Illit silarsuaq nutaaq misigiumaarpiuk?

’Inunnut pitsaanerpaassaaq inuunertik atorunikku nuannaarlutik inuulluataarlutillu. Inuk nerillunilu imersinnaappat suleruloornerminilu tamani pilluarluni inuuppat tamannaavortaaq Guutip tunissutaa.’ — NALUNAAJAASUP OQAASII 3:12, 13.

1. Suup siunissamut isumalluarnissatsinnut pissutissaqartippaatigut?

INUPPASSUIT isumaqarput Guuti ajugaqanngitsoq sukannersuullunilu naakkittaatsuusoq. Qulaanili allassimasoq oqaasianit isumassarsiarititaasumit Biibilimit issuagaavoq. Tamanna naleqqulluartuuvoq tannaammat ’Guuti pilluartoq’ siuaasavullu siulliit paratiisimi najugaqartimmagit. (1 Timûtiuse 1:11; 1 Moses 2:7-9) Siunissaq Guutip innuttaminut neriorsuutigisaa misissorutsigu, tupigusutigissanngilarput pissutsit soraajuitsumik nuannaarutigineqartussat pineqarmata.

2. Qilanaarisinnaasatta ilaat taakkit.

² Allaaserisap siuliani Biibilip oqariartaatsip ’qilaat nutaat nunalu nutaaq’-p eqqartornerisa sisamat ilaat pingasut sammereerpavut. (Jesaja 65:17) Siulittuutit tatiginartut taakkua ilaat sarĸúmersitat 21:1-imi allassimavoq. Versini tulliuttuni allaatigineqarpoq Guuti ajugaqanngitsoq qanoq ililluni nunarsuarmi pitsaanerulluinnartumut allanngortitsiumaartoq. Inuit aliasunnermit qullii isaannit allarterumaarpai. utoqqalinermit, napparsimanermit ajunaarnermilluunniit toqusoqarunnaassaaq. Aliasunneq, nillianeq anniarnerlu atorunnaassapput. Siunissaq nuannerluinnartoq! Piviusunngornissaali ilumut qulakkeersinnaavarput? Tamannalu maannakkut inuunitsinnut qanoq sunniuteqartariaqarpa?

Tatiginninnissamut pissutissaqarluarpugut

3. Sooq Biibilip siunissaq pillugu neriorsuutai tatigisinnaavavut?

³ Malugiuk sarĸúmersitat 21:5-imi qanoq nangilluni allassimasoq. Tassani issuarneqarpoq Guuti qilammi issiavissaarsuarmini issiasoq ima oqartoq: ’Ata, suut tamaasa nutaanngortippakka.’ Neriorsuut Guutimeersoq taanna namminersulernermik nalunaarummit sumilluunniit pitsaaneruvoq, inatsisilianit sunilluunniit pitsaaneruvoq imaluunniit inuit siunissamut neriulluaatigisartagaannit sunilluunniit pitsaaneruvoq. Allassimaffimmi tassani neriorsuutigineqartoq tutsuiginarluinnarpoq Guutimit Biibilimi ’sallusinnaanngitsutut’ oqaatigineqartumit oqaaserineqarami. (Títuse 1:2) Paasinarpoq ilaat isumaqarpata allamik iliuuseqarnata tatiginnilluta siunissamut neriorsuutit taakku nuannaarutigiinnartariaqarivut. Tamannali naammagiinnartariaqanngilarput. Siunissaq pillugu suli ilinniarsinnaavugut.

4, 5. Siulittuutit Biibilimeersut misissoriikkatta suut siunissamut tatiginninnerulersissinnaavaatigut?

⁴ Eqqarsaatigilaariakkit allaaserisap siuliani ilikkakkavut Biibilip qilassanik nutaamik nunassamillu nutaamik neriorsuutai pillugit. Aaqqissuussineq nutaaq taamaattoq Esajasip siulittuutigisimavaa, siulittuutaalu eqquuppoq juutit nunaminnut utermata pallorfiginninnerlu ilumoortoq pilerseqqillugu. (Esra 1:1-3; 2:1, 2; 3:12, 13) Esajasilli siulittuutaa taassuminngaannaq kinguneqarlunilu taassumunngaannaq tikkuussiva? Naamik, taamaanngilaq. Siulittuutaa annerusumik eqquukkumaarpoq siunissami ungasissumi. Tamanna nalujunnaarparput 2 Pîtruse 3:13-imi aammalu sarĸúmersitat 21:1-5-mi atuakkavut tunngavigalugit. Allassimaffiit taakku  tikkuussipput ’qilannut nutaanut nunamullu nutaamut’ nunarsuaq tamakkerlugu kristumiunut iluaqutaajumaartunut.

