Naassaanngitsumik pilluarneq qilammi nunarsuarmiluunniit?

SUMI najugaqarneq pilluarnermut aalajangiisuunerpaava? Amerlanerit oqarumassapput peqqinneq, inuunerup siunertaqarnera allanullu ajunngitsumik attaveqarneq pilluarnermut aalajangiisuusut. Biibilimi ima ussateqarpoq: „Asanninnermik pigisaqarluni naatitanit nerisassiat pitsaanerupput uumissuinermik pigisaqarluni ussigup neqaanik siatamik nerisaqarnermit.“ — Ussatit 15:17.

Ajoraluartumik nunarsuarmi angerlarsimaffitsinni uumissuineq, nakuuserneq ajortorpassuillu allat atugaajuarsimapput. Qilammili, anersaalluunniit silarsuaanni, inuppassuit toqup kingorna neriuuteqarfigisaanni, qanoq ippa? Isumaqartoqarneratut akornusersorneqarani pilluarluni eqqissisimaffiujuaannarsimava?

Biibilimi ajoqersuutigineqarpoq Guuti qilammiittoq pinngortitat anersaajusut millionilippassuit inngilinik taaneqartut najugaqatigalugit. (Matîuse 18:10; sarĸúmersitat 5:11) ’Guutip ernerisut’ anersaajusutut allaatigineqarput. (Job 38:4, 7) Inuttulli inngilit nammineq piumasamik iliorsinnaatitaapput; robottitut pinngortitaanngillat. Taamaattumik eqqortuliornissaq eqqunngitsuliornissarluunniit qinersinnaavaat. Inngilit eqqunngitsuliorsinnaappat? Ilaasa tupigusuutigissagunarpaat paasitinneqarunik ukiut tusindillit matuma siorna inngilerpassuit pikitsitsigamik Guutimut ajortuliorsimasut. — Jûtarse 6.

Qilammi pikitsitsineq

Anersaat silarsuaanni ajortuliortoqaqqaarpoq inngili Satanimik (isumaqartoq „assortuisoq“) aamma Diaavulumik (isumaqartoq „mamarliisoq“) taaneqalersoq Guutimut pikitsitsimmat. Inngili taanna naalattuusimagaluartoq nammineq piumasani malillugu eqqunngitsuliorpoq. Kingusinnerusukkut anersaat allat ajortumik sunnerpai, taamaattumillu taakkua ilaasa amerlasuut Noap nalaani ulersuaq sioqqullugu Satan Guutimut pikitsitseqatigilerpaat. — 1 Moses 6:2, aamma takuuk NV-mi quppernerup ataani ilanngussaq; 2 Pîtruse 2:4.

Inngilit tunussisut taakku ingerlaannaq qilammit peersinneqanngillat. Ukiuni tusindilinni arlalinni — qularnanngitsumik killilersugaallutik — qilammiiginnarsinnaatitaapput. * Naggataatigulli Guutip unioqqutitsisut taakku naammagittarfigiunnaarpai, qilammillu anisinneqarput piffissanngorpallu suujunnaarsinneqassallutik. Qilammi nipituumik tutsiuppoq: ’Tamanna pillugu qilaat taakkunanilu ineqartusi ukorsii, tipaatsugitsi.’ (sarĸúmersitat 12:7-12) Qularnanngitsumik inngilit aalajaatsut tipaatsuutigaat pikitsitsisut ajortut taakku qilammiikkunnaarsinneqarmata.

Paasissutissat taakku ilisimaneqarpallaanngitsut takutippaat pinngortitat silassorissut Guutip inatsisaanik najoqqutassiaanillu sumiginnaatillugit piviusumik eqqissineqarsinnaanngitsoq. (Jesaja 57:20, 21; Jeremia 14:19, 20) Kikkulli tamarmik Guutip inatsisaanut naalattuugaluarpata eqqissineqassagaluarpoq. (Tussiaat 119:165; Jesaja 48:17, 18) Inuit tamarmik Guuti asallugulu naalappassuk inoqatitillu asagunikkik nunarsuaq najugaqarfiussannginnerpa  nuannersoq pilluarfiusorlu? Ilumut, Biibilimi taama allassimavoq.

Namminissarsiorlutimmi ajortuliorunnaarumanngitsut? Ilumoorlutik Guutip piumasaatut iliorusuttut eqqissisimanerat naassaanngitsumik akornusersussavaat? Naamik. Guutip inngilit ajortut qilammiittut akuliuffigai, maanilu nunarsuarmi inuit ajortut aamma akuliuffigissavai.

