Atuaqqissaartarneq — pissarsiffiulluartoq nuannaarutaasorlu

’Ujarniaruk . . . Taava ilisarilissavat Guuti.’ — USSATIT 2:4, 5.

1. Aliikkutaralugu atuarnitta qanoq nuannaartissinnaavaatigut?

INUPPASSUIT nuannaralugu atuartarput. Atuagassiat qinerluagaappata atuarneq peqqinnarlunilu qasuernarsinnaassaaq. Biibilimik atuarnermut pilersaarutip saniatigut kristumiut ilaasa Tussiaatit, Ussatit, iivangkiiliuni oqaluttuat imaluunniit Biibilip atuagartai allat atuaannarlugit nuannarisarpaat. Oqaatsit eqqarsaatillu kusanassusiat nuannaarutigisorujussuuaat. Allat Jehovas Vidners Årbog, atuagassiaq Iteritsi!, atuagassiami matumani inuunermi misigisat, imaluunniit oqaluttuarisaanermik, nunalerinermik pinngortitalerinermilluunniit atuakkiat aliikkutaralugit atuartarpaat.

2, 3. (a) Anersaakkut paasissutissat itisuut qanoq ilillutik nerisassanut mattusuunut assersuunneqarsinnaappat? (b) Atuaqqissaarneq sumik nassataqarpa?

² Aliikkutaralugu atuarneq qasuernarsinnaavoq, isumaliutigilluarlugulu atuaqqissaartariaqarpoq. Tuluk isumaliutersortartoq Francis Bacon allappoq: „Atuakkat ilaat misissulaaginnagassaapput, ilaat atuapallatassaannaapput, ikittuinnaallu atuaqqissaarneqartariaqarlutik.“ Soorunami Biibili taaneqartuni kingullerniippoq. Apustili Paulus allappoq: ’Tamatuminnga [Kristus kunngimit palasimillu Melkizedekimit siumut assersuunneqartoq pillugu] oqaasissaqaraluaqaagut, kisianni oqaatsinik nassuerneq ajornakuluppoq, tusassaaqqajaaginnalerassi. . . . Inersimasut nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Eprîarit 5:11, 14) Nerisassat mattusuut iineqartinnatik uunneqartinnatillu tamuaneqaqqaartariaqarput. Anersaakkut paasissutissat itisuut paasissagaanni pigiliutissagaannilu eqqarsaatigineqaqqaartariaqarput.

³ Oqaatsinik qinerlerfissiami oqaaseq „atuaqqissaarneq“ ima nassuiarneqarpoq: „Atuarnikkut misissuinikkulluunniit ilisarsinissaq paasisaqarnissarluunniit anguniarlugu isummap atornissaa.“ Atuaqqissaarneq qarsupittumik atuarnerinnaanngilaq, immaqa atuartilluni oqaatsit ilaannik allattarluni. Atuaqqissaarneq suliaavoq, isumaliutigilluartariaqarluni immikkoortitsisinnaasariaqarlunilu. Suliniuteqartariaqarnerli nuanniitsuusariaqanngilaq.

 Atuaqqissaarneq nuannaarutigiuk

4. Tussiaasiortoq naapertorlugu, Guutip oqaasianik atuarneq atuaqqissaarnerlu qanoq inuummarinnartuullunilu pissarsilluarnartuusinnaava?

⁴ Guutip oqaasianik atuarneq atuaqqissaarnerlu inuummarissiallannartuullunilu nakussatsiallannarsinnaavoq. Tussiaasiortoq nassuiaavoq: „[Jehovap] inatsisai innarluitsuupput, tarnimik tumannguersaasarput. [Jehovap] nalunaajaatai sallusuitsuupput, paasisakitsunik ilisimatuunngortitsisarput. [Jehovap] maleruagassiai naapertuilluartuupput, uummammik nuannaartitsisarput. [Jehovap] peqqussutai sukuluipput, isinik qaamaneqalersitsisarput.“ (Tussiaat 19:8, 9) Jehovap inatsisai oqaassutaalu tarnimut nutaannguallaataasarput, anersaakkut peqqissiartuutaallutik, qamuuna nuannaartittarluta Jehovallu siunertaanik paasinnilluarsimagatta isitsinni takuneqarsinnaavoq. Nuannerluinnassusia!

