„Inassutit malilluarniakkit, taava inuuginnassaatit“

ANGUTAAVOQ inuusuttoq, silassorissaq ’takuminartoq inugissorlu’. Sulisitsisuata nulia tiingatuujuvoq ittuujuitsuullunilu. Angut inuusuttoq ajuutigingaarlugu ullut tamaasa kanngunartuliorfigeqqusaartarpoq. „Ullut ilaanni Josefip suliassani suliarissallugit illumut isermat kiffanillu allanik isersimasoqanngimmat Potifarip nuliata Josef qallersaataagut tiguaa oqarlunilu: ’Innaanniannga!’“ Josefilli, ataataanerpaap Jakobip ernerata, qallersaatini qimallugu Potifarip nulia qimarratigaa. — 1 Moses 39:1-12.

Ussernartorsioraangamilli tamarmiunngitsoq qimaasarput. Angut inuusuttoq Israelitoqqap kunngiata Salomonip unnuami aqqusinermi takusaa assersuutitut eqqarsaatigeriaruk. Arnap uteriitsup maleruutiinnartippaa ’pinasuarlunilu illuanut angerlaqatigaa assigalugu ussik toqutaaffissaminukaassaq’. — Ussatit 7:21, 22.

Kristumiut ’uersaaneq qimarratigissagaat’ oqaaqqissaarneqarput. (1 Korintumiut 6:18) Apustili Paulus ajoqersukkamut kristumiumut inuusuttumut Timoteusimut allappoq: ’Inuusuttut kajungerisaat qimarratiginiakkit.’ (2 Timûtiuse 2:22) Kanngunartuliortitsisinnaasunik, allasiortitsisinnaasunik allanilluunniit ileqqorluttuliortitsisinnaasunik naammattuugaqassagaluarutta Josefip Potifarip nulianit qimarratiginnissimaneratut aalajangeriataarsinnaatigaluta qimaasariaqarpugut. Taamaaliornissamut aalajangersimaniarluta suna iluaqutigisinnaavarput? Biibilimi Ussatit kapitaliisa arfineq-aappaanni kunngi Salomonip nalissaqanngitsumik unnersuuppaatigut. Kanngunartuliortut peqquserluttuliornerinit qanoq ajunaartitaannginnissaq ilinniartitsissutigiinnanngilaa, aammattaaq angutip inuusuttup arnamit inuunerluttumit kanngunartuliortinneqarnera uummaarissumik oqaluttuarineratigut periaasiinik qulaarivoq.

’Inassutit inussannut qilerutikkit’

Kunngi ataatarpalaartumik siunnersuuteqarluni aallartippoq: „Ernera, oqaatsikka sianigilluarniakkit inassutikkalu uummammiugalugit! Inassutit malilluarniakkit, taava inuuginnassaatit, ajoqersuutikkalu pigittuinnakkit isivit tappiutaatut erligitigalugit.“ — Ussatit 7:1, 2.

Angajoqqaat, ingammik ataataasut, Guutip suna ajunngitsuunerarneraa ajortuunerarneraalu meeqqatik ilinniartissallugit Guutimeersumik akisussaaffeqarput. Mosesip ataataasut oqaaqqissaarpai: „Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ (5 Moses 6:6, 7) Aamma apustili Paulus allappoq: ’Ilissi angajoqqaat, qitornasi narrutsatseqinasigik, paariniarsigilli perorsarlugit inertertarlugillu [Jehovamit].’ (Evfisumiut 6:4) Guutip oqaasiani Biibilimi oqaaqqissaarutit, inassutit inatsisillu angajoqqaat ajoqersuinerannut, meeqqat pigiliuttariaqagaannut pingaartittariaqagaannullu, ilaapput.

Aamma angajoqqaat ilinniartitsinerat angerlarsimaffimmi malittarisassanik — najoqqutassianik ilaqutariit maleruartariaqagaannik — ilaqarsinnaapput. Ilaqutariit tamarmik iluaqutigissavaat. Soorunami pisariaqartitat apeqqutaatillugit najoqqutassiat ilaqutariinniit ilaqutariinnut assigiinngissinnaapput. Angajoqqaat ilaquttaminnut suna ajunnginnerpaanersoq aalajangigassaraat, najoqqutassiaallu asanninnerannut isumassuinerannullu  ersiutaagajunnerpaasarput. Inuusuttut malittarisassanut taamaattunut angajoqqaaminnillu Biibilimit ilinniakkaminnut tamanut naalaqqullugit kajumissaarneqarput. Aap, ilinniartitaaneq taamattoq ’isitta tappiutaatulli’ — paarilluartariaqakkatut illersorluartariqakkatulluunniit — sernigineqartariaqarpoq. Taamaalilluni Jehovap najoqqutassiaanik sumiginnaanerup toqussutaasinnaanera pinngitsoorneqarsinnaavoq — ’inuuginnartitsilerluni’.

