Utaqqisinnaassuseqarit!

„Uanga [Jehova] alaatsinaassavara, Guuti annaassisiga neriuffigissavara, Guutima qinnutiga tusarumaarpaa.“ — MIKA 7:7.

1, 2. (a) Israelikkut qanoq ilillutik eqqunngitsumik isumaliortaasertik puilasuitsumi ajoqutigaat? (b) Kristumiup ajunngitsumik isumaliortaaseq ineriartortinngippagu qanoq pisoqarsinnaava?

ISUMALIORTAASEQ apeqqutaalluni inuunermi assigiinngitsorpassuit isumalluartumik isumalluanngitsumilluunniit isigineqarsinnaapput. Israelikkut puilasuitsumiitillutik tupinnartuliornikkut mannamik pilersorneqarput. Nuna naasoqanngitsoq tamanna qinertariaqaraluarpaat Jehovallu pilersuinera qujamasuutigalugu. Taamaaliorneq isumalluarnermut ersiutaasimassagaluarpoq. Akerlianilli Egyptenimi nerisarsimasatik assigiinngitsorpassuit eqqarsaatigiinnarpaat mannalu nerisassapalaajunerarlugu. Isumaliortaatsip ajussusia! — 4 Moses 11:4-6.

² Ullumikkut kristumiup isumaliortaasia neriuuteqarneranut annilaanganeranulluunniit aamma aalajangiisuusinnaavoq. Eqqunngitsumik isiginnittaaseqarutta nuannaarunnaarsinnaavugut, taamaappallu ilungersunassaaq, Nehemiasimi oqarpoq: „[Jehovami] nuannaarneq ilissi nakuussutigaarsi.“ (Nehemja 8:10) Isumalluartumik nuannersumillu isumaliortaaseqarutta nukittujuarsinnaavugut ilagiinnilu eqqissinermut ataasiussuseqarnermullu siuarsaataalluni. — Rûmamiut 15:13; Filípimiut 1:25.

3. Jeremiasip artornartut nalaanni inuunermini ajunngitsumik isumaliortaatsini qanoq iluaqutigisimavaa?

³ Jeremias piffissami artornartumi inuugaluarluni ajunngitsumik isumaliortaaseqarsimavoq. Allaat 607-imi u.n.s. Jerusalemip aserorneqarneranut amiilaarnartumut isiginnittuugaluarluni, isumalluarpoq. Jehovap Israel puiussanngilaa, inuiaqatigiillu aniguiumaarput. Upputit-ni Jeremias ima allappoq: „[Jehovap] nallittuilluni naammassisai isumassuineralu soraanngillat. Ullaat tamaasa nutaavoq saammaannera, unneqqarissusialu angeqaaq.“ (Upputit 3:22, 23) Oqaluttuarisaaneq  naallugu Guutip kiffai, allaat pissutsini ajornerpaani, isumalluartumik nuannersumillu isumaliortaaseqartuarniarsimapput. — 2 Korintumiut 7:4; 1 Tásalûníkamiut 1:6; Jâko 1:2.

4. Jesus qanoq isumaliortaaseqartuarpa, tamannalu qanoq iluaqutigaa?

⁴ Ukiut 600-t Jeremiasip inuunerata kingorna Jesusip ajunngitsumik isumaliortaatsini aamma nikallujuissutigisimavaa. Ima atuarpugut: ’Taassuma tipaatsuutissaq imminut saqqangiussaq pillugu ilalaarluni [nappagaq nalliutsitaaffik, NV] atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ (Eprîarit 12:2) Qanorluunniit assortorneqaraluarluni malersorneqaraluarluniluunniit — allaat napakkami naalliutsitaaffimmi — Jesusip ’tipaatsuutissaq imminut saqqanngiussaq’ eqqarsaatigisimavaa. Nuannaarneq tamanna tassaavoq Jehovap kisimi oqartussaaneranik aqqanillu illernartumik aalajangiussinerup immikkut pisinnaatitaaffiginera, siunissamilu inuit naalattut pilluangaarnissaasa eqqarsaatiginera.

