„Iluatsitsineq“ qanoq nalilerneqartarpa?

„INUUNERMI iluatsitsineq“ qanoq paasisariaqarpa? Amerlanerit suliffimmi qaffakkiartornermut, ingammik atorfimmut akissarsilluarnartumut, atassuteqartissagunarpaat. Aammattaaq amerlasuut tusaamasaanermut atassuteqartittarpaat. Illittaaq ajunngitsumik iluatsittumillu inuuneq taama nassuiassagaluarpiuk? Akitinnak Jesus Kristus inuunermini pisuujusimannginnerata eqqaamanissaa pingaaruteqarpoq. Immikkut nersugaaneq angusimanngilaalluunniit, nalimini oqaasissaqartunit nersorneqanngilarluunniit. Inuunerali iluatsinngitsoorpa? Naamik. Sooq?

Ilaatigut inuttut ’Guutimi pisuujugami’. (Lúkarse 12:21) Guutip Jesus inuunermik siunertalimmik akissarsisippaa ’naalannaammik ataqqinaammillu’ toqusunit makitillugulu niaqoruserumallugu. Jehovap ’akitsingaartippaa ateqartillugulu aternit tamanit annerusumik’. (Eprîarit 2:9; Filípimiut 2:9) Jesusip inuunerminik atuinera Jehovap uummataanik nuannaartitsivoq. (Ussatit 27:11) Nunami inuunera iluatsippoq, siunertarisaata  eqquunnera pissutigalugu. Jesus Guutip piumasaanik iliorpoq, aqqalu ataqqinartillugu. Guutillu Jesus pisuussutinik tusaamasaanermillu ilisimatuup, politikkerip timersortartulluunniit kinaagaluartup qaqugumulluunniit angusimanngisaanik tunivaa. Jesus inuunermini allat angusinnaanngisaannik iluatsitsilluinnarpoq.

Angajoqqaat kristumiut nalunngilaat meeqqamik Jesusip maligassiai malikkunikkit Jesusitullu Guutimi pisuunngorlutik, meeqqat maannakkut nuannaangaalissasut — siunissamilu pissutsit aaqqissuussaanissaanni sianinernit tamanit annerungaartumik akissarsisinneqassallutik. Inuusuttutut pitsaanerusumik Jesus ilaarneqarsinnaanngilaq, suliaata assinganik suliaqarnermit, tassa ajornanngippat piffissaq tamaat oqaluussisartuulluni.

Inuiaqatigiilli ilaanni inuusuttut piffissaq tamaat oqaluussisartuusarnerat nalinginnaanngilaq. Angutip inuusuttup atuarnini naammassiguniuk immaqa ulloq naallugu suliffeqalernissaa, nuliarnissaa ilaqutaqalernissaalu ilimagineqartarput. Ilaatigut inuiaqatigiinni taamaatut ileqqulinni inuusuttut kukkusumik tunngaveqarlutik piffissaq tamaat kiffartornissaq qinerumaneq ajorpaat. (Ussatit 3:27) Sunarpiaruna pissutaasoq? Nunaqqatimik „iluatsitsinerup“ qanoq nalilernissaanut isumassarsiaasa malinnissaannut naqisimaneqartipput. Robert * taamaaliorpoq.

Kulturip nalunngeqatiginnissutsillu akerleriissuteqarnerat

Robert ilaqutariinni Jehovap Nalunaajaasuini peroriartorpoq. Inuusuttuaraanermini inooriaasia ikinngutigisartagaalu kissaatiginanngilluinnarmata arnaata ernumagilerpaa. Taamaattumik pioneeri qinnuigisimavaa kajumissaaqqullugu. Qanoq pisoqarsimaneranik Robert oqaluttuarpoq:

„Qatanngutip pioneerip soqutiginninnera pingaartittorujussuuara. Maligassiuilluarnerata kissaateqalersippaanga atuarunnaarniariaruma inuuninni suliassatut isigalugu pioneeritut kiffartulernissamut. Maannali anaanaga allarluinnaq pissutigalugu ernumaqqilerpoq. Nunagisatsinni arnaq inuusuttoq atuarunnaarniariarluni pioneerinngoraangat ajorineqanngilluinnartarpoq, angutilli inuusuttup pioneerinngornissani eqqarsaatigilertinnagu aningaasatigut isumannarunnaarsimanissaa ilimagineqartarpoq.

