Makitanerup kanngunarsagaaneq kingunerisarpaa

„Makitassutsip kanngusunneq kingunerisarpaa, qanilaartulli ilisimassut pigaat.“ — USSATIT 11:2.

1, 2. Makitaneq suua, pissuserlu tamanna qanoq ajunaarutaasarsimava?

LEVIKKUUSOQ sinngasoq Jehovap innuttaminut siulersuisitaanut pikitsitsisunut siulersuivoq. Kunngissaq ataqqineqarumatooq ataatami issiavissaarsuanik arsaarniarlugu pilersaarutipiloqarpoq. Kunngip utaqqisinnaanngitsup Guutip pruffiitiata innersuussutai erseqqissut sumiginnarpai. Israelikkut taakku pingasut assigiimmik pissuseqarput: makitaneq.

² Makitasuunngoqqajaanartorujussuuvoq. (Tussiaat 19:14) Makitasuut imminnut angisuutikkajupput pisussaatitaaffiginngisaminnillu piumasarsortarlutik. Tamanna ajunaarutaagajuppoq. Makitanerup kunngit kunngiujunnaarsissimavai naalagaaffiillu uppitissimallugit. (Jeremia 50:29, 31, 32; Daniel 5:20) Allaat Jehovap kiffai makitanermik tammartitaasimapput — ajunaarutigisaminnik.

3. Makitanerup navianaatai qanoq ilikkarsinnaavavut?

³ Pissutissaqarluarluni Biibilimi mianersoqqussuteqarpoq:  „Makitassutsip kanngusunneq kingunerisarpaa, qanilaartulli ilisimassut pigaat.“ (Ussatit 11:2) Ussatip tamatuma ilumoorneranik Biibilimi arlalinnik assersuutissaqarpoq. Ilaat misissornerugutsigik makitanerup pisinnaatitaaffinnillu qaangiinerup qanoq navianartiginerat paasissavarput. Taamaattumik maanna takussavarput angutit pingasut qulaani taaneqartut sinnganeq, ataqqineqarusunneq naammagittaannerlu qanoq makitasuunnguutigisimagaat kanngunarsagaanermik kingunilimmik.

Kora — pikitsitsisoq sinngasoq

4. (a) Kora kinaava, qularnanngitsumillu oqaluttuarisaanermi pisimasut suut peqataaffigisimagunarpai? (b) Pikitsitsineq suna Korap aallarnerpaa?

⁴ Kora levikkuuvoq Kehatip kinguaavisa ilaat Mosesip Aronillu illuat. Ukiuni qulikkuutaani arlalinni Jehovamut ilumoortuusimagunarpoq. Tupinnartuliornikkut Imaq Aappalaartukkut anigueqataaneq immikkut pisinnaatitaaffigisimavaa, aamma Israelikkunnut Sinaip Qaqqaani nersuteeraliamik pallorfiginnittunut Jehovap eqqartuussineranik naammassinneqataasimanissaa ilimanarpoq. (2 Moses 32:26) Piffissalli ingerlanerani Kora Mosesimut Aronimullu pikitsitsisunut siulersuisunngorpoq. Aamma pikitsitsisut ilagaat Rubinikkuusut Datan, Abiram aamma On, aammattaaq Israelikkunnut naalakkat 250-it. * „Sualuppallaaleqaasi!“ Mosesimut Aronimullu oqarput, „Ilagiinnut ilaasut tamarmik illernartuupput, [Jehovalu] akornanniippoq. Sooq [Jehovap] ilagiissaanit pingaarnerutinniarpisi?“ — 4 Moses 16:1-3.

5, 6. (a) Sooq Kora Mosesimut Aronimullu pikitsitsiva? (b) Korap Guutip aaqqissuussinerani inissisimaffini suusupagigaa sukkut erserpa?

⁵ Kora ukiorpassuarni aalajaareerluni sooq pikitsitsilersimava? Mosesip naqisimannilluni siulersuinera pissutaasinnaanngilaq, taannami ’nunarsuarmi inunnit tamanit anneruniajuinnerpaasimavoq’. (4 Moses 12:3) Koralli Moses Aronilu sinngagisimagunarpai nuimasumillu atorfeqarnerat naapertuilluanngitsutut  isigalugu. Ilumuunngitsuliorluni Moses Aronilu nammineerniarpallaarnerarlugit namminissarsiornerarlugillu ilagiinni imminut qutsisisinnerarpai. — Tussiaat 106:16.