Utaqqisinnaaneq ilinniaruk

5. Pissutsini qanoq ittuni utaqqisinnaassuseq iluaqutigissavarput ajornartorsiutip eqqortumik isumaqarfiginissaanut?

⁵ Jesusitut isumaliortaaseq ineriartortikkutsigu nuannaarneq Jehovameersoq annaassanngilarput naak tamatigut ilimagisatsitut piffissarisorisatsigulluunniit pisoqanngikkaluartoq. Pruffiiti Mika oqarpoq: „Uanga [Jehova] alaatsinaassavara, Guuti annaassisiga neriuffigissavara.“ (Mika 7:7; Upputit 3:21) Aamma utaqqisinnaassuseqarnerput takutissinnaavarput. Qanoq ililluta? Assigiinngitsorpassuartigut takutissinnaavarput. Assersuutigalugu isumaqarsinnaavugut qatanngut angut akisussaaffilik maannakkorpiaq iluarsineqartariaqartumik kukkussuteqarsimasoq. Utaqqiumassuseqarutta pisimasut eqqarsaatigisinnaavavut: ’Ilumut kukkusimava, imaluunniit uangaana paatsoorsimagiga? Kukkusimappat imaassinnaava Jehovap akuliuffiginagu akuerigaa isumaqarami qatanngut angut taanna iluarsissasoq tamatuminngalu ajoqersorneqartariaqanngitsoq?’

6. Nammineq ajornartorsiuteqarutta utaqqisinnaassuseqarneq qanoq iluaqutigissavarput?

⁶ Utaqqisinnaaneq aamma pisariaqarsinnaavoq nammineq ajornartorsiuteqarutta sanngiissulluunniit aalajangersimasoq akiorutsigu. Immaqa Jehova ikioqqulluta qinnuigaarput, ajornartorsiulli aaqqinneqanngilaq. Qanoq iliorsinnaavugut? Ajornartorsiut aaqqinniarlugu sapinngisatsinnik iliuuseqartuartariaqarpugut, Jesusillu oqaasii tatigalugit: „Qinujuaannaritsi, tunineqassaasi taava; ujarlertuaannaritsi, nanisissaasi taava; kasuttortuaannaritsi, mappiunneqassaasi taava.“ (Lúkarse 11:9, NV) Qinujuaannarit Jehovalu utaqqillugu. Piffissanngorpat piumasani naapertorlugu qinnutivut akissavai. — 1 Tásalûníkamiut 5:17.

7. Utaqqisinnaassuseqarnerup qanoq ikiorsinnaavaatigut Biibilimik annertunerujartortumik paasisaqarneq eqqortumik isigissallugu?

⁷ Biibilip siulittuutai eqquussortillugit Allakkat  paasinerujartorpagut. Immaqali ilaannikkut isumaqartarpugut aalajangersimasoq pillugu paasisaqarneruneq sivisuumik pisariaqarsimasoq. Pisariaqarsorisarpulli malillugu nassuiarneqanngippat utaqqisinnaassuseqassaagut? Eqqaamajuk Jehovap naleqqulluartuutikkaa ’anngigisaq illernartoq Kristusip pia’ ukiut 4000-t missaasa ingerlaneranni saqqummeriartungaartissimagaa. (Evfisumiut 3:3-6, NV) Naammagittaannissamut pissutissaqarpugut? ’Inussiaq ilumoorlunilu silatooq piffissaq eqqortoq nalliuttaraangat’ Jehovap kiffaanik nerisitsisussatut toqqarneqarsimasoq qularaarput? (Matîuse 24:45, NV) Suut tamaasa paasilluanngikkaluarlugit sooq nuannaarunnaassaagut? Eqqaamajuk Jehovap aalajangeraa qanoq ililluni qaqugulu ’pilersaarutini’ saqqummersissanerlugit. — Amos 3:7.

8. Inuppassuit qanoq ilillutik Jehovap kamagittarnera iluaqutigisimavaat?

⁸ Ilaat immaqa nikallorsimapput isumaqaramik ukiorpassuit aalajaallutik kiffartoreerlutik inuutillutik ’Jehovap ullussaa pingaaqisoq siooranangaaqisorlu’ nalliutissanngitsoq. (Joel 3:3, 4) Qiimmassaatigisinnaavaalli ukiorpassuarni taakkunani pisimasut ajunngitsut eqqarsaatigineri. Peter ima siunnersuivoq: ’Naalakkatta kamajuissusia annassutissaatissiuk.’ (2 Pîtruse 3:15) Jehovap kamagittarnera pissutigalugu inuit eqqortuliorusuttut millionilikkuutaat sallusuissummik ilinniarnissaminnut periarfissinneqarput. Tamanna nuannaarutigissanngilarput? Eqqaamasariaqarparpullu Jehovap kamagittarnera sivisunerujartortillugu ’annerusumik annannissarput sulissutigisinnaagatsigu mianersorluta uulillutalu’. — Filípimiut 2:12; 2 Pîtruse 3:11, 12.

