Anersaaq illernartoq illit ikiortigaajuk?

TEOLOGIT inuillu nalinginnaat Guutip anersaava illernartoq assigiinngitsorpassuarnik isumaqartippaat. Tamatumali tungaatigut nalornisariaqanngilagut. Anersaaq illernartoq suunersoq erseqqissumik Biibilimi nassuiarneqarpoq. Ilaasa isumaqarnerattut kinaassusiliunngilaq, Guutilli piumasaminik naammassinninnermini pissaanersuaraa sulissutiginnittoq. — Tussiaat 104:30; apustilit suliait 2:33; 4:31: 2 Pîtruse 1:21.

Anersaaq illernartoq Guutip siunertaasa naammassineqarnissaannut atassuteqarluinnarmat, anersaamut taassumunnga naapertuuttumik inoorusuttariaqarpugut. Anersaap illernartup nammineerluta ikiortiginissaa kissaatigisariaqarparput.

Sooq ikiorneqartariaqarpugut?

Jesusip nunarsuaq qimangajalerlugu nalunnginnamiuk ajoqersukkani ima neriorsoqqissaarpai: ’Ataataq qinnuigiumaarpara, taassumalu tunissavaasi illersuisumik allamik, naassaanngitsumik ilissinniittuaqqullugu.’ Aamma oqarpoq: ’Ilumoortumilli oqarfigaassi: iluanaassaasi aallassagama, aallanngikkumami illersuisup ornissanngilaasi; aallarumali ilissinnut aallartikkumaarpara.’ — Juánase 14:16, 17; 16:7.

Jesusip ajoqersukkani pingaarutilimmik suliassippai ima peqqugamigit: ’Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit; ajoqersorsigillu ilissinnut peqqusakka tamaasa maleruaqqullugit.’ (Matîuse 28:19, 20, NV) Suliassaq oqitsuunngilaq, malersorneqaraluarluni naammassisassaagami. — Matîuse 10:22, 23.

Avataaniit malersorneqarnerup saniatigut aamma ilagiit iluanni aaqqiagiinngittoqalissaaq. Ukiup 56-ip missaani Paulus Romami kristumiunut allappoq: ’Oqaaqqissaarpassili, qatanngutikka, imaattut sianigeqqullugit: ajoqersuut ilinniagarsi assortorlugu assuariissitsisut mamiatsatsitsisullu; taakku nigorsigik.’ (Rûmamiut 16:17, 18) Pissuseq tamanna apustilit toqunerata kingorna ajornerulissaaq. Paulus mianersoqqusivoq: ’Nalunngilanga kingunikkut amaqqut sualuttut akornassinnut piumaartut savarpannik qajassuussissanngitsut. Ilissilu nammineq akornassinnit angutit makikkumaarput ajoqersukkat imminnut malinnaatikkumallugit mumingasunik oqaluttut.’ — apustilit suliait 20:29, 30.

Akornutaasut tamakku ajugaaffiginiarlugit Guutip ikiuinera pisariaqartippaat, ikiuisorlu Jesus aqqutigalugu pilersippaa. Jesusip makinnerata kingorna, piinsip ulluani ukiumi 33-mi, ajoqersugai 120-t ’tamarmik anersaamik illernartumik ilumioqangaalerput’. — apustilit suliait 1:15; 2:4.

Ajoqersukkat nassuerutigaat anersaaq illernartoq piffissami tamatumani kuineqartoq tassaasoq Jesusip ikiortissatut neriorsuutigisaa. Qularnanngitsumik Jesusip ikiorti imaluunniit illersuisoq pillugu nassuiaataa una paasinerulerpaat: ’Illersuisup anersaap illernartup, Ataatap atikkut aallartitassaata, taassuma tamanik ajoqersussavaasi, eqqaasikkumaarpaasilu ilissinnut oqaaserisannik tamanik.’ (Juánase 14:26). Jesusip ikiorti taanna aamma ’anersaamik sallusuitsumik’ taavaa. — Juánase 15:26.

Anersaaq qanoq ikiuiva?

Anersaaq illernartoq arlalitsigut ikiuisussaavoq. Siullermik Jesusip ajoqersukkani neriorsorpai oqaaserisimasaminik anersaamit eqqaasinneqartarumaartut. Matumuuna oqaasialuinnarnik  eqqaasinneqarnissaat kisiat pinngilaa. Jesusip ajoqersuutaasa isumaannik itinerusunik anersaamit paasitinneqassapput. (Juánase 16:12-14) Naatsumik oqaatigalugu anersaap ajoqersukkat sallusuissummik paasinninnerulersissavai. Apustili Paulus kingusinnersukkut allappoq: ’Guutip anersaamigut uatsinnut saqqummersippaa; anersaammi suut tamaasa killisiortarpai Guutip itissusiinut allaat.’ (1 Korintumiut 2:10) Jesusip ajoqersugaasa tanitat allat eqqorluartumik ilisarsitissagunikkik namminneq paasinninnerat tunngaveqarluartariaqarpoq.

