Allat Jehovami ileqqorisariaqartoq naapertorlugu saqilluarnissaannut ikiukkit

’Soraanngilagut qinnuttarlusi qinusarlutalu . . . [Jehovami] ileqqorisariaqartoq naapertorlugu tamatigut iluarisassaanik saqilluaqqullusi, ajunngitsulianillu tamanik kingunissioqqullusi.’ — KULORSAMIUT 1:9, 10.

1, 2. Ingammik qanoq iliorneq nuannaarnermik nalerisimaarnermillu kinguneqartarpa?

’NAASORISSAASUP nunaataani inissiami kalittakkami najugaqarpugut. Pilimanianngitsumik inuugatta inuit nutaarsiassamik nuannersumik oqaluussiffiginissaannut piffissaqarnerusarpugut. Arlaleriarluta allat Jehovamut tunniulluinnarnissaannut ikiorlugit immikkut pisinnaatitaaffigalugu pilluaqqussaangaartarpugut.’ — Aappariit Afrika Kujallermi piffissaq tamaat kiffartortut.

² Allanik ikiuinerup nuannaarnermik kinguneqartarneranut isumaqataassannginnerpit? Ilaasa aalajangersimasumik napparsimasunik, piitsunik kiserliortunilluunniit ikiuinertik nalerisimaarutigingaartarpaat. Kristumiullu ilumoortut qularinngivippaat allanik Jehova Guutimik Jesus Kristusimillu ilisarsinermik avitseqateqaraangamik pitsaanerpaamik ikiuisarlutik. Taamaaliornermikkuinnaq allat Jesusip utertitsissummik pilliutaanik akuersinissaannut, Guutimut ajunngitsumik attaveqaleriartornissaannut inuunermillu naassaanngitsumik neriuuteqalernissaannut ilinniartissinnaavaat. — apustilit suliait 3:19-21; 13:48.

3. Ingammik kikkut iliuuseqarfigisariaqarpavut?

³ Guutimulli kiffaareersut ’aqqutigeqqussamik’ malinnittut aamma ikiorneqartariaqarnerat eqqaamavarput? (apustilit suliait 19:9) Qularnanngilaq ikiorusuttuarivut, immaqali naluarput qanoq iliuuseqarfiginerusinnaanerlugit. Immaqa misigivugut pisinnaasatta ikiuisinnaanerput killileraa, taamaattumillu nalerisimaarnissarigaluarput angunngitsoorlugu. (apustilit suliait 20:35) Tamakku tamaasa eqqarsaatigalugit Biibilimi Kulorsamiunut agdlagkat ilinniutigisinnaavavut.

4. (a) Pissutsinik sunik atugaqarluni Paulusip Kolossæmiut allaffigai? (b) Epafras qanoq tamatumunnga anguniagaqarpa?

⁴ Apustili Paulusip kristumiut Kolossæmiittut allaffigigamigit Romami illumit aneqqusaanngilaq, uffa pulaartoqarsinnaagaluarluni. Ilimagisatsitullu Paulusip killilimmik kiffaanngissuseqarnini atorpaa Guutip naalagaaffia pillugu oqaluussilluni. (apustilit suliait 28:16-31) Kristumiut allat Paulus pulaarsinnaavaat, uppeqataasalu ilaasa sivisungaatsiartumik parnaarussaaqatigisimassagunarlugu. (Kulorsamiut 1:7, 8; 4:10) Pulaartut ilagaat iivangkiiliumik oqaluussisartoq ilungersortoq Epafras Frygiamiittumit Kolossæmeersoq, tassa Asiaaqqami (ullumikkut Tyrkiami) nuna qatsissoq Efesusip kangianiittoq. Epafrasip ilagiit Kolossæmiittut aallarneeqataaffigisimavai, ilagiillu eqqaaniittut Laodikæamiittut Hierapolisimiittullu kiffartuullugit suleluloortarluni. (Kulorsamiut 4:12, 13) Sooq Epafrasip Paulus Romamiittoq tikeraarpaa, Paulusillu qisuariarnera qanoq ilinniarfigisinnaavarput?