9. Jehovamut kiffartornermi iliuuserisinnaasagut killeqarpata nikallujuinnissatsinnut utaqqisinnaassuseqarneq qanoq iluaqutigisinnaavarput?

⁹ Utaqqisinnaassuseqarutta nikallujuittuarsinnaavugut, allaat assortorneqarneq, nappaatit, utoqqalineq ajornartorsiutilluunniit allat pissutigalugit kiffartornermi kissaatigisatsitut iliorsinnaanngikkaluarluta. Jehovap naatsorsuutigaa uummatikkut iluunngarluta kiffartorfigissagitsinni. (Rûmamiut 12:1) Guutilli ernerata ’sanngiitsumik piitsumillu nallittuisup’ sapikkatsinnik piumaffiginngilaatigut, Jehovalu aamma taamaaliunngilaq. (Tussiaat 72:13) Taamaattumik kajumissaarneqarpugut pisinnaasatsinnik ilioqqulluta, naammagittarlutalu — silarsuarmi matumani imaluunniit piumaartussami — atukkatta pitsaanerulernissaat utaqqeqqullugu. Eqqaamajuk: ’Guuti iluaatsuunnginnami sulinersi asanninnersilu aqqa pillugu ileqqorisarsi puiussanngilai, iluartut kiffartuuttarassigik sulilu kiffartuuttarlugit.’ — Eprîarit 6:10.

10. Utaqqinikkut pissuseq suna pinngitsoorneqarsinnaava? Nassuiaruk.

¹⁰ Utaqqisinnaassuseqarutta aamma anneruniarnermut illersuutigissavarput. Ilaat utaqqiumannginnamik tunussimapput. Immaqa isumaqarput Biibilimik paasinnittaatsini imaluunniit peqatigiiffiup tungaatigut allannguisoqartariaqartoq. Paasisimanngilaalli Jehovap anersaavata siulersuineratigut kiffaq ilumoorlunilu silatooq allannguisartoq Taassuma piffissarititaani, uagut piffissarisorisatsinniunngitsoq. Allannguinerit tamarmik Jehovap piumasaanut naapertuuttariaqarput, uagut isumatsinnut naapertuunnatik. Tunussisut anneruniartuunertik ’orlussutigaat’. Kristusitut isumaliortaaseq ineriartortissimagunikku nuannaaginnarsinnaagaluarput Jehovallu innuttaasa akornanniiginnarlutik. — Filípimiut 2:5-8.

11. Utaqqisariaqarnerput qanoq pitsaanerpaamik atorsinnaavarput, taamaalillutalu kina malissavarput?

¹¹ Soorunami utaqqisinnaanerup eqiasunneq uninngaannarnerluunniit assiginngilaa. Suliassaqangaarpugut. Assersuutigalugu nammineq inuttut Biibili atuaqqissaartariaqarparput taamaalillutalu anersaakkut ittunik soqutiginnilluta soorluttaaq  pruffiitit aalajaatsut allaallu inngilit taamaaliorsimasut. Taakkua soqutiginninnerat pillugu Peter ima allappoq: ’Annannissaq tamanna pruffiitit . . . siunersiutigalugulu killisiutigaat. . . . Tamakku inngilit itsuarumagaluarpaat.’ (1 Pîtruse 1:10-12) Nammineq atuaqqissaartarneq pisariaqavippoq, aalajangersimasumillu ataatsimiigiartarneq qinunerlu aamma taamaapput. (Jâko 4:8) Anersaakkut pisariaqartitaminnik miserratiginninnatik aalajangersimasumik anersaakkut nerisartut uppeqatiminnillu ilagisaqartartut takutippaat Kristusitut isumaliortaaseqalersimallutik. — Matîuse 5:3, NV.

Piviusorsiortarit

12. (a) Adam Evalu sumut attaviitsoorusuppat? (b) Adamip Evallu maligassiaat malinneqarmat qanoq kinguneqarpa?

