Kristusitut isumaliortaaseqarit

’Guutip erinitsannaveersaasup tuppallersaasullu tunilisi ataasiusumik isumaliorfigeqatigeeqqullusi Kristus Jesus malillugu.’ — RÛMAMIUT 15:5.

1. Isumaliortaasitta qanoq ililluni inuunerput tamaat sunnersinnaava?

ISUMALIORTAASEQ inuunermi pingaaruteqartorujussuuvoq. Isumaliortaaserput — eqiasunnerput eqiasuinnerpulluunniit, isumalluannginnerput isumalluarnerpulluunniit, assortuiumatuunerput suleqatigiuminartuunerpulluunniit, naammagittaannerput qujamasuttuunerpulluunniit — pissutsini assigiinngitsuni qanoq qisuariarnitsinnut aamma allat uatsinnut qanoq qisuariarnerannut sunniuteqangaartarpoq. Ajunngitsumik isumaliortaaseqarutta allaat atugarlioraluarluta nuannaarsinnaavugut. Isumaliortaaserpulli pitsaanngippat naammagittaalliortuaannassaagut atugarissaaraluaraangattaluunniit.

2. Qanoq ililluni isumaliortaaseq aalajangersimasoq pigiliunneqarsinnaava?

² Isumaliortaaseq ajunngitsoq ajortorluunniit ilikkagaavoq. Collier’s Encyclopedia-mi meeraq inoorlaaq pillugu ima allassimavoq: „Meeqqap isumaliortaasissani ilinniartariaqarpaa, soorluttaaq oqaatsit pisinnaassuserluunniit alla ilinniartariaqarai.“ Qanoq ililluta isumaliortaaseq aalajangersimasoq ilinniarsinnaavarput? Assigiinngitsorpassuit soorunami sunniuteqaqataasinnaapput, avatangiisilli ilagisartakkallu pingaaruteqaqaat. Qinerlerfissiami qulaani eqqaaneqartumi allassimavoq: „Milunnikkullusooq qanigisatta isumaat ilinniarlugillu pigiliuttarpavut.“ Ukiut tusindillit arlallit matuma siorna Biibilimi tamatumunnga assingusumik allassimasoqarpoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ — Ussatit 13:20; 1 Korintumiut 15:33.

Eqqortumik isumaliortaatsikkut maligassaalluartoq

3. Eqqortumik isumaliortaatsikkut kina maligaassaalluarnerpaava, qanorlu ililluta ilaarsinnaavarput?

³ Sutigut tamatigut, aamma eqqortumik isumaliortaatsimigut, Jesus maligassaalluarpoq. Ima oqarpoq: ’Maligassamimmi pivassi imaalioqqullusi soorlu ilissinnut iliortunga.’ (Juánase 13:15) Jesus ilaassagutsigu ilinniaqqaartariaqarparput. * Jesusip inuunera misissoqqissaartariaqarparput apustili Peterip oqaasii maleruarumallugit: ’Tamatumunngami qaaqqusimavusi, Kristusissaaq anniarmimmat ilissi pillusi maligassaqartillusi, tumini atuaqqullusigik.’ (1 Pîtruse 2:21) Jesusip assiginissaa sapinngisatsinnik anguniagaraarput. Taamaaliussagutta taassumatut isumaliortaaseqartariaqarpugut.

4, 5. Rûmamiut 15:1-3-mi Jesusip pissusiisa ilaat suna eqqaaneqarpa, kristumiullu qanoq ilillutik ilaarsinnaavaat?

⁴ Jesus Kristusitut isumaliortaaseqarneq qanoq paasisariaqarpa? Paulusip Rûmamiunut agdlagai-ni kapitali 15-imi akissutissarsisinnaavugut. Kapitalip tamatuma versiini siullerni Paulusip Jesusip pissusiisa ilaat malunnarnerusoq eqqaavaa: ’Uagulli sanngisuusugut sanngiitsut qajannassusiisigut kamagissavavut namminerlu nuannarisatsinnik  iliornata. Nungulluta inoqatitta nuannarisassaannik iliorniarta iluaqutaassasumik ineriartuutaassasumik; Kristusissaaq nuannarisaminik iliunngilaq, kisianni soorlu allassimasoq: „Ilinnik mitallersut mitallerneri uannut tupput.“’ — Rûmamiut 15:1-3.

