Qinuneq iluaqutaava?

INUIT tamangajammik inuunermi ilaani qinusariaqartutut misigisarput. Upperisarsiornerni tamangajanni ilungersortumik qinusoqartarpoq. Assersuutigalugu Buddhasiortut — ilaannikkut ullormut tusindileriarlutik — qinnuminnik uuminnga uteqattaarisarnerat nalinginnaavoq: „Amida Buddha tatigaara.“

Ajornartorsiutit inuiaat erloqissutigiuagaat eqqarsaatigalugit ima aperisoqartariaqarpoq: Inuit Guutimut qinugaangamik sumik angusaqassangasarpat? Qinnutit tamakku tamarmik iluaqutaappat?

Sooq inuit Guutimut qinusarpat?

Kangiamiorpassuit siuaasaminnut aamma shintosiortut taosiortullu guutiinut qinusarput. Ilaatigut taamaaliortarput soraarummeernermi angusinissaminnut ikiorneqarumallutik, katersugassaqarluarumallutik imaluunniit nappatinut sernissorneqarumallutik. Buddhasiortut neriuttarput taamaaliornermikkut qaammarsarneqarsinnaallutik. Hindusiortut guutit arnat angutillu nuannarisatik ilungersorlutik ilisimanermik, pigissaarnermik illersorneqarnermillu qinnuigisarpaat.

Katuullit ilaasa neriuutigaat inuiannut iluaqutaassasoq mattuffinni matoqqasuni mattuttutut inuugunik qinujuarlutillu. Katuullit millionilippassuit Mariamit ikiorneqarumallutik alanngaarlutik qinusarput, immaqa qinutillutik ujammit atorlugit. Kangiani amerlasuut assakaasut  aalajangersimasut qinunerminni atortarpaat. Naaggaartut Ataatarpuumi oqaatsit uteqattaartarpaat, immaqalu immineerlutik misigissutsitik Guutimut oqaatigisarlugit. Juuterpassuit sivisuumik angalasarput Jerusalemimi Qarmami Qiasarfimmi qinujumallutik neriuutigalugu naalaffik sananeqaqqikkumaartoq ukiullu nutaat eqqissineqarfiusut pigissaarfiusullu atuutilerumaartut.

Inuit millionilikkuutaat qinujuaraluartut innuttaaqatigiit piitsuussutsimik, imigassamik ikiaroornartumillu atornerluinermik, ilaqutariit avissaartuunnerannik, pinerluttuliornermik sorsunnermillu annertusiartuinnartumik ajornartorsiuteqarput. Imaassinnaava inuit taakku tamarmik eqqortumik qinunngitsut? Qinnutitsinnummi tusarnaartoqarpa?

Qinnutitsinnut tusarnaartoqarpa?

Qinnutit tusarneqanngikkunik iluaqutaavallaassanngillat. Qinunermik atuisut upperilluinnarpaat anersaat silarsuaanni takussaanngitsunit tusarnaarneqarlutik. Qinnutilli silaannaap maligaasai iluaqutigiinnarlugit apuunneq ajorput. Amerlasuut qularinngilaat qinusup eqqarsaataanik atuarsinnaasoqartoq. Kinaasinnaava?

Qaratsap ameraasaani neuronini milliardilikkuutaani eqqarsaatit qanoq pilersartut misissueqqissaartartut paasisinnaanngilaat. Soorunalimi qaratsamik pinngortitsisup eqqarsaativut paasisinnaavai. Tassaavoq Pinngortitsisoq, Jehova Guuti. (Tussiaat 83:19; sarĸúmersitat 4:11) Taanna kisimi qinnuigineqartariaqarpoq. Apeqqutaavorli: Qinnutit tamaasa tusarnaartarpai?

Qinnutit tamarmik tusarneqartarpat?

Kunngi David Israelitoqqami inuusoq Guutimut qinujuartarpoq. Guutimit isumassarsisitaalluni tussiaasiortarpoq ilaatigullu ima allalluni: „Illit tusartartutit qinnutitsinnik, . . . Inuit tamarmik ornissavaatsit.“ (Tussiaat 65:3) Oqaatsit tusindilippassuit arlaat sorliilluunniit atorlugit qinusoqaraluarpat Jehovap qinnutit paasisinnaavai. Inuup kialuunniit qarasaata paasissutissat taama amerlatigisut suliarisinnaanngilai, Guutilli akuerisaanik qinusut tamaasa soqutigai.

Jesus Kristusip qinunermik pingaartitsingaartup erseqqissarpaa Guutip qinnutit tamaasa iluarinngikkai. Malugiuk taamanikkut ileqquusoq qinnutinik alanngaarluni uteqattaarineq qanoq oqaatigigaa. ’Qinusaraangassi oqaatsisi Guutimik nalusutut amerlanaassanngilasi, taakku amerlasuunik oqaaseqaraangamik tusarneqassasorisarmata.’ (Matîuse 6:7) Ilimagisinnaanngilarput Jehovap qinnutit uummammit pisuunngitsut tusarnaassagai.

Ussatip Biibilimeersup paasitippaatigut sooq qinnutit tamaasaanngitsoq Guutip iluarigai: „Tusaajumanngitsup inatsisinillu maleruaajumanngitsup qinnutaa allaat maajunnartuuvoq.“ (Ussatit 28:9) Ussat alla imaappoq: „[Jehova] inunnit iluaatsunit ungaseqaaq, iluartulli qinnutaat tusartarpaa.“ (Ussatit 15:29) Ilaanni Judakkut siulersuisui ajortuliungaarmata Jehova ima nalunaarpoq: „Qinuniarlusi assasi isaakkaluarussigit isikka matussavakka, qanorluunniit qinutigigaluarussi tusassanngilassi assasi aammik ulikkaarmata.“ — Jesaja 1:1, 15.

Apustili Peterip qinnutit Guutimit iluarisaannginnerannut pissutaasinnaasoq alla eqqaavaa. Ima allappoq: ’Taamattaaq angutaasusi nuliasi silalimmik inooqatigisigik, pisattatut qajannarnerusutut iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ (1 Pîtruse 3:7) Uiusup ajoqersuummik tamatuminnga sumiginnaasup ilimagisinnaanngilaa qinnutini tusarneqassasut.

Tassa qinnutivut Guutimit tusarneqassappata naammassisariaqartumik piumaffigineqarpugut. Qinusulli amerlasuut Guutimit piumaffigineqarnertik soqutigerpianngilaat. Tamannalu pissutaavoq qinnutit amerlasuut ilarpassuisa silarsuarmik pitsaanerusumik kinguneqarsimannginnerannut.

Qinnutitta tusarneqarnissaannut Guutip suna piumasaraa? Akissut qinnutit pissutaanerannut attuumassuteqarpoq. Paaserusukkutsigu qinuneq iluaqutaanersoq paasisariaqarparput qinunerup suna siunertarineraa. Aap, sooq Jehovap qinunikkut imminut saaffiginnissinnaalersissimavaatigut?

[Suminngaanneernera]

G.P.O., Jerusalem