¹² Guutip inuit siulliit marluk pinngortikkamigit taassuma kisimi suna eqqortuunersoq sunalu eqqunngitsuunersoq aalajangersinnaavaa. (1 Moses 2:16, 17) Adam Evalu Guutimit siulersorneqarumanngillat, ullumikkullu silarsuarmi avatangiisitsinni tamatuma kinguneri takussaapput. Apustili Paulus allappoq: ’Inukkut ataasiusukkut ajorti silarsuarmut tikiuppoq ajortikkullu toqu tikiulluni, taamalu toqup inuit tamakkerlugit tikikkai, tamarmik ajortuliormata.’ (Rûmamiut 5:12) Adamip nalaaniilli ukiut 6000-t ingerlaneranni paasinarsisimavoq Jeremiasip oqaasii ilumoortut: „[Jehova], nalunngilara inuup ingerlavissani nammineq aalajangigassarinngikkaa angutillu aalajangigassarinngikkai qanoq ingerlanissani alloriartarnissanilu.“ (Jeremia 10:23) Jeremiasip oqaasiisa ilumoornerinik akuersineq isumaqanngilaq nikallujasuuneq. Piviusorsiornermut ersiutaavoq. Oqaasiisa paasinarsitippaat ukiuni hundredelippassuarni inuit Guutimut atanatik naalakkersuitillugit sooq ’inuup inoqatini pissaaneqarfigiuarsimagaa ajoqutigisaanik’. — Nalunaajaasup oqaasii 8:9, NV.

13. Jehovap Nalunaajaasuisa inuit angusinnaasaat piviusorsiortumik qanoq isigaat?

¹³ Inuiaat atugaat eqqarsaatigalugit Jehovap Nalunaajaasuisa paasisimavaat pissutsit aaqqissuussaaneranni maanna atuuttumi angusarisinnaasat killeqartut. Isumalluartumik isumaliortaaseqarutta nuannaartuaannarsinnaavugut, ajornartorsiutilli tamaasa aaqqissinnaanngilavut. 1950-ikkut aallartinneranni USA-mi palasi ima qulequtalimmik atuakkiorpoq: The Power of Positive Thinking (Isumalluartarit — Pilluarlutit inuugit). Atuakkiamini eqqartorpaa isumalluarluni iliuuseqarfigigaanni akornutaasut amerlanerit ajugaaffigineqarsinnaasut. Isumalluartuunerup ajunngitsuunera qularutissaanngilaq. Misilittakkalli takutippaat ilisimasat, piginnaanerit, nunap piinik pigisat pissutsillu allarpassuit inuit ataasiakkaat angusinnaasaannut killiliisartut. Silarsuarlu tamakkerlugu eqqarsaatigalugu ajornartorsiutit inunnit aaqqinneqarsinnaanerannut angivallaaqaat — qanorluunniit isumalluartigisumik eqqarsaraluaraanni!

14. Jehovap Nalunaajaasui isumalluarpalunngitsuuppat? Nassuiaruk.

¹⁴ Jehovap Nalunaajaasui tamakkuninnga piviusorsiortumik isiginnittaaseqaramik ilaannikkut isumalluapalunngitsuunerarneqartarput. Akerlianilli ilungersorlutik inuit atugaasa naassaanngitsumik pitsaanerulernissaannut aaqqiissuutissatuaq allanut oqaluttuarerusuppaat. Aamma taamaaliornermikkut Kristusip isumaliortaasia ilaartarpaat. (Rûmamiut 15:2) Inuit Guutimut ajunngitsumik attaveqalernissaannut ikiorumallugit ulapipput. Nalunngilaat siunissaq eqqarsaatigalugu tamanna inuit iluaqutiginerpaassagaat. — Matîuse 28:19, 20; 1 Timûtiuse 4:16.

