Sooq meeraqanngillat?

AAPPARIIT Dele Folalu * Nigeriami Napasuliaq Alapernaarsuiffiup Peqatigiiffiata allaffeqarfiani sulilersimatsiaannartut, Folap arnaata pulaarpai. Imminut pingaarutilerujussuarmik sininnaveerutigisartakkaminik oqaloqatiginiarlugit ungasissumut angalasimavoq.

„Ajunngilluinnartumik pisarpassinga,“ oqarfigai. „Nassittarpassinga tikeraartarlungalu. Asanninneq nittartagarsi uannut pingaarutilerujussuuvoq. Utoqqaligussili kia taama pissaneraasi eqqarsaatigileraangakku ernumatsattarpunga. Maanna ukiuni marlunni katissimareerpusi sulilu meerartaarnasi. Piffissaasorinngilisiuk Betelimiikkunnaarlusi meeqqiulernissassinnut?“

Folap arnaa imatut eqqarsarpoq: Betelimiinnerat naammalerpoq. Siunissartik pilersaarusiulertariaqarpaat. Suliaat allanit suliarineqarsinnaassagunarput. Delep Folallu tamakkiisumik kiffartornertik taamaatittariaqanngilaat, meeqqisaatigalutik nuannaarutissartaalu misigiitigalugit allatut kiffartorsinnaassapput.

Anaanaasup ernumassutai

Folap arnaata tamakku ernumassutigimmagit paasinarpoq. Tamatigut nunanilu tamani meeqqat pingaaruteqarlutillu pissusissamisuuginnarput. Meerartaarnerit nuannaarnarlutillu isumalluarnarput. „Arnap timaata iluani inerittoq tassaavoq taassuma akissarsiarititaa,“ Biibilimi taama allassimavoq. Aap, meeqqiorsinnaaneq Pinngortitsisitsinnit asannittumit tunissutaavoq naleqangaartoq. — Tussiaatit 127:3.

Aappariit meerartaarnissaat nunani amerlasuuni pinngitsaaliissutaasarpoq. Assersuutigalugu Nigeriami arnat tamarmik agguaqatigiissillugu arfinilinnik meerartaartarput, taamaattumik katittorsiornermi katernaanut ajunngitsumik isumaqarlutik inuit ima oqartarnerat nalinginnaavoq: „Qaammatit qulingiluat qaangiuppata meeqqap qianera angerlarsimaffissinni tusaasinnaalissavarput.“ Aamma katittunut siniffeeraq tunissutaasinnaavoq. Sakiusut qaammatisiutit alapernaalluartarpaat. Ukiup ataatsip ingerlanerani nuliartaaq naartulinngippat, arlaannik ajornartorsiuteqarpata ikiorsinnaanerlugit paasiniartarpaat.

Anaanarpassuit isumaat imaappoq, aappariinnerup meeqqiornissaq kinguaariillu ingerlateqqinnissaat siunertarigaa. Folap arnaa panimminut oqarpoq: „Sooq meerartaarnianngikkuit katippit? Inuunermik tunineqarputit, maannalu tamanna meeqqannut ingerlateqqittariaqarpat.“

Tassunga tunngatillugu assigiinngitsualuit eqqarsaatigisariaqarput. Afrikami nunani amerlasuuni utoqqaat sulissunneqarnerat annikitsuararsuuvoq. Mikigallaramik paarisimammatik meeqqat angajoqqaaminnik utoqqalisunik isumaginnittarnerat nalinginnaavoq. Folap arnaa ima eqqarsarpoq, meeqqani meeqqiulinngikkunik, ukiualuit qaangiuppata kiserngorussinnaasut, soqutigineqaratik, piitsuullutik toqugunillu ilinissaqaratik.

Afrikap ilarujussuani meeraqannginneq perloqqussutitut isigineqarpoq. Allaat sumiiffiit ilaanni arnat katinnginnermi meerartaarsinnaanerat uppernarsaqquneqartarpoq. Arnarpassuit naartusinnaanngitsut, ernumallutik nakorsanik periarfissanillu allanik ujaasisarput  meerartaarsinnaannginnerminnit ikioqqullutik.

