Isumaqatigiinngissutinut qanoq iliuuseqartarpit?

ULLUT tamaasa inunnut assigiinngitsorujussuarnik kinaassusilinnut attuumassuteqartarpugut. Amerlanertigut nuannarisarpagut ilimageriikkatsinnillu allaanerusunik takunnissinnaalersittarpaatigut. Ataasiakkaat isumaqatigiinngissutinik ilungersornartunik annikitsunilluunniit isumalunnernut pissutaaqataasunik pilersitsisarput. Qanorluunniilli ikkaluarpata sianissutsikkut, misigissutsikkut anersaakkullu isumaqatigiinngissutinut iliuuseqarnitsinnit sunnerneqartarpugut.

Isumaqatigiinngissutit qatangiinnartinniarlugit sapinngisatsinnik aaqqiiniaraangatta, peqqissutsitsinnut iluaqutaaginnarani allanuttaaq eqqissisimanerusumik pissuseqartissavaatigut. Soorlu ussatitoqqami allassimasoq: „Uippalliaanneq timip inuummarississutigisarpaa.“ — Ussatit 14:30.

Tassunga akerliulluinnartoq nalunanngitsumik ilumoortoq imaappoq: „Illoqarfittut aserukkatut qarmaajakkatut ippoq angut imminut naalakkersinnaassuseqanngitsoq.“ (Ussatit 25:28) Kina arlarput eqqarsaatinut eqqunngitsunut pitoraattunut imminut allanullu ajoqutaasinnaasunut nittarsaakkusuppa? Kamanneq nununngikkaanni tamanna ajornanngilaq. Jesusip Qaqqami oqaluutsimi isummatta misissornissaat inassutigivaa, isumaqatigiinnginnernut qanoq iliornitsinnut aalajangiisuummat. (Matîuse 7:3-5) Allanik isornartorsiusariaqanngilagut, eqqarsaatigisariaqarparpulli allanik ikinnguteqarneq qanoq ineriartortillugulu atajuartissinnaaneripput, inooriaatsit tunuliaqutallu assigiinngissusaat apeqqutaatinnagu.

Isiginnittaaserput

Isumaqatigiinngissut piviusoq eqqarsaataannarluunniit luarsissagutsigu, paaseqqaartariaqarparput eqqarsariaatsimik isummamillu eqqunngitsumik pigisaqarsinnaagatta. Biibilimi eqqaasinneqarpugut tamatta ajortuliortartugut ’Guutimi nersornaammik ajorsarluta’. (Rûmamiut 3:23) Imaassinnaavortaaq eqqarsaatigilluarneratigut paasigipput isumaqatigiinninneq akerlitta pisuussutiginngikkaa. Tassunga atatillugu pruffiitip Jonasip inuunerani pisimasup misissornerunera ilinniarfissaalluarpoq.

Jehovap peqqusineratigut Jonas illoqarfimmut Ninevimukarpoq Guutip illoqarfiup inuinut eqqartuussutiminik piviusunngortitsingajalernera nalunaarutigiartorlugu. Qujanartumik tamanna Ninevimiut tamarmik isumataarnerannik Guutimullu ilumoortumut uppertunngornerannik kinguneqarpoq. (Jona 3:5-10) Peqqissiminerata Jehova isumaqalersippaa isumakkeerfigineqartariaqartut, tamannalu pillugu qajassuuppai. „Tamannali Jonap ajoreqaa.“ (Jona 4:1) Jonasip Jehovap naakkinnissusianut qisuariarnera eqqumeeqaaq. Sooq Jonasip Jehova kamaassinnaavaa? Qularnanngilaq Jonasip nammineq misigissutsini pingaartikkamigit isumaqarlunilu inunnut kanngunarsagaalluni. Jehovap naakkinnissusia qujamasuutiginngilaa. Jehovap inussiarnersumik Jonas isigisassiuinikkut ilinniartippaa isumaqarfiginninnerminik allanngortitsinissaminut iluaqutigisaanik Jehovallu naakkinnissusiata naleqangaassusianik paasinnilluassutigisaanik. (Jona 4:7-11) Nalunanngitsumik  Jehovap isumaa pinnani Jonasilli isumaa kukkunersiortariaqarpoq.

Pissusissamisuunnginnerpa ilaanneeriarluta pisumut aalajangersimasumut isummatsinnik allanngortitsinissarput? Apustili Paulus kajumissaarivoq: ’Ataqqeqatigiigitsi ingiaqattaallusi.’ (Rûmamiut 12:10) Suna pivaa? Ilaatigut kajumissaarpaatigut ingasaassisooqqunata kristumiunullu allanut ataqqinningaartumik pissuseqaqqulluta. Tamanna isumaqarpoq ataasiakkaat piumasaminnik qinersisinnaanerannut inissaqartitsissasugut. Aammattaaq Paulusip eqqaasippaatigut: ’Kialuunniit nammineq nammagassi nammassagaa.’ (Galâsiamiut 6:5) Taamaattumik silatusaarnerussaaq eqqarsaatigeqqissaassallugu isumarput allaanngortittariaqarnerlugu isumaqatigiinnginnerit aaqqiagiikkunnaarutaatinnagit. Jehovap eqqarsartaasia malinniarlugu ilungersortariaqarpugut Guutimillu ilumoorlutik asannittut allat eqqisseqatiginerat atatiinnarlugu. — Jesaja 55:8, 9.

