Siunnersuutit pitsaasut sumi nassaarisinnaavigit?

Siunnersuineq maanna ukiumut dollarinik milliardilikkuutaanik kaaviiartitsisumik niuerninngorsimavoq. Inuit ikiorneqarusupput. Sianissutsikkut peqqissutsimik immikkut ilisimasalik Heinz Lehmann ima malugisaqarsimavoq: „[Ullumikkut innuttaaqatigiinni] ilinniartitaanerup inunnillu isumaginninnerup tungaatigut amigaateqaqaaq. Upperisarsiornikkut eriagisassat siornatigutut ikkunnaarsimapput. Ilaqutariittut inuuneq tutsuiginannginnerulersimavoq . . ., taamaattumillu inuit sumut saaffiginnissanerlutik nalusarpaat.“ Atuakkiortoq Eric Maisel oqarpoq: „Tarnikkut, anersaakkut timikkulluunniit ajornartorsiutit aaqqinniarlugit siornatigut angakkumut, palasimut nakorsamulluunniit ikiortissarsiortartut maanna akissutissarsiorlutik atuakkanut imminut ikiorniartunut naatsorsuiussanut saattarput.“

AMERIKAMI Tarnip Pissusiinik Ilisimatuut Peqatigiiffiat suleqatigiissitaliorpoq nioqqutissiornermik annertusiartuinnartumik tamatuminnga misissuisussamik. Suleqatigiissitat taakku oqarput „inuit imminut paasinissaannut allanillu paasinninnissaannut ikiorneqarsinnaasut . . ., isummalli taaguutillu niuernermik siuarsaasut suliniarnerit taakkua nassatarisartagaat ingasaassiartuinnarlutillu tupinnartussarsiortuaannartut.“ Toronto Star-imi allattartoq oqarpoq: „Upperisarsiornikkut ilaannakuusumik ilaarsinerit sianigikkit. . . . Ingammik atuakkat imminut ikiorniartunut naatsorsuussat, båndit imaluunniit pikkorissarnerit piffissami sivikippallaami, ilungersornarpallaanngitsumik imaluunniit imminut piumaffigivallaarnani, neriorsuivallaartut mianersorfigikkit.“ Ilumoorpoq amerlasuut ilumoorlutik annikilliortunik ikiuerusummata. Ajoraluartumilli soqutigittaatsorpassuaqarpoq allat kiserliornerannik ajornartorsiornerannillu piviusumik ikiorsiisinnaanatik iluanaarniartunik.

Ikiuineq tatiginartoq sumi nanisinnaavarput? Siunnersuutit atoriaannaasut atorsinnaajuaannartullu sumi nanisinnaavavut?

Unnersuussutit iluaqutaanngitsoorneq ajortut

1800-kkunni palasi Amerikamiu Henry Ward Beecher oqarsimavoq: „Biibili tassaavoq immap assinga, Guutip pia, sumiissusersiutissat. Umiiarnaveersaartissavaatit, umiarsualivillu sumiinnersoq qanorlu ilillutit ikkarlinnak apuussinnaanersutit takutissallugu.“ Angut alla Biibili pillugu ima oqarsimavoq: „Inuk kinaluunniit Allakkanut utoqqaavallaalersinnaanngisaannarpoq; utoqqaliartortilluni atuagaq neruttoriartortarpoq itisiartorllunilu.“ Sooq Biibili ilumooruttariaqarpa?

Biibilimi allassimavoq: ’Allakkat tamarmik Guutip anersaarneranik ilallit atortussaapputtaaq ajoqersuutaallutik inerteqqutaallutillu iluarsiartuutaallutillu iluarnermullu perorsaataallutik, inuk Guutip pigisaa inerilluaqqullugu ajunngitsuliornernullu tamanut piginnaanngorsagaaqqullugu.’ (2 Timûtiuse 3:16, 17) Biibili inuunerup pilerfianit Jehova Guutimeersuuvoq. (Tussiaat 36:10) Guutip qanoq katitigaanerput nalunngilluarpaa, soorlu Tussiaat 103:14-imi eqqaasinneqartugut: „Nalunngilaami qanoq pinngortitaasugut,  eqqaamavaa pujualaannaasugut.“ Taamaattumik Biibilip nalinga tatigilluinnarsinnaavarput.

