Guutip ileqqussatigut minguitsuuneq pillugu isiginnittaasia

„Uanga tassa [Jehova], Guutit, iluaqutaasunik ilinnik ajoqersuisoq, ingerlavigisassakkut ingerlatitsisoq.“ — JESAJA 48:17.

1, 2. (a) Kinguaassiuutitigut ileqqussanut najoqqutassiat amerlasuunit qanoq isigineqartarpat? (b) Kristumiut kinguaassiuutitigut ileqqussanut najoqqutassiat qanoq isigaat?

ULLUMIKKUT nunani amerlasuuni ileqqussat inuup nammineq aalajangigassaatut isigineqartarput. Amerlasuut isumaqarput atoqatigiinneq asanninnermut ersiutaasoq qanoq ilisukkulluunniit piumallerlunilu nuannaarutigineqarsinnaasoq, aappariinnermut attuumassuteqanngitsoq. Amerlanerusut isumaat nalinginnaasoq tassaavoq allanut ajoqusiinngippat piumasamik iliortoqarsinnaasoq. Inuppassuit isumaqarput ileqqussanut atatillugu, ingammillu atoqatigiinneq eqqarsaatigalugu, allat eqqartuunneqartariaqanngitsut.

² Jehovamilli ilisarsilersimasut allamik isiginnittaaseqarput. Nuannaarlutik Biibilip najoqqutassiai maleruartarpaat, Jehova asagamikku piumasaatullu iliorumagamik. Jehovap asagaatik, ajoqersuutaalu iluaqutigalugit pillualersitsisartullu nalunngilaat. (Jesaja 48:17) Guuti inuunerup pilerfigimmagu, soorunami taanna saaffigisariaqarparput timip atornissaa pillugu ajoqersorneqarumalluta, pingaartumik kinguaassiuutit eqqarsaatigalugit, taakku kinguaassiornermut pingaaruteqarmata.

 Pinngortitsisup asannittup tunissutaa

3. Kristumiuuneraqatigiit iluanni amerlasuut atoqatigiinneq pillugu sumik ajoqersorneqarpat, tamannalu Biibilimi allassimasumut naapertuuppa?

³ Ullumikkut isiginnittaatsimut nalinginnaasumut akerliusumik kristumiuuneraqatigiit iluanni amerlasuut ajoqersuutigisimavaat atoqatigiinneq ajortuliornerusoq kanngusuutigisariaqartorlu, Edenillu naatsiiviani ’ajortisiaq’ tassaasoq Evap Adamimik atoqatiginninnera. Isumali taanna allakkanut isumassarsiarititaasunut naapertuutinngilaq. Biibilimi inuit siulliit marluk tassaanerarneqarput ’Adam nulialu’. (Môrsasip agdlagai sujugdlît 2:25) Guutip kinguaassioqquai oqarluni: „Kinguaassiorlusi amerliartoritsi nuna tamakkerlugu.“ (1 Moses 1:28) Siunertaqassanngikkaluarpoq Guutip Adam Evalu kinguaassioqqummagit kingornalu peqqusamisut iliormata pillarpagit. — Tussiaat 19:9.

4. Atoqatigiinneq sunik siunertaqarpa?

⁴ Guutip siuaasatsinnut siullernut peqqussutaata, Noamut ernerinullu uteqqinneqarnerata, takutippaa atoqatigiinnerup kinguaassiorneq siunertarigaa. (1 Moses 9:2) Biibilimili takuneqarsinnaavoq tamannaannaq Guutip kiffaasa katissimasut siunertaralugu atoqatigiinnertik pisussaaffiginngikkaat. Atoqatigiinnikkut aappariit misigissutsikkut timikkullu pisariaqartitatik matussutississinnaavaat nuannaarutigingaarlugulu. Taamaalillutik imminnut tunniusimaffigilluinnarnertik ersersissinnaavaat. — 1 Moses 26:8, 9; Ussatit 5:18, 19; 1 Korintumiut 7:3-5.