Taava ilinniagaqarpunga namminersorlungalu suliffiuteqalerlunga. Sivitsunngitsoq suliffiutiga kisiat ulapputigilerpara, ataatsimiinnerit oqaluussinerlu eqqarsaatiginagit ileqqussaannartut ingerlatilerpakka. Nalunngeqatiginnissutsima ilerasutsilerpaanga nalunnginnakku Jehova kiffartuunnerusinnaagaluarlugu. Taamaakkaluartoq allat ilimagisaannit allaanerusumik iliornera assoruunnarsimaqaaq, nuannaarutigaarali taamaaliuinnarsimagama. Maanna nuliaqarpunga, nuliaralu ukiut kinguliit marluk pioneeriuvugut. Qanittukkut ilagiinni kiffartortunngorpunga. Qularnanga oqarsinnaavunga maanna nalerisimaarnivik misigalugu uummatima iluunngaanit, piginnaaneralu tamaat Jehova kiffartuullugu.“

Atuagassiami matumani inuusuttut ilinniagaqaqqullugit imaluunniit iluaqutaasunik piukkunnarsaqqullugit akuttoqatigiimmik kajumissaarneqartarput. Suna siunertaralugu? Aningaasarsiorluaqqullugit? Naamik. Pisinnaassuseqalernissamut pissutaanerpaavoq tamatumuuna imminut isumagisinnaanissaq, Jehovalu sapinngisaq tamaat kiffartuullugu, pisinnaaguit piffissaq tamaat  kiffartortutut. Amerlanertigulli inuusuttut suliffitsik aallutingaaramikku kiffartornissartik tunulliutilertarpaat. Ilaasa piffissaq tamaat kiffartornissartik isumaliutiginerluunniit ajorpaat. Sooq taamaanngila?

Ilaatigut Robertip oqaluttuaata ersersippaa. Ilinniagaqareerami namminersortunngorpoq, sivitsunngitsorlu inuunera kaaviaaginnartutut ingerlalerpoq. Siunertarisimagaluarpaa aningaasatigut isumannarunnaarnissaq; ullutsinnili inoqarpa ilumut sillimasinnaasunik, ilagiinni kristumiuniikkaluarunik allaniikkaluarunilluunniit? Kristumiut imminnut pilersorsinnaajumallutik aningaasatigut akisussaassuseqalerniarlutik ilungersortariaqarput. Paasisariaqarpaalli ulluni makkunani ajornartorsiorfiusuni ikittuinnaat aningaasatigut nalorninartorsiunngimmata. Taamaattumik Jesusip Matîuse 6:33-mi neriorsuutaa kristumiunik toqqissisimatitsivoq.

Robertip nuannaarutigaa qamuuna kajumissaarisoq malinniarlugu aalajangersimagami, kulturikkut ileqquusut aalajangiusimaannarnagit. Ullumikkut nalerisimaangaarneq misigivaa piffissaq tamaat kiffartorneq suliarilersimagamiuk. Piffissaq tamaat kiffartorneq suliaavoq pingaartinnangaartoq. Robert qamuuna eqqissisimavoq ’piginnaanini tamaat’ atorlugu Jehova kiffartuukkamiuk, soorlu oqartoq.

Piginnaassusitit tamakkiisumik atukkit

Jehovap Nalunaajaasuisa akornanni amerlasuut piginnaassuseqarluartuupput. Ilaat malunnaatilimmik silassorissuseqarput, allalli assassullaqqissuullutik. Tunissutit tamakku tamarmik Jehovamit pipput, ’nammineq tamaasa tunisaramigit inuunermik anersaarnermillu sunillu tamanik’. (apustilit suliait 17:25) Inuuneqanngippat piginnaassutsit taakku naleqassanngillat.

Taamaattumik eqqortuuginnarpoq inuunerput Jehovamut tunniusimalluinnagarput kiffartuunneranut atorutsigu. Angut inuusuttoq pikkorilluinnartoq ukiuni hundredelinni siullerni inuusoq taamaaliorniarluni aalajangerpoq. Ilaqutariinnit nuimasunit naggueqarpoq inuusuttuunerminilu ukiut illoqarfimmi Tarsusimi Kilikiamiittumi atorpai. Inunnguuseralugu juutiuvoq, ataataminilli Romamiutut innuttaassuseqarneq kingornussaralugu. Tamatuma amerlasuunik pisassaqartillugulu pisinnaatitaaffeqalersippaa. Inuusukkallarami taamanikkut „ilisimatuut“ nuimanerit ilaanni, tassa Gamalielimi, Inatsisit ilinniarpai. Siunissarissaannguatsiaqaaq. — apustilit suliait 21:39; 22:3, 27, 28.

