’Tamassi qatanngutigiippusi’
’Tamassi qatanngutigiippusi’
’Ilissili ajoqersuisunik taaqqussanngilasi, ataaseq ajoqersortigigassiuk, Kristus; ilissili tamassi qatanngutigiippusi.’ — MATÎUSE 23:8.
1. Kangiamiu arnaq qanoq aperiva, tamannalu sumut ersiutaava?
„KINA ataqqisariaqarnerua, ajoqersuiartortitaq Betelimiluunniit sulisoq?“ arnap Kangiamiup kristumiup ajoqersuiartortitaq Australiameersoq taama aperaa. Paaserusuppaa kina ataqqisariaqarnerunersoq, ajoqersuiartortitaq nunamit allameersoq imaluunniit nunami tassanimiu Guutip oqaasianik kiffartortoq Napasuliaq Alapernaarsuiffiup immikkoortortaqarfiani sulisoq. Ajortumik isumaqarani apeqqut tamanna, atorfikkaajunermik pingaartitsineq kulturimut ersiutaasoq, ajoqersuiartortitap tupaallaatigaa. Kia pingaaruteqarneruneranik aperisup ataasiakkaat qanoq pissaaneqartiginerannik oqaasissaqatiginerannillu paasisaqarusunnermik pissuteqarpoq.
2. Uppeqativut qanoq isigisariaqarpavut?
2 Kia pingaaruteqarneruneranik aatsaat soqutiginnittoqalinngilaq. Allaat Jesusip ajoqersugaasa arlaleriarlutik oqallisigisarpaat kina annerunersoq. (Matîuse 20:20-24; Mákorse 9:33-37; Lúkarse 22:24-27) Taakkuattaaq ukiuni hundredelinni siullerni juutiussutsimit kulturikkut immikkoortitsiffiusuminngaanneerput. Kulturi taanna eqqarsaatigalugu Jesusip ajoqersukkani ima unnersuuppai: ’Ilissili ajoqersuisunik taaqqussanngilasi, ataaseq ajoqersortigigassiuk, Kristus; ilissili tamassi qatanngutigiippusi.’ (Matîuse 23:8) Biibilimik misissueqqissaartartoq Albert Barnes naapertorlugu upperisarsiornikkut taaguutip, soorlu ’rabbi’ ’ajoqersuisumik’ isumallip, taamatut taaguutillit pingaarniartunngortissinnaavai piginnaaneqarnerusutullu misigitissinnaallugit, taamatullu taaguuteqanngitsut sinngalersinnaallutillu nikanartutut misigilersinneqarsinnaapput. Tamatumani anersaaq taamaaliornerlu ’Kristusimi peqqusersuinermut’ akerliulluinnarpoq. Taamaattumik kristumiut nakkutilliisutik ’utoqqaanertamik’ taallugit oqaluunneq ajorpaat, oqaaserlu ’utoqqaanertaq’ qujanarniutitut atortarnagu. (Job 32:21, 22) Akerlianik utoqqaanertat Jesusip unnersuussutaanik malinnittut ilagiinniittunik allanik ataqqinnittarput, soorluttaaq Jehova pallorfigisiminik ilumoortunik ataqqinnittartoq Jesusilu ajoqersukkaminik ilumoortunik ataqqinnittarluni.
Jehovap Jesusillu maligassiaat
3. Jehovap qanoq ililluni pinngortitani anersaajusut ataqqivai?
3 Naak Jehova nammineq ’Qutsinnerusaartuulluni’ aallaqqaataaniilli pinngortitani ataqqiuarsimavai suliaminut peqataatillugit. (Tussiaat 83:19) Jehovap inuk siulleq pinngortikkamiuk ernituani ’suliortutut’ suliamut peqataatippaa. (ússatit 8:27-30; 1 Moses 1:26) Jehova kunngi ajortoq Akab suujunnaarsikkumallugu aalajangerami, allaat inngilit kajumissaarpai qanoq taamaaliortoqarsinnaaneranik siunnersuuteqaqqullugit. — 1 Kunngit 22:19-23.
