Aalajaagitsi iluarluinnarlusi qulanngilluinnarlusilu

’Taassuma assoruulluni qinnuttuinnarpaasi aalajaaqqullusi iluarluinnarlusi qulanngilluinnarlusilu Guutip peqqusaa tamaat eqqorlugu.’ — KULORSAMIUT 4:12.

1, 2. (a) Kristumiuunngitsut kristumiut siulliit pillugit suut malugaat? (b) Kulorsamiunut agdlagkat-ni Paulusip Epafrasillu qatanngutinik asannittumik isumassuinerat qanoq erseqqissarneqarpa?

JESUSIP ajoqersugai isumassoqatigiilluartarput. Terlullianip ukiuni 100-kkunni 200-kkunnilu inuusup iliarsunnut, piitsunut utoqqalisunullu isumassuisimanerat allaatigaa. Taamaalillutik kristumiut asaqatigiinnertik iliuutsimikkut takutittaramikku allanit ima oqaatigineqartarput: ’Ila, asaqatigiingaassusiat.’

² Kulorsamiunut agdlagkat-ni erseqqissarneqarpoq apustili Paulusip suleqataatalu Epafrasip qatanngutit Kolossæmiittut taama asannittumik isumassoraat. Paulusip allaffigai Epafrasip ’assoruulluni qinnuttuinnarai aalajaaqqullugit, iluarluinnaqqullugit qulanngilluinnaqqullugillu Guutip peqqusaa tamaat eqqorlugu’. Ukiumi 2001-imi Jehovap Nalunaajaasuisa Kulorsamiut 4:12-imit issuagaq manna ukiumut allassimaffittut atussavaat: ’Aalajaanniaritsi iluarluinnarlusi qulanngilluinnarlusilu Guutip peqqusaa tamaat eqqorlugu.’

3. Assigiinngitsut marluk suut Epafrasip qinnutigai?

³ Soorlu atuaripput Epafrasip siullermik qinnutigaa Kolossæmiut ’aalajaallutik iluarluinnaqqullugit’, aappassaanillu ’Guutip peqqusaa tamaat eqqorlugu qulanngilluinnaqqullugit’. Paasissutissat tamakku iluaqutissatsitut Biibilimut ilanngunneqarput. Taamaattumik imminut aperisariaqarpugut uagut qanoq aalajaalluta iluarluinnarsinnaanerluta qulanngilluinnarsinnaanerlutalu Guutip piumasaa tamaat eqqoqqullugu. Tamannalu sumik nassataqassava? Misissoriartigu.

’Aalajaalluta iluarluinnarniartariaqarpugut’

4. Kristumiut Kolossæmiittut sutigut ’iluarluinnartariaqarpat’?

⁴ Epafrasip kissaatigilluinnarpaa anersaakkut qatanngutini Kolossæmiittut ’aalajaallutik iluarluinnassasut’. Oqaaseq ’iluarluinnarlusi’-mik nutserneqartoq aamma inersimassutsimut naammalluarnermullu atorneqartarpoq. (Matîuse 19:21; Eprîarit 5:14; Jâko 1:4, 25) Jehovap Nalunaajaasuatut kuisinneq kristumiutut inersimalluartunngornermik isumaqartariaqanngilaq. Ilagiinnut Efesusimiittunut Kolossæp kitaaniittunut Paulus allappoq paarsisut ajoqersuisullu tamarmik ikiuisussaasut ’tamatta apuutserluta ataasiussusissamut, uppeqatigiilluta Guutillu erneranik ilisarseqatigiilluta, angut inersimasoq nallersimallugu, Kristusip tamakkigaasa angissusiat nallersimallugu’. Allakkamilu ilaanni allani Paulusip kristumiut kajumissaarpai ’silaqarsutsimikkut inersimasunngoqqullugit’. — Evfisumiut 4:8-13; 1 Korintumiut 14:20.

