Inuup inuuneranik oqaluttuaq

Silarsuarmi qaammaqqusersuisoq George Youngip inuuneranik oqaluttuaq

Oqaluttuartoq: Ruth Young Nicholson

„Soormi taava oqaluttarfitsinni nipangiunneqassava? . . . Inuttut qanoq ittuussagaluarpugut paasisavut ilumoortuusut ilisimallualereerlugit nipangiukkutsigit taakkualu allaaseraakka? Inuilli ilisimatinnaveersaarnagit, sallusuissut utoqqatsissutissarsiornata erseqqissumillu oqaluussissutigitigu.“

OQAATSIT tamakku 33-nik quppernilinnik allakkat, oqaluffimmi ilaasortat aqqisa allassimaffiannit ataatama atini peerneqaqqullugu allagaasa ilaminiinnannguarai. Ukiumi 1913-imi pisimavoq. Tamatuma kingorna silarsuarmi qaammaqqusersuisutut sulinera pissanganartoq aallartippoq. (Filípimiut 2:15) Meeraaninninngaaniilli ilaquttanni allanillu ataatama misigisaanik oqaluttuat katersorsimavakka, ikinngutillu ikiortigalugit inuunera paasisaqarfigisimallugu. Amerlasuutigut ataatama inuunera apustili Paulusip inuuneranut eqqaanartoqartippara. Taasumatut ’inuiaqatigiinnut apustiliusutut’ ataata Jehovap tusarliussaa inunnut tusarliunniarlugu nunanut allanut qeqertanullu aallarnissaminut piumassuseqartuaannarpoq. (Rûmamiut 11:13; Tussiaat 107:1-3) Ataataga, George Young, oqaluttuarilara.

Ukiut siusinnerusut

John aamma Margaret Young, presbyterinut Skotlandimiunut ilaasortaapput, ataatalu ernerinit nukarlersaavoq. Septembarip 8-ani 1886-imi inunngornerata kinguninnguagut ilaqutariit Edinburghimit Skotlandimiittumit Canadap kitaanut British Columbiamut nuupput. Ataatap angajui pingasut — Alexander, John Malcolmilu — ukiualuit tamatmuma siorna Skotlandimi inunngorput. Marion, nukappiaqqat najaat, Nelliemik taaneqartartoq, ataatamit ukiunik marlunnik nukarliuvoq.

 British Columbiami, Saanichimi, Victoriamit ungasinngitsumi pilluarlutik akisussaafimmik ilinniaatigalutik nunami alliartorput. Taamaattumik angajoqqaavi Victoriameereerlutik uteraangata silami suliassat suliarineqareersimasarput, illulu torersarneqareersimalluni.

Ukiut ingerlaneranni ataatap angajuisalu aatsitassarsiorneq qisulerinerlu soqutigilerpaat. Qatanngutigiit Youngikkut orpippassuaqarfiit qisuttarinnersiorlugit angalasarput, pisisarlutillu tuniniaasarput. Ataatap aningaasanut tunngasut tamaasa akisussaaffigai.

Piffissap ingerlanerani ataata anersaamut tunngasunik soqutiginnilerami aalajangerpoq presbyterianerinut palasinngorniarluni. Tamatuma nalaani Zion’s Watch Tower Tract Societymi præsidentip siulliup Charles Taze Russellip oqalugiaatai aviisini naqinneqarsimapput, tamannalu inuuneranut sunniuteqangaalerpoq. Ilikkakkaminit killinneqarluni oqaluffimmit ilaasortaajunnaarluni allakkani aallaqqaataani eqqartorneqartut allappai.

Ataatap versit Biibilimeersut atorlugit inussiarnersumik erseqqissumilli oqaluffiup ajoqersuutai, tarneq toqusuitsoq aamma anniarfimmi ikualasumi inuit naassaanngitsumik Guutip naalliutsikkai, ilumuungitsut uppernarsarpai. Aamma ajoqersuut, Guuti ataasiullunilu pingasuusoq, kristumiuunngitsunik pilerfeqartoq Biibilimillu tunngaveqanngitsoq qulaarpaa. Taamanili Jesus Kristus tumisiulerpaa kristumiutullu kiffartorneq maniguulluni piginnaassutsini nukinilu tamaasa atorlugit Jehovap unnersiutiginissaanut atulerpai.

