Sooq imminut tunulliulluta ikiuukkumatuujussaagut?

Bill 50-it sinnerlugit ukioqarpoq, nuliaqarpoq meeraqarlunilu illuliornermilu ilinniartitsisuulluni. Ukiut tamaasa sapaatit-akunneri arlallit Jehovap Nalunaajaasuisa naalagaaffilersaarfiliorneranni akeqanngitsumik ikiuunnermut atortarpai. Emma 22-nik ukiulik ueqanngilaq ilinniarluarsimasuullunilu. Nammineq angorusutani anguniaannarnagit nuannaarniutinillu pingaartitsinani allat Biibilimik paasinninnissaannut ikiorlugit qaammatit tamaasa nalunaaquttap-akunneri 70-it oqaluussinermut atortarpai. Maurice Bettylu utoqqalinersiuteqartuupput. Eqqissisimaarnissaraluarminnut taarsiullugu nunamut allamut nuupput, tassani inuit Guutip nunamut siunertaanik ilinniarnissaannut ikiorniarlugit.

INUIT taakku imminnut immikkut ittutut isiginngillat. Inuupput nalinginnaasut eqqortutut isigisaminnik iliuuseqartut. Sooq piffissartik, nukitik, piginnaanitik pigisatillu allat iluaqutissaannut atorpaat? Ingerlassutigisaat tassaavoq Guutimut tulliminnullu asanningaarnerat. Asanninnerup taassuma taakku piviusumik imminut tunulliullutik ikiuukkumatuunngortissimavai.

Imminut tunulliulluni ikiuukkumatuujunermik pissuseqarneq qanoq paasisariaqarpa? Imminut tunulliulluni ikiuiumatuujuniarluni inuulluuteqarnaveersaartutut pinngernaveersaartutulluunnit inuunissaq pisariaqanngilaq. Imminut tunulliulluni ikiuukkumatuujuneq isumaqanngilaq nuannaarutinik tamanik nalerisimaarnermillu arsaarneqarneq ingasaassilluni imminut isumakkerneq. Inuk imminut tunulliulluni ikiuukkumatooq tassaavoq „allat ikiorniarlugit ilorrisimaarnerminik pilliuteqartoq“. — Politikens Store Nye Nudansk Ordbog.

Jesus Kristus — maligassaalluarnerpaaq

Guutip ernitua Jesus Kristus, inuit imminut tunulliulluni ikiuiumatunermik pissuseqartut maligassaalluarnersaraat. Jesus inuttut inuunini sioqqullugu piunera isumassarsinartorujussuullunilu nalerisimaarnartorujussuusimassaaq. Ataataminut pinngortitanullu anersaajusunut qanittumik tatiginnittumillu attaveqarsimavoq. Aammattaaq Guutip ernerata piginnaanini sulianut  piumasaqarfiusunut pissanganartunullu ’suliortutut’ atorsimavai. (ússatit 8:30, 31, nutsigaq pisoqaq) Pissutsini inuit pisuunerpaalluunniit misigilluagaasa akimugaanni inuusimavoq. Jehova Guutip saniani qilammi qutsissumik immikkullu piginnaatitaaffiusumik inissisimavoq.

Taamaakkaluartoq ’pissutsini iperarpaa kiffap taattua atillugu inuillu assigilerlugit’. (Filípimiut 2:7) Inuttut inuulernermigut nammineq iluaqutissani iperarusunneruai inuuninilu pilliutigalugu Satanip ajoqusiinera iluarsiumallugu. (1 Moses 3:1-7; Mákorse 10:45) Tamanna isumaqarpoq inuit ajortillit akornanni silarsuarmi Satan Diaavulup pissaaneqarfigisaani inuusariaqartoq. (1 Juánase 5:19) Isumaqarportaaq ajornartorsiutit anigortariaqassallugit timimigullu anniaatit naammagalugit atortariaqassallugit. Qanorluunniilli akeqassagaluarpat Jesus aalajangersimavoq Ataatami piumasaanik iliorniarluni. (Matîuse 26:39; Juánase 5:30; 6:38) Tamatumuuna Jesusip asanninnera ilumuussusialu killinga tikillugu misilinneqarput. Qanoq piumassuseqartigiva? Apustili Paulus oqarpoq ’imminik nikanarsartoq naalaannarluni toqumut allaat, massami [nappakkami naalliutsitaaffimmi, NV] toqumut allaat.“ — Filípimiut 2:8.