5. Iluarluinnalernissarput qanoq suliniutigisinnaavarput?

⁵ Kolossæmiittut ilaat suli anersaakkut inersimallualersimanngikkunik, tamanna sulissutigisariaqarpaat. Ullumikkut uagut eqqarsaatigaluta aamma taamaannginnerpa? Ukiorpassuit sivikitsumilluunniit kuisissimagaluarutta, silatuumik isumaqalersimanerput siuneqassutsikkullu inersimallualersimanermik ineriartortitsisimanerput nalorninaappat? Aalajangigassaqaraangatta Biibilip najoqqutassiai eqqarsaatigisarpavut? Guutimut ilagiinnullu tunngasut uatsinnut pingaaruteqarnerujartuinnarpat pingaaruteqannginnerulersimappalluunniit?  Iluarluinnalernissatsinnut suliniutissavut tamaasa maani sammisinnaanngilavut, assersuutilli marluk misissoqqissaariartigik.

6. Immaqa sutigut siumukarsinnaavugut Jehovatut naammalluinnarniarluta?

⁶ Takorlooriaruk alliartortilluta nunami allamiut naggueqatigiilluunniit inuiaqatigiilluunniit allat uumissornissaat imaluunniit paqumiginissaat ilikkaripput. Nalunngilarput Guuti kinaassusersiortuunngitsoq, uaguttaaq taamaattariaqanngilagut. (apustilit suliait 10:14, 15, 34, 35) Najukkatsinni ilagiinni ilageeqatigiilluunniit ilaanni taamaattoqarpoq, taamaattumik taakku ilagisarpavut. Qamanerpiarli annerusumik minnerusumilluunniit akuersunngittuarnerpavut pasillikujullugilluunniit? Taakkua ilaat kukkuppat ajuallatsilaarpatigulluunniit ajortunik pissuseqarneraqqajaassavavut? Taamaappat imminut aperisariaqarpugut: ’Guutip kinaassusersiunnginnera ilaarniarlugu iliuuseqarnerusinnaavunga?’

7. Allanut qanoq isiginnittaaseqartariaqarpa kristumiutut iluarluinnassagaanni?

⁷ Assersuut alla: Filípimiut 2:3 naapertorlugu ’saqitsaagajunnermit piunngitsumillu ataqqineqarumanermit pinnata, kisianni qanilaarluta ilavut immitsinnit annerutittariaqarpavut’. Tamatumuuna arlaatigut siuariarsimanerpugut? Tamatta nukittuffeqarlutalu sanngiiffeqarpugut. Allat sanngiiffii siornatigut maluginiarajussimagutsigik imaalisimavugut allat naammalluinnangajannissaat ilimagiunnaarlugu? (Jâko 3:2) Allat pitsaaqutaat malugisarpavut? Alapernaalluinnartarpavut? Qatanngut arnaq aalajangersimasoq uatsinnit naammagittarnerugunartoq akueraarput? Uppeqaterpulluunniit uatsinnit uppernerusoq? Qatanngulluunniit angut aalajangersimasoq uatsinnit ilinniartitsillaqqinnerusoq? Qatanngulluunniit arnaq uatsinnit imminut naalakkersinnaanerusoq? Immaqa kristumiut Kolossæmiittut ilaasa tamakku siumukarfigisariaqarpaat. Uaguttaaq taamaaliorpugut?

8, 9. (a) Epafrasip Kolossæmiut ’aalajaallutik iluarluinnarnissaat’ qinnutigimmagu qanoq paasisariaqarpa? (b) Kolossæmiut ’aalajaallutik iluarluinnarnissaat’ sumik nassataqassava?

⁸ Epafrasip Kolossæmiut ’aalajaallutik iluarluinnarnissaat’ qinnutigaa. Ima paasisariaqarpoq Guutimut qinusoq taakku siumukarnerujartortillutik kristumiutut iluarluinnartuaannassasut, inersimalluinnartuaannassasut inersimasuujuartuaannarlutillu.

⁹ Siumut ilisimareersinnaanngilarput kristumiunngortoq kristumiuuginnassanersoq, maannakkut qanorluunniit inerisimatigigaluarpat. Jesus oqarpoq Guutip ernerisa anersaajusut ilaata ’sallusuissut aalajangiutinngikkaa’. (Juánase 8:44) Paulusillu Korinthimiut  paasitippai itsaq ilaat piffissangaatsiami Jehovamut kiffartorsimagaluartut, kingusinnerusukkulli taamaatitsillutik. Qatanngutini tanitaasut ima mianersoqquai: ’Tamanna pillugu kinaluunniit qeqartuusorisoq mianersorli orloqqunani.’ (1 Korintumiut 10:12) Kolossæmiut ’aalajaallutik iluarluinnarnissaannik’ qinnutip ilungersunassusia tamatuma erseqqissarpaa. Iluarluinnalerunik inersimasunngorlutillu nikallujuittariaqarput nigornatillu, qasunatik tammarnatilluunniit. (Eprîarit 2:1; 3:12; 6:6; 10:39; 12:25) Aalajaattuarunik ’ullussami takusarneqarfissaminni’ ’aalajaallutik iluarluinnartutut’ naggataatigut akuerineqassapput. — 2 Korintumiut 5:10; 1 Pîtruse 2:12.