Kolossæmiut sunniuteqarluartumik ikiorneqarnerat

5. Sooq Paulusip Kolossæmiut allaffigai?

⁵ Paulus ilagiinni Kolossæmiittuni pissutsit pillugit siunersiorniarlugu Epafras ilungersuanartumik angalalluni Romaliarpoq. Kristumiut Kolossæmiittut  uppernerat, asanninnerat oqaluussisarnerallu pillugit nalunaaruteqarpoq. (Kulorsamiut 1:4-8) Aammali Kolossæmiut anersaakkut peqqissusiannut sunnerneqarnerit aserorsaasut pillugit isumakuluutini eqqartorsimassavai. Paulus isumassarsisitaalluni allappoq ajoqersuisooqqusersut ajoqersuutaat naqqissorlugit. Ingammik Jesus Kristusip immikkut pingaaruteqarnera sammivaa. * Paulusip ajoqersuutit Biibilimeersut ilaat tunngaviusut saqqummiunniaannarpai? Kolossæmiut allatigut qanoq ikiornerusinnaavai, uagullu allanik ikiuinissatsinnut sumik ilinniarfigisinnaavarput?

6. Kolossæmiunut allakkamini Paulusip suna ersersinniarpaa?

⁶ Allakkaminut aallarniutigalugu Paulusip ikiueriaaseq immaqa eqqarsaatigiuanngisarput nassuiarpaa. Ikiueriaaseq tamanna ungasissumiittunut allaat iluaqutaasinnaavoq, Paulus Epafrasilu Kolossæmit ungasimmata. Paulus ima neriorsueqqissaarpoq: ’Guuti Naalakkatta Jesusip Kristusip Ataataa qutsavigisaraarput qinnuttaraangassi.’ Aap, kristumiut Kolossæmiittut immikkut qinnunneqartarput. Paulus nangippoq: ’Tamanna pillugu uaguttaaq taamanili tusaqqaaratta soraanngilagut qinnuttarlusi qinusarlutalu peqqusaanik ilisarsisorsuanngoqqullusi tamanik ilisimalersillusi anersaallu piinik sianilersillusi.’ — Kulorsamiut 1:3, 9.

7, 8. Nammineq ilagiittullu qinnutitsinni kikkut qinnukkajuppavut?

⁷ Nalunngilarput Jehova ’tusartartoq qinnutinik’, taamaattumik qularutiginngilarput qinnutivut piumasaanut naapertuuttut tusarusussagai. (Tussiaat 65:3; 86:6; Ussatit 15:8, 29; 1 Juánase 5:14) Allalli qinnukkaangatsigik qanoq qinusarpugut?

⁸ Soorunami ’silarsuarmi qatanngutigisavut’ eqqarsaatigalugillu qinnuttarpavut. (1 Pîtruse 5:9) Imaluunniit Jehova saaffigisarparput kristumiut allallu ajunaarnersuarnit ajunaarnernilluunniit allanit eqqorneqartut eqqarsaatigalugit. Ukiuni hundredelinni siullerni kristumiut tusaramikku Judæami kaattoqartoq, ajoqersukkat eqqaamiuisa allat ikiuutinik nassitsinnagit qatanngutitik eqqugaasut qinnuteqattaaqqaarsimassavaat. (apustilit suliait 11:27-30) Ullumikkut kristumiut ataatsimiinnerini — najuuttut paasisinnaasaannik ’aammen’-eersinnaasaannillu — qatanngutigiit tamaasa imaluunniit qatanngutigiippassuit eqimattat qinnukkajuppavut. — 1 Korintumiut 14:16.

Qinugaangavit qinnutitit immikkut erseqqissartakkit

9, 10. (a) Assersuutit suut takutippaat allat immikkut ittumik qinnunnissaat naleqqulluartuusoq? (b) Paulus immikkut ittunik qinnutinik sunik qinnunneqarsimava?

⁹ Biibilimili aamma allanik immikkut erseqqissaalluni qinnussinernik assersuutissaqarpoq. Jesusip oqaasii Lúkarse 22:31, 32-mi isuarneqartut eqqarsaatigikkit. Ajoqersukkanit aqqanilinnit aalajaatsunit avatangerneqarpoq. Tamarmik piffissami aggersumi artornartulimmi Guutimit tapersersorneqartariaqarput, Jesusillu qinnuppai. (Juánase 17:9-14) Taamaattorli Jesusip Peter immikkut eqqaavaa, ajoqersugaq taanna immikkut qinnullugu. Assersuutissat allat: Elisap Guuti qinnuigaa angut aalajangersimasoq, kiffani, ikioqqullugu. (2 Kunngit 6:15-17) Apustili Johannesip Gajusip pilluartuunissaa peqqissuunissaalu qinnutigai. (3 Juánase 1, 2) Aamma qinnutini allani inuit amerlanngitsut qinnunneqarput. — Job 42:7, 8; Lúkarse 6:28; apustilit suliait 7:60; 1 Timûtiuse 2:1, 2.