⁵ Kristumiut kajumissaarneqarput Jesusip isiginnittaasia ilaaqqullugu maniguullutik allat ikiornerisigut namminneq nuannarisaminnik iliornatik. Maniguulluni allanut kiffartorneq taamaattoq ’sanngisuunut’ ilisarnaataavoq. Jesus inunnit allanit tamanit anersaakkut sanngisuunerusoq imminut pilluni oqarpoq: ’Inuup ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ (Matîuse 20:28) Uaguttaaq kristumiutut allat aamma ’sanngiitsut’ kiffartuunniarlugit siulliulluta iliuuseqarumavugut.

6. Qanoq ililluta Jesusip malersorneqarnermut mitaatigineqarnermullu qisuariarnera ilaarsinnaavarput?

⁶ Jesus aamma allatigut pitsaasumik pissuseqarpoq eqqarsaatimigut iliuutsimigullu tamatigut isumalluartuujuaannarami. Guutimut kiffartornerminut ajunngitsumik isiginnittaatsini allat isumalluanngitsumik isumaliortaasiannit sunnertissimanngisaannarpaa, uagullu sunnertittariaqanngilagut. Guutimut aalajaatsumik pallorfiginninnini pissutigalugu mitaatigineqarlunilu malersorneqaraangami maalaarnani kamagittartarpoq. Nalunngilaa ’iluaqutaassasumik ineriartuutaassasumillu’ allanut iluaritinniartut silamiunit uppinngitsunit paasinninngitsunillu assortorneqarnissartik ilimagisinnaagaat.

7. Jesus qanoq ililluni naammagittartuua, uagullu sooq aamma taamaattariaqarpugut?

⁷ Jesus aamma allatigut ajunngitsumik isumaliortaaseqarpoq. Jehova erinitsaatinngisaannarpaa, naammagittarlunili Guutip siunertaasa naammassineqarnissaat utaqqillugit. (Tussiaat  110:1; Matîuse 24:36; apustilit suliait 2:32-36; Eprîarit 10:12, 13) Aamma ajoqersukkani naammagittaaffigisimanngilai. Kajumissaarpai ’ilinniarfigeqqulluni’, ’qanilaarami’ ajoqersuinini ineriartornarlunilu nakussatsinnarmat. ’Uummatikkut makitajuikkami’ pingaarniarpallaanngisaannarlunilu inornartuunngisaannarpoq. (Matîuse 11:29) Paulusip kajumissaarpaatigut Jesusip taama isumaliortaaseqarnera ilaaqqullugu ima allakkami: ’Ima isumaqaritsi soorlu Kristus Jesus; Guutip taattua taassuma pigigaluaramiuk Guutisut issutsi paggatigisatut isumaqartinngilaa, pissutsili iperarpaa kiffap taattua atillugu inuillu assigilerlugit.’ — Filípimiut 2:5-7.

8, 9. (a) Sooq namminissarsiunngitsumik isumaliortaaseqalissagaanni immikkut ilungersuussisariaqarpa? (b) Jesusip maligassiaata malinniarnissaa artornartikkutsigu sooq nikallortariaqanngilagut, Paulusilu tamatumuuna qanoq maligassaalluarpa?

⁸ Allat kiffartuukkumallugit taakkualu soqutigisaat nammineq soqutigisamit pingaartinnerujumallugit oqarneq ajornanngeqaaq. Ilumoorlutali isumaliortaaserput misissorutsigu immaqa paasissavarput uummatitta taamaaliornissaq kajumissaarutiginerpaanngikkaa. Sooq? Siullermik Adamimit Evamillu namminissarsiorajussuseq kingornukkatsigu; aappassaanik silarsuarmi namminissarsiornermik pingaartitsiffiusumi inuugatta. (Evfisumiut 4:17, 18) Namminissarsiunngitsumik isumaliortaaseqalissagutta eqqarsartaaseq naammalluinnanngitsunut inunnguuserisatsinnut akerliusoq ineriartortittariaqarparput. Taamaaliussagutta aalajaalluinnartariaqarpugut tamaviaartariaqarlutalu.

⁹ Naammalluinnanngitsuunitta, Jesus Kristusip uatsinnut naammalluinnartumik maligassiaanut akerliusup, ilaannikkut nikallortissinnaavaatigut. Immaqa Jesusitut isumaliortaaseqalersinnaanerput qularaarput. Malugikkilli Paulusip kajumissinartumik oqaasii: ’Ilugami, tassa uiniga, ajunngitsoqanngitsoq ilisimavara; piumanissaq pigigaluarpara, kisianni ajunngitsoq suliarissallugu sapersarpunga. Piumasarami ajunngitsoq suliarisarinngilara, kisianni piumanngisara ajortoq suliarisarpara. Guutimmi inatsisai inuutsikkut ilorlikkut nuannarigaluarpakka; kisianni inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut avatinniittunut.’ (Rûmamiut 7:18, 19, 22, 23) Paulusip naammalluinnanngitsuunerata Guutip piumasaanik iliorusunnerani akornusersortuarpaa, isumaliortaasiali — Jehova taassumalu inatsisai pillugit eqqarsaatai — maligassaalluarput. Uaguttaaq taassumatut isumaliortaaseqarsinnaavugut.