1917-imi pilgrimitut kiffartuussilerpoq; taamani nakkutilliisut angalasartut Napasuliaq Alapernaarsuiffiup Peqatigiiffianit aallartitat taama taaneqartarput. Canadami illoqarfissuarni illoqarfinnilu oqalugiartarpoq aammalu „Skabelsens Fotodrama“, tassa filmi assillu seqersittakkat, takutittarlugu. Ataataga tikeraaraangat isiginnaartitsisarfiit ulikkaavittarput. Pilgrimitut tikeraarnerisa allattorsimaffii 1921 tikillugu The Watchtower-imi takuneqarsinnaapput.

Winnipegimi aviisit ilaanni allassimavoq oqaluussisup George Youngip inuit 2500-t oqalugiarfigisimagai amerlasuullu isersinnaasimanngitsut inersuaq ulikkaarmat. Ottawami qulequtaq „Anniarfimmut utimullu“ oqalugiaatigaa. Angutip utoqqaap ima allaatigaa: „Oqalugiaat naammat George Youngip palasit arlallit oqaluttarfimmukaqquai oqalliseqatigiumallugit, arlaannaalluunniit nikuinngilaq. Taava paasilerpara sallusuissut nassaaralugu.“

Ataata pilgrimitut tikeraaraangami anersaamut tunngasut sapinngisamik amerlanerpaat piffissaqarfiginiartarpai. Naggataatigullu tuaviortariaqartarpoq illoqarfiup tullianut qimuttuitsut angumeriniarlugit. Suliassami tullianut biileraangami amerlanertigut ullaaralaannguakkut aallartarpoq. Ataata eqiasuitsuunermi ilungersuussinermilu saniatigut aamma allanik soqutiginnittutut, kristumiutullu suliamigut tukkornermigullu tusaamasaavoq.

Ataatsimeersuarnerpassuarni najuuffigisamini ingammik Edmontonimi Albertamiittumi 1918-imi pisimasoq puigunaatsinnerpaavaa. Nellie kuisissammat ilaqutariit tamarmik najuupput. Ataata qatangnutinilu kingullermik katerisimaarsimapput,  ukiut marluk tamatuma kingorna Malcolm puallulluni toqummat. Malcolm ataatamisulli qatanngutimisullu qilammi inuunissaminik neriugisaqarpoq, tamarmillu toqussartik tikillugu Guutimut aalajaattuarput. — Filípimiut 3:14.

Nunanut allanut

1921-imi Canadami ataata angalalluni oqaluussereerami Joseph F. Rutherfordimit, taamani Peqatigiiffimmut præsidentiusumit, Caribiamut aallartinneqarpoq. Sumiluunniit ataatap „Skabelsens Fotodrama“ takutikkaangagu ilassilluarneqartarpoq. Trinidadimiitilluni ima allappoq: „Inersuaq ulikkaavippoq, inuppassuillu utiinnartariaqarput inissaqanngimmat. Unnuup tulliani aamma inersuaq inunnik tattoqippoq.“

1923-mi ataata Brasiliamut aallartinneqarpoq. Tassani tusarnaartorpassuit oqaluffigisarpai, ilaatigut oqalutsimik attartorluni. Vagttårnet-imi 1. januaari 1924-moortumi ima atuarneqarsinnaavoq: „Juunip aallaqqaataaniit septembarip 30-ata tungaanut qatanngutip Youngip ataatsimiinnerit tamanut ammasut 21-t, katillugit 3600-nit najuuffigineqartut, ilagiinnullu ataatsimiinnerit 48-t, 1100-nit najuuffiginneqartut, siulersorsimavai, Portugalimiutullu atuagassiat akeqanngitsut katillugit 5000-it agguaassimallugit.“ Ataata „Inuit millionilikkuutaat maanna inuusut toqunngisaannassapput“-mik oqalugiaraangat inuppassuit soqutiginningaarnertik ersersittarpaat.

Marsip 8-ani 1997-imi Brasiliami immikkoortortaqarfik allineqarmat atuagaaqqami, tamatumunnga tunngatillugu saqqummertumi, ima allassimavoq: „1923: George Young Brasiliamut tikippoq. Rio de Janeiromi immikkoortortaqarfiliornissaq piareersarpaa.“ Atuagassiat Biibilersaarutit Spaniamiutuut saniatigut aamma Portugalimiutut, tassa Brasiliami oqaatsit pingaarnerit atorlugit, saqqummersinneqarnissaat pisariaqartinneqarpoq. Taamaatumik 1. oktobarip 1923-mi Napasuliaq Alapernaarsuiffik Portugalimiutut saqqummertalerpoq.