Innersuussuterpassuit najoqqutassarpassuillu inuunitsinni tamani atorsinnaasagut Biibilip imarai. Taanna aqqutigalugu Guutip oqarfigaatigut: „Aqqut aana ingerlavigisassarsi.“ (Jesaja 30:21) Ullumikkut inuit pisariaqartitaat ilumut Biibilip matussusersinnaavaa? Paasiniariartigu.

Biibilip matussusertagai:

Isumakuluutit anigornissaannut ikiorneqartariaqarnerput. Biibilimi allassimavoq: ’Suulluunniit pillugit isumakulunnaveeritsi, nungullugilli kissaatigisasi Guutimut nalunaarsigik torlulallusi qinullusilu qujallusilu; eqqissinerullu Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Aningaasatigut ajornartorsiutinut, kinguaassiuutitigut oqaatsikkullu atornerluinneqarnermut imaluunniit asasamik toqusoornermut attuumassuteqartunik misigissutsikkut tatineqarnernik aniguiniarnermi qinuneq iluaqutaasarsimava? Misigisaq tulliuttoq eqqarsaatigeriaruk.

Panini kinguaassiuutitigut atornerlunneqarsimasoq paasereerlugu Jackie nassuerpoq: „Nammineq qitornamik illersuisinnaanngitsutut imminut pisuutinneq oqaatigineqarsinnaanngilaq. Aliatsangaarneq, akaarigaqannginneq kamannerlu akiortariaqarsimavakka. Misigissutsit tamakkua inuunera aserorsalersimavaat. Uummatima Jehovamit sernigineqarnnissaa pisariaqarteqaara.“ Filípimiut 4:6, 7 atuaqattaareerlugu unnersuutaata maleruarnissaa ilungersuutigaa. „Ullut tamaasa qinoqattaartarpunga misigissutsinik nuanniitsunik artorsinneqaqqunanga, Jehovallu ikiorsimavaanga uummatinni eqqissinermik nuannaarnermillu ineriartortitsinissannut. Ilumut eqqissineq qamuuna misigivara,“ Jackie oqaluttuarpoq.

Immaqa aamma illit qanoq iliuuseqarfigisinnaanngisannik aaqqissinnaanngisannilluunniit, misigissutsikkut attorneqaatigisannik, atugaqarputit. Biibilip qinunissamut kajumissaarutaata maleruarneratigut ajornartorsiutit anigorluarnerusinnaavatit. Tussiaasiortup imatut kajumissaarpaatigut: „Atugassatit [Jehovamut] isumagitikkit, tatigiuk ikiunngitsoornavianngimmatit.“ — Tussiaat 37:5.

Qiimmassarneqartariaqarnerput. Tussiaasiortup pingaartitsinini ima oqaatigaa: „[Jehova], nuannaraara ineqarfiit, najugaq naalannangaarlutit inigisat. Aalajaappoq maanna isikkama tummisaat. Katisimasuni unnersiutigissavara [Jehova].“ (Tussiaat 26:8, 12) Biibilimi kajumissaarneqarpugut Jehova pallorfiginiarlugu aalajangersimasumik ataatsimooqatigiittarnissatsinnik. Ataatsimooqatigiinneq taamaattoq qanoq ililluni pisariaqartitsinitsinnik matusisinnaava? Tamatumunnga atatillugu allat qanoq misilittagaqarpat?

