Guutip naalagaaffianik oqaluussissutiginninnermit nutaarsiassat

Guuti asannittoq ilisarilerpaa

ANGUT Brasiliamiu Antôniomik atilik 16-inilli ukioqarluni inuuneq pakatsissutigisimavaa. Inuunerup siunertaqannginneranik misigineq ikiaroornartup imigassallu pinngitsoorsinnajunnaarnerannik kinguneqarpoq. Inuunini kipitinniarlugu eqqarsaatigikulasarsimavaa. Taamatunaasiit misigaluni anaanami oqaasia eqqaalersimavaa. ‛Guuti asassutaavoq‛, (1 Juánase 4:8) Sumili Guuti asannittoq nassaarisinnaava?

Atornerluinini unitsinniarlugu najugaqarfimmini palasimut ikiortissarsiorpoq. Naak Antônio ilagiinni katuuliusuni ingerlallualeraluarluni suli apeqqutissarpassuaqarpoq. Assersuutigalugu eqqarsaatigaa Jesusip suna pigaa oqarami: ‛Sallusuissut ilisarissavarsi, sallusuissutillu inussiaajunnaarsissavaasi.‛ (Juánase 8:32) Sunaana inussiaajunnaarneq Jesusip neriorsuutigigaa? Apeqqutaa oqaluffeqarfimmit naammaginartumik akineqarsinnaasimanngilaq. Piffissap ingerlanerani Antôniop suna tamaat sussakkeerpaa ileqqutoqqaminullu uteqqilluni. Pinngitsuuisinnaajunnaarneralu siullermit ajornerulerpoq.

Tamatuma nalaani Antôniop nulia, Maria, Jehovap Nalunaaiaasuinik Biibilimik atuaqqissaaqateqartalersimavoq. Atuartarnera ajorinngikkaluarlugu Jehovap Nalunaajaasui „Amerikamiut upperisaatut pissaaneqarniarnermik kisimik soqutigisalittut“ taasimavai.

Mariap tamanna nakkaannarfiginngilaa, illulli iluani sumut tamaanga Napasuliaq Alapernaarsuiffik Iteritsi!-lu iliorartarpai, isumaqarami atuagassiat Antôniop soqutigisinnaasaanik imaqartut. Antôniop atuarneq nuannaraa, taamaattumik ilaatigooriarluni nuliani peqanngeriaraangat atuagassiat qupperapallattarpai. Inuunermini siullerpaamik apeqqutit Biibilimut tunngasut akissutissarsivai. Oqaluttuarpoq: „Asanninneq inussiarnernerlu nuliama Nalunaajaasullu uannut nittartagaat maluginiartalerpakka.“

1992-imi Antônio aalajangerpoq Jehovap Nalunaajaasuinik Biibilimik atuaqqissaaqateqartalerniarluni. Kisannili imerneq ikiaroornerlu ingerlatiinnarpai. Unnuit ilaanni inissiapalaaqarfiit piulluanngitsut ilaanni pulaarsimaareerlutik ikinngutinilu angerlartillutik politiinit unitsinneqarput. Antônio kokainimik nassaarfigereerlugu unatalerpaat. Politiip ilaasa marallummut uppitippaa timmiarsiutinilu kinaanut tutsillugu. „Toquinnaruk!“ politiit allat nilliapput.

Marallummi nalatilluni, inuunermini pisimasut takorlooriataarpai. Ajunngitsumik eqqaamasatuanngui ilaquttaminut Jehovamullu tunngapput. Jehovamut naatsumik qinuvoq ikioqqullunilu. Patsiseqanngitsumik politiit Antônio qimappaat. Angerlarpoq qularinagu Jehovap illersorsimagaani.

Soqutiginninnerulerluni Antônio Biibilimik atuaqqissaaqqittalerpoq. Jehova nuannaartikkumallugu inuunerminik pisariaqartunik allannguiartuaarsimavoq. (Evfisumiut 4:22-24) Imminut naalakkersorluni ikiaroornartunik atornerluinini aqussinnaalerpaa, nakorsamilli aamma ikiorneqartariaqarpoq. Qaammatini marlunni katsorsaavimmiipoq; tassanilu atuagassianik Biibililersaarutinik atuarnissaminut periarfissaqarluarpoq, ilaatigut atuagaq Ilisarsineq inuunermut naassaanngitsumut sammisoq. Atuakkanit taakkunannga ilikkakkani uninngaqatiminut oqaluttuarisarpai.

Katsorsaavik Antôniop qimakkamiuk Jehovap Nalunaajaasuinik Biiiblimik atuaqqissaarnini ingerlatiinnarpaa. Ullumikkut Antônio Marialu, paniilu marluk anaanaalu ilaqutariittut ataasiussuseqarlutik Jehovamut kiffartorput. Antônio oqarpoq: „Oqaatsit ’Guuti asassutaavoq’ isumaat atsaat paasilerpara.“ (wE 1/6 2000)

[Qupp. 25-mi assiliartaq]

Rio de Janeiromi oqaluussineq