Ilinnut oqartussaatitaasut ataqqikkit
Ilinnut oqartussaatitaasut ataqqikkit
’Tamaasa ataqqisigik, qatanngutigiit asasigik, Guuti mianerisiuk, kunngi ataqqisiuk.’ — 1 PÎTRUSE 2:17.
1, 2. Ullumikkut amerlasuut oqartussaasut qanoq isigisarpaat, aamma sooq?
„MEEQQAT kisimik pisinnaatitaaffeqarput. Angajoqqaanut ataqqinnittuerussimavoq,“ anaanaq taama anersaaruluppoq. „Oqaasissaqartut tatigeqqinagit,“ nipitittakkami allassimavoq. Pissutsinut ilisarnaatit marluk taakku malugisimassagunarpatit. Silarsuaq tamakkerlugu angajoqqaanut, ilinniartitsisunut, sulisitsisunut atorfilinnullu ataqqinninnginneq nalinginnaalersimaqaaq.
2 Ilaasa immaqa tuitik qaffatsiallassavaat oqarlutillu: ’Oqartussaasut ataqqisariaqanngilakka.’ Ilaannikkut tamanna ilumoorsinnaagaluarpoq. Tusartuarpavut atorfillit peqquserluttuliortut, sulisitsisut piumatuallaartut, ilinniartitsisut pikkorippallaanngitsut angajoqqaallu nakuusertartut. Qujanartumilli kristumiut ikittuinnaat kristumiut ilagiivini oqartussaasunut ataqqinnikkumanngillat. — Matîuse 24:45-47.
3, 4. Sooq kristumiut oqartussaatitaasut ataqqisariaqarpaat?
3 Kristumiutut silarsuarmi oqartussaasunut ’naalattariaqarpugut’. Apustili Paulusip kristumiut eqqaasippai ’oqartussaasunut qulliunerusunut naalaqqullugit, oqartussaassuseqanngimmat Guutimit pinngitsumik; oqartussaasut piusut atorfimminnut annerusumik minnerusumilluunniit oqartussaassuseqarfiusunut Guutimit ivertitaammata’. (Rûmamiut 13:1, 2, 5, NV; 1 Pîtruse 2:13-15) Paulusip aamma ilaqutariinni oqartussaassusillit naalannissaannut pissutissaalluartoq eqqaavaa oqarami: ’Arnat ukorsii, uisi naalassigik, soorlu Naalakkami ileqqussaasoq. Meeqqat ukorsii, angajoqqaasi tamatigut naalassigik, tamanna Naalakkap iluarimmagu.’ (Kulorsamiut 3:18, 20) Ilagiinni utoqqaanertat ataqqineqartariaqarput ’anersaap illernartup ivertimmagit takusaassartooqqullugit, Guutip ilagiissai . . . paareqqullugit’. (apustilit suliait 20:28) Oqartussaatitaasunik ataqqinninnerput Jehovamut ataqqinninneruvoq. Soorunalimi Jehovap oqartussaaneranut ataqqinninnerput salliutittuassavarput. — apustilit suliait 5:29.
4 Maanna oqartussaasunut ataqqinnissimanngitsut ataqqinnissimasullu ilaat misissussavavut, eqqaamalluguli Jehova tamanit oqartussaanerpaasoq.
Ataqqinninnginneq Guutip iluarinngisaanik kinguneqarpoq
5. Mikalip qanoq ililluni David ataqqinninngitsuliorfigaa, sumillu kinguneqarpa?
5 Kunngi Davidimik oqaluttuap takutippaa Jehovap oqartussaanermik Guutimeersumik nikaginnittut qanoq isigigai. Davidip angerutsip illerfia Jerusalemimukaakkaa nuliaata Mikalip takugamiuk ’David Jehovap saani pisissaartoq qamuuna narrutsaappaa’. Mikalip David ataqqisariaqaraluarpaa, ilaqutariinni niaquusutuinnaanngitsoq aammali nunami kunngiusutut. Mitallerpalulluni oqarpoq: „Kakkaak Israelikkut kunngiat ullumi ataqqinarsaannguataarami! Atorfilittami inussiaataat arnat isigitillugit uppatimigut atisaqarani angalaarpoq kannguttaatsut pisarnerattut.“ Tamatuma kingunerisaanik Mikal qitornaqanngilaq. — 2 Samuel 6:14-23.
