Katittorsiornerit nuannersut Jehovamut ataqqinaataasut

Welsh Aamma Elthea Sowetomi Afrika Kujallermi 1985-Mi Katipput. Katikkamik Assitik Ilaannikkut Isiginnaarlugit Panitsillu, Zinzi, Ulloq Nuannersoq Misigeqqittarpaat. Paniata Qaaqqusat Kikkuuneri Taagorlugit Assini Tikkuartorneri Nuannaraa Ingammik Anaanami Katittup Assii.

SIULLERMIK Sowetomi katersortarfimmi katittunut oqalugiartoqarpoq. Taava erinarsoqatigiit kristumiut inuusuttut Jehovamut unnersiutiginnissumik tulleeriillutik erinarsorput. Qaaqqusallu nereqatigiipput Naalagaaffiup erinarsuutaanik nipikitsumik nipilersortoqartillugu. Imigassamik aalakoornartumik sassaallertoqarnanilu qitittoqarnanilu nipituumik nipilersortoqanngilaq. Qaqqusat katerisimaarnertik katittunillu pilluaqqusinertik nuannaarutigiinnarpaat. Katittorsiorneq tamarmi nalunaaquttap-akunnerinik pingasunik sivisussuseqarpoq. „Katittorsiorneruvoq nuannaarutigalugu eqqaasartagassara,“ Raymond, kristumiu utoqqaanertaq, oqaluttuarpoq.

Welsh Elthealu katikkamik Napasuliaq Alapernaarsuiffiup Peqatigiiffiata Afrika Kujallermi immikkoortortaqarfiani nammineq piumassutsiminnik sulipput. Ikittuinnarnik qaaqqussinissamut akissaqarput. Kristumiut ilaat piffissartik tamaat kiffartorunnaarsimapput nalinginnaasumillu suliffeqalerlutik kusanartorsuarmik katittorsiorniarlutik. Welsh Elthealu pilimanianngitsumik katissimanertik peqqissimassutiginngilaat, Zinzimmi inunngornissaata tungaanut piffissartik tamaat Jehovamut kiffartuunnarsinnaasimapput.

Kisiannimi katittut Peqatigiiffiup saqqummersitaaniunngitsoq nipilersuuteqarusuppata qititsitserusuppatalu? Immaqa viinnimik aalakoornartunilluunniit allanik sassaallerniarput. Immaqa katittorsiornersuarmut alutornangaartumut akissaqarput. Katinnerminni Guutip kiffaanut naleqqutumik nuannersuunissaa qanoq ilillutik qulakkeersinnaavaat? Apeqqutit taamaattut eqqarsaatigeqqissaartariaqarput, Biibilimimi ima peqquneqarpugut: ’Nerigaangassiluunniit imeraangassiluunniit sugaangassiluunniit Guuti naalannarseqqullugu pisartaannaritsi.’ — 1 Korintumiut 10:31.

Ernguttoqartinnaveersaaruk

Katinnerup nuannersuunnginnissaa takorlooruminaappoq. Ingasaassisoortoqarsinnaavorli nalliuttorsiorneq piumasaarsortumik erngunninngorluni. Nalinginnaasumik katittorsiornerni Guutimut ataqqinaataajaasunik pisoqartarpoq. Assersuutigalugu aalakoortoqartarnera qaqutigoortuunngilaq. Alianaraluartumik kristumiut katinneranni aamma taamaattoqartarsimavoq.

Biibilimi mianersoqqussuteqarpoq ’imigassaq silaarunnartoq perpaluttartorsuusoq’. (ússatit 20:1) Aalakoornartup inuk ataaseq nipiliortissinnaammagu amerlasuut imerpallaarpata qanoq pisoqarsinnaasoq takorloorneqarsinnaavoq. Katerisimaarnerni taamaattuni ’imerajunneq, nerivallaarneq allallu taamaattut periaannaapput, Biibilimi ’uinngup suliaanik’ taaneqartunik. Taamaaliortoq peqqissiminngitsoq kinaluunniit Guutip naalagaaffiata naalakkersuinerata ataani naassaanngitsumik inuunissamut naleqqutinngilaq. — Galâsiamiut 5:19-21.

 Inuusuttut aalakuualaartut ingerlaaqatigiit erinarsortut, qitittut nipilersortullu oqaatiginiarlugit „nerivallaarnermut“ griikerit oqaasiat atorneqartarpoq. Katittorsiornermi imigassaq killeqanngippat, nipituumik nipilersortoqarpat imminullu naalakkersorsinnaanani qitittoqarpat katittorsiorneq erngunninnguuteratarsinnaavoq. Taamaattoqarpat sanngiitsut uinngup suliai, soorlu ’uersaaneq mingunartuliornerlu kanngunarliornerlu’ ussernartorsiorfigisinnaavaat ’kamannertillu’ nununngitsoorsinnaallugu. Uinngup suliaasa taamaattut kristumiutut katittorsiorneq nuannerunnaartinnginniassammassuk qanoq iliortoqarsinnaava? Apeqqut tamanna akiniarlugu katittorsiorneq aalajangersimasoq pillugu Biibilimi allassimasut misissornerusinnaavavut.