Eqqunngitsumik isumaliortaaseq allanngortinneqarsinnaavoq

10. Isumaliortaaseq qanoq ittoq ineriartorteqqullugu Paulusip Filippimiunut kajumissaarutigaa?

¹⁰ Imaassinnaava ilaasa isumaliortaasertik allanngortittariaqaraat? Aap. Ukiuni hundredelinni siullerni kristumiut ilaat taamaaliortariaqarsimagunarput. Filippimiunut allakkamini Paulusip eqqortumik isumaliortaaseq eqqartorpaa. Ima allappoq: ’Ima pinngilaq tigoreeriga [qilammi inuunissamut siusinnerusumik makinnissaq], imaluunniit naammatsereersunga: kisianni arpanniarpara, tigussagaluarneriga, uangattaaq Kristusip tigummanga. Qatanngutikka, imminik pillunga isumaqanngilanga tigoreeriga; ataaserli pivara: tununniittut puiorlugit siuninniittullu isattorlugit tikisassaq arpanniarpara ajugaasup pisassaa Guutip Kristus Jesusikkut pavannga qaaqqusissutaa piniarlugu. Taava inersimasugut tamatta taama isumaqarniarta.’ — Filípimiut 3:12-15.

11, 12. Jehovap qanoq ililluni isumaliortaatsimik eqqortumik paasitittarpaatigut?

¹¹ Paulusip oqaasiisa takutippaat kristumiunngoreerluta siumukarnissarput pisariaqarsorinngikkutsigu isumaliortaaserput amigaateqartoq. Taamaakkutta Kristusitut isumaliortaaseqanngilagut. (Eprîarit 4:11; 2 Pîtruse 1:10; 3:14) Taava neriuutissaqanngilagut? Naamerluinnaq. Ilumoorluta kissaatigigutsigu Guutip ikiorsinnaavaatigut isumaliortaasitta allanngortinnissaanut. Paulus nangilluni allappoq: ’Sukkut taama isumaqanngikkaluarussi Guutip tamatuminngattaaq nassuerfigiumaarpaasi.’ — Filípimiut 3:15.

¹² Kissaatigigutsigu Jehovap isumamik eqqortumik paasitissagaatigut nammineq iliuuseqartariaqarpuguttaaq. ’Taama isumaqanngikkaluartut’  eqqortumik isumaliortaaseqalersinnaapput qinunikkut Guutip oqaasia atuaqqissaartarunikku kristumiut atuagassiataat ’inussiap ilumoorlunilu silatuup’ pilersitai ikiortigalugit. (Matîuse 24:45, NV) Kristumiut utoqqaanertat, ’Guutip ilagiissai paareqqullugit’ anersaamit illernartumit toqqarneqartut, nuannaarlutik ikiuiumapput. (apustilit suliait 20:28) Qujamasungaarsinnaavugut Jehovap naammalluinnanngitsuunerput eqqarsaatigalugu asannilluni ikiorumammatigut! Ikiuinera ilassiniartigu.

Allat ilinniarfigikkit

13. Jobimik oqaluttuaq Biibilimeersoq qanoq ilinniutigisinnaavarput eqqortumik isumaliortaaseqarneq pillugu?

¹³ Romamiunut allakkamini kapitali 15-imi Paulusip nassuiarpaa itsaq inuusimasut maligassiaasa eqqarsaatigineri isumaliortaasitsinnik allannguinissatsinnut iluaqutigissagipput. Ima allappoq: ’Siornagut allassimasut tamarmik allassimapput uatsinnut ilinniutissaallutik nerioqqulluta erinitsannata allakkallu tuppallersaatigalugit.’ (Rûmamiut 15:4) Jehovap kiffaasa aalajaatsut itsaq inuusimasut ilaat isumaliortaatsimikkut allannguisariaqarsimapput. Job pingaarnertigut ajunngitsumik isumaliortaaseqarsimavoq. Jehova ajortumik isummersorsimanngisaannarpaa, naallu naalliuuteqaraluarluni Guuti tatigiunnaarsimanngilaa. (Job 1:8, 21, 22) Kisianni imminut iluartuuteqqajaasimavoq. Elihu aqqutigalugu Jehovap Job ikiorpaa taamaalioqqajaajunnaarsinniarlugu. Ajuallannani Jobip isumaliortaatsimi allanngortittariaqarnera akueraa taamaaliorlunilu. — Job 42:1-6.