6. Jehovap tanitaminut Korap ataqqinninnginnera qanoq isigaa?
6 Guutimeersumik teokratiskiusumik ataqqinninnginnermigut maligassiuinerluttoq tassaavoq Kora. Kehatikkuugami immikkut pisinnaatitaaffeqarpoq tupermi illernartuutiliami Jehova kiffartorfigissallugu. Taamaattoq Moses Aronilu, Guutip Israelikkunnut siulersuisussatut tanitai, isornartorsiulerpai. Korap Israelikkunni naalagaasut allat pikitsitseqatigai ittuujuillunilu Moses Aronilu oqarfigalugit: „Ilagiinnut ilaasut tamarmik illernartuupput, [Jehovalu] akornanniippoq. Sooq [Jehovap] ilagiissaanit pingaarnerutinniarpisi?“ Korap malittaasalu isiginnittaasiat Jehovap qanoq isigaa? Jehovap imminut ataqqinninnginnertut isigaa. Malitsitik tamarmik nunamit iineqartut takoreerlugit Kora naalagaasullu 250-it innermit Jehovameersumit nungunneqarput. — 4 Moses 16:1-3, 28-35.
7. ’Apustilit assut akitsisut’ pissutissaqarpat Paulusip oqartussaanera isornartorsiussallugu?
7 Aamma ukiuni hundredelinni siullerni kristumiut ilagiissaanni teokrati tunngavigalugu oqartussaanermut ataqqinninngitsoqarpoq. Ilagiinni Korinthimiittuni ’apustilit assut akitsisut’ Paulusimut ataqqinninngitsumik isiginnittaaseqarput. Oqalugiartutut piginnaaneri isornartorsiortarpaat oqarlutik: ’Timimigut najuilluni sanngiitsarpoq, oqaasialu sussaanngilaq.’ (2 Korintumiut 10:10; 11:5) Paulus oqalugiallaqqissuuguni oqalugiallaqqisuunngikkuniluunniit apustilitut ataqqineqartariaqarpoq. Paulusilli oqaasii ilumut ’sussaanngillat’? Tamanut ammasumik oqalugiaataasa Biibilimi allanneqarsimasut takutippaat oqalugiartutut nakimaallisitsisartoq. Paulusip kunngi Herodes Agrippa II, ’juutit ileqquinik saqitsaatigisartagaannillu tamanik ilisimasalik’ oqaloqatigillatsiareeraani, oqaaserisai pissutigalugit kunngi Paulusimut oqarpoq: ’Kajumissaarinikkut kristumiunngorteqqajaqaarma.’ (apustilit suliait 13:15-43; 17:22-34; 26:1-28) Taamaattorli Korinthimi apustilit makitavallaartut oqarput Paulusip oqaasii sussaanngitsut. Jehovap isiginnittaasiat qanoq isumaqarfigaa? Jesus Kristusip nakkutilliisut ilagiinni Efesusimiittut tusarleramigit nersualaarpai ’apustiliunerartunit taamaannatilli’ tammartitaanngimmata. — sarĸúmersitat 2:2.
Naammalluinnanngikkaluartunut ataqqinninneq
8. Davidip qanoq ililluni takutippaa oqartussaassuseq Jehovap Saulimut tunniussaa ataqqillugu?
8 Biibilimi assersuutissarpassuit eqqaaneqarput, allaat oqartussaassutsiminnik atornerluisunik, ataqqinnittut. David tamatumuuna maligassaalluarpoq. Kunngi Saulimut kiffartorpoq, anguniakkanili pissutigalugit taassumannga sinngagineqarlunilu toqunniarneqarpoq. (1 Samuel 18:8-12; 19:9-11; 23:26) David Saulip toqunnissaanut arlaleriarluni periarfissaqalertaraluarpoq, oqarlunili: „[Jehovap] tanitami uannit ajoquserneqarnissaa pinngitsoortikkiliuk.“ (1 Samuel 24:4-7; 26:7-13) Davidip nalunngilaa Saul eqqartuunneqartariaqartoq, eqqartuunneqarnissaali Jehovamut pisippaa. (1 Samuel 24:13, 16; 26:22-24) Saul mitallinngilaa allanullu ajortumik eqqartornagu.
