Sooq taama akilersilluni peqquserluttoqartigaa?

„Peqqserluttuliortoq illersussanngilat akilersinnerluutinik akilersillutit, akilersinnerluutit tappissuugaluarmik tappiillisitsisarmata pingitsuutitassaagaluit pisuutitassanngortillugit.“ — 2 Moses 23:8.

UKIUT 3500-t matuma siornatigut akilersilluni peqquserlunneq Mosesip inatsisaani assuarineqarpoq. Ukiuni hundredilikkuutaani tulliuttuni akilersilluni peqquserlunnermut inatsiserpassualiortoqartarsimavoq. Taamaakkaluartoq inatsisitigut akilersilluni peqquserlunneq unikaallatsinneqarsimanngilaq. ’Tunissutit’ millionilikkuutaat ullut tamaasa allanik piginnittoqalertarput, taakkualu kingunerisaanik inuit milliardilikkuutaat eqqorneqartarput.

Akilersilluni peqquserlunneq ima siammarsimatigaaq siuarsimatigalunilu allaat inuttaaqatigiikkuutaat ajoquserneqarnisaat navianartorsiortinneqarluni. Nunat ilaanni arlaannik iliussagaanni akilersilluni peqquserluutinik akiliinissaq pinngitsoorneqarsinnaanngingajappoq. Inuk eqqortoq akilerlugu peqquserlukkaanni soraarummeernermi angusisoqarsinnaavoq, biilernermut allagartartaartoqarsinnaalluni, isumaqatigiisummik qulakkeerisoqarsinnaalluni eqqartuussinermiluunniit ajugaasoqarsinnaalluni. Arnaud Montebourg, Parisimi eqqartuussissuserisoq ajuusaarluni oqarpoq: „Akilersilluni peqquserlunnerup assigaa mingutitsinerujussuaq inunnut nikallornartoq.“

Ingammik niuernerup silarsuaani akilersilluni peqquserlunneq annertusiartuinnarpoq. Sulliffeqarfiit ilaisa iluanaarutimik pingasorarterutaat oqartussaasunut peqquserluttunut akiutissaminnuinnaq immikkoortittarpaat. Tuluit atuagassiaat The Economist naapertorlugu silarsuarmi sakkussianik niuernermi ukiumut kaaviiartitaat 25 milliardit dollariusut 10 procentinit ikinnerunngitsut pisisinnaagunartunut peqquserlullutik akiliutigisarpaat. Akilersilluni peqquserlunnerup annertusiartornera ilutigalugu, kingunipilui ingasalluinnalersimapput. Tusakkat naapertorlugit nunat aningaasaqarniarnerat tamarmi ukiuni qulini kingullerni ajorsilluinnarsimavoq aningaasaatilissuit ’ikinngutitillu ikioqatigiinnerisa’, niueriaatsit peqquserluttut attaveqarluartunik ikittunik immikkut pisinnaatitsinerisa, kingunerisaannik.

Akilersilluni pinerluttarnerup tamatumalu kingunerisaanik aningaasakilliulernerup eqqunngitsoorsinnaanngisai tassaapput piitsut — akiliillutik peqquserlussinnaanngitsut. Soorlu The Economist-imi eqqorluartumik oqaatigineqartoq „akiliilluni peqquserlunneq tassaaginnarpoq naqisimanninneq allatut ittoq“. Naqisimanninneq taama ittoq unitsinneqarsinnaava imaluunniit akilersilluni peqquserlunnerit pinngitsoorneqarsinnaappat? Apeqqutit akisinnaajumallugit siullermik peqquserlunnermut pissutaasut tunngaviisa ilaat paaseqqaartariaqarpavut.

Peqquserlunnermut suut pissutaappat?

Sooq inuit peqquserlukkumanerusarpat unneqqarinnissamininngarnit? Immaqa inuit ilaannut piuminarnerummat periarfissatuaammalluunniit piumasatik piniarlugit. Ilaannikkut akiliilluni peqquserlunnerup ajornanngitsumik pillaatissaq pinngitsoortissinnaammagu. Amerlasuut politikkerini, politiini aammalu eqqartuussisuni takusakkatik, soorlu peqquserlunnernik isiginngitsuusaarinerit taamatulluunniit periaasillit, malillugit iliortarput.

 Peqquserlunneq annertusiartuinnartillugu, inuit akuerisaalertarpaat, naggataatigullu nalinginnaalertarluni. Inuit aningaasarsiakinnerusut misigisarput allamik periarfissaqaratik. Isumaqarput inuuniarnermi malinnaakannerniassagaanni akilersilluni peqquserlunnissaq pisariaqavissoq. Aamma peqquserlunnikkut akilerneqarumasut imaluunniit nammineq iluaqutissaminik peqquserlulluni akiliisoq pillarneqanngippat sarfamik assuisut ikittuinnaassapput. „Iluaatsuliorneq piaartumik pillaateqartitaanngikkaanngat inuit iluaatsuliorumallersarput,“ kunngi Salomon taama oqarpoq. — Nalunaajaasup oqaasii 8:11.

Nukerujussuit marluk peqquserlunnermik ikummarissaasarput: Namminissarsiorneq piumatunerlu. Namminissarsiortup peqquserlunnermi allanik ajoqusinera takunngitsuusaartarpaat aammalu akilersilluni peqquserlunneq eqqortutut isikkoqalersinniartarpaa nammineq iluaqutigigamiuk. Akilersillutik peqquserluttartut nunap piisigut iluanaarnerujartortillutik piumatunerujartuinnartarput. Salomonip malugisimavaa: „Aningaaseritooq aningaasaatiminik ilatsaasuiuartarpoq. Pisuussutinik nuannarinnittoq pissarsiaminik naammatsiuitsuuvoq.“ (Nalunaajaasup oqaasii 5:9) Aningaasanik iluanaarniaraanni piumatussuseq immaqa iluaqutaasinnaavoq, kisiannili peqquserlunnermik inatsisaannermillu isiginngitsuusaarilersitsisarpoq.

Pingaartoq alla arajutsisassarinngisarput tassaavoq silarsuup naalagaata ersinngitsup sunniuteqarnera. Biibilimi Satan Diaavulumik taaneqarpoq. (1 Juánase 5:19; sarĸúmersitat 12:9) Satanip peqquserlunneq siuarsartuarpaa. Akiliilluni peqquserlunnerit neqeroorutaasimasut ingasannerpaartaat tassaavoq Satanip Kristusimut neqeroorutaa: ’Makku tamaasa ilinnut tunniukkumaarpakka, nunamut pallorfigigumma.’ — Matîuse 4:8, 9.

Kisianni Jesus peqquserlutsitassaanngilaq ajoqersukkanilu taamaaliornissaannik ajoqersorlugit. Jesusip ajoqersuutaa akilersilluni peqquserlunnermik akiuiniarnermut ullumikkut iluaqutaasinnaanerpa? Apeqqut tamanna allaaserisami tulliuttumi eqqartorneqassaaq.