Aappassaanik Jesusip ajoqersukkani qinunermik qinukulanissaannillu ilinniartippai. Ilaannikkut suna qinnutigissanerlugu nalornigaangata anersaap qinnuttarsinnaavai ikiorlugilluunniit. ’Taamattaaq aamma anersaap sanngiissutsitsigut ikioraraatigut, qinnutigisassatsinnimmi iluassasunik nalugatta; kisianni anersaap nammineq anersaamisarnernik taassaanngitsunik illersoraraatigut.’ — Rûmamiut 8:26.

Pingajussaanik Jesusip ajoqersugai tamanut ammasumik sallusuissummik illersuinerminni anersaamit ikiorneqassapput. Jesusip mianersoqquai: ’Killisiuiffinnut pisikkumaarpaasi iperartorlusilu naalagiartarfinni. Naalagarsuarnullu kunnginullu pisikkumaarpaasi uanga pillunga taakkualu inuaqatigiillu nalujunnaarutissaannik. Taamali pisippasi, isumakulussanngilasi qanorluunniit sumilluunniit oqalussasusi, taamaalisukkut oqaasissassinnik tunineqassagassi, ilissi oqaluttuunnginnassi, Ataatassili anersaa ilussinni oqaluttuummat.’ — Matîuse 10:17-20.

Aammattaaq anersaap kristumiut ilagiivi ilisaritissavai ilagiinnilu ilaasortat silatuumik namminneq aalajangeerusussuseqarlersillugit. Ullumikkut uatsinnut qanoq pingaaruteqarnersoq paasiniarlugu taakkununnga tunngasut marluk misissorneroriartigik.

Ilisarnaataassaaq

Guutip toqqakkamisut innuttaasut juutit ukiuni hundredelikkuutaani Mosesip inatsisaasa ataaniipput. Jesus Messiassitut akueriumanngimmassuk siulittuutigaa sivitsunngitsoq namminneq ajattorneqassasut: ’Allakkani imaattut atuanngisaannarpisigik? Ujarak illuliortut sussarinngisaat teqeqqussanngorluni ujaraalerpoq. [Jehovamit] taamaalivoq tupinnaqalunilu issitsinnut. Tamanna pillugu oqarfigaassi: Guutip naalagaaffia ilissinnit peerneqassavoq, inuiannullu allanut tunniunneqassavoq inerititaanik naammatsitsisunut.’ (Matîuse 21:42, 43) Ukiumi 33-mi piinsip ulluani kristumiut ilagiivi pilersinneqarmata, Jesusip ajoqersugai ’inuianngorput Guutip naalagaaffiata inerititaanik naammatsitsisut’. Taamanimiilli ilagiit taakkua Guutip tusarliisorilerpai. Guutip juutit iluariunnaarlugit kristumiut ilagiivi iluarilersimagai tamarmik paasiniassammassuk paatsuugassaanngitsumik ilisarnaasiorpoq.

Piinsip ulluani anersaap illernartup ajoqersukkat oqaatsinik assigiingitsunik ilinniarsimanngisaannik oqalussinnaalersippai. Tusarnaartut tupigusoqaat aperalutillu: ’Qanormi . . . tamatta immikkut oqaatsivut inunngorfitsinni oqaaserineqartut atoraat tusarpavut?’ (apustilit suliait 2:7, 8) Allamiutut oqalussinnaanerup aamma ’tupinnartuliat nalunaaqutillu amerlasuut apustilitigut pisartut’, inuit 3000-t missaat paasinnilersippaat Guutip anersaava sulissutiginnittuusimassasoq. — apustilit suliait 2:41, 43.

’Anersaap inerititaanik’ — asanninnermik, nuannaarnermik, eqqissinermik, kamajuinnermik, inussiarnernermik, ajunngitsuliornermik, uppernermik, saamanermik imminullu naalakkersinnaanermik — inerititaqarnerup Kristusip ajoqersugai Guutip kiffarigai uppernarsarpaa. (Galâsiamiut 5:22, 23) Ingammik asanninneq kristumiut ilumoortut ilagiivisa ilisarnaatigaat. Jesus siulittuivoq: ’Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:34, 35.

Kristumiut siulliit ilagiivinut ilaasortaasut Guutip anersaavata siulersuinera akueraat anersaallu ikiuinerata iluaqutissartaanik atuillutik. Ullumikkut kristumiut nalunngilaat ukiuni hundredelinni siullernitulli maannakkut Guuti toqusunit makititsineq ajortoq tupinnartuliornerluunniit ajortoq, Jesus Kristusilli ajoqersugaasut Guutip anersaavata inerititai ilisarnaataatippaat. — 1 Korintumiut 13:8.

 Silatuumik aalajangiininni ikiorti

Biibili Guutip anersaavanit illernartumit pilersitaavoq. Biibilip oqaasianit uppilersinneqaraangatta anersaamit illernatumit ilinniartinneqarnertut ippoq. (2 Timûtiuse 3:16, 17) Silatuumillu aalajangiinissatsinnut ikiorsinnaavaatigut. Anersaarli uagutsinnut sunniisipparput?