Katittorsiorneq Jesusip najuuffigisaa

Jesus ajoqersukkanilu Galilæami Kanami katittunut qaaqqusaasimapput. Katittorsioqataapput allaallu nuannersuunissaanut Jesus taperseeqataalluni. Viinni nungummat pitsaanerpaamik tupinnartuliornikkut viinniliorpoq. Qularnanngitsumik viinni sinneruttoq katittup qujamasuttup ilaqutaasalu pisariaqartitaat piffissangaatsiami matussutississimassavaat. — Juánase 2:3-11.

Katittorsiorneq Jesusip najuuffigisaa arlalittigut ilinniarfigisinnaavarput. Siullermik Jesus ajoqersugaalu katittorsortunut qaaqqusaanatik agginngillat. Erseqqissumik Biibilimi allassimavoq qaaqqusaasut. (Juánase 2:1, 2) Katittorsiornernik assersuusiani marlunni najuuttut qaaqqusaanerarlugit Jesus arlaleriarluni oqarpoq. — Matîuse 22:2-4, 8, 9; Lúkarse 14:8-10.

Nunat ilaanni nunaqqatit tamarmik, qaaqqusaagaluarunik qaaqqusaanngikkaluarunilluunniit, katittorsiornernut tikilluaqqusaasarput. Aningaasatigulli ajornartorsiortitsilersinnaavoq. Aappassiariit pissakitsut qaaqqusat amerlassusii killeqanngitsut nerisassaqarnissaat imigassaqarnissaallu qulakkeerniarunikkik akiligassarpassuaqalersinnaapput. Kristumiut aappariit qaaqqusanut amerlassusii aalajangersimasunut minnerusumik qaaqqusiniarpata, qatanngutit qaaqqusaanngitsut paasinnittuusariaqarput aalajangigaallu ataqqillugu. Afrika Kujallermi Cape Townimi angut katinnerminut 200-nik qaaqqusisimavoq. 600-ulli aggersimapput, nerisassallu nungupallapput. Qaaqquneqaratik aggersunut ilaapput takornariat bussersut weekendimi katinnerup nalaani nalaatsornerinnakkut Cape Townimiittut. Takornariartitsisoq nuliartaamut ungasissumik eqqarliuvoq, isumaqarlunilu katittut apereqqaarnagit angalaqatigiit ilagisinnaallugit.

Katittunik ilasseqatigiinnermut tamarmik tikilluaqqusaasut erseqqissumik oqaatigineqarsimanngippat, kristumiu ilumoortoq aggissanngilaq nerisassallu qaaqqusanut naatsorsuussaasut nerillugit. Qaaqqusaanatik ilaarusuttut imminnut ima aperisariaqarput: ’Ilaaguma katerngaanut asanninngitsuliussaanga? Pisarissersuutaassaanga nuannaarnerlu akornusissavara?’ Kristumiu paasinnittuusoq qaaqqusaannginnini ugguutiginagu ajuallaatiginagulu katittut pilluaqqussummik asannittumik nassissavai Jehovallu pilluaqqusineranik kissaallugit. Aamma aappariit katittorsiorneranni tunissummik nassinnerisigut nuannaartissinnaavai. — Nalunaajaasup oqaasii 7:9; Evfisumiut 4:28.

Kina akisussaava?

Afrikap ilaani ilaqutaasut utoqqaanerusut katittorsiornermik aaqqissuussisuusarneri ileqquuvoq. Katittut ilaasa tamanna qujamasuutigaat aningaasammi tungaatigut akisussaatittanngimmatik. Immaqa aamma isumaqarput katittorsiornerup qanoq ingerlaneranik akisussaaffiiartaraatik. Aappassiariillu eqqarlimik ajunngitsumik isumaqarlutik ikiuiniarnerinik sunilluunniit akuersitinnatik inuttut kissaatimik ataqqineqarnissaat qulakkeertariaqarpaat.

Jesus Guutip ernerigaluaraani ’qilammit aqqartoq’, Kanami katittorsiornermi pisunut amerlanernut aqutsilersimannginnguatsiarpoq aalajangeeqataasimagunarnanilu. (Juánase 6:41) Allamik ‘nerliiassalerisartoqartoq’ Biibilimi  oqaluttuarineqarpoq. (Juánase 2:8) Nerliiassalerisartoq ilaqutariinni qullersaalersumut, uitaamut, akisussaasarpoq. — Juánase 2:9, 10.