4, 5. Jehovap qanoq ililluni inuit ataqqisarpai?
4 Jehova silarsuarmi kisimi Oqartussaasutut naalakkersuivoq. (5 Moses 3:24) Inuit isumasiortariaqanngilai. Taamaattoq sikiffigaalusooq takuniarlugit. Tussiaasiortut ilaat allappoq: „Kina ippa [Jehovatut] Guutitsitut qilammi nunamilu, taanna pavanersuaq issiavoq samungarsuarli isigaluni! Makitippai nikanartoq pujualanit, piitsorlu arsakunit.“ — Tussiaat 113:5-8.
5 Jehova Sodomamik Gomorramillu suujunnaarsitsitsinnani Abrahamip apeqqutaanut tusarnaarpoq paasitillugulu naapertuilluartumik pisoqassasoq. (1 Moses 18:23-33) Naak Jehovap siumut nalunngereeraluaraa Abrahamip qinnutigisai qanoq kinguneqarumaartut, naammagittarluni Abraham tusarnaarpaa oqaasiilu narraatiginagit.
6. Jehovap Habakkukip apeqqutaasa akinerisigut ataqqigamiuk Habakkukimut qanoq sunniuteqarpa?
6 Jehovap aamma Habakkuk tusarnaarpaa aperimmani: „[Jehova], qanoq sivisuutigisumik kappialassanerpunga ilinnit tusarneqarnanga?“ Jehovap Habakkukip taama aperinera oqartussaanerminut apeqqusiinertut isigivaa? Naamik, Habakkukip apeqqutai naleqqulluartutut isigai, akillunilu paasitippaa Kaldæamiut atorlugit eqqartuussutini naammassiumaarlugu. Pruffiiti qularunnaarsippaa eqqartuussut siulittuutigineqartoq ’eqquutinngitsoorani piviusunngorumaartoq’. (Habakkuk 1:1, 2, 5, 6, 13, 14; 2:2, 3) Jehovap pruffiiti Habakkuk ataqqivaa taassuma isumakuluutai ilumoorullugit apeqqutaalu akillugit. Taamaalilluni pruffiiti ernumasoq qiimmassarneqarpoq. Guutini annaassisini tatigilluinnarlugu tipaatsuutigeqqissinnaavaa, ullumikkuttaaq Habakkukip allagaasigut isumassarsiarititaasutigut Jehovamut tatiginninnerput nakussatsinneqarpoq. — Habakkuk 3:18, 19.
7. Sooq ukiumi 33-mi Piinsip ulluani Peterip suliassaa maluginiarnartuua?
7 Jesus Kristus aamma allanik ataqqinnittarnermigut maligassiuilluarpoq. Ajoqersukkani ima oqarfigai: ’Uannik inunnut nassuerutiginnittoq uangattaaq nassuerutigiumaarpara Ataatannut qilammiusumut; uannilli inunnut miserratiginnittoq uangattaaq miserratigiumaarpara Ataatannut qilammiusumut.’ (Matîuse 10:32, 33) Unnuamili killuutigineqarfiani ajoqersugaasa tamarmik qimappaat, apustilillu Peterip pingasoriarluni miserratigaa. (Matîuse 26:34, 35, 69-75) Jesus qalliinnarsiunngilaq, Peterilli qamuuna misigissusii peqqissimingaarneralu soqutigineruvai. (Lúkarse 22:61, 62) Ullut 51-innaat qaangiuttut Kristusip apustili peqqissimisoq ataqqivaa ullormi Piinsemi Jesusip ajoqersugaanut 120-nut sinniisuutikkamiuk ’qilammiup naalagaaffiata matuersaataasa’ siullersaat atoqqugamiuk. (Matîuse 16:19; apustilit suliait 2:14-40) Peter allamik isumataarnissaminut ’qatanngutiminillu nakussatsitsinissaminut’ periarfissinneqarpoq. — Lúkarse 22:31-33.
Ilaqutariinni ataqqeqatigiigitsi
8, 9. Uiusup qanoq ililluni Jehova Jesusilu ilaarlugit nuliani ataqqisinnaavaa?
