Ikit sorsunnerup pilersitai mamissapput

ABRAHAM ukiuni 20-ni inuinnarnut naalagaaffimmut akiuunniartunut ilaasimavoq. * Sorsukkunnaarsimavorli sorsoqqikkumanngisaannassallunilu. Aap, siornatigut akerarisimasami ilaat maanna ikinngutinnaarai. Allannguisoq tassaavoq Biibili. Biibilip Abraham neriuuteqalersippaa paasisaqalersillugulu, pissutsinut Guutitut isiginnittaaseqalersillugu. Biibilip akiuukkusukkunnaarsippaa, aliasunneq, uumissuineq narrutsissimanerlu ajugaaffigalugit. Paasivaa Biibili uummammut nakorsaataasinnaasoq.

Qanoq ililluni Biibili misigissutsikkut ikinut nakorsaataasinnaava? Abrahamimut pisimasut Biibilip allanngortissinnaanngilai. Taamaattorli Guutip oqaasiata atuarneratigut eqqarsaatigeqqissaarneratigullu eqqarsaatai Pinngortitsisup pissutsinut isiginnittaasianut naleqquttunngortinneqarput. Maanna siunissamut neriuutissaqalerpoq inuunerminilu allanik pingaartitaqalerluni. Guutip pingaartitai maanna pingaartilerpai. Tamakkualu kingunerisaannik uummataani ikit mamikkiartulerput. Abrahamilu allanngornissaminut ikiorneqarpoq.

Innuttaasut imminnut sorsuunnerannut akuliunneq

Abraham 1930-kkunni Afrikami inunngorpoq. Sorsunnersuit Aappaata kingorna nuna inuuffigisaa nunamit eqqaaniittumit pissaaneqarnerusumit naalakkersorneqalerpoq, Abrahamilli nunaqqataasa ilarpassui namminersorusupput. 1961-imi kattuffimmut nunamit pissaaneqarnerusumit kiffaanngissuseqarnissamik sorsuutiginnittunut Abraham ilaasortanngorpoq.

„Akeraraavut. Toqunnissarput pilersaarutigisarpaat, taamaattumik toqunniarpavut,“ Abraham nassuiaavoq.

Abrahamip inuunini navianartorsiortikkajuppaa, taamaattumillu ukiuni 20-ni sakkuaatereerluni 1982-imi Europamut qimaavoq. Taamani 50-ingajannik ukioqarpoq maannalu piffissaqarluarami inuunini eqqarsaatigaa. Neriuutigisimasai piviusunngorsimappat? Siunissaq qanoq issava? Abrahamip Jehovap Nalunaajaasui naapippai ataatsimiigiartalerlunilu. Eqqaamavaa ukiualuit tamatuma siorna Afrikami naqitaaraq Nalunaajaasumit tigusimasani atuarsimallugu. Naqitaaqqami nunarsuarmi paratiisi piumaartussaq qilammilu naalagaaffik inuiannut naalakkersuisussaq allaatigineqarput. Tamannali ilumoorsinnaava?

 Abraham oqarpoq: „Biibilimit paasivara ukiorpassuit sorsuttarsimanikka asuliinnaasimasut. Naalagaaffik tamanut naapertuilluartuliortutuaq tassaavoq Guutip naalagaaffia.“

Abrahamip Jehovap Nalunaajaasuatut kuisinnerata kinguninngua angut Robertimik atilik Afrikamit Europamut illoqarfimmut Abrahamip najugaqarfigisaanut qimaavoq. Robertip Abrahamillu sorsunneq ataaseq peqataaffigisimavaat, akeraariillutilli. Robertip eqqarsaatigigajuppaa inuunerup sunarpiaq siunertarineraa. Uppertuuvoq Biibilimillu atuartarnermigut nalunngilaa Guutip aqqa tassaasoq Jehova. Nalunaajaasut Abrahamip ilagiivinniittut Robert Biibilimik paasisaqarnerulernissaanik ikiorniarlugu neqeroorfigimmasuk, akueriinnarpai.