Eqqarliusut kristumiut ilaqutanngorlaat qullersaata Guutimit oqartussaatitaanera ataqqisariaqarpaat. (Kulorsamiut 3:18-20) Katinnermini susoqarneranut akisussaasariaqarpoq. Soorunami ingasaassisariaqanngilaq, ajornanngippallu nuliartaami, angajoqqaami sakimilu kissaataat naatsorsuutigisariaqarpai. Eqqarlit katittut kissaataannut akerliusumik piareersaaniarpata aappariit inussuarnersumik ikiuiniartoq itigartittariaqarsinnaavaat, pilimanianngitsumillu katittorsiornertik nammineq akilerlugu. Taamaalillutik kingusinnerusukkut eqqaasartagassaminnik nuanniilliunnginnissartik pinngitsoortissinnaavaat. Assersuutigalugu Afrikami katittorsiortuni eqqarlip uppinngitsup oqalugiartunik tulleriiaarisup (toastmasterip) ilaqutariit siuaasai toqoreersimasut skåleerutigai.

Ilaannikkut katittut katittorsiorneq suli naanngitsoq aallartarput. Taamaaliortoqarpat uitaap Biibilimi najoqqutassiat ataqqineqarnissaannik akisussaasumik katittorsiornerullu piffissami silatusaartumi naanissaanik isumaginnittariaqarpoq.

Pilersaarusioqqissaarneq oqimaaqatigiissaarinerlu

Katittuni Jesusip najuuffigisaani nerisassaqarluarsimagunarpoq, Biibilimmi katittorsiortunut neriartoqquneqarnermik taavaa. Oqaatigineqareersutut naammattumik viinneqarsimavoq. Qularnanngilaq ileqqorissumik qitittoqarsimassasoq naleqquttumillu nipilersortoqarsimassasoq juutimmi qassimiuaarneranni tamanna nalinginnaavoq. Assersuutigalugu ernermik tammaraluartumik Jesusip assersuusiaani ilisimaneqarluartumi erserpoq. Oqaluttuami tamatumani ataataq pisooq erni tammaraluartoq utermat nuannaarnermik ima oqarpoq: ’Nerillutalu tipaatsutta.’ Jesus naapertorlugu pisimasumi tamatumani qitittoqarpoq nipilersortoqarlunilu. — Lúkarse 15:23, 25.

Kanamili katittorsiornermut tunngatillugu nipilersortoqarnera qitittoqarneraluunniit Biibilimi eqqaaneqanngimmat soqutiginarpoq. Katittorsiornerit pillugit Biibilimi oqaluttuani sumiluunniit qitinneq eqqaaneqanngilaq. Biibilip nalaani Guutip kiffaasa ilumoortut akornanni katittorsiornerni qitinneq pingaarnerpaajugunanngilaq malunnarnerpaajunaniluunniit. Tamanna qanoq ilinniarfigisinnaavarput?

Afrikami kristumiut ilaasa katittorsiornerini sakkortusaaterujussuit atorneqartarput. Nipilersuut ima nipitutigisinnaavoq allaat nalinginnaasumik  oqaloqatigiittoqarsinnaanani. Ilaannikkut nerisassat naammanneq ajorput, qitittulli noqissinnaanngeriaannaasut amigaataaneq ajorlutik. Pissutsini taamaattuni katittorsiorneq erngutiitigaluni qittannissamut utoqqatsissutaasinnaavoq. Aammattaaq nipituumik nipilersornerup perulluliortut takornartat qaaqqusaanatik aggersut ussagartikkajuppai.

Katittorsiornernik Biibilip oqaluttuaani nipilersuutit qitinnerillu pingaartinneqanngillat. Jehovamut ataqqinaataasumik katittorsiornissamik pilersaarusiornermi tamanna ilaasariaqanngila? Afrika Kujallermi kristumiut inuusuttut katittunut qaaqqutissimasut, qanittukkut katittorsiornernut arlalinnut piareersarnermi, qitittaatsit piuminaatsut nalunaaquttap-akunnerpassui sungiusarsimavaat. Qaammatini arlalinni piffissaq sivisuallaartoq tamatumunnga atorpaat. Kristumiulli ‘ullunik piginnaaffiusunik asiutitsinaveersaartussaapput’, ’iluarnerusunut’, soorlu oqaluussinermut, nammineq atuaqqissaarnermut kristumiullu ataatsimiinnerinut najuunnernut piffissaqarumallutik. — Evfisumiut 5:16; Filípimiut 1:10.

