Qanoq ililluta Guuti qanillisinnaagipput

Jâko 4:8-mi allassimavoq ’Guutimut palligunniaritsi, taava ilissinnut palligutissavoq.’ Jehova Guutip takutissimavaa inuit imminut qanillinissaat qanoq kissaatigitigigini ernermi pilluta toqunissaa akuerigamiuk.

ASANNILLUNI qaaqqusissummut tamatumunnga qisuariarluni apustili Johannes allappoq: ’Uagut asannippugut taassuma asaqqaarmatigut.’ (1 Juánase 4:19) Guutimulli qanilliniarluta nammineq iliuuseqaqqaartariaqarpugut. Allanut attaveqarluarniarluni naammassisariaqartunut pingaarnernut sisamanut allaaserisami siuliani eqqaaneqartunut assingupput. Taakkulu misissorluarnerussavavut.

Guutip pissusii tupinnartut malugikkit

Guuti amerlasuunik tupinnartunik pissuseqarpoq; ilaat malunnarnerpaat tassaapput asanninneq, ilisimassuseq, naapertuilluassuseq pissaanerlu. Ilisimassusia pissaaneralu silarsuarmi avataaniittunilu angingaartuni silarsuarmilu avatangiisitsinni, ulloriaqatigiippassuarnit atominut mikisuararsuarnut takussaalluarput. Tussiaasiortoq allappoq: „Qilaap oqaluttuaraa Guutip naalannassusia, isuisimasup nalunaarutigaa assaasa piliaat.“ — Tussiaat 19:1; Rûmamiut 1:20.

Aamma pinngortitarsuaq Guutip asanninnerata akisunneraa. Pinngortitaanitta kisimi takutippaa Guutip kissaatigigaa inuuneq nuannaarutigissagipput. Ooqattaarisinnaassusermik naamasinnaassusermillu, qalipaatinik takunnissinnaassusermik, nipilersukkanik nuannaarutiginnissinnaasusermik illarsinnaasusermillu tunisimavaatigut, avatangiisitsinnik alutornangaartunik nuannaarutiginnissinnaatilluta, pissutsinillu allarpassuarnik inuunermi pinngitsoorneqarsinnaagaluartunik. Aap, Guuti tunisiumatulluinnarpoq, ajunngitsoq asannittorlu — pissusii ’Guutimik pilluartumik’ taaneqarnissaanut qinngaqqunnanngitsunngortitsisut. 1 Timûtiuse 1:11; apustilit suliait 20:35.

Kisimi oqartussaanerminik atuinera pinngortitaminillu tapersorserneqarnera pingaarnerpaamik asanninnermik tunngaveqarmat Jehovamut ataqqinaataavoq. (1 Juánase 4:8) Jehova silarsuarmut avataaniittunullu kisimi oqartussaassuseqarluni Naalagaavoq, kisianni inuit pingaartumik kiffani ilumoortut ataatap asannittup meeqqaminut iliortarneratut iliorfigai. (Matîuse 5:45) Iluaqutissaannik erliguutinngilai. (Rûmamiut 8:38, 39) Taaneqareersutut allaat ernituani iluaqutissatsitut tunniuppaa. Inuunerput naassaanngitsumillu inuusinnaanerput Guutip asanninneranik pissuteqarpoq. — Juánase 3:16.

Jesusip ataatani assigilluinnarpaa taamaalillunilu Guutip qanoq ituuneranik ilisimasaqarluarlersilluta. (Juánase 14:9-11) Allanik pingaartitsisuuvoq namminissarsiunngivissuullunilu. Ilaanni angummut tusilartuullunilu oqalussinnaanngitsumut ilisaritinneqarpoq. Takorloorluarsinnaavarput angut inuppassuit akornanniinnermini annilaangallunilu nalornisimassasoq. Soqutiginarpoq Jesusip angut kisimeeqatiginiarlugu nigortilaarmagu tassanilu ajorunnaarsillugu. (Mákorse 7:32-35) Inuit misigissutsinnik soqutiginnittut qanoq ittuussutsinnillu ataqqinnittut pingaartippigit? Taamaappat qularnanngilaq Jehovamik Jesusimillu ilisarsiartornerit ilutigalugu qaninnerusumik attavigilissagitit.

