Jehovap oqaaqqissaarutai nuannaraagit?
Jehovap oqaaqqissaarutai nuannaraagit?
„Maleruarpakka inatsisitit nuannaringaarlugillu.“ — TUSSIAAT 119:167.
1. Jehovap oqaaqqissaarutai ingammik sumi eqqaaneqaqqattaarpat?
JEHOVAP kissaatigaa innuttani pilluassasut. Pilluarnerli piviusoq misigissagutsigu Guutip inatsisai malillugit inuusariaqarpugut peqqussutaalu maleruarlugit. Taamaattumik oqaaqqissaarpaatigut. Taakku Biibilimi eqqaaneqaqattaarput, ingammik Tussiaat 119-imi, Judakkut kunngissaata inuusuttup Ezekiasip allagarigunagaani. Erinarsuut tusarnersoq tamanna ima aallarniuteqarpoq: „Pilluarpoq assuarnaatsumik inuuseqartoq [Jehovallu] inatsisaanik maleruaasoq. Pilluarpoq inassutaanik maleruaasoq, taassuminngalu ujarlersoq uummatimigut iluunngarluni.“ — Tussiaat 119:1, 2.
2. Guutip oqaaqqissaarutai pilluarnissatsinnut qanoq attuumassuteqarpat?
2 ’Jehovap inatsisaanik maleruaasarpugut’ oqaasia tunngavigalugu ilisarsigaangatta ilisarsinerpullu tamanna maleruaraangatsigu. Naammalluinnanngitsuugattali oqaaqqissaarneqartariaqarpugut. Hebriiarit oqaasiata ’oqaaqqissaarummik’ nutserneqartup takutippaa Guutip inatsisiminik, peqqussutiminik, maleruagassiaminik ingerlavigeqqusaminillu eqqaasittaraatigut. (Matîuse 10:18-20) Pilluartuarsinnaavugut aatsaat oqaaqqissaarutai maleruartarutsigik, taakkumi iluaqutigalugit anersaakkut tammarsaarutit ajunaarutaasinnaasut aliasuutaasinnaasullu ingalassimasinnaavavut.
Jehovap oqaaqqissaarutai attavigilluinnakkit
3. Tussiaat 119:60, 61 naapertorlugu suna tatigisinnaavarput?
3 Tussiaasiortup Guutip oqaaqqissaarutai nuannareqai imalu erinarsorluni: „Nangaananga tuaviorpunga peqqussutitit maleruarniarlugit. Guutiitsut qilersuutaasa nimersimavaannga, puiorsimanngilakkali inatsisitit.“ (Tussiaat 119:60, 61) Jehovap oqaaqqissaarutai iluaqutigalugit malersorneqarnitsinni nikallujuissinnaavugut tatigigatsigu Ataatatta qilammiusup akeqqatta killilersuutaat peersinnaagai. Piffissarititani nallerpat akornutaasut taamaattut piiassavai Naalagaaffimmik oqaluussineq killilersugaanngitsumik naammassisinnaaqqullugu. — Mákorse 13:10.
4. Guutip oqaaqqissaarutai qanoq qisuariarfigisariaqarpavut?
4 Ilaannikkut Jehovap oqaaqqissaarutai uagutsinnut perorsaatitut sunniuttarput. Perorsarneqarneq tamanna pingaartittuartariaqarparput soorlu tussiaasiortoq taamaaliortoq. Qinunikkut Guuti oqarfigaa: „Ilumummi inatsisitit kajumissaatigaakka. . . . Taamaattumik nuannaraakka inatsisitit.“ (Tussiaat 119:24, 119) Oqaaqqissaarutinik Guutimeersunik tussiaasiortup pigisaanit amerlanerusunik peqarpugut. Jehova innuttaminut Inatsisit ataaniittunut ilinniartitsisuusoq, aammattaarli kristumiunut ilagiinnut siunertaa pillugu Allakkani Griikerisuuni Allakkanit Hebriiarisuunit issuakkat hundredelikkuutaat eqqaasinnginnerpaatigut? Guutip inatsisiminut atatillugu arlaanik eqqaasikkaangatigut unnersuussineq taamaattoq qujumasuutigisarparput. ’Jehovallu inatsisai ataniarfigigutsigik’ ajortuliornissamut Pinngortitsisullu iluarinngisai uatsinnut pilluaalersitsisut ussernartorsiorfigissanngilavut. — Tussiaat 119:31.