Robert nassuiaavoq: „Aallaqqaataaniilli Nalunaajaasut Jehovap Jesusillu immikkut kinaassusilittut aqqinik atuinerat pingaartippara. Tamanna Biibilimi atuariikkannut naapertuuppoq. Maluginiakkama ilaat alla tassaavoq Nalunaajaasut atisarissaartuusut allallu inussiarnerfigisarlugit inuiaqatigiissuseq apeqqutaatinnagu.“

Akeraariit ikinngutigiilerput

Siornatigut akerariit Robert Abrahamilu maanna ikinngutigiilluarput. Jehovap Nalunaajaasuisa ilagiivini ataatsimi tamakkiisumik kiffartortuupput. „Sorsunnerup nalaani eqqarsaatigisarpara qanoq ilillutik inuit nunanit sanileriinneersunit — ilarpassui uppeqatigiikkaluartut — imminnut uumissorsinnaasut,“ Abraham oqarpoq. „Robertilu oqaluffimmut ataatsimut ilaasortaavugut, taamaattorli sorsuuttarpugut. Maannakkut tamatta Jehovamut nalunaajaasuuvugut, uppernittalu ataasiussuseqartippaatigut.“

„Tassa allaassutaa,“ Robert nangippoq. „Maanna upperisaqarpugut piviusumik qatanngutigiissuarnut ilaalersitsisumik. Sorsoqqinngisaannassaagut.“ Akerariissimasut taakkua uummataannut Biibili sunniuteqartorujussuuvoq. Uumissuineq narrutsassimanerlu tatiginninnermik ikinngutigiinnermillu taarserneqarput.

Abraham Robertilu sorsutsillugit, angutit inuusuttut marluk nunat marluk akornanni sorsunnermi allami illua’tungeriillutik sorsupput. Erniinnaq aamma taakkua uummataannut Biibili nakorsaatitut sunniuteqalerpoq. Qanoq ililluni?

Toqutsigit — namminerlu martyrisut toqugit

Gabrielip ilaqutariinni upperisarsiortuusuni peroriartorsimasup ilinniarsimavaa nunagisani sorsunnermik illernartumik sorsuttuusoq. Taamaattumik 19-inik ukioqarluni nammineq piumassutsiminik sakkutuunngorpoq sorsuffimmullu aallarnissaminik qinnuteqarluni. Qaammatini 13-ini sorsunnermi sakkortunerpaamiippoq, ilaannikkut akeqqat kilometeri affarlu qanitsigisarlugit. „Pingaartumik pisimasoq ataaseq eqqaamavara,“ oqarpoq. „Naalakkatta oqaluttuuppaatigut akeqqat unnuaq taanna saassussissasut. Pissangangaaratta unnuaq naallugu qamutigeqattaarpavut.“ Gabrielip sanileriit akeqqatut toqusussatut isigai. „pilersaarutigaara sapinngisannik amerlasuut toquniarlugit. Naggataatigullu ikinngutima ilarpassui assigalugit martyrisut toquniarpunga.“

Piffissalli ingerlanerani Gabriel pakatsilerpoq. Qaqqanut qimaavoq, killeqarfik qaangerlugu nuna sorsuffiunngitsoq tikillugu,  Europamullu ingerlaqqilluni. Guuti apereqattaarpaa sooq inuuneq taama artornartiginersoq, ajornartorsiutillu pillaataanersut Guutimeersut. Jehovap Nalunaajaasuinut attaveqalerpoq, taakkualu Biibili tunngavigalugu takutippaat sooq ullumikkut inuuneq taama ajornartorsiuteqartigisoq. — Matîuse 24:3-14; 2 Timûtiuse 3:1-5.