Brasiliami ataatap nuimasorpassuit attavigisalerpai. Angut pisooq Portugalimiu Jacintho Pimentel Cabralimik atilik naapippaa, taassumalu angerlarsimaffimmi ataatsimiinnernut atorneqarsinnaanera neqeroorutigaa. Erniinnaq Jacinthop sallusuissut Biibilimeersoq ilassivaa, kingusinnerusukkullu immikkoortortaqarfimmi sulilerluni. Aamma Portugalimiumik naatsiivilerisumik Manuel da Silva Jordãomik atilimmik inuusuttoqarpoq. Ataatap tamanut ammasumik oqalugiaataa tusarnaareerlugu Portugalimut uterumallerpoq kolportørinngorniarluni, qanga Jehovamut nalunaajaasut piffissaq tamaat oqaluussisartut taama taaneqartarput.

Ataatap Brasilia tamaat qimuttuitsunik angalaarfigaa, soqutiginnittorpassuillu naapillugit. Angalanermi ilaanni Bony aamma Catarina Green naapippai, sapaatip-akunnerilu marlungajaat taakkunaniippoq sallusuissummik Biibilimeersumik oqaloqatigisarlugit. Tamatuma kingunerisaanik ilaqutariinnut ilaasut arfineq-marluk Jehovamut tunniulluinnarlutillu kuisipput.

1923-mi Sarah Bellona Ferguson aamma ataatap atassuteqarfigilerpaa. 1867-imi aninilu, Erasmus Fulton Smith, ilaquttanilu tamaasa ilagalugit USA-mit Brasiliamut nuussimavoq. 1899-imiilli Napasuliaq Alapernaarsuiffik–mik tuluttut aalajangersimasumik nassiffigitittarpoq. Ataata tikeraarmat kiisami sivisuumik kissaatigisimaqisamisut Sarah kuisissinnaalerpoq, meeraalu sisamat aamma ataatap Sallie ajamik taasaa, kuisipput. Marsip 11-ani 1924-mi tamanna pisimavoq.

Sivitsunngitsoq ataata Amerika Kujallermi nunani allani oqaluussisalerpoq. Novembarip 8-ani 1924-mi Perumiitilluni ima allappoq: „Limami Callaomilu naqitaaqqat 17.000-it agguaateqqammerpakka.“ Tassanngaanniit Boliviamukarpoq naqitaaqqanik agguaajartorluni. Tamanna qanoq ingerlasimanersoq ima allaatigaa: „Ataatatta qilammiusup ilungersornivut pilluaqquai. Eqqilimmit, kuussuup Amazonip aariaani najugaqartumit, ikiorneqarpunga. Uteruni naqitaaqqat 1.000-it atuakkallu arlallit nassassavai.“

Ataatap sulinera pissutigalugu sallusuissutip Biibilimeersup naatsiiassartai nunani arlalinni Amerika Qiterlermi Kujallermilu  siaruarterneqarput. The Watchtower-imi, 1. decembari 1924-moortumi allassimavoq: „Maanna George Young ukiut marluk sinnilaarlugit Amerika Kujallermiippoq. . . . Qatanngutip asasap taassuma Punta Arenasimi, Magellanip Ikerasaaniittumi, sallusuissummik tusagassaq tusarliutissallugu immikkut pisinnaatitaaffigisimavaa.“ Aamma nunani soorlu Costa Ricami, Panamami Venezuelamilu ataata oqaluussinermi aallarniisuuvoq. Naak malariamik nappaateqaleraluarluni peqqiillioraluaqalunilu ingerlaqqippoq.

Taavalu Europamut

Marsimi 1925-mi ataata Europamukarpoq Spaniami Portugalimilu naqitaaqqat Biibililersaarutit 300.000-it agguaakkumallugit qatanngutillu Rutherfordip tikinnissaanut piareersarniarluni. Kisianni Spaniamut tikikkami upperisarsiornikkut allatut isumalinnik akaarinninngitsoqarmat qatanngutip Rutherfordip oqalugiarnissaa ataatap nangaanartoqartinnerarpaa.

Akillugu allakkamini qatanngutip Rutherfordip Jesaja 51:16 innersuussutigaa, tassani allassimavoq: „Oqaasissakka illissi qanissinnut pisippakka assammalu alanngortaanut toqqorlutit, qilak isivippara nunarsuarlu tunngavilerlugu Sionimittttunullu oqarpunga: ’Innuttaraassi’.“ Taava ataata oqarpoq: „Tassa Naalakkap piumasaraa ingerlaannassasunga kingunerilu taassumunnga isumagisassanngortissagikka.“

Maajip 10-ani 1925-mi qatanngut Rutherford Barcelonami Novedades Theaterimi oqalutseqarluni oqalugiarpoq. 2000-t sinnerlugit najuupput, ilaatigut naalagaaffimmi atorfilik aamma immikkut ittumik isiginnaartitsivimmi nakkutilliisoq. Taamatuttaaq Madridimi 1200-t najuuttoralugit taama pisoqarpoq. Oqalugiaatit tamakkunannga soqutiginnilersitsinerisa kinguneraa Spaniami, 1978 Yearbook of Jehovah’s Witnesses naapertorlugu ’George Youngimit siulersorneqartumik’ immikkoortortaqarfeqalerneq.