5. Jehovap oqaaqqissaarutaanik suup nuannarinnilersissavaatigut?
5 Jehovap oqaaqqissaarutai qanoq nuannaritigisariaqarpavut? „Maleruarpakka inatsisitit nuannaringaarlugillu,“ tussiaasiortoq erinarsorpoq. (Tussiaat 119:167) Jehovap oqaaqqissaarutai nuannaringaassavavut Ataatamit isumaginnerusulluinnartumit eqqaasitsisuutitut isigigutsigik akueralugillu. (1 Pîtruse 5:6, 7) Oqaaqqissaarutai pisariaqartippavut, paasigutsigulu qanoq iluaqutigitigalugit nuannarinerulissavavut.
Guutip oqaaqqissaarutai sooq pisariaqartikkivut
6. Ilaatigut sooq Jehovap oqaaqqissaarutai pisariaqartippavut, suullu eqqaamanissaannut ikiortigisinnaavavut?
6 Jehovap oqaaqqissaarutaanik pisariaqartitsinitsinnut pissutaasut ilaat tassa puigutunerput. The World Book Encyclopedia-mi allassimavoq: „Nalinginnaasumik piffissap ingerlanerani puigutunerujartornartarpoq. . . . Nalugunanngilarput ateq imaluunniit paasissutissaq aalajangersimasoq oqaatigingajakkaluarlugu eqqaasinnaajunnaavillugu. . . . eqqaamasaarulluinnariataarneq tamanna takornartaanngilaq eqqaamanninniarnermik iluatsinngitsumik taaneqartarpoq. Ilisimatuut assersuutigisarpaat soorlu inimi tukattumi tammaasaq nanissagaanni. . . . Qulakkeerniaraanni paasissutissaq aalajangersimasoq eqqaamaneqartuassasoq allaat ilisimatinneqarluareernermi kingorna misissoqqissaarneqartariaqarpoq.“ Peqqissaarluta atuaqqissaartarutta uteqqiisaruttalu Guutip oqaaqqissaarutaanik eqqaamanninnissatsinnut malinninnissatsinnullu ikiussavaatigut tamakkulu uagutsinnut iluaqutaassallutik.
7. Sooq Guutip oqaaqqissaarutai aatsaat taama pisariaqartitsigaavut?
7 Ullumikkut Jehovap oqaaqqissaarutai aatsaat taama pisariaqartitsigaavut inuiaat oqaluttuarisaanerannut pissutsit aatsaat taama ajortigilersimammata. Guutip oqaaqqissaarutaanik eqqumaffiginninnitta siuneqalersissavaatigut silarsuup ajortumik tammarsaarutaanik nakkaannarfiginninnginnissatsinnut. „Ilinniartitsisinnit tamanit ilisimassuseqarneruvunga,“ tussiaasiortoq erinarsorpoq, „eqqarsaatigiuartarakkit inassutit. Silassorinneruvunga utoqqarnit maleruagassiatit maleruarakkit. Isikkakka aqqutinit ajortunit tamanit nigorsimatippakka oqaatsisit maleruarsinnaaqqullugit.“ (Tussiaat 119:99-101) Guutip oqaaqqissaarutai maleruarutsigik ’aqqutinit ajortunit tamanit’ nigorsimasinnaavugut taamaalillutalu inuppassuit qasseersuit ’taarsiorlutik isumamikkut inuunermit Guutip pianit avissaarsimasut’ assiginngitsoorsinnaallugit. — Evfisumiut 4:17-19.
8. Uppernikkut misilinneqaraangatta aalajaaannissatsinnut qanoq piareersarluarsinnaavugut?
8 Guutip oqaaqqissaarutai aamma pisariaqartippavut ’ulluni kingullerni’ makkunani annikilliornartorpassuit anigornissaannut nakussatsinneqartaratta. (Daniel 12:4) Tamakkuninnga oqaaqqissaarneqanngikkutta ’tusarnaartuusinnaavugut puigutuut’. (Jâko 1:25) Namminerli ilagiillu peqatigalugit Biibililersaarutit ’kiffap ilumoorlunilu silatuup’ pilersitai iluaqutiginiarlugit peqqissaarluta Biibilimik atuaqqissaartarutta uppernikkut misilinneqarnitsinni nalussanngilarput qanoq aalajaassinnaanerluta. (Matîuse 24:45-47) Anersaakkut pilersorneqarnivut iluaqutigalugit paasisinnaavarput qanoq iliortariaqarnersugut Jehovamut iluarisaajumalluta artornartunik misilinneqaraangatta.