9. (a) David Saulimit malersorneqartilluni qanoq misigiva? (b) Qanoq ililluta nalunngilarput David Saulimut ataqqinninnermini ilumoortoq?
9 David malersorneqartilluni ernumava? „Persuaaniartut toqunniarpaannga,“ Jehova torlorfigaa. (Tussiaat 54:5) Uummammiuni Jehovamut aniatippai: „Aniguisinnga akeqqannit, Guuti, . . . angutit nukittuut saassummannga, naak unioqqutitsinangalu ajortulisimanngitsunga, [Jehova]. Naak pisuussuteqanngitsunga katersuupput ajortumeerniarlunga. Iterit, nammineq aggerit takuniaallutit!“ (Tussiaat 59:2-5) Assingusumik misigisaqarsimavit — oqartussaassup eqqunngitsuliorfiginngisaannakkavit erloqisittuarsimavaatit? Davidip Saul ataqqinngitsoorumanngilaa. Saul toqummat Davidip qiimmattaatiginngilaa. Allaat uppusiorpoq: „Saul Jonatanilu nuannarisat asanartullu avissaarsimanngillat inuutillutik . . . Sukkanerusarsimapput nattoralinnit, nakuunerullutillu løvenit. Ilissi Israelip panii, Saul upputigisiuk.“ (2 Samuel 1:23, 24) Jehovap tanitaanik ataqqinninnermigut David maligassaalluarpoq, naak Saulip eqqunngitsuliorfigigaluaraani.
10. Siulersuisoqatigiit oqartussaanerat Guutimeersoq ataqqillugu Paulus qanoq maligassaalluarpa, sumillu kinguneqarpa?
10 Aamma oqartussaatitaanermut Guutimeersumut ataqqinnittunik kristumiut siulliit nalaanni maligassaalluartoqarpoq. Assersuutigalugu Paulus eqqarsaatigeriaruk. Taanna ilagiit kristumiut siulersuisoqatigiivisa aalajangigaaannik ataqqinnittarpoq. Paulus kingullermik Jerusalemimiinnermini siulersuisoqatigiinnit siunnersorneqarpoq inatsisit naapertorlugit minguersaqqullugu Mosesip inatsisaanik assortuinnginnini allanut takutinniarlugu. Paulus eqqarsarsinnaagaluarpoq: ’Taamani inuunera navianartorsiormat qatanngutit taakkua peqquaannga Jerusalem qimaqqullugu. Maanna piumaffigaannga Mosesip inatsisai ataqqigikka tamanut takutissagiga. Galasiamiut allaffigereerpakka siunnersorlugit Mosesip inatsisaanik maleruaajunnaaqqullugit. Naalaffimmukaruma allat immaqa paatsuussavaat isumaqarlutillu kipineqartunut iluarisaajumallunga eqqunngitsumut akuersiinnartunga.’ Paasinarpoq Paulus taama eqqarsarsimanngitsoq. Kristumiut najoqqutassiaannut unioqqutitsinerunngimmat siulersuisoqatigiit siunnersuutaat akueralugulu malippaa. Taamaaliornerata kingunerisaanik Paulus juutinit inupalaarpassuarnit annaanneqartariaqalerpoq, tamatumalu kingorna ukiuni marlunni parnaarussaalluni. Naggataatigulli Guutip piumasaa pivoq. Paulusip Cæsareami atorfikkaat oqaluussiffigisinnaavai, kingornalu naalagaaffiup akiligaanik Romaliaanneqarluni. Tassani kaasari allaat oqaluussiffigaa. — apustilit suliait 9:26-30; 21:20-26; 23:11; 24:27; Galâsiamiut 2:12; 4:9, 10.
Ataqqinnippugut?
