Qanoq ikinngutitaartoqarsinnaasoq

„Inuunermi ataatsimik ikinngutitaarneq imaannaanngeqaaq. marlunnik ikinngutitaaraanni amerlaqaat. Pingasulli ajornaveqaat.“ — Henry Brooks Adams.

OQAATSIT taakkua ersersinniarpaat ikinngutit ilumoortut qaqutigoortuusut. Inuit kiserliortut ikinngutissaaleqisullu oqarajupput: „Oqaloqatissaqanngilanga.“ „Tatigisaqanngilanga.“ „Qimmera ikinngutiginerpaavara.“

Ikinngutigiinnerup ineriartortinnissaa ataavartinnissaalu unamminiarnartuuvoq. Misissuinerup takutippaa „USA-mi innuttaasut inersimasut 25 procentii ’kiserliortuaannartuusut’, aamma . . . Frankrigimi innuttaasut affaat immikkuungaartutut misigipput.“ Attaveqatissarsiorfiit chattertarfiillu * amerliartupiloorneri attaveqatissarsiorlunilu allagarsiinerit amerliartuinnarneri inuit ikinngutissaaleqinerannut takussutissaapput.

Kiserliorneq inuup misigissusiinut sunniuteqaannanngilaq, kisianni aamma timaanut sunniuteqartoq, sianiutip nakorsaa dr. David Weeks oqarpoq. „Uannut nakorsiartartut amerlanersaat annilaanganermik sianiutiluttut isumatsassimasullu kiserliortutut taaneqarsinnaapput. Isumatsanneq kiserliornerlu malunnartumik imminnut attuumassuteqarput.“

Avinnerit ilaqutariillu avissaartuuttarnerat pissutigalugit amerliartuinnartut kisimiittussanngorput. Tuluit-Nunaanni misissuinerup takutippaa ukiut 2000-ikkut aallartinneranni innutaasut 30 procentii kisimiillutik najugaqartuusut.

Biibilimi siulittuutigineqarpoq ’ullussani kingullerni’ namminissarsiorneqangaassasoq. (2 Timûtiuse 3:1-5) Malunnarpoq amerlasuut suliffitsik imaluunniit pigisatik soqutiginerugaat ikinngutitaarnissaminninngarnit. Atuakkiortoq Anthony Storr maluginiagaqarsimavoq: „Inunnit amerlavallaartunit aapparmik meeqqamillu ilaginissaat qitiutinneqanngilaq, suliffitilli qitiutippaat.“

 IKINNGUTIT ILUMOORTUT NALISSAQANNGILLAT

Inuup inuunerata pitsaassusia ikinngutigiinnerup pitsaassusianut aalajangiisuulluinnarpoq. Inuit imminnuinnaq eqqarsaatigisut pilluannginnerugajupput iliuuseqaqatigisinnaasaminnik eqqarsaatiminnillu aveqatigisinnaasaminnik ikinnguteqannginnamik. Ilumoorpoq Jesus oqarmat: ’Tunisineq tigusinermit pilluarnarnerusoq.’ (apustilit suliait 20:35) Tuluup taalliortup George Byronip ima oqaatigaa: „Nuannaarusuttup allat aveqatigisariaqarpai.“

Oqaatsinik qinerlerfissiami oqaaseq ikinngut ima nassuiarneqarpoq: „Inuk ilaqutariit avataaneersoq nuannarisaasoq, tatiginartoq soqutigisaqatigisarlu.“ Ikinngut ilumoortoq isumalluarnartunik eqqarsalersitsisarpoq. Pisariaqartinneqaruni qiimmassaasinnaasoq kajumilersitsisinnaasorlu, immaqalu allaat aliasoqataajumalluni. Kunngi Salomon oqarpoq: „Ikinngutaasup asannissutsi tamatigut takutittarpaa, eqqarliusorlu erniusimavoq annikilliornermi ikiortissaalluni.“ (Ussatit 17:17) Pigisat nalikilliartortarput, ilumoortumilli ikinngutigiinneq piffissap ingerlanerani ineriartortarpoq nukittoriartortarlunilu.