10, 11. (a) Epafrasip qinnutai qanoq ilinniarfigisinnaavavut? (b) Epafrasip qinnutigisai eqqarsaatigalugit tamatta immikkut qanoq aalajangertariaqarpugut?

¹⁰ Eqqartoreerparput allat atiisigut taallugit qinnunnissaat qanoq pingaaruteqartigisoq, Jehovalu qinnuigalugu immikkut erseqqissarlugu nakussatseqqullugit, tuppallersaqqullugit pilluaqqoqqullugillu anersaamillu illernartumik tuneqqullugit. Epafrasip Kolossæmiunut qinnutai taamaapput. Qinnutai Jehovamut qinnutigisinnaasatsinnut assersuutissaalluartutut isigisariaqarpavut. Nalunanngilaq nammineq ’aalajaalluta iluarluinnaqqulluta’ Jehova qinnuigisariaqaripput ikioqqulluta. Taamaaliortarpugut?

¹¹ Soormi Jehovamut qinulluta nammineq atukkavut eqqartussanngilavut eqqartorlugulu ’iluarluinnalernermut’, inersimalernermut inerilernermullu atatillugu qanoq siumukarsimatiginersugut? Ilungersorluta ikioqqulluta qinnuigisinnaavarput paasiteqqulluta suut eqqarsaatigalugit anersaakkut ineriartortariaqarnersugut. (Tussiaat 17:3; 139:23, 24) Qularnanngitsumik arlaatigut siumukarfissaqarpugut. Tamannali nikallussutigisariaqanngilarput. Tatiginnillutali Guutimut qinusa, immikkut erseqqissaavigalugu siumukarnissatsinnut ikioqqulluta. Qinunitsinnilu aalajaattuartariaqarpugut. Sooq tamatta immikkut aalajangernianngilagut sapaatip-akunnerani tulliuttumi ’aalajaalluta iluarluinnarnissarput’ qinnutiginiarlugu. Qinunikkut ukiumut allassimaffiup uatsinnut qanoq pingaaruteqarnera eqqarsaatigilluarutsigu pitsaassaaq. Nigoqqajaanerput, qasuleqqajaanerput Guutimulluunniit kiffartorumaaqqajaanerput qinnutsinni eqqartortariaqarpavut tammaqqajaanerillu akiornissaannut ikioqqulluta. — Evfisumiut 6:11, 13, 14, 18.

Qulanngilluinnarnissarput qinnutigisariaqarparput

12. Sooq Kolossæmiut ’qulanngilluinnarnissaat’ immikkut pingaaruteqarpa?

¹² Epafrasip aamma Kolossæmiut Guutip isaani naggataatigut akuerineqarnissaannut aalajangiisuusussaq alla qinnutigaa. Uatsinnullu aamma taama aalajangiisuutigaaq. Suna? Tassa uppeqatini aalajaallutik iluarluinnassasut ’qulanngilluinnarlutillu Guutip peqqusaa tamaat eqqorlugu’. Eqqarsaatit aserornartut ajoqersuutinut ilumoortunut eqqaanartut naammattoortarpaat. Assersuutigalugu ilaasa Kolossæmiut kimigiiserfigaat nalliuttorsuit nalliuttorsiutigeqqullugit iisinnginniarlutik immikkulluunniit nerisaqarlutik, juutinut qangali peqqussutigineqartunut assingusunik. Ajoqersuisooqqusersut inngilit, anersaat pissaaneqangaartut Inatsisit Mosesimut tunniunneqarneranni akunnermiliuttut, pillugit ajoqersuinerluutitik aallunneruaat. Qularnanngitsumik tatisinerujussuusimassaaq, isumaqatigiinngissutillu tamarmik paatsiveerunnarsimassallutik. — Galâsiamiut 3:19; Kulorsamiut 2:8, 16-18.