’Ima isumaqaritsi’

Jesusip maligassiaa maleqqullugu kajumissaarneqarpugut. Paulus imatut kajumissaarivoq: ’Ima isumaqaritsi soorlu Kristus Jesus.’ (Filípimiut 2:5) Qanoq ililluta taamaaliorsinnaavugut? Soorlu ’imminuinnaq pinnata, kisianni qanilaarluta ilavut annerutillugit’. (Filípimiut 2:4) Asanninnivik ’namminissaminik piniartarinngilaq’. — 1 Korintumiut 13:5.

Inuit isumaginnilluartut allat ikiornissaannut piareersimaniarlutik imminnut puigorajupput. Ullutsinnili amerlasuut imminnuinnaq eqqarsaatigeqqajaanerusarput. Silarsuaq imminuinnaq isumaginiarnermik sunnersimaneqarpoq. Silarsuup anersaava mianersorfigisariaqarparput, inuunermut isiginnittaaserput eqqarsartaaserpullu taakkunannga ilusilersorneqarpat, ilimanarpoq kissaatigisavut allanit tamanit pingaarnerutilissagivut. Taava qanoq iliornivut tamarmik — piffissamik nukinnik pigisanillu atuinerput — namminissarsiorluta soqutigisatsinnik aqunneqalissapput. Taamaattumik sunnerneqarnermut tamatumunnga assoruulluta akiuuttariaqarpugut.

Allaat ajunngitsumik isumaqarluni siunnersuutip ilannikkut imminut tunulliulluni ikiuukkumatuujunermik pissuseqarnerput sakkukillisissinnaavaa. Apustili Peterip paasigamiuk Jesusip imminut tunulliulluni ikiuukkumatussusia tassunga qanoq kinguneqalersoq oqarpoq: ’Naalagaq, taamaalineqarnaveerit.’ (Matîuse 16:22) Erseqqippoq Jesusip Ataatami oqartussaanera qutsisisinniarlugu inuiaallu annaanniarlugit allaat toqujumanerunera akueriuminaatsippaa. Taamaattumik Jesus taamaalioqqunagu inakkaluarpaa.

’Imminik isumakkeerit’

Jesus qanoq qisuariarpa? Pisimasoq oqaluttuarineqarpoq: ’Qiviarluni ajoqersukkani isigilerpai, Peterilu appisaluullugu oqarpoq: Tununnut nigorit, Sataniaa, Guutip pii pinnagit inuit pii isumagigakkit.’ Maannalu Jesusip inuppassuit ajoqersukkani ilagalugit qaaqquai oqarfigalugillu: ’Uannik malinnikkumasoq imminik isumakkiissavoq, [napasorlu anniartitaaffini, NV] ersullugu malissavaanga.’ — Mákorse 8:33, 34.

Peterip Jesusimik siunnersuineranit imminut asattuutequllugu ukiut 30-it missaat qaangiuttut, takutippaa imminut tunulliunneq sunaasoq paasisimallugu. Uppeqatini eqqissillutik ’imminut asattuutequllugit’ inanngilai. Taarsiulluguli Peterip kajumissaarpai sulinissaminnut isummamikkut piareeqqullugit kissaatigisarisimasaminnillu silamiorpaluttunit  ilusilersorneqarunnaaqqullugit. Naak misilinneqaraluarlutik inuunerminni Guutip piumasaanik iliorneq pingaarnerutittussaavaat. — 1 Pîtruse 1:6, 13, 14; 4:1, 2.

Inuunermi nuannaarneruneq misigissavarput Jehovamut tunniukkutta, aalajaalluta Jesus Kristus malikkutsigu qanorlu iliornivut tamaasa Guutimit aqunneqartikkutsigik. Tassuuna Paulus maligassaalluarpoq. Piffissap sivikissusianik ilisimanninnerata Jehovamullu qujamasunnerata killippaa Guutip piumasaanik iliornissaminit allamut saassutigisinnaasani, silamiutut anguniagaqarneq taamaatillugu. Oqarpoq: ’Uangami tunisiumaqalungalu . . . tunniukkumaqaanga’, allat iluaqutissaannut. (2 Korintumiut 12:15) Paulusip piginnaassutsini imminuunngitsoq Guutip soqutigisaasa siuarsarnissaannut atorpai. — apustilit suliait 20:24; Filípimiut 3:8.

