Atuarnermut atuaqqissaarnermullu piffissarsigit

’Ullut piginnaaffiusut asiutinnaveersigik, ullut ajormata.’ — EVFISUMIUT 5:16.

1. Sooq piffissap pilersaarusiornissaa silatusaarnerua, piffissamillu atuinerput sumik ersersitsisarpa?

OQARTOQARSIMAVOQ ’piffissamik immikkoortitsisoq tassaasoq piffissamik sipaartoq’. Naammassisassaminut piffissamik aalajangersimasumik immikkoortitsisoq piffissaminik atorluaanerugajuppoq. Kunngi Salomon silatooq allappoq: „Qilaap ataani pisartut suut tamarmik aalajangersimasumik piffissaligaapput.“ (Nalunaajaasup oqaasii 3:1) Tamatta assigiimmik piffissaqarpugut; nammineq aalajangigassaraarput qanoq atorluartigissanerlugu. Pingaarnersiuinitta piffissamillu qanoq atuinitta ersersittarpaa suut uummammiuginerugivut. — Matîuse 6:21.

2. (a) Qaqqami oqaluutsimini Jesus anersaakkut pisariaqartitavut pillugit qanoq oqarpa? (b) Eqqarsaatigeqqissaagassarput suna imminut misissornartoq apeqqutigisariaqarparput?

² Timitta pisariaqartimmagu nerisariaqarlutalu sinittariaqarpugut. Anersaakkummi pisariaqartitavut? Taakkuattaaq matussutissinneqartariaqarput. Qaqqami oqaluutsimini Jesus oqarpoq: „Pilluarput anersaakkut pisariaqartitaqarnerminnik  miserratiginninngitsut.“ (Matîuse 5:3; NV) Taamaattumik ’kiffap ilumoorlunilu silatuup’ aalajangersimasumik eqqaasittarpaatigut Biibilimik atuarnermut atuaqqissaarnermullu piffissaqartariaqarnitsinnik. (Matîuse 24:45) Pingaaruteqassusia immaqa nalunngikkaluarlutigu misigisinnaavugut Biibilip atuartarnissaanut atuaqqissaarnissatsinnullu piffissaqarnata. Taamaattumik misissoriartigu Guutip oqaasiata atuartarnissaanut, atuaqqissaarnissamut ilikkakkatsinnillu eqqarsaatiginneqqissaarnissamut piffissaqarnerulersinnaanersugut.

Biibilimik atuarnissamut atuaqqissaarnissamullu qanoq piffissaqartoqarsinnaanersoq

3, 4. (a) Piffissamik atuinerput eqqarsaatigalugu apustili Paulus qanoq siunnersuiva, tamatumunngalu suna ilaava? (b) Paulus oqarami ’ullut piginnaaffiusut asiunnaveersigik’ imaluunniit ’pisiarisigik’ qanoq isumaqarpa?

³ Piffissaq inuuffigisarput eqqarsaatigalugu tamatta apustili Paulusip oqaasii eqqumaffigisariaqarpavut: ’Taamaattumik mianersoqqissaaritsi saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata. Tamanna pillugu siuneqanngitsunngornaveeritsi, [Jehovalli] peqqusaa sunaasoq sianiginiarsiuk.’ (Evfisumiut 5:15-17) Siunnersuut tamanna kristumiutut tunniulluinnarsimasutut inuunitsinnut tamarmut soorunami pingaaruteqarpoq, tamatuma ataaniipput qinunermut, atuaqqissaarnermut, ataatsimiigiarnermut, sapinngisatsinnillu ’Guutip naalagaaffianik nutaarsiassap nuannersup’ oqaluussissutigineranut peqataanissamut piffissarsinissarput. — Matîuse 24:14; 28:19, 20.