Biibilimi kristumiut ’neruttoqqullugit’ kajumissaarneqarput, tassa allanik asannittumik isumaginnillutik. (2 Korintumiut 6:13) Allanut ammaneq inussiarnissaarnerlu ilisimassuseqarnermut ersiutaavoq. Nalunaajaasup oqaasii 11:1, 2-mi allassimavoq: „Karriutitit imaatigut nassiussukkit, taava immaqa kingunersuarileraluarpaguluunniit iluanaaruteqarfigiumaarpatit. Pigisatit inunnut amerlasuunut agguaatikkit nalunaqimmat ajunaarutissat suut nunarsuarmi matumani nalliuteratarsinnaanersut.“ Najoqqutassaq tamanna ikinngutigiinnermut qanoq tulluarami? Ikinngutigiinneq ineriartortissimagaanni imaassinnaavoq ikinngutit ilaat ajornartorsiulerfimmi ikiuiartortoq.

Ikinngutigiit ilumoortut aammattaaq allatut illersuutaasarput. „Ikinngutaalluartoq unataagaangami ajunngitsumik siunertaqartarpoq,“ Ussatit 27:6-mi allassimavoq. Kikkut tamarmik nersualaarisarput, ilumoortumilli ikinnguteqartariaqarpoq ikinngummi kukkunerinik eqqaasitsisartumik asannittumillu atoriaannaasumik ikiuiumasumik. — Ussatit 28:23.

Ikinngutaalluartut tunissutaapput qaqutigoortut isumalluarnartumut sunniisinnaasut. apustilit suliáinik agdlagkat kapitali 10-mi atuarparput Romamiut sakkutuuisa naalagaata Korneliusip inuunerani pisimasut. Inngilip nalunaarfigaa qinnutai tusarneqartut, Korneliusillu apustili Peterimik pulaarneqarnissani ilimagigamiuk ’eqqarlini ikinngutinnaanilu ataatsimut qaaqqusimavai.’ Tamatuma kingunerivaa Korneliusip ikinngutiginerpaasaasa kipineqanngitsut, Guutimik nalusunit nutaarsiassamik nuannersumik ilassinneqqaartunut ilaanerat anersaamillu illernartumik taninneqaqqaartunngornerat. Taamaalillutik Guutip naalagaaffiani Kristus kunngioqatigilertussanngorpaat. — apustilit suliait 10:24, 44.

 Qanorli ililluta ikinngutigiinneq ineriartortissinnaavarput? Biibilimi tamanna pillugu oqaaserpassuaqarpoq atoriaannaasunik arlalinnik siunnersuuteqartunik. (Ataani ungaluusamiittoq takuuk.)

SUMI IKINNGUTIGIILLUARNEQ INERIARTORTINNEQARSINNAASOQ

Kristumiut ilagiit ilumoortumik ikinngutigiinnermik ineriartortitsivigissallugit pitsaanerpaapput. Siulliullugu Jehova, Ataatarput qilammiusoq Pinngortitsisorpullu, taavalu Jesus Kristus, Annaassiserput ikinngutigilernissaannut periarfissaq atorluarneqarsinnaavoq. ’Asanninneq tamanit anneq tassa ikinngutini pillugit inuunini iperaraanni,’ oqarpoq Jesus, ikinngutigileqqulluni qaaqqusisoq. (Juánase 15:13, 15) Jehova Jesus Kristusilu ikinngutigilernerisigut ’ininut ittuinnartunut ilasiarissagaatigut’ qularnanngilaq. Jehovamik Jesusimillu ikinnguteqarneq tassaavoq inuuneq naassaanngitsoq. — Lúkarse 16:9; Juánase 17:3.

Taakkua qanimut qanoq ikinngutigineqarsinnaappat? Tussiaat 15 qupperutsigu versiilu tallimat atuarlugit Jehovap ikinngutaatut ’ineqarfiani najugassarsissagutta’ suut piumasaqaataanersut takusinnaassavarput. Jesusilu oqarpoq: ’Inassutikka malikkussigik ikinngutigissavassi.’ — Juánase 15:14.

