Sooq Guuti kiffartuuppiuk?

Ilaanni kunngip Guutimik mianerinnittup ernini ima siunnersorpaa: „Ataatavit Guutia ilisariniaruk! Kajumillutit naalanniaruk uummatikkut iluunngarlutit!“ (1 Israelikkut 28:9) Erseqqippoq Jehovap kissaatigigaa qamannga pisumik qujamasunnermit kiffartuutissagitsinni.

JEHOVAMUT Nalunaajaasuusugut neriorsuutinik Biibilimeersunik paasitinneqaqqaaratta qamannga pisumik qujamasuttarpugut. Ullut tamaasa Guutip siunertaa pillugu nutaanik ilikkagaqartarpugut. Jehova ilisarisimaneruleraangatsigu ’kajumilluta uummatikkullu iluunngarluta’ kiffartuunnissaa kissaatiginerulertarparput.

Jehovamut nalunaajaasunngortut ilarpassuisa inuunertik tamaat nuannaarlutik Jehova kiffartuuttarpaat. Ilaqarpulli aamma aallartilluarsimagaluartunik, piffissalli ingerlanerani suna pissutigalugu Guutimut kiffartuussilersimanerminnik puiguisimasunik. Ilinnut taama pisoqarpa? Taamaappat isumatsanniaqinak. Nuannaaleqqittoqarsinnaavoq. Qanoq?

Pilluaqqusaanitit taagukkit

Siullermik Guutip ullormut ilinnut pilluaqqussutigisartagai eqqarsaatigeriakkit. Tunissuterpassui ajunngitsut eqqarsaatigikkit: Pinngortitai tupinnangaartut — kikkut tamarmik iluaqutigilluarsinnaasaat qanorluunniit innuttaaqatigiinni aningaasatigullu inissisimagaluarunik — nerisassat imigassat, peqqissuseq, Biibilimik ilisarsineq, siullerpaamik pingaarnerpaamillu Jehovap ernerminik tunnissutaa. Toqunerata ilerasuuteqarnata Guutimut kiffartorsinnaalersippaatigut. (Juánase 3:16; Jâko 1:17) Guutip ajunngingaassusia eqqarsaatiginerulerukku qujamasunnerulissaatit. Iliuuserisimasaanut tamanut uummammik pisumik qujamasunnerpit kiffartuusserusulersissavaatit. Qularnanngilaq tussiaasiortutut misigileqqissasutit, ima allappoq: „Angingaarput naammassisatit, [Jehova] Guutiga, angeqaat tupinnartuliatit pillutalu pilersaarutitit, ilinnut naleqqiunneqartoqarsinnaanngilaq! . . . amerlavallaaramilli taagorneqarsinnaanngillat.“ — Tussiaat 40:6.

Oqaatsit taakku Davidimit allanneqarput, angut ajornartorsiuteqanngitsutut oqaatigineqarsinnaanngilluinnartoq. Inuusuttuunermi ilarujussua kunngi Saulimit ajortumit taassumalu kiffaanit toqutsiniartunit qimaasariaqarsimavoq. (1 Samuel 23:7, 8, 19-23) Aammattaaq Davidip sanngiissutsini akiortariaqarsimavai. Tamanna Tussiaat 40-mi ima allaatigaa: „Naalliuutinimmi kisissaanngitsunik unguneqarpunga, iluaatsuliama kingunerisa anguaannga. Isikka aarlortinneq sapilerpakka iluaatsuliakka amerlanerummata niaqquma nujaanit.“ (Tussiaat 40:13) David ajornartorsiuteqarpoq, kisianni nikallorluinnassutiginngilai. Ajornartorsiuteqaraluaqaluni Jehovap qanoq pilluaqqusimagaani pingaarnerutippaa, qularnaallillugulu paasivaa naalliuutini pilluaqqussuterpassuarnut naleqqiullugit soqutaannginnerungaartut.

Ajornartorsiuteqarpallaaleruit imaluunniit imminut naammagiunnaaruit iluaqutaassaaq Daviditut unikkaallallutit pilluaqquneqarnitit eqqaajortorukkit. Qularnanngilaq pilluaqquneqarnitit tamakku pingaartikkakkit Jehovamut tunniulluinnartutit, tamakkulu eqqarsaatigeqqissaarukkit nuannaaleqqinnissannut iluaqutaasinnaapput  uummatikkullu qujamasullutit Guuti kiffartuuteqqilerlugu.