14. Isumaliortaasitta tungaatigut ajoqersorneqarutta Job qanoq ilaarsinnaavarput?

¹⁴ Uppeqatitta ilaata inussiarnersumik oqarfigippatigut eqqunngitsumik isumaliortaaseqarunartugut Jobitut qisuarissanerpugut? Jobip ’Guuti oqaaserluffiginngilaa’, uagullu taamaaliortariaqanngilagut. (Job 1:22) Naapertuilluanngitsumik naalliuuteqarutta naammagittaalliunngisaannarta imaluunniit Jehova artornartunut pisuutinngisaannartigu. Imminut iluartuutinnata eqqaamatigu Jehovamut kiffartornermi qanorluunniit pisinnaatitaaffeqaraluarluta suli ’kiffaasugut atunngitsut’. — Lúkarse 17:10.

15. (a) Jesusip ajoqersugaasa ilaat qanoq eqqunngitsumik isuliortaaseqarsimappat? (b) Peter qanoq ililluni ajunngitsumik isumaliortaaseqarpa?

¹⁵ Ukiuni hundredelinni siullerni Jesusip tusarnaartaasa ilaat eqqunngitsumik isumaliortaaseqarsimapput. Ilaanni Jesus paasiuminaatsunik oqaaseqarpoq. Taamaattumik ’ajoqersugaasa ilarpassui’ oqarput: ’Oqaatsit tamakku mamianaqaat,  kia tusarumassavai?’ Taakku eqqunngitsumik isumaqarnerat erseqqippoq, tamatumalu kingunerisaanik Jesus tusarnaarunnaarpaat. Oqaluttuaq ima nangippoq: ’Taamanernit ajoqersugaasa ilarpaalui tunuarterput angalaqatigiunnaarlugulu.’ Tamarmik eqqunngitsumik isumaliortaaseqarpat? Namik. Allassimavoq: ’Taava Jesusip taakku aqqaneq-marluk oqarfigai: „Ilississaaq aallassavisi?“ Taava Simon Peterip akivaa: „Naalagaq, kimut aallassagatta?“’ Peterip nammineq apeqqutini ima akivaa: ’Illit oqaaseqarputit naassaanngitsumik inuussutilinnik.’ (Juánase 6:60, 66-68) Pitsaasumik isumaliortaaseqarpoq! Biibilip ajoqersuutaasa nassuiaataat imaluunniit paasinninnerit allanngoraangata paasiuminaatseqqaassagaluarutsigik uaguttaaq taassumatut isumaliortaaseqartariaqarpugut. Silatusaarnerunngilaq paasiuminaatsitaqarneq pissutigiinnarlugu Jehova kiffartorfigiunnaarutsigu imaluunniit ’oqaatsit peqqissinartut’ akerliannik oqaaseqarutta. — 2 Timûtiuse 1:13.

16. Jesusip nalaani juutit upperisarsiornikkut siuttui tupannartumik qanoq isumaliortaaseqarpat?

¹⁶ Ukiuni hundredelinni siullerni juutit upperisarsiornikkut siuttui Jesusitut isumaliortaaseqarsimanngillat. Jesusip Lazarus toqusunit makitimmagu paasinarsivoq taakkua Jesus tusarumanngivikkaat. Tupinnartuliaq tamanna eqqortumik isumalinnut tamanut uppernarsaataalluarpoq Jesusip Guutimeersuuneranut. Imali allassimavoq: ’Taava palasiunerit farisiiarillu killisiuisoqatigiissussanik ataatsimut qaaqqusipput oqarlutik: „Qanoq pissaagut? Inuk taanna amerlasuunik nalunaaqutiliormat. Ilaginnaannarutsigu tamarmik upperfigilissavaat, taavalu Romamiut nunarpullu innuttavullu tigujartussavaat.“’ Aaqqiissuutissaq suna eqqarsaatigaat? ’Ullormit tassannga isumalioqatigiittarput toqukkumallugu.’ Jesus toqunniaannarnagu aamma tupinnartuliorsinnaaneranut uppernarsaat uumasoq suujunnaarsinniarpaat. ’Palasiunerit isumalioqatigiipput Lazarusissaaq toqukkumallugu.’ (Juánase 11:47, 48, 53; 12:9-11) Alianangaassagaluarpoq uagut taakkutut isiginnitaaseqarutta nuannaarutigisinnaasaraluarpullu ajuallaatigalugulu kamassutigigutsigu! Navianartuussaarlu!