Guutimit killiliissutit

5. Atoqatigiinneq eqqarsaatigalugu Guutip inuit qanoq ilioqqunngilai?

⁵ Atoqateqarsinnaaneq Guutimit tunissutaavoq, isumaqanngilarli killeqanngitsoq. Allaat aappariit iluanni taamaappoq. (Evfisumiut 5:28-30; 1 Pîtruse 3:1, 7) Aapparinngisamik atoqateqarneq inerteqqutaavoq. Tamanna Biibilimi erseqqissarneqarpoq. Guutip innuttaminut inatsisaani allassimavoq: „Allasiussanngilatit.“ (2 Moses 20:14) Kingusinnerusukkut Jesusip ’arnaaneqarneq’, ’uersaaneq’ ’kanngunartuliornerlu’ eqqaavai isumapiluttut inuup uummataanit pisutut inummullu mingutsitsissutut. (Mákorse 7:21, 22) Apustili Paulusip isumassarsisitaalluni kristumiut Korinthimiittut ima oqaaqqissaarpai: „Kanngunartuliornaveeritsi.“ (1 Korintumiut 6:18, NV) Hebriiarinullu allakkamini allappoq: ’Nuliariinneq tamani kanngunaakkili nuliariillu innarfiat minguikkili; uersaasulli arnaanillillu Guutip eqqartuukkumaarpai.’ — Eprîarit 13:4.

6. Biibilimi oqaaseq ’kanngunartuliorneq’ atorneqaraangat suut pineqarpat?

⁶ Oqaaseq ’kanngunartuliorneq’ qanoq paasisariaqarpa? Biibilimi griikerit oqaasiannit porneiʹa-mit nutsigaavoq, tamatumanilu ilaannikkut inuit marluk katissimanngitsut atoqatigiinnerat pineqartarpoq. (1 Korintumiut 6:9) Allassimaffinni allani, soorlu Matîuse 5:32-mi aamma Matîuse 19:9-mi oqaaseq allamittaaq isumaqarsinnaavoq, soorlu allasiorneq, qanigivallaakkanik uumasunillu atoqateqarneq. Oqaatsip porneiʹa-p aamma aapparinngisamut kinguaassiuutitigut iliuutsit allat pisinnaavai. Assersuutigalugu qaneq imaluunniit erluk atorlugu, aamma allat kinguaassiuutaasa sattaarnerat. Iliuutsit taakku tamarmik Guutip oqaasiani — toqqaannartumik toqqaannangitsumilluunniit — avoqqaarineqarput. — 3 Moses 20:10, 13, 15, 16; Rûmamiut 1:24, 26, 27, 32. *

Guutip ileqqussanut najoqqutassiai iluaqutigikkit

7. Ileqqussatigut minguittuarutta qanoq iluaqutigissavarput?

⁷ Inunnut naammalluinnanngitsunut Jehovap kinguaassiuutit pillugit peqqussutaasa maleruarnissaat unamminiarnartuusinnaavoq. Juuteq isumaliutersortartoq tusaamasaq Maimonides ukiuni 1100-kkunni inuusoq allappoq: „Torami [Mosesip  inatsisaani] inerteqqutinit tamanit maleruaruminaannerpaassimapput kinguaassiuutitigut attaveqatigiinnerit inerteqqutaasut.“ Guutilli ajoqersuutaa maleruarutsigu iluaqutigingaassavarput. (Jesaja 48:18) Tamakku eqqarsaatigalugit naalakkutta assersuutigalugu nappaatipilunnut, ilaatigut katsorsarneqarsinnaanngitsunut toqussutaasinnaasunullu, illersorneqarsinnaavugut. * Katissimanani naartulernissamut illersorneqassaagut. Tamatuma saniatigut Guutip ilisimassusia naapertorlugu inuugaanni ilerasuuteqartariaqanngilaq. Imminut ataqqinerulernarpoq, allanillu, soorlu eqqarlinnit, aapparisamit, meeqqanit, kristumiutullu qatanngutinit, ataqqineqarnarnerulluni. Aamma kinguaassiuutinut tunngasunut peqqinnartumik ajunngitsumillu isiginnittaaseqarpugut, tamannalu pilluarlutik aappariinnerannut ilasaataasarpoq. Arnaq kristumiu allappoq: „Sallusuissut Guutip oqaasianeersoq tassaavoq illersuutissaq pitsaanerpaaq. Katinnissara ilimagaara, katikkumalu tulluusimaarutigissavara angut kristumiu uissara oqaluttuussinnaagakku minguittuarsimallunga.“

