Atuartartut apeqqutaat

Nuliaq kristumiuulluartoq uimi avinniarneranut qanoq akuersiumanngitsigissava?

Aappariinneq atulersinneqarmat Guuti oqarpoq angut arnarlu attavigiissasut. (1 Moses 2:18-24) Inuit nammalluinnanngitsuunerat pissutigalugu aappariippassuit ajornartorsiuterpassuaqarput; sulili Guutip piumasaraa aappariit aappariiginnassasut. Apustili Paulus allappoq: ’Aappallilli uanga pinnanga Naalakkap peqquai, uillup uini avissanngikkaa (avikkaluaruniulli ueqanngissinnarli, uiniluunniit saammarsaqqikkiliuk;) aamma nuliallup nulii qimassanngikkaa.’ — 1 Korintumiut 7:10, 11.

Tamanna allanneqarsimavoq inuit naammalluinnanngitsut akornanni aappariit ilaat aappaasup avikkumallerneratigut avittassasut nalunanngimmat. Paulus allappoq taama pisoqarpat, marluullutik ’aappaqanngiinnassasut’. Sooq? Taamatut avinnerup aappariinneq Guutip isaani atorunnaarsinngimmagu. Najoqqutassaq Jesusip kristumiunut aappariinnut aalajangigaa tunngavigalugu Paulus taama oqarsinnaasimavoq: ’Nuliaminik uersanngitsumik [grækerisut: porneiʹa] avittoq allamik nuliaruni arnaaneqarpoq, avitamillu nuliarlu arnaaneqarpoq.’ (Matîuse 19:9) Aap, Biibili malillugu avinnissamut tunngavissaasutuaavoq ’uersarneq’ tassa kinguaassiuutitigut kanngunartuliorneq. Pisimasumi Paulusip eqqartugaani arlaannaalluunniit allasiorsimagunanngilaq, tassa avikkumasoq uiugaluarpat nuliaagaluarpalluunniit, Guutip isaani suli aappariipput.

Tulliullugu Paulusip eqqartorpaa kristumiu uppinngitsumik avikkusuttumik aappalik. Taava tulliuttoq unnersuussutigineqarpoq: ’Uppinngitsorli avikkumaguni avikkili, qatanngut angulluunniit arnarluunniit taamaannissamigut pinngitsaalisaanngimmat; kisianni eqqisseqqulluta Guutip qaaqquaatigut.’ (1 Korintumiut 7:12-16) Nuliaalluartoq uimi uppinngitsup qimappani avinniarlugulu qanoq iliorsinnaava?

Immaqa avikkumassanngilaq. Imaassinnaavoq uini suli asagaa misigissutsikkut atoqatigiinnikkullu peqatigiittarnertik eqqarsaatigalugu. Immaqa aamma eqqarsaatigaa nammineq ukiukitsunillu meeraqarunik pigisatigut ikiorneqartariaqarluni. Immaqa allaat neriuutigaa piffissap ingerlanerani uini uppertunngussasoq annallunilu. Kisiannili Biibilimik tunngaveqanngitsumik avinnissamut iliuuseqarsimappat, soorlu Paulus allattoq ’avikkumappat avissinnaavaa’. Taamaapportaaq uiusup kristumiup Guutip aappariinnermut inatsisai malinngippagit avikkumallunilu.

Taamaattoqartillugu immaqa pisariaqassaaq nammineq meeqqallu inatsisitigut isumannarunnaarnissaat qulakkeeruniuk. Qularnanngilaq meeqqaminut angajoqqaatut oqartussaaginnarnissani kissaatigissagaa anaanamik pisariaqartitsinerat qularunnaarumallugu, najoqqutassanik ajunngitsunik ilinniartikkumallugit Biibilillu ajoqersuuta ajunngitsoq tunngavigalugu uppernermik tuniumallugit. (2 Timûtiuse 3:15) Avinnerup pisinnaatitaaffimmik tamatuminnga annaasaqarnera kingunerisinnaavaa. Taamaattumik immaqa aalajangerpoq inatsisitigut ikiortissarsiorniarluni meeqqami najuinnarnissaat uimilu ilaquttaminut qimalikkaminut pilersuisussatut akisussaaffilersinnissaa qulakkeerniarlugu. Nunat ilaanni arnap avikkumanngitsup, allakkat angajoqqaatut oqartussaassuseqaannarnissamik, uimilu avinniarneranut akuersinngikkaluarluni akilersuinissamik isumaqatigiissummik inatsisitigut piumasaqaatinik imallit atsiorsinnaavai. Sumiiffinni allani allakkat imatut oqaasertalerneqartarput arnaq atsiornermigut averusernissamut avinnissamulluunniit akuersisoq. Uini allasiorsimappat averusernissamut avinnissamulluunniit pappiaqqat nuliaasup atsiorpagit assigissagaa uini qimakkini.

