Jehovap qasusoq nakussatsittarpaa

„[Jehovap] qasusoq nakussatsittarpaa, nukillaangasoq pissatsittarpaa.“ — JESAJA 40:29.

1. Guutip pinngortitaaniittumik nukimmik assersuummik taasaqarit.

JEHOVAP pissaanera killeqanngilaq. Eqqarsaatigeriaruk nukerujussuaq pinngortitaaniittoq! Atomi mikisuaraq — suut tamarmik sananeqaataat — ima mikitigaaq erngup kuseriarnera ataaseq atominik 100 milliardit milliarderiaataannik imaqarluni. * Nunarsuatsinni uumassusilinnut tamanut seqinermi atomit nukissiornerat aalajangiisuuvoq. Seqernulli nukissiornerata ilaa qanoq annertutigisoq nunarsuarmi inuusoqarneranut pisariaqartinneqarpa? „Seqernup nukissiaata milliardtedeliata affaannaa nunarsuarmut pisarpoq,“ ulloriarsiortoq James S. Pickering allappoq. Taamaattoq seqernup „nukissusiaata ilaminiinnaa nunarsuarmut annguttarpoq, tamannalu nunarsuarmi suliffissuaqarfiit tamarmik katillutik nukissusiaannit 100.000-riaammik anneruvoq,“ matematikkimik ilisimatooq Fred Hoyle atuakkiamini Ulloriarsiorneq-mi allappoq.

2. Jesaja 40:26-mi Jehovap pissaanera pillugu qanoq allassimasoqarpa?

² Atomit mikisuaqqat imaluunniit avataarsua angingaartoq eqqarsaatigalugit Jehovap pissaanera  angingaartoq tupigusuutigaarput. Tupinnanngilaq ima oqarsinnaammat: „Qilaap tungaanut qiviaritsi, takussagissilu: Kia ullorissat pinngortippai? [Jehovap] kisittarpai sakkutoorpassuartut sorsukkiartortitassamisut, tamaasa immikkut atiisigut taasarlugit. Silatungaarlunilu pissaaneqangaarami ataasiinnarmilluunniit minitaqarsimanngilaq.“ (Jesaja 40:26) Aap, ’pissaaneqangaarpoq’ nukimmullu angingaartumut avataarsuata pinngortinneqarneranut atorneqartumut pilerfiulluni.

Pissaaneq pissusissaq akimorlugu pisariaqarpoq

3, 4. (a) Ilaatigut suut qasutissinnaavaatigut? (b) Apeqqut suna eqqarsaatigisariaqarparput?

³ Guuti killeqanngitsumik pissaaneqarpoq, inuilli qasusarput. Sumiluunniit qasoqasunik inoqartarpoq. Qasullutik itertarput, suliartoraangamik atuariartoraangamilluunniit qasusarput, angerlaraangamik innaraangamillu qasuinnaratik nukillaarluinnartarput. Ilaat allamukarusukkaluaqaat pisariaqartingaatsiakkaminnik qasuersaarniarlutik. Uaguttaaq Jehovamut kiffaasutut qasusarpugut, Guutimut tunniusimalluta inuunitsinni suliniuteqartuartariaqaratta. (Mákorse 6:30, 31; Lúkarse 13:24; 1 Timûtiuse 4:8) Isumagisariaqakkavuttaaq allat amerlaqaat uagutsinnik nukillaartitsisinnaapput.

⁴ Kristumiuugaluarluta inuttut allatut akiorniagassatsinnik ajornartorsiuteqarsinnaavugut. (Job 14:1) Nappaatit, aningaasatigut ajornartorsiutit isumakuluutillu nikallussutigisinnaavavut nukillaassutigisinnaallugillu. Unamminiarnartut tamakkua saniatigut naapertuilluarneq pissutigalugu malersorneqartarput. (2 Timûtiuse 3:12; 1 Pîtruse 3:14) Ulluinnarni silarsuup tatisinera Guutillu naalagaaffianik oqaluussinitsinnut assortuineq pissutigalugit ima qasutigisinnaavugut Jehovamut kiffartornermi suliniuteqarunnaarluta. Tamatuma saniatigut Satan Diaavulu sapinngisamik iliuuseqartarpoq Guutimut assuarnaakkunnaarsinniarluta. Taamaattumik nukillaaqqunata uniinnaqqunatalu anersaakkut qanoq nakussatsinneqarsinnaavugut?