13. Kolossæmiut suna akuerisariaqarpaat, uagullu tamanna akuerigutsigu qanoq iluaqutigissavarput?

¹³ Paulusip ajoqersuinerluutit naqqissorpai Jesus Kristusip inissisimaffia erseqqissarlugu. ’Taamaattumik Kristus Jesus Naalagaq pigilerassiuk taassumani saqigitsi, taanna manngoqarfigalugu taassumanilu ineriartortinneqarlusi uppernikkullu aalajangerlusi, soorlu ajoqersorneqartusi.’ Aap, Kolossæmiut Kristusip Guutip siunertaani inissisimaffia pillugu qulanngilluinnartariaqarput imminnullu qanoq pingaaruteqartiginera paasisariaqarlugu. Uatsinnuttaaq taamaappoq. Paulusip nangilluni Kristus pillugu  allalluni tamanna itisilerneruaa: ’Taassumanimi Guutiussutsip tamarmiussusia iluunngarmi ineqarpoq timeqarluni; ilissilu taassumani siulersuisut naalakkersuisullu tamarmik niaqorisaanni tamakkerneqarpusi.’ — Kulorsamiut 2:6-10.

14. Suna pissutigalugu kristumiut Kolossæmiittut neriuutaat piviusuua?

¹⁴ Kolossæmiut anersaamik illernartumik taninneqarput. Qilammi inuunissamik immikkut neriuuteqarput, pissutissaqarluarlutillu neriuutip tamatuma aalajangiunnissaanut. (Kulorsamiut 1:5) Neriuutiminnik qularutiginninngilluinnarnissaat ’Guutip peqqussutigaa’. Arlaata neriuutip tamatuma tutsuiginarnera qularisariaqarpaa? Naamik. Ullumikkut Guutimit nunarsuarmi paratiisissami inuunissamik neriugisaqartut allatut isumaqarfigisariaqarpaat? Naamerluinnaq! Neriuut tatiginartoq tamanna nalunaatsumik ’Guutip peqqusaanut’ ilaavoq. ’Amerlangaartunut’ ’annikilliornartussamit angisuumit’ aniguiumaartunut ilaaniarlutit suliniuteqaruit, neriuutit qanoq piviusuutigaa? (sarĸúmersitat 7:9, 14) Tamanna pillugu ’qulanngilluinnarpit Guutip peqqusaa tamaat eqqorlugu’?

15. Paulusip ilaatigut neriuut sunut atassusippaa?

¹⁵ Oqaaseq ’neriuut’ kissaatigisamik eqqoriaanerinnaanngilaq takorluuinerinnaananiluunniit. Tamanna Paulusip siusinnerusukkut ilagiinnut Romamiittunut allagaanit paasinarsivoq. Assiginngiitsut imminnut attuumassutillit eqqartorpai. Malugiuk oqaaseq ’neriuut’ ataqatigiinni makkunani qanoq inissisimaffeqartoq: ’Naalliunnartut allaat usorsitsaatigaavut, ilisimagatta naalliulluni nikallujuitsunngornartartoq, nikallujuillunilu misiligaalluarnartartoq, misiligaalluarlunilu neriuttunngornartartoq, neriullunilu pakatsinassanngitsoq; Guutimmi asannissusia uummatitsinnut kuisaavoq anersaakkut illernartukkut uatsinnut tunniussaasukkut.’ — Rûmamiut 5:3-5.

16. Biibilip tusarliussaa paaseqqaaratsigu sumik neriuutissaqalerpugut?

¹⁶ Jehovap Nalunaajaasuisa Biibilip tusarliussaanik oqaluttuuteqqaarmatigut, immaqa tusarliussap ilaa aalajangersimasoq pingaartumik soqutigaarput, assersuutigalugu toqungasut makinnissarluunniit pillugit ajoqersuuteqarnerat. Amerlasuunut immikkut pingaaruteqarluinnarsimavoq Biibilip paratiisissami nunarsuarmiittumi naassaanngitsumik inuunissamik neriorsuutaanik ilisimannilerneq. Eqqaamaviuk tamanna tusaqqaarakku? Nappaataarunnissamik utoqqalisarunnaarnissamillu, suliatta kingunerisa iluaqutiginissaannik inuillu uumasullu eqqisseqatigiinnissaannik neriugisaqalerneq nuannerluinnarpoq. (Nalunaajaasup oqaasii 9:5, 10; Jesaja 65:17-25; Juánase 5:28, 29; sarĸúmersitat 21:3, 4) Tassaavoq neriuut tupinnarluinnartoq.

