Guutip naalagaaffianik oqaluussissutiginninnermit nutaarsiassat

Jehovamut asannittut taassuma isaani erlinnartuupput

LIBANON Biibilip nalaaniilli pinngortitap piisigut peqangaartutut tusaamasaasimavoq. (Tussiaat 72:16; Jesaja 60:13) Cederit portusuut ingammik pingaartinneqarsimapput illuliornermullu atugassatut assut piumaneqarsimaqaat, kusarnartuunertik, tipigissuunertik asiujaatsuunertillu pissutigalugu. Ukiuni hundredelinni siullerni suli pingaarnerusumik Libanonimeersoqarpoq. îvangkîlio Mákorsip agdlagâ-ni allassimavoq Tyrusip Zidonillu itsaq Libanonip eqqaani, ’nunallit inuppassuullutik [Jesusip] malunnangaartuliai tusaramikkik ornikkaat.’ — Mákorse 3:8.

Ullumikkut Libanon assingusumik Jehovap isaani erlinnartunik inerititaqarnera ingerlaannaarpoq, soorlu misigisani tulliuttuni ersersinneqartoq.

• Jehovamut Nalunaajaasoq inuusuttoq Wissamimik atilik klassiminut nalunaaquttap-akunnerata affaani oqalugiaqquneqarsimavoq. Periarfissaq tamanna atorlugu upperisani pillugu oqaluttuarniarluni aalajangerpoq pinngortitsinerlu eqqartorniarlugu atuakkamit Livet — hvordan er det kommet her? Ved en udvikling eller en skabelse?-mit piareersaalluni. Wissamip oqalugiaatissaa ilinniartitsisup takugamiuk eqqartugassaa pingaaruteqaqimmat oqalugiarnissaa 45 minutsimut sivitsoqquaa.

Wissamip oqalugiaatini aallartilluanngikkaaluunniit ilinniartitsisup nipangeqqugallarpaa atuarfiullu ningiua aatillugu. Taannalu takkummat aallaqqaataaniit aallarteqqittariaqarsimavoq. Wissamip aallarniilluni apeqqutaanut soqutiginnilluni tusarnaarpoq, oqaasiilu tupigusuutigingaaramigit atuartut tamarmik pissaannik oqalugiaataata kopiianik piumasimavoq.

Kingunitsianngua ilinniartitsisoq alla sanioqqukkami klassimi nuannaarpalunnerat malugaa. Susoqarnersoq paasiniaavoq, paasigamiullu aperivoq pinngortitaaneq pinngoriartuaarnerluunniit Wissamip uppernarsiniarneraa. „Pinngortitaaneq,“ akisoqarpoq. Ilinniartitsisup paasigamiuk Wissam Jehovamut Nalunaajaasuusoq klassimut oqarpoq: „Oqalugiaataa tusareerussiuk nalussanngilarsi ilisimatusarnerup pinngortitsineq tapersersoraa — pinngoriartuaarnerunngitsoq.“

Paasinarsivoq ilinniartitsisoq ’Skabelsesbog’-iutilik tassanngaaniillu universitetimi oqalugiaateqartarsimasoq. Qimagutinnginnermini qinnuigaa atuartitani ilagalugit aqaguani takkuteqqissinnaanerluni Wissamip taakkununnga oqalugiaatini oqalugiaatigeqqinniassammagu. Tamanna isumaqarpoq Jehova pillugu nalunaajaalluartoqaqqittoq.

• Nina 22-nik ukiulik sallusuissutsip ernganut imerusuppoq. Ullut ilaanni illuminit Biibilimik tunisippoq, illuatalu piinsisiortut oqaluffianukaqatigaa. Nuannaringaarlugu Biibili atuarpaa, atuakkaminillu paasigamiuk kristumiut oqaluussisussaasut upperisani allanut oqaluttuarisalerpaa. Tamarmik aperisarpaat: „Jehovamut Nalunaajaasuuit?“ Sooq taamatut aperisarnersut eqqumiigisarsimavaa.

Ukiut arfinillit qaangiummata Nina Jehovap nalunaajaasuinit pulaarneqarpoq, taakkullu Guutip naalagaaffia pillugu oqaluttuuppaat. Aallaqqaammut ajoqersuutaat kukkunersiorniarsimagaluarpaa, paasilertorpaali akissutaat tamarmik paasiuminartut tamatigullu Biibilimik tunngaveqartut.

Piffissap ingerlanerani Ninap Guutip aqqa Jehovasoq ilikkarpaa. Aamma ilikkarpaa Guutip naalagaaffiata suut pilluaqqussutigissagai, allarpassuillu. Tamakku qularnarunnartissimavaat sallusuissutaasoq, kingornalu Guutimut tunniulluinnarpoq kuisillunilu. Ukiut kingulliit arfineq-marluk Nina piffissaq tamaat oqaluussisartuuvoq. Nalunanngilaq Jehovap asannitsini ilumoortut pilluaqqusarai. — 1 Korintumiut 2:9. (wE 1/8 2000)