Jehovap peqatigiissortai malittuakkit
Jehovap peqatigiissortai malittuakkit
’Guutip eqqissisaasup . . . tamanik ajunngitsuliorsinnaanngorsarlisi peqqusani naammatseqqullugu.’ — EPRÎARIT 13:20, 21.
1. Silarsuup inui qassiuppat, upperisarsiornerillu assiigiinngitsut qassinik ilaasortaqarpat?
UKIUMI 1999-imi silarsuup inui 6 milliardinngorput. The World Almanac naapertorlugu musliimit 1.165.000.000-iupput, 1.030.000.000-t katuuliullutik, 762.000.000-t hinduullutik, 354.000.000-t Buddhasiortuullutik, 316.000.000-t naaggaartuullutik 214.000.000-llu ortodoksit ilagiissaannut ilaallutik.
2. Ullumikkut upperisarsiornermut atatillugu pissutsit qanoq oqaatigineqartariaqarpat?
2 Ullumikkut upperisarsiornerni avissaartuunneq paatsiveerunnerlu eqqarsaatigalugit aperisinnaavugut inuit millionilippassuit taakku Guutip piumasaatut iliortarnersut. Taamaaliunngillat, ’Guuti ularussinermut Guutiunngimmat, eqqissinermulli’. (1 Korintumiut 14:33) Jehovamummi kiffartortut nunarsuaq tamakkerlugu qatanngutigiittut qanoq ippat? (1 Pîtruse 2:17) Misissoqqissaaraanni paasinarpoq ’Guutip eqqissisaasup tamanik ajunngitsuliorsinnaanngortikkai piumasani naammasseqqullugu’. — Eprîarit 13:20, 21.
3. Ukiumi 33-mi piinsip ulluani Jerusalemimi qanoq pisoqarpa, aamma sooq?
3 Jehovap Nalunaajaasui Guutimit iluarisaanersut soorunami amerlassusiat tunngavigalugu aalajangerneqarsinnaanngilaq; amerlassuseqarneq Guutip killissutigissanngilaa. ’Inuaqatigiinnit allanit amerlanerummata’ Guutip Israelikkut qininngilai. Inuiaqatigiinnimmi tamanit ’ikinnersaapput’. (5 Moses 7:7) Israelikkulli Guutimut ilumuunngillat. Taamaattumik ukiumi 33-mi piinsip ulluani Jehovap Kristusip ajoqersugaasa ilagiissaat pilersinneqaqqammersoq iluarilerpaa. Taakku Jehovap anersaavanik illernartumik taninneqarput, aallussilluarlutillu Guuti Kristusillu pillugit sallusuissut oqaluussissutigisalerlugu. — apustilit suliait 2:41, 42.
Siumukartuarput
4. Sooq ilagiit kristumiut ukiuni hundredelinni siullerni siumukartuarpa?
4 Ukiuni hundredelinni siullerni ilagiit kristumiut siumukartuarpoq. Nunat illoqarfiillu oqaluussiffigineqarsimanngitsut oqaluussiffigineqartalernissaat, ajoqersuganngorlaallu ilagiinnut ilaalertarnissaat isumagineqarput, ilagiillu Guutip siunertaanik paasisaqarnerulerlutik. Kristumiut siulliit allakkat Guutimit isumassarsiarititat aqqutigalugit anersaakkut qaammariartorneq malittaraat. Apustilinit allanillu tikinneqartarnertik kajumississutigalugu kiffartuussinertik naammassivaat. Tamakku tamarmik Kristumiut Allagaataanni Griikerisuuni allaatigineqarput. — apustilit suliait 10:21, 22; 13:46, 47; 2 Timûtiuse 1:13; 4:5; Eprîarit 6:1-3; 2 Pîtruse 3:17, 18.
5. Guutip peqatigiissortai ullumikkut sooq siumukartuarpat, aamma sooq malittuartariaqarpavut?
5 Ukiuni hundredelinni siullerni kristumiut assigalugit ullumikkut Jehovap Nalunaajaasuisa aallaqqaammut ikkaluarlutik amerlisimapput. (Sakarja 4:8-10) 1800-kkut naalerneranniilli Guutip anersaavata peqatigiissortaanut najuunnera erseqqippoq. Inuit pissaanerat tatiginagu anersaap illernartup siulersuinera tatigigatsigu Biibilimik paasisaqarnikkut Guutillu piumasaatut iliornikkut siumukartuarpugut. (Sakarja 4:6) ’Ulluni kingullerni’ makkunani Jehovap peqatigiissortaasa siumukartuartut malittuarnissaat pingaaruteqartorujussuuvoq. (2 Timûtiuse 3:1-5) Taamaaliorutta neriuuterput uumatittuarsinnaavarput Guutillu naalagaaffia pilersinneqareersoq oqaluussissutigisinnaallugu pissutsit aaqqissuussaanerata maanna atuuttup naggatissaa nalliutsinnagu. — Matîuse 24:3-14.