11. Qanoq ililluta silamiut oqartussaasui ataqqisinnaavavut?
11 Uagut oqartussaatitaasut ataqqivavut? Kristumiut oqarfigineqarput ’tamaasa pisassaannik tuneqqullugit: ataqqinninnermik pisussaq ataqqinninnermik’. „Oqartussaasunut qulliunerusunut“ naalassagatta isumaqaannanngilaq akileraassasugut, aammalu oqaatsikkut iliuutsikkullu oqartussaasut ataqqissagivut. (Rûmamiut 13:1-7) Oqartussaassunut immaqa nuanniilliortitsisunut sassarutta qanoq qisuariassaagut? Mexicop ilaani Chiapasimi oqartussaasut ilaqutariit 57-it Jehovamut nalunaajaasuusut nunaataat tigugallarpaat. Taamaaliorput kristumiut taakkua upperisarsiornikkut nalliuttorsiornerit aalajangersimasut peqataaffigiumanngimmatigik. Ajornartorsiut aaqqinniarlugu ataatsimiileraangamik oqaluussisartut tamatigut ipiillutillu torersuupput, ataqqinnillutillu oqaluttarlutik. Ukiorlu ataaseq qaangiuttoq pineqartoq aalajangiiffigineqarpoq taakkua iluaqutigisaannik. Periaasiat takunnittut ilaannit ima ataqqineqartigimmat taakkua aamma Jehovamut nalunaajaasunngorusulerput.
12. Sooq nuliaasup uiminut uppinngitsumut ’mianerinninnissaa’ pingaaruteqarpa?
12 Qanoq ililluta ilaqutariit iluanni oqartussaatitaaneq Guutimeersoq ataqqisinnaavarput? Jesus anniartinneqarnermini qanoq maligassiuilluartigisoq eqqartoreeramiuk apustili Peter nangilluni allappoq: ’Taamattaaq nuliaasusi uissinnut naalattuugitsi, oqaatsimut naalasseriitsoqarpat taakku oqaaseqanngitsukkut nuliamik saqineratigut ilataarineqaqqullugit, mianerinnillusi piitaajuitsumik saqinersi isigisaraangamikku.’ (1 Pîtruse 3:1, 2; Evfisumiut 5:22-24) Tassani Peterip erseqqissarpaa nuliaasup uiminut ’mianerinnilluni’ naalatsigitinnera qanoq pingaaruteqartigisoq, aamma naak uiusut tamarmik immaqa taamatut ataqqineqartariaqanngikkaluartut. Ataqqinninnermigut nuliaasup uini uppinngitsoq ilataarisinnaavaa.
13. Nuliaasut qanoq ilillutik uitik ataqqisinnaavaat?
13 Tamatumunnga tunngatillugu Peterip Sara eqqaavaa, uia Abraham upperluarnermigut maligassaalluarmat. (Rûmamiut 4:16, 17; Galâsiamiut 3:6-9; 1 Pîtruse 3:6) Nuliaasup uiminut uppertumut ataqqinninnera soorunami nuliaasup uiminut uppinngitsumut ataqqinninneranit minnerusariaqanngilaq. Taavami nuliaasup uini arlaannik isumaqatiginngippagu? Jesus siunnersuivoq matumani atorneqarsinnaasumik: ’Erloqquppatit miilitut ataatsitut ungasitsigisumut aappariumallutit, marluttut ungasitsigisumut aapparuuk.’ (Matîuse 5:41) Uiit ’aapparineratigut’ imaluunniit tapersersorneratigut ataqqiviuk? Taamaaliornissat sapernartikkukku taava oqaloqatigiissutigisiuk. Qanoq misigisutit nalunngitsorissanngilat, ataqqinnittumilli oqaloqatigiissutigisiuk. Biibilimi ima siunnersuuteqarpoq: ’Alianaatsunik oqaaseqartaannaritsi, tarajorsimasunik, kimulluunniit qanoq akissutissassinnik ilisimaqqullusi.’ — Kulorsamiut 4:6.