Salomon nangippoq: „[Inassutit] inussannut qilerutikkit uummatinnullu allallugit.“ (Ussatit 7:3) Inussatta takukulasarnerisulli, arlaannillu suliaqaraangatta inussatta pingaaruteqarnerisulli, Biibilimit perorsarneqarnitta, Biibilimik ilisarsinitta, Jehovap inassutaanik eqqaamannittuarnissarput sugaluaraangattalu taakkuninnga siulersorneqarnissarput qulakkiissavaa. Inassutit taakkua uummatitsinni allassavavut inuttullu pissuserilissallugit.

Ilisimassutsip silassorissutsillu pingaaruteqarneri erseqqissarniarlugit kunngi oqaaqqissaarivoq: „Ilisimassut oqarfiguuk:’Aleqaraakkit’, silassorissorserlu eqqarlinnik taajuk.“ (Ussatit 7:4) Ilisimassut tassaavoq Guutimit ilisarsinermik atuilluarneq. Aleqamut asangaakkamut misiginertulli ilisimassut misigiffigisariaqarparput. Silassorissuseq suua? Silassorissuseq imaluunniit paasinnissinnaaneq tassaavoq piginnaaneq pineqartup immikkuualuttortaasa ataatsimullu isiginerata imminnut atassuteqarnerannik takunnissinnaanikkut isumasiusinnaaneq. Ikinngummut tatigisatsitulli silassorissutsimut qanitsigaluta misigisariaqarpugut.

Sooq Biibilimit ilinniakkavut aalajangiusimasariaqarpavut, aamma sooq ilisimassummut silassorissutsimullu qanimut attaveqarneq ineriartortittariaqarpavut? ’Pitsaaliussammatigut allap nulianut, arnamut allasiorniartumut piutserluni ussassaarisumut.’ (Ussatit 7:5) Taamaaliorutta arnap allasiortup, kanngunartuliortup, pitsaasuusaarluni maleruutiinnartitsiniarneranut sernigineqassaagut. *

Angutip inuusuttup ’arnaq nakutitsiniartoq’ naapikkaa

Maanna Israelip kunngiata nammineq takusani allaatigai: „Ilaanni igalaakkut silammut isigitillunga itsuarfikkut itsuarama takulerpara inuusuttut akornanni nukappiatsiaq isumaatsoq; arajutsinaveersaalerpara taanna angutit pututikkuminartut ilaat. Aqqusinermi angalaarpoq arnap illuata teqeqquata eqqaani, taavalu arnap illuata tungaanut ingerlarusaalerluni. Taamani unnulluni taarsigaa, taarsivittarfiata naligileraa.“ — Ussatit 7:6-9.

Biibili kalaallisut nutsigaq pisoqaq naapertorlugu Salomonip itsuarfia igalaartaqarani ammasuuvoq. Ammanera qisunnik amitsunik qiperukkanik ungaluusaliaagunarpoq. Aqqusinerni tarrajunneq taarsivinninngorpoq. Kunngip angut  inuusuttoq pututikkuminartoq —  nakutikkuminartoq — takulerpaa. Siuneqassuseq silaqassuserlu amigaatigai. Uummataa silassorinngilaq. Aqqutigisani qanoq ittuusoq sunalu naammattoorsinnaanerlugu nalugunanngilaa. Arnap illuata tungaanukarluni ’illuata teqeqqua’ qanillivaa. Arnaq kinaava? Suniartoruna?

Kunngi arajutsisaqanngitsoq nangippoq: „Taava takulerpara arnap ornikkaa atortittartutut atisaqarluni, nakutitsiniutinik pilersaaruteqarluni. Eqqissiveqannginnermit nangamasassaajunnaarluni angerlarsimaannarneq sapertarpoq. Aqqusinermiikkaluariarluni illoqannginnersamukararaaq aqqusernillu paarlaffiini tamani qamasarluni.“ — Ussatit 7:10-12.