⁶ Qularnanngitsumik Korap Guutip aaqqissuussaani immikkut pisinnaatitaaffimminik pingaartitsinnginnera ilaatigut ajornartorsiutaavoq. Levikkut Kehatip kinguaavi palasiunngillat, Guutilli inatsisaanik ajoqersuisussaallutik. Aammattaaq illernartuut nuunneqassagaangat pequtaanik atortuinillu tigumiartuusarput. Suliaq pingaanngitsuunngilaq, upperisarsiornikkummi ileqqussatigullu minguitsut kisimik atortunik illernartunik tigumiaqqusaapput. (Jesaja 52:11) Taamaattumik Mosesip Kora oqaluukkamiuk ima aperivorlusooq: Suliat ima pingaartinngitsigaajuk allaat palasinngorniarlutit? (4 Moses 16:9, 10) Korap paasisimanngilaa Jehovap aaqqissuussinera naapertorlugu aalajaalluni kiffartuunnissaa — immikkut inissisimaffeqarnerunani atorfeqarnerunaniluunniit — ataqqinaataanerpaasoq. — Tussiaat 84:11.

7. (a) Moses Koramut peqataanullu qanoq qisuariarpa? (b) Korap pikitsitsinera qanoq ajunaarutaangaarpa?

⁷ Mosesip Kora peqatigisaalu aamaasivilerlutik tipigissaasisarlutillu toqqup naapeqatigiittarfiup killinganut aqaguani ullaakkumut qaaqquvai. Kora peqatigisaalu palasiunnginnamik tipigissaatilliisussaatitaanngillat. Aamaasivilerlutik tipigissaasisarlutillu aggerunik, palasiusussaatitaasutut suli isumaqarnerannut nalunaajaataassaaq — naak unnuaq naallugu eqqarsarluarfissaqaraluarlutik. Aqaguani ullaakkut sassarmata, Jehovap kamannini naapertuilluartoq takutippaa. ’Nuna aatsarpoq [Rubinikkullu] tamarluinnaasa iillugit.’ Sinneri, ilaatigut Kora, innermit Guutimeersumit ikuallagaapput. (5 Moses 11:6; 4 Moses 16:16-35; 26:10) Korap makitanera kanngunarsaataanerpaamik — Guutimit iluarisaannginnermik — kinguneqarpoq!

’Sinngaleqqajaaneq’ akioruk

8. ’Sinngaleqqajaaneq’ qanoq ililluni kristumiut akornanni malunnarsinnaava?

⁸ Koramik oqaluttuaq uatsinnut mianersoqqussutaavoq. Inuit naammalluinnanngitsut ’sinngaleqqajaasuupput’ allaat ilagiinni kristumiuni malunnarsisinnaasumik. (Jâko 4:5, NV) Assersuutigalugu taaguutit inissisimanerillu pingaartippallaalersinnaavavut. Koratulli nammineq pilerigisatsinnik immikkut pisinnaatitaaffillit sinngagilersinnaavavut, angutitulluunniit kristumiutut Diotrefesitut, ukiuni hundredelinni siullerni inuusutulli, ilisinnaavugut. Apustilit oqartussaanerannut, nammineq siulersortaarusukkunarami, isornartorsiuerpalaartorujussuusimavoq. Johannes allappoq Diotrefes ’pingaarnerujumasuusoq’. — 3 Juánase 9.

9. (a) Ilagiinni akisussaaffeqalernermi isuma suna ingalassimasariaqarparput? (b) Guutip aaqqissuussaani inissisimaffipput qanoq isigissavarput?

⁹ Soorunami ajortuunngilaq angutit kristumiut ilagiinni akisussaaffeqarusunnerat. Allaat Paulusip taamaaliornissaat kajumissaarutigaa. (1 Timûtiuse 3:1) Kiffartornitsinnili immikkut pisinnaatitaaffivut nersornaatitut isiginngisaannassavavut isumaqarlutaluunniit nuimanerulernissamut alloriarnerusoq. Jesusip ima oqarnera eqqaamajuk: ’Ilissinni angisuunngorumasup kiffartuullisi. Ilissinnilu siulliujumasoq ilaminut kiffaannaagili.’ (Matîuse 20:26, 27) Tamatuma takutippaa akisussaaffeqarnerusunut sinnganeq eqqunngitsuusoq, soorlu Guutip peqatigiiffiani suliaqarnerput Guutip isaani naleqarnitsinnut aalajangiisuusoq. Jesus oqarpoq: ’Ilissi tamassi qatanngutigiippusi.’ (Matîuse 23:8) Aap, ilagiinni oqaluussisartuugaluarutta pioneeriugaluaruttaluunniit, kuiserlaajugutta ukiorpassuarniluunniit aalajaassimagaluarutta, tamatta  — Jehova tarnitsinnik tamakkiisumik kiffartuussimagutsigu — aaqqissuussinerani pingaaruteqassaagut. (Lúkarse 10:27; 12:6, 7; Galâsiamiut 3:28; Eprîarit 6:10) Biibilip unnersuussutaanik maleruaaniartunik millionilikkuutaanik allanik suleqatiginninneq pilluaqqussutaangaarpoq: ’Tamassi ilissinnut nikanartinnermik assuuseritsi.’ — 1 Pîtruse 5:5.