Maajip 13-ani 1925-mi qatanngut Rutherford Lissabonimi Portugalimiittumi oqalugiarpoq. Aamma tassani tikeraarneq iluatsilluarpoq, naak palasit ataatsimiinneq ajoquserniarlugu suaartarlutillu issiavinik millooraluartut. Spaniami Portugalimilu qatanngutip Rutherfordip oqalugiareermat ataatap „Skabelsens Fotodrama“ takuteqqeqattaarpaa, sumiiffinnilu taakkunani atuagassianik Biibililersaarutinik naqitertitsisarlunilu agguaassisarpoq.  1927-mi nalunaarutigaa tusagassaq nuannersoq „Spaniami illoqarfissuarni illoqarfinnilu minnerusuni tamani oqaluussissutigineqareersoq.“

Sovjetunionimi oqaluussineq

Ataatap ajoqersuiartortitatut kiffartorfissaa tulleq tassaavoq Sovjetunion, tassungalu aggustip 28-ani 1928-mi tikippoq. Allakkat oktobarip 10-ani 1928-mi ullulerneqartut ilaannaa imaappoq:

„Ruslandimut tikikkamali suli ilungersornerullunga qinusarpunga ’naalagaaffiit tikiulli’. Oqaatsit ilikkalerpakka, arriitsumilli. Oqalutsiga angut qaqutigoorluinnartuuvoq. Juutiuvoq, Kristusili upperaa Biibililu nuannareqalugu. Soqutiginartunik misigisaqarpunga, naluarali qanoq sivisutigisumik suli maaniissinnaatitaanerlunga. Sapaatip-akunnerani kingullermi nalunaaquttap-akunneri 24-t qaangiutsinnagit aallaqquneqarpunga, tamannali allanngortinneqarpoq sivisunerulaartumik maaniissinnaalerlunga.“

Kharkovimi, maanna Ukrainemi illoqarfissuanngortumi, Biibilimik atuaqqissaartartut naapippai. Naapinnerallu qiimmaallaataaqaaq amerlasuullu nuannaarnermik qullilipput. Unnuit tamaasa unnuaqeqqata tungaanut ataatsimeersuaarartarput. Kingusinnerusukkut qatanngutinik naapitsinini pillugu ataata ima allappoq: „Qatanngutit nallinnat! Atuagaatimininngui arsaarinnissutigineqarsimapput, naalakkersuisullu inussiarniipput; taamaakkaluartorli qatanngutit nuannaarput.“

Ataatap Sovjetunionimi kiffartornera atuagassiaaqqami immikkut ittumi eqqaaneqarpoq, Skt. Petersborgimi Ruslandimiittumi, immikkoortortaqarfimmik nutaamik atoqqaartitsinermi juunip 21-ani 1997-mi najuuttunut iluaqutissatut pilersinneqartumi. Atuagassiaaqqami oqaluttuarineqarpoq ataata Moskvamut aallartinneqartoq aamma „Ruslandimi agguaassassanik atuagassiaaqqanik Frihed for Folket aamma Hvor er de Døde? 15.000-ngorlugit naqiterinissaminut“ akuerineqartoq.

Ruslandimit uterami USA-mi pilgrimitut kiffartortunngortitaavoq. South Dakotami Nellena aamma Venda Pool, nukariit kingorna Perumi ajoqersuiartortitanngortut, pulaarpai. Ataatap qasusuilluni kiffartorneranik pingaartitsingaarnertik oqaatigaat nangillutillu: „Taamanikkut qatanngutit nalunanngitsumik pioneeritut anersaaqarput pigisakillutillu nunanut takornartanut aallartarlutik kisianni uummataat Jehovamut asanninnermik ulikkaarlutik. Tamanna kajumississutigalugu taama naammassisaqartigisinnaapput.“

 Aappariinneq angalanerlu alla

Ukiuni arlalinni ataatap Clara Hubbert Ontariomi, Manitoulin Islandimeersoq, allaqatigisarsimavaa. 26. juuli 1931-mi ataatsimeersuarnermi Columbusimi Ohiomiittumi Biibilimik atuaqqissaartartut Jehovap Nalunaajaasuinik taaguuteqalermata tamarmik najuupput. (Jesaja 43:10-12) Sapaatip-akunnerata tulliani katipput. Sivitsunngitsoq ataata aallaqqittariaqarpoq tamatumuuna qeqertanut Caribiamiittunut aappassaanik ajoqersuiartorluni Tassanilu ataatsimiinnerit aaqqissuunnerinut illumiillu-illumut oqaluussinermik ilinniartitsinermut peqataalluni.