6, 7. Immikkoortuni pingasuni Jehovap peqatigiissortaasa siumukarfigisimasaat suut misissuataarnerussavavut?
6 Ilaqarpugut 1920-kkunni, 30-kkunni 40-kkunnilu Jehovap peqatigiissortaanut ilaalersimasunik. Taamanikkut kia takorloorsinnaavaa ulloq manna tikillugu taama amerliartortoqartiginissaa siuariartoqartiginissaalu? Eqqarsaatigeriakkit ukiuni nutaanerusuni angusat immikkut pingaarutillit. Jehovap innuttani siulersukkani aaqqissugaasut atorlugit naammassisai eqqarsaatigigaanni anersaakkut qiimmannaqaaq.
7 Itsaq Davidip Jehovap tupinnartuliai eqqarsaatigeqqissaaramigit killissutigeqai. Ima oqarpoq: „Oqaluttuaralugillu tusartikkusukkaluarpakka, amerlavallaaramilli taagorneqarsinnaanngillat.“ (Tussiaat 40:6) Uaguttaaq taama misigivugut, Jehovammi ullutsinni naammassisai misinnangaartut tamaasa oqaatigiuminaatsikkatsigik. Misissoriartigilli immikkoortut pingasut Jehovap peqatigiissortaasa pingaartumik siumukarfigisimasaat: (1) anersaakkut qaammariartorneq, (2) pitsaanerusumik annertunerusumillu oqaluussineq kiisalu (3) aaqqissuussinikkut naleqqulluartunik allannguineq.
Anersaakkut qaammarissiartorneq qujamasuutigaarput
8. Qaammarissiartornerup Ussatit 4:18-imi eqqaaneqartup Naalagaaffimmut atatillugu sumik paasitippaatigut?
8 Anersaakkut qaammarissiartornermut atatillugu Ussatit 4:18-imi allassimasut ilumoornerat paasinarsivoq: „Iluartulli aqqutaata assigaa ullaap qaammalernera qaammarissiartortoq ulluuneratut qaamatigilerserluni.“ Qujamasuutigaarput anersaakkut qaammarissiartuinnarneq misigigatsigu. 1919-imi Cedar Pointimi Ohiomiittumi ataatsimeersuarnermi Guutip naalagaaffia erseqqissarneqarpoq. Naalagaaffik aqqutigalugu Jehovap aqqi illernarsissavaa kisimilu oqartussaassutsini qutsissisissallugu. Anersaakkut qaammarissiartornerup paasitippaatigut Biibilip, Mosesimik allakkat siullernit sarĸúmersitat-nut, nalunaajaassutigigaa Jehovap Naalagaaffik ernermi naalakkersugaa aqqutigalugu atermi illernarsisinnissaa siunertarigaa. Tamatumuuna naapertuilluarnermik nuannarisaqartut tamarmik nuanningaartumik neriuutissaqarput. — Matîuse 12:18, 21.
9, 10. 1920-kkunni Guutip naalagaaffia aamma peqatigiissortat marluk imminnut akerleriit pillugit sunik ilikkagaqartoqarpa, tamannalu qanoq iluaqutigineqarpa?
9 1922-mi Cedar Pointimi ataatsimeersuarnermi allami oqalugiartoq pingaarneq J. F. Rutherford Guutip innuttaanut ima kajumissaarivoq: „Kunngi taassumalu naalagaaffia oqaluussissutigisigik, oqaluussissutigisigik, oqaluussissutigisigik!“ 1925-mi The Watch Tower-imi 1. marsi 1925-moortumi (Vagttaarnet, 1. maaji 1925) allaaserisami qulequtalimmi „Inuiaqatigiit nutaat pinngornerat“-mi Guutip naalagaaffiata 1914-imi pilersinneqarnera pillugu siulittuutinut anersaakkut qaamaneq annerulerpoq. 1920-kkunni aamma paasineqalerpoq peqatigiissortaqartoq marlunnik imminnut akerleriittunik, Jehovap aamma Satanip. Peqatigiissortat taakku marluk imminnut akiuupput, aatsaallu Jehovap peqatigiissortai malittuarutsigik ajugaaqataasinnaavugut.