Tamakku eqqarsaatigalugit isummertoqartarpoq aappariit piaaralutik meerartaarusunngitsut, pingaarutilerujussuarmik imminnut erliguuttut. Eqqumiitsutut, uungaannaq isigisutut naakkinartutullu isigineqartarput.

Nuannaarutit akisussaaffiillu

Jehovap innuttaasa nassuerutigaat meeraqarneq nuannersuinnaanngitsoq aammali akisussaaffiusoq. Biibilimi 1 Timûtiuse 5:8-mi ima allassimavoq: ’Kisianni kialuunniit ilani annerusumillu inoqutini isumaginngikunigit, taassuma upperneq soraarussimavaa uppingitsumit ajornerulluni.’

Angajoqqaat ilaquttatik timikkut anersaakkullu isumagisussaavaat, tassungalu piffisarujussuaq nukippassuillu atortariaqarput. Naak Guutip meerartaartikkaluaraatik Guuti akisussaatinngilaat. Biibilimi najoqqutassat naapertorlugit akueraat Guutip angajoqqaat meeqqat perorsarnissaannut tamakkiisumik akisussaatikkai; tamanna allanut tunniuttariaqangilaq. — 5 Moses 6:6, 7.

Angajoqqaat suliassaat ingammik ’ullussani kingullerni ajornartuni’ erloqinartuuvoq. (2 Timûtiuse 3:1-5) Aningaasaqarniarnerup ajorsigaluttuinnarnerata saniatigut, innuttaaqatigiit akornanni guutiitsuussutip ullutsinni meeqqanik perorsaaniarneq unamminiarnartunngortippaa. Taamaakkaluartorli silarsuarmi tamarmi kristumiut aappariippassuit akisussaaffik tamanna tigusimavaat, iluatsittumillu meeqqat Guutimik mianerinnittut ’perorsarlugit inertertarlugillu Naalakkamit’. (Evfisumiut 6:4) Angajoqqaat taakkua eqiasuillutik suliaat pillugit Jehovap asavai pilluaqqullugillu.

Sooq ilaat meeraqanngiinnnartut

Aappaatigut aamma kristumiunik aappariippassuaqarpoq meeraqanngitsunik. Ilaat meerartaarsinnaanngillat meerarsiartaarusunnatillu. Allat meerartaarsinnaagaluarlutik aalajangersimapput meerartaarniaratik. Aappariit taakku akisussaaffeqarusunngiinnarlutik, imaluunniit angajoqqaatut unamminiarnartut qunugigamikkit meeraatsuunngillat. Aalajangersimappulli piffissaq tamaat atorlugu kiffartornerit assigiinngitsut, angajoqqaatut akisussaaffeqarlutik sammisinnaanngisatik samminiarlugit. Ilaat ajoqersuiartortitaapput; allat angalallutik nakkutilliisutut Betelimiluunniit Jehova kiffartuuppaat.

Kristumiutulli allatut akueraat suliassaqartoq nukinginnartumik naammassineqartariaqartumik. Jesus oqarsimavoq: ’Naalagaaffimmillu iivangkiiliu tamanna oqaluussissutigineqassavoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussavoq.’ Suliaq tamanna ullumikkut suliarineqarpoq. Suliaq pingaartorujussuuvoq, tassami ’naggatissaq’ tusagassamik nuannersumik tusaajumanngitsunut tamanut piuneerussilluinnartussaammat. — Matîuse 24:14; 2 Tásalûníkamiut 1:7,8.

Ulluvut Noap ilaqutaasalu ulersuarmit anassutaasussamik umiarsualiornerata nalaannut assingupput. (1 Moses 6:13-16; Matîuse 24:37) Naak Noap erneri pingasut nuliaqaraluarlutik meerartaarnissaminnut ulersuup qaangiunnissaa utaqqivaat. Imaassinnaavoq aappariit taakkua kissaatigigaat soqutiginninnertik nukitillu tamaasa suliassamut atorniarlugit. Aamma imaassinnaavoq silarsuarmi nikanarsisimasumi, perulluliorfiusumilu ’nunami inuit ajussusiat annertusiartuinnartumi piumasaallu pilersaarutaallu ajortuinnaasuni’ meerartaarusunngitsut. — 1 Moses 6:5.