Becky oqaluttuarpoq: „Angajoqqaama Jehova kiffartuutinngilaat, Guutimut pallorfiginninnermut tunngasut iliuuseriniakkakka tamaasa assortortarpaat. Ataatsimiigiarnissaq uannut ilungersunartorujussuuvoq.“ Becky misigivoq pilluaqqusaangaarluni kristumiut ataatsimiinnerinut aalajaalluni najuunniartarami. „Ataatsimiinnerni uppernera nakussatsinneqartarpoq, atuartutut, panittut Jehovamullu kiffartortutut ulluinnarni tatineqarnerit akiorsinnaanngorlugit. Naalagaaffilersaarfimmiittut atuaqatinnit allaanerulluinnarput. Isumassuisuupput ikiuiumatuujullutillu, oqaloqatigiinnivullu qiimmassaataajuaannarput. Ikinngutiviupput.“

Aap, Biibilip uppeqatinik aalajangersimasumik ataatsimooqatigiittarnissamik unnersuussutaanik maleruaanikkut qiimmasarneqartariaqarnerput Jehovamit matussusertissinnaavarput. Tassani tussiaasiortup oqaasiisa ilumoornerat misigisinnaavarput: „Guuti tassa qimarravipput nakuussuterpullu, isumannaatsumik ikiuiserput annikilliornartuni tamani.“ — Tussiaat 46:2.

Nalerisimaarnartumik siunertaqartumillu suliaqartariaqarnerput. ’Aalajangeritsi saqinnaveerlusilu Naalakkallu suliaanik naammassisaqangaartuinnarlusi, suliniarnisi Naalakkami asuliinnaanngitsut ilisimagassigik,’ Biibili siunnersuivoq. (1 Korintumiut 15:58) ’Naalakkami sulineq’ piviusumik nalerisimaarnarpa? Kristumiutut kiffartorneq  pingaarutilimmik kinguneqartarpa?

Amelia ima misigisimavoq: „Aappariit avinniartut Biibilimik atuaqqissaaqatigisarsimavakka. Aamma arnaq, pania toqutaasimasoq, ikiorsimavara. Arnap toqusimasut qanoq pissuseqarnerinik ilisimasaqannginnini anniaatigaa. Pisimasuni marlunni taakkunani ajoqersuut Biibilimeersoq eqqissisitsivoq neriuuteqalersitsillunilu. Taakkuninnga ikiueqataasimanera nuannaarutigingaarpara nalerisimaarutigingaarlugulu.“ Scott oqarpoq: „Oqaluussinermi nuannersumik misigisaqaraanni, Biibilimik atuaqqissaaqatitaaraanni imaluunniit torrutiinnarlugu oqaluussinermi angusaqarluaraanni ukiorpassuarni oqaluuserineqarsinnaavoq. Oqaluttuarnerit tamaasa misigissutsit taakkorpiaat misigineqartarput taamatorpiarlu nuannaartoqartarluni! Oqaluussineq tassaavoq annerpaamik ataavartumillu nuannaartitsisoq.“

Erseqqippoq oqaluussinissamik Biibilip unnersuussutaanik maleruaanikkut nalerisimaarnartumik siunertaqartumillu suliaqartariaqarneq matussuseraa. Illittaaq allat Guutip aqqutigeqqusaanik najoqqutassiaanillu ilinniartitsinermi, aamma nammineq iluaqutigisassanni, suleqataanissannut qaaqquneqarputit. — Jesaja 48:17; Matîuse 28:19, 20.

Guutip oqaasia iluaqutigiuk

Qularnanngitsumik Biibili tassaavoq ullumikkut silarsuatsinni unnersuussutinik atoriaannaasunik tatiginartunillu imalik. Iluaqutigiumallugu iliuuseqartuartariaqarpugut. Aalajangersimasumik atuartariaqarparput, atuaqqissaartariaqarlugu eqqarsaatigeqqissaartariaqarlugulu. Paulus oqaassivoq: ’Tamakku isumaliutigikkit ileqqoralugillu alliartussutsit tamanut malunnarseqqullugu.’ (1 Timûtiuse 4:15; 5 Moses 11:18-21) Guutip uppernarsaaffigaatigut unnersuutiminik Biibilimiittunik maleruaagutta ingerlalluassasugut. Neriorsuivoq: „[Jehova] tunaariuk . . . Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6. (wE 1/6 2000)

[Qupp. 31-mi assiliartaq]

Unnersuutinik Biibilimeersunik maleruaaneq nalerisimaarnarlunilu siunertaqarpoq