Arnaq attaveqarfigiuminartuusoq atisaasigut nalunanngilaq. (1 Moses 38:14, 15) Kanngunartuliortartutut, atortittartutut, atisaqarpoq. Nakutitsiniutinik pilersaaruteqarpoq — ’peqqusersusaaruteqarluni’. (Da. aut. 1992) Eqqissiveqarnani, nangagassaanani, oqalorusoqaluni, uteriilluni, perpalulluni namminissarsiortuullunilu, ittuujuillunilu ussassaarerpaluppoq. Angerlarsimaannarnermit nakutitassarsiorluni illoqannginnersaniikkusunneruvoq aqqusernilluunniit paarlaffiiniikkusunnerulluni. Angutitut inuusuttutut ittoq utaqqivaa.

’Piutsersunik oqaluffigaa’

Angutip inuusuttup arnaq inuunerluttoq peqquserlunniartoq naapippaa. Salomonip tamanna malugisimassavaa. Oqaluttuarpoq: „Taava inuusuttoq eqippaa kunillugulu, ittuujuillunilu ima oqarfigalugu: ’Ilagiissummik pilliiartoreerama taamalu neriorsuutikka naammassereerakkit anivunga naapikkiartorlutit, ujaarigakkillu kiisami nanivakkit.’“ — Ussatit 7:13-15.

Arnap taassuma qarlui pitsaasuussaarput. Oqaasii nakimanngillat ittuujuippasillusilu. Oqaasiisa tamarmik angut inuusuttoq maleruutiinnartinniarpaat. Ullormi tamatumani ilagiissummik piliisimanerarnermigut neriorsuutiminillu eqquutitsisimanerarnermigut suut tamaasa naapertuilluartuusaartinniarpai taatsiarlugulu anersaakkut sanngiitsuunani. Jerusalemimi naalaffimmi ilagiissummik pilliutigineqartartut tassaapput neqit, qajuusat, uliat viinnillu. (3 Moses 19:5, 6; 22:21; 4 Moses 5:8-10) Ilagiissummik pilliuteqartup pilliummi ilaanik imminut ilaquttaminullu immikkoortitsisinnaammat arnaq isumaqartitsiniarpoq illumini naammattunik nerisassaqarlunilu imigassaqartoq. Ima paasillugu angutip inuusuttup angerlaqatigiguniuk nuannisarumaartoq. Taannarpiaq naapigiarsimallugu arnaq oqarpoq. Oqaluttuaq upperisinnaagaanni — killitsinnassusia. „Ilumoorpoq arnaq naapigiagaqartoq,“ Biibilimik misissueqqissaartartoq oqarpoq, „angulli taannarpiaq ujarsimavaa? Sianiitsup — immaqa inuusuttup taassuma — kisimi upperisinnaavaa.“

Kanngunartuliorfigeqqusaartup taassuma isikkuni, oqaatsini qujanarniartut, eqitaarinini kunissininilu illigussaarutigeriarlugit naamasinnaaneq ilannguppaa. Oqarpoq: „Siniffiga tungilersoreerpara ilupaassianik qalipaatigissaartunik Egyptenimit pisunik, nallavigalu tipigissaasersoreerpara myrramik, aloemik kanelimillu.“ (Ussatit 7:16, 17) Takujuminarsaaneq paasisimalluarlugu qalipaatigissaartunik Egyptenimeersunik siniffini tungilersimavaa myrramillu, aloemik kanelinillu tipigissarsimallugu.

„Qaa, naammatsilluta atoqatigiikkiartorta, tutissaagut qaanissaata tungaanut.“ Nuannersumik inuit marluk nereqatigiinnissaannut qaaqqusissutaannaanngilaq. Kinguaassiuutitigut atoqatigiumavaa. Neqeroorut angutip inuusuttup pissanganartippaa pileritsassutigalugulu. Kajungernarnerutinniarlugu nangippoq: „Uiga angerlarsimanngilaq ungasissorsuarmut aallarami; aningaasivini nassarpaa, qaammanniffimmi aatsaat angerlassaaq.“ (Ussatit 7:18-20) Uini niuerluni angalammat sivitsorpallu aatsaat angerlarnissaa ilimagigamiuk, toqqissisimalluinnarsinnaallutik angut inuusuttoq isumalluarsaarpaa. Angummut inuusuttumut ajuutigeqqusaallaqqippoq. „Inuusuttoq piutsersunik oqaluffigalugu maleruutiinnartippaa, oqaatsimigut nakutinniarlugu ussernartumut saatsippaa.“ (Ussatit 7:21) Neqeroorut taama ussernartoqartigisoq maleruutiinnarfigissanngikkaanni Josefitut ittariaqarpoq. (1 Moses 39:9, 12) Piumasaqaammut tamatumunnga angut inuusuttoq naleqqiunneqarsinnaava?