8 Uiusut angajoqqaallu aamma Jehova Jesus Kristusilu ilaartariaqarpaat oqartussaanersertik Guutimeersoq atoraangamikku. Peter ima kajumissaarivoq: ’Taamattaaq angutaasusi nuliasi silalimmik inooqatigisigik, pisattatut qajannarnerusutut iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ (1 Pîtruse 3:7) Takorlooriaruk naasulivik marraq kusanartoq, soorunami qummuattamit qisummit sanaamit qajannarnerusoq. Taanna qajassuunnerusariaqannginnerpa? Uiusup Jehova ilaarlugu nuliani ataqqisinnaavaa ilaqutariinni aalajangigassaqaraangat isumasiorneratigut. Eqqaamajuk Jehovap Abrahamip tusarnaarnissaa piffissaqarfigigaa. Uiusoq naammalluinnanngitsuuvoq, taamaattumillu immaqa suut tamaasa eqqumaffigisinnaanngilai. Uiusup nuliami isumaasa soqutiginerisiugut ataqqippagu silatusaarnerussanngila?
9 Nunani uiusunut oqartussaassuseqangaarfiusuni, uiusup eqqaamasariaqarpaa nuliami immaqa qamuuna misigissutsimi oqaatiginissaat ajornakusoortissinnaagaa. Jesus Kristusip nunamiikkallarami ajoqersukkaminut, katersanut ’nuliassanut’ ilaasunut, isumaginninnera uiusup ilaarsinnaavaa. Jesusip taakku isumagai timikkut anersaakkullu killeqarneri soqutigalugit, allaat pisariaqartitatik oqaatiginngikkaluaraat. (Mákorse 6:31; Juánase 16:12, 13; Evfisumiut 5:28-30) Uiusup malugisariaqarpaattaaq nuliami imminut ilaquttaminullu iliuuserisai, pingaartitsininilu oqaatsimigut iliuutsimigullu takutittariaqarlugu. Jehovap Jesusillu nersualaartariaqartut pilluaqqusariaqartullu pingaartittarpaat. (1 Kunngit 3:10-14; Job 42:12-15; Mákorse 12:41-44; Juánase 12:3-8) Kangiamiu arnaq kristumiu uini Jehovamut Nalunaajaasunngorsimalermat oqarpoq: „Siornatigut uiga allornerit pingasut sisamalluunniit siuninni pisuttarpoq, uangalu suut tamaasa tigumiartariaqarlugit. Maanna pooqattavut tigumiartarpai angerlarsimaffitsinnilu suliakka pingaartittarlugit!“ Uiusup qujamasunnini ilumoorluni oqaatigisarpagu nulia pingaartinneqartutut misigissaaq. — Ussatit 31:28.
10, 11. Angajoqqaat qanoq Jehovap Israelikkunnut pikitsitsigajuttunut attaveqarnermini maligassiuilluarnera ilinniarfigisinnaavaat?
10 Angajoqqaat meeqqaminnut attaveqarnerminni Guuti ilaartariaqarpaat, ingammik naveerneqartariaqaraangata. „[Jehovap] Israelikkut Judakkullu“ mianersoqqusarsimagaluarpai aqqutikkut ajortukkoorunaaqqullugit, kisianni ’naalasseriitsuupput’. (2 Kunngit 17:13-15) Aap, Israelikkut „ilumoortuusaarniarfigaat qanerminnik, salluliorfigalugulu oqqaminnik“. Angajoqqaarpassuit immaqa misigisarput meeqqatik ilaannikkut taamatorluinnaq iliortartut. Israelikkut „Guuti misilinniartuartarpaat“; ajuallatsittarlugulu aliasutsittarpaat. Taamaattorli Jehova naakkinnittuuvoq, „ajortulianik isumakkiisarpoq aseruissananilu“. — Tussiaat 78:36-41.
