Ileqqussatigut minguitsuujuarsinnaavutit

’Guutimik asanninneq tassaavoq inassutai maleruarutsigik, inassutaalu artornanngillat.’ — 1 JUÁNASE 5:3.

1. Ullumikkut ileqquusut eqqarsaatigalugit sumik assigiinngissuteqarpat?

QANGARSUARLI pruffiiti Malakias isumassarsisitaalluni siulittuivoq Guutip innuttaasa ileqqui Guutimut kiffaanngitsut iliuuserisartagaannut akerliulluinnarumaartut. Pruffiiti ima allappoq: „Taava kingumut malugiumaarparsi iluartut guutiitsullu pineqarneri qanoq assigiinngitsigisut.“ (Malaki 3:18) Siulittuut taanna ullumikkut eqquuppoq. Silatusaarneruvoq eqqortuliornerullunilu Guutip inatsisai, aamma ileqqussatigut minguitsuujuaqqussutai, maleruaraanni. Ajornaatsuujuaannanngilarli. Pissutissaqarluarluni Jesus oqarpoq kristumiut annanneqarnissartik ilungersuutigisariaqaraat. — Lúkarse 13:23, 24.

2. Ileqqussatigut minguitsuujuarneq tatisinerup qanoq ittup ilaannut erloqinarsisittarpaa?

² Sooq ileqqussatigut minguitsuuniarneq ajornakusoorpa? Ilaatigut silarsuup inuuffigisatta tatisinera pissutigalugu. Aliikkutassiornermik inuussutissarsiutillit kinguaassiuutitigut eqqunngitsumik atoqatigiinneq asanninnermut tunngasutut, nuannersutut inersimasuunermullu ersiutaasutut allaatigisarpaat, kingunipiluilu amerlanertigut sumiginnarneqartarput. (Evfisumiut 4:17-19) Atoqatigiittinneqartut amerlanersaat tassaanngillat aappariit. Filmini tv-milu atoqatigiinneq nalaatsornertut akisussaaffittaqanngitsullu allaatigineqartarpoq. Amerlanertigut asanninnermut ataqqeqatigiinnermullu takussutissaqartanngilaq. Amerlasuut meeraanerminiilli tamakkunannga sunnerneqartarsimapput. Tamatuma saniatigut inuppassuit ilagisartakkaminnit ullumikkut ileqqussatigut najoqqutassiat kiffaanngissuseqarpalaartut malinnissaannut tatineqartarput, taamaaliorumanngitsullu ilaannikkut mitaatigineqarlutillu illaruaatigineqartarput. — 1 Pîtruse 4:4.

3. Silarsuarmi amerlasuut kanngunartuliortarnerannut pissutaasut ilaannik taasaqarit..

³ Aamma qamannga pisumik perusussuseq pissutigalugu ileqqussatigut minguitsuujuarniarneq erloqinarsinnaavoq. Jehovap inuit kinguaassiuutitigut perusussuseqartillugit pinngortippai, pilerissuserlu tamanna sakkortusinnaavoq. Illigunneq eqqarsaatinit aallaaveqarpoq, kanngunartuliornerlu eqqarsariaatsimut Jehovap eqqarsaataanut naapertuutinngitsumut attuumassuteqartarpoq. (Jâko 1:14, 15) Misissuineq ungasinngitsukkut British Medical Journal-imi saqqummiunneqartoq naapertorlugu aalapernaanneq inuppassuit atoqateqaqqaarnerannut pissutaavoq — paaserusuinnarpaat atoqatigiinneq sunaasoq. Allat isumaqarput ilutitik atoqateqartartut, taamaattumillu namminneq atoqateqartalerusupput. Allattaaq oqarput misigissuseqarnatik imaluunniit taama pisoqarmat ’putumalaarsimallutik’. Guutili nuannaartikkusukkutsigu allatut eqqarsartariaqarpugut. Eqqarsariaaseq qanoq ittoq iluaqutigalugu ileqqussatigut minguitsuujuarsinnaavugut?