⁵ Soorlu eqqaaneqareersoq oqariartaaseq ’qilak nutaaq nunalu nutaaq’ Biibilimi sisamariarluni atorneqarpoq. Oqaatsip atorneqarfii pingasut takoreerpavut qiimmaallannartunillu paasisaqarfigalugit. Biibilimi erseqqissumik siulittuutigineqarpoq Guutip peerumaarai ajussuseq naalliunnernullu pissutaasut allat, aaqqissuussinissamilu nutaami inuit pilluaatissikkumaarai.

6. ’Qilak nutaaq nunalu nutaaq’ pillugit siulittuutit sisamaat sumik imaqarpa?

⁶ Maanna oqaatsip ’qilak nutaaq nunalu nutaaq’-p Jesaja 66:22-24-imi eqqartorneqarnera misissoriartigu. Ima allassimasoqarpoq: „’Soorlumi qilak nunalu nutaanngortitassakka kiinnama saani atajumaartut,’ oqarpoq [Jehova], ’taamatut kinguaassasi atisilu atassapput.’ ’Qaammanniffiillu sabbatillu tamaasa inuit tamarmik aggertassapput kiinnama saanut palloriarlutik,’ oqarpoq [Jehova], ’aniumaarpullu takuniarlugit angutit uannik tunussisimasut timaat toqungasut, quperlui taakkuninnga nerisut toqussanngimmata innerallu taakkuninnga ikikkaasoq qamissanani; maajunnarumaarpullu inunnut tamanut.’“

7. Sooq ilimagisinnaavarput Jesaja 66:22-24 aamma siunissami eqquutitikkumaartoq?

⁷ Siulittuut taanna annerusumik eqquukkumaarpoq, juutit nunaminnut uteqqissimasut akornanni eqquunnermi saniatigut. Tamanna pisussaassaaq Pîtrusip agdlagaisa áipaisa sarĸúmersitat-llu allanneqarnerata kingunerujussuatigut, tassani ’qilak nutaq nunalu nutaaq’ piumaartut allaatigineqarmata. Inernileereernivut tunngavigalugit qilanaarutigisinnaavarput aaqqissuussinissap nutaap tamatuma tamakkiisumik piviusunngornissaa alutornassaqisoq. Pissutsit nuannaruutigisinnaasassatta ilaat eqqarsaatigeriartigik

8, 9. (a) Guutip kiffai qanoq ilillutik ’atajumaarpat’? (b) Jehovap kiffaasa ’qaammanniffiit sabbatillu tamaasa’ pallorfiginninnissaannik siulittuut qanoq ililluni eqquutissava?

⁸ sarĸúmersitat 21:4-mi neriorsuutigineqarpoq toqup peqarunnaarnissaa. Jesaja 66-imi oqaatsit tamatumunnga naapertuupput. Vers 22-mi paasivarput Jehovap nalunngikkaa „qilak nunalu nutaat” sivikitsuinnaanngitsumik atassasut, atajuassasulli. Taamatuttaaq Jehovap kiffai inuusinnaatitaassapput; kiinaata saani „atajumaarput”. Tamanna aamma erserpoq Guutip innuttaminut iliuuserisareersimasaanit. Kristumiut ilumoortut naakkittaatsumik malersugaasarsimapput pimoorutivillugulu nungutinniarneqartarsimallutik. (Juánase 16:2; apustilit suliait 8:1) Akeqqalli pissaanilissuit, soorlu Romamiut kaasariat Nero nazistillu siulersortaat Adolf Hitler, Jehovamut  lumoortunik taassuma aqqanik atuisunik nungutitsisinnaasimanngillat. Guutip ilagiissini qinikkat ullumimut atatippai, qularinngilarpullu atatittuarumaarai.

