Guuti takussaanngitsoq qanillisinnaavarput?
Guuti takussaanngitsoq qanillisinnaavarput?
’Qanoq ilillunga takusinnaanngisara palliguffigisinnaavara?’ immaqa aperissaatit. Taama aperineq pissusissamisoorunarpoq. Unali eqqarsaatigiuk:
AALLANUT asannittumik ataavartumillu attaveqarniarnerup ineriartortinnissaanut isigisinnaassuseq qanoq pingaaruteqartigaa? Pingaarutillit takuneqarsinnaanngitsut pingaaruteqarluarsinnaapput, allaammi pingaarnerusinnaallutik. Assersuutigalugu ilaat akuttoqatigiimmik allaffigeqatigiittarnermikkut, allakkaminni suut nuannaralugit suullu nuannarinagit, inuunermi anguniakkatik, pingaartitatik, quiagisatik, allallu kinaassutsiminnut ilisarnaataasut soqutigisatillu oqaluttuaralugit allat qanittumik attavigilersimavaat.
Tappiitsuttaaq takusinnaanngikkaluarlugit allanut ajunngitsumik attaveqalersinnaanermut assersuutissaalluarput. Soorlu aappariit tappiitsut Edward Gwenilu. * Edwardip Gwen inersimasunut tappiitsunut atuarfimmi naapippaa. Gwenip pissusai nuannarai, pingaartumik ilumoortumik oqaluttarnera ileqqoqarneralu, sulinermullu ajunngitsumik isumaqarfiginninnera. Gwenip Edward nuannaraa, soorlu nammineq oqartoq, „perorsarneqarninni pissutsit pingaartutut isigeqquneqartut tamaasa pissuserimmagit.“ Pissiariilerput ukiullu pingasut qaangiummata katillutik.
Edward oqaluttuarpoq: „Inummut allamut qanittumik attaveqarnissap ineriartortinnissaanut tappiitsuuneq pingaaruteqarpallaanngilaq. Immitsinnut isigisinnaanngikkaluarpugut misigissutsilli tappiitsuunngillat.“ Maanna ukiut 57-it qaangiunneranni Edward Gwenilu suli nuannariittorujussuupput. Oqarput aappariinnermi ingerlalluarneranut pissutaasut minnerpaamik sisamaasut: (1) Aapparisap pissusiisa ajunngitsut arajutsinnginnissaat, (2) pissusiilu taakku iluaralugillu eqqarsaatiguarnissaat, (3) oqaloqatigiilluartarnerup attatiinnarnissaa, aamma (4) sammisaqaqatigiittuartarnissaq.
Immikkoortut taakku sisamat ataqatigiilluarnernut tamanut pingaaruteqarput — ikinngutigiit akornanni, aappariit akornanni imaluunniit suli pingaarnerusoq, inuit Guutillu akornanni ataqatigiinnerugaluarpat. Ilanngutassiami tulliuttumi takussavarput, naak takusinnaanngikkaluarlugu Guutimut qanittumik attaveqarnerup ineriartortinnissaanut qanoq ikiorsinnaaneraatigut. *
[Quppernerup ataani ilanngussat]
^ imm. 4 Atit allanngortitaapput.
^ imm. 6 Inuit akornanni ikinngutigiinnerup akerlianik piuneranik upperisaqarneq Guutimik ikinnguteqarnerup tungavigaa. (Eprîarit 11:6) Guutimut upperluarnerup qanoq ineriartortinneqarsinnaanera atuakkami Jehovap Nalunaajaasuinit saqqummersinneqartumi Findes der en Skaber som interesserer sig for os? itinerusumik sammineqarpoq.