5. Sooq kristumiutut kiffartuuterput nammineerluta naammassisinnaanngilarput?

⁵ Anersaakkut nakussatsinneqassagutta Jehova, Pinngortitsisoq ajugaqanngitsoq tatigisariaqarparput. Apustili Paulusip eqqartorpaa kristumiutut kiffartussagunik inuit naammalluinnanngitsut pissusissaq akimorlugu pissaaneqartariaqartut. Ima allappoq: „Pequulli tamanna puuguttani marraasuniitillugu pigaarput, pissaaneq pissusissaq akimorlugu uatsinnit pinnagu Guutimut pigeqqullugu.“ (2 Korintumiut 4:7, NV) Kristumiut tanitaasut ’saammaannartitaanerup pianik kiffartuuteqarput’ kiffartoqatitik nunarsuarmi inuunissamik neriugisallit ilagalugit. (2 Korintumiut 5:18; Juánase 10:16; sarĸúmersitat 7:9) Guutip suliassiisutaanik suliaqaraangatta inuttut naammalluinnanngitsutut malersorneqartaratta nammineerluta saperpugut. Jehovap anersaaminik illernartumik ikiortarpaatigut, taamaattumillu sanngiissutsitta taassuma pissaanera ersersinnerusarpaa. Qularunnaarsinneqarattalu ’Jehovap iluartut najummissagai’ tuppallersarneqaatigeqaarput! — Tussiaat 37:17.

’Jehova pissassaatigaara’

6. Jehovap nakussatsitsisinnaaneranik Biibilip qanoq neriorsoqqissaarpaatigut?

⁶ Ataatarput qilammiusoq ’pissaaneqangaarpoq’, ajornanngitsumillu nakussatsissinnaavaatigut. Ima paasitinneqarpugut: „Qasusoq nakussatsittarpaa, nukillaangasoq pissatsittarpaa. Inuusuttut qasulersaraluarput nukillaalersarlutillu, inuutsaruttortut allaat naakkiuttarput. Kisianni [Jehovamik] neriuffiginnittut nukineqqissapput, sulunissapput nattoralittut. Arpassapput nukillaarnatik, ingerlassapput qasussanatik.“ (Jesaja 40:29-31) Tatineqarnerujartoratta immaqa ilaannikkut arpattutut nukillaartutut artorsartutut misigisinnaavugut. Inuunermulli arpannermi apuuffissarput siuneralaannguatsinniimmat uniinnassanngilagut. (2 Israelikkut 29:11) Akerarput Diaavulu ’liivertut uiannisaartutut’ angalasarpoq unitsinniarluta. (1 Pîtruse 5:8) Eqqaamatigu ’Jehova nakuussutigigipput eqqortinnaveeqqutigalugulu’, taassumalu qasusut nakussatsinniarlugit assigiinngitsorpassuarnik isumagisaraatigut. — Tussiaat 28:7.

7, 8. Jehovap Davidimik, Habakkukimik Paulusimillu nakussatsitsisimaneranut sunik uppernarsaatissaqarpa?

 ⁷ Jehovap David nakussatsissimavaa akornutissaqangaaraluarluni aalajaannissaanut. Taamaattumik tatiginnilluni upperluarlunilu David ima allappoq: „Guutip ilagippatigut ajugaassaagut, akeqqavut tummaarissavai!“ (Tussiaat 60:14) Jehovap aamma Habakkuk nukissaqartippaa pruffiititut suliassaminik naammassinninnissaanut. Habakkuk 3:19-imi allassimavoq: „Guuti [Jehovaasoq] pissassaatigaara, isikkakka oqilasuunngortippai kulavaap isigaasut qattunernilu angalaartillunga.“ Aamma Paulusip maligissiaa maluginiarnarpoq, taanna allammat: ’Tamaasa [Guutikkut] pissatsitsisikkut sapinngilakka.’ — Filípimiut 4:13.