Ataatsimiinnerit pingaaruteqangaarnerat
9. ’Inuit tunissutaasut’ kikkuuppat, qanorlu uppeqatitik ikiortarpaat?
9 Guutip oqaaqqissaarutai pisariaqartippavut ilaatigullu pisariaqartitsineq tamanna matussuserneqartarpoq kristumiut ataatsimiinnerini qatanngutinit angutinit toqqakkanit ajoqersorneqartaratta. Apustili Paulus allassimavoq Jesus ’qutsissumut pavunnarami tigusat aallarukkai, tunisivorlu [inunnik tunissutaasunik, NV]’. Paulus nangilluni allappoq: ’Ilaat [Kristusip] apustilinngortippai, ilaat pruffiitinngortippai, ilaat iivangkiiliulersaartunngortippai, ilaat paarsisunngortippai ajoqersuisunngortillugillu, iluartut naammattunngoqqullugit, kiffartuutissaq suliareqqullugu, Kristusip timaa ineriartorteqqullugu.’ (Evfisumiut 4:8, 11, 12) Qujamasuutigingaarsinnaavavut ’inuit tunissutaasut’ utoqqaanertat toqqakkat taakkua Guuti pallorfiginiarlugu aggeraangatta Jehovap oqaaqqissaarutaanik eqqaasittarmatigut!
10. Eprîarit 10:24, 25-mi suna pingaarnerpaatut erseqqissarneqarpa?
10 Tamakkuninnga tamanik Guutip iliuuseqarneranut qujamasuutiginninnitta sapaatip-akunneranut tallimariarluta ilagiit ataatsimiinnerinut najuutsittassavaatigut. Aalajangersimasumik katersuuttarnerup pingaaruteqarnera Paulusip erseqqissarpaa. Ima allappoq: ’Misissoqatigiinniartalu asanninnermut ajunngitsuliornermullu kajumissaaqatigiilluta, katisimasarfippullu qimannaveertigu, ilaat taamaattarmata; kisianni oqaaqqissaaqatigiilluta pisa; annerusumilli taamaassaagut ullussaq qanillilersoq malugilerassiuk.’ — Eprîarit 10:24, 25.
11. Sapaatip-akunneranut ataatsimiinnerit tamaasa qanoq iluaqutigisarpavut?
11 Ataatsimiinnerit uatsinnut iluaqutaanerat pingaartippiuk? Sapaatip-akunneri tamaasa Napasuliaq Alapernaarsuiffik-mik atuaqqissaartarnerup uppernerput nakussatsittarpaa, Jehovallu oqaaqqissaarutaanik maleruaanissatsinnut ikiortarluta ’anersaallu silamiusup’ akiornissaanut piginnaanngortittarpaatigut. (1 Korintumiut 2:12; apustilit suliait 15:31) Tamanut ammasumik oqalugiaatitigut Guutip oqaasianeersunit ajoqersorneqartarpugut, ilaatigut Jehovap oqaaqqissaarutaanik Jesusillu ’oqaasiinik naassaanngitsumik inuussutilinnik’ nuannersunik. (Juánase 6:68; 7:46; Matîuse 5:1–7:29) Teokratiimik Atuarfimmi ajoqersuillaqqissinissatsinnut sungiusarneqartarpugut. Sapaatip-akunneri tamaasa Oqaluussinermut tunngasumik ataatsimiinnerit nalissaqanngillat nutaarsiassamik nuannersumik illumit-illumut oqaluussinermut, pulaaqqiinermut, angerlarsimaffinni Biibilimik atuaqqissaaqateqarnermut allanillu kiffartuuteqarnermut pikkorissarneqartaratta. Ilagiillu atuakkamik atuaqqissaaqatigiinneranni ikinnerusaratta taamaattumillu periarfissaqarnerusarluta Guutip oqaaqqissaarutaanik oqaaseqarfiginnikulanerunissatsinnut.
12, 13. Asiami nunat ilaanni Guutip innuttaasa kristumiut ataatsimiinneri pingaartillugit qanoq takutippaat?