5. Atuaqqissaarneq qanoq nuannaarutaangaarsinnaava?

⁵ Sulinerput ajunngitsumik kinguneqaraangat nuannaarutiginerusarparput. Taamaattumik atuaqqissaarneq nuannaarutiginerussagutsigu ilisimalikkavut atupallattariaqarpavut. Jakob ima allappoq: ’Inatsisinut naammalluartunut kiffaanngissutsip piinut soraarani itsuartoq tusartaalluni puiutunngitsoq suliassamillu naammassinnittoq taanna qanoq iliornermini pilluarumaarpoq.’ (Jâko 1:25) Ilikkakkavut inuunitsinni ingerlaannaq atuleraangatsigik nalerisimaarnartorujussuusarpoq. Oqaluussinitsinni ajoqersuinitsinniluunniit apeqqutigineqartartut akiniarlugit misissuisarnerput nuannaarutaangaarsinnaavoq.

Guutip oqaasianut kajungerisaqarneq ineriartortiguk

6. Tussiaat 119-imik allattup Jehovap oqaasianik kajungerisaqarnini qanoq oqaatigaa?

⁶ Tussiaat 119-imik allattup, immaqa Ezekias suli kunngissaalluni, Jehovap oqaasianik kajungerisaqarnini oqaatigaa. Taalliortorpalaarluni oqarpoq: „Ileqqoreqqusatit kajumissaatigaakka oqaatsisillu puiornagit. Ilumummi inatsisitit kajumissaatigaakka . . . Kajumissaatigaakka peqqussutitit nuannarilluakkakka. Nallittuissutsivit tikillinga inooqqullunga, inatsisitit kajumissaatigigakkit. Annaassinissat kiperiffigaara, [Jehova], inatsisitillu kajumissaatigaakka.“ — Tussiaat 119:16, 24, 47, 77, 174.

7, 8. (a) Qinerlerfissiaq naapertorlugu Guutip oqaasianik ’kajumissaatiginninneq’ qanoq paasisariaqarpa? (b) Qanoq ililluta takutissinnaavarput Guutip oqaasia nuannarigipput? (c) Ezra Jehovap inatsisaanik atuartinnani qanoq aalajangertarpa?

⁷ Tussiaat 119-imi oqaatsip ’kajumissaatigaakka’-mik nutserneqartup nassuiarneranut Allakkanik Hebriiarisuunik qinerlerfissiami allassimavoq: „Versi 16-imi oqaatsip ’nuannaangaarneq’ . . . aamma ’eqqarsaatiginneqqissaarneq’ isumaqatigiittut . . . Imatut tulleriinneqarput: nuannaarpoq, eqqarsaatiginneqqissaarpoq, kajumiginnippoq . . . Oqaatsit taakkua imaannguatsiarput siunertaqarluartumik eqqarsaatiginninnikkut inuup Jahvehp oqaasia kajumississutigilersinnaagaa. . . . Oqaatsip isumaa misigissutsinut attuumassuteqarpoq. *

⁸ Aap, Jehovap oqaasianut asanninnerput uummatitsinninngaannertariaqarpoq,  misigissuseqarfitsinnit. Allassimaffimmik aalajangersimasumik atuariikkatsinnik eqqarsaatiginneqqissaarnerput nuannaarutissarsiffigisariaqarparput. Anersaakkut eqqarsaatit itisuut tiguartiffigisariaqarpavut eqqarsaatigeqqissaarlugillu. Taamaaliussagutta eqqissilluta isumaliutiginnilluartariaqarpugut qinullutalu. Ezratut Guutip oqaasiata atuarnissaanut eqqarsaatigeqqissaarnissaanullu uummatikkut aalajangertariaqarpugut. Taanna pillugu ima allassimavoq: „Esrap siunertaraa Jehovap inatsisai paasiniarluarniarlugit, maleruarniarlugit inuillu ilinniartinniarlugit Israelikkut inatsisaannik eqqartuussinermillu malittarisassanik.“ (Esra 7:10) Malugiuk Ezra uummammigut aalajangerami pingasunik siunertaqartoq: paasiniaavoq, nammineq maleruaaniarluni allanillu ilinniartitsiniarluni. Taassuma maligassiaa malinniartariaqarparput.

Atuaqqissaarneq guutisiornitsinnut ilaavoq

9, 10. (a) Tussiaasiortup Jehovap oqaasianut soqutiginninnini qanoq takutippaa? (b) Hebriiarit oqaasiat ’eqqarsaateqarneq’-mik nutserneqartoq qanoq isumaqarpa? (c) Sooq pingaaruteqarpa Biibilimik atuaqqissaarnerup ’pallorfiginninnerup ilaatut’ isiginissaa?