¹⁰ Paulus allakkamini immikkut ittumik qinunissamut innersuussigajuppoq. Allaffigisani qinnuigai imminut suleqatiminillu qinnusseqqullugit. Kulorsamiut 4:2, 3-mi allassimavoq:  ’Qinusaritsi qasusuillusi eqqumaniarlusilu qujasarlusi; uaguttaarlu ilanngulluta qinnutsigut oqaatsit matuanik Guutimut matuiuteqqulluta, anngigisaq Kristusip pia qilersugaassutigisara oqaluutigeqqullugu.’ Eqqarsaatigikkittaaq assersuutit uku: Rûmamiut 15:30; 1 Tásalûníkamiut 5:25; 2 Tásalûníkamiut 3:1; Eprîarit 13:18.

11. Romamiitilluni Epafrasip kikkut qinnuppai?

¹¹ Aamma Paulusip Romami suleqataanut atatillugu taamaappoq. Paulus allappoq: ’Epafrasip nunaqqatissi Kristusip Jesusip kiffaata inuulluaqquaasi; taassuma assoruulluni qinnuttuinnarpaasi.’ (Kulorsamiut 4:12) Oqaaseq ’assoruulluni’ aamma ’tamaviaarluni’-mik nutserneqarsinnaavoq, soorlu itsaq unammersuarnerni eqaarsaartartut tamaviaartartut. Qatanngutigiilli pallorfiginnittut ilumoortut silarsuarmi tamarmiittut imaluunniit Asiaqqami tamarmiittut Epafrasip ilungersorluni qinnuppai? Paulusip paasitippaatigut Epafrasip pingaartumik Kolossæmiittut qinnukkai. Epafrasip taakkua atugaat nalunngilai. Taakkua ilaannaasa atii nalunngilavut, naluarpullu suut ajornartorsiutigigaat. Ajornartorsiutigisinnaasaasali ilaat takorlooriartigit. Inuusuttup Linusip isumaliutersuutit pingaarnerit isumaasa sunniinerat akiortariaqalersimagunarpaa, Rufusilu juutit ileqqulersuutaat kajungernartut unitsissimasani akiorsinnaassagunigit nakussatsinneqartariaqalersimagunarpoq. Uppinngitsumik ueqarami Persis meeqqani Naalakkami perorsarsinnaajumallugit qasusuittariaqarsimannginnerpa ilisimassuseqartariaqarsimannginnerpalu, Asynkritusilu toqussutissaminik nappaateqarami immikkut tuppallersarneqangaartariaqalersimannginnerpa? Aap, Epafrasip najukkamini ilagiinniittut ataasiaakkaat nalunngilai, qamannga pisumik qinnuppai nammineq Paulusillu kissaatigigamikku kristumiut tunniulluinnarsimasut taakku Jehovami ileqqorisariaqartoq naapertorlugu saqilluassasut.

12. Nammineq qinunitsinni qanoq immikkut erseqqissaanerusinnaavugut?

¹² Tamatumani allat qanoq ikiorneqarnissaannut maligassarput takusinnaaviuk? Eqqaaneqareersutut kristumiut ataatsimiinnerini qinnutigineqartut nalinginnaanerugajupput, najuuttut assigiinngeqimmata. Namminerli ilaqutariittulluunniit qinunermi immikkut erseqqissaalluni ajussanngeqaaq. Ilaannikkut Guutimut qinusaratta nakkutilliisut angalasartut imaluunniit anersaakkut paarsisut tamaasa pilluaqqoqqullugit siulersoqqullugillu, ilaannikkulli immikkut erseqqissaanerusariaqannginnerpugut? Assersuutigalugu sooq ilagiitsinnut nakkutilliisoq angalasartoq ilagiinnitsinnut imaluunniit ilagiit atuakkamik atuaqqissaaqatigiinneranni aqutsisoq atia taallugu qinnutissanngilarput? Filípimiut 2:25-28-mi aamma 1 Timûtiuse 5:23-mi takutinneqarpoq Paulusip Timoteusip Epafroditusillu peqqinnerat immikkut isumakuluutigigaa. Tamatumunnga assingusumik napparsimasut nalunngisatta atii taallugit soqutigigivut ersersissinnaavarput?