Ilagiit ataatsimiinneri iluaqutaasinnaapput

Jehovap ajunngingaassusianik eqqarsaatiginneqqissaarnitta saniatigut kristumioqatitta katerisimaaqatiginissaat pisariaqartipparput. Angutit, arnat meeqqallu Guutimut asannittut kiffartorfiugiumallugulu aalajangiussisimasut aalajangersimasumik ataatsimeeqatigisarlugit qiimmaallannartaqaaq. Maligassiuinerisa Jehovamut kiffartornitsinni uummatikkut iluunngarluta suliniuteqarnissatsinnut kaammattussavaatigut. Naalagaaffilersaarfimmi takugunisigut qiimmassaatigissavaattaaq.

Miserratigisariaqanngilaq sulerulooreersimalluni nikallungakujullunilluunniit ajornartorsiuteqarneq sanngiissuseqarnerluunniit pissutigalugit ataatsimiigiarnissaq ajornarsinnaasarmat. Taamaattoqartillugu imminut naalakkersinnaanissaq pisariaqarpoq, ’timi artorsartillugulusooq’, kristumioqatitta ataatsimeeqatiginissaannik peqqussut malinniarlugu. — 1 Korintumiut 9:26, 27; Eprîarit 10:23-25.

Ilaannikkut taamatut misigisaratta isumaqarpa Jehovamut asanninnikippallaartugut? Naamerluinnaq. Itsaq kristumiut inersimalluartut Guutimut aalajaallutik asannittut Guutip piumasaanik iliorumallutik ilungersortariaqarsimapput. (Lúkarse 13:24) Apustili Paulus taakkua ilagaat. Misigissutsini ammasumik imatut allaatigai: ’Ilugami, tassa uiniga, ajunngitsoqanngitsoq ilisimavara; piumanissaq pigigaluarpara, kisianni ajunngitsoq suliarissallugu sapersarpunga. Piumasara ajunngitsoq suliarisarinngilara, kisianni piumanngisara ajortoq suliarisarpara.’ (Rûmamiut 7:18, 19) Korintumiunut ima allappoq: ’Iivangkiiliumi oqaluutigigakku usorsitsaarsinnaanngilanga, pinnginneq uannut ajornarmat; uannut eqqarnaqqajaqaarluunniit iivangkiiliu oqaluutiginngikkukku. Kajumillunga piguma akissarsiassaqarpunga; kajuminngikkumali taava pilittaassutut paarisaqartitaavunga.’ — 1 Korintumiut 9:16, 17.

Amerlanersatsitut Paulus ajunngitsuliornissaminut ilungersuatitsisumik ajortulioqqajaasarpoq. Ilungersorlunili akiuuppoq ajortulioqqajaasarninilu ajugaaffiginiarnerini amerlanertigut iluatsitsisarpoq. Soorunalimi Paulus nammineersinnaanermigut aniguinngilaq. Allappoq: ’Tamaasa pissatsitsisikkut sapinngilakka.’ (Filípimiut 4:13) Jehovap Paulus nakussatsippaa, aammattaaq illit ikioqqullutit qinnuigigukku eqqortuliornissannut nakussatsissavaatit. (Filípimiut 4:6, 7) Taamaattumik ’upperisassaq . . . assoruutigiuk’, taava Jehovap pilluaqqujumaarpaatit. — Jûtarse 3.

Taamatut akiuunninni immineerneqanngilatit. Jehovap Nalunaajaasuisa ilagiivini kristumiut utoqqaanertat inersimalluartut ’upperisassamik assoruutigisaqartut’ ikiussallutit piareersimapput. Ikioqqullutit utoqqaanertamut saaffiginnikkuit ’tuppallersarniarlutit’ sapinngisaminik iliussaaq. (1 Tásalûníkamiut 5:14) ’Anorersuarmut oqquiffittut sialussuarmullu oqqiffiuniarluni’ ilungersuutigissavaa. — Jesaja 32:2.

’Guuti asassutaavoq,’ kissaatigaalu asanninnermit kiffartuutissagitsinni. (1 Juánase 4:8) Guutimut asannileqqinnissat pisariaqartikkukku taava qulaani allaaserineqartutut naleqquttumik iliuuseqartariaqarputit. Peqqissimissutiginavianngilat. (wE 15/12 2000)