Allanut akueriuminartuuvugut?

Takorlooruk meeraaqqat marluk pinnguaq kamaassutigigaat. Noqqoruunnerat sakkortusigaluttuinnarpoq assortuussutigaallu, aappaata iperaanissaata allamilluunniit akuliuttoqarnissaata tungaanut.

Mosesimik allakkani siullerni oqaluttuarineqarpoq Abrahamip soraluaatalu Lotip savanik paarsisuisa isumaqatigiinnginnerat. Abraham siulliulluni Lotimukarpoq oqarluni: „Saqitsaatissanngilagut — uanga illillu, paarsisortakka paarsisortatillu — eqqarleriikkatta.“ Abraham aalajangersimavoq isumaqatigiikkunnaarnerit Lotilu ataqatigiinnerminnut ajoqutaalissanngitsut. Allaat angajulliunini pillugu toqqaaqqaartussaatitaanini atorumanngilaa. Pilliuteqarnissaminut piareersimavoq. Abrahamip Lot inoqutini nersutaatinilu sumut ingerlanissaanik toqqaasippaa. Lotip nunap ilaa qorsuusoq Sodomap Gomorrallu eqqaaniittoq toqqarpaa, angutillu taakku marluk eqqissillutik avissaarput. — 1 Moses 13:5-12.

Allat eqqissisimaqatigiuarnissaat anguniarlugu Abrahamip pissutigisaasa assinginik pissuteqarluta iliuuseqarnissatsinnut piareersimavugut? Biibilimi pisimasup tamatuma kusanartumik maligassaqartippaatigut isumaqatigiinninnerit qanoq atoruminartunngortissinnaanerinut. Abraham kajumissaarivoq: „Saqitsaatissanngilagut.“ Ilumoorluni aaqqiissutissamik nassaarusuppoq. Eqqissisimaqatigiinnerup atatiinnarnissaa piareersimaffigigutsigu paatsooqatigiinnerit iluarsiuminarnerussapput. Abrahamip oqaatsini naggaserpai: „Eqqarleriikkatta.“ Sooq pissuseq taama naleqartigisoq pilliutigineqassava nammineq iluaqutissaq pingaarniarnerluunniit kissaatigiinnarlugit? Abrahamip suna pingaarnerusoq arajutsisimanngilaa. Taamaaliorpoq imminut ataqqineq ataqqisaanerlu pigiinnarlugit, peqatigitillugu soralussami ataqqinassuseqaannarnissaa isumagaa.

Pisoqartarporli isumaqatigiissitsiniartussamik atorfissaqartitsiffiusumik, pitsaanerpaavorli saqitsaanneq marluinnaalluni unitsissinnaagaanni. Jesus kajumissaarivoq siulliulluta qatanngut eqqisseqatiginiassagipput, pisariaqarpat utoqqatserfigalugu. * (Matîuse 5:23, 24) Imminut nikanartinneq pisariaqarpoq Peterili allappoq: ’Tamassimi ilissinnut nikanartinnermit assuuseritsi, anneruniartut Guutip akerartormagit, nikanartulli saammaattarlugit.’ (1 Pîtruse 5:5) Uppeqatitsinnut iliuutsivut Guutimut atassuteqarnitsinnut erseqqissumik sunniuteqarput. — 1 Juánase 4:20.

Ilagiinni kristumiuni pisoqarsinnaavoq eqqissisimanissaq pillugu pisinnaatitaaffiup taamaatinnissaanik piumaffigineqartugut. Ullumikkut Jehovamut nalunaajaasut amerlasuut ukiut kingulliit tallimat ingerlaneranni ilumoorlutik Guutimik pallorfiginnittunut qatanngutigiissuarnut ilanngussimapput. Nuannaarutigeqaarput. Qanoq iliornitta taakkununnga ilagiinniittunullu allanut  sunniuteqarnera qularnanngilaq. Pissutissaqarluarpoq eqqarsaatigilluassallugu allat aliikkutassanik, sunngiffimmi sammisanik, pulaartitsisarnermik suliffimmillu qinersinerput qanoq isumaqarfigineraat. Imminut aperisariaqarpugut iliuutsitta oqaatsittalu ilaat paatsoorneqarsinnaanersut allanullu naakkiussutaallutik.