8. Minguitsumik ileqqoqarnitta pallorfignninneq ilumoortoq qanoq siuarsarsinnaavaa?

⁸ Minguitsumik ileqqoqartuarutta pallorfiginninnermut ilumoortumut atatillugu paatsuuinernik pinngitsoortitseqataasinnaavugut inunnillu Guutimut pallorfigisatsinnut siulersueqataasinnaalluta. Apustili Peter allappoq: ’Iluartumik saqigitsi Guutimik nalusuni, taakku pinerluttuunerarlusi oqaatissuaatigigaluatik pillugit ajunngitsuliasi takullugit ullussami takusarneqarfissami Guutimik unnersiutiginneqqullugit.’ (1 Pîtruse 2:12) Naak Jehovamut kiffaanngitsut minguitsumik ileqqoqarnerput maluginngikkaluaraat iluarinngikkaluaraalluunniit qularissanngilarput Ataatatta qilammiusup takugaa iluarissagaalu, aap, ajoqersuutiminik maleruaanitsinni ilungersornivut nuannaarutigigai. — Ussatit 27:11; Eprîarit 4:13.

9. Sooq Guutip ajoqersuutaa tatigilluinnartariaqarparput immaqa naak suna tunngavigineraa paasilluanngikkaluarlugu? Assersuummik taasaqarit.

⁹ Guutimut uppertut tatigaat taassuma nalunngikkaa suna imminnut iluaqutaanerpaasoq, aamma immaqa naak paasilluanngikkaluarlugu sooq aalajangersimasumik siulersorneraatik. Mosesip inatsisaani assersuut eqqarsaatigeriaruk. Sakkutuut tammaarsimaffii pillugit peqqussut naapertorlugu inuit annatik  tammaarsimaffiup avataani assaallugit matoortartussavaat. (5 Moses 23:13, 14) Israelikkut immaqa paasinngilaat suna peqqussummut siunertaasoq, ilaasalu immaqa pisariaqanngitsutut isigaat. Kingusinnerusukkulli ilisimatuut paasilerpaat inatsit taanna pissutigalugu imeq mingutsinneqarsimanngitsoq, nappaatinullu amerlasuunut sullerngit tunillaassuutsissinnaasaannut illersuutaasoq. Tamatumunnga assingusumik anersaamut, innuttaaqatigiissutsimut, misigissutsinut, timimut eqqarsartaatsimullu tunngasunik Guuti pissutissaqarluarluni taamaallaat aappariit atoqatigiissinnaanerannik aalajangiisimavoq. Maanna misissoriartigik Biibilimi innuttaasut ileqqussatigut minguittuarnermikkut maligassaalluartut ilaat.

Josef ileqqorikkami pilluaqquneqarpoq

10. Kia Josef kanngunartuliorfiginiarsaraa, Josefilu qanoq akiva?

¹⁰ Qularnanngitsumik Josef, Jakobip ernera, pillugu oqaluttuaq Biibilimeersoq eqqaamavat. 17-inik ukioqarami Potifarimut, Egyptenimi Faraop paarsisaasa naalagaannut, kiffanngorpoq. Jehovap Josef pilluaqquaa, piffissallu ingerlanerani Potifarip illuanut tamarmut nakkutilliisunngorpoq. Josef 20-t sinnerlugit ukioqarami „takuminartuuvoq inugissuullunilu“. Potifarip nuliata malugaa kanngunartuliorfiginiarsaralugulu. Josefip aalajangiusimasani erseqqissarpaa, paasitippaalu siunnersuutaa malikkaluaruniuk naalakkani killuutigissallugu, aammalu ’Guutimut ajortuliussalluni’. Josef sooq taama isummerpa? — 1 Moses 39:1-19.