Guutip pissusii eqqarsaatigeqqissaakkit

Inuk kusanartunik pissuseqarsinnaavoq, kisianni taanna kajungerissagutsigu inuup taassuma pissusii itinerusumik eqqarsaatigisariaqarpavut. Jehovamut tunngatillugu aamma taamaappoq. Qanilliniarlugu pissusiisa eqqarsaatigeqqissaarneri iliuuserisassatta pingaaruteqartut ilagaat. Kunngi David ilumoorluni Jehovamik asannittoq ’angut [Jehovap] uummataata iluarisaa’ oqarpoq: „Ullut itsarsuarnitsat eqqaavakka, naammassisatit tamaasa eqqarsaatigaakka isumaliutigeqqissaarlugillu assappit suliaat.“ — apustilit suliait 13:22; Tussiaat 143:5.

 Pinngortitarsuup tupinnartui qimerlooraangakkit, Biibilimiluunniit Guutip oqaasiani atuaraangavit, Daviditulli takusatit atuakkatilluunniit eqqarsaatigeqqissaartarpigit? Takorlooruk erneq ataataminit asangaakkaminit allagarseqqammersoq. Allakkat taakku qanoq isigissavai? Ilimananngilaq qimerluualaallatsiaannariarlugit amusartumut ilissagai. Naamik, qularnanngilaq sunnguit tamaasa allaassutaalaartullu maluginiaqqissaarlugit atuaqqissaassavai. Taamatuttaaq Guutip oqaasia uatsinnut erlinnartigisariaqarpoq, soorlu tussiaasiortumut ima oqartumut taamaattoq: „Ilami inatsisitit nuannareqaakka, eqqarsaatinniitittuarpakka.“ — Tussiaat 119:97.

Attaveqatigiilluarneq atatiinnarsiuk

Attaveqatigiilluarneq allanut ajunngitsumik ataqateqarnernut tamanut qitiuvoq pingaarutilik. Tamanna isumaqarpoq oqalulluni aamma tusarnaarluni, eqqarsaatikkuinnaanngitsoq aammali uummatikkut. Qinunikkut pinngortitsisumut oqaluttarpugut, imaappoq Guuti pallorfiginninnertut saaffigisarparput. Jehovap imminut asannittut kiffartortullu Jesus Kristusimillu palasiunertut aallartitaatut akuerinnittut qinnutaat nuannaarutigisarpai. — Tussiaat 65:3; Juánase 14:6, 14.

Qanga Guutip inuit assigiinngitsorpassuartigut attaveqarfigisarpai, assersuutigalugu takorluukkatigut, sinnattukkatigut inngilillu ikiortigalugit. Ullumikkulli oqaatsini allassimasut Biibili aqqutigalugu taamaaliorpoq. (2 Timûtiuse 3:16) Oqaatsit allassimasut iluaqutissarpassuaqartarput. Qanoq ilisukkulluunniit siunersiorsinnaavavut. Allakkatulli atuaqattaarneqarsinnaapput, imaaliallaannaq allanngortinneqarsinnaanngillat soorlu oqaluttuareqqiinerit taamatut pisartut. Biibili Ataatatsinnit qilammiusumit asannittumit allagarpassuartut katersukkatut isigisinnaavarput taakkunatigullu ullut tamaasa oqaluffigitilluta. — Matîuse 4:4.

Assersuutigalugu suup eqqortuuneranut suullu eqqunngitsuuneranut Jehovap isumaa Biibilip saqqummiuppaa, nunarsuarmullu inunnullu siunertaanik ilisimatitsivoq. Aammattaaq inuit inuiaqatigiillu assigiinngitsorpassuit, pallorfiginnittunit aalajaatsunit akeqqanut narrutsassimasunut qanoq iliuuseqarfigisimanerai oqaluttuarai. Inunnut iliuuserisimasami allanneqartinnerisigut Jehovap annikitsualuttai ilanngullugit kinaassutsiminik oqaluttuuppaatigut. Asanninnerminik, nuannaarnerminik, aliasunnerminik, pakatsinerminik, kamannerminik, naakkinnissutsiminik isumassuinerminillu, aap, eqqarsaatiminik tamanik misigissutsiminillu taakkununnga pissutaasut ilanngullugit inunnit paasineqarsinnaasunngorlugit, paasitippaatigut. — Tussiaat 78:3-7.