17, 18. (a) Paulusip nassuiaanermini oqaaseq ’neriunneq’ sumi eqqaavaa? (b) Neriuut Rûmamiut 5:4, 5-mi eqqartorneqartoq sumik ilisarnaateqarpa, uagullu taama ittumik neriuuteqarpugut?

¹⁷ Qularnanngitsumik arlaatigut assortorneqarsimassaagut malersorneqarsimassallutaluunniit. (Matîuse 10:34-39; 24:9) Aamma ukiuni kingullerni nunat ilaanni Jehovap Nalunaajaasui angerlarsimaffimminni ujajaaffigineqartarput qimaatitaasarlutilluunniit. Ilaat timimikkut ajoquserneqartarput, Biibililersaarutaatiminnik arsaarneqartarlutik imaluunniit tusagassiuutini mamarlerneqartarlutik. Qanorluunniit malersorneqaraluarluta Rûmamiut 5:3-mi allassimasutut naalliunnartunik atugaqaraluarluta nuannaarsinnaavugut, tamannalu ajunngitsumik kinguneqartarpoq. Paulusip allagaatulli naalliunneq nikallujuissutaasarpoq. Nikallujuinnerlu misiligaalluarnarpoq akuerineqassutaasarlunilu. Nalunngilarput eqqortuliorluta, tassami Guutip piumasaatut ilioratta, taamaattumillu taassumunnga akuerisaasutut misigisimalluinnarluta. Paulusip oqarneratut ’misiligaalluartutut’ misigaagut. Nangilluni allappoq ’misiligaalluarneq neriuttunngornartartoq’. Immaqa eqqumiilaarsorisinnaavarput Paulusip ’neriunneq’ aatsaat tamatumani eqqaammagu. Tamannami sioqquterujussuarlugu neriuutissaqalersimannginnerpugut, sallusuissut tusaqqaaratsiguli?

 ¹⁸ Soorunami Paulusip maani silarsuarmi naammalluinnartumi inuunissamik neriuuteqaqqaalernerput pinngilaa. Pingaaruteqarnerungaartoq, itinerusoq killinnarnerusorlu pivaa. Aalajaalluta nikallujuikkutta taamaattumillu Guutip akuerinninnera malugalugu neriuleqqaarnerput qajannaallisinneqarpoq. Uatsinnut neriuut tamanna piviusuunerulerpoq, tunngaveqarnerullerluni namminerisaanerulerlunilu. Neriuut nakussatsinneqarami tamanna nalunaannerulerpoq. Sianissuserput inuunerpullu tamaat sunnerluinnarsimavaa. ’Neriulluni pakatsinassanngilaq; Guutimmi asannissusia uummatitsinnut kuisaavoq anersaakkut illernartukkut uatsinnut tunniussaasukkut.’

19. Neriuut qinnutsinni qanoq pingaaruteqartigisariaqarpa?

 ¹⁹ Epafrasip ilungersorluni qinnutigaa qatanngutimi Kolossæmiittut ’qulanngilluinnarnissaat Guutip peqqusaa tamaat eqqorlugu’ siunerminniittut pingaartittuaannarsinnaaqqullugit qularinngilluinnaqqullugillu. Uaguttaaq Guutimut qinugaangatta aalajangersimasumik silarsuassami nutaami inuunissamik neriuuterput eqqaasariaqarparput. Jehovamut oqaatiginiartigu qanoq qilanaaritigigipput, piviusunngornissaalu qularinngivikkipput. Qulanngilluinnarnerput nakussatseqqullugu qinnuigisigu. Epafrasip Kolossæmiunik ’Guutip peqqusaa tamaat eqqorlugu qulanngilluinnarnissaannik’ qinnussinera sunik qinussanerluta najoqqutarisariaqarparput. Akuttunngitsumik taamaaliorta.