13. Assersuutigalugu suut nammineq qinunitsinni ilanngutissallugit naleqqussinnaappat?

¹³ Soorunami allat atugaannut susassarinngisatsinnut akuliuttariaqanngilagut, qinnutitsinnili ilisarisimasatta asasattalu soqutigilluinnarnerisa ersersinnerat naleqquppoq. (1 Timûtiuse 5:13; 1 Pîtruse 4:15) Qatanngut angut immaqa suliffissaaruppoq uagullu suliffittaartissinnaanngilarput. Atiali taallugu ajornartorsiutaa qinnutitsinni immikkut eqqaasinnaavarput. (Tussiaat 37:25;  Ussatit 10:3) Qatanngummik arnamik ’Naalakkamiinnaq’ aappanissalluni aalajangerami ueqarani meeraqaranilu utoqqalilersimasumik nalunngisaqarpugut? (1 Korintumiut 7:39) Nammineq Jehovamut sooq qinnutissanngilarput pilluaqqoqqullugu kiffartorneranilu aalajaattuarnissaanut ikioqqullugu? Immaqaluunniit utoqqaanertat marluk qatanngut unioqqutitsisimasoq ajoqersorsimavaat. Naleqqutissanngila taakku tamarmik akuttunngitsumik namminneq qinunerminni atia taassappassuk?

14. Qinnutit immikkut erseqqissakkat allanillu ikiuineq imminnut qanoq attuumassuteqarpat?

¹⁴ Nammineerluta qinnugaangatta ilisarisimasatta Jehovamit tapersersorneqarnermik, tuppallersarneqarnermik, ilisimassutsimik, anersaamik illernartumik tamatumaluunniit inerititaanik inerikkiartortitsinermik ikiorneqartariaqartut qinnunnissaannut periarfissarpassuaqarpugut. Ungasinneq atukkalluunniit allat pissutigalugit aningaasatigut toqqaannartumilluunniit ikiuisinnaanerput immaqa killeqarpoq. Qatanngutittali qinnuttarnerat puigortariaqanngilarput. Nalunngilarput Jehovami ileqqorisariaqartoq naapertorlugu saqerusuttut, taamaattumillu taama ingerlajuassagunik ikiortariaqarunarlutik. Ilaatigut qinnullugit ikiorsinnaavavut. — Tussiaat 18:3; 20:2, 3; 34:16; 46:2; 121:1-3.

Allanut nakussatsissutaasumik iliuuseqarit

15. Sooq Kulorsamiunut agdlagkat naggataat soqutigisariaqarparput?

¹⁵ Ilungersorluni immikkut erseqqissaalluni allanut qinnussinerinnaq naammanngilaq, ingammik qanigisat asasallu pineqaraangata. Kulorsamiunut agdlagkat-ni tamanna erseqqissarneqarpoq. Biibilimik nassuiaasartut amerlasuut isumaqarput Paulusip ajoqersuutit siunnersuutillu atoriaannaasut eqqaareerlugit nammineq inuulluaqqussilluni allakkani naaginnarai. (Kulorsamiut  4:7-18) Paasereerparpulli allakkat naaneri siunnersuutinik naleqangaartunik imaqartut, tamakkunanngalu suli ilinniagassaqarpugut.

16, 17. Qatanngutit Kulorsamiut 4:10, 11-mi eqqaaneqartut suut ilisarnaatigaat?

¹⁶ Paulus ima allappoq: ’Aristarkusip parnaarussaaqatima inuulluaqquaasi, Markusillu Barnabasip illuata, taanna pillugu peqqussutit tusarpasi (tikippasi ilassiniarsiuk), Jesusillu Justusimik taasap; tamassa kipineqartut ilagisaat, taakkuinnaat ilagalunga Guutip naalagaaffia sulissutigaat uannut tuppalliutaallutik.’ — Kulorsamiut 4:10, 11.