⁸ Daviditut, Habakkukitut Paulusitullu Guutip uatsinnik nakussatsitsisinnaanera annaassisinnaaneralu upperisariaqarparput. Naalagaq kisimi oqartussaasoq Jehova ’pissaaneqangaartoq’ nalunnginnatsigu, maanna misissoriartigit Guutip periarfissiissuterpassui anersaakkut nakussatsissutigisinnaasavut.

Anersaakkut nakussatsinneqarnissatsinnut pilersinneqartut

9. Kristumiut atuagassiaataat nakussatsinneqarnissatsinnut qanoq pingaaruteqartigaat?

⁹ Biibili Biibililersaarutillu kristumiut saqqummersitaat atuaqqissaartarutsigik nakussatsinneqarsinnaallutalu napatinneqarsinnaavugut. Tussiaasiortoq ima erinarsorpoq: „Pilluarpoq . . . [Jehovap] inatsisaanik nuannarisaqartoq inatsisaalu eqqarsaatigalugit ullukkullu unnuakkullu. Taassuma assigaa orpik kuunnguup killingani ikkunneqarsimasoq inerititaqarfissamigut inerititaqartartoq toqujuitsunillu pilutaqarluni. Qanoq iliornermini tamani iluatsitsisaraaq.“ (Tussiaat 1:1-3) Soorlu timikkut nukittujuarniarluta nerisariaqartugut Guutip oqaatsini kristumiullu atuagassiaataat aqqutigalugit anersaakkut inuussutissatut tunniuttagai nerisariaqarpavut. Taamaattumik siunertaqarluartumik atuaqqissaarneq eqqarsaatiginneqqissaarnerlu immikkut pingaaruteqarput.

10. Qaqugukkut atuaqqissaarnermut eqqarsaatiginneqqissaarnermullu piffissaqarsinnaavugut?

¹⁰ ’Guutip itissusiisa’ eqqarsaatiginerat iluaqutaasorujussuuvoq. (1 Korintumiut 2:10) Qanorli eqqarsaatiginneqqissaarnermut piffissaqarsinnaavugut? Abrahamip ernera Isak ’unnulernerani narsaammi angalaarpoq’ isumaliorniarluni. (1 Moses 24:63-67, aamma takuuk nutsigaq nutaanngitsoq.) Tussiaasiortup Davidip Guuti ’unnuap ingerlanerani eqqarsaatigeqqissaarpaa’. (Tussiaat 63:7) Ullaakkut, unnukkut unnuakkulluunniit — aap, sukkulluunniit — Guutip oqaasia atuaqqissaarlugulu eqqarsaatigeqqissaarsinnaavarput. Atuaqqissaarnerup eqqarsaatiginneqqissaarnerullu saniatigut aamma allamik Jehovap anersaakkut nakussatsissinnaavaatigut — tassa qinunitsigut.

11. Sooq aalajangersimasumik qinusarneq pingaaruteqartittariaqarparput?

¹¹ Aalajangersimasumik Guutimut qinugaangatta nakussatsinneqartarpugut. Taamaattumik ’qasusuilluta qinusariaqarpugut’. (Rûmamiut 12:12) Ilaannikkut misilinneqarneq aalajangersimasoq sapissanngikkutsigu ilisimassuseq nakuussuserlu qinnutigisariaqarpavut. (Jâko 1:5-8) Guutillu siunertaasa naammassineqarnerat isigigaangatsigu imaluunniit kiffartornitsinnut nakussatsinneqaraangatta qutsavigalugulu unnersiutigisariaqarparput. (Filípimiut 4:6, 7) Jehova qinunikkut qanittumik attaveqarfigiuarutsigu qimanngissaannassavaatigut. „Takuat,“ David erinarsorpoq. „Guuti ikiortigaara.“ — Tussiaat 54:6.

