Nunarsuaq misilitsiffissaannaraarput?

EQQISSIALLANNASSUSIA! Sapaatip-akunnerini marlunni qasunartumik soraarummeerluni misilitsereerami arnaq ilinniartoq qiimmaallannartumik nalunaarfigineqarpoq angusisimasoq. Maanna inuunermini ingerlaqqissinnaanngorpoq kissaatigiuakkaminillu suliffeqalerluni.

Inuppassuit nunarsuarmi inuuneq taamatut isigisarpaat. Isumaqarput inuuneq kikkut tamarmik piareersaataasumik misilitsiffigisariaqaraat. ’Angusisut’ tamatuma kingorna inuunermut allamut pitsaanerusumut ingerlaqqissapput. Inuuneq maanna atugarput, inunnit amerlasuunit kissaatigisaavallaanngitsoq, tassaagaluarpat ilimagisinnaasatuarput alianarluinnassagaluarpoq. Angut Job Biibilimi eqqaaneqartoq inuunermi annersaani peqqissuullunilu pisoorsuusimavoq. Taamaattoq oqarpoq: „Inuk arnamit erniusoq inuunikittarpoq eqqissinaatsorsiortarlunilu.“ — Job 14:1.

Qinerlerfissiami New Catholic Encyclopedia-mi isuma nalinginnaasoq pillugu allassimavoq: „Qilammi naalannassuseq tassaavoq Guutip inunnut siunertarisaa. . . . Inuit pilluarnissaat qilammi pilluarluni inuunissamut attuumassuteqarpoq.“ Ungasinngitsukkut USA-mi Kristusip Oqaluffia-nit apersuititsineq naapertorlugu apersorneqartut 87 procentii isumaqarput toqugunik qilaliarumaarlutik.

Aamma kristumiuunngitsorpassuit neriuutigaat toqup kingorna pitsaanerusumukarumaarlutik. Assersuutigalugu musliimit qilammi paratiiseqarnera upperaat. Kinami Japanimilu Buddhasiortut ’Nuna Minguitsoq’-mik upperisaqartut upperaat ateq „Amitabha“ (isumaqartoq „Buddha killeqanngitsumik alutornassusilik“) alanngaarunikku Nunami Minguitsumi, imaluunniit Paratiisimi Kitaaniittumi, pilluarlutik ernioqqikkumaarlutik.

Soqutiginartumik Biibilimi, silarsuarmi atuakkat upperisarsiornermut tunngasut nutserneqarnerpaartaanni siammarsimanerpaartaannilu, nunarsuaq qimatassatut, inuunissamut allamut alloriarfissatut, allaatigineqanngilaq. Assersuutigalugu allassimavoq: „Iluartut nuna kingornutissavaat najugaqassallutillu tassani naassaanngitsussamut.“ (Tussiaat 37:29) Biibilimi aamma Jesusip oqaasii makku tusaamasaasut atuarneqarsinnaapput: ’Pilluarput qanilaartut, nuna pigissagamikku.’ — Matîuse 5:5.

Isummap siaruarsimasup tamatuma, nunarsuarmi inuuneq utaqqiisaagallartuunerarpaa, toqusarneq nunarsuarmi inuunerup kingorna inuunermut pilluarfiusumut isertarfiunerarlugu. Tamanna ilumoorpat toqu ajunngitsuuvoq. Amerlanerilli toqu taama isumaqarfigaat, imaluunniit inuuneq sivitsortinniarsaraat? Misilittakkat takutippaat inuit peqqikkallartillutik toqqissisimagallartillutillu toqorusunngitsut.

Nunarsuarmili inuuneq ajussutsimik naalliutinillu ulikkaarmat inuppassuit qilak eqqissisimaarfissatuatut pilluarfissatuatullu isigaat. Qilak tassaava ajussuseqarfiunngitsutuaq aaqqiagiinngiffiunngitsutuarlu? Inuunerup aappaani qilammiinnaq inuusoqarsinnaava? Immaqa Biibilip tamakkununnga akissutaa tupaallaatigissavat. Allaaserisaq tulliuttoq atuariaruk.