Guutip oqaasiata, Biibilip peqqissaartumik atuaqqissaartarneratigut, tamatuminngalu aqunneqartilluni Jehovamik Jesusimillu ikinnguteqarumanermut takussutissaavoq. Taamatut ikinngutigiinneq anguniarlugu aamma kristumiut ataatsimiittarneri,  Guuti pillugu ilisarsiffissavut, najuuffigisariaqarpavut. Jehovap unnersuussutai eqqumaffigigutsigik taanna erneralu qaninnerulissavavut.

Ataatsimiinnerni aamma allat Jehovamik asannittut ilisarisimalissavavut inuunermilu anersaap inerititaanik ersersitsisut — asanninnermik, nuannaarnermik, eqqissinermik, kamajuinnermik inussiarnernermik ajunngitsuliornermik uppernermik saamanermik imminullu naalakkersinnaanermik. (Galâsiamiut 5:22, 23) Ilumoorlutit arlalinnik ikinngutitaarnissat kiserliornerpillu ajugaaffiginissaa soqutigigukkit Guutip innuttai peqatigalugit kristumiut ataatsimiinneri sapaatip-akunneri tamaasa najuuffigisariaqarpatit. Ataavartumik ikinngutigiinnermik ineriartortitsiffissatsialaapput.

IKINNGUTIGIITTUARNEQ

Ikinngutigiilluarnerit Jehova Guutimit tunissutaapput nuannersut. Jehovap pissusiinik takutitsisarput. Jehovap asanninnermigut tunisiumatunermigullu nunarsuaq pinngortitanik silassorissusilinnik inuttalerpaa, ikinngutigiilersinnaasunik. Kristumiut allat ilagisarnerisigut, taakkununnga qiimmassaataagutta, oqaluussinermi suleqatigiilluta, aalajangersimasumik qinoqatigisarnerisigut qinnuttarnerisigullu Jehova taassumalu ernera Jesus Kristus assigilersinnaavavut.

Ikinngutigiinnerup tunissutaaneranik ilassinninneq kikkunnut tamanut periarfissaavoq, ungasinngitsukkullu ikinngutitta amerlinissaannut periarfissaqalissaagut. Maannakkut inuusunik millionilippassuarnik ikinnguteqarneq ineriartortissinnaavarput, aamma siuaasavut sinippaartut nunarsuarmili ’toqu peqarunnaarpat’ makititaajumaartut. (sarĸúmersitat 21:4; Juánase 5:28, 29) Inussiarnisaartuugit ilassiortuugillu, Jehovamillu asannittunik ikinngutissarsiorlutit. Guutip oqaasianut isumassarsiarititaasunut tusarnaarnikkut allaat Jehova Guuti Jesus Kristusilu ikinngutigilersinnaavatit. Taava kiserlioqqinngisaannassaatit. (wE 1/12 2000)

[Qupp. 22, 23-mi ungalusaq/​assiliartat]

ATAAVARTUMIK IKINNGUTIGIINNISSAMUT ILIUUSISSAT ARFINILLIT

1. IKINNGUTAAGIT. Abraham ’Guutip asasaanik’ taaneqarpoq aalajaatsumik uppernini pissutigalugu. (Jâko 2:23) Tamannaannaanngilarli. Abrahamip aamma Guutimut asanninnini takutippaa. (2 Israelikkut 20:7) Nammineq iliuuseqarluni misigissutsini Jehovamut oqaluttuarai. (1 Moses 18:​20-33) Aap, ikinngutaagaanni siulliulluni iliuuseqartariaqarpoq. Jesus oqarpoq: ’Tunisigitsi, taava ilississaaq tunineqassaasi.’ (Lúkarse 6:38) Oqaaseq qiimmaallannartoq imaluunniit ikiuineq ikinngutigiilluarlernermut aallarniutaasinnaavoq. Amerikamiu atuakkiortoq Ralph Waldo Emerson ima oqarsimavoq: „Ikinngutitaarnissamut periaasituaq tassaavoq nammineq ikinngutaaneq.“

2.IKINNGUTIGIINNEQ INERIARTORTINNIARLUGU PIFFISSAQARTARIT. Inuit amerlanersaasa ikinngutigiinnerup ajunngequtai atorluarniartarpaat. Pisariaqartumilli piffissalernissaminnut ulapippallaarput. Rûmamiut 12:​15, 16-​mi allat nuannaaqatigeqqullugit aliasoqatigeqqullugillu kajumissaarneqarpugut. Ima allassimavoq: ’Tipaatsuttut tipaatsoqatigisigik, qiasullu qiaqatigisigik. Ataasiusumik isumaliorfigeqatigiigitsi.’ Jesus Kristus ikinngutini piffissaqarfigisarpai, naak ulapikkaluarluni. (Mákorse 6:31-34) Eqqaamajuk ikinngutigiinneq naasutut imerterneqartariaqatutut immat sikkersinnaaniassammallu naggorissartariaqarluni — piffissaqarfigisariaqarlunilu.