Absalom — ajornannginnersiortartoq ataqqineqarumatooq

10. Absalom kinaava, qanorlu ililluni kunngimukarlutik eqqartuussinikkut aalajangiiffigineqarumasunut qujanarniartarpa?

¹⁰ Kunngi Davidip ernerisa pingajuata, Absalomip, oqaluttuassartaa ataqqineqarumaneq pillugu ilinniarfigilluarsinnaavarput. Peqqusersusaartoq ajornannginnersiortartorlu taanna kunngimukarlutik eqqartuussinikkut aalajangiiffigineqarumasunik qujanarniarfiginnittarpoq. Siullermik tusangiasaarpai Davidip ajornartorsiutaat soqutiginngikkai. Taava toqqaannartuliorpoq: „Ilumulli uanga nunatsinni eqqartuussisunngortinneqartuuguma,“ oqarpoq, „taava kikkulluunniit saqitsaateqarlutik eqqartuussinikkullu aalajangiiffigineqarumallutik uannukartut tamaasa naapertuiluartumik pineqartissagaluarpakka.“ Absalomip peqqusersusaarnera killeqanngilaq. „Saqitsaateqartullu ornilluni pallorfiginiaraangani eqillugu kunittapaa,“ Biibilimi oqarluttuarineqarpoq. „Avannaamiullu eqqartuussinikkut aalajangiiffigitikkiartortut tamaasa Absalomip taamaaliorfigisaramigit peqqusersiornermigut Avannaamiut ilissarsiarai.“ — 2 Samuel 15:1-6.

11. Qanoq ililluni Absalomip David kunngiussusianik arsaariaraluarpaa?

¹¹ Absalomip aalajangiusimalluinarpaa ataatani kunngiussusianik arsaarniarlugu. Ukiut tallimat tamatuma siorna Davidip angajulliliaa, Amnon, toqutaatissimavaa, najami Tamarip pinngitsaalillugu arneriffigineranut akiniutigigunarlugu. (2 Samuel 13:28, 29) Absalom taamanikkulli kunnginngorusussimasinnaavoq Amnonimillu toqutsinini unammillertiminik ajornanngitsumik peersitsinertut isigalugu. * Qanorluunniit pisoqarsimagaluarpat piffissanngulermat Absalom iliuuseqarpoq. Nunamilu tamarmi kunnginngornini nalunaarutigitillugu. — 2 Samuel 15:10.

12. Nassuiaruk qanoq ililluni Absalomip makitanini nikanarsaatigigaa.

¹² Absalom piffissap ilaa iluatsitsisimavoq, „pikitsitsiniaqatigiit pissaaneqarnerujartuinnarput inuit Absalomimut ililiuttut amerliartuinnarmata“. Piffissap ilaatigut kunngi David inuujumalluni qimaasariaqarpoq. (2 Samuel 15:12-17) Tamatuma kinguninngua Absalomip iluatsitsinerigalua unitsinneqarpoq. Joabimit toqunneqarpoq, itersarsuarmullu iginneqarluni ujaqqanillu matoorneqarluni. Eqqarsaatigeriaruk — angut ataqqineqarumatooq taanna kunnginngorumagaluartoq, torersumik ilisaanngitsoq! * Makitaneq Absalomimut nikanarsaataalluinnarpoq. — 2 Samuel 18:9-17.

Namminissarsiorlutit ataqqineqarumatuujoqinak

13. Kristumiut qanoq ilillutik ataqqineqarusunnermik anersaaqalersinnaappat?

¹³ Absalomip pissaaneqaleriartornera kingusinnerusukkullu uppititaanera ilinniarfigilluarsinnaavarput. Silarsuarmi unammillerajuttumi matumani inuit qullersaminnut qujaniartarnerat iluareqqusaartarnerallu immaqalu immikkut pisinnaatitaaffeqalertarnerat qaffatsitaasarnerallu nalinginnaavoq. Immaqa aamma suleqatitik tapersersortissarsiariniartarpaat  kakkanniarfigisarlugillu. Mianersunngikkutta uummatitsinni ataqqineqarusunnermik anersaaqalersinnaavugut. Ukiuni hundredelinni siullerni taamatut pisoqarsimagunarpoq, taamaattumillu apustilit uppeqatitik sakkortuumik mianersoqqusariaqarsimavaat. — Galâsiamiut 4:17; 3 Juánase 9, 10.