⁴ Ullumikkut Jehovap kiffaasa amerlasuut Biibilimik atuartarneq atuaqqissaartarnerlu piffissaqarfigiuminaatsikkunarpaat. Soorunami ulloq unnuarlu nalunaaquttap-akunneranik ataatsimik ilasinnaanngilarput, taamaattumik Paulusip siunnersuutaa piffissamik asiutitsinnginnissaq allamik isumaqarsimassaaq. Oqaatsit griikerisuut ’ullut piginnaaffiusut asiutinnaveersigik’-mik nutserneqarsimasut isumagaat ’alla akigalugu pisineq’. Expository Dictionary-mi W. E. Vinep ima nassuiarpaa: „periarfissat tamaasa sapinngisamik atorluarlugit, iluaqutigilluarniarsaralugit, asiutinneqarunimmi utertinneqaqqissinnaanngimmata.“ Biibilip atuartarnissaanut atuaqqissaarnissaanullu piffissaq piginnaaffiusoq sumit pissarsiarisinnaavarput?

Eqqortumik pingaarnersiuisariaqarpugut

5. Sooq aamma qanoq ’sorliit iluartut’ imaluunniit pingaaruteqartut ’misilittariaqarpavut’?

⁵ Illuinnarni akisussaaffitta saniatigut aamma guutisiornitsinni anersaakkut ittunik arlalinnik isumagisassaqartarpugut. Jehovamut kiffaagatta tunniulluinnarsimasut ’Naalakkap suliaanik naammassisaqangaartuinnarpugut’. (1 Korintumiut 15:58) Taamaattumik Paulusip kristumiut Filippimiittut allaffigai ’sorliit iluarnersut misilittarsinnaaqqullugit’. (Filípimiut 1:10) Tamanna isumaqarpoq pingaarnersiuisariaqartugut. Anersaakkut ittut nunap piinik soqutiginninnermit pingaarnerusariaqarput. (Matîuse 6:31-33) Anersaakkulli pisussaaffivut eqqarsaatigalugit oqimaaqatigiimmik isiginnittaaseqartariaqarpugut. Kristumiutut inuunitsinnut  assigiinngitsunut tunngasunut qanoq eqqortumik piffissaliisinnaavugut? Nakkutillisut angalasartut nalunaarutigisimavaat kristumiut ’soorliit iluarnersut’ isumagisariaqakkamik ilaat, Biibilimik atuarneq namminerlu atuaqqissaarneq, ilaannikkut sumiginnaqqajaasaraat.

6. Angerlarsimaffimmi avataaniluunniit sulineq eqqarsaatigalugu piffissamik pisinnaaffiusumik pisineq qanoq nassataqarsinnaava?

⁶ Soorlu paasereeripput piffissamik piginnaaffiusumik piffissarsineq isumaqarpoq „periarfissap sapinngisamik atorluarnerpaanissaa“ aamma „iluaqutigilluarnerpaanissaa“. Taamaattumik Biibilimik atuartarnissaq atuaqqissaartarnissarlu sumiginnaqqajaagutsigu, isumatusaarnerussaaq tamatta immikkut piffissamik atuisarnerput paasiniarutsigu. Suliffeqarutta piumasaqarpallaartumik piffissaajarnarpallaartumillu nukinnillu atuinarpallaartumik ajornartorsiut tamanna Jehovamut qinunikkut saqqummiuttariaqarparput. (Tussiaat 55:23) Imaassinnaavoq allannguisinnaasugut pingaaruteqarnerusut Jehovamik pallorfiginninnermut attuumassutillit, assersuutigalugu atuaqqissaarneq Biibilimillu atuarneq, piffissaqarfiginerujumallugit. Eqqortumik oqaatigineqarsimavoq angerlarsimaffimmi suliassat naammassinavianngitsut. Taamaattumik arnat kristumiut piffissamik pingaarnersiuisariaqarput aalajangersimasumillu Biibilimik atuarnermut sukumiisumillu atuaqqissaarnermut piffissalertariaqarlutik.