Angut inuusuttoq taanna kinaava? Saulusimik ateqarpoq. Kristumiunngorporli piffissallu ingerlanerani apustili Paulusitut ilisimaneqalerluni. Inuunermini angusarerusutani isumakkeerpai inuuninilu tamaat kristumiutut Jehova kiffartuullugu. Paulus tusaamasaalerpoq, nersorneqartutut inatsisinik ilisimasutuunngitsoq, nutaarsiassamilli nuannersumik ilungersuussilluni oqaluussisutut. Ukiut 30-ngajaat qaangiummata ajoqersuiartortitaareerluni Paulus Filippimi ikinngutiminut kingumut qiviarluni kristumiunngunngikkallarami naammassisimasani pillugit allappoq: ’Taanna pillugu tamatigut ajunaartoorama tamaasalu igitassaannaatillugit Kristusi iluanaaqqutigiumallugu.’ (Filípimiut 3:8) Paulusip taamatut inuusimanini peqqissimissutiginngisaannarpaa!

Gamalielimit ilinniarsimasani iluaqutiginikuusimavai? Aap, taamaalluinnarpoq! Piffissani arlalinni ’iivangkiiliu illersorlugulu aalajangersarsinnaasimavaa’. Suliassaviali tassaavoq nutaarsiassap nuannersup oqaluussisuutiginissaa, ilinniagaata ilikkartissinnaanngisaa. — Filípimiut 1:7; apustilit suliait 26:24, 25.

Ullumikkut tamatumunnga assingusumik ilaasa piginnaassusertik ilaatigullu ilinniakkatik Guutip naalagaaffiata soqutigisai siuarsarniarlugit atorsinnaasimavaat. Assersuutigalugu Amy, aningaasarsiornerup inatsisinillu ilisimatusarnerup tungaatigut ilinniagartooq. Siornatigut eqqartuussissuserisoqarfimmi akissarsiarissaarluni suliffeqarsimavoq, ullumikkulli Napasuliaq Alapernaarsuiffiup Peqatigiiffiata immikkoortortaqarfiisa ilaanni akissarsiaqarnani kajumissutiminit kiffartorpoq. Amyp inuunini ima oqaluttuaraa: „Isumaqarpunga qinigassanni pitsaanerpaaq qinersimallugu. . . . Universitetimi ilinniaqatima ilaannut kimulluunniit paarlaannissara eqqarsaatigisinnaanngilara. Suliaq qinersimasara usorsisimaarutigaara. Suut tamaasa pisariaqartitakka kissaatigisakkalu pigaakka — inuuneq nalerisimaalersitsisoq  nuannaalersitsorlu inuunerlu imaqangaartoq naammaginartorlu.“

Amyp inooriaaseq nalerisimaalersitsisoq qamuunalu eqqissisitsisoq Jehovamillu pilluaqqusaaneq qinerpai. Tassaannginnerluni angajoqqaat kristumiut tamarmik meeqqaminnut kissaatigisaat?

Kristumiutut kiffartorneq iluatsittoq

Allaat kristumiutut kiffartornermi soorunami aamma „iluatsitsinermut“ eqqortumik isumaqarneq pingaaruteqarpoq. Kiffartornerup iluatsittutut isiginissaa ajornanngitsuuvoq oqaluussineq pissarsiffiulluartoq atuagassianik Biibilimik tunngaveqartunik agguaassisimagaanni pissarsiffiulluartunillu Biibili pillugu oqaloqateqarsimaneq kingumut qiviarsinnaagaanni. Qaqutiguinnarli tusarnaarneqartarutta isumaqalersinneqarsinnaavugut oqaluussinerput piffissaajaataaginnartoq. Pingaaruteqarpali inuit oqaloqatigiumassagaatigut akueralutalu? Naamik, paasivarput Jehovamit miserratigineqannginnissarput pingaarnerujussuusoq. Inunnit tusarnaarneqarnersugut tusarnaarneqannginnersugulluunniit aalajangiisuunngilaq. Tamatuminnga Jesusip ajoqersukkani sunniuteqarluartumik ilinniartippai.

Soorlu nalunngikkipput Jesusip piffissap ilaani oqaluussisartut 70-it ’illorpalinnut inulinnullu tamanut ornikkumasaminut aallartikkai’. (Lúkarse 10:1) Sungiusimanngisaminnik illoqarfinni nunaqarfinnilu Jesus ilaginagu oqaluussisussanngorput. Taamaattumik aallartinnginnermini Jesusip ilinniarteqqissaarpai. ’Eqqissinermik pissusilimmik’ naammattuuigunik taanna Guutip naalagaaffia pillugu nalunaajaaffigeqqissaasavaat. Ilassineqanngikkunilli pisimasoq eqqarsaatigeqqinnagu qimaannassaavaat. Jesusip paasitinniarpaa tusarumanngitsut Jehova ilumut narrugigaat. — Lúkarse 10:4-7, 16.

Taakkua 70-it oqaluussinertik naammassereeramikku ’kingumut tikiupput tipaatsullutik oqarlutillu: „Naalagaq, anersaapiluit aqqit pillugu allaat naalappaatigut.“’ (Lúkarse 10:17) Angutinut taakkununnga naammalluinnanngitsunut anersaanik pissaanilissuarnik anisitsineq tupinnarsimassaqaaq; Jesusilli ajoqersukkani qiimmatsassimaqisut oqaaqqissarpai: ’Manna tipaatsuutigissanngilarsi anersaat naalatsigigassigik, tipaatsugitsili atisi qilammi allassimammata.’ (Lúkarse 10:20) Taakkua 70-it naatsorsuutigisinnaassanngilaat sukkulluunniit anersaapilunnik anisitsisinnaassallutik, oqaluussinerminnillu angusarissaartuaannassanatik. Aalajaakkunilli kiffartornerat iluatsissaaq, aatsaalli Jehovamit akuerisaajuassallutik.

Tamakkiisumik kiffartorneq naleqangaartutut isigaajuk?

Ilaanni angut inuusuttoq kristumiumut utoqqaanertamut oqarpoq: „Ilinniarnertuunngorniarfimmi naammassereeruma suliffissarsiorlunga misilissavara. Suliffissarsinngikkumalu piffissaq tamaat kiffartorniarnissara isumaliutigissavara.“ Pioneerinngorsimasulli amerlanerit taamatut isiginngilaat. Ilaasa suliffitsik akissarsiarissaarnartoq qimassimavaat; allat ilinniagassamik piukkunnartumik neqeroorutit itigartissimavaat. Apustili Paulusitut pilliuteqarsimapput, taassumatullu — aamma Robertitut Amytullu — qinikkatik peqqissimissutiginngilaat. Jehova, pitsaanerpaamik tunineqartariaqartoq, unnersiutigiumallugu piginnaanitik atorlugit pisinnaatitaaffissuusoq annertooq paasisimavaat.

Jehovap Nalunaajaasorpassuit aalajaatsut, immaqa kristumiutut akisussaaffitik pissutigalugit pioneeriusinnaanngillat. Guutili ’uummatimikkut iluunngarlutik tarnikkullu iluunngarlutik isumakkullu iluunngarlutik’ kiffartuukkunikku Jehovamit iluarisaassapput. (Matîuse 22:37) Namminneq pioneeriusinnaanngikkaluarlutik miserratiginngilaat piffissaq tamaat kiffartortut suliamik naleqaqisumik qinersisimasut.

Apustili Paulus allappoq: ’Silap matuma inui ileqqoqatigeqinasigik.’ (Rûmamiut 12:2) Ilitsersuut tamanna isumaqarpoq eqqarsartaaserput silarsuup matuma aaqqissuussaanerata najoqqutarisartagaanut tulluarsassanngikkipput. Pioneeriugaluaruit pioneeriunngikkaluaruilluunniit Jehovamut kiffartornerit inuuninni pingaarnerpaasariaqarpoq. Jehovamit iluarisaaguit tamanit pingaarnerpaaq pigissavat, taavalu inuunerit „iluatsittutut“ oqaatigineqarsinnaassaaq. (wE 1/11 2000)

[Quppernerup ataani ilanngussaq]

[Qupp. 9-mi assiliartaq]

Inuunerit kaaviiaaginnartumik ingerlalersoorteqinagu