14. Meeqqat angajoqqaaminnik ataqqinninnerat sumik nassataqarpa?
14 Qitornasimi? Guutip oqaasiani allassimavoq: ’Ilissi meeqqat, angajoqqaasi naalassigik Naalakkami, taama iluarmat. „Ataatat anaanallu ataqqikkit“, tassa inassut siulleq unnersuummik ilalik.’ (Evfisumiut 6:1-3) Malugiuk angajoqqaanut naalanneq ’ataatamut anaanamullu ataqqinninnermut’ naligitinneqarmat. Griikerit oqaasiat ’ataqqikkit’-mik nutserneqartoq isumaqarsinnaavortaaq ’pingaartikkit’ imaluunniit ’naleqartikkit’. Naalanneq angajoqqaat najoqqutassiaannik immaqa ingasappallaarsorisanik kajumilluni maleruaanerinnaanngilaq. Guutip meeqqat kajumissaarpai angajoqqaaminnik siunersuutaannillu pingaartitseqqullugit. — Ussatit 15:5.
15. Meeqqat qanoq ilillutik angajoqqaatik ataqqiuarsinnaavaat naak isumaqaraluarlutik angajoqqaat kukkusimasut?
15 Angajoqqaatilli iliuuseqarpata ataqqinnippallaarunnaassutigisannik? Taamaappat taakkutut isiginiartariaqarpat. Taakkua inunngortissimannginnerpaatsit isumagalutillu? (Ussatit 23:22) Asagamitsit taamaaliorsimannginnerpat? (Eprîarit 12:7-12) Angajoqqaatit ataqqinnittumik oqaluffigikkit inussiarnersumillu nassuiaallugit qanoq isumaqartutit. Soqqusaalliorfigeqinagit, aamma naak iluarinngisannik qisuariassagaluarpata. (Ussatit 24:29) Eqqarsaatigiuk Davidip qanoq Saul ataqqiuaraa, allaat kunngi Guutip maleruaqqusaanik maleruaajunnaaraluartoq. Jehova qinnuigiuk ikioqqullutit misigissutsivit aqussinnaanissaannut. „Uummammiugisasi tamaasa taassumunnga saqqummiussigit,“ David allappoq. „Guuti qimarravigaarput.“ — Tussiaat 62:9; Upputit 3:25-27.
Siulersuisut ataqqikkit
16. Ajoqersuisooqqusersut inngilillu qanoq ilinniarfigisinnaavavut?
16 Naak ilagiinni utoqqaanertaasut anersaamit illernartumit toqqarneqaraluarlutik, naammalluinnartuunngillat kukkusarlutillu. (Tussiaat 130:3; Nalunaajaasup oqaasii 7:20; apustilit suliait 20:28; Jâko 3:2) Taamaattumik ilagiinniittut ilaasa immaqa utoqqaanertat naammagittaalliutigaat. Ilagiinni arlaat eqqortumik iliuuseqarfigineqanngitsorinarpat qanoq qisuariassaagut? Malugeriaruk ukiuni hundredelinni siullerni ajoqersuisooqqusersut inngilillu qanoq assiigiinngitsigisut: ’[Ajoqersuisooqqusersut] saperuttaallutik tatituugamik naalannartut uulinnatik mitaatigisarpaat, naalli inngilit nakuussutsikkut pissaassutsikkullu annerugaluarlutik taakku mitalliutaasumik [Jehovap] saani eqqartuutinngikkaat.’ (2 Pîtruse 2:10-13) Ajoqersuisooqqusersut ’naalannartut’ — utoqqaanertat ukiuni hundredelinni siullerni kristumiut ilagiissaanni oqartussaatitaasut — mitaatigaat, inngililli ajoqersuisooqqusersut qatanngutigiinnik saqitsaatilersitsisut mitaatiginngilaat. Inngilit inunnit qutsinnerungaartumik inissisimaffillit naapertuilluarnermullu misigissuseqarnerungaartut nalunngilluinnarpaat ilagiinni qanoq pisoqartoq, Jehovali ataqqigamikku eqqartuussisussanngortippaat. — Eprîarit 2:6, 7; Jûtarse 9.