7, 8. (a) Atuarnermut atuaqqissaarnermullu sammisassanit sunit piffissarsisinnaavugut? (b) Aliikkutaqarnerup suna siunertaraa, tamannalu siunertarigutsigu eqqortumik pingaarnersiuinissarput qanoq ajornannginnerutissinnaavarput?

⁷ Amerlanersatta piffissaq sammisassanut pingaaruteqanngitsunut atugassaraluartik atuaqqissaarnermut atorsinnaavaat. Immitsinnut aperisinnaavugut: ’Atuagassianut aviisinullu silamiorpaluttunik atuarnermut, tv-mik isiginnaarnermut, nipilersuutinik tusarnaarnermut  videospillernermullu piffissaq qanoq annertutigisoq atortarpara? Qarasaasiaq piffissaqarfiginerusarpara Biibilimik atuarnissaminngarnit? Paulus oqarsimavoq: ’Tamanna pillugu siuneqanngitsunngornaveeritsi, Jehovalli peqqusaa sunaasoq sianiginiarsiuk.’ (Evfisumiut 5:17) Nalunaajaasut amerlasuut atuaqqissaarneq Biibilimillu atuarneq naammattumik piffissaqarfiginngilaat tv-mik isiginnaarpallaarneq pissutiginerullugu. — Tussiaat 101:3; 119:37, 47, 48.

⁸ Ilaat immaqa oqassapput atuaqqissaaginnavissinnaanatik aliikkutassaqartariaqarlutillu. Tamanna ilumoorpoq, imaassinnaavorli isumassarsiatsialaasoq piffissaq aliikkusersornermut atortagarput piffissamut Biibilimik atuarnermut atuaqqissaarnermullu atortakkatsinnut naleqqiuttariaqarparput. Inernera immaqa tupaallaatigissavarput. Aliikkusersorneq qasuersaarnerlu pisariaqartippavut eqqortumillu isigisariaqarlugit. Aliikkutaqarnerup anersaakkut suliniuteqaqqinnissatsinnut nutaannguallannissarput siunertaraa. Tv-mi aallakaatitat videospillillu amerlasuut qasunarsinnaapput, Guutilli oqaasianik atuarneq atuaqqissaarnerlu inuummarissinarpoq nakussatsiallannarlunilu. — Tussiaat 19:8, 9.

Ilaasa atuaqqissaarneq qanoq piffissaqarfigisaraat

9. Atuagassiaaqqami Ullut tamaasa Allakkat misissortakkit-mi 1999-imoortumi siunnersuutigineqartut maleruarutsigik qanoq iluaqitigissavarput?

⁹ Atuagassiaaqqami Ullut tamaasa Allakkat misissortakkit-mi * 1999-imoortumi siuleqummi allassimavoq: „Pitsaanerussaaq ullormut allassimaffik nassuiaatillu atuagassiaaqqami matumaniittut ullaat tamaasa atuartarukkit. Misigissaatit soorlu Jehovap Ajoqersuisorsuup unnersuumminik itersaraatit. Siulittuutitigut oqaatigineqarpoq ullaat tamaasa Jesus Kristus Jehovap unnersuutaanik iluaqutiginnittartoq: ’[Jehovap] ullaat tamaasa siutiga itersarpaa ajoqersukkat pisarnerattut tusarnaaqqullunga’.“ Taamaalilluni Jesusip ’ajoqersukkap oqaanik nikallortut nakussatsissinnaasimavai’. (Jes. 30:20; 50:4; Mat. 11:28-30) Ullaat tamaasa Guutip oqaasianit unnersuussutinit naleqqulluartunit ’itersarneqartaruit’ nammineq ajornartorsiutigisinnaasatit atoruminarnerutiinnarnagit aammali ’ajoqersukkap oqaanik’ allat ikiorsinnaassavatit.“

10. Ilaasa Biibilimik atuarneq atuaqqissarnerlu qanoq piffissaqarfigisarpaat, qanorlu iluaqutigaat?

¹⁰ Kristumiut amerlasuut siunnersuut tamanna malittarpaat ullaaralaakkut ullormut allassimaffik nassuiaallu atuartarlugit tamatumalu saniatigut Biibili atuarlugu atuaqqissaarluguluunniit. Frankrigimi pioneeri arnaq aalajaatsoq ullaat tamaasa makiaartarpoq minutsillu  30-t Biibilimik atuarniarluni. Qanoq ililluni ukiut tamaasa taamaaliorsinnaasimava? Ima oqarpoq: „Aalajangerpunga qanorluunniillu pisoqassagaluarpat atuarnissamik pilersaarutiga aalajangiussimaniarlugu!“ Qaqugukkulluunniit atuartarnissamut pilersaaraluarutta pilersaarutitta aalajangiussimanissaa pingaarnerpaavoq. René Mica ukiuni 40-ni Europami Afrikallu avannaani pioneeriusimasoq oqarpoq: „1950-imiilli ukiut tamaasa Biibilip naallugu atuarnissaa anguniagariuarpara, maannakkulli 49-riarlunga taamaaliorpunga. Misigisimavunga Pinngortitsisumut qanittumik attaveqartuarnissannut aalajangiisuulluinnartoq. Guutip oqaasiata eqqarsaatigeqqissaarnera iluaqutigisimavara Jehovap naapertuilluassusiata pissusiisalu allat paasinerunissaannut nakussatsinnarsimaqaarlu.“ *

’Piffissanngoraangat nerisassaannik tunisisarneq’

11, 12. (a) Anersaakkut ’nerisassanik’ sunik ’kiffap ilumoorlunilu silatuup’ isumagisarpaatigut? (b) ’Nerisassat’ taakku qanoq piffissaasukkut tunniunneqartarpat?

¹¹ Soorlu aalajangersimasumik nerisarneq timikkut peqqinnartoq, atuaqqissaarnermut Biibilimillu atuarnermut aalajangersimasumik pilersaaruteqarneq anersaakkut peqqinnarpoq. îvangkîlio Lúkarsip agdlagâ-ni Jesusip oqaasii atuarsinnaavavut: ’Kinami taava illumi pisortaatitaava aalajaatsoq, silatooq, naalagaata kiffaminut paarsisunngortitassaa piffissanngoraangat nerisassaannik tunisaqqullugit?’ (Lúkarse 12:42, NV) Ukiut 120-t sinnerlugit Napasuliaq Alapernaarsuiffik Biibililersaarutillu allat aqqutigalugit anersaakkut ’nerisassanik piffissanngoraangat tunniussisarsimavoq’.

¹² Malugiuk oqaaseq ’piffissanngoraangat’. ’Ajoqersuisorsuatta’ Jehovap ernini kiffaqatigiillu aqqutigalugit piffissakkut eqqortukkut innuttani ajoqersortarpai ajoqersuutit ileqqullu pillugit. Soorlulusooq nipi ataatsikkut tusaripput oqartoq: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi.’“ (Jesaja 30:20, 21) Inuttut ataasiakkaarluta Biibili Biibililersaarutillu peqqissaartumik atuaraangatsigik aammattaaq misigigajuppugut eqqarsaatit toqqaannartumik uatsinnut allanneqarsimasut. Aap, siunnersuutit ajoqersuutillu Guutimeersut piffissanngoraangat pisarpavut, taamaalillutalu usserneqarnerit assortornissaannut silatuumillu aalaajangernissatsinnut iluaqutigisarpavut.

Peqqinnartunik nerisarneq ineriartortiguk

13. Anersaakkut qanoq peqqinnanngitsumik nerisaqartoqarsinnaava?

¹³ ’Nerisassat’ piffissanngoraangat tunniunneqartut iluaqutigilluassagutsigik nerilluartariaqarpugut. Biiblimik atuarnermut atuaqqissaarnermullu aalajangersimalluinnartumik pilersaaruteqartariaqarpoq malittariaqarlugulu. Anersaakkut peqqinnartumik nerisarpit itisilerillutillu atuaqqissaarnissamut aalajangersimasumik piffissalertarpit? Imaluunniit atuagassat uatsinnut piareersarluakkat qarsupiinnartumik atuapallartarpigit, tuavioqalutit nukingiinnaq nerisarpit imaluunniit allaat nerinngitsoortarlutit? Anersakkut peqqinnanngitsunik nerisaqarneq ilaasa uppernermikkut sanngiillissutigaat — allaalluunniit tunussissutigalugu. — 1 Timûtiuse 1:19; 4:15, 16.

14. Sooq allaaserineqartareeraluartut peqqissaartumik misissornissaat iluaqutaava?

¹⁴ Ilaat immaqa isumaqarput ajoqersuutit tunngaviusut nalunngereerlugit allaaserisallu nutaarsiassaqannginnerarlugit. Taamaattumik aaqqissuulluakkamik atuaqqissaartarnissartik ataatsimiigiartarnissartillu pisariaqarsorinngilaat.  Biibilimili takutinneqarpoq ilinniareersimasatsinnik eqqaassineqartuartariaqartugut. (Tussiaat 119:95, 99; 2 Pîtruse 3:1; Jûtarse 5) Soorlu igasup pikkorissup nerisassat aalajangersimasut assigiinngiiaartumillu atoqqittarai mamaat allanngorartinniarlugu, kiffaqatigiit aamma assigiinngitsorujussuarnik anersaakkut pikkunnartunik sassaalliivigisarpaatigut. Allaat oqaluuserineqarajuttut allaaserineqartareersut annikitsualuttaqarput arajutsisariaqanngisatsinnik. Tassami, piffissaq nukiillu atuaqqissaarnitsinnut atortakkavut atuakkatsinnit qanoq pissarsitiginersugut aalajangiisuusarput.

Atuarnerup atuaqqissaarnerullu anersaakkut iluaqutissartaat

15. Biibilip atuartarneratigut atuaqqissaarneratigullu Guutip oqaasianik oqaluussisutut qanoq pikkorissiartorsinnaavugut?

¹⁵ Biibilimik atuarneq atuaqqissaarnerlu arlalippassuartigut iluaqutissartaqarput. Kristumiutut  akisussaaffitta tunngaviunerusut ilaata naammassineqarnissaanut ikiorneqarpugut, tassaasinnaaqqulluta ’sulisartoq pakatsisussanngitsoq oqaatsimik sallusuissutip pianik tunioraalluartoq’. (2 Timûtiuse 2:15) Biibili atuarnerujartortillugu atuaqqissaarnerujartortillugulu isumarput Guutip eqqarsaataanik imaqarneruleriartussaaq. Taava Paulusitut inuit ’Allakkat najoqqutaralugit nassuiaaffigisinnaavavut taakkununngalu saqqangiullugu’ Jehovap siunertaa nuanningaartoq. (apustilit suliait 17:2, 3) Ilinniartitsisinnaanerussaagut, oqaloqatigiinninnivullu, oqalugiaativut siunnersuutivullu anersaakkut ineriartornarnerussapput. — Ussatit 1:5.

16. Guutip oqaasiata atuartarnera atuaqqissaarneralu inuunitsinni qanoq iluaqutigissavavut?

¹⁶ Piffissap Guutip oqaasiata misissorneranut atukkatta saniatigut inuunerput Jehovap aqqutigeqqusaanut naleqqunnerulersissinnaavarput. (Tussiaat 25:4; 119:9, 10; Ussatit 6:20-23) Atuaqqissaarnitta anersaakkut nakussatsissinnaavaatigut, soorlu maniguunnerulersilluta, ilumoornerulersilluta nuannaarnerulersillutalu. (5 Moses 17:19, 20; sarĸúmersitat 1:3) Biibilimik atuarnitsigut atuaqqissaarnitsigullu ilisarsinerput atoraangatsigu, inuunitsinni Guutip anersaava sunniuteqarluarnerusarpoq, iliuutsitsinnilu tamani anersaap inerititaanik atuinerulerluta. — Galâsiamiut 5:22, 23.

17. Biibilimik atuarnitta atuaqqissaarnittalu annertussusiat pitsaassusiallu Jehovamut attaveqarnitsinnut qanoq sunniuteqarpat?

¹⁷ Guutip oqaasiata atuartarneranut atuaqqissaarneranullu sammisassanit allanit piffissarsinissap pingaarnerpaatinnera Guutimut qamannga pisumik attaveqalissutigisinnaavarput qaninnerulissutigalugulu. Paulusip qinnutigaa kristumioqatini ’[Guuti] peqqusaanik ilisarsisorsuanngoqqullugit tamanik ilisimalersillugit anersaallu piinik sianilersillugit, tassa Jehovami ileqqorisariaqartoq naapertorlugu tamatigut iluarisassaanik saqilluaqqullugit’. (Kulorsamiut 1:9, 10) Tamatumunnga assingusumik ’Jehovami ileqqorisariaqartoq naapertorlugu saqilluassagutta’ uaguttaaq ’peqqusaanik ilisarsisorsuanngortariaqarpugut tamanik ilisimalerluta anersaallu piinik sianilerluta’. Jehovamit pilluaqquneqassagutta akuerineqassaguttalu Biibilimik atuarnitsinnut atuaqqissaarnitsinnullu piffissap atortakkatta annertussusia pitsaassusialu pingaaruteqarnerpaapput.

18. Jesusip oqaasii Juánase 17:3-mi issuarneqartut maleruarutsigik sumik pilluaqquneqassaagut?

¹⁸ ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Tassaana allassimaffiit ilaat ataaseq Jehovap Nalunaajaasuisa atukulanerpaasaat, Guutip oqaasiata atuaqqissaarnerata pingaaruteqassusia allanut paasitinniaraangamikku. Taamattulli aamma nammineq atuaqqissaarneq pingaaruteqartigaaq. Jehovamik erneranillu Jesus Kristusimik ilisarsiartornerput naassaanngitsumik inuunissamik neriuuteqarnitsinnut aalajangiisuuvoq. Eqqarsaatigilaaruk tamanna qanoq paasisariaqartoq. Jehova pillugu ilinniartuaannassaagut — naassaanngilluinnartumillu Taassuminnga ilinniarsinnaassaagut! — Nalunaajaasup oqaasii 3:11; Rûmamiut 11:33. (wE 1/10 2000)

[Quppernerup ataani ilanngussat]

Uteqqiinissamut apeqqutit

• Piffissamik atuinitsigut suna ersersinneqartarpa?

• Biibilimik atuarnermut atuaqqissaarnermut sumit piffissarsisinnaavugut?

• Sooq anersaakkut nerisarnerput eqqumaffigisariaqarparput?

• Allakkanik illernartunik atuartarneq atuaqqissaartarnerlu sunik iluaqutissartaqarpat?

[Atuaqqissaarnermi apeqqutit]

[Qupp. 21-mi assiliartat]

Aalajangersimasumik Biibilimik atuartarnerup atuaqqissaartarnerullu ’sulisartutut pakatsisussaanngitsutut oqaatsimik sallusuissutip pianik tunioraalluartissavaatigut’

[Qupp. 23-mi assiliartat]

Inuunitsinni ulapikkaluarluta inuunitsinni sammisassat allat anersaakkullu suliniutit oqimaaqatigiissikkutsigik pilluaqquneqangaassaagut