⁹ Tussiaasiortoq oqarpoq Jehovap inatsisai, peqqussutai ileqqoreqqusaalu eqqarsaatigisarlugit. Ima erinarsorpoq: „Maleruagassiatit eqqarsaatigeqqissaarpakka ingerlavigeqqusatillu misissorlugit. . . . Peqqussutinnut isaatissavakka assakka ileqqoreqqusatillu eqqarsaatigilluassallugit. Ilami inatsisitit nuannareqaakka, eqqarsaatinniitittuarpakka. Ilinniartitsisinnit tamanit ilisimassuseqarneruvunga eqqarsaatigiuartarakkit inassutitit.“ (Tussiaat 119:15, 48, 97, 99) Qanoq ililluta Jehovap oqaasia ’eqqarsaatigiuarsinnaavarput’?

¹⁰ Hebriiarit oqaasiat ’eqqarsaateqarneq’-mik nutserneqartoq isumaqarportaaq ’eqqarsaatigeqqissaarpaa, isumasioqqissaarpaa’. Oqaaseq Guutip suliaasa oqaasiatalu nipaatsumik eqqarsaatigeqqissaarnerat pillugu atorneqarpoq. (Theological Wordbook of the Old Testament) Taggit ’eqqarsaatit’ atorneqaraangat ’tussiaasiortup eqqarsaatiginneqqissaarnera’ imaluunniit ’asannilluni Guutip inatsisaanik atuaqqissaarnera’ ’guutisiornermut tunngatinneqarput. Paasivarput qanoq pingaaruteqartigisoq eqqarsaatigigutsigu Guutip oqaasianik atuaqqissaarneq pallorfiginninnitsinnut ilaasoq. Taamaattumik qinunikkut peqqissaartumillu taamaaliortariaqarpugut. Atuaqqissaarneq pallorfiginninnerup ilagaa, pallorfiginninnerpullu pitsanngorsarniarlugu atuaqqissaartarpugut.

Guutip oqaasia itisilertariaqarparput

11. Jehovap eqqarsaatit itisuut anersaakkut ittut innuttaminut qanoq saqqummiuttarpai?

¹¹ Guutimut nersorinnilluni tussiaasiortoq oqarpoq: „Ilami angingaarmata naammassisatit, [Jehova], eqqarsaatitillu siunersissaanatik.“ (Tussiaat 92:6) Apustili Paulusip ’Guutip itissusii’, eqqarsaatit itisuut Jehovap ’anersaamigut’ ’kiffaq ilumoorlunilu silatooq’ aqqutigalugu innuttaminut saqqummersitai, eqqartorpai. (1 Korintumiut 2:10; Matîuse 24:45) Kiffaqatigiit taakkua eqiasuillutik tamaasa anersaakkut inuussutissanik pilersorpaat — nutaat ’immummik’ inersimasullu ’nerisassamik mattusuumik’. — Eprîarit 5:11-14.

12. ’Guutip itissusiinik’ kiffaqatigiit nassuiarsimasaannik assersuummik taasaqarit.

¹² ’Guutip itissusii’ paasissagutsigik qinunikkut Oqaasia atuaqqissaarlugulu eqqarsaatigeqqissaartariaqarparput. Assersuutigalugu allaaserisani nassuiarneqarluarsimavoq Jehova naapertuilluartuusoq aammalu naakkinnittuusoq. Naakkinnittuliornera naapertuilluassusianut akerliunngilaq; Guutimmi naakkinninnera naapertuilluassusianut asanninneranullu ersiutaavoq. Jehovap ajortuliortoq eqqartuukkaangamiuk Jehovap aalajangeqqaartarpaa Ernermi utertitsisutut pilliutaa tunngavigalugu ajortuliortup naakkinnittuliorfiginissaa ajornannginnersoq. Ajortuliortoq peqqissiminngippat pikitsitsippalluunniit Guutip naapertuilluassutsi atussavaa naakkiginissaa naleqqutissanngimmat. Qanorluunniit ilioraluaruni najoqqutassaminut qutsisunut  ilumuussaaq. * (Rûmamiut 3:21-26) „Ata, Guutip ilisimanerata itissusia!’ — Rûmamiut 11:33.

13. ’Oqaatsit isumaviat’ imalluunniit ’katinnerat’, anersaakkut ilumoortut manna tikillugu saqqummiunneqartut, qanoq pingaartissinnaavavut?