12 Ilagiit ataatsimiinneri aalajangersimasumik najuuffiginerisigut Guutip oqaaqqissaarutaanik eqqaasinneqartarpugut anersaakkullu nukittujuarsinnaallutalu sorsuttoqaraluartoq, aningaasatigut ajornartorsiortoqaraluartoq allanillu uppernikkut misiligaasoqartaraluartoq. Nunami Asiamiittumi kristumiut 70-it missaasa angerlarsimaffimminnit anisitaagamik orpippassuarnilu inooqqusaallutik pinngitsaalineqaramik ataatsimiinnerit pingaaruteqarnerat qularutiginngilaat. Aalajangersimasumik ataatsimiittuaannarniarlutik aalajangersimapput taamaattumillu illoqarfitsik sorsunnermit piuneerunneqarsimasoq uterfigaat, Naalagaaffilersaarfiullu sinnikui aavaat orpippassuarnilu sanaqqillugu.
13 Nunami tassani ukiorpassuarni sorsuttoqarnerani aalajaareerlutik Jehovap innuttai ilungersorlutik kiffartortuarput. Tassani utoqqaanertat ilaat aperineqarpoq: „Qatanngutit suna ataqatigiissutiginerusimaneraat?“ Ima akivoq: „Ukiuni 19-ini ataatsimiinneq ataasiinnarluunniit taamaatiinnarsimanngilarput. Ilaannikkut qaartartumeerisoqartillugu allanilluunniit ajornartorsiuteqartillugu qatanngutit ilaat ataatsimiigiarsinnaanngillat, ataatsimiinnerli ataaserluunniit taamaatiinnanngisaannarparput.“ Qatanngutit angutit arnallu asanartut taakkua ’katisimasarfimmik qimannaveernissaata’ pingaaruteqarluinnarnera paasisimavaat.
14. Annap utoqqalisup ileqqua qanoq ilinniutigisinnaavarput?
14 Uillarnerup Annap 84-inik ukiullip ’naalaffik qimanneq ajorpaa’. Taamaattumik najuuppoq Jesus inoorlaajusoq naalaffimmukaanneqarmat. (Lúkarse 2:36-38) Ataatsimiigianngitsuunnginnissat aalajangiusimaviuk? Sapinngisannik ataatsimeersuarnermi qulequttat tamaasa najuuffigisarpigit? Tamakkunatigut ajoqersorneqartarnitta anersaakkut iluaqutaasup uppernarsarpaa Ataatarput qilammiusoq innuttaminik isumassuisuusoq. (Jesaja 40:11) Periarfissat tamakku aamma nuannaarnerulersittarpaatigut, najuukkaangattalu takutittarparput Jehovap oqaaqqissaarutai pingaartillugit. — Nehemja 8:5-8, 12.
Jehovap oqaaqqissaarutai immikkoorutigaavut
15, 16. Jehovap oqaaqqissaarutaanik maleruaanerput ileqqutsinnut qanoq sunniuteqassava?
15 Guutip oqaaqqissaarutai maleruartarutsigik silarsuarmit ajortumit matumannga immikkoorutigissavavut. Assersuutigalugu Guutip oqaaqqissaarutai eqqumaffigigaangatsigik kinguaassiuutitigut kanngunartuliortanngilagut. (5 Moses 5:18; Ussatit 6:29-35; Eprîarit 13:4) Sallunissamut, peqquserlunnissamut tillinnissamulluunniit ussernartorsiortinneqarutta oqaaqqissaarutit Guutimeersut naalallugit ajugaaffigisinnaavavut. (2 Moses 20:15, 16; 3 Moses 19:11; Ussatit 30:7-9; Evfisumiut 4:25, 28; Eprîarit 13:18) Jehovap oqaaqqissaarutaanik maleruaanitta aamma akiniaanaveersaatissinnaavaatigut, puttarsisaqarnaveersaartilluta allanilluunniit mamarliinaveersaartissinnaalluta. — 3 Moses 19:16, 18; Tussiaat 15:1, 3.