Suliamut tunngatillugu qanoq aalajangersimavugut? Anersaap illernartup suliffittaarisinnaasaq pillugu Jehovap isiginnittaasiatut isiginnittaaseqartissinnaavaatigut. Suliarput Biibilip najoqqutassiaanut naapertuuttariaqarpoq teokratiimullu tunngasumik anguniakkatsinnik anguniagaqarsinnaatilluta. Suliffik ataqqisaalluni nuimasuunersoq akissarissartuunersorlu pingaarnerunngilaq. Inuussutissaqartitsisinnaanersoq kristumiutullu pisussaaffitsinnik eqqortitsinissatsinnut piffissaqartitsinersoq periarfissaqartitsinersorlu pingaarneruvoq.

Inuunermi atugarissaarusunneq nalinginnaavoq paasinarluarlunilu. (Nalunaajaasup oqaasii 2:24; 11:9) Taamaattumik kristumiup oqimaaqatigiissaarilluartup aliikkutassat assigiinngitsut inuummarissinartut nuannaarutigilluarsinnaavai. Anersaalli inerititaanut naapertuuttariaqarput, ’uinngup suliaanut’ naapertuunnatik. Paulus oqarpoq: ’Ersippulli uinngup suliai imaattut: uersaaneq mingunnartuliornerlu kanngunartuliornerlu guutipilussiornerlu ilisiinnerlu qinngarsuinerlu saqitsaannerlu annerussinerlu kamannerlu saqitsaagajunnerlu assuariinnerlu immikkoorniarnerlu sinnganerlu imerajunnerlu nerivallaarnerlu allallu taamaattut.’ Aammattaaq ’piunngitsumik ataqqineqarnissaq piniassanngilarput kamassaaqatigeeqqunata sinngaattaqqunatalu’. — Galâsiamiut 5:16-26.

Ikinngutissarsiornermi aamma taamaappoq. Anersaamut tunngasunik pingaartitsineri tunngavigalugit, isikkui nunalluunniit piisigut pigisaat tunngaviginagit, ikinngutissarsiorneq silatusaarneruvoq. Davidip Guutimut ikinngutaasimanera qularnanngilaq, Guutimmi ’uummammi iluarisaanik’ taasimavaa. (apustilit suliait 13:22) Guutip David isikkua tunngavigalugu Israelimut kunngissatut toqqanngilaa, najoqqutassiarli una tunngavigaa: „Inuit isiminnut saqqumisuinnaat isigisarpaat, [Jehovalli] inuup uummataa isigisarpaa.“ — 1 Samuel 16:7.

Ikinngutigiinnerit tusindilippassuit qalliinnarsiornermik pigissaarnermilluunniit tunngaveqaramik aserorsimapput. Ikinngutigiinnerit pisuussutinik nalorninartunik tunngaveqartut aseroriataarsinnaapput. (Ussatit 14:20) Guutip oqaasiata isumassarsiarititaasup Jehovamut kiffartornitsinni tapersersortigisinnaasatsinnik ikinngutissarsioqquaatigut. Oqaasiani oqaluttuunneqarpugut tunisinneq pinnagu, tunisineq nuannaarnarnerusoq ulapputigissagipput. (apustilit suliait 20:35) Ikinngutitsinnut tunniussinnaasatsinnit piffissarput tunniusimanerpullu pingaarnerpaajupput.

Kristumiu aappassarsiortoq Biibilimi isumassarsiarititaasumi unnersuunneqarsinnaavoq. Apeqqut tamanna pillugu Biibilimi ima allassimavorlusooq: ’Kiinaa inuusialu kisiisa isiginagit. Aamma isigai isigikkit.’ Isigai? Aap, ima paasillugu: Jehovap nutaarsiassamik nuannersumik oqaluusseqqusineranut atorneqarpat, taamaalilllutik Jehovap isaani ’tusarningaarlutik’? Sallusuissutip tusarliussaanik eqqissinerullu nutaarsiassaanik nuannersumik kamissimappat? Ima allassimavoq: „Ila tusarningaarami nuannersumik oqariartuuteqartup qaqqani pisuppalua, taassuma eqqissinermik tusarliisup, tusagassanik nuannersunik aatsisup, annaanneqarnermik tusarliisup Sionimullu oqartup: ’Guutit kunngiuvoq!’“ — Jesaja 52:7; Evfisumiut 6:15.

’Ulluni ajornartunik nalliuttoqarfiusuni’ inuugatta, Guutip piumasaanik iliussagutta ikiorneqartariaqarpugut. (2 Timûtiuse 3:1) Ukiuni hundredelinni siullerni ikiuisup, Guutip anersaavata illernartup kristumiut sulineranni sunniuteqangaartumik tapersersorpai, aammattaaq inuttut ikiorpai. Peqqissaartumik Biibilimik atuaqqissaarneq, Guutip anersaavata illernartup pilersitaa, anersaamik illernartumik uagutsinnut iluaqutiginnilluartitsisinnaasut pitsaanerit ilagaat. Taanna ikiortigaajuk? (wE 15/10 2000)

 [Qupperneq tamakkerlugu asseq]