14. Sooq ataqqineqarusunneq pingaarneruniarnerlu ingalassimasariaqarpavut?

¹⁴ Jehovap peqatigiissortaani peqqusersusaarlutik pingaarneruniarlutillu ataqqineqarusuttut inissaqartinneqanngillat. (Ussatit 25:27) Biibilimi ima mianersoqqussuteqarpoq: „[Jehovap] nungutissavai qarlut peqqusersiortut tamaasa, oqqallu pingaakujuutaannarnik oqaluttartut.“ (Tussiaat 12:4) Absalom peqqusersiortunik qarloqarpoq. Qujanarniarfigisani makitaffigai — kissaatigisamisut qaffasissumik atorfinikkumalluni. Qatanngutigiissuarni Paulusip unnersuussutaanik maleruaasuniinnerput ’saqitsaagajunnermillu piunngitsumillu ataqqineqarumanermit pinngitsuni, kisianni qanilaarlutik ilaminnit imminnit annerutitsisuniinneq’ pilluaqqussutaavoq. — Filípimiut 2:3.

Saul — kunngi utaqqisinnaanngitsoq

15. Saulip anneruniajuitsuusimanini qanoq ililluni malunnartissimavaa?

¹⁵ Saul, Israelimut kunnginngortoq, anneruniajuitsuusimagaluarpoq. Assersuutigalugu inuusuttuunerani pisimasoq eqqarsaatigeriaruk. Guutip pruffiitiata Samuelip ajunngitsumik eqqartormani, Saul maniguulluni akivoq: „Uanga Benjaminikkuuvunga Israelikkut naggueqatigiissortaasa ikinnersaannut ilaasoq, uagullu eqqarleriiusugut naggueqatigiit Benjamikkuusut eqqarleriissortaasa tamarmik nikanarnersaraatigut. Sooq taava taama oqaluffigaanga?“ — 1 Samuel 9:21.

16. Saulip utaqqisinnaannginnera qanoq malunnarsiva?

¹⁶ Kingusinnerusukkulli Saul anneruniajuitsuujunnaarsimavoq. Filisterinut sorsutsilluni Gilgalimut uterpoq tunuarluni, Samuelip Guutimut pilliiartornissaa utaqqiartorlugu. Samuel piffissaq eqqorlugu tikinngimmat, Saul makitavallaarluni nammineq pilliut ikikkagassaq pilliutigaa. Pilleereersorlu Samuel tikippoq. „Qanoruna ilioravit?“ Samuel aperaaq. Saul akivoq: „Paasigakku sakkutuut siammakaallutik qimakkaannga illillu piffissaq aalajangigaq eqqorlugu tikiutinngitsutit . . . Taavalu sapiiserlunga nammineq pilliut ikikkagassaq pilliutigaara.“ — 1 Samuel 13:8-12.

17. (a) Sooq Saulip iliuusia illersorneqarsinnaasorinarpa? (b) Sooq Jehovap Saulip utaqqisinnaanani iliuusia avoqqaaraa?

¹⁷ Immaqa Saulip iliuusia illersorneqarsinnaasorinarpoq. Guutimmi innuttai isumatsannartoqarnera pissutigalugu ’navianartorsiorput’, ’annikilliortitaaqalutik’ annilaarsimaqalutillu. (1 Samuel 13:6, 7) Pisinnaatitaagaanni siulliulluni iliuuseqarneq kukkunerunngilluinnarpoq. * Eqqaamasariaqarparpulli Jehovap uummaterput atuarsinnaagaa ilorlikkullu pissutigut takusinnaagai. (1 Samuel 16:7) Taamaattumik Saulimi takusaqarsimassaaq Biibilimi toqqaannartumik oqaluttuarineqarsinnaanngitsumik. Assersuutigalugu Saulip utaqqisinnaannginnera makitanermik pissuteqartoq takusinnaasimassavaa. Saulip — Israelimut tamarmut kunngiusup — pruffiitip utoqqaap pilaartup utaqqinissaa uumigingaarsimasinnaavaa. Qanorluunniit pisoqarsimagaluarpat Saul misigisimavoq  Samuelip kingusinaarnerata nammineersinnaatikkaani unnersuussutinillu erseqqissunik sumiginnaatissinnaalluni. Qanoq kinguneqarpa? Saulip iliuusia Samuelip nersualaanngilaa. Akerlianik avoqqaaralugu oqarpoq: „Kunngiujunnaarsitaasussanngorputit . . . [Jehovap] ilinnut peqqussutaa naalannginnakku.“ (1 Samuel 13:13, 14) Makitaneq kanngunarsagaanermik kinguneqaqqippoq.

