Jehovap Nalunaajaasui qularatik siumut ingerlajuarsinnarput

Ukiumoortumik ataatsimiinnermit nalunaarusiaq

ULLUNI makkunani, sunik tamanik qularfiusuni nalorniffiusunilu, Jehovap Nalunaajaasuisa kristumiutut qularuteqanngilluinnartuunertik immikkoorutigaat. Tamanna erseqqissivoq Watch Tower Bible and Tract Society of Pennsylvaniap ukiumoortumik ataatsimiinnerani arfininngornermi 7. oktobari 2000-imi Jehovap Nalunaajaasuisa ataatsimeersuartarfiani Jersey City, New Jerseymiittumi. *

Aqutsisoq, John E. Barr, Jehovap Nalunaajaasuisa Siulersuisoqatigiivinit ilaasortaasoq, aallarniinermini ima oqaaseqarpoq: „Nunarsuup inuinit milliardilikkuutaanit tamanit upperaarput qularutiginagulu ullumikkut Jehovap erni asangaakki, Jesus Kristus, qilammi Kunnginngortissimagaa akeqqamilu akornanni naalagaasoq.“ Qularuteqanngilluinnarnerput nalunaarusiani pissanganartuni arfinilinni nunarsuarmi assigiinngitsuneersuni erserpoq.

Haitimi anersaarsiorneq sallusuissummit Biibilimeersumit ajugaaffigineqartoq

Haitimi anersaarsiorneq nalinginnaaqaaq. Nunami tassani immikkoortortaqarfimmi ataatsimiititaliami ataqatigiissitsisoq John Norman, oqaluttuarpoq: „Inuit nalinginnaasumik voodoosiortarput imminnut illersorniarlutik.“ Angakkulli ajortoorluni niuni annaagamiuk anersaarsiornerup pissaanera qularutigilerpaa. ’Qanoq ililluni tamanna uannut pisinnaava anersaanik illersorneqaruma?’ eqqarsarpoq. Allarpassuit assigalugit angutip taassuma sallusuissut Jehovap Nalunaajaasuinit ilinniarpaa anersaarsiornerullu naapiaanniutaanit aniguisinneqarluni. Haitimi siuariartoqarnissaa ilimanaateqarpoq nalliuttorsiornermi apriilip 19-iani 2000-imi najuuttut nunami oqaluussisartunit sisamariaammik amerlanerummata.

Koreami angalaartarferujussuarmi ilungersuussineq

Koreami Jehovap nalunaajaasuisa 40 procentii piffissaq tamaat kiffartortuupput. Immikkoortortaqarfiup ataatsimiititaliaata ataqatigiissitsisua Milton Hamilton oqaluttuarpoq: „Taakkorpassuit ikiortigalugit oqaluussiffigisartagarput 47 millioninik inulik qaammammut ataasiarlugu naammassineqartarpoq.“ Ilagiit ussersorlutik oqaasillit amerliartornerat malunnarnerpaavoq. Ilageeqatigiinni ataatsini ussersorlutik oqaluttulinni 800-nik atuaqqissaaqateqartoqarpoq, agguaqatigiisillugu oqaluussisartoq ataaseq ataatsimik atuaqqissaaqateqartarluni. Ajoraluartumik qatanngutit angutit inuusuttut sakkutooqarnikkut  akuliuukkusunnginnertik pissutigalugu suli paarnaarussaasarput. Kristumiulli taakkua aalajaattut ajunngitsuliorfigineqartarput suliassinneqarajullutillu tatiginartuunermik piumasaqaatitalimmik.

Mexicomi pisariaqartitsinersuaq matussuserneqarpoq

Aggusti 2000-imi Mexicomi oqaluussisartut 533.665-it oqaluussinerminnik nalunaaruteqarsimapput, tamannalu angusaavoq annerpaaq. Pingasoriaataannit amerlanerusut eqqaaniaalluni nalliuttorsiorneq najuuffigisimavaat. Immikkoortortaqarfiup ataatsimiititaliaata ataqatigiissitsisua Robert Tracy oqaluttuarpoq: „Anguniagaraarput ukioq manna naalagaaffilersaarfiit 240-t sanaartornissaat. Amerlanerungaartulli pisariaqartippavut.“

Jehovap Nalunaajaasuisa inuusuttortaat Mexicomi maligassaalluartuupput. Palasi katuuliusoq angut inuusuttoq pillugu oqarsimavoq: „Ilaasortama akornanni taamaattuuteqarusukkaluarpunga. Piumassuseqarluarnerat tupigusuutigaara Biibilimillu atuinermut pikkoreqimmata. Guuti illersorsimavaat inuunertik annaasinnaagaluarlugu.“