¹⁷ Uani Paulusip qatanngutit imminut immikkut pingaaruteqarsimasut eqqaavai. Allappoq kipineqartut ilagigaat, taamaattumik inunnguuseralugu juutiupput. Romami juuterpassuaqarpoq kipineqartunik, taakkua ilaat kristumiuupput. Taakkua Paulusip eqqaasaasa ikiorsimavaat. Taakkua kristumiut juutiunngitsunik nagguillit ilagisarnerat tunuarsimaarfigisarunanngilaat nuannaarlutilli Paulus ilagalugu juutiunngitsut oqaluussiffigisarlugit. — Rûmamiut 11:13; Galâsiamiut 1:16; 2:11-14.

18. Paulusip suleqatimi ilaat qanoq oqaatigai?

¹⁸ Malugiuk Paulusip ima oqaatigigai: ’Uannut tuppalliutaapput.’ Ny Verden-Oversættelsen naapertorlugu ima nutserneqarpoq: ’Taakku uannut nakussatsissutaapput.’ Oqaaseq griikerisooq Paulusip uani atugaa Biibilimi ataasiiaannarluni atorneqarpoq. Nutsikkani amerlasuuni ’tuppalliutaapput’-mik nutserneqarpoq. Griikerilli allamik nalinginnaanerusumik ’tuppallersaammut’ (paraʹklēsis) oqaaseqarput. Oqaaseq taanna oqaluullu assingusoq (parakaleʹō) Paulusip allakkani taakkunani atorpai, kisiannili kapitali 4, versi 11-mi atornagu. — Matîuse 5:4; apustilit suliait 4:36; 9:31; 2 Korintumiut 1:4; Kulorsamiut 2:2; 4:8.

19, 20. (a) Paulusip qatanngutit Romamiittut ikiortigisani pillugit oqaatigisaa qanoq paasisariaqarpa? (b) Qatanngutit taakkua qanoq Paulus ikiorsinnaasimavaat?

¹⁹ Qatanngutit Paulusip eqqaasai tuppallersaataasunik oqaaseqarnermit iliuuseqarnerugunarput. Oqaaseq griikerisooq Kulorsamiut 4:11-mi ’nakussatsissutaapput’-mik isumaqartoq allakkani Biibililersaarutaanngitsuni nakorsaammut nipaallisaataasumut  tunngatinneqartarpoq. Biibilimik nutsikkami New Life Version-imi ima nutserneqarpoq: „Ila iluaqutigeqaakka!“ Today’s English Version-imi ima nutserneqarpoq: „Uannut iluaqutaaqaat.“ Qatanngutit kristumiut taakku Paulusimut qanoq iliorsimanerpat?

²⁰ Naak Paulus pulaarneqarsinnaagaluarluni allanik assigiinngitsorpassuarnik iliuuseqarsinnaanngilaq, assersuutigalugu nerisassanik atisanillu pisariaqartunik pisiniarsinnaannginnami. Qanorlu ililluni allakkanik imussanik atuaqqissaarutissarsiva? Imaluunniit allannermut atortussat pisiariniarunigit? (2 Timûtiuse 4:13) Qatanngutit eqqaaneqartut Paulus ikiorsimassagunavippaat pisiniullugu kiffartuulluguluunniit. Immaqa aamma ilagiit aalajangersimasut tikeraarusuppai qanoq innersut takuniarlugit kajumissaarniarlugillu. Taamaaliorsinnaanngilarli, qatanngutillu taakkua immaqa sinnerlugu tikeraartarpaat, nalunaaruteqartarlutik kingornalu Paulus qanoq pisoqarneranik oqaluttuuttarlugu. Tamanna nakussatsissutigisimassaqaa.

21, 22. (a) Sooq Kulorsamiut 4:11-mi allassimasoq eqqaamasariaqarparput? (b) Paulusimik ilaginnittut iliuuserisimasaasa ilaannik ilaarsinnaasatsinnik taasaqarit.

²¹ Paulus oqaasiisa ’nakussatsissutaaqqulluta’ paasitippaatigut uagut qanoq allanut iliuuseqarsinnaanitsinnik. Qatanngutivut qularnanngitsumik Jehovami ileqqorisariaqartoq naapertorlugu saqilluartarput ileqqussatigut najoqqutassiai maleruartarlugit, kristumiut ataatsimiinneri najuuffigisarlugit oqaluussinermullu peqataasarlutik. Tamanna pillugu nersortariaqarpavut. Paulusilli suleqataatulli ’nakussatsissutaaneruniarluta’ iliuuseqarnerusinnaanerpugut?