12. Sooq Guuti anersaavanik illernartumik qinnuigisariaqarparput?

¹² Ataatatta qilammiusup nakussatsittarpaatigut  anersaani illernartoq, imaluunniit pissaanini sulissutiginnittoq, atorlugu. Paulus allappoq: ’Tamanna pissutigalugu Ataataq seeqqumiarfigaara . . . naalannangaarsutsi missiliorlugu inuutsissigut ilorlikkut anersaamigut assut nukittorteqqullusi.’ (Evfisumiut 3:14-16) Anersaaq illernartoq qinnutigisariaqarparput tatigalugu Jehovap tamatuminnga pilluaqqussagaatigut. Jesus ima nassuiaavoq: Meeraq aalisakkamik qinnuteqaraangat ataatap asannittup pulateriaarsummik tunissanerpaa? Soorunami naamik! Taamaattumik ima isummerpoq: ’Taava ilissi naak ajortusi qitornasi tunissutinik ajunngitsunik tunisinnaagussigik, annerusumik Ataatap qilammiusup imminit qinusut anersaamik illernartumik tunissannginnerpai!’ (Lúkarse 11:11-13) Taassumatut tatiginnilluta eqqaamajuartigu Guutip kiffai aalajaatsut anersaava ikiortigalugu nakussatsinneqarsinnaasut.

Ilagiit nakuussutaapputtaaq

13. Kristumiut ataatsimiinneri qanoq isigisariaqarpavut?

¹³ Kristumiut ilagiivisa ataatsimiinneri aqqutigalugit Jehovap nakussatsittarpaatigut. Jesus oqarpoq: ’Marlummi pingasulluunniit atera tunaaralugu katisimasaraangata akornanniittaraanga.’ (Matîuse 18:20) Jesus taama neriorsuigami ilagiinni siuttuusut sammisariaqagaat eqqartorpai. (Matîuse 18:15-19) Kisianni oqaasii ataatsimiinnitsinnut ataatsimeersuarnitsinnullu tamanut, Jesusip aqqa tunaaralugu qinnutinik aallarnerneqartartunut naggaserneqartartunullu, atuupput. (Juánase 14:14) Taamaattumik ataatsimiinnernut taamaattunut najuunneq, ikittunik tusindilinnilluunniit najuuttoqaraluarpat, immikkut pisinnaatitaaffiuvoq. Tamanna pillugu ataatsimiinnerit taakku, anersaakkut nakussatsinneqarnissatsinnik, asaqatigiinnissatsinnik ajunngitsuliornissatsinnillu siunertaqartut, qujamasuutigisariaqarpavut. — Eprîarit 10:24, 25.

14. Kristumiut utoqqaanertat suliaat qanoq iluaqutigisarpavut?

¹⁴ Kristumiut utoqqaanertat anersaakkut ikiortarluta kajumissaartarpaatigut. (1 Pîtruse 5:2, 3) Paulusip ilagiit nakkutigisani ikiortarpai kajumissaartarlugillu, soorluttaaq ullumikkut nakkutilliisut angalasartut taamaaliortartut. Aap, uppeqatimi ilaginissaat erinigeqaa nammineq taakkulu kajumissaaqatigiiniassagamik. (apustilit suliait 14:19-22; Rûmamiut 1:11, 12) Ilagiitsinni utoqqaanertat nakkutilliisullu allat anersaakkut nakussatsinniarluta iliuuseqangaartartut pingaartittuartigik.