Imaanngilaq ullumikkut meerartaarnissaq kukkunerusoq, kristumiulli aappariippassuit Jehovap innuttaminut suliareqqusaa pingaartoq kisiat sulissutigiumallugu meerartaarumanngillat. Aappariit ilaasa meerartaarnissartik utaqqisikallarsimavaat, ilaasali meeraqannginnissartik aalajangiussimavaat, Jehovallu silarsuassaani naapetuilluarfiusumi meeraqalernissatik qilanaaralugu. Uungaannaq isigisutut oqaatigineqarsinnaava? Annaasaqarpat? Nalliginisaannut patsisissaqarpa?

Toqqisisimaneq nuannaarnerlu

Dele Folalu, qulaani taaneqartut maanna ukiut qulit sinnerlugit aappareereerput, meeraqanngiinnarnissartillu aalajangiussimallugu. „Ilaquttatta meerartaaqqulluta suli pinngitsaaliniartarpaatigut,“  Dele oqarpoq. „Ernumassutigineruvaat toqqisisimasumik siunissaqarnersugut. Soorunami uagutsinnik eqqarsaatiginninnerannut qujamasunnerput tamatigut ersersittarparput, inussiarnersumilli nassuiaattarpavut aalajangersimanerput nuannaarutigalutigu. Toqqissisimanissamut tunngatillugu paasitinniartarpavut, Jehova aalajaatsunut ilumoortunullu ernumaginnittoq isumaginnittorlu tunaartaralutigu. Nassuiaattarpavuttaaq qulakkiivilugu oqartoqarsinnaanngitsoq angajoqqaat utoqqalisut meeraasa isumagiumaaraat. Ilaasa angajoqqaatik utoqqalisut isumagilluarneq ajorpaat, allallu ikiuisinnaaneq ajorput aamma allat angajoqqaaminnik siulliullutik toqusarput. Uagulli Jehova tatigigutsigu siunissarput isumaannaappoq.“

Dele, allallu taamatut atugallit Jehovap kiffaminut aalajaatsunut neriorsuutaa tatigilluinnarpaat: ’Iperassanngilakkit qimasanatillu.’ (Eprîarit 13:5) Aamma upperaat „[Jehovap] talia ima naatsiginngitsoq annaassisinnaanani, siutaalu ima matoqqatiginatik tusaasinnaanani“. — Jesaja 59:1.

Aamma Jehovap kiffani aalajaatsut qanoq napatittarai eqqarsaatigalugit toqqisisimanartarpoq. Kunngi David allappoq: „Inuusuttuusimavunga utoqqalisimallungalu maanna, takusimanngisaannarpungali iluartumik qimagaasumik.“ Una eqqarsaatigeriaruk. Jehovap kiffaanik aalajaatsunik qimagaasunik nalunngisaqarpit? — Tussiaat 37:25.

Jehovamut kiffartuussillutik kristumioqatiminnullu iluaqutaasumik inuusimasut peqqissimissutiginngilaat, nalerisimaarlutilli kingumut eqqarsaatigisarlugu. Qatanngut Iro Umah ukiuni 45-ni piffissaq tamaat atorlugu oqaluussisartuusimasoq, maannalu Nigeriami ilagiinni nakkutilliilluni angalasartoq, oqarpoq: „Nuliaralu meeraqanngilagut, puigunngilarpulli Jehovap anersaakkut timikkullu isumagiuarsimammatigut. Amigaateqarsimanngilagut. Utoqqaligutta qimannavianngilaatigut. Ukiut taakkua piffissaq tamaat atorlugu kiffartuussinivut inuunitsinni pilluarnarnerpaajusimapput. Qujamasuutigaarput uppeqativut kiffartuussinnaagatsigit, tamannalu pingaartippaat tapersersorlutalu.“

Naak aappariippassuit namminneq meerartaanngikkaluarlutik, allatut meeraqalertarput: Ajoqersukkat kristumiut Jehovamik pallorfiginnittut. Apustili Johannes 100-t missaani ukioqarluni allappoq: ’Matumannga annerusumik tipaatsuutigisaqanngilanga: qitornakka tusaraangakkit sallusuissut eqqorlugu saqisut.’ (3 Juánase 4) Johannesip ’qitornaasa’ — ’sallusuissummik’ ilinniartissimasaasa — aalajaatsuunerisa nuannaarutissingaarpaat.