3. ALLAT OQALUKKAANGATA TUSARNAARLUARTARIT. Tusarnaallaqqissut ikinngutitaarajunnerusarput. ’Inuk kinaluunniit tusarasuarluni pili oqalukkumaarnertullunilu,’ ajoqersugaq Jakob oqarpoq. (Jâko 1:19) Allat oqaloqatigigaangatsigit soqutigalugit misigitittariaqarpavut paasiniarlugulu qanoq innersut. Imminut pillutik oqalutsillugit. Siulliulluta ataqqisariaqarpavut. (Rûmamiut 12:10) Taava ilagiumassavaatigut. Akerlianik oqaloqatigiinnermi qalliuniartuaannaraanni imaluunniit imminuinnaq eqqartoqqajaaginnaraanni tusarnaarusuttussaaleqinassaaq imaluunniit misigissutsiminik pisariaqartitaminillu soqutiginnittussaaleqinarsissalluni.

4. ISUMAKKEERFIGINNITTUUGIT. Ilanni Jesusip Peter oqarfigaa isumakkerfiginninnissaminut piareersimajuaqqullugu, aap ’77-eriarluni allaat.’ (Matîuse 18:​21, 22) Ikinngutip ilumoortup kukkunerit annikitsut ilaginnaannapallattarpai. Tamanna immaqa assersuunneqarsinnaavoq paarnartornermut. Ilaasa paarnat neriumasanngilaat, kiguteeraqarmata. Paarnanilli mamarisallit kigutai malugineq ajorpaat. Ikinngutit ilumoortut ikinngummi pissusii ajunngitsut malugisarpai isumaalliornerilu annikitsut ilaginnaannartarlugit. Paulusip ima kajumissaarpaatigut: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi.’ (Kulorsamiut 3:13) Isumakkeerfiginninneq ilikkaraanni ikinngutit ikinngutigiinnarneqarsinnaapput.

5. ALLAT INUUNERAT ATAQQIUK. Kikkut tamarmik kisimiinnissartik pisariaqartittarpaat; aammattaaq ikinngutigisatta. Ussatit 25:17-imi silatuumik siunnersorneqarpugut: „Ikinngutivit illuanut iseriartukulavallaarniaqinak qatsuteqinammatit uumigilerlutillu.“ Taamaattumik ikinngutinnut pulaakulavallaarniaqinak pulaaraangakkillu sivisunaarniaqinak, ingasaassinalli. Pigalugit misiginaveerit, sinnganermik kinguneqarsinnaammat. Nammineq nuannarisatit assigiinngitsunullu isiginnittaatsitit eqqartoraangakkit siuneqassuseqartarit. Tamanna ikinngutigiinnissinnut nutaannguallaatassaaq pissarsinarnerussallunilu.

6. TUKKORTUUGIT. Tukkortuuneq ikinngutigiinnermut nukittorsaataasarpoq. Apustili Paulusip siunnersuutigaa ’tukkortuunissaq ikiuisarnissarlu’. (1 Timûtiuse 6:18) Assersuutigalugu allanik qiimmassaaqataaneq ajunngilluinnarpoq. (Ussatit 11:25) Ilumoorlutit nersualaarinissarnut qiimmassaanissarnullu tunuarsimaarniaqinak. Allat toqqissisimanissaannik ilumoorlutit soqutiginnikkuit orniginerussavaatsit. Eqqarsaatigiuk illit taakku qanoq iliorfigisinnaaneritit, taakkua ilinnut qanoq iliornissaat pingaarnerpaatinnagu.

[Quppernerup ataani ilanngussaq]