15. Uppeqativut ilagiitsinniittut qanoq ’tuppalliutaalluarsinnaappat’?

¹⁵ Uppeqativut ilagiitsinniittut uatsinnut ’tuppalliutaalluarsinnaapput’. (Kulorsamiut 4.10, 11) ’Ikinngutaasup asannittup’ annikillioraangatta ikiorsinnaavaatigut. (Ussatit 17:17) Assersuutigalugu Guutip kiffai 220-t nazistinit nakkutigineqarfimminnit tigusanut inissiarsuarmit Sachsenhausenimit  iperarneqaramik 200 kilometeringajaat angalasussanngorsimavaat. Ataatsimoorput nukitunerusullu sanngiitsut qamuteeqqanik assakaasulinnik uniarpaat. Qanoq kinguneqarpa? Toqu tikillugu angalanermi tigusat inissiarsuanneersut 10.000-t sinnerlugit toqugaluartut, kisianni Jehovap Nalunaajaasuanik ataatsimilluunniit toqusoqanngilaq. Misilittakkat taamaattut Napasuliaq Alapernaarsuiffiup naqitertitaani, soorlu Jehovas Vidners Årbog-imi imaluunniit Jehovas Vidner — forkyndere af Guds rige-mi, saqqummersinneqartartut uppernarsaataapput Guuti innuttami nikallujuinissaannut nukissaqartitsisartoq. — Galâsiamiut 6:9. *

Oqaluussinermit nakussatsinneqartarpugut

16. Aalajangersimasumik oqaluusseqataanerup qanoq anersaakkut nakussatsissavaatigut?

¹⁶ Naalagaaffimmik oqaluussissutiginninnermut aalajangersimasumik peqataasarutta aamma anersaakkut nakussatsissutigissavarput. Sulinerup tamatuma Guutip naalagaaffiata sammiuarnissaannut pilluaqqussutissallu eqqarsaatitsinniitinnissaannut ikiortarpaatigut. (Jûtarse 20, 21) Neriorsuutit Biibilimeersut oqaluussinermi eqqartortakkatta neriuuteqartippaatigut aalajangerluinnartissinnaallutalu, pruffiititut Mikatut taanna oqarmat: „Uagut ingerlajumaarpugut Jehovap Guutitta aqqa tunaaralugu soraajuilluta, naassaanngitsumik allaat.“ — Mika 4:5, NV.

17. Biibilimik atuaqqissaaqateqarnerit eqqarsaatigalugit sumik siunnersorneqarpugut?

¹⁷ Jehovamut attaveqarnerput nakussatsinneqassaaq allanik ajoqersuigaangatta Biibili atortarutsigu. Assersuutigalugu atuagaq Ilisarsineq inuunermut naassaanngitsumut sammisoq atorlugu Biibilimik atuaqqissaaqateqaraangatta silatusaarnerussaaq allassimaffiit issuarneqartut ilaat atuarlugillu oqaloqatigiissutigisarutsigik. Tamanna ilinniartup iluaqutigissavaa uagullu anersaakkut paasisaqarnerusarpugut. Ilinniartup assersuut imaluunniit eqqarsaat Biibilimeersoq paasiuminaatsippagu atuakkami ’Ilisarsineq’-mi kapitali ataaseq arlaleriarlugu atuaqqissaaqatigiissutigineqarsinnaavoq. Piareersarluarnitsigut immikkut suliniuteqarnitsigut allat Guutimut qaninnerulersissinnaagaangatsigik nuannaarutigaarput!

18. Atuakkap ’Ilisarsinerup’ sunniuteqarluartumik atorneqarneranik assersuummik taasaqarit.

¹⁸ Ukiut tamaasa atuagaq ’Ilisarsineq’ atorneqartarpoq inuit tusindilikkuutaat Jehovamut kiffatut tunniulluinnarnissaannut, taakkunannga amerlanerit Biibilimik ilisimasaqarsimanngikkaluarput. Assersuutigalugu Sri Lankami angutip hindusiortup meeraalluni tusarpaa nalunaajaasoq arnaq paratiisi pillugu oqaluttuartoq. Ukiut arlallit tamatuma kingorna nalunaajaasoq ornippaa, sivitsunngitsorlu nalunaajaasup uiata angut Biibilimik atuaqqissaaqatigilerpaa. Aap, angut inuusuttoq ullut tamaasa atuaqqissaarniarluni aggertarpoq, sivitsunngitsorlu atuagaq ’Ilisarsineq’ naallugu. Ataatsimiinnerit tamaasa najuuffigisalerpai upperisarsiornerlu attavigisani attavigiunnaarlugu, Guutillu naalagaaffianik oqaluussisartunngorluni. Kuisikkami ilisarisimasaminik Biibilimik atuaqqissaaqateqalereerpoq.