11, 12. Guuti suli innuttaminut kanngunartuliorneq allasiornerlu pillugit allassimasunik inatsisiliorsimanngimmat, sooq Josef isummernermisut isummersinnaava?

¹¹ Inunnit qulaarneqarnissamut annilaanganeq Josefip qisuariarnerata pissutiginngilaa. Josefip ilaqutai ungasissumi najugaqarput, ataataatalu toqusoraa. Josef kanngunartulioraluarpat ilaqutaasa tusarnavianngilaat. Qularnanngitsumik ajortuliaq aamma Potifarimut kiffaanullu allanut isertorneqarsinnaagaluarpoq, tamatigut isersimasoqartanngimmat. (1 Moses 39:11) Josefilli nalunngilaa ajortuliaq Guutimut isertorneqarsinnaanngitsoq.

¹² Josef Jehova pillugu ilisimasani naapertorlugit tunngavilersuisimagunarpoq. Qularnanngitsumik nalunngilaa Jehova Edenip naatsiiviani qanoq oqartoq: „Tamanna pillugu angutip ataatani anaananilu qimallugit nuliani attavigissavaa, uiningussappullu ataaseq.“ (1 Moses 2:24) Aamma Jehovap filisterit kunngiannut Josefip aanaqqiutaanik Saramik kanngunartuliorfiginninniartumut oqaaserisai nalugunanngilai. Jehovap kunngi taanna oqarfigaa: „Toqussaatit arnaq taanna tigusat pillugu, angutip allap nuliarimmagu. . . . Uangamiuna aamma illit uannut ajortuliutsaaligikkit; taamaattumik ilinnut attortinnaveersaarpara.“ (1 Moses 20:3, 6) Jehova suli allassimasunik inatsisiliorsimanngikkaluartoq, taamaattoq paasinarpoq aappariinneq qanoq isigigaa. Josefip ileqqussanik paasinnissimanerata Jehovamillu nuannaartitsiumanerata  kanngunartuliornissamik eqqarsaammik itigartitsitippaat.

13. Josefip Potifarip nulia qanillinngitsoorsinnaanngikkaa sooq qularutissaanngila?

¹³ Potifarilli nulia ilungersorpoq. „Ullut tamaasa“ kimigiiserfigalugu inaateqqusarpoq. Sooq Josefip qanillinngitsoorsinnanngilaa? Kiffaagami pisussaaffini naammassisariaqarpai, atukkanilu allanngortissinnaanagit. Itsarnisarsiortut nassaarisimasaasa takutikkunarpaat Egyptenimiut illui ima sananeqartartut illup pingaarnersaatigooqqaarlutik pequusivinnukarsinnaatillugit. Taamaattumik Josefip Potifarip nulia qanillinngitsoorsinnaanngilaa. — 1 Moses 39:10.

14. (a) Josef Potifarip nulianit qimaammat qanoq pisoqarpa? (b) Josefip aalajaannera pillugu Jehovap qanoq pilluaqquaa?

¹⁴ Taava ullut ilaanni illumi kisimiipput. Potifarip nuliata Josef tiguaa oqarfigalugulu: „Innaanniannga!“ Josef qimaavoq. Itigartinneqarnini kamaatigalugu Potifarip nuliata pinngitsaaliilluni arneriffiginneriaraluartutut unnerluutigaa. Sumik kinguneqarpa? Jehovap ingerlaannaq Josefip assuarnaassusia akilerpaa? Naamik. Josef parnaarunneqarpoq isigaalu kalunnernik aalajangerneqarput. (1 Moses 39:12-20; Tussiaat 105:18) Jehovap takuaa naapertuilluanngitsumik iliorfigineqartoq, kingusinnerusukkullu parnaarussivimmit kunngip illussaarsuanut qaffatsillugu. Egyptenimi pissaaneqarnerpaamut tulliuvoq nuliani qitornanillu pilluaqquneqaatigalugit. (1 Moses 41:14, 15, 39-45, 50-52) Aammattaaq Josefip assuarnaassuianik oqaluttuaq ukiut 3500-t matuma siorna allanneqarpoq taamanerniilli Guutip kiffaanit atuarneqarsinnaalluni. Josef pilluaqquneqangaarpoq Guutip inatsisai naapertuilluartut maleruaramigit! Ullumikkut uaguttaaq immaqa paaserpianngikkaluarparput ileqqussatigut assuarnaattuarnitta iluaqutaanera, qularissanngilarpulli Jehovap takugaa piffissanngorpat pilluaqqussavaatigut. — 2 Israelikkut 16:9.