Qulanngilluinnarneq ineriartortiguk

4. Ileqqussatigut minguitsuujuassagaanni suna pisariaqarpa?

⁴ Ileqqussatigut minguitsuujuassagutta paasisariaqarparput taamatut inooriaaseq iluaqutaangaartoq. Tamanna apustili Paulusip Romami kristumiunut oqaasiinut naapertuulluinnarpoq: ’Sianigileqqullusiuk sunaasoq Guutip peqqusaa  ajunngitsoq iluarisassarlu naammalluinnartorlu.’ (Rûmamiut 12:2) Paasissagutsigu ileqqussatigut minguitsuujuarneq iluaqutaasoq kanngunartuliornerup Guutip oqaasiani assuarineqarneranik ilisimasaqarneq naammanngilaq. Aamma sooq kanngunartuliorneq assuarineqartoq pinngitsoortinnissaalu qanoq iluaqutigissagipput paasisariaqarparput. Tamatumunnga pissutaasut ilaat allaaserisami siuliani eqqaaneqarput.

5. Suna pingaarnerpaatillugu kristumiut ileqqussatigut minguitsuujuarusuttariaqarpat?

⁵ Kristumiut kanngunartuliornermik ingalassimanninnissaannut pissutaasoq pingaarnerpaaq tassa Guutimut attaveqarneq. Ilinniarsimavarput taassuma nalunngikkaa suna uatsinnut iluaqutaanerpaasoq. Taassumunnga asanninnerput ajortut uumiginissaannut iluaqutigissavarput. (Tussiaat 97:10) ’Tunissutit tamarmik ajunngitsut tunniussallu tamarmik naammalluartut’ Guutimit pisarput. (Jâko 1:17) Asavaatigut. Naalannitsigut takutipparput asallugulu uatsinnullu iliuuserisai tamaasa pingaartillugit. (1 Juánase 5:3) Kissaatigisariaqarparput Jehovap inatsisaasa naapertuilluartut unioqqutinnerisigut pakatsisinnginnissaa aliasutsinnginnissaalu. (Tussiaat 78:41) Taassumunnga illernartumik naapertuilluartumillu pallorfiginninnerup mitallerneqarneranik kinguneqarsinnaasumik iliuuseqarusunngilagut. (Títuse 2:5; 2 Pîtruse 2:2) Ileqqussatigut minguitsuujuarnikkut Jehovap uummataa nuannaartittarparput. — Ussatit 27:11.

6. Ileqqussatigut najoqqutassiat pillugit allat oqaluttuunnissaat sooq iluaqutaasinnaava?

⁶ Ileqqussatigut minguitsuujuarniarluni aalajangersimagaanni aalajangersimanermik allat oqaluttuunnissaat illersuutaassaaq. Allat oqaluttuutikkit Jehova Guuti kiffartuullugu, taassumalu najoqqutassiai qutsisut aalajangiusimaniarlugit. Illit inuunerit, illit timit, illit qinikkat pineqarput. Suna navianartorsiortinneqarpa? Ataatannut qilammiusumut attaveqarnerit erlinnangaartoq. Taamaattumik ileqqussatigut assuarnaassutsivit oqallisigineqannginnissaa qulakkeeruk. Guutip najoqqutassiaanik aalajangiussinikkut taassumunnga sinniisuunerit tulluusimaarutigiuk. (Tussiaat 64:11) Allat ileqqunnik oqaluttuunnissaat kanngusuutiginngisaannaruk. Nakussatsinneqassaatit illersorneqarlutillu, allallu maligassiannik malinninnissaannut kajumissaassallugit. — 1 Timûtiuse 4:12.

7. Ileqqussatigut minguitsuujuarnerput qanoq aalajangiusimasinnaavarput?

⁷ Ileqqussatigut najoqqutassiat qutsissut aalajangiusimaniaraanni allallu tamatuminnga oqaluttuutereeraanni, aalajangiusimasaq aalajangiusimaniarlugu iliuuseqartariaqarpoq. Ilaatigut taamaaliorsinnaavugut peqqissaartumik ikinngutissarsiornikkut. Biibilimi allassimavoq: „Sianisuunik peqateqartoq ilisimassuseqalersarpoq.“ Ilittut ileqqussatigut najoqqutalinnik peqateqarit; taakkua nakussatsissavaatsit. Allassimaffimmi tamatumani aamma allassimavoq:  „Silaatsulli ikinngutaa ajortumeertussaasarpoq.“ (Ussatit 13:20) Inuit aalajangerninnik allanngortitseqqajaasinnaasut sapinngisannik ingalassimaniakkit. — 1 Korintumiut 15:33.