15. Jehovap Nalunaajaasuisa qanoq ilillutik inuit pitsaanerusumik inuulersillugit ikiorsimavaat?

¹⁵ Jehovap Nalunaajaasuisa innuttaaqatigiit iluanni ajornartorsiutit — ingammillu ajornartorsiutit inooriaatsip ajortunngorsimasup Biibilimut akerliusup kinguneri — isiginngitsuusaanngilaat. Guutimut kiffaarusuttut Jehovamut Nalunaajaasunngortinnatik allanngortariaqarput. Amerlanertigut Guutip iluarinngisaanik ileqqoqarunnaartariaqartarput. (1 Korintumiut 6:9-11) Taamaattumik Jehovap Nalunaajaasuisa inuit eqqortuliorusuttut amerlasuut imerajuttuujunnaartillugit, ikiaroortarunnaaartillugit, kanngunartuliortarunnaartillugit aningaasanoortarunnaartillugillu ikiorsimavaat. Inuit taakku akisussaassuseqartumik peqqusersuitsumillu ilaquttamik  isumaginissaat ilikkarsimavaat. (1 Timûtiuse 5:8) Inuttut ataasiakkaatut ilaqutariittullu taamatut ikiorneqaraangata innuttaaqatigiinni ajornartorsiutit ikinnerulertarput — ikiaroortartut, ilaqutariinni nakuusertartut ilaallu ilanngullugit ikinnerulertarmata. Innuttaasutut namminneq inatsisinik maleruaanermikkut allallu pitsaanerusumik inuulersillugit ikiornerisigut Jehovap Nalunaajaasuisa aaqqissuussinerit oqartussaasullu isumaginninnermik suliaqartut oqilisaappaat.

16. Sooq Jehovap Nalunaajaasui silarsuaq pitsaanerulersinniarlugu suliniutinut peqataasanngillat?

¹⁶ Jehovap Nalunaajaasuisa silarsuarmi ileqqussatigut pissutsit allanngortissimagamikkik? Ukiut qulit kingulliit ingerlaneranni oqaluussisartut 3.800.000-init 6.000.000-ingajaannut amerlisimapput. Tassa 2.200.000-t missaannik amerlisimapput, taakkualu ilarpassui kristumiunngoramik ileqqupiluit taamaatissimavaat. Tassa inuppassuit inuunerat pitsaanerulersimavoq — ukiut taakkua ingerlaneranni silarsuup inuinut 875.000.000-inik amerlisimasunut sanilliullugit ikittuinnaagaluarput. Nalunngikkaluarlugu ikittuinnaat aqqut inuunermut sammisoq qinissagaat Jehovap Nalunaajaasuisa inuit tusarusuttut ikiorsinnaagamikkik nuannaarutigeqaat. (Matîuse 7:13, 14) Jehovap Nalunaajaasui silarsuaq tamakkerlugu allannguinissat Guutip kisimi pilersissinnaasai utaqqitillugit, silarsuaq pitsaanerulerniarlugu suliniutinut, aallaqqaammut ajunngitsumik siunertaqartaraluartunut kingusinnerusukkulli pakatsissutaasartunut allaallu nakuusernermik kinguneqartartunut, peqataasanngillat. — 2 Pîtruse 3:13.

17. Jesus allat ikiorniarlugit qanoq iliorpa, aamma qanoq iliunngila?

¹⁷ Taamaalillutik Jehovap Nalunaajaasui Jesusip nunamiitilluni Jehovamut tatiginninneratut tatiginnipput. Ukiuni hundredelinni siullerni Jesus arlaleriaqaluni tupinnartuliorluni ajorunnaarsitsisarpoq. (Lúkarse 6:17-19) Allaat toqusunik makititsivoq. (Lúkarse 7:11-15; 8:49-56)  Nappaatilli tamaasa piinngilai toqulu ajugaaffigilluinnarnagu. Nalunngilaa Guutip piffissarititaa suli nalliutinngitsoq. Jesus inuttut naammalluinnartuugami qularnanngitsumik politikkikkut isumaginninnikkullu ajornartorsiutit annertuut aaqqinniarlugit iliuuseqangaarsimasinnaagaluarpoq. Inuit taamanikkut inuusut ilaasa kissaatigisimagunaraluarpaat Jesusip pissaanini taamatut atussagaa, taamaaliorumanngilarli. Ima atuarpugut: ’Inuit Jesusip nalunaaqutiliaa tamanna takugamikku oqarput: „Ilumut tassa pruffiiti taanna silarsuarmut tikiuttussaq.“ Jesusilli nalujunnaaramigit kunnginngortikkumalluni tigujartussagaanni, aamma qaqqamut kisimiilluni nigorpoq.’ — Juánase 6:14, 15.

18. (a) Jesusip qanoq takutittuarsimavaa utaqqisinnaassuseqarluni? (b) 1914-imiilli Jesusip suliassaa qanoq allanngorsimava?