16 Guutip oqaaqqissaarutaanik maleruaanitsigut illernartitaasinnaavugut immikkoortitaasinnaallutaluunniit taassumunnga kiffartornermut. Silarsuarmillu matumannga immikkooruteqarnerup pingaaruteqassusia! Nunarsuarmi inuunermini unnuk kingulleq Jehovamut qinunermini Jesusip ajoqersukkani ima qinnuppai: ’Oqaatsinnik tunivakka, silarsuullu inuisa uumissorpaat ilaginnginnamikkik, soorlu uangattaaq silarsuup inuisa ilaginngikkaannga. Qinnutinngilakka silarsuarmit peerseqqullugit, kisianni ajortumut sernigeqqullugit. Silarsuup inuisa ilaginngilaat, soorlu uangattaaq silarsuup inuisa ilaginngikkaannga. Sallusuissutsikkut iluarsakkit; oqaatsisit sallusuissutaapput.’ (Juánase 17:14-17) Guutip oqaasia pingaartittuartigu, taassuma taassumunnga illernartumik kiffartornissamut piukkunnarsartarmatigut.
17. Guutip oqaaqqissaarutai sumiginnarutsigik qanoq pisoqassava, taamaattumillu qanoq iliortariaqarpugut?
17 Jehovap kiffaasut kiffartuunnerani piukkunnarsartuarusuppugut. Guutip oqaaqqissaarutai sumiginnarutsigik silarsuup anersaavanit, oqalunnitsigut, atuagassiaatitsigut, aliikkutassiaatitsigut ileqqulersornitsigullu ersersinneqarajuttunit, artorsartinneqassaagut. ’Aningaaserituujorusunngilagut, usorsitsaatoorusunnata, anneruniartoorusunnata, qujasuitsoorusunnata, qiningasoorusunnata, isumaatsoorusunnata, ilisimaniartoorusunnata, Guuti kajumiginagu nuannaarutinut kajumittoorusunnataluunniit’ — pissutsit tamakku taasinnaasavut Guutimut tunussisut ilisarnaataasa ilaminiinnaraat. (2 Timûtiuse 3:1-5) Aaqqissuussanerup matuma ajortup ulluini kingullerni inuugatta Guuti ikioqqulluta qinnuigiuartigu oqaaqqissaarutai maleruartuarumallugit taamaalillutalu ’mianersorluta oqaasii malillugit’. — Tussiaat 119:9, nutsigaq pisoqaq.
18. Guutip oqaaqqissaarutaanik maleruaaneq sumik ilaqarpa?
18 Jehovap oqaaqqissaarutaasa iliuusereqqusaanngitsunut mianersoqquinnanngilaatigut. Aammattaaq uummatikkut, tarnikkut, isumakkullu iluunngarluta, nukivullu tamakkerlugit asallugu Jehovamut tatiginnilluinnarnissatsinnut ajunngitsuliornissatsinnullu kajumissaarneqarpugut. (5 Moses 6:5; Tussiaat 4:6; Ussatit 3:5, 6; Matîuse 22:37; Mákorse 12:30) Guutip oqaaqqissaarutaasa aamma inoqatitsinnut asanninnissatsinnut kajumissaartarpaatiguttaaq. (3 Moses 19:18; Matîuse 22:39) Ingammik Guutip piumasaatut iliorluta ’Guutimik ilisarsinermik’ inuunartumik allat aveqatigigaangatsigit takutittarparput Guuti tullivullu asallugit. — Ussatit 2:1-5.
Jehovap oqaaqqissaarutaanik maleruaagaanni inuuginnartoqarsinnaavoq!
19. Qanoq allat takutissinnaavavut Jehovap oqaaqqissaarutaasa maleruarnissaat atoriaannaallunilu iluaqutaasoq?
19 Jehovap oqaaqqisaarutai maleruarutsigik allallu taamaaliornissaannut ikiorlugit annatsikkumaarpugut tusartivullu annatsikkumaarlugit. (1 Timûtiuse 4:16) Qanoq allat paasitissinnaavavut Jehovap oqaaqqissaarutaasa maleruarnissaat atoriaannaallunilu iluaqutaasoq? Taamaaliorsinnaavugut nammineq inuunitsinni Biibilip najoqqutassiaanik maleruaalluta. Taamaalillutik inuit ’inuunermik naassaanngitsumik eqqortumik isumaqarfiginnittut’ takusinnaassavaat Guutip oqaasiani inooriaasereqquneqartoq pitsaanerpaasoq. (apustilit suliait 13:48, NV) Takussavaattaaq ’Guuti ilumut ilutsinniittoq’ ilagalutalu Naalakkamik kisimi oqartussaasumik Jehovamik pallorfiginninnerusulissallutik. — 1 Korintumiut 14:24, 25.