Jobip ’isiminik isumaqatigiissuteqarnera’

15. Jobip isiminik isumaqatigiissuteqarsimanera’ qanoq isumaqarpa?

¹⁵ Assuarnaattuartoq alla tassa Job. Diaavulumit annikilliortinneqarnermini inuunini kingumut eqqarsaatigaa oqarlunilu sualuttumik pillarneqarnissani naammagalugu atorumallugu, assersuutigalugu Jehovap kinguaassiuutinut tunngasunut najoqqutassiai unioqqutissimagaluarunigit. Job oqarpoq: „Isikka isumaqatigiissuteqarfigisimavakka niviarsiaq pileritsaallugu isigiumanagu.“ (Job 31:1) Job isumaqarpoq Guutimut assuarnaattuarnini aalajangiussimalluinnarlugu aalajangersimalluni arnaq pileritsaallugu isigiumanagu. Soorunami ulluinnarni arnat takusarpai, qularnanngitsumillu pisariaqaraangat ikiortarlugit. Arnalli allat asannippalaartumik soqutiginianngilai qaninniarniarnagilluunniit. Annikilliortinneqanngikkallarami pisorsuusimavoq, ’angutini kangiamiuni pissaaneqarnerpaalluni’. (Job 1:3) Pisuussutinili arnarpassuarnit maluginiarneqarnissaminut atorsimanngilai. Paasinarpoq arnanut inuusuttunut naleqqutinngitsumik atoqateqarusulluni eqqarsaatersortarsimanngitsoq.

16. (a) Job qanoq krisutmiunut katissimasunut maligassaalluarpa? (b) Malakiasip nalaani uiusut Jobimit allaanerulluinnartumik qanoq iliuuseqartarpat, ullumikkullu aamma taamaattoqarpa?

¹⁶ Job piffissani ajunngitsuni ajortunilu ileqqussatigut assuarnaattuarsimavoq. Jehovap tamanna malugaa Jobilu pilluaqqungaarlugu.  (Job 1:10; 42:12) Job kristumiunut katissimasunut, angutinut arnanullu, maligassaalluarpoq. Tupinnanngilaq Jehovap asangaarmagu. Ullumikkulli amerlasuut pruffiitip Malakiasip nalaani inuusimasut ilaattut iliortarput. Malakiasip angutit amerlasuut isornartorsiorpai nuliatik qimassimammatigik, ingammik arnanut inuusuttuunerusunut katinniarlutik. Jehovap pilliiviutaa nuliaasut qimagaasut qulliinik matoorneqarporlusooq, aapparminnullu ’ilumuunngitsuliortut’ pillagassaanerarpai. — Malaki 2:13-16.