Nunarsuaq minguiarneqassaaq

„Qilak issiavissaarsuaraara, nunarsuarlu isikkama tummarfigaat,“ Guuti oqarsimavoq. (Jesaja 66:1) Guutip nammineq illernarluinnartup ’isikkami tummarfiat’ ajussutsimit mingutsinneqarnera naassaanngitsumut akuerinavianngilaa. (Jesaja 6:1-3; sarĸúmersitat 4:8) Qilammik anersaanit ajortunit minguiaanermisulli inuit ajortut tamaasa nunarsuarmit piissavai. Tamanna allassimaffinni tulliuttuni takutinneqarpoq:

„Ajortummi piiagaasussaapput, [Jehovamulli] neriuttut nuna kingornutissavaat.“ — Tussiaat 37:9.

„Peqqusersuitsut nunami najugaqartuassapput, assuarnaatsut aamma tamaaniissapput. Kisianni guutiitsut piiagaassapput tunussisullu nunaminnit aallarunneqarlutik.“ — Ussatit 2:21, 22.

’Guutip iluarimmagu annikillisitsisisi annikilliornermik akilerumallugit, ilissili annikillisitaasusi uatsinnut ilagitillusi qasuersaarnermik akilerumallusi Naalagaq Jesus qilammit saqqummilerpat pissaanermi inngilii ilagalugit, innermi ikualasorsuarmi Guutimik ilisimasaqanngitsunut Naalakkattalu Jesusip iivangkiiliuanut naalakkumanngitsunut akiniutissaq aggiullugu; taakku pillaammik atugaqassapput tammarnissamik naassaanngitsumik Naalakkap isigernanit nakuussusiatalu naalannassusianit.’ — 2 Tásalûníkamiut 1:6-9.

’Silarsuarlu pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ — 1 Juánase 2:17.

Nunarsuarmi eqqissineq ataavassava?

Biibilimi ersarissumik takutinneqarpoq qanoq sivisutigisumik Guutip ajussutsimik akuerinninnera killeqartoq. Qanorli nalunngissinnaavarput ajussuseq peerneqareeruni takkuteqqissanngitsoq? Noap nalaani ulersuup kingorna sivitsunngitsoq ajussuseq ima annertutigileqqitsigimmat Guutip inuit oqaasiisa paatsiveerutsinnerisigut pilersaarutipilui maangaannartippai. — 1 Moses 11:1-8.

Ajussuseqaqqilinnginnissaanut tatiginninnitsinnut pissutaanerpaavoq nunarsuaq taamanikkussaq ulersuup kingornatigutulli inunnik naalakkersuisoqarunnaarnissaa. Nunarsuaq Guutip naalagaaffiata ataaniissaaq. Naalagaaffik taanna qilammit aqunneqartoq nunarsuarmut naalakkersuisutuaassaaq. (Daniel 2:44; 7:13, 14) Ajussutsimik atuutilersitseqqinniartunut tamanut erniinnaq akuliutissaaq. (Jesaja 65:20) Guutip naalagaaffiata naggataatigut allaat ajussutsimik pilersitsisimasoq, Satan Diaavulu, suujunnaarsissavaa, inngilipiluit malittai ilanngullugit. — Rûmamiut 16:20.

Ullumikkut nerisassaaleqineq, atisassaaleqineq, inissaaleqineq suliffissaaleqinerlu pissutigalugit ilaat pinerluttuliortarput, Guutilli naalagaaffiata ataani inuit tamakku isumakuluutigisariaqassanngilaat. Nunarsuaq tamarmi paratiisiussaaq naggorissoq amigaateqarfiunngitsoq. — Jesaja 65:21-23; Lúkarse 23:43.

Pingaaruteqarnerusumik Guutip naalagaaffiata innuttani eqqissilluni inooqatigiinnissamut ilinniartissavai inuttullu naammalluinnartunngortillugit. (Juánase 17:3; Rûmamiut 8:21) Inuit sanngiissutit ajortulioqqajaanerillu akiortariaqarunnaarunikkik nuannaarlutik Guuti naalalluinnarsinnaalissavaat, inuup naammalluinnartup Jesusip iliorsimaneratulli. (Jesaja 11:3) Jesus allaat usserniarneqarnermini naalliutsinneqarnerminilu Guutimut ilumoortuarpoq, pissutsit  paratiisissami atuutinngilluinnartussat. — Eprîarit 7:26.