Gabrielip ilikkagaqarnerujartortilluni paasinerujartorpaa Biibili sallusuissummik imaqartoq. „Ilinniarpara nunarsuarmi paratiisiusumi naassaanngitsumik inuusinnaasugut. Tupinnartumik meeraallunga tamanna erinigisimaqaara.“ Gabrielip Biibili tuppallersaatigaa uummamminullu aliasuttumut eqqissisaatigalugu. Misigissutsikkut ikii mamilerput. Piffissap ingerlanerani akerarisimasani Daniel naapikkamiuk Gabriel uumissuiunnaarsimavoq. Danielilli suna Europaliaatigaa?

„Ilumut piuguit ikiunnga!“

Daniel katuullisut peroriartorsimavoq 18-inillu ukioqarluni sakkutuujunissaminut qaaqqusaalluni. Sorsunnermut Gabrielip sorsuffigisaanut aallartinneqarpoq, illua’tungaanili. Sorsuffimmiitilluni Daniel qamussuarmut sorsuummut eqqorneqartumut ilaavoq. Ikinngutai toqutaapput, Danielilu ikilerujussuarpoq tigusaallunilu. Qaammaterpassuarni napparsimmavimmiippoq tigusanullu inissianiilluni, kingornalu nunamut sorsuffiunngitsumut aallartitaalluni. Kiserliorami piitsuullunilu imminornissani eqqarsaatigilerpaa. Daniel Guutimut qinuvoq: „Ilumut piuguit ikiunnga!“ Aqaguani Jehovap Nalunaajaasuisa pulaarpaat apeqqutaasalu ilarpassui akisinnaallugit. Naggataatigut qimaasutut Europaliarpoq. Tassanittaaq Danielip Jehovap Nalunaajaasui ilagisalerpai Biibilimillu atuaqqissaartalerluni. Ilikkagaasa isumakulunnera narrutsassimaneralu millisittarpaat.

Gabriel Danielilu maanna ikinngutigiipput, Jehovap Nalunaajaasuisut kuisimasutut anersaakkut qatanngutigiittut ataasiussuseqarlutik. „Jehovamut asanninnera Biibilimillu ilisimasaqalernera iluaqutigalugit Taassumatut isiginnittaaseqalerpunga. Daniel akerariunnaarpara. Ukiualuit matuma siornatiguusimasuuppat nuannaarutigalugu toqussagaluarpara. Biibilip tamatumunnga akerliulluinnartumik iliornissannik ilinniartippaanga — taanna pillugu toqusinnaallunga,“ Gabriel oqarpoq.

„Inuit assigiinngitsunik upperisallit inuaqatigiinnillu assigiinngitsuneersut imminnut toqoraattut takuakka,“ Daniel oqarpoq. „Aamma inuit uppeqatigiikkaluit illua’tungeriinni sorsuttut imminnut toqoraattut. Takugakku Guuti pisuutippara. Maanna paasivara sorsunnernut tamanut Satan pisuusoq. Gabrielilu maanna uppeqatigiippugut. Sorsoqqinngisaannassaagut!“

’Guutip oqaasia uumavoq killinnartorsuullunilu’

Suna pillugu Abraham, Robert, Gabriel Danielilu taama allanngortigippat? Qanoq uumissuinerup aliasunnerullu sorlai uummataannit peersinnaappat?

 Angutit taakku tamarmik sallusuissut Biibilimeersoq atuarlugu, eqqarsaatigeqqissaarlugulu ilikkarpaat, Biibili Guutip oqaasia ’uumammat killinnartorsuullunilu’. (Eprîarit 4:12) Biibilimik atuakkiortoq tassaavoq inuiannik Pinngortitsisoq, taassumalu nalunngilaa tusarusuttut ilinniarusuttullu uummataat qanoq ajunngitsumik sunnerneqarsinnaasut. „Allakkat illernartut tamarmik Guutip sunniineratigut isumassarsiarititaapput iluaqutaallutik ajoqersuutaallutillu inerteqqutaallutik, iluarsiartuutaallutik, iluarnermut perorsaataallutik.“ Biibilimit siulersorneqarusuttup inuunermini nutaanik najoqqutassiaqalerneq akueraa. Jehovap qanoq isiginnittaaseqarnera ilinnialerpaa. Tamannalu pilluaqqussutissarpassuarnik nassataqarpoq, ilaatigut ikit sorsunnerup pilersitaasa mamillutik ajorunnaarnissaannik. — 2 Timûtiuse 3:16, NV.