¹⁸ Jesus politikkimut suliassanulluunniit isumaginninnermut tunngasunut akuliukkumanngilaq nalunnginnamiuk kunngitut pissaaneqalernissaminut nunarsuarmiullu tamarmik ajorunnaarsinneqarnissaannut suli piffissaanngitsoq. Allaat qilaliareernermi anersaatullu toqujuitsuulereernermi kingorna iliuuseqartinnani Jehovap piffissarititaa utaqqivaa. (Tussiaat 110:1; apustilit suliait 2:34, 35) 1914-imili Guutip naalagaaffiani kunnginngortinneqarnerminiilli ’aallarpoq ajugaalluni ajugaassallunilu’. (sarĸúmersitat 6:2; 12:10) Nuannaarluta qujamasullutalu kunngitut naalakkersuineranut naalatsigitippugut, kristumiuunerartut allat Guutip naalagaaffia pillugu Biibilimi ajoqersuutigineqartunik paasinnikkumanngitsut.

Utaqqineq — artornarpa imaluunniit nuannersuua?

19. Qanoq pisoqarnerani utaqqineq ’tarnikkut anniaataalersinnaava’, qanorlu pisoqarnerani utaqqineq nuannersuusinnaava?

¹⁹ Salomonip nalunngilaa utaqqineq artornarsinnaasoq. Ima allappoq: „Utaqqivallaarneq tarnikkut anniaataalersarpoq.“ (Ussatit 13:12) Qularutissaanngilaq pissutissaqanngitsumik ilimagisaqarsimalluni pakatsineq ’tarnikkut anniaataalersinnaasoq’. Pisussarli nuannersoq — katinnissaq, erninissaq asasanilluunniit naapeqqinnissaq — sivisuumik qilanaarisinnaavarput, utaqqinerlu silatuumik atorutsigu pisussamullu piareersarluarutta nuannaarnerulissaagut.

20. (a) Pisussat nuanningaartut suut qilanaaraavut? (b) Jehovap siunertaasa naammassineqarnissaat utaqqitillugu qanoq ililluta nuannaarsinnaavugut?

²⁰ Qilanaarisavut piviusunngussasut tatigilluinnarutsigu — nalugaluarlugu qaqugu piumaartut — utaqqineq ’tarnikkut anniaataalertariaqanngilaq’. Jehovamik pallorfiginnittut aalajaatsut nalunngilaat Kristusip ukiuni tusindini naalakkersuinissaa qanillisoq. Tatigaat nappaatit toqullu peerneqarluinnarnissaat misigiumaarlugu, qilanaareqaallu toqusimasut milliardilikkuutaat, ilaatigut ilaquttat ikinngutillu toqukkut annaasimasatik, inuunermut tikilluaqqunissaat. (sarĸúmersitat 20:1-3, 6; 21:3, 4) Ullumikkut avatangiisini ajunaarnerpassuaqarmat qilanaaraat Paratiisip nunarsuarmi pilersinneqarnissaa. (Jesaja 35:1, 2, 7) Taamaattumik silatusaarnerussaaq utaqqineq pitsaanerpaamik atorutsigu ’Naalakkallu suliaanik naammassisaqangaartuinnarluta’. (1 Korintumiut 15:58) Anersaakkut neriuartariaqarpugut. Jehovamut qanilliartuinnartumik attaveqarneq ineriartortittuartariaqarparput. Allat uummatikkut iluunngaarlutik Jehovamut kiffartortut ilagisartigik, uppeqativullu qiimmassaartarlugit. Aap, Jehovamit piffissaqartitaatilluta piffissaq sapinngisamik atorluarniartigu. Taamaaliorutta Jehovap utaqqinera ’tarnikkut anniaataassanngilaq’. Akerlianik nuannaarutigingaassavarput! (wE 1/9 2000)

Makku nassuiarsinnaavigit?

• Jesusip utaqqisinnaanini qanoq takutippaa?

• Pissutsini qanoq ittuni kristumiut utaqqisinnaassuseqartariaqarpat?

• Sooq Jehovap Nalunaajaasuisa Jehovap utaqqinera ajorinngilaat?

• Jehova utaqqitillugu qanoq ililluni nuannaartoqarsinnaava?

[Atuaqqissaarnermi apeqqutit]

[Qupp. 12-mi assiliartat]

Jesus ’tipaatsuutissaq imminut saqqangiussaq pillugu ilalaarpoq’

[Qupp. 13-mi assiliartaq]

Ukiorpassuarni kiffartoreeraluarluta nuannaartuarsinnaavugut

[Qupp. 15-mi assiliartat]

Inuit millionilikkuutaat Jehovamut nalunaajaasunngoramik pitsaanerusumik inuulersimapput