Sooq ilaat qilaliassasut

Biibililli atuartartut amerlasuut Jesusip oqaasiinik ilinniartissavai: ’Ataatama illuani inissat amerlaqaat. . . . Inissioriartoreerussilu kingumut tikiukkumaarpunga.’ (Juánase 14:2, 3) Tamatuma nunarsuarmi paratiisiusumi naassaanngitsumik inuunissamik eqqarsaat akerlerinngilaa?

Ajoqersuutit taakku imminnut assortunngillat tapertariillutilli. Biibilimi allassimavoq kristumiut aalajaatsut killilimmik amerlassusillit, 144.000-t, qilammi anersaatut makititaajumaartut. Sooq taama immikkut akilerneqassappat? Tassaagamik Johannesip takorruugai, ’uummartut, Kristusilu kunngioqatigaat ukiut tuusintillit’. (sarĸúmersitat 14:1, 3; 20:4-6) Nunarsuup inuinut milliardilikkuutaanut naleqqiullugit 144.000-t taakku ’savarpannguaannaapput’. (Lúkarse 12:32) Inuit ajornartorsiutigisartagaat namminneq ajornartorsiutigisimagamikkik, Jesusitulli ’qajannarsutsitsinnik naakkinnissinnaapput’ nunarsuaq inuilu pissutsinut paratiiserpalaartunut aallaqqaammut piusimasunut siulersortillugit. — Eprîarit 4:15.

Nunarsuaq — inuiaat naassaanngitsumut angerlarsimaffissaat

Ukiut 2000-ngajaat matuma siorna Jesus Kristusip utertitsissutitut pilliutaata pilersinneratigut Guutip 144.000-t katersulerpai. Qularnanngitsumik katersuineq tamanna maanna naammassineqareerpoq. (apustilit suliait 2:1-4; Galâsiamiut 4:4-7) Jesusip pilliutaa 144.000-t ajortuliaannuinnaanngitsoq ’silarsuarmiuttaarli tamarmik’ ajortuliaannut saammaanneqaatissaavoq. (1 Juánase 2:2) Taamaattumik Jesusimut uppertut tamarmik naassaanngitsumik inuusinnaapput. (Juánase 3:16) Iliverni sinittut Guutip eqqaamasai makikkumaarput, qilammi inuunermut pinnatik, nunarsuarmili minguiarneqarsimasumi inuunermut. (Nalunaajaasup oqaasii 9:5; Juánase 11:11-13, 25; apustilit suliait 24:15) Qanoq ittumik siunissaqarpat?

sarĸúmersitat 21:1-4-mi allassimavoq: ’Guutip ineqarfia inunniippoq . . . qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ Takorlooriaruk — inuit toqumit aniguisinneqassapput, anniaatillu nillianerillu toqup kingunerisai qanganngoreersimassallutik. Jehovap nunarsuarmut inuiannullu aallaqqaammut siunertaa kiisami misinnangaartumik piviusunngussaaq. — 1 Moses 1:27, 28.

Inuunermik toqumilluunniit qinersineq

Adam Evalu qilammi inuunissamik neriorsorneqarsimanngillat. Guutimut naalanneq nunarsuarmilu paratiisiusumi naassaanngitsumik inuuneq imaluunniit taassumunnga naalannginneq toqulu qinersinnaavaat. Ajoraluartumik naalannginneq qinerpaat taamaattumillu ’issunngoqqittariaqarlutik’. (1 Moses 2:16, 17; 3:2-5, 19) Guutip siunertarisimanngilaa inuit nalinginnaasumik toqussasut iliverlu aqqusaarlugu qilaliarnissaat. Guutip inngilerpassuit qilammiittussanngorlugit pinngortissimavai. Anersaat taakku tassaanngillat inuit toqusimasut qilammiittussatut makitinneqarsimasut. — Tussiaat 104:1, 4; Daniel 7:10.

Qanoq iliortariaqarpugut nunarsuarmi paratiisissami naassaanngitsumik inuujumalluta? Siullermik Guutip oqaasia Biibili misissortariaqarparput. Jesus qinulluni oqarpoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ — Juánase 17:3.

Paratiisissami naassaanngitsumik pilluarluta inuussagutta iliuuserisariaqakkatta aapparaat ilisarsineq tamanna naapertorlugu iliuuseqarneq. (Jâko 1:22-24) Guutip oqaasianik maleruaasut siulittuutit pissanganartut, soorlu Jesaja 11:9-mi allassimasut, piviusunngornerat takujumaarpaat: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ (wE 1/10 2000)

[Quppernerup ataani ilanngussaq]

 [Qupp. 7-mi assiliartat]

„Iluartut nuna kingornutissavaat najugaqassallutillu tassani naassaanngitsussamut.“ — Tussiaat 37:29.