⁹ Taamatuttaaq Guutimut ilumoortut nunamut nutaamut ilaajumaartussat, tassa silarsuarmi nutaami inuiaqatigiit ilumoortumik guutisiortut, atajumaarput ataatsimoorlutik inuttullu ataasiakkaarlutik. Pallorfiginninneq tamanna nalaatsornerinnaassanngilaq, taamungaannaq pinerussanngilaq. Guutip inatsisaasigut Mosesikkoortumik Israelikkunnut tunniunneqartutigut piumasarineqarpoq qaammatit tamaasa pallorfiginninneq malunnartinniarneqartassasoq, qaammanniffiani, aammalu sapaatit-akunneri tamaasa sapaatikkut. (3 Moses 24:5-9; 4 Moses 10:10; 28:9, 10; 2 Israelikkut 2:4) Taamaattumik vers 23-ip siulittuutigaa aalajangersimasumik aammalu ataavartumik Guuti ilumoortoq guutisiorfigineqarumaartoq, sapaatit-akunneri tamaasa qaammatillu tamaasa. Taamanikkussamut guuteqarumannginneq upperisarsiornikkullu ilumoortuusaarneq ullumikkut nalinginnaaqisut qanganngorsimassapput. Tamatumalu taartigisaanik ’inuit tamarmik aggertassapput Jehovap kiinaata saanut palloriartorlutik’.

10. Sooq qularissanngilarput silarsuassami nutaami guutiitsoqassanngitsoq?

¹⁰ Jesaja 66:24-imi erseqqissarneqarpoq nunami nutaami eqqissineq naapertuilluarnerlu navianartorsiortinneqanngisaannassasut. Inuit iluaatsut imaluunniit ’guutiitsut’ eqqissinermik naapertuilluarnermillu aseruisinnaatitaassanngillat. 2 Pîtruse 3:7-mi allassimasoq eqqaajuk, tassa ’ulloq iluaatsut eqqartuutiffissaat aserorfissaallu’ siunissatsinniittoq. Erseqqissartariaqarpoq ’iluaatsut’ ullormi eqqartuussivissami ajunaarumaarmata. Pisuussuteqanngitsut suneqarnavianngillat, naak nunarsuatsinni sorsuttoqaraangat pisuussuteqanngitsut eqqorneqarajunnerusartut, immaqa sakkutuujunngitsut sakkutuunit amerlanerit toqutaasarlutik. Tamatumunnga akerliusumik silarsuup Eqqartuussisua naapertuilluartoq neriorsuivoq ullussani tassaajumaartoq inuit ’iluaatsut aserorfissaat’.

11. Esajas naapertorlugu Guutimit taassuminnga pallorfiginninnermit tunussisimasut tamarmik qanoq pissappat?

¹¹ Iluartut, imaluunniit naapertuilluartut, annakkumaartut paasiumaarpaat Guutip oqaasii siulittuutaasut eqqortuusut. Js 66 Versi 24-mi siulittuutigineqarpoq ’angutit Jehovamut tunussisimasut timaat toqungasut’ eqqartuussineranut uppernarsaataajumaartut. Esajasip oqariartaasia quarsaarnarsinnaasarpoq, kisiannili ilumoortumik oqassagaanni oqaluttuarisaanermi pisimasut piviusut atuinnarpai. Jerusalemitoqqap qarmarsuisa silataanni eqqaaveqartarpoq, ilaannikkut pinerlussimasut toqutat timaat tamakkununnga iginneqartarlutik. * Quperlut innerlu eqqakkanik inuillu torersumik ilineqarnissaminnut  naleqquttuutinneqanngitsut timaannik nungutsipallassinnaasarput. Tamakkuuku Esajasip assersuutitut atorai ersersinniarlugu Jehovap aqqutigeqqusaminik naapertuilluartunik unioqqutitsisut eqqartuukkumaarlugit.

Jehovap neriorsuutigisai

12. Esajas aamma silarsuassami nutaami inuuneq pillugu sumik paasissutissiiva?

¹² Eqqaamajuk sarĸúmersitat 21:4 sammigatsigu eqqaagatsigik aaqqissuussinissami nutaami suut piusssannginnersut. Taava immaqa eqqarsarputit taamanikkussamut suut piussanersut. Inuuneq qanormitaava issava? Tamanna aamma Jesajap allagai-ni kapitali 65-imi oqaatigineqarpoq. Tassani siulittuutigineqarpoq Jehovamit akuerineqassagutta inuusinnaatitaassaguttalu, aammalu ‘qilaat nutaat nunalu nutaaq’ pilersivippagit, pissutsit suut atorumaarnerivut. Nunami nutaassami naassaanngitsumik inuunissamut pilluaqqusaasut utoqqalissanngillat naggataatigullu toqussanatik. Jesaja 65:20-mi assingusumik neriorsorneqarpugut: „Meeqqanik meeraaraanerminni toqusoqassaassaaq utoqqarsuarnilluunniit ukiussaminnik naammatsitsisimanngitsunik. Inuusunnerpaalluni toqusoq hundredenillu ukioqalinngitsoortoq perloqqusatut isigineqassaaq.“