Niviarsiaq ileqqorissoq

17. Niviarsiaq Sjunemimiu qanoq „naatsiivittut matoqqasutut“ ittuua?

¹⁷ Assuarnaatsut pingajuat tassaavoq niviarsiaq Sjunemimiu. Inuusuttuullunilu pinnersuugami savanik paarsisumit soqutigineqaannarnani, aammali Israelimi kunngimit Salomonimit pisoorsuarmit malugineqalerpoq. Pisimasut oqaluttuarineqarput Taalliat Asanninnilersaarutit-ni Salomonip allassimasaani, niviarsiarlu tamatigut ileqqorittuarpoq tamannalu allanit ataqqineqaatigaa. Salomonip niviarsiaq itigartitsitsilluinnaraluartoq isumassarsisitaalluni taanna pillugu oqaluttuaq allappaa. Savanik paarsisup niviarsissap asasaata aamma ileqqorinnera ataqqivaa. Ilaanni eqqaavaa niviarsiaq „naatsiivittut matoqqasutut“ ittoq. (Taalliat asanninnilersaarutit 4:12) Israelitoqqami naatsiivinni kusanartuni naasorpassuaqarpoq, naasut tipigissut orpiillu takuminartut. Amerlanertigut naatsiiviit orpikkanik ungaluliaasunik qarmanilluunniit avatangerneqartarput, taamaallaallu matukkut parnaarneqarsinnaasukkut iserfigineqarsinnaallutik. (Jesaja 5:5) Savanik paarsisumut niviarsissap pinnissusia ileqqussatigullu minguissusia naatsiivittut kusanartutut ipput. Ileqqorilluartuuvoq. Tunniusimanini taamaallaat uissaminut ersersittarpaa.

18. Josef, Job niviarsiarlu Sjunemimiu pillugit oqaluttuat sumik eqqaasippaatigut?

¹⁸ Ileqqussatigut assuarnaassutsimigut niviarsiaq Sjunemimiu arnanut kristumiunut ullumikkut inuusunut maligassaalluarpoq. Jehovap ileqqorissusia malugaa nuannaarutigalugulu, pilluaqqullugulu Josefimik Jobimillu pilluaqqusisimanermisut. Ullumikkut ilinniutigisinnaasatsitut assuarnaassusiat Guutip oqaasiani oqaluttuarineqarpoq. Assuarnaattuarniarluta ilungersornivut Biibilimi allanneqartussaanngillat, Jehovali ’atuagaateqarpoq’ piumasaminik iliorusuttut eqqaaneqaatissaannik. Puigunngisaannassavarput Jehova ’naalaartoq’ nuannaarutigigaalu ilungersorluta ileqqussatigut minguitsuujuarniaraangatta. — Malaki 3:16.

19. (a) Ileqqussatigut minguitsuuneq qanoq isigisariaqarparput? (b) Allaaserisami tulliuttumi suna sammissavarput?

¹⁹ Immaqa uppinngitsut mitallissavaatigut, Pinngortitsiserpulli asannittoq naalakkatsigu nuannaarutigaarput. Taakkunannga ileqqussatigut qutsinnerusunik najoqqutassaqarpugut, najoqqutassianik Guutimeersunik. Taakku tulluusimaarutigisinnaavavut, pingaartingaartariaqarlugillu. Ileqqussatigut minguittuarutta Guutip pilluaqqusinera nuannaarutigisinnaavarput siunissamilu pilluaqqussuterpassuit misigiumaarlugit. Qanorli ililluta ileqqussatigut minguitsuujuarsinnaavugut? Apeqqut pingaaruteqaqisoq tamanna allaaserisami tulliuttumi sammineqassaaq. (wE 1/11 2000)

[Quppernerup ataani ilanngussat]

Makku nassuiarsinnaavigit?

• Atoqatigiinneq pillugu Biibili qanoq ajoqersuuteqarpa?

• Oqaaseq ’kanngunartuliorneq’ Biibilimi atorneqaraangat qanoq paasisariaqarpa?

• Ileqqussatigut minguitsuujuarneq qanoq iluaqutigissavarput?

• Sooq Josef, Job niviarsiarlu Sjunemimiu kristumiunut ullumikkut inuusunut maligassaalluarpat?

[Atuaqqissaarnermi apeqqutit]

[Qupp. 18-mi assiliartaq]

Josef kanngunartuliornermit qimaavoq

[Qupp. 19-mi assiliartaq]

Niviarsiaq Sjunemimiu „naatsiivittut matoqqasutut“ ippoq

[Qupp. 20-mi assiliartaq]

Jobip ’isini isumaqatigiissuteqarfigai’