Guutip oqaasiata nassuiarpaa inuiaqatigiit naggueqatigiillu kikkulluunniit allanit pitsaanerunngitsut ajornerunatilluunniit. ’Guuti nakerisarsiortuunngilaq, kisianni inuianni tamani kinaluunniit mianerinnitsini naapertuilluartumillu iliortoq nuannaraa.’ Tamakku akuerigaanni inuiaqatigiissutsikkut naggueqatigiissutsikkulluunniit uumissuinermik misigissutsit qaangeriartuaarneqarsinnaapput. — apustilit suliait 10:34, 35.

Biibilip siulittuutaasa takutippaat Guutip naalakkersuinikkut aaqqissuussaaneq maanna atuuttoq Naalagaaffimmik Messiasikkoortumik taarsissagaa. Naalagaaffik taanna aqqutigalugu Guutip „nunarsuarmi tamarmi sorsunnerit soraarsikkumaarpai“. Sorsunnernik siuarsaasartut sorsunnissamullu kajumissaarisut tamarmik peerneqassapput. Sorsunnerni toqutaasut makikkumaarput nunarsuarmilu paratiisiusumi inuunissaminnik periarfissaqartinneqassallutik. Kinaluunniit saassussisumit qunutitsisumilluunniit qimaasariaqarnavianngilaq. — Tussiaat 46:10; Daniel 2:44; apustilit suliait 24:15.

Inuit taamanikkussaq inuussasut pillugit Biibilimi allassimavoq: „Illuliorumaarput namminneq inigisassaminnik viinnequtinillu ikkussuillutik inerititai nerisassaminnik. Illuliussanngillat allamiut inissaannik . . . Sulilussinnassanngillat qitorniussanatillu tassanngaannaq toqusussanik.“ Ajoqusikkat naapertuilluanngitsullu aaqqinneqassapput. Neriugisaq tamanna upperigaanni aliasunneq anniaatillu inuup uummammiugisai tamarmik peerneqariartuinnassapput. — Jesaja 65:21-23.

Biibili uummammut nakorsaataavoq pitsaasoq. Maannakkut allaat ajoqersuutai ikinut sorsunnerup pilersitaanut mamisitsereertarput. Akerariissimagaluartut silarsuaq tamakkerlugu qatanngutigiissuartut atasiussuseqarput. Katsorsaaneq tamanna Guutip aaqqissuussaani nutaassami ingerlaqqissaaq uummissuinerit aliasunnerillu tamaasa inuiaat uummataannit peerneqarluinnarnissaat tikillugu. Pinngortitsisoq neriorsuivoq ’pereersut eqqaamaneerutissasut eqqaaqqinneqarnatillu’. — Jesaja 65:17. (wD 1/1 2001)

[Quppernerup ataani ilanngussat]

[Qupp. 4-mi issuagaq]

„Biibilimit paasivara ukiorpassuit sorsuttarsimanikka asuliinnaasimasut“

[Qupp. 5-mi issuagaq]

Akerariissimasut uummataannut Biibili sunniuteqartorujussuuvoq

[Qupp. 6-mi issuagaq]

Uumissuineq narrutsassimanerlu tatiginninnermik ikinngutigiinnermillu taarserneqarput

[Qupp. 6-mi issuagaq]

Biibilimit siulersorneqarusuttup inuunermini nutaanik najoqqutassiaqalerneq akueraa

[Qupp. 7-mi assiliartaq]

Akerariissimagaluartut silarsuaq tamakkerlugu qatanngutigiissuartut atasiussuseqarput

[Suminngaanneernera]

Qimaasunut inissiat: UN PHOTO 186811/J. Isaac