8. (a) Sooq ajunngitsunik isummersortaqartariaqarpugut? (b) Suut ingalassimasariaqarpavut?

⁸ Aamma isumarput ilumoortunik, ilumoorsaartunik, iluartunik, minguitsunik, asanartunik nersornartunillu, ileqqorissunik ataqqinartunillu immerniartariaqarparput. (Filípimiut 4:8) Taamaaliorsinnaavugut isiginnaagassatsinik atuagassatsinnillu nipilersukkanillu tusarnaakkatsinnik qiniataarinitsigut. Oqarutta atuakkat atuagassiallu kanngunartunik imallit sanngiillisitsisinnaanngitsut, assigiinnassavaa oqarluni atuakkat atuagassiallu ileqqussanik qutsissunik najoqqutassiaqarnermut kajumissaarisut ineriartornartuunngitsut. Eqqaamajuk inuit naammalluinnanngitsut kanngunartulioqqajaasinnaasut. Atuakkat, atuagassiat, filmit nipilersornerlu kinguaassiuutitigut pileritsannartut eqqunngitsumik illigussuseqalernarput, tamannalu ajortuliornermik kinguneqarsinnaavoq. Ileqqussatigut minguitsuujuarniarluta isumarput ilisimassummik Guutimeersumik immertariaqarparput. — Jâko 3:17.

Kanngunartuliortitsisinnaasut

9-11. Iliuuserisat suut angummut inuusuttumut kanngunartuliortitsisut Salomonip allaatigai?

⁹ Iliuutsit kanngunartuliortitsisinnaasut oqaatigineqarsinnaagajupput. Iliuuserisat tamarmik utertikkuminaattarput. Malugeriaruk Ussatit 7:6-23-mi tamanna qanoq allaatigineqartoq. Salomonip „nukappiatsiaq isumaatsoq“, tassa ajunngitsumik pissuteqanngitsoq, takuaa. Inuusuttoq „aqqusinermi angalaarpoq arnap [atortittartup] illuata teqeqquata eqqaani, taavalu arnap illuata tungaanut ingerlarusaalerluni. taamani unnulluni taarsigaa, taarsivittarfiata naligileraa“. Taamani inuusuttoq kukkoqqaarpoq. „Unnulluni taarsigaa, taarsivittarfiata naligileraa“ inuusuttoq uummamminit siulersorneqarpoq aqqusinermut sumulluunniiunngitsoq — nalunngisamisulli aqqusinermut atortittartumik naapitsiffigisinnaasaminut.

¹⁰ Nangilluni allassimavoq: „Taava takulerpara arnap ornikkaa atortittartutut atisaqarluni, nakutitsiniutinik pilersaaruteqarluni.“ Inuusuttup arnaq takulerpaa! Utersinnaavoq angerlarlunilu, maannali artornarnerulerpoq, ingammik ileqqussatigut sanngiikkami. Inuusuttoq eqippaa kunillugulu. Kuninneqareerami oqaasii akuersiinnartitsiniartut tusarnaarpai: „Ilagiissummik pilliiartoreerama,“ oqarpoq. „Taamalu neriorsuutikka naammassereerakkit.“ Ilagiissummik pilliinerit tassaasarput neqi, qajuusat, uulia viinnilu. (3 Moses 19:5, 6; 22:21; 4 Moses 15:8-10) Taama oqarunarpoq upperisarsiortuusaarluni, tamatumunngalu peqatigiitillugu inuusuttoq paasitippaa imminni nerippat imerpallu ajunngitsoq. „Qaa,“ kajumissaarpaa, „naammatsilluta atoqatigiikkiartorta, tutissaagut qaanissaata tungaanut.“

¹¹ Qanoq kinguneqarnersoq takorlooruminaanngilaq. „Oqaatsimigut nakutinniarlugu ussernartumut saatsippaa.“ Inuusuttup illuanukaqatigaa „assigalugu ussik toqutaaffissaminukaassaq imaluunniit tuttu napiaaniutinut napiteriataartoq“. Salomon oqaatsinik ilungersunartunik naggasiivoq: ’Paasisimanagu toqusussaasoq.’ Aap, inuunerminik navianartorsiortitsivoq ’uersaasut arnaanillillu Guutip eqqartuukkumaarmagit’. (Eprîarit 13:4) Angutit arnallu tamanna ilinniutigilluarsinnaavaat. Guutimut iluarisaajunnaartitsisumik iliuuseqartoornissarput mianersuutigisariaqarparput.