Kristusip isumalluartumik isumaliortaasia ilaaruk

17. (a) Pissutsini suni Daniel qunusuitsuliorpa? (b) Jesusip qanoq ililluni qunusuinnini ersersippaa?

¹⁷ Jehovap kiffai isumalluartumik isumaliortaaseqartuarput. Danielip akerai isumalioqatigiipilullutik inatsisilioqqusimmata kinaluunniit ullut 30-t ingerlaneranni guutimut allamut inummulluunniit kunngiunngitsumut qinoqqusaajunnaarsillugu, Danielip nalunngilaa tamanna Jehova Guutimut attaveqarnerminut attuumassuteqartoq. Ullut 30-t ingerlaneranni Guutimut qinunngila? Naamik, qunusuilluni ullormut pingasoriarluni Jehova qinnuigisarpaa taamaaliortareernermisut. (Daniel 6:6-17) Jesus aamma akeqqaminit qunutitaanngilaq. Sabbatimi angut toqungasumik assalik naammattoorpaa. Jesusip nalunngilaa juutit najuuttut ilaasa amerlasuut kamassutigissagaat sabbatimi ajorunnaartitsiguni. Isumaannik toqqaannartumik aperai, akiumanngimmatalu angut ajorunnaarsillugu. (Mákorse 3:1-6) Jesus nangaanani eqqortuusorisamisut iliortuaannarpoq.

18. Sooq ilaasa assortortarpaatigut, isumalluanngitsumillu isumaat qanoq qisuariarfigisariaqarparput?

¹⁸ Ullumikkut Jehovap Nalunaajaasuisa nalunngilaat assortuisut ajortumik qisuariarsinnaanerat qunussutigisariaqarnagu. Qunulersinneqarunik Jesusitut isumaliortaaseqarsimassanngillat. Amerlasuut Jehovap Nalunaajaasui assortortarpaat, ilaasa paasisimasakinnertik allallu oqaluussisartunik uumissuinertik tusarliussaannilluunniit iluarinninnginnertik pissutigalugu. Isumalluartumilli  isumaliortaaserput taakkua uumissuinerannit sunnerneqartariaqanngilaq. Allat aalajangiitinngisaannassavavut qanoq Guuti pallorfigissagipput.

19. Qanoq ililluta Jesus Kristusitut isumaliortaaseqarsinnaavugut?

¹⁹ Jesusip ajoqersukkani Guutillu pilersitai tamatigut isumalluartumik isumaqarfigisarpai, qanorluunniit artornartigigaluarpat. (Matîuse 23:2, 3) Ilaartariaqarparput. Qatanngutivut naammalluinnanngitsuugaluarput, uaguttaarli naammalluinnanngitsuuvugut. Nunarsuarlu tamakkerlugu qatanngutigiissuit avataanni sumi pitsaanerusunik ilagisartagaqarsinnaavugut ilumoornerusunillu ikinnguteqarsinnaallutalu? Jehovap oqaatsiminik allassimasumik tamakkiisumik suli paasitinngilaatigut, upperisarsioqatigiilli allat kikkut uatsinnit paasisimasaqarneruppat? Tamatigut eqqortumik isumaliortaaseqarta, Jesusitut isumaqarluta. Taamaaliussagutta ilaatigut Jehova utaqqiumasariaqarparput, tamannalu allaaserisami tulliuttumi sammissavarput. (wE 1/9 2000)

[Quppernerup ataani ilanngussaq]

Uteqqiineq

• Isumaliortaasitta qanoq ililluni inuunerput tamaat sunnersinnaava?

• Jesus Kristusip isumaliortaasia oqaluttuariuk.

• Jobip isumaliortaasia qanoq ilinniarfigisinnaavarput?

• Assortorneqarutta qanoq isumaliortaaseqartariaqarpugut?

[Atuaqqissaarnermi apeqqutit]

[Qupp. 7-mi assiliartat]

Kristumiu eqqortumik isumaliortaasilik allat ikiorniarlugit siulliulluni iliuuseqartarpoq

[Qupp. 9-mi assiliartaq]

Qinunikkut Guutip oqaasianik atuaqqissaartarneq Kristusitut isumaliortaaseqalernissatsinnut iluaqutigissavarput