10 Paasisaqarnerujartorneq tamanna qanoq iluaqutigaarput? Guutip naalagaaffia kunngilu Jesus Kristus silarsuarmut matumunnga ilaanngimmata, uaguttaaq silarsuarmut ilaasinnaanngilagut. Silarsuarmit immikkoornitsigut takutissavarput sallusuissut tapersersoripput. (Juánase 17:16; 18:37) Ajornartorsiutit anigoruminaatsut aaqqissuussaanerup matuma ajortup erloqissutigititai qimerlooraangatsigik qujamasuutigisarparput Satanip peqatigiissortaanut ilaannginnatta. Aamma Jehovap peqatigiissortaani anersaakkut toqqissisimanartumiinnerput pilluaqqusaassutigaarput.
11. Taaguut Biibilimut naapertuulluartoq suna Guutip innuttaasa 1931-mi atulerpaat?
11 1931-mi Columbusimi Ohiomiittumi ataatsimeersuarnermi Jesaja 43:10-12-imi allassimasut paasineqarnerulerput. Ataatsimeersuarnermilu tamatumani Biibilimik Atuaqqissaartartut taaguut ilisarnaataasoq Jehovap Nalunaajaasui taaguutigilerpaat. Guutip aqqanik ilisarititsineq immikkut pisinnaatitaaffissuuvoq, allat annassagunik aqqanik torlorfiginnissinnaaniassammata. — Tussiaat 83:19; Rûmamiut 10:13.
12. 1935-mi amerlangaartut pillugit anersaakkut qaamaneq qanoq qaammarissiartorpa?
12 1930-kkut sioqqullugit Guutip innuttaasa akornanni amerlasuut siunissamut qanoq neriugisaqarnerminnik nalornisarsimapput. Ilaasa qilammi inuunissaq eqqarsaatigaat, Biibililli nunarsuarmi paratiisissamik ajoqersuutaa kajungeriitigalugu. 1935-mi Washington, D.C.-mi ataatsimeersuarnermi pissanganarsimassaqaaq ilikkaramikku amerlangaartut sarĸúmersitat-ni kapitali 7-imi eqqaaneqartut tassaasut nunarsuarmi inuunissamik neriugisallit. Taamanimiilli amerlangaartut katersorneqarnerat aallunneqartuarpoq. Qujamasunnginnerpugut paasigatsigu ’amerlangaartut’ kikkuunersut? Inuit amerliartuinnartut inuaiqatigiinnit, naggueqatigiinnit oqaasilinnillu tamanit katersorneqartarmata, aallussinerulernissatsinnut killissutigaarput Jehovap peqatigiissortaanik malinnaalluta.
13. Akerleriissut pingaartoq suna 1941-mi St. Louisimi ataatsimeersuarnermi sammineqarpa?
13 1941-mi St. Louisimi Missourimiittumi ataatsimeersuarnermi inuit tamarmik soqutigisariaqagaat sammineqarpoq, tassa silarsuarmi tamarmi kisimi oqartussaaneq naalakkersuisussaanerluunniit pillugu akerleriissut. Akerleriissut tamanna erniinnaq aalajangerneqassaaq, ullussarsuarlu annilaangaanganartorlu qanilliartorasuarpoq. 1941-mi ataatsimeersuarnermi aamma alla tamatumunnga tunngasoq sammineqarpoq, assuarnaassuserput, tassa Guutip kisimi oqartussaaneranut isiginnittaaserput.
14. 1950-imi ataatsimeersuarnermi nunanit assigiinngitsunit peqataaffigineqartumi naalagaasut Tussiaat 45:17-imi eqqaaneqartut pillugit suna ajoqersuutigineqarpa?
14 1950-imi New Yorkimi ataatsimeersuarnermi nunanit assigiinngitsunit peqataaffigineqartumi nassuiarneqarpoq naalagaasut Tussiaat 45:17-imi eqqaaneqartut kikkuunersut. Pissanganarpoq qatanngut Frederik Franzip oqalugiarluni nassuiarmagu nunarsuassamut nutaamut naalagaasussat akornatsinninngaanneersut. Ataatsimeersuarnermi tamatumani tulliuttunilu anersaakkut tunngasunut qaamaneq qaammarissiartornerulerpoq. (Tussiaat 97:11) Qujamasuppugut ’aqqut’ ingerlavigisarput ’assigimmagu ullaap qaammalernera qaammarissiartortoq ulluuneratut qaamatigilerserluni’.