12. (a) Angut inuusuttoq ’isumaatsuummat’ qanoq paasisariaqarpa? (b) Qanoq ililluta ileqqussatigut nukittusinnaavugut?

 ¹² Malugiuk angut inuusuttoq oqaluttuarineqartoq ’isumaatsuusoq’. Tassa eqqarsaatai, kissaatai, misigissusii inuunermilu anguniagai Guutimit iluarisaanissamut naapertuutinngitsut. Ileqqussatigut sanngiinnerata aliasutsippaa. ’Ulluni kingullerni’ makkunani artornartuni ileqqorissutsikkut nukittuneq ilungersuutigisariaqarpoq. (2 Timûtiuse 3:1) Guutilli ikiorneqarnissarput isumagisarpaa. Kristumiut ilagiissaasa ataatsimiinnerisigut aqqutikkut eqqortukkoornissatsinnut kajumissaarneqarnissarput allallu uatsitut anguniagallit ilaginissaannut periarfissaqarnissarput  isumagisimavaa. (Eprîarit 10:24, 25) Ilagiinni utoqqaanertaasut paarsisut naapertuilluarnerup aqqutaatigoornissatsinnik ajoqersortarpaatigut. (Evfisumiut 4:11, 12) Guutip oqaasia, Biibili, siulersortigalugulu siunnersortigaarput. (2 Timûtiuse 3:16) Tamatigullu Guutip anersaavanit ikiorneqarnissarput qinnutigisinnaavarput. — Matîuse 26:41.

Davidip ajortuliorneri ilinniutigikkit

13, 14. Sooq David arlaleriarluni sualuttunik ajortuliorpa?

¹³ Ajoraluartumik allaat Guutimut kiffaasut nuimasut ilaat kanngunartuliorsimapput. Ilaat tassaavoq kunngi David ukiuni qulilinni arlallinni aalajaalluni Jehovamut kiffaasimasoq. Qularnanngivippoq Guuti asangaaraa. Taamaakkaluartorli arlaleriarluni sualuttunik ajortuliorpoq. Angutitut inuusuttutut Salomonip allaatigisimasaatut Davidimik annertuumik ajortuliortitsisut iliuutsit arlaliupput.

¹⁴ Taamani David 50-it sinnilaarlugit ukioqarunarpoq. Illumi qaavanit pinnersoq Batseba uffartoq takuaa. Taanna pillugu paasiniaatitsivoq paasillugulu kinaanersoq. Paasivaa uia Urias angerlarsimanngitsoq — Ammonikkut illoqarfianik Rabbamik ungusinermut peqataasoq. Davidip Batseba qaaqquaa inaallugulu. Kingusinnerusukkut ajornartorsiuteqalerpoq. Paasinarsivoq Batseba Davidimik naartulersimasoq. Davidip Urias sorsunnermit angerlaqquaa neriuutigalugu nuliani inaatissagaa, allat isumaqarniassammata Batsebap qitornaanut Urias ataataasoq. Uriasili imminukanngilaq. David, ajortuliani isertorniarlugu qanorluunniit iliorusulluni, Urias Rabbamukarteqqippaa sakkutuut naalagaannut allakkat Uriasip toqutaaffigisinnaasaanukarteqqussutit nassartillugit. Urias toqutaavoq, Davidillu uillarneq katippaa naartunera suli paasineqartinnagu. — 2 Samuel 11:1-27.

15. (a) Davidip ajortuliaa qanoq qulaarneqarpa? (b) David Nathanimit avoqqaarineqarami qanoq qisuariarpa?