17. Misigigutta utoqqaanertat arlaat eqqortumik iliuuseqanngitsoortoq upperneq qanoq pingaaruteqarpa?
17 Naak aalajangersimasoq iliuuseqarfigineqarnissamisut iliuuseqarfigineqanngikkaluartoq Jesus Kristus ilagiit niaqorigaat uumasoq upperigipput takutittariaqannginnerparput? Taassuma nakkutiginnginnerpaa nunarsuaq tamakkerlugu ilagiinni pigisamini qanoq pisoqarnersoq? Taassuma ajornartorsiummut aaqqeeriaasia, ilagiinnillu siulersueriaasia akueralugulu ataqqisariaqannginnerparput? Aap, ’kinaagatta aapparput eqqartuupparput’? (Jâko 4:12; 1 Korintumiut 11:3; Kulorsamiut 1:18) Ernumassuteqarutta Jehova qinnuigalugu eqqaasinnaavarput.
18, 19. Isumaqarutta utoqqaanertaq kukkusimasoq qanoq iliorsinnaavugut?
18 Inuttut naammalluinnanngitsuugatta ajornartorsiulertarlutalu artornartorsiulertarpugut. Ilaannikkut utoqqaanertat ilaat kukkussuteqarsinnaavoq arlalinnut ernumalersitsisumik. Taamaattoqartillugu iliuuseqapallappallaarneq iluaqutaanngilaq. Taamaalioraluarutta ajornartorsiut ajornerulersinneqaannassaaq. Anersaakkut oqimaaqatigiissitsisinnaasut Jehovap piffissanngorpat akuliunissaa kissaatigisamitullu pisariaqartumik perorsaatissiinissaa utaqqissavaat. — 2 Timûtiuse 3:16; Eprîarit 12:7-11.
19 Ernumatinneqaleruttali qanoq iliortariaqarpugut? Ikiorneqarumalluta utoqqaanertat ataqqinnittumik saaffiginissaat pitsaanerussaaq ilagiinniittut allat tamatuminnga oqaloqatiginagit. Isornartorsiuinnngikkaluarluta utoqqaanertanut nassuiaasinnaavugput qanoq misigitinneqartugut. Eqqaamajuartigu qatanngutigigivut, ataqqiuartariaqarlugillu saaffigigaangatsigik. (1 Pîtruse 3:8) Mitalliisuusariaqanngilagut, kristumiutulli inersimalluarnerat tatigisariaqarparput, Biibililu tunngavigalugu asannittumik unnersuussutaat pingaartittariaqarlugu. Arlaannillu iluarsisariaqartunik pissuseqartoqarpat Jehova tatigisinnaavarput Jehovap utoqqaanertat siulersussagai ajunngitsumik eqqortumillu iliornissaannut. — Galâsiamiut 6:10; 2 Tásalûníkamiut 3:13.
20. Allaaserisami tulliuttumi suna sammineqassava?
20 Oqartussaatitaasunik ataqqinninnermut atatillugu suli alla eqqarsaatigineqartariaqarpoq. Oqartussaatitaasut aamma nakkutigisaminnut ataqqinnittariaqannginnerpat? Tamanna allaaserisami tulliuttumi sammissavarput. (wE 15/6 2000)
Eqikkaaneq
• Oqartussaatitaasunut ataqqinninnissatsinnut sumik pissutissaqarluarpugut?
• Jehovap Jesusillu oqartussaatitaanermik Guutimeersumik ataqqinninngitsut qanoq isigaat?
• Oqartussaatitaasunik ataqqinninnermikkut maligassaalluartunik taasaqarit.
• Oqartussaatitaasumik uatsinnut kukkusoqarsorigutsigu qanoq iliorsinnaavugut?
[Atuaqqissaarnermi apeqqutit]
[Qupp. 8-mi assiliartaq]
Sara Abrahamip oqartussaatitaaneranut ataqqinningaarami pilluarpoq
[Qupp. 9-mi assiliartaq]
Mikalip Davidip kunngitut ilaqutariinnilu niaquusutut oqartussaatitaanera ataqqinngilaa
[Qupp. 11-mi assiliartaq]
„[Jehovap] tanitami uannit ajoquserneqarnissaa pinngitsoortikkiliuk.“
[Qupp. 12-mi assiliartaq]
Ernumassuteqaruit Jehovamut qinuninni eqqaasinnaavat