11 Jehovap Israelikkut allaat ima qinnuigai: „Qaallusi eqqartuutitikkiartorta, . . . Ajortuliasi aappillarissaatitut aappalutsigigaluarunik aputitut qaqortigilissapput.“ (Jesaja 1:18) Naak Jehova eqqunngitsuliorsimanngikkaluarluni inuiaat pikitsitsigajuttut qaaqquai eqqartuussaaqatigiumallugit. Angajoqqaat meeqqaminnut attaveqarnerminni isummeriartaaseq taamaattoq malikkunikku pitsaassaaq. Meeqqat perorsaatissinneqartariaqarpata angajoqqaat isumaannik tusarnaarnermikkut ataqqisinnaavaat eqqarsalersinniarlugillu oqaloqatigisariaqarlugit isiginnittaasertik allanngortittariaqarneraat.
12. (a) Sooq mianersuutigisariaqarparput meeqqatta Jehovamit ataqqinerunnginnissaat? (b) Meeqqanik naveersigaangatta ataqqinassusiannik pingaartitsissagutta suna pisariaqarpa?
12 Ilaatigut meeqqat soorunami ilumoortumik oqaaqqissaarneqartariaqarput. Angajoqqaat Elitut ’ernerminut Jehovamit ataqqinninnerusutut’ iliornissartik kissaatiginngilaat. (1 Samuel 2:29) Meeqqallu malugisinnaasariaqarpaat naveersinneq asanninnermik tunngaveqartoq. Malugisinnaasariaqarpaat angajoqqaamik asagaatsik. Paulusip ataataasut ima unnersuuppai: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu Jehovamit.’ (Evfisumiut 6:4) Ataataasut oqartussaanerat suusupaginngilaa, pingaarnerpaamilli ataataasut meeqqamik ataqqinassusiat pingaartittariaqarpaat imalu sukangatigisariaqarnatik meeqqat kamatsilerlugit. Angajoqqaat meeqqat ataqqinassusiat pingaartikkunikku piffissaqartariaqarput, tamannali tamanut pingaaruteqarpoq.
13. Ilaqutariinni utoqqalisimasunut Biibili qanoq isiginnittaaseqarpa?
13 Ilaqutariinni ataqqeqatigiissagaanni uiusup nuliaminik meeqqaminillu ataqqinninnissaa naammanngilaq. Japanimiut ima ussateqarput: „Utoqqalisimasup meeqqani naalattariaqarpai.“ Ussatip tamatuma isumaa tassaavoq meeqqat inersimasunngoreerpata angajoqqaat pisinnaatitaaffimmik qaanginnginnissaat sianigisariaqaraat, meeqqatilli inersimasut tusarnaartariaqarlugit. Tamanna Biibilimut naapertuuppoq, tassani ajoqersuutigineqarmat angajoqqaat qitornatik ataqqigaat tusarnaarnerisigut, meeqqalli aamma ilaquttaminnut utoqqalisimasunut ataqqinninngitsoortariaqanngitsut. „Tusaaniaruk ataatat inuunermut pinngorfiit, anaanallu utoqqaasoq sumiginnaqinagu,“ Ussatit 23:22-mi allassimavoq. Kunngi Salomonip ussat tamanna maleruarpaa anaanamilu qinnuigaluni saaffigimmani ataqqillugu. Issiavissaarsuarmi talerpiata tungaanut issiavissaarsuarmik allamik inissiivoq anaananilu Batseba qanoq oqaasissaqarnersoq tusarnaarlugu. — 1 Kunngit 2:19, 20.
14. utoqqaat ilagiinniittut qanoq ililluta ataqqisinnaavavut?
14 Anersaakkut ilaqutariissuartut periarfissaqarluarpugut ilagiinniittut utoqqalisimasut ’ingiaqattaalluta’ ataqqissallugit. (Rûmamiut 12:10) Immaqa siornatigutut iliorsinnaajunnaarsimapput, tamannalu qularnanngitsumik aliasuutigaat. (Nalunaajaasup oqaasii 12:1-7) Oqaluussisartup tanitaasup utoqqalisup siniffimminiittualersimanini naammaginagu ima oqaatigaa: „Toqunissara erinigaara, sulileqqikkumallunga!“ Utoqqaat iluaqutigissavaat akueralugillu ataqqigutsigik. Israelikkut ima peqquneqarput: „Qeersuut nikuiffigissavasi utoqqaallu ataqqillugit.“ (3 Moses 19:32) Utoqqaat atorfissaqartinneqartut pingaartinneqartullu malugitittariaqarpavut soqutiginerisigut. Taakkununnga ’nikuinnerusinnaavoq’ ingilluta ukiullu arlallit matuma siornatigut misigisimasaat tusarnaarutsigik. Utoqqarnut ataqqinninnerput tamanna uagut anersaakkut pissarsiffigilluassavarput.