13. Jesaja 65:20-mi toqqissisimaneq pillugu sumik neriorsuuteqarpa?

¹³ Tamanna Esajasip nunaqqataanut siullermik eqquummat isumaqarpoq nunami meeqqat isumannaatsumiittut. Akeqqanik nunamut isaasoqassanngilaq, Babylonimiut qanga taamaaliorsimanerattut — tassa meeraaqqanik toqoraallutik aallarussillutilluunniit imaluunniit angutit piukkunnarseruttortut toqorarlugit. (2 Israelikkut 36:17, 20) Taamatuttaaq inuit silarsuarmi nutaassami isumannaatsumiissapput toqqissisimallutillu; inuunertik nuannaarutigisinnaassavaat. Pikitsitsiniartut, Guutimut ajortuliortuliorniartut, inuuginnarsinnaatitaassanngillat. Taamaaliortut Jehovap peersissavai. Pikitsitsisoq allaat hundredenik ukioqaraluaruni ’inuusunnerpaasutut’ toqussaaq — tassa inuunermut naassaanngitsumut angusinnaagaluaanut naleqqiullugu sivikitsuinnarmik inuussaaq. — 1 Timûtiuse 1:19, 20; 2 Timûtiuse 2:16-19.

14, 15. Jesaja 65:21, 22-mi suliassat imaqarluartut suut neriorsuutigineqarpat?

¹⁴ Piaaraluni ajortuliortup taamatut peersitaanissaa iserfiginerunagu Esajasip allaaseraa silarsuarmi nutaami pissutsit qanoq ikkumaarnerat. Takorlooriaruk illit nammineq ilaquttavillu pilluaqqussutit Esajasip allaaserisai inuulluaatigigisi. Immaqa eqqarsaatigeqqaakkat tassa qanoq ittumik najugaqassanersusi. Tamanna Esajasip vers 21-imi 22-milu sammivaa, tassani ima siulittuigami: „Illuliorumaarput namminneq inigisassaminnik  viinnequtinillu ikkussuillutik inerititai nerisassaminnik. Illuliussanngillat allamiut inissaannik ikkussuissanatillu takornartat nerisassaannik, innuttakka orpiup pisoqaassusiatut utoqqaatigilissammata qinikkamalu nerissammatigit namminneq suliamik inerititaat.“

¹⁵ Illuliorneq suli nalugukku naatsiiveqarsimanngisaannarlutillu, siulittuutip paasitikkunarpaatit nutaanik ilinniagaqartariaqartutit. Aammami immaqa paasisimasalinnit pikkorissunit ilinniartinneqarumassaatit, assersuutigalugu sanilinnit ikiorneqarlutit! Esajasip oqaatiginngilaa illutaassat matuinnartakkanik igalaarsuaqassanersoq kiattup anoraanngua suialaartillugu inuulluataarutiginiassagakku, imaluunniit matoqqasunik igalaaminertalinnik igalaaqassanersoq ukiup allanngorarnerinik isiginnaarfigisinnaasannik. Illut uingasumik qaliaqassanerluni sialuk aputillu aannera kuuttarniassammat? Imaluunniit najugarisavit silaa imaassanerluni toqqissumik qaliaqarnissaq pitsaanerussalluni — soorlu Kangiani qiterlermi; qaliaq toqqissoq ilaquttat ikinngutillu ilagalugit nuannersumik nereqatigiiffiusinnaasoq? — 5 Moses 22:8; Nehemja 8:16.

16. Sooq ilimagisinnaavarput silarsuassami nutaami pisariaqartitavut tamarmik matussuserneqassasut?

¹⁶ Tamakku eqqarsaatigalugit nuanneraluartoq allap qulakkeernissaa immaqa pingaarneruvoq. Suna? Tassa siullermik nammineq illutaarnissarput. Nammineq illussatsinnik — ullumikkutuunngitsoq, immaqa ilungersuullugu illulioriarluni allamut atugassanngorlugu. Js 65 Versi 21-imi aamma allassimavoq ’viinnequtinik ikkussuissasugut inerititai nerisassatsinnik’. Tamanna erseqqippoq ima isumaqartoq: Ilungersornivut iluarusungaarnermik kinguneqartassasut suliattalu inerititai nuannaarutigisinnaasassagivut. Taamaaliorsinnaassaagullu sivisuumik inuulluta — ’orpiup pisoqaassusiatut’ allaat. Aap, ’suut tamarmik’ nutaanngortinneqassapput! — Tussiaat 92:13-15.