Ullumikkut nuannaarneq taamaattoq misigineqarsinnaavoq. Bernice Nigeriamiu ukiut 19-t ueqarpoq meeraqarniarnanilu aalajangersimalluni. Ukiuni 14-ini kingullerni pioneeriusimavoq. Maanna meerartaarsinnaajunnaangajalernini qalliartortillugu, peqqissimissutiginngilaa ajoqersuganngortitsinermut inuunini atorsimagamiuk. Oqarpoq: „Anersaakkut qitornakka alliartortut isigalugit nuannaartarpunga. Meerartaarsimagaluaruma sallusuissummik ajoqersorsimasannit qaninnerusimanissaat qularaara. Anaanavimmittut pisarpaannga, nuannaarutiminnik ajornartorsiutiminillu oqaloqatigisarpaannga siunnersuutikkalu tusarusuttarlugit. Allaffigisarpaannga pulaaqattaattarlutalu.

Ilaasa meeraqannginneq perloqqusutitut isigisarpaat.Taakku oqartarput utoqqaligunik naalliuutigissagaat. Uangali taamatut isumaqanngilanga. Nalunngilara Jehova uummammik ilumoortumik kiffartuuttuartillugu akilerumaaraanga isumagiumaaraangalu. Utoqqaliguma immineernavianngilaanga.“

Guutimit asaneqartut pingaartinneqartullu

Meerartaartut ’sallusuissut eqqorlugu saqisunik’ perorsaasimasut qujassutissaqaqaat. Pissutissaqarluartumik Biibilimi allassimavoq: „Iluartup ataataa ilumut qiimmattaatissaqarpoq, silatuumik ernilik nuannaarutissaqarpoq. Ataatannut anaanannullu nuannaarutaaniarit, ilinnik erniarinnittoq qiimmattaatissiguk.“ — Ussatit 23:24, 25.

Kristumiut meerartaarnermik nuannaarutiginnissimanngitsut, allatigut pilluaqquneqarsimapput. Aappariippassuit taakku Naalagaaffiup  soqutigisaanik annertungaartunik siuarsaaqataasimapput. Ukiut ingerlaneranni misilittakkanik ilisimassummik pikkorissusermillu pigisaqalersimapput, Naalagaaffiup suliaanut pingaarutilimmik peqataasinnaalissutigisaminnik. Amerlaqisut suliamut tamatumunnga siuttuupput.

Tusagassaq nuannersoq pissutigalugu meerartaarsimanngillat, Jehovalli anersaakkut ilaquttanik asannittunik suliaannik pingaartitsingaartunik pilluaqqusimavai. Soorlu Jesus oqartoq: ’Inuup kialuuniit illuni qatanngutiniluuniit angutit qatanngutiniluuniit arnat arniluuniit angunniluuniit qitornaniluunniit nunaatiniluunniit qimakkaluarunigit [imaluunniit ’iperaraluarunigit’] uanga iivangkiiliulu pilluta, hundredeleriarlugit maanna matumani pisaassavoq illussaminik qatanngutissaminillu arnassaminillu qitornassaminillu nunaatissaminillu, . . . silallu aappaani inuuneq naassaanngitsoq pissavaa.’ — Mákorse 10:29, 30.

Aap, Jehovamut aalajaattuartut, taassumunnga naleqangaarput. Aalajaatsut tamarmik, meeraqarunik meeraqanngikkunilluunniit, apustili Paulusimit ima neriorsorneqarsimapput: ’Guutimi iluaatsuunnginnami sulinersi asanninnersilu aqqa pillugu ileqqorisarsi puiussanngilai, iluartut kiffartuuttarassigik sulilu kiffartuuttarlugit.’ — Eprîarit 6:10. (wE 1/8 2000)

[Quppernerup ataani ilanngussaq]

[Qupp. 24-mi assiliartaq]

Aappariit meeraqanngitsut anersaakkut ilaquttanik asannittunik pilluaqquneqarsimapput