¹³ Tussiaasiortutut killitsissutigaarput Jehovap eqqarsaaterpassuarminik aveqatigisarmatigut. David allappoq: ’Ilami eqqarsaativit siunersissaanngissusii uannut, Guuti, ila amerlangaassusii! Kisikkaluarukkit sioqqanit amerlaneroqqajaqaat.’ (Tussiaat 139:17, 18) Eqqarsaatinut kisissaanngitsunut Jehovap piffissami naassaanngitsussami saqqummiukkumaagaanut naleqqiullugit ullumikkut ilisimasavut, manna tikillugu saqqummiunneqartut ilumoortut anersaakkut ittut naleqangaartut, ’oqaatsit isumaviat’ imaluunniit ’katinnerat’, pingaartipparput, Guutillu oqaasia itisilertuarlugu. — Tussiaat 119:160, aamma takuuk NV-mi quppernerup ataani ilanngussaq.

Atuaqqissaarnermi pitsaasunik atortoqartariaqarpoq suliniuteqarlunilu

14. Ussatit 2:1-6-imi Guutip oqaasianik atuaqqissaarnermi ilungersuussisoqartariaqarnera qanoq erseqqissarneqarpa?

¹⁴ Peqqissaarluni Biibilimik itisuumik atuaqqissaassagaanni ilungersortariaqarpoq. Tamanna Ussatit 2:1-6-imi erseqqissarneqarpoq. Maluginiakkit oqaluutit pisorsiutaasut kunngi Salomonip atorai erseqqissarniarlugu Guutimit ilisarsinissaq, ilisimassuseq siuneqassuserlu pigilissagaanni iliuuseqartariaqartoq. Ima allappoq: „Ernera, oqaatsikka ilassiniakkit inassutikkalu pigiliullugit, ilisimassummut naalaarlutit paasiniaallutillu uummatikkut iluunngarlutit. Silassorissuseq qaaqquinnariannguaruk siuneqarnerlu aggeqqullugu nipituumik torlulaffigalugu. Ujarniaruk sølvisiortoq assigalugu, erlinnartunik nassaarniartutut ilungersorlutit. Taava paasilissavat Guutimik mianerinninneq sunaasoq ilisarilerlugulu Guuti. [Jehovami] tassaavoq ilisimassuseqalersitsisartoq, ilisimasaqarneq siuneqarnerlu qarnanit pilersarput.“ Aap, atuaqqissaarneq kinguneqarluassappat ilungersortariaqarpugut, erlinnartunillu nassaarniartutut ujaasilluta.

15. Assersuutip Biibilimeersup suup takutippaa pitsaasumik atuaqqissaariaaseqartariaqartugut?

¹⁵ Atuaqqissaarnerput anersaakkut pissarsiffigissagutsigu atuaqqissaarneq ileqquulluartariaqarpoq. Salomon allappoq: „Ulimaat ikkiillisoq kiinnanneqanngikkuni assoroorutigisariaqartarpoq.“ (Nalunaajaasup oqaasii 10:10) Aap, sulisartup ulimaat ikkiitsoq atoruniuk iluamilluunniit atornagu nukimminik atuilussinnassaaq naammassinerlussalluguluunniit. Taamaassinnaavoq aamma atuaqqissaarnermik atuinerput atuaqqissaariaatsivut assigiinngitsorpassuugamik. Atuaqqissaariaatsitta pitsaanerulersinnissaanut atuakkami Håndbog for den teokratiske skole-mi kapitali 7-imi arlalinnik siunnersuuteqarpoq. *

16. Atuaqqissaassagutta peqqissaarluta siunnersuutit atoriaannaasut suut iluaqutigisinnaavavut?

¹⁶ Sulisartup aallartitsinani sakkut atorfissaqartitani saqqummertarpai. Uaguttaaq atuaqqissaalinnginnitsinni atorfissaqartitavut saqqummertariaqarpavut. Eqqaamasariaqarparput atuaqqissaarneq sulinerusoq eqqarsarluartariaqartugullu, issialluarnissarpullu silatusaarnerussaaq. Eqiingarusukkutta nerrivimmi allaffimmiluunniit issiagutta ajunnginnerussagunarpoq siniffimmi nalanerminngarnit imaluunniit ilorrisimaarluni issianerminngarnit. Sivisulaartumik eqqarsaatiginneqqissaaruit immaqa iluaqutigissavat iseqqimissaarlutit imaluunniit silamut anillutit silaannarissaruit.

17, 18. Atuaqqissaarutit pitsaasut ilaannik atorluarsimasannik taasaqarit.