17. Neriorsuut suna ingammik angajoqqaat kajumississutigisinnaavaat?

¹⁷ Qitornaqaruit oqaatsit tulliuttut ilinnut immikkut isumaqassapput: „Sulilussinnassanngillat qitorniussanatillu tassanngaannaq toqusussanik, tassaagamik kinguaariit pilluaqqusakka qitornaminnik najorteqartussanngorlugit. Suli torlunngitsut akiumaarpakka sulilu qinulinngitsut tusassallugit.“ (Jesaja 65:23, 24) Ilaasa misigisimavaat ’qitorniunneq tassanngaannaq toqusussamik’. Ajornartorsiutit meeqqat naapittagaat tamaasa taagorniassallugit maanna pissutissaqanngilaq. Tamattalu takusareerpavut angajoqqaat suliffimminni qaffakkiartornissaminnik, sunngiffimminni soqutigisaminnik aliikkutassaminnillu ima ulapputeqartigisut meeqqatik piffissaqarfiginagit nukissaqarfiginagilluunniit. Ataatarpulli Jehova taamaanngilaq. Uani qularutissaanngitsumik neriorsuivoq tusarumalluta pisariaqartitatsinnillu tuniumalluta, tamanna suli qinnutiginngikkippulluunniit.

18. Sooq silarsuassami nutaami uumasut nuannaarutigisinnaassavavut?

¹⁸ Guutip sunik tamanik nutaanngortitsinissaa eqqarsaatigigukku vers 25-imi Guutip oqaasiani siulittuutaasumi oqaatigineqartoq takorloornialaariaruk: „Amaroq savaararlu ivigartoqatigiissapput, løverlu karriarnikutorumaarpoq ussittut; kisianni pulateriaarsuup issoq nerisarissavaa. Ajortumik iliortoqarnanilu ajoqusiisoqassanngilaq qaqqanni illernartumi tamarmi, oqarpoq [Jehova].“ (Jesaja 65:25) Eqqumiitsuliortut amerlasuut oqaatsinit taakkunannga isumassarsisarsimapput. Oqaatsilli taakku tassaaginnanngillat oqaatsit kusanartuliat imaluunniit takorluugaannaat. Ullut ilaanni piviusunngussapput. Inuit akornanni eqqissineqarumaarpoq, aammali inuit uumasullu akornanni. Maannakkut biologit uumasulerituullu amerlasuut inuunermik annersaat atortarpaat uumasut ilaannamininngui, immaqaluunniimmi uumasoqatigiikkuutaat ataasiinnaat, misissugaralugit. Eqqarsaatigeriaruk qanoq periarfissaqartigilerumaartugut uumasunik ilinniarnissatsinnut uumasut ersigiunnaarpatigut! Taava orpippassuarni qaqqaniluunniit timmissat uumasullu qanillissinnaassavavut — misissorlugillu, ilinniarfigalugit nuannaarutigalugillu. (Job 12:7-9) Toqqissisimalluinnarsinnaassaagut; inunnit uumasunilluunniit navianartoqassanngilaq. Jehova oqarpoq: „Ajortumik iliortoqarnanilu ajoqusiisoqassanngilaq qaqqanni  illernartumi tamarmi.“ Ullumikkut takusartakkatsinnit misigisartakkatsinnillu allaanerujussuanngussaaq!

19, 20. Guutip innuttai sutigut ullumikkut inunnit amerlanernit allaanerulluinnarpat?

¹⁹ Siusinnerusukkut eqqaavarput inuit eqqortumik siulittuisinnaanngitsut naak ukiunut tuusintilinnut nutaanut ikaarsaalerneq ernumanernik ilaqartinneqaraluaqisoq. Inuup kialuunniit naluaa siunissami qanoq pisoqarumaarnersoq. Taamaattumik inuppassuit isumakulupput allaallu paatsiveerusimaarlutik. Canadami universitetit ilaanni pisortaasoq Peter Emberley ungasinngitsukkut allappoq inersimasut ilarpassui ’kiisami isummertariaqalersitaasimasut inuunermi apeqqutinut pingaaruteqartunut: Kinaavunga? Suna anguniarpara? Kinguaariinnut tulliuttunut sumik kingornussassaqartitsivunga? Inuunermik qiteqqunneranni ilungersorput torersumik inuuneqalerniarlutik siunertaalu paasiniarlugu.’