Kanami katittorsiornermi Jesusip viinniliaata annertussusia eqqarsaatigalugu alutornartumik katittorsiornerugunarpoq. Taamaakkaluartoq qularutigissanngilarput katittorsiornerunngitsoq nipiliorfiusoq qaaqqusat imerlutik aalakuulersut soorlu juutit katittorsiornerisa ilaanni taamaassimasoq. (Juánase 2:10) Sooq qularutigissanngilarput? Jesus ilaammat. Ilagisartakkat ajortut pillugit Guutip inatsisaanik allanit tamanit Jesus malinneqqissaarneruvoq: „Ilaginiaqinagit viinnisorpallaartut.“ — Ussatit 23:20.

Aappassiariit katinnerminni viinnimik imigassanilluunniit aalakoornartunik allanut sassaallerniarunik, sassaalliinerup akisussaassuseqartunit nakkutigineqarnissaa isumagisariaqarpaat. Nipilersortoqassappat naleqquttuusariaqarpoq, qanorlu nipitutigisumik nipilersortoqarnissaanik akisussaassusilimmik qinersisariaqarlutik. Katittorsiorneq qaaqqusanit aqunneqalertariaqanngilaq nalorninartunillu ingasattumillu nipituumik nipilersortoqalerluni. Qitittoqassappat naleqquttuunissaa nipiluallaannginnissaalu aqutissiuunneqarsinnaavoq. Uppinngitsut kristumiullu inersimalluanngitsut pissuserissaanngitsumik illigussaarisumillu qitippata allamik naleqqunnerusumik nipilersortoqarnissaa katittup isumagisariaqarsinnaavaa. Aammattaaq pissuserilluni qitinneq unitseqqusinnaavaa. Iliuuseqanngippat katittorsiorneq piitangersimaartunngorsinnaavoq arlaannut naakkiussutaasinnaasoq. — Rûmamiut 14:21.

Ulorianaatit ullutsinni qiteriaatsit ilaannut, nipituumik nipilersornermut aalakoornartunillu killilersugaanngitsumik saassaallernermut atalluinnarnera pissutigalugu, kristumiut uinngortussat arlallit katinnerminni taamaattoqannginnissaa aalajangersimavaat. Taamaaliornerat ilaannit isorineqarsimavoq, uinngortussalli taakkua nersortariaqarput Jehovap aqqanik illernatumik kanngunarsaasinnaasunik pinngitsoortitsiniarmata. Uinngortussat allat katinnerminni naleqquttumik nipilersuuteqarnissaa, piffissami aalajangersimasumi qitittoqarnissaa aalakoornartumillu killimmik sassaallertoqarnissaa isumagisimavaat. Qanorluunniit aalajangeraluaruni uinngortoq katinnermini akuerisimasaminut akisussaavoq.

Afrikami kristumiut inersimalluanngitsut ilaasa katittorsiornerit ingasaassinaveersaartut ilisinernut assersuullugit nuannarinngilaat. Isummeriartaaserli tamanna oqimaaqatigiissitsinngilaq. Uinngup suliai ajortut maannakkorpiaq pissanganarsinnaapput nuannaartitsisinnaallutillu, Jehovalli aqqanik kanngunarsaasinnaapput ilerasuuteqalersitsillutillu. (Rûmamiut 2:24) Akerlianilli Guutip anersaava illernartoq piviusumik nuannaartitsisarpoq. (Galâsiamiut 5:22) Aappariippassuit kristumiut katinnertik nuannaarlutik nalerisimaarlutillu eqqaasarpaat, nuannersuummat ’naakkiussutigineqanngitsoq’. — 2 Korintumiut 6:3.

Welship Eltheallu eqqarlimik uppinngitsut katinnerminnut ilaasut oqaasii isumalluartut suli eqqaamavaat. Ataaseq oqarsimavoq: „Ullumikkut katittorsiornerit nipiliorfiusut qatsuppagut. Katittorsiortunut ileqqorissunut ilaalluni allannguutaavoq nuannersoq.“

Katittorsiornerit nuannersut ingasaassinianngitsullu aappariinnerup Pilersitsisuanut, Jehova Guutimut, ataqqinaataanerat pingaarnerpaavoq. (wE 1/5 2000)

[Qupp. 22-mi ungalusaq/​assiliartaq]

Qaaqqusinissamut allattuiffik

• Eqqarlit uppinngitsoq oqalugiassappat qulakkeereerpiuk arlaannut ileqqutoqqamulluunniit allamut kajumissaarissanngitsoq?

• Nipilersortoqassappat atorneqartussat naleqquttuinnaanissaat isumagereerpiuk?

• Nipilersuut nipituallaassanngila?

• Qitittoqassappat ileqqorissumik pissava?

• Imigassaq taamaallaat killilimmik sassaalliutigineqassava?

• Imigassanut akisussaasoqarnissaa isumagineqarpa?

• Katittorsiornerup naggaserneqarnissaa piffissami silatusaartumi aalajangereerpiuk?

• Katittorsiortoqarunnaarnissaanut akisussaassoqassava?