¹⁵ David iluatsitsissimagunarpoq ajortuliani isertoramiuk. Qaammatit ingerlapput. Meeraq — nukappiaraq — inunngorpoq. Davidilli Tussiaat 32 allannerani pisimasut taakku eqqarsaatigigunigit, nalunanngilaq ilerasuuteqangaartoq. (Tussiaat 32:3-5) Ajortuliaq Guutimut isertorneqarsinnaanngilaq. Biibilimi allassimavoq: „Davidip qanoq iliorneri [Jehovap] ajoreqai.“ (2 Samuel 11:27) Jehovap pruffiiti Natan aallartippaa, taassumalu periaaserissumik David paasitippaa qanoq iliorsimaneranik. Davidip ingerlaannaq nassuerutigaa Jehovalu isumakkeerfigineqarnissaminik qinnuigalugu. Ilumoorluni allamik isumataarami Guutimut ajunngitsumik attaveqaqqilerpoq. (2 Samuel 12:1-13) Davidip avoqqaarineqarnini ajuallaatiginngilaa. Akerlianik tugsiautit 141:5-imi allassimasutut isiginnittaaseqarpoq: ’Iluartup patippanga isumassorneqassaanga, inerterpanga niaqquma tarnutigissavaa, niaqora peqqunngissanngilaq.’

16. Salomon unioqqutitsinerit pillugit qanoq mianersoqqusillunilu unnersuussiva?

¹⁶ Salomonip, Davidip Batseballu ernerisa aappaata, immaqa ataatami inuunerani piffissaq erloqinartoq tamanna eqqarsaatigisimassavaa. Kingusinnerusukkut allappoq: „Ajortuliaminik isertuisoq pilluaatissaqanngilaq; ajortuliaminilli anngiiaatiginnittoq soraarussisorlu naallittorneqartussaavoq.“ (Ussatit 28:13) Sualuttumik ajortuliorutta unnersuussut isumassarsiarititaasoq tamanna, mianersoqqussutaallunilu siunnersuutaasoq, maleruartariaqarparput. Jehovamut ajortuliaq nassuerutigisariaqarparput ilagiillu utoqqaanertai saaffigalugit ikioqqulluta. Unioqqutitsisimasut ikiorniarlugit utoqqaanertat pingaarutilimmik akisussaaffeqarput. — Jâko 5:14, 15.

Ajortuliornerup kinguneri naammagalugit atukkit

17. Ajortuliornitsinnik isumakkeerfiginnittaraluarluni sumut Jehovap illersunngilaatigut?

¹⁷ Jehovap David isumakkeerfigaa. Sooq? David qamanerpiaq eqqortumik isiginnittaaseqarmat, allat naakkinnittuliorfigisarmagit, ilumoorlunilu allamik isumataarmat. Davidili ajortuliami ajunaarutaasut kingunerinut illersorneqanngilaq. (2 Samuel 12:9-14) Ullumikkuttaaq taamaappoq. Jehovap ajortuliortut peqqissimisut ajortumeernianngilai, aammali  eqqunngitsuliornerisa pissusissamisoortumik kingunerinut illersorniarnagit. (Galâsiamiut 6:7) Kanngunartuliorneq avinnermik, kissaatiginngisamik naartulernermik, napaatipilunnermk allanillu ataqqineqarunnaarnermik kinguneqarsinnaavoq.

18. (a) Paulusip ilagiit Korinthimiittut qanoq allaffigai angut kinguaassiuutitigut ingasattumik ajortuliormat? (b) Jehovap ajortuliortut qanoq asannittuliorfigalugillu naakkinnittuliorfigai?

¹⁸ Sualuttumik ajortuliorsimagutta eqqunngitsuliornitta kinguneri erloqissutigalugit nikallungalersinnaavugut. Allamilli isumataarnissatsinnut Guutimullu iluarisaaqqinnissatsinnut akornutissaqartariaqanngilagut. Ukiuni hundredelinni siullerni Paulusip Korinthimiut allaffigai angut qanigisarivallaakkaminik atoqateqartartoq ilagiinnit peerseqqullugu. (1 Korintumiut 5:1, 13) Angut ilumoorluni allamik isumataareermat, Paulusip ilagiit ima ajoqersorpai: ’Isumakkeerfigissavarsi tuppallersarlugulu asanninnermik aalajangerfigalugu.’ (2 Korintumiut 2:5-8) Ajoqersuineq isumassarsiarititaasoq tamanna Jehovap ajortuliortunut allamik isumataartunut asanninneranut naakkinninneranullu ersiutaavoq. Inngilit qilammiittut tipaatsuutigisarpaat ajortuliortumik allamik isumataartoqaraangat. — Lúkarse 15:10.