²⁰ Paasinarpoq inuppassuit taamaammata. Immaqa inuunertik pissarsiffiginiarlugu sukisaarsartarput imaluunniit pissanganartorsiortarlutik. Naluaalli siunissami qanoq pisoqassanersoq, taakkununngami inuuneq siunertaqanngitsutut ippoq. Inuuneq isumaqartinngilaat, torersivissaqanngitsutut isigaat ilumoortumillu siunertaqanngitsutut. Misileriarulli illit inuunerit taakkua inuunerannut sanilliunniarlugu eqqartoriikkavut tunngavigalugit. Nalunngilammi silarsuassami nutaami Jehovap uatsinnut neriorsuutigisimasaani avatangiisivut qimerloorsinnaassagivut qamanngalu pisumik oqarluta: Aap, Guutip ilumut suut tamaasa nutaanngortissimavai. Nuannaarluinnassaagut!

21. Jesaja 65:25 aamma Jesaja 11:9 qanoq imminnut attuumassuteqarpat?

²¹ Sapiiserpallaarnerunngilaq immitsinnut takorluussalluta Jehovap silarsuaani nutaami ittugut. Guutip ilungersorluni kajumissaarpaatigut maanna sallusuissummi pallorfigeqqulluni sulissutigeqqullugulu inuunissamut naleqqussarnissarput, silarsuarmi „ajortumik iliortoqarnanilu ajoqusiisoqarfiunngitsumi, Jehovap qaqqaani illernartumi tamarmi“. (Jesaja 65:25) Nalunngiliulli Esajas allakkamini siusinnerusukkut assingusumik eqqartuimmat. Tassani eqqaavaa silarsuarmik nutaamik nuannaarutiginnissanersugut aalajangiinissamut pingaaruteqartoq. Jesaja 11:9-mi ima allassimasoqarpoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“

22. Siulittuutinik Biibilimeersunik sisamanik taakkuninnga misissuinitta iliuuseqarnissamut sumut killittariaqarpaatigut?

²² Aap, pingaaruteqartoq tassaavoq ’Jehovamik ilisarsineq’. Guutip suut tamaasa nutaanngortippagit nunarsuarmiikkumaartussat Guuti taassumalu piumasaa pillugu eqqorluartumik ilisimasaqassapput. Tassaaginnanngilaq uumasunik ilisimasaqarneq. Aamma Guutip oqaasia isumassarsiarititaasoq misissoqqissaartariaqarparput. Eqqarsaatigiinnaruk ’qilannik nutaanik nunamillu nutaamik’ siulittuutit sisamaannaat misissornerisigut qanoq paasisaqarsimatigisugut. (Jesaja 65:17; 66:22; 2 Pîtruse 3:13; sarĸúmersitat 21:1) Pissutissaqarluarpugut ullut tamaasa Biibilimi atuartarnissatsinnut. Illit taamaaliortarpit? Taamaanngippat Guutip uatsinnut ilisimaqqusaanik ullut tamaasa atuartalerniarlutit suut allanngortissinnaassavigit? Paasissavat silarsuassaq nutaaq erinigiinnarnagu aamma maannakkorpiaq nuannaarnerulissasutit, soorluttaaq tussiaasiortoq taamaaliorsimasoq. — Tussiaat 1:1, 2. (wE 15/4 2000)

[Quppernerup ataani ilanngussaq]

Qanoq akissavigit?

• Jesaja 66:22-24-p aatsaat siunissami eqquuttussaaneranik isumarput sumik tunngaveqarpa?

• Siulittuutini Jesaja 66:22-24-mi aamma Jesaja 65:20-25-mi allassimasuni annikitsualuit pingaartumik suut eqquunnissaat pingaartumik qilanaaraagit?

• Suut pissutigalugit siunissaq isumalluarfigisinnaavarput?

[Atuaqqissaarnermi apeqqutit]

[Qupp. 15-mi assiliartaq]

Esajasip, Peterip Johannesillu ’qilannut nutaanut nunamullu nutaamut’ ilisarnaataasussat siulittuutigaat