Nunaqqatigiinni ilagiinnilu pisup annikitsualuttaanik ilisimasallit amerlanavianngillat. Assersuutigalugu avinneq Biibilimi tunngaveqarnersoq amerlasuut ilisimanavianngilaat. Taamaattumik taamaattoqartinnagu inassutiginassaaq nuliaasup (ajunnginnerussaaq allaganngorlugu) nakkutilliisoq siulittaasoq ilagiinnilu utoqqaanertaq alla qanorpiaq pisoqarsimaneranik ilisimatippagit. Pissutsit piviusut utoqqaanertat ilisimagunikkit taamaattoqarnerani kingusinnerusukkulluunniit qanoq pisoqarsimanera apeqquserneqalissagaluarpat qulakkeerneqassaaq.

Jesusip oqaaserisaa saaqqikkiartigu: ’Nuliaminit uersanngitsumik avittoq allamik nuliaruni arnaaneqarpoq.’ Angut allasiorsimappat nulianili najuinnarusullugu, nuliaasup — assersuummi Jesusip saqqummiussaani pisuunngitsup — isumakkeerfigissanerlugu aappariinnarlugulu ajattussanerluguluunniit  qinissavaa. Uini isumakkeerfigiumappagu inooqatigiinnarlugulu, ileqqorlunnerunngilaq. — Hosea 1:1-3; 3:1-3.

Uiusoq allasiorsimasoq avinniarpat, immaqa nuliaasoq isumakkeerfiginninnissaminut suli piareersimavoq, immaqalu neriuppoq uterfigissagaani. Nalunngeqatiginnissutini pissutsillu atukkani naapertorlugit aalajangissavaa avikkumanera itigartissanerlugu. Nunat ilaanni arnaq avikkusunngitsoq, angajoqqaatut oqartussaaqataanissaminik avinnissamullu akuersinngikkaluarluni akilersuinissamik isumaqatigiissummik allakkat atsiornissaannut periarfissaqarpoq. Allakkat atsiornissaat qineruniuk, isumaqanngilaq uini qimakkaa. Nunani allani nuliaasoq avikkusunngitsoq averuserumanngitsorluunniit piumaffigineqarsinnaavoq isumaqataanerminik allakkat ersersitsisut atsioqqullugit. Allakkat atsiorunigit paatsuugassaanngitsumik takutissavaa uini pisuusoq qimakkini.

Aamma taamaattoqartillugu inassutiginarpoq nuliaasup uppertup avinniarneqartup ilagiinni utoqqaanertat allakkanik qanoq pisoqalerneranik nassuiaasunik tunippagit oqaluttuaralugulu suut pissutaallutik taamatut pisoqarnersoq paatsoornissaagaluit pinngitsoorneqarsinnaapput. Ilisimatissinnaavai uini nalunaarfigisimallugu isumakkeerfigiumallugu taassumunngalu nuliaaginnarumalluni. Tamatumuuna ersersissavaa avinneq kissaatiginngikkini, namminerlu uini qimanniarnagu isumakkeerfiginissaanut suli piareersimalluni. Taamatut erseqqissareeruniuk uini isumakkeerfigiumallugu aappariinnerlu atatiinnarlugu, allakkanik taamaallaat aningaasaqarnermut angajoqqaatullu oqartussaaqataanissamut tunngassuteqartunut atsioruni, isumaqassanngilaq uini qimakkaa. *

Avinnerup kingorna nuliaasup uini isumakkerfigeriaannaallugu ersersikkuniuk, nammineq uialuunniit allamut kateqqissinnaanngilaq. Nuliaasup pisuussuteqanngitsup isumakkeerfiginninniarnera itigartinneqarpat, kingusinnerusukkulli uimi allasiornera pillugu qimanniarlugu aalajangerpat, marluullutik allamik aappaneqqissinnaapput. Jesusip paasitippaa aappaasoq pisuussuteqanngitsoq taamatut aalajangernissaminut pisinnaatitaasoq. — Matîuse 5:32; 19:9; Lúkarse 16:18. (wE 15/12 2000)

[Quppernerup ataani ilanngussaq]