Apustili Paulusip oqaaqqissaarutaa eqqaamagaanni ajunngeqaaq: ’Tamanik iliorsinnaavunga, kisianni ilaat iluaqutaanngillat; tamanik iliorsinnaavunga, kisianni ilaat ineriartuutaanngillat. Namminissaminik piniartoqanngikkili, aapparmili iluaqutissaanik.’ (1 Korintumiut 10:23, 24) Kristumiutut pingaartittorujussuuarput asanninnerup ineriartortinnissa kristumiutullu qatanngutigiissuartut isumaqatigiinneq. — Tussiaat 133:1; Juánase 13:34, 35.

Oqaatsit peqqissaataasut

Oqaatsit eqqortut ilorraallaataasumik sunniuteqarsinnaasorujussuupput. „Tungusunnitsuutitut kusertutut ipput inussiarnersumik oqaatsit tarnimut tungusunnitsut timimullu peqqissaataasut.“ (Ussatit 16:24) Ussatip taassuma ilumuussusia paasineqarsinnaavoq oqaluttuami Gideonip qanoq ililluni Efraimikkullu isumaqatigiikkunnaarnissaagaluaq pinngitsoortikkaa.

Gideon Midjanikkunnut sakkortuumik akiuutilersimavoq taamaattumillu Efraimikkut angutitai qinnuigalugit ikioriartoqqulluni. Akiuunnerulli kingorna Efraimikkut Gideon naammagittaalliorfigaat ajuallassimallutik akiuunneq aallartitsinnagu qaaqqusimanngimmatik. Oqaatigineqarpoq: „Sakkortuumik avoqqaarlerfigigaat.“ Gideonip akivai: „Qanoq iliorama ilissi iliornissinnut naleqqiunneqarsinnaasumik? Ilissi Efraimikkuususi viinnissanit kingunikuikkasi uagut Abieserikkuusugut katersukkatsinnit naleqarnerunnginnerpat? Massami Guutip Midjanikkut siulersuisui Oreb Seʹebilu ilissi assassinnut tunniussimavai. Uanga sumik tamatumunnga naleqqiunneqarsinnaasumik naammassisaqarsimanerpunga?“ (Eqqartuussisut 8:1- 3) Oqatsinik taakkunannga qinerluagaasunik Gideonip isumaqatigiinnginnerup naggueqatigiit sorsuunnerannik kinguneqarsinnaanera pinngitsoortippaa. Immaqa naggueqatigiit Efraimikkut pingaarniartuusimapput. Gideonilli eqqissinermik anguniagaqarnerminut ajoqutaatinngila. Ilaarsinnaavarput?

Allanit ilaanni kamaanneqalertarpugut immaqalu allaat akeqqersimaarfigineqalerluta. Taama pisoqartillugu piviusut miserratigissanngilavut soorlilu taama isumaqarfigineraatigut paasisinnaaneripput misilillugu. Arlaatigut kamalersitsissutaasinnaasumut peqataasimavugut? Taamaassimappat soormi pisooqataanerput nassuerutigigutsigu ersersillugulu pisimasoq ajornerulersissimagatsigu aliasuutigigipput? Oqaasialunnguit eqqarsaatigilluakkat immaqa pissutsit najummassimanartut iluarseqqissinnaavaat. (Jâko 3:4) Immaqa akerlerisatta narrujuummisimasup nuannaralutigu inussiarnersumik qularunnaarsinneqarnissani taamaallaat pisariaqartippaa. Biibilimi oqaatigineqarpoq „Qisussaarukkaangat inneq qamittartoq“. (Ussatit 26:20) Aap, oqaasissagut mianersuukkaangatsigut eqqortumillu siunertaqarluta saqqummiullugit ’kamakkunnaarsitsissaagut’ misigissutsikkullu ikit mamitillugit. — Ussatit 15:1.

Apustili Paulus imatut kajumissaarivoq: ’Ajornanngippat sapinngisassinnik inuit tamaasa eqqissiveqatiginiarsigik.’ (Rûmamiut 12:18) Soorunami allat misigissusii naalagaaffiginngilavut, kisianni eqqissinissaq anguniarlugu sapinngisatsinnik iliorsinnaavugut. Pissutissaqanngilaq nammineq allalluunniit naammanngitsumik akerliunerannit killinneqassalluni. Taarsiullugu Biibilimi ilitsersuutit tunngaveqarluartut naalattariaqarpavut. Akerleriinnerit Jehovamit ilinniartinneqarnerput malillugu atorutsigit, pilluarneq eqqissinerlu naassaanngitsoq angussavarput. — Jesaja 48:17 (wE 15/8 2000)

[Quppernerup ataani ilanngussaq]

[Qupp. 25-mi assiliartaq]

Piumasatta pinissaa peqqussutigisarparput?

[Qupp. 26-mi assiliartaq]

Abraham akerleriissummi saqitsaakkunnaarsitsiniarnermigut maligassiuilluarpoq