 ¹⁷ Atuaqqissaarnissatsinnut atortussatsialapassuaateqarpugut. Taakkua ilaat pingaarnerpaaq tassaavoq Biibilimik nutsigaq Ny Verden-Oversættelsen, maannakkut tamaat ilaannaaluunniit oqaatsinut 37-nut nutserneqarsimasoq. Naqitigaq Ny Verden-Oversættelsen nalinginnaasoq allassimaffinnik innersuussuteqarpoq, aamma tunuata tungaani ’Biibilip atuagartaanik allattuiffeqarpoq’, tassanilu allattut atii, sumi allanneqarsimanerat qangalu pisimanerat paasineqarsinnaapput. Aamma oqaatsinut ujarliutitaqarpoq, ilanngussaqarpoq nunallu assingi takuneqarsinnaapput. Aammattaaq oqaatsit ilaannut, soorlu qallunaatut, Biibili taanna anginerusunngorlugu saqqummerpoq, ’Atuaqqissaarut’-mik taaneqartumik. Taanna taaneqareersunik tamanik imaqarpoq, aammalu quppernerit ataanni sukumiisunik ilanngussartaqarpoq ujarliutitaqarlunilu. Guutip oqaasianik itisiliinerunissannut atortussat naqiterneqartartut tamakkiisumik atorluartarpigit?

¹⁸ Atuaqqissaarluni atortussaq alla asseqanngitsoq tassaavoq Qinerlerfissiaq atuakkanik  marlunnik immikkoortulik Indsigt i Den Hellige Skrift (Biibilimik paasisaqarneq). Atuagaq taanna pigigutsigu atuaqqissaaraangatta tamatigut eqqatsinniitittariaqarparput atorniassagatsigu. Biibilimi oqaluuserineqartut amerlanersaasa tunuliaqutaannut tassani paasissutissarsisinnaavugut. Atuagaq „Hele Skriften er inspireret af Gud og gavnlig“ aamma iluaqutaasorujussuuvoq. Biibilip atuagartaasa ilaannik atualeraangavit atuakkami ’Hele Skriften’-imi immikkoortoq tamatumunnga tunngasoq misissorsinnaavat nunami sumi oqaluttuarisaanermilu tunuliaquttaat aammalu Biibilimi atuakkap naalisarlugu imaa uatsinnullu qanoq iluaqutaanersoq paasiniassallugu pitsaassaaq. Ungasinngitsukkut atuaqqissaarnermi atortut naqiterneqarsimasorpassuit taakkua saniatigut aamma cd-rom Watchtower Library saqqummersinneqartoq maanna oqaatsini qulingiluani pineqarsinnaavoq.

19. (a) Sooq Jehovap Biibilimik atuaqqissaarnissatsinnut atortussatsialannik pilersorsimavaatigut? (b) Biibilimik atuartarnissatsinnut atuaqqissaartarnissatsinnullu nakkutiginnilluarnitsinnik takutitsinissatsinnut suna pisariaqarpa?

¹⁹ Jehovap ’kiffaq ilumoorlunilu silatooq’ aqqutigalugu atortussat tamakkorpassuit pilersippai kiffani nunarsuarmiittut ’Guutimik ilisarsileqqullugit’. (Ussatit 2:4, 5) Atuaqqissaarneq ileqqorilluarutsigu Jehovamik ilisarsinerussaagut taassumunngalu qaninnerusumik attaveqasalluta. (Tussiaat 63:2-9) Aap, atuaqqissaarneq ilungersuutassaavoq, pissarsiffiulluarporli nuannaarutaallunilu. Piffissaqarfigineqartariaqarpoq, amerlasuulli eqqarsarunarput: ’Qanoq ilillunga Biibilimik atuartarninnut atuaqqissaartarninnullu naammattumik piffissaqarsinnaavunga?’ Tamanna allaaserisat ataqatigiit ukua pingajuanni sammineqassaaq. (wE 1/10 2000)

[Quppernerup ataani ilanngussat]

Uteqqiinissamut apeqqutit

• Atuaqqissaartarnerput pissarsiffiulluarsinnaava nuannaarutaasinnaallunilu?

• Tussiaasiortutut Jehovap oqaasia ’kajumissaatigigipput’ ’eqqarsaatigigippullu’ qanoq takutissinnaavarput?

• Ussatit 2:1-6-imi Guutip oqaasianik atuaqqissaarnermi ilungersortariaqartugut qanoq takutinneqarpa?

• Atuaqqissaarnermi atortussatsialaat suut Jehovap pilersippai?

[Atuaqqissaarnermi apeqqutit]

[Qupp. 14-mi assiliartaq]

Eqqissilluta isumaliutiginnilluartarutta qinullutalu Guutip oqaasianut nuannarisaqarneq ineriartortissinnaavarput

[Qupp. 17-mi assiliartat]

Guutip oqaasianik atuaqqissaarnermut atortussarpassuit atorluartarpigit?