20. Ikittunnguit kristumiuujunnaarnerat sooq nikallussutigisariaqanngilarput?

²⁰ Eqqissiunnaartittariaqanngilaatigut kristumiut tamakkeratik ’aalajaallutik iluarluinnannginnerata’ qulanngilluinnannginneratalu. Ilaat immaqa upperunnaassapput, anguniagaqarunnaarlutik taamaatiinnarlutilluunniit. Allaat Jesusip qaniginerusaasa ilaat taamaappoq, tassa Judas apustilit ilaat. Taannali killuussisunngormat apustilit allat taamaatiinnarpat ilatsiinnalerpalluunniit? Naamik. Tussiaat 109:8 issuarlugu Peter oqarpoq Judas allamik taarserneqassasoq. Taartissaa apustilit toqqarpaat, Guutillu kiffai aalajaatsut oqaluussiuarput. (apustilit suliait 1:15-26) Aalajangerput aalajaattuarlutik iluarluinnassallutik qulanngilluinnassallutillu.

21, 22. Kikkut aalajaalluta iluarluinnarnerput qulanngilluinnarnerpullu malugissavaat?

²¹ Qularinngilluinnartariaqarparput aalajaalluta iluarluinnarnerput Guutillu piumasaa tamaat eqqorlugu qulanngilluinnarnerput maluginngitsoorneqassanngitsoq. Malugineqassallunilu pingaartinneqassaaq. Kikkunnit?

²² Qatanngutitta ilisarisimallutalu asagamisigut malugissavaat. Amerlanerit immaqa oqaatigissanngikkaluarpaat, kisianni Tásalûníkamiunut agdlagkat sujugdlît 1:2-6-imi allassimasutut sunniuteqassaaq: ’Guutimut tamassi qujassutigittuinnarpassi qinusaraangattalu eqqartortarlusi, kipisuitsumillu eqqaamasarparput uppernissigut qanoq sulisartusi asanninnissigullu qanoq assorortartusi, qanorlu nikallujuitsusi Naalakkatsinnut Jesus Kristusimut Guutip Ataatatta saani neriunnissigut, . . . iivangkiiliu pigisarput ilissinnut oqaasiinnaalluni pinngimmat, pissaallunili anersaakkullu illernartukkut pisarluni nakimajunnaarsitsilunilu; . . . Uatsinnillu Naalakkamillu malinnittunngorpusi.’ Kristumiut ilumoortut avatangiisivut taama qisuariassapput takugaangamitigut ’aalajaalluta iluarluinnartugut qulanngilluinnarlutalu guutip peqqusaa tamaat eqqorlugu’. — Kulorsamiut 1:23.

23. Ukiumi 2001-imi suna aalajangiuttariaqarparput?

²³ Aamma Ataatatta qilammiusup qularnanngivissumik nikallujuissuserput malugissavaa nuannaarutigalugulu. Sooq? ’Aalajaakkatta iluarluinnarluta qulanngilluinnaratta Guutip peqqusaa tamaat eqqorlugu’. Paulusip Kolossæmiut nersualaarpai ’Jehovami ileqqorisariaqartoq naapertorlugu tamatigut iluarisassaanik saqilluarmata’. (Kulorsamiut 1:10) Aap, inuit naammalluinnanngitsut Jehovamut iluarisaalluinnarsinnaapput. Ukiuni hundredelinni siullerni qatanngutivut Kolossæmiittut taamaapput. Ullumikkut kristumioqativut taamaapput. Uaguttaaq taamaassinnaavugut. Taamaattumik ukiumi aggersumi ulluinnarni qinnutitsinni iliuuserisatsinnilu tamani ’aalajaalluta iluarluinnarluta qulanngilluinnarlutalu Guutip peqqusaa tamaat eqqorlugu’ aalajangersimanerput takutitsigu. (wE 15/12 2000)

Makku eqqaamavigit?

• ’Aalajalluni iluarluinnarneq’ qanoq paasisariaqarpa?

• Inummut namminermut tunngasut suut qinunitsinni eqqartorsinnaavavut?

• Neriuut Rûmamiut 5:4, 5-imi eqqaaneqartoq qanoq immikkut ittuua?

• Allaaserisaq naapertorlugu 2001-imi suna anguniagarisariaqarparput?

[Atuaqqissaarnermi apeqqutit]

[Qupp. 21-mi assiliartaq]

Epafrasip qinnutigaa qatanngutini aalajaallutik iluarluinnaqqullugit qulanngilluinnaqqullugillu Kristus neriuutertillu eqqarsaatigalugit

[Qupp. 24-mi assiliartaq]

Allat millionilikkuutaat uatsitut tutsuiginartumik neriuuteqarput qulanngilluinnarlutillu