Paulusitut isumaqarnerluta qanoq ililluta imminut misissorsinnaavugut? Imminut aperisinnaavugut soorlu: „Sumut piffissara, nukikka, piginnaassutsikka pigisakkalu atortarpakka? Taakkua allallu tunissutit naleqangaartut nammineq soqutigisakka kisiisa siuarsarniarlugit atortarpakka, allanulluunnit iluaqutaatittarpakka? Tusagassaq nuannersoq oqaluussissutigalugu inuunermik annaassiniarluni sulinermi iliuuseqarnerunissara eqqarsaatigisimavara, immaqa piffissaq tamaat oqaluussisartutut? Suliniarnerni soorlu sanaartornerni naalagaaffilersaarfiillu aserfallatsaalineranni peqataanerusinnaavunga? Immikkut ikiortariaqartut ikiornissaannut periarfissat atortarpakka? Pigisakka pitsaanerpaat Jehovamut tunniuppakka? — Ussatit 3:9.

’Tunisineq pilluarnarneruvoq’

Imminut tunulliulluni ikiuukkumatuneq imminut akilersinnaava? Taamaalluinnarpoq. Paulusip nammineq misilittakkamigut nalunngilaa imminut tunulliulluni ikiuukkumatussuseqarnerup pilluaqqussuterpassuit kingunerisarai. Tamatuma nuannaartingaarlugulu ilorrisimaartippaa. Miletimi angutit utoqqassaat Efesusimeersut naapikkamigit imatut nassuiaappai: ’Tamatigut unnersuuppassi, taama sulisariaqarmat sanngiitsullu isumagisariaqarmata, eqqaasariaqarmallu Naalakkap Jesusip oqaasia oqarmat: „Tunisineq tigusinermit pilluarnarneruvoq.“’ (apustilit suliait 20:35) Inuit millionillit misigisimavaat taamatut pissuseqarneq maannangaaq nuannaangaarnermik  kinguneqartartoq. Aammattaaq siunissami Jehovap nammineq allallu soqutigisaannik nammineq soqutigisaminnit pingaarnerutitsisut akilerpagit nuannaarutaassaaq. — 1 Timûtiuse 4:8-10.

Bill aperigaanni sooq naalagaaffilersaarfiliornermi allat ikiorlugit nukini atornerai, akissaaq: „Ilagiit allat amerlanertigut ikittuinnaasut ikiorlugit nalerisimaarnarteqaara. Ilisimasama pisinnaasamalu allat iluaqutissaannut atornerat nuannaarutigaara.“ Sooq Emmap nukimmi piginnaasutsimilu allat Biibilimi sallusuissummik ilinniarnissaannut ikiuinermut atornissaat qinerpaa? „Allamik pitsanerusumik sammisaqarnissaq takorloorsinnaanngivippara. Kissaatigaara inuusutsillunga nukissaqarlungalu Jehova allallu nuannaartinniarlugit sapinngisara tamaat iliuuseqarnissara. Pigisatigut iluaqutissat taamaatitakka naleqanngillat. Jehovap uannut iliuuserisimasai eqqarsaatigalugit iliuuserisariaqakkakka iliuuseriinnarpakka.“

Mauricep Bettyllu peqqissimissutiginngilaat ukiorpassuit sulerulullutik meeqqaminnik perorsaareerlutik ’eqqissisimaarusunnermut’ tunniutiinnarsimannginnamik. Maanna utoqqalinersiuteqalerlutik inuunermik iluaqutaasumut siunertalimmullu atornera ingerlatiinnarusuppaat. „Issiaannarluta qasuersaarusunngilagut,“ oqaluttuarput. „Nunani allani inuit Jehovamik ilisarsinissamut ikiornerisa siunertalimmik iliuuseqarnissatsinnut periarfissippaatigut.“

Imminut tunulliullutit allanik ikiuinissat aalajangiusimaviuk? Ajornaatsuunngilaq. Inuttut naammalluinnanngitsutut erinigisatsinnut, ilumoorlutalu Guutimik nuannaartitserusunnitsinnut akiuuttuarneruvoq. (Rûmamiut 7:21-23) Akiuunnermili ajugaasinnaavugut Jehovamit inuunerput aqunneqartikkutsigu. (Galâsiamiut 5:16,17) Qularnanngivippoq kiffartuullugu imminut tunulliulluta ikiuiniarluta sulinerput eqqaamassagaa, pilluaqqungaassavaatigullu. Jehova Guutip „qilaap suppivii ammassavai pilluaatissiissutinillu killiligaanngitsunik kueraaffigissalluta“. — Malaki 3:10; Eprîarit 6:10. (wE 15/9 2000)

[Qupp. 31-mi assiliartaq]

Jesus imminut tunulliulluni ikiuukkumatuujuvoq. Illimmi?

[Qupp. 32-mi assiliartaq]

Paulusip nukini tamaasa oqaluussinermut atorpai