’Ataqqeqatigiigitsi ingiaqataallusi’
15. Utoqqaanertat qanoq ilillutik ilagiinniittut ataqqisinnaavaat?
15 Utoqqaanertat maligaassaalluaraangata ilagiinniittut ingerlalluartarput. (1 Pîtruse 5:2, 3) Utoqqaanertat ulapikkaluaqalutik isumaginnilluartuussapput inuusuttunik, ilaqutariinni ittuusunik, anaanaasunik kisermaanik, ningiuusunik utoqqarnillu ajornartorsiuteqarpata ajornartorsiuteqanngippataluunniit siulliullutik saaffigisariaqarpaat. Utoqqaanertat ilagiinni ilaasortaasut tusarnaartarpaat, iliuuserisimasaallu nersualaartarlugit. Utoqqaanertap eqqumasup qatanngutiminik nersuilaarisup Jehova ilaartarpaa, taassumami pinngortitani nunamiusut pingaartippai.
16. Sooq utoqqaanertat ilagiinniittutut allatulli ataqqisariaqarpavut?
16 Jehova ilaarlugu utoqqaanertat maligassaalluartuupput Paulusillu kajumissaarutaa malillugu: ’Qatanngutigiissutut asaqatigiigitsi ungagiillusi. Ataqqeqatigiigitsi ingiaqataallusi.’ (Rûmamiut 12:10) Nunani inuiaqatigiissutsikkut immikkoortitsisoqarfiunerusuni taamaaliorneq immaqa utoqqaanertanut ajornakusoorsinnaavoq. Assersuutigalugu Kangiani nunat ilaanni ’qatanngummut angummut’ oqaatsit assigiinngitsut marluk atorneqartarput. Aappaa ataqqinninnermut ersiutaavoq, aappaalu nalinginnaanerulluni. Qanittoq tikillugu ilagiinniittut oqaaseq ataqqinnippaluttoq utoqqaanertanut utoqqalisimasunullu atortarpaat, oqaatsilli aappaa allanut tamanut atortarlugu. Kajumissaarneqarpulli oqaaseq nalinginnaanerusoq tamanut atortaqqullugu, Jesusimmi ajoqersukkani oqarfigai: ’Tamassi qatanngutigiippusi.’ (Matîuse 23:8) Nunani allani immikkoortitsigajunneq immaqa taama nalinginnaatiginngikkaluarpoq, tamattali immikkoortitsiniarajunneq sianigisariaqarparput. — Jâko 2:4.
17. (a) Sooq utoqqaanertat ilassiortuusariaqarpat? (b) Utoqqaanertat qanoq ilillutik Jehova malinniarsinnaavaat ilagiinni ilaasortanut attaveqarnerminni?
17 Paulusip kajumissaaraluarpaatigut utoqqaanertat ilaat ’marloriakkamik ataqqineqaqqullugit’, sulili qatanngutigaavut. (1 Timûtiuse 5:17) ’Siooranata sassarsinnaassagutta saammaassisup issiavissaarsuanut’ silarsuarmi Naalakkap kisimi Oqartussaasup pigisaanut, aamma utoqqaanertat ’Guutimik malinninniartut’ saaffigisinnaannginnerpavut? (Eprîarit 4:16; Evfisumiut 5:1) Nakkutilliisut tamarmik ataasiakkaarlutik ilassiortuunertik nalilersinnaavaat, eqqarsaatigigunikku siunnersoqqusunit qanoq akulikitsigisumik saaffigineqartarnerlutik. Jehova ilinniarfigisinnaavaat, taassuma allat iliuuseqarnermini peqataatittarmagit. Allat ataqqisarpai akisussaaffinnik agguaanermigut. Immaqa naak oqalussisartut ilaasa siunnersuutaat piviusunngortinneqarsinnaanngikkaluartut, utoqqaanertat taakkua soqutiginninnerat pingaartittariaqarpaat. Eqqaamajuk Abraham apereqattaarmat Habakkukilu ernumatsalluni ikioqqummat Jehova qanoq qisuariartoq.