20, 21. Guutip oqaaqqissaarutaasa anersaavatalu sunik iliuuseqarsinnaanngortippaatigut?
20 Biibilimik atuaqqissaartuarnitsigut, ilikkakkavut naapertorlugit iliuuseqarluta Jehovallu anersaakkut pilersitai sapinngisamik iluaqutiginiarutsigik oqaaqqissaarutai nuannaarutigilluinnassavavut. Oqaaqqissaarutit tamakku maleruartarutsigik iluaqutigissavavut ’inuttaap Guuti assilillugu pinngortitap atinissaanut, iluartillugu illernartillugulu ilumoornikkut’. (Evfisumiut 4:20-24) Jehovap oqaaqqissaarutaasa anersaavatalu illernartup ’asannissinnaanngortippaatigut, nuannaarsinnaanngortilluta, eqqissisinngortilluta, kamajuissinnaanngortilluta, inussiarnersinnaanngortilluta, ajunngitsuliorsinnaanngortilluta, uppersinnaanngortilluta, saamasinnaanngortilluta imminullu naalakkersorsinnaanngortilluta’ — pissutsinik silarsuarmi Satanip pissaaneqarfigisaani nalinginnaasunit allaanerulluinnartunik. (Galâsiamiut 5:22, 23, NV; 1 Juánase 5:19) Taamaattumik nammineq Biibilimik atuarnitsigut, utoqqaanertat toqqakkat aqqutigalugit, ataatsimiinnitsinni ataatsimeersuarnitsinniluunniit Jehovap oqaaqqissaarutaanik eqqaasinneqartarnivut qujamasuutigisariaqarpavut.
21 Allaat naapertuilluarneq pissutigalugu malersorneqaraluarluta Jehovap oqaaqqissaarutaanik maleruaajartortilluta nuannaarsinnaalertarpugut. (Lúkarse 6:22, 23) Aarlerinartorsioraangatta Guuti aniguisitsisutut tatigaarput. Tamanna ingammik maannakkut pingaaruteqarpoq inuiaat tamarmik Harmagedonimi ’sorsunnissamut Guutip ajugaqanngitsup ullussarsuani piumaartumut’ katersorneqalermata. — sarĸúmersitat 16:14-16.
22. Jehovap oqaaqqissaarutai eqqarsaatigalugit suna aalajangiuttariaqarparput?
22 Inuunermik naassaanngitsumik tunissummik pisassarinngisaraluatsinnik tunineqassagutta, Jehovap oqaaqqissaarutai nuannarisariaqarpavut uummatikkullu iluunngarluta maleruarlugit. Taamaattumik tussiaasiortutut ima erinarsortutut isiginnittaaseqartariaqarpugut: „Inatsisitit tamatigut naapertuilluartuupput. Siuneqarnermik tuninnga inuusinnaaqqullunga.“ (Tussiaat 119:144) Taamaattumik tussiaasiortutut aalajangertariaqarpugut: „Torlulaffigigakkit [Jehova] annaannga, taava inatsisitit unioqqutinnaveersaassavakka.“ (Tussiaat 119:146) Aap, oqaatitsigut iliuutsitsigullu takutinniartigu Jehovap oqaaqqissaarutai ilumut nuannarilluinnarivut. (wE 1/12 2000)
Qanoq akissavigit?
• Tussiaasiortup Jehovap oqaaqqissaarutai qanoq isigai?
• Sooq Guutip oqaaqqissaarutai pisariaqartippavut?
• Oqaaqqissaarutit Guutimeersut eqqarsaatigalugit ataatsimiinnerit qanoq pingaaruteqartigaat?
• Jehovap oqaaqqissaarutaasa qanoq silarsuarmit matumannga immikkooruteqartippaatigut?
[Atuaqqissaarnermi apeqqutit]
[Qupp. 15-mi assiliartaq]
Tussiaasiortup Jehovap oqaaqqissaarutai nuannaarutigilluinnarpai
[Qupp. 17-mi assiliartaq]
Annap maligassiaa malinniarlugu ataatsimiigianngitsuunnginnissat aalajangiusimalluinnarpiuk?
[Qupp. 18-mi assiliartaq]
Jehovap oqaaqqissaarutaanik maleruaatilluta kiffartuunnerani minguittuarsinnaavugut akuerisaajuarsinnaallutalu