19. Guutip naalagaaffia siulliukkutsigu suna qularissanngilarput?

¹⁹ Guutip naalagaafia siulliukkutsigu uatsinnik nakussatsitsisumik nuannaalissaagut. (Matîuse 6:33) Naak misilinneqarnerit assigiinngitsut atortaraluarlugit nuannaarneq tamanna pigiinnartarparput ilungersuussillutalu nutaarsiassaq nuannersoq oqaluussissutigiuarparput.  (Títuse 2:14) Ilarpassuagut tamakkiisumik kiffartornermut periarfissaqartarput, ilaallu oqaluussisartunik pisariaqartitsiffiunerpaani kiffartortarput. Qanoq pisoqassagaluarpalluunniit Guutip naalagaaffiata soqutigisai nuannaarluta siuarsarniarpavut, tatigilluinnarparput Jehovap sulinerput aqqanullu asanninnerput piugussanngikkai. — Eprîarit 6:10-12.

Jehovamit nakussatsinneqarlutit ingerlagit

20. Jehovap nakussatsittaraatigut tatigigipput qanoq takutissinnaavarput?

²⁰ Tamatigut takutinniartigu Jehova neriuffigigipput taannalu nakussatsinneqarnissatsinnut tatigalugu. Taamaaliorsinnaavugut ’kiffaq ilumoortoq’ aqqutigalugu anersaakkut pilersitai iluaqutigilluarlugit. (Matîuse 24:45) Nammineq ilagiillu peqatigalugit Biibililersaarutit atorlugit Guutip oqaasianik atuaqqissaarneq, ilumoorullugu qinuneq, utoqqaanertat anersaakkut ikiuinerat, uppeqatit aalajaatsut maligassiuilluarnerat oqaluussinermullu aalajangersimasumik peqataasarneq — tamakku tamarmik Jehovamut attaveqarnitsinnut nakussatsissutaapput taassumunngalu illernartumik kiffartornermut nukissaqalersittarluta.

21. Apustilit Peterip Paulusillu Guutimit nakussatsinneqarnissartik pisariaqartillugu qanoq ersersippaat?

²¹ Naak inuttut sanngiikkaluarluta Jehovap nakussatsissavaatigut ikiorsinnaagaatigut tatigigutsigu. Apustili Peterip ikiorneqarnissatta pisariaqarnera nalunngilaa allallunilu: ’Kiffartuussisoqaraangat Guutip nakussatsitsinera missiliorlugu pili.’ (1 Pîtruse 4:11) Paulusillu Guutip pissaanera tatigalugu takutippaa oqarami: ’Sanngiitsaraangama, asissorneqaraangama, ajorsaraangama, qinugineqaraangama, Kristus pissutigalugu qussalasaraangama tuppalleraraanga; sanngiitsaraangamami pissatsittaraanga.’ (2 Korintumiut 12:10) Qanortoq uagut taassumatut tatiginnitta Naalagarlu kisimi oqartussaasoq Jehova qasusumik nakussatsitsisartoq unnersiutigalugu. — Jesaja 12:2. (wE 1/12 2000)

[Quppernerup ataani ilanngussat]

Qanoq akissavit?

• Sooq Jehovap innuttai pissusissaq akimorlugu pissaaneqartariaqarpat?

• Biibilimi sumi uppernarsaatissaqarpa Guutip kiffani nakussatsittarai?

• Jehovap anersaakkut nakussatsinniarluta qanoq iliorpa?

• Jehovap nakussatsittaraatigut tatigigipput qanoq takutissinnaavarput?

[Atuaqqissaarnermi apeqqutit]

[Qupp. 11-mi assiliartaq]

Jehovamut attaveqarnerput nakussatsinneqartarpoq Biibili atorlugu allanik ajoqersuigaangatta