Guutip oqaasiata ilaanik atuareerluni imminut aperisoqarsinnaavoq: ’Atuakkakka qanoq iluaqutigisinnaavakka?’ Sulilu pingaarnerusoq: ’Qanoq ilillunga qaninnerusumik Guutimut attaveqalersinnaavunga?’ Siullermik Guutip kinaassusia pillugu atuarsimasat ilikkarsimasallu eqqarsaatigeqqissaartariaqarput uummammiuliullugillu. Taamaalioreeraanni Jehova qinunikkut saaffigisariaqarpoq oqaluttuullugulu atuarsimasanut tunngatillugu eqqarsaatinik misigissutsinillu ilorlerpaanik qanorlu misilillugu atorniarnerlugit. Attaveqatigiinneruvoq. Allanittaaq uummammioqaraanni soorunami qinunermi ilanngunneqarsinnaapput.

Guuti suleqatigiuk

Qanga angutit ilumoortut ilaat pillugit Biibili allappoq „Guutip saavani inuusut“ imaluunniit „kiinaata saani inuuseqartut“ (1 Moses 6:9; 1 Kunngit 8:25) Oqaatsit taakku qanoq isumaqarpat? Pingaarnerusumik inuunerminni ullut tamaasa Guuti ingerlaqatigisutut illugu inuummata. Ajortiliugaluarput Guutilli inatsisai najoqqutassiaalu nuannaraat, Guutillu siunertaa malillugu inuullutik. Inuit  taamaattuut Guutip iluarai soqutigalugillu Tussiaat 32:8-mi oqaatigineqartutut: „Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.“

Illittaaq Jehova ikinngutigilersinnaavat — ingerlaqatigalugulusooq ilinnik isumaginnittutut ataatatullu siunnersuisutut. Pruffiitip Esajap Jehova tassaanerarpaa „iluaqutaasunik ilinnik isumaginnittoq, ingerlavigisassakkut ingerlatitsoq“. (Jesaja 48:17) Taamaattumik ikinnguteqarnerup pilluaqqussutaasa misigisarnerisigut Daviditut misigissavarput soorlu Jehova ’sanilerigipput’. — Tussiaat 16:8.

Guutip pissusii aqqanut attuumassuteqarput

Upperisarsioqatigiit amerlasuut Biibilimillu nutsikkat amerligaluttuinnartut Guutip nammineq aqqa Jehova atunngitsoorlugulu ilisaritinngitsoortarpaat. (Tussiaat 83:19) Allakkalli hebraierisuut allaqqaarneqarneranni ateq taanna 7000-ingajannik taaneqarsimavoq. (Killoq Biibilimik nutserisut  amerlanersaat Guutip aqqa peersimavaat, allanneqaqqaarneranili guutipiluit taaneqartut aqqi atuinnarsimallugit soorlu Ba’al, Bel, Merodak Satanilu allaat.)

Ilaat isumaqarput Guutip aqqata atunnginnera soqutaavallaanngitsoq. Unali eqqarsaatigiuk: Kinaassusilimmut ateqanngitsumut qanittumik tatiginnillunilu attaveqarneq sapernarpa sapernanngilaluunniit? Taaguutit soorlu Guuti Naalagarlu (aamma guutipilunnut atorneqartartut) Jehovap pissaaneranik oqartussaassusianik imaluunniit qanoq issusianik immaqa paasititsigaluarput, namminerli aqqa tassaavoq allanit tamanit immikkoorutaa. (2 Moses 3:15; 1 Korintumiut 8:5, 6) Guutip ilumoortup pissusii ilisarnaataalu nammineq aqqanut attuumassuteqarput. Upperisarsiornermik ilinniarsimasoq Walter Lowrie eqqorluartumik oqarsimavoq: „Guutip aqqanik ilisimanninngitsup kinaassuserpiaa naluaa.“

Australiami katuullitut upperisaqartumut Mariamut taamaappoq. Jehovap Nalunaajaasuisa siullermik naapikkamikku Biibilimi Guutip aqqata takutinnissaanut akuerineqarput. Qanoq qisuariarpa? „Biibilimi Guutip aqqa siullerpaamik takugakku qiavunga. Guutip nammineq aqqanik paasitinneqarama atorsinnaagakkulu killitseqaanga.“ Mariap Biibilimik atuaqqissaartarnini ingerlatiinnarpaa. Tamatuma kingunerisaanik inuunermini siullermeerluni Jehova kinaassusilittut ilikkarpaa attavigiuarnissaalu ineriartortissinnaanngorlugu.