²² Qatanngummik arnamik nalunngisaqarutta Korintumiunut agdlagkat sujugdlît 7:37-mi ajoqersuutigineqartumik maleruaagami ueqanngitsumik meeraqanngitsumillu, immaqa ilaqutariittut sammisartakkatta ilaannut peqataatissinnaavarput. Soormi ulloqeqqasioriartoqqussanngilarput nuannaarsaqatigiilaarnermulluunniit qaaqqullugu? Ataatsimeersuarnissamut biiliunnissaanik neqeroorfigisinnaavarput immaqaluunniit feeriaqatigeqqusinnaalluta? Ilaserisinnaalluguluunniit pisinialerutta? Soorunami aamma aappaqanngitsut allat imaluunniit angalaarneq sapingajalluinnartut iliuuseqarfigisinnaavavut. Immaqa pissarsinartunik misigisalikkersaarsinnaapput imaluunniit pisinialerutta siunnersuuteqarluarsinnaallutik. (3 Moses 19:32; Ussatit 16:31) Peqatigiinneq taama ittoq ikinngutigiilluarnermut ineriartortinneqarsinnaavoq taakkununngalu pisariaqartunik kiffartuunneqarnissaminnut assigisaannullu ikioqqunissaq ajornannginnerulersinnaalluni. Qatanngutit Romami Paulusimut ’nakussatsissutaasumik’ atortussatigut ikiuinerat ilaarsinnaavavut. Taamanikkutut asanninnerup nimia Jehovamillu aalajaalluta kiffartuusseqatigiinnissatsinnik aalajangernerput nakussatsissavaa.

23. Tamatta immikkut qanoq iliortariaqarpugut?

²³ Tamatta immikkut assersuutit allaaserisami matumani eqqaaneqartut eqqarsaatigeqqissaartariaqarpavut. Assersuutaannaapput, eqqaasissinnaavaatigulli qatanngutitsinnut qanoq ’nakussatsssutaanerusinnaanersugut’. Soorunami silinitsinni inuit atugarisaannik pitsanngorsaaniarnerinnaq kissaatiginngilluinnarparput. Qatanngutit Kulorsamiut 4:10, 11-mi eqqaaneqartut suliniutaasa ikiuiniarnerinnaq siunertarinngilaat. Taakkua Paulus ’ilagalugu Guutip naalagaaffia sulissutigaat’, aatsaalli taamaalillutik allat nakussatsissinnaavaat. Uaguttaaq taamaaliortariaqarpugut.

24. Suna siunertaralugu allat qinnuttarpavut nakussatsinniartarlugillu?

²⁴ Nammineq qinunitsinni allat atiisigut taasarpavut nakussatsinniarlugit isumaqaratta ’Jehovami ileqqorisariaqartoq naapertorlugu iluarisassaanik saqilluarusuttut’. (Kulorsamiut 1:10) Taanna Paulusip taasaanut Epafrasimut attuumassuteqarpoq, taassuma Kolossæmiut qinnummagit ’aalajaaqqullugit iluarluinnaqqullugit qulanngilluinnaqqullugillu Guutip peqqusaa tamaat eqqorlugu’. (Kulorsamiut 4:12) Tamatta immikkut qanoq taamaaliorsinnaavugut? Tamanna allaaserisami tulliuttumi sammissavarput. (wE 15/12 2000)

[Quppernerup ataani ilanngussaq]

Uku malugaagit?

• Nammineq qinunitsinni allanut qanoq iluaqutaanerusinnaavugut?

• Kristumiut ilaat Paulusimut qanoq ’nakussatsissutaalluarpat’?

• Pissutsini qanoq ittuni allanut ’nakussatsissutaalluarsinnaavugut’?

• Suna siunertaralugu allat qinnuttarpavut nakussatsinniartarlugillu?

[Atuaqqissaarnermi apeqqutit]

[Qupp. 18-mi assiliartaq]

Allat ilaqutariittut sammisaqarnitsinnut peqataaqqusinnaavavut?

[Suminngaanneernera]

Green Chimney’s Farmip akuersineratigut