18. Ilagiinniittut ilaat ikiorneqarusuttut ingerlaqqissappata utoqqaanertat qanoq ilillutik Jehova ilaarsinnaavaat?
18 Ilagiinniittut ilaat ilaannikkut ingerlaqqissagunik ikiorneqartariaqarput. (Galâsiamiut 6:1) Taakkuattaaq Jehovap isaani erlinnannginnerunngillat ataqqineqartariaqarlutilli. „Siunnersuisup ataqqippanga taanna saaffigiuminartinnerussavara,“ oqaluussisartoq oqarpoq. Amerlanerit ataqqineqaraangamik siunnersorneqarnertik ajunngitsumik qisuariarfigisarpaat. Eqqunngitsuliorsimasoq oqalutsiinnarlugu tusarnaaqqaaraanni pisariaqartumik siunnersorneqarnini ilassiuminarnerutittarpaa. Eqqaamajuk Jehovap Israelikkut eqqarsalersinniarlugit oqaluuteqqeqattaartarai misiginneqatigigamigit. (2 Israelikkut 36:15; Títuse 3:2) Misiginneqataasumik inussiarnersumillu siunnersorneqarnerup ikiortariallit uummataat anngussavai. — Ussatit 17:17; Filípimiut 2:2, 3; 1 Pîtruse 3:8.
19. Allamik upperisallit qanoq isigisariaqarpavut?
19 Aamma anersaakkut qatanngutissarigunakkavut ataqqisariaqarpavut. Immaqa isumaqarpugut sallusuissummik ilassinninniaasaarpallaartut, naammagittarfigisariaqarpavulli inuttullu ataqqinassusiat eqqarsaatigisariaqarlugu. Jehovap ’tammarsimasoqaqqusinnginnami tamaasa allamik isumataaqquai’. (2 Pîtruse 3:9) Allat Jehovatut isigisariaqannginnerpavut? Tamatigut inussiarnerniartuarutta ikiuinerniartuaruttalu nalunaajaanissamut periarfissaqassaagut. Soorunami anersaakkut navianartorsiortitsisinnaasumik ilagisaqarusunngilagut. (1 Korintumiut 15:33) Tullitsinnulli asannittariaqarpugut allamillu upperisallit narruginagit. — apustilit suliait 27:3.
20. Jehovap Jesus Kristusillu maligassiaasa qanoq iliortissavaatigut?
20 Jehovap Jesus Kristusillu tamatta ataqqineqartussatut isigaatigut. Taakkua maligassiaat tamatigut eqqaamasariaqarparput ’ataqqeqatigiillutalu ingiaqataalluta’. Aap, Naalakkap Jesus Kristusip oqaasii eqqarsaatigiuartigik: ’Tamassi qatanngutigiippusi.’ — Matîuse 23:8. (wE 15/6 2000)
Uteqqiinissamut apeqqutit
• Uppeqativut qanoq isigisariaqarpavut?
• Jehovap Jesus Kristusillu maligassiaasa qanoq killissinnaavaatigut allanik ataqqinninnissatsinnut?
• Uiusut angajoqqaallu qanoq ilillutik allat ataqqisinnaavaat?
• Utoqqaanertat eqqaamagunikku uppeqatitik qatanngutigalugit qanoq iliussappat?
[Atuaqqissaarnermi apeqqutit]
[Qupp. 15-mi assiliartaq]
Nuliat pingaartitsinernik ersersitsivigalugu ataqqiuk
[Qupp. 15-mi assiliartaq]
Meeqqatit tusarnaarnerisigut ataqqikkit
[Qupp. 15-mi assiliartaq]
Ilagiinnittut ataqqikkit