Oqaluussinermi siumukariartorneq
15, 16. (a) Oqaluussinermut atatillugu 1920-kkunni 1930-kkunnilu qanoq siumukartoqarsimava? (b) Ukiut ingerlaneranni atuakkat suut kristumiut kiffartornerata siuarsarneqarnerannut sunniuteqarluarpat?
15 Suliassamik pingaartumik peqatigiissortamut siumukariartortitsisoq alla tassaavoq Guutip naalagaaffianik oqaluussissutiginninneq ajoqersuganngortitsinerlu. (Matîuse 28:19, 20; Mákorse 13:10) Suliaq tamanna naammassisinnaaqqullugu peqatigiissortat oqaluussinermi suliniuteqarneruniarnissatta pingaaruteqassusia erseqqissartuarsimavaat. 1922-mi kristumiut tamarmik kajumissaarneqarput oqaluusseqataaqqullugit. Tamarmik immikkut qaamasuminnik qaamatitsinissartik akisussaaffigaat namminnerlu sallusuissut oqaluussissutigisariaqarlugu. (Matîuse 5:14-16) 1927-mi Jehovap innuttai kajumissaarneqarput sapaat oqaluussinermut immikkoorteqqullugu. Februaari 1940 aallarnerfigalugu Jehovap Nalunaajaasuisa aqqusinermi niuertarfeqarfinni atuagassianik The Watchtower-imik (Napasuliaq Alapernaarsuiffik) aamma Consolation-imik (maannakkut Iteritsi!) neqerooruteqartarnerat takussaanerulersimavoq.
16 1937-mi (qallunaatut 1939-mi) atuagassiaaraq Model-studium saqqummerpoq, tassanilu soqutiginnittut sallusuissummik Biibilimeersumik ilinniarnerusinnaaqqullugit pulaaqqiineq pisariaqartutut erseqqissarneqarpoq. Ukiuni tulliuttuni Biibilimik atuaqqissaaqateqalernissaq pingaartinneqangaalerpoq. Kiffartoriaatsip tamatuma siuarsarnissaanut atuakkat „Gud Maa Være Sanddru“ 1946-mi (’Guuti sallusuitsuuvoq’, qallunaatut 1948-mi) aamma sagdlusuíssut inûnigssamut nâgssáungitsumut sangmissoĸ 1968-imi (qallunaatut 1969-imi, kalaallisut 1973-imi) saqqummersinneqarput. Maannakkut atuagaq Ilisarsineq inuunermut naassaanngitsumut sammisoq atortarparput. Atuakkat tamakku atuaqqissaaraanni upperneq Biibilimik tunngaveqarlualertarpoq.
Peqatigiissutsikkut pitsanngoriarnerit
17. Jesaja 60:17-imut naapertuuttumik Jehovap peqatigiissortai qanoq siuariarsimappat?
17 Siumukariartortitsisup pingajuatut peqatigiissutsikkut pitsanngoriarnerit pineqarput. Jesaja 60:17 naapertorlugu Jehova ima neriorsuivoq: „Taarteqartissavara kanngussak kuultimik, savimineq sølvimik, qisuk kanngussammik, ujarallu saviminermik. Eqqissineq ilinnut naalaganngortissavara, iluarnerlu naalakkersortigissavat.“ Siulittuummut naapertuuttumik ullumikkut oqaluussinermik nakkutiginninneq Guutillu savaataanik paarsineq eqqarsaatigalugit pitsanngoriartoqarsimavoq.
18, 19. Ukiut ingerlaneranni peqatigiissortaani qanoq pitsanngoriartoqarpa?
18 1919-imi Peqatigiiffiup ilagiinni oqaluussinermut aaqqissaasumut peqataajumasuni tamani sulinermut siulersuisoq toqqarsimavaa. Aaqqissuusseqqinnerup tamatuma oqaluussineq siuarsarpaa. 1932-mi ilagiinni utoqqaanertanik kiffartortunillu qinersisarneq atorunnaarpoq. Taamaalillutik ilagiit demokratii tunngavigalugu siulersorneqarunnaarput. 1938-mi suli pingaarnerusumik Peqatigiiffiup ilagiinni kiffartortut tamaasa toqqarsinnaalerpai. Tamanna ukiuni hundredelinni siullerni ilagiinni kristumiuni aaqqissuussinermut, Guutip siulersuineratigut toqqaanernut, naapertuuneruvoq. (apustilit suliait 14:23; 1 Timûtiuse 4:14) 1972-imi nakkutilliisut ilagiinnilu kiffartortut kiffartuussinissaminnut toqqarneqartalerput kristumiut ukiuni hundredelinni siullerni toqqaasarnerattut. Ilagiinni angummik ataasiinnarmik nakkutilