Biibilimik atuartarneq — iluaqutaasoq nuannersorlu

„Ullukkut unnuakkullu . . . atuartariaqarpat.“ — JOSVA 1:8.

1. Atuarneq ingammillu Biibilimik atuarneq sutigut iluaqutaava?

ATUAGASSIAT pitsaasut atuartaraanni pissarsiffiginartorujussuusarput. Naalakkersuinermik isumaliutersortartoq franskeq Montesquieu (Charles-Louis de Secondat) ima allassimavoq: „Atuaqqissaarneq tassaavoq inuunerup qatsunassusianut iluaqutissara pitsaanerpaaq. Nalunaaquttap-akunnerani ataatsimi atuarninni peerneqarsinnaanngitsumik aliasuutissaqarsimanngisaannarpunga.“ Biibilimik atuartarneq eqqarsaatigalugu aamma annerusutigut taamaappoq. Tussiaasiortoq isumassarsisitaalluni allappoq: „[Jehovap] inatsisai innarluitsuupput, tarnimik tumannguersaasarput. [Jehovap] nalunaajaatai sallusuitsuupput, paasisakitsunik ilisimatuunngortitsisarput. [Jehovap] maleruagassiai naapertuilluartuupput, uummammik nuannaartitsisarput.“ — Tussiaat 19:8, 9.

2. Sooq Jehovap ukiut ingerlaneranni Biibili sernissortuarsimavaa, innuttamilu Biibilimik qanoq atuarnissaat piumasaraa?

² Biibilimut atuakkiortutut Jehova Guutip atuakkiani ukiuni hundredelikkuutaani akeqqat ajorluinnartut, upperisarsiortut upperisarsiortuunngitsullu, assortuinerannit sernissortuarsimavaa. ’Taassuma inuit tamaasa annaqqummagit sallusuissummillu ilisarsileqqullugit’ oqaatsimi inuiannit tamanit pigilerneqarsinnaanissaa isumagisimavaa. (1 Timûtiuse 2:4) Naatsorsuutigineqarpoq oqaatsit assigiinngitsut 100-t atorlugit nunarsuarmiut 80 procentii anguneqarsinnaasut. Biibili tamaat oqaatsinut 370-inut nutserneqarsimavoq, Biibilillu atuagartaasa ilaat oqaatsini allani 1860-ini atuarneqarsinnaapputtaaq. Jehovap kissaatigaa innuttami Oqaatsiminik atuartarnissaat. Kiffani Oqaatsiminik sammisaqartartut, aap, ullut tamaasa taassuminnga atuartartut, pilluaqqusarpai. — Tussiaat 1:1, 2.

Biibilimik atuartarneq nakkutilliisunut piumasaqaataavoq

3, 4. Israelikkut kunngii Jehovamit sumik piumaffigineqarpat, sunalu pillugu kristumiut utoqqaanertat aamma ullumikkut piumasaqaat taanna naammassisariaqarpaat?

³ Ukiut Israelikkut kunngiutitaqarfissaat pillugit Jehova ima siulittuivoq: „Kunnginngortup inatsisit ukua assilinerat palasinit Levikkuusunit pissavaa; allaffissanut imusanut allagaassaaq. Allakkat imusat imminiitissavai inuuninilu tamaat atuartassallugit, ilikkaqqullugu [Jehova] Guutini mianerissagamiuk. Peqqussutit ileqqoreqqusallu inatsisini taakkunani allassimasut ataqqissavai maleruassallugillu, makitasaarluni nunaqqatini anneruniarfigissannginnamigit peqqussutillu nigussannginnamigit talerpimmut saamimmulluunniit.“ — 5 Moses 17:18-20.

⁴ Malugiuk sooq Jehovap piumasarigaa Israelikkunnut kunngiusussat ullut tamaasa inatsisinik allassimasunik atuartassasut: (1) ’ilikkaqqullugu Jehova Guutini mianerissagamiuk, peqqussutit ileqqoreqqusallu inatsisini taakkunani allassimasut ataqqillugit maleruassallugillu’; (2) ’makitasaarluni nunaqqatini anneruniarfigissannginnamigit’; (3) ’peqqussutit nigussannginnamigit  talerpimmut saamimmulluunniit’. Ullumikkut kristumiut nakkutilliisut aamma ilikkartariaqannginnerpaat Jehova mianerissallugu, inatsisai maleruassallugit, qatanngutitik anneruniarfigissanagit Jehovallu peqqussutai nigussanagit? Ullut tamaasa Biibilimik atuartarneq taakkununnga Israelikkut kunngiinut pingaaruteqarneratulli pingaaruteqartigaaq.

5. Ungasinngitsukkut Siulersuisoqatigiit immikkoortortaqarfiit ataatsimiititaliaat Biibilimik atuartarneq eqqarsaatigalugu qanoq allaffigaat, sunalu pillugu kristumiut utoqqaanertat tamarmik siunnersuutit taamaattut maleruartariaqarpaat?

⁵ Kristumiut nakkutilliisut ullumikkut ulapittuummata ullut tamaasa Biibilimik atuartarneq unamminiarnartuusinnaavoq. Assersuutigalugu angutit Jehovap Nalunaajaasuisa Siulersuisoqatigiivinut ilaasortat nunarsuarlu tamakkerlugu immikkoortortaqarfiit ataatsimiititaliaannut ilaasortat tamarmik ulapittaqaat. Taamaattoq ungasinngitsukkut Siulersuisoqatigiit immikkoortortaqarfiit ataatsimiititaliaat tamaasa allaffigaat ullut tamaasa Biibilimik atuartarnerup atuaqqissaarnermillu ileqquliussinerup pingaaruteqassusiat erseqqissarlugu. Allakkani nassuiarneqarpoq taamaaliortarutta Jehovamut sallusuissummullu asanninnerput allisinneqassasut, ’tamatumalu ikiussavaatigut uppernitta, nuannaarnitta nikallujuissutsittalu naggatissaq ataqqinangaartoq tikivillugu atatinniarnissaannut’. Jehovap Nalunaajaasuisa ilagiivini utoqqaanertat tamarmik aamma taama misigisarput. Ullut tamaasa Biibilimik atuartarunik ’iluatsitsillutik’ imaluunniit paasisaqarluarlutik iliuuseqartassapput. (Josva 1:7, 8) Ingammik taakkununnga Biibilimik atuarneq ’iluaqutaalluni ajoqersuutaallunilu inerteqqutaalluni, iluarsiartuutaalluni, iluarnermut perorsaataassaaq’. — 2 Timûtiuse 3:16.

Inuusuttunut utoqqarnullu pisariaqavissoq

6. Sooq Josuap Jehovap inatsisai tamaasa Israelikkut naggueqatigiivinut nunasisunullu katersuussimasunut atuffassissutigai?

⁶ Itsaq inuinnaat Allakkat namminerisaminnik pigisinnaanngilaat, taamaattumik Biibilimik atuartarneq ilagiit tamarmik katisimatillugit naammassineqartarpoq. Josva illoqarfimmut Ajimut Jehovamit ajugaatinneqareerami Israelikkut naggueqatigiivi katersuutsippai Ebalip Qaqqaanut Garisimillu Qaqqaanut saatsillugit. Ima oqaluttuarineqarpoq: „Taava Josvap inatsisit tamaasa atuffassissutigai pilluaqqussutitaat perloqqussutitaallu ilanngullugit inatsisit allassimaffianni allassimasut tamaasa malilluaqqissaarlugit. Mosesip peqqussutai tamarluinnaasa Josvap atuffassissutigai angutinut katersuussimasunut, arnanut meeqqanut nunasisunullu Israelikkut akornanniittunut.“ (Josva 8:34, 35) Inuusuttut utoqqaallu, Israelikkuusut nunasisullu tamarmik uummatikkut isumakkullu puiuikkiunniartariaqarpaat iliuutsit suut Jehovap pilluaqqussarai suullu iluarissanngikkai. Aalajangersimasumik Biibilimik atuartarutta uaguttaaq iluaqutigissavarput.

7, 8. Ullumikkut kikkut ’nunasisutut’ ippat, aamma sooq ullut tamaasa Biibilimik atuartariaqarpat? (b) Jehovap innuttaasa akornanni ’meeqqat’ qanoq ilillutik Jesus ilaarsinnaavaat?

⁷ Ullumikkut Jehovap kiffai millionilikkuutaat anersaakkut ’nunasisutut’ ipput. Siornatigut silamiut ileqqorisartagaat naapertorlugit inuusimapput, inuunertilli allanngortissimavaat. (Evfisumiut 4:22-24; Kulorsamiut 3:7, 8) Jehovap ajunngitsut ajortullu pillugit aalajangersagai eqqaamajuartariaqarpaat. (Amos 5:14, 15) Ullut tamaasa Guutip oqaasiata atuartarnera taamaaliornissaminnut iluaqutigissavaat. — Eprîarit 4:12; Jâko 1:25.

⁸ Jehovap innuttaasa akornanni ’meeqqat’  amerlasuut angajoqqaaminnit Jehovap iliuusereqqusaanik ajoqersorneqarsimapput, piumasaatali naapertuilluassusianik namminneq qulakkeeriniartariaqarput. (Rûmamiut 12:1, 2) Qanoq ilillutik taamaaliorsinnaappat? Israelimi palasit utoqqaanertallu ima ajoqersorneqarput: „Inatsisit atuarneqartassapput Israelikkut tamarmik tusaatillugit. Inuit, tassa angutit arnallu meeqqallu nunasisullu illoqarfissinni najugaqartut, katersortissigit. Inatsisit tusarlisigit ilikkarsinnaaqqullugu Jehovap Guutimik mianerinissaa pingaartissinnaaqqullugulu peqqussutit inatsisini makkunaniittut tamarmik maleruarnissaat. Aamma meerartassi inatsisinik nalugallartut taakku tusassavaat, ilikkarsinnaaqqullugu [Jehovap] Guutissi mianerinissaa.“ (5 Moses 31:11-13) Inatsisinut naalatsigitikkami Jesusip 12-iinnarnik ukioqarluni Ataatami inatsisaasa paasiniarnissaat soqutigingaarpaa. (Lúkarse 2:41-49) Kingusinnerusukkut ileqqumisut juutit naalagiartarfiini Allakkat atuffassissutigineqartarnerat tusarnaartarpaa peqataaffigisarlugulu. (Lúkarse 4:16; apustilit suliait 15:21) Ullumikkut inuusuttut Jesus ilaarniartariaqarpaat ullut tamaasa Guutip oqaasia atuartarlugu ataatsimiinnernullu Biibilip atuarneqartarfianut atuaqqissaartarfianullu aalajangersimasumik najuuttarlutik.

Biibilimik atuartarneq salliutinneqartariaqarpoq

9. Sooq atuagassavut eqqarsaatigalugit immikkoortitsisinnaassuseqartariaqarpugut? (b) Atuagassiamik matuminnga aallarniisup aaqqissuisullu Biibilimik atuaqqissaarnissamut iluaqutissavut pillugit qanoq allappa?

⁹ Kunngi Salomon ilisimatooq allappoq: „Ernera, manna mianersoqqussutigissavara: Atuakkiat saqqummerartut ingasalluinnarput, eqqarsaatersorpallaarnerlu timimut qasusaataaginnartarpoq.“ (Nalunaajaasup oqaasii 12:12) Oqaatigineqartariaqarportaaq atuakkat ullumikkut saqqummersinneqartut amerlasuut atuaraanni timimut qasusaataaginnanngitsut aammali isummamut navianaateqartut. Taamaattumik immikkoortitsisinnaasariaqarpugut. Biibililersaarutinik atuartarnitta saniatigut aamma Biibili atuartariaqarparput. Atuagassiamik matuminnga aallarniisup aaqqissuisullu atuartartuni ima allaffigai: „Puigunngisaannartigu  Biibili najoqqutassarigipput atuaqqissaarnissamullu iluaqutissatut Guutimit tunniunneqaraluartut Biibilimut taarsiisuunatik ’iluaqutissaannaasut’.“ * Taamaattumik Biibililersaarutit sumiginnarnagit Biibiliinnaq atuartariaqarparputtaaq.

10. ’Kiffap aalajaallunilu silatuup’ qanoq ililluni Biibilimik atuartarnerup pingaaruteqassusia erseqqissarsimavaa?

¹⁰ Tamatuma pingaaruteqassusia eqqumaffigalugu ’inussiap aalajallunilu silatuup’ ukiorpassuarni Teokratiimik Atuarfiup pilersaarutaanut atatillugu ilagiinni tamani Biibilimik atuartarneq pilersaarutigisimavaa. (Matîuse 24:45) Pilersaarut maanna atorneqartoq malikkaanni ukiuni arfineq-marlunni Biibili naallugu atuarneqarsinnaavoq. Tamarmik, ingammillu nutaat siornatigut Biibili naallugu atuarsimanngikkunikku, pilersaarut tamanna iluaqutigissavaat. Napasuliaq Alapernaarsuiffiup Peqatigiiffiata ajoqersuiartortitassanut Atuarfiani aamma Kiffartortut Atuarfianni atuartut Betelimilu kiffartortunngorlaat tamarmik piumaffigineqartarput ukiup ataatsip ingerlanerani Biibili naallugu atuassagaat. Nammineq inuttut ilaqutariittulluunniit qanorluunniit pilersaaruteqaraluaruit Biibilimik atuarneq pingaartinneqartariaqarpoq.

Atuartarnerit sumik ersersitsiva?

11. Sooq ullut tamaasa Jehovap oqaasii nerisariaqarpavut?

¹¹ Biibilimik atuarnissamut pilersaarutitit naammassinngitsoortarukkit imminut ima aperisariaqarputit: ’Atuartarnera tv-milluunniit isiginnaartarnera Jehovap oqaasianik atuarnissannut qanoq sunniuteqartarpa?’ Eqqaamajuk Moses qanoq allassimasoq — Jesusilu qanoq uteqqiisoq — ’timiusaannaq inuup inuussutiginngilaa, oqaaserli sunaluunniit Guutip qarnanit anisoq inuussutigisaraa’. (Matîuse 4:4; 5 Moses 8:3) Soorluttaaq ullut tamaasa timiusaq assingaluunniit nerisaripput timikkut peqqissuuniarluta, aamma ullut tamaasa Jehovap eqqarsaatai misissortariaqarpavut anersaakkut peqqissuuniarluta. Ullut tamaasa Guutip eqqarsaatai sammisarsinnaavavut Biibili atuarlugu.

12, 13. (a) Apustili Peterip Guutip oqaasianik kajungerisaqartariaqarnerput qanoq assersuusiaraa? (b) Paulusip qanoq ililluni immummik assersuut Peterimit allaanerusumik atorsimavaa?

¹² Biibili ’inunnut oqaaseritinnagu Guutimulli oqaaseritillugu (massalu ilumut taamaappoq)’ kajungeraarput soorlu inoorlaap anaanami immua kajungerigaa. (1 Tásalûníkamiut 2:13) Apustili Peter ima assersuussiorpoq allakkami: ’Inoorlaannguatut immuk piviusoq oqaasiusoq kajungerisiuk, tamatumuuna annannissamut alliartoqqullusi, misigisimagussiuk Naalagaq avaaginnittuusoq.’ (1 Pîtruse 2:2, 3) Nammineq misigisimagutsigu ’Naalagaq avaaginnittuusoq’ Biibilimik atuartarneq kajungerilissavarput.

¹³ Maluginiarnarpoq Peterip uani immummik assersuut apustili Paulusip atorsimasaanit allaanerusumik atoraa. Immuup inoorlaap inuussutissat pisariaqartilluinnagai tamaasa matussusertarpai. Peterip assersuussiaata takutippaa Guutip oqaasiata ’annannissamut alliartornissatsinnut’ pisariaqartitavut tamaasa imarigai. Paulusilli immummik pisariaqartitsineq eqqaavaa anersaakkut inersimasuunerartut ilaasa peqqinnanngitsunik inuussuteqarnerat takutinniarlugu. Hebriiarinut kristumiunut allakkamini Paulus allappoq: ’Qangalimi ajoqersuisunngorunnarsissagaluarlusi Guutip oqaasiisa ilinniaqqaariaqartortaannik kingumut ajoqersoriaqalerpusi immummillu pisariaqalerlusi, nerisassaq mattusooq sapilerassiuk. Inersimasulli nerisassamik mattusuumik pisariaqarput, tassa misigisaqartarnermit sungiusagaasunik sianissutillit ajunngitsorlu ajortorlu immikkoorsusiisigut ilisarisinnaallugit.’ (Eprîarit 5:12-14) Biibili peqqissaartumik atuartarutsigu siuneqassutsitta ineriartortinnissaanut anersaakkullu ittunik kajungerisaqarnissatsinnut sunniuteqangaassaaq.

Qanoq ililluta Biibili atuartariaqaripput

14, 15. (a) Biibilimik Atuakkiortup sumik immikkut periarfissippaatigut? (b) Qanoq ililluta ilisimassuseq Guutimeersoq iluaqutigisinnaavarput? (Assersuutinik taasaqarit.)

¹⁴ Biibilimik atuarneq pissarsiffiulluassappat atuaannarnata aamma qinoqqaartariaqarpugut. Qinuneq immikkut pisinnaatitaaffiuvoq. Taamaammat assersuunneqarsinnaavoq atuakkap sammisai itisuut paasiumallugit atuakkiortumut  ikioqqullutit saaffiginninnermut. Taamaaliorneq iluaqutaasorujussuussaaq! Biibilimik atuakkiortup taama immikkut periarfissippaatit. Ukiuni hundredelinni siullerni siulersuisoqatigiinnut ilaasut ilaata qatanngutini ima allaffigai: ’Ilisimassutsikkut inorsartumik ilaqarussi Guuti tamanik appisaluussinani tunisisaannartoq qinnuigiliuk; taava tunineqarumaarpoq. Upperlunili qinuli nakimanani.’ (Jâko 1:5, 6) Ullumikkut Siulersuisoqatigiit kajumissaartarpaatigut tamatigut qinoqqaarluta Biibilimik atuartaqqulluta.

¹⁵ Ilisimassuseq tassa ilisarsineq naapertorlugu iliuuseqarneq. Taamaattumik Biibilit quppertinnagu Jehova qinnuigiuk atuagassanni nammineq inuuninni atortariaqakkatit eqqumaffigisinnaaniassagakkit. Paasissutissat nutaat ilisimariikkannut atassusikkit. ’Oqaatsinut peqqissinartunut’ ilisimasannut ilanngutikkit. (2 Timûtiuse 1:13) Jehovap kiffaasa itsaq inuusut inuuneranni pisimasut takorluukkit, imminullu aperigit nammineq pisuni taakkununnga assingusuni qanoq qisuariassanerlutit. — 1 Moses 39:7-9; Daniel 3:3-6, 16-18; apustilit suliait 4:18-20.

16. Biibilimik atuarneq iluaqutigisinnaassagutsigu siunnersuutit atoriaannaasut suut atorluarsinnaavavut?

¹⁶ Quppernerit aalajangersimasut naammassiniarlugit atuaannarnak. Piffissaqarluartarit. Atuakkatit eqqarsaatigisakkit. Aalajangersimasoq paaserusukkukku allassimaffiit qupperit ataanni innersuussutigineqartut quppertakkit. Suli paaserpianngikkukku kingusinnerusukkut misissugassannik allattuigit. Atuarninni eqqaamasassatit titartakkit imaluunniit kopiikkit. Immaqalu quppernerup sinaani nammineq atugassannik allattuerusupputit. Allassimaffinnit oqaluussininni ajoqersuininniluunniit atorsinnaasatit pillugit oqaatsit pingaarnerusut allakkit Ny Verden-Oversættelsen-imilu oqaatsinik qinerlerfissiani oqaaseq taanna titaruk. *

Biibilimik atuartarneq nuannaarutigiuk

17. Sooq ullut tamaasa Biibilimik atuartarneq nuannaarutigisariaqarparput?

¹⁷ Tussiaasiortup ’Jehovap inatsisaanik nuannarisaqartoq ullukkullu unnuakkullu inatsisaanillu eqqarsaatiginnittoq’ eqqaavaa. (Tussiaat 1:2) Ullut tamaasa Biibilimik atuartarnerput avaannguginagu nuannaarutigisariaqarparput. Nuannaarutissatut isigissagutsigu ilaatigut eqqumaffigisariaqarparput ilinniakkatta pingaaruteqarnerat. Kunngi silatooq Salomon allappoq: „Pilluarpoq ilisimassummik nassaartoq. . . . Ilisimassutsip aqqutai aqqutaapput alianaatsut, ingerlavii tamarmik eqqissinermut sammipput. Aalajangiussisiminut tamanut orpiuvoq inuunartoq, pilluarput taassuminnga iperaanaveersartut.“ (Ussatit 3:13, 17, 18) Ilisimassuseqalerniarluni ilungersornerit imminut akilertarput, aqqutai alianaammata, eqqissinermut, nuannaarnermut naggataatigullu inuunermut sammillutik.

18. Biibilimik atuarnerup saniatigut aamma suna pisariaqarpa, allaaserisamilu tulliuttumi suna sammissavarput?

¹⁸ Aap, Biibilimik atuarneq iluaqutaallunilu nuannersuuvoq. Naammappali? Kristumiuuneraqatigiit oqaluffeqarfiinut ilaasortat ukiuni hundredelikkuutaani Biibilimik atuartaraluarlutik, ’ilinniartuinnaraluarlutik sallusuissummik ilisarsineq saperluinnarput’. (2 Timûtiuse 3:7) Biibilimik atuarneq pissarsiffiussappat inuunitsinni aammalu oqaluussinermi ajoqersuinermilu ilinniarsimasavut atorniartariaqarpavut. (Matîuse 24:14; 28:19, 20) Suliniuteqartariaqarpugut atuaqqissaarnermullu periaatsit pitsaasut atortariaqarlugit, tamannalu aamma nuannaarutaallunilu qiimmassaataasinnaavoq, soorlu allaaserisami tulliuttumi paasissagipput. (wE 1/10 2000)

[Quppernerup ataani ilanngussat]

Uteqqiinissamut apeqqutit

• Israelikkut kunngiinut siunnersuut suna ullumikkut nakkutilliisut maleruartariaqarpaat, aamma sooq?

• Ullumikkut kikkut ’nunasisutut’ aamma ’meeqqatut’ ippat, aamma sooq taakku ullut tamaasa Bibiili atuartariaqarpaat?

• ’Kiffap aalajaallunilu silatuup’ aalajangersimasumik Biibilimik atuartarniassagatta qanoq ikiorsimavaatigut?

• Qanoq ililluta Biibilimik atuartarnerput iluaqutigisinnaallugulu nuannaarutigisinnaavarput?

[Atuaqqissaarnermi apeqqutit]

[Qupp. 9-mi assiliartaq]

Pingaartumik utoqqaanertat ullut tamaasa Biibili atuartariaqarpaat

[Qupp. 10-mi assiliartaq]

Jesusip juutit naalagiartarfiini Allakkanik atuaanermut peqataaneq ileqqoraa