Aap, Guuti ’qanillisinnaavarput’ naak takusinnaanngikkaluarlugu. Eqqarsaatitsinni uummatitsinnilu kinaassusia nuanningaartoq „takusinnaavarput“ sulilu annerusumik asalerlugu. Asanninneq taamaattoq ’iluarluinnassutsip nimeraa’. — Kulorsamiut 3:14. (wE 15/10 2000)

[Qupp. 6-mi ungalusaq/​assiliartaq]

Jehovap imminut asanninnerput qisuariarfigaa

IKINNGUTIGIINNEQ marlunnik sammiveqarpoq. Guutimut qaninnerulernitsigut nammineq qaninnerulertarpaatigut. Simionimut Annamullu utoqqarsuanngorsimasunut marluullutillu Biibilimi immikkut taaneqartunut misigissusii eqqarsaatigeriakkit. Iivangkiiliulersaartup Lukasip oqaluttuaraa Simion ’iluartuusoq Guutimillu mianerinnittoq’ Messiasilu utaqqigaa. Simonip pissusii ajunngitsut Jehovap malugai angullu taanna utoqqalisoq asanninnermik ersersitsivigaa nalunaarfigigamiuk ’[Jehovap] tanitaa takusimatinnaga toqu misigissanngikkaa’. Jehovap neriorsuutini eqquutitippaa Simionilu naalungiarsummut Jesusimut angajoqqaaminit Jerusalemimi naalaffimmukaanneqartumut siulersorlugu. Nuannaarluni qujamasungaarlunilu Simionip meeraq pakkuppaa qinullunilu: ’[Jehova], maanna kiffat angerlartikkumaarpat eqqissisillugu, soorlu oqartutit, isima takummassuk annaassutigisat,’ — Lúkarse 2:25-35.

’Taamaanneragut’ aamma Jehovap asanninnini Annamut 84-inik ukiulimmut Jesusimut siulersorneratigut ersersippaa. Biibilimi oqaluttuarineqarpoq uillarneq taanna asanartoq naalaffimmiittuaannartuusoq Jehova ’Guuti kiffartuullugu’. Pingaartitsingaarluni Simionitulli Jehova ajunngitsuliungaarneranik qutsavigaa, taavalu ’tamanut Jerusalaap utertitaanissaanik utaqqisunut oqaluttuaralugu’ — Lúkarse 2:36-38.

Jehovap malugaa Simeonip Annallu qanoq asatigalunilu mianeritigigaanni, siunertamilu naammassineqarnissaa qanoq soqutigitigigaat. Biibilimi oqaluttuarineqartut taamaattut Jehovamut qaninnerulersinngilaatsit?

Ataatamisulli Jesusip inuit uummataasa qanoq ittuuneri takusinnaavai. Naalaffimmi ajoqersuitilluni takuaa aningaasanik ilioraaffimmut ’uillarneq piitsoq quppakunik marlunnik ilisisoq’. Amerlanerit isumaqassagaluarput tunissutaa naleqanngitsoq, Jesusili taama isumaqanngilaq. Arnaq nersualaarpaa pigisani tamaasa tunniummagit. (Lúkarse 21:1-4) Taamaattumik qularissanngilarput Jehova Jesusilu pigisatta pitsaanersaannik tunigutsigit tunissuterput angigaluarpat mikigaluarpalluunniit pingaartissagaatigut.

Guutip asannitsini nuannaarutigai, kisianni tunulluni eqqunngitsumik ingerlasoqaleraangat aliasuutigisarpaa. 1 Moses 6:6-imi allassimavoq Jehovap ulersuaq sioqqullugu inuit ajussusiat „uummammigut anniaatigileraa“. Tussiaat 78:41-​mi oqaatigineqartutut kingusinnerusukkut Israelikkut naalasseriitsut ’Israelip illernartua Guuti misilinniartarpaat ajuallatsillugulu’. Guuti tamanik pilersitsisoq soqutigittaatsuunngilaq misigittaatsuunanilu. Uagut naammalluinnanngitsugut assiginata, taanna Kinaassusiliuvoq misigissutsiminik oqimaaqatigiissaarisinnaasoq aramasuunaniluunniit.

[Qupp. 7-mi assiliartaq]

Jehovap pinngortitarsuanik eqqarsaatiginnittuarneq tassunga qanillissutigisinnaasatta ilagaat