 Assigalugu ’ussik toqutsivimmut ingerlasoq’

Salomon angippoq: „[Tammartitaata] malinnasuarpaa, soorlu ussik toqutsivimmut ingerlasartoq, kalinnerit sianiitsunik naalassaataasut isikkamigut atisaralugillusooq, tinguni qarsumut qupitserlugu; soorlu timmiannguaq qilorartuummut tuaviortoq, ilisimanagu toquffigissagini.“ — Ussatit 7:22, 23, nutsigaq pisoqaq.

Qaaqqusissut angummut inuusuttumut akiugassaanani ussernartorsiornarpoq. Silassorissutsi tamaat puiorlugu ’ussik toqutsivimmut ingerlasoq’ assigalugu malippaa. Angut inuusuttoq ajortimut kajungingaarami angutitut kalunneqartutut pillagassaangitsoorsinnaanngitsutut ippoq. ’Tinguni qarsumit qupineqarmat’, toqussutigisinnaasaminik ikeqalerami, aatsaat ulorianartorsiornini paasivaa. Nappaammik toqunartumik, kinguaassiuutitigut tunillaattartumik nappaateqalersitsisinnaasumik iliuuseqarami toqussaaq. * Anersaakkut aamma toqusinnaavoq — toqussutigisinnaagamiuk. Timaanut inuuneranullu tamarmut attuumassuteqarpoq, Guutimullu sualuttumik ajortuliorluni. Timmissatut qilorartuummiittutut toqumut tuaviorpoq.

„Ingerlavigisaani tammatitaaniaqinasi“

Kunngi silatuup Salomonip takusami ilinniutissartaa uparuarpaa, kajumissaarillunilu: „Qitornakka, taava tusaaniarsinga, oqaasissakka naalaarsigit! Arnap allasorniartup aqqutaasa atuarnissaannut ussertinnaveeritsi, ingerlavigisaani tammatitaaniaqinasi! Amerlaqaammi toqussutissaannik ikilersimasai, ikinngeqaat orlutissimasai. Taassuma illuanit aqqutit atapput toqusut inaannut, toqup najugaanut taartorsuarmut.“ — Ussatit 7:24-27.

’Inuuginnaqqulluta’ kanngunartuliortartut ileqqui ingalassimassagivut kunngi Salomonip siunnersorpaatigut. (Ussatit 7:2) Uagutsinnut ullumikkut inuusunut piffissaalluartukkut unnersuussutaavoq. Nakutitassarsiortartut qamasarfigisaasa qanillinnginnissaat pingaaruteqarluinnarpoq. Sumiffinni taamaattuniinnitsigut periaasiinut sooq ulorianartorsiortissaagut? Sooq ’isumaatsut’ ’arnallu allasiorniartup’ ingerlavigisaani tammartitaasut tusarnaassavavut?

Kunngip takusaata ’arnap allasiorniartup’ angut inuusuttoq ’tutinniarlugu’ pilerisaarlugu qaaqquaa. Inuusuttorpassuit — ingammik niviarsissat — assingusumik atornerlunneqartanngillat? Apeqqut manna eqqarsaatigeriaruk: Kinguaassiuutitigut kanngunartuliornissamut pilerisaarisoqarpat asanninneruva ilumoortoq namminissarsiortumilluunniit piumatussusiua? Angutip ilumoorluni arnamik asannittup arnap nalungeqatiginnissusianut kristumiutullu ilinniagaanut akerliusumik iliortinniarlugu sooq tatissavaa? Kunngi Salomon mianersoqqusivoq: Aqqutinut taamaattunut „ussertinnaveeritsi“.

Allanik kanngunartuliortitsisartut oqaatsit pitsaasuusaartut eqqarsaatigilluakkallu atorajuppaat. Ilisimassut silassorissuserlu iligigutsigik taamaattut eqqumaffiginissaannut ikiussavaatigut. Jehovap peqqussutai eqqaamajuarutsigit illersugaasaagut. Taamaattumik naassaanngitsumut ’inuuginnarniarluta inassutit maleruartuartariaqarpavut’. — 1 Juánase 2:17. (wE15/11 2000)

[Quppernerup ataani ilanngussat]

[Qupp. 30-mi assiliartaq]

Angajoqqaavit najoqqutassiissutai qanoq isigaagit?

[Qupp. 32-mi assiliartaq]

Guutip inassutaanik maleruaaneq inuunermik naleqarpoq