19. Unioqqutitsineq pissutigalugu ilumoorluni peqqissimineq qanoq ajunngitsumik kinguneqarsinnaava?

¹⁹ Unioqqutitsinerup kingunerisaanik nikallungagaanni Job 36:21-mi kajumissaarutip maleruarnera iluaqutaasinnaavoq: „Mianersorit iluaatsuliornermut saaqqunatit.“ Ajortuliornerup kinguneri nuanniitsut unioqqutitseqqinnginnissatsinnut iluaqutigisinnaavavut. Davidip ajortuliorsimanini pissutigalugu misigisani alianartut allanik ajoqersuinermini atorpai. Ima oqarpoq: „Ajortuliortut ajoqersussavakka aqqutigeqqusannik, unioqqutitsisut ilinnut utersinnaaqqullugit.“ — Tussiaat 51:15.

Jehova kiffartuullugu pilluarnermik kinguneqartarpoq

20. Guutip inatsisai naapertuilluartut naalakkaanni qanoq kinguneqarluartarpa?

²⁰ ’Aap, pilluarput Guutip oqaasianik tusartut toqqorlugulu,’ Jesus oqarpoq. (Lúkarse 11:28) Guutip inatsisai naapertuilluartut naalakkaanni maannakkut naassaanngitsumillu pilluarnermik kinguneqassaaq. Ileqqussatigut minguitsuujuarsimagutta taava taamaattuaannarniarta Jehovap ikiorniarluta iliuuserisimasai iluaqutigalugit. Kanngunartuliornerup napiaaniutaanut nakkaannarsimagutta, isumalluarniarta nalunnginnatsigu Jehova ilumoorlutik peqqissimisut isumakkeerfigissallugit piareersimasoq, aalajangiusimaniartigulu ajortulioqqissanata. — Jesaja 55:7.

21. Apustili Peterip ajoqersuutaa suna iluaqutigalugu ileqqussatigut minguittuarsinnaavugut?

²¹ Ungasinngitsukkut silarsuaq naapertuilluanngitsoq manna ileqqorluttoq isiginnittaatsini iliuutsinilu ilanngullugit peerneqassaaq. Ileqqussatigut minguitsuujuarutta maannakkut naassaanngitsumillu iluaqutigissavarput. Apustili Peter allappoq: ’Taamaattumik, asasakka, tamakkuninnga ilimagisaqarassi ilungersorniaritsi taassumunnga naapeqqullusi innarluitsusi assuarnaallusilu eqqissillusi. . . . Taamaaliumaartumik nalorniunnaarassi, misissoritsi soqqusaatsut tammartarnerisigut ilageqqunasigik aalajaassutsitsinnillu kataqqunasi.’ — 2 Pîtruse 3:14, 17. (wE 1/11 2000)

Uku nassuiarsinnaavigit?

• Sooq ileqqussatigut minguitsuujuarneq erloqinarsinnaava?

• Ileqqussat qutsissut malillugit inuuniarluta aalajangersimanerput aalajangiusimaannarniarlugu qanoq iliorsinnaavugut?

• Salomonip oqaluttuarisaata angutip inuusuttup ajortuliorneri qanoq ilinniutigisinnaavavut?

• Davidip maligassiaa eqqarsaatigalugu allamik isumataarneq pillugu suna ilinniarparput?

[Atuaqqissaarnermi apeqqutit]

[Qupp. 23-mi assiliartaq]

Ileqqussanut tunngasunik isiginnittaasitsinnik allanik oqaluttuussineq illersuutaavoq

[Qupp. 25-mi assiliartaq]

Jehovap David isumakkeerfigaa ilumoorluni allamik isumataarmat