Anaana assinik, assiliaaqqanik allakkanillu Surinamimit, Sankt Kittsimiit allarpassuarniillu nassiussarsisarsimavoq. Oqaluussinermi siumukariarnerit ilaatigullu timmissat, uumasut naasullu nunani taakkunaniittut allaaserisarpai. 1932-mi juunimi ataatap Caribiami suliassani naammassivaa, ileqqumisullu akikinermiilluni Canadamut angerlarluni. Tamatuma kingorna anaanalu piffissaq tamaat kiffartoqatigiipput, 1932/33 ukiukkut piffissaq tamaat kiffartortorpassuillu Ottawap eqqaaniissimapput.

Ilaqutariittut inuuneq sivikitsoq

1934-mi aniga, David, inunngorpoq. Mikisuullunili anaanap natsaminut poorisartagaanut qaqilluni oqalugiartuusaartarpoq. Inuunini tamaat ataatamisulli Jehovamik ilungersuutiginninnini takutittuarpaa. Pingasuullutik biilimik højtalerilimmik ingerlaartarput Canadami ilagiit kangianiit kitaanut tikeraartarlugit. 1938-mi ataata British Columbiami kiffartortillugu inunngorpunga. Davidip eqqaamavaa ataatap siniffimmut iligaanga pingasuullutillu siniffiup saanut seeqqummerlutik ataatalu uanga pillunga qujalluni qinusoq.

1939-mi ukiukkut Vancouverimi najugaqarpugut ataatama ilagiit eqqaaniittut pulaaqattaarnerini. Ukiut ingerlanerini allakkat katersukkatta ilaagaat ataatap British Colombiami Vernonimiitilluni januaarip 14-ani 1939-mi allagai. Ataatap allakkat Claramut, Davidimut Ruthimullu allassimavai, aallaqqaataalu imaappoq: „Pakkussilaarnerinnaq kunissilaarnerinnarlu.“ Allakkani tamatta immikkut allaffigisimavaatigut. Katersugassat amerlaqisut sulissussalli ikeqisut eqqartorpaa. — Matîuse 9:37, 38.

Suliassani naammassereerlugit Vancouverimit uterami sapaatip-akunnera qaangiuttoq ataatsimiinnermi uppippoq. Nakorsamit misissortinnerup takutippaa qaratsamigut kræftertoq. Maajip 1-iani 1939-mi nunami inuujunnaarpoq. Taamani qulingiluanik qaammateqarpunga, Davidilu tallimanik ukioqarpoq. Anaanarput asasarput qilammi neriugisalinnut ilaasoq juunip 19-ani 1963-imi toqussi tikillugu aalajaattuarpoq.

Nutaarsiassap nuannersup nunanut arlalinnut ingerlateqqinnissaanut pisinnaatitaaffini qanoq isiginerini ataatap anaanamut allakkamini kusanartumik ima oqaatigaa: „Jehovap angingaassutsiminik nunani makkunani Naalagaaffimmik tusarliussap qaamarnanik qaammaqqusersuitippaanga. Aqqa illernartoq unnersiutigineqarli. Qajannassutsikkut, sanngiissutsikkut naammanngissutsikkullu naalannassusia qaamavoq.“

George aamma Clara Youngikkut meeraasa, ernutaasa ernutaqqiutaasalu aamma Guuterput asannittoq, Jehova, kiffartuuppaat. Tusarpara ataatap akuttunngitsumik Eprîarit 6:10 issuartaraa. Imaappoq: ’Guuti iluaatsuunnginnami sulinersi asanninnersilu aqqa pillugu ileqqorisarsi puiussanngilai’. Uaguttaaq ataatap suliai puiunngilavut. (wE 1/7 2000)

[Qupp. 24-mi assiliartaq]

Talerpilleq ataataga, angajuilu pingasut

[Qupp. 26-mi assiliartaq]

Nikorfasoq ataata qatanngutit Woodworth, Rutherford Macmillanilu

Ataani: Saamerlerpaaq ataata qatanngut Russell allallu

[Qupp. 27-mi assiliartat]

Ataata anaanalu

Ataani: Katikkamik

[Qupp. 28-mi assiliartaq]

David, anaana uangalu ataatap toquneranit ukiualuit qaangiuttut