Utaqqisinnaannginneq mianersorfigiuk

18, 19. (a) Ullumikkut utaqqisinnaannginneq qanoq ililluni Guutip kiffaanik makitasaartitsisinnaanersoq oqaluttuariuk. (b) Kristumiut ilagiivisa ingerlanerat pillugu suna eqqaamasariaqarparput?

¹⁸ Saulip makitalluni iliuuseqarnera Guutip oqaasiani iluaqutissatsitut allanneqarsimavoq. (1 Korintumiut 10:11) Qatanngutitta kukkuneri uumigeqqajaasinnaavavut. Saulitulli immaqa utaqqisinnaajunnaarsinnaavugut eqqarsarlutalu iluamik sulisoqassappat nammineertariaqarluta. Assersuutigalugu eqqarsaatigeriartigu qatanngut angut aaqqissuussillaqqisoq. Piffissamik eqqorluaasarpoq, peqatigiiffimmilu malittarisassanik paasisimannilluartuulluni, oqalugiallaqqissuulluni ilinniartitsillaqqissuullunilu. Isumaqarporli allat najoqqutassiaminik qutsissunik maleruaasinnaanngitsut naammassisaqarpallaartanngitsullu. Tamatuma utaqqisinnaannginneranik malunnarsisitsisinnaatippaa? Qatanngutini isornartorsiortariaqarpai immaqalu oqamisaarluni taannaqanngitsuuppat iliuuseqartoqartassanngikkaluartoq ilagiillu ingerlalluassanngikkaluartut? Naamik. Tamanna makitanerussagaluarpoq!

¹⁹ Kristumiut ilagiit suup ataatsimoortippai? Ingerlatsinikkut piginnaanerit? Naammassisaqarluarsinnaanerup? Ilisarsinerup? Tamakku tamarmik ilagiit aaqqiagiinnerulersissinnaagaluarpai. (1 Korintumiut 14:40; Filípimiut 3:16; 2 Pîtruse 3:18) Jesusili oqarpoq ajoqersukkami asanninneq pingaarnertut ilisarnaatigissagaat. (Juánase 13:35) Utoqqaanertat isumassuilluartut torersumik ingerlatsisut nalunngilaat ilagiit niuernertut sukannersumik siulersorneqassanngitsut; akerlianilli assersuutaasumik savaapput asanninnermik isumassuinermillu pisariaqartitsisut. (Jesaja 32:1, 2; 40:11) Makitalluni najoqqutassiat taakku sumiginnarneqaraangata isumaqatigiinnginnermik kinguneqarajuppoq. Akerlianik peqatigiinneq Guutimik mianerinninnermik ilaqartoq eqqissisitsisarpoq. — 1 Korintumiut 14:33; Galâsiamiut 6:16.

20. Allaaserisami tulliuttumi suna sammineqassava?

²⁰ Kora, Absalom aamma Saul pillugit Biibilimi oqaluttuat Ussatit 11:2-mi allassimasut erseqqissumik takutippaat makitaneq kanngunarsagaanermik kinguneqartartoq. Versili taanna nangippoq: „Qanilaartulli ilisimassut pigaat.“ Makitajuinneq suua? Biibilimi assersuutit suut pissutsimik tamatuminnga paasitissinnaavaatigut, ullumikkullu makitajuinneq qanoq malunnartissinnaavarput? Apeqqutit taakku allaaserisami tulliuttumi sammineqassapput. (wE 1/8 2000)

[Quppernerup ataani ilanngussat]

Eqqaamasinnaavigit?

• Makitaneq suua?

• Sinnganerup Kora qanoq makitasaartippaa?

• Absalomip ataqqineqarumatuup oqaluttuassartaa qanoq ilinniarfigisinnaavarput?

• Saul assiginagu qanoq utaqqisinnaassuseqarsinnaavugut?

[Atuaqqissaarnermi apeqqutit]

[Qupp. 10-mi assiliartaq]

Saul utaqqisinnaajunnaarami makitasaalerpoq