Sierra Leonemi sorsunnerup nalaani qatanngutit assuarnaattuarput

Sierra Leonemi apriili 1991-imi naalagaaffiup inuisa imminnut sorsuunnerat aallartimmalli, tusindilippassuit ikiligaapput, timikkut aqqunartiterlutik toqutaallutilluunniit. „Sorsunneq atugarliornerillu inunnik sunniingaarput,“ immikkoortortaqarfiup ataatsimiititaliaata ataqatigiissitsisua Bill Cowan oqaluttuarpoq. „Siornatigut oqariartuutitsinnut soqutiginninngikkaluarsimasut maannakkut soqutiginnillutik tusarnaartarput. Qaqutigoortuunngilaq inuit aqqusiniinnarmit naalagaaffilersaarfimmut ataatsimiigiaqqaartarnerat. Qatanngutit aqqusinermi unitsinneqakulasarput Biibilimillu atuaqqissaaqatigineqarumallutik.“ Nunami pissutsit nalorninaraluartut oqaluussineq Sierra Leonemi inerititaqarluarpoq.

Afrika Kujallermi sanaartornissarsuarmik pilersaarusiaq

Maannakkorpiaq naalagaaffilersaarfiit tusindilikkuutaat Afrika Kujallermi immikoortortaqarfiup nakkutigisaani nunami annertuumi pisariaqartinneqarput. Naalagaaffilersaarfiit hundredelikkuutaat sanaartorneqareerput. „Quini orpiulluunniit ataani siornatigutut ataatsimiinnatik maannakkut qatanngutit ataatsimiissinnaanngorput sumiiffimmi naleqquttunik isiavissalimmi,“ John Kikot immikkoortortaqarfiup ataatsimiititalianut ilaasortaasoq oqaluttuarpoq. „Naalagaaffilersaarfiit amerlanerit angivallaanngikkaluarlutik illunit eqqaamiuminnit kusarnarnerpaasarput. Sumiiffiit ilaanni paasineqarsimavoq naalagaaffilersaarfiliortoqarneranit ukioq ataaseq qaangiummat ilagiit marloriaammik amerleriarsimasut.“

Ukrainemi Jehovap nalunaajaasuini kinguaariit nutaat

Ukiumi kiffartorfiusumi 2000-mi Ukrainemi oqaluussisartut amerlanerpaaffiat 112.720-usimavoq. Taakkunannga 50.000-nit amerlanerusut ukiuni tallimani kingullerni sallusuissut Biibiliminngaanneersoq ilikkarsimavaat. „Jehovap kinguaariit nutaat inuusuttut atiminik oqaluussisinnaasut sassartissimavai,“ John Didur immikkoortortaqarfiup ataatsimiititaliani ataqatigiissitsisoq oqarpoq. Nangilluni oqarpoq: „Ukiut marluk kingulliit atuagassiat 50 millioninit amerlanerusut agguaanneqarsimapput, nunap inuisa amerlaqataat. Qaammatit tamaasa agguaqatigiisillugu tusindinik allagarsisarpugut soqutiginnittunit paasissutissanik amerlanerusunik perusuttunik.“

Pilersaarusiami saqqummiussat allat killitsinnartut

Daniel Sydlik, Siulersuisoqatigiinnut ilaasortaasoq, pissanganartumik oqalugiaateqarpoq. Ilanngutassiaq atuagassiami uani „Siulersuisoqatigiit peqatigiiffimmit inatsisitigut akuerisaasumit qanoq allaassuteqartut“-mik qulequtalik oqalugiaat tamanna paasissutissiisoq tunngavigalugu allaaserisaavoq.

Theodore Jaracz Siulersuisoqatigiinneersoq eqqarsaallannartumik oqalugiaateqarpoq qulequtalimmik „Nakkutilliisut ilagiinnilu kiffartortut Guutip siulersuineratigut toqqarneqartarput“. Allaaserisat ilaanni atuagassiami uani tamanna qulequtarineqarpoq.

Aamma Siulersuisoqatigiinnut ilaasortaq alla, David Splane, 2001-imi ukiumut allassimaffik oqalugiaatigaa, imatut nipilik: ’Aalajaanniaritsi iluarluinnarlusi qulanngilluinnarlusilu Guutip peqqusaa tamaat eqqorlugu.’ (Kulorsamiut 4:12) Jehovap Nalunaajaasui tamarmik aalajangersimapput Guutip naalagaaffia pillugu nutaarsiassaq nuannersoq nunarsuaq tamakkerlugu oqaluussissutiginiarlugu. — Matîuse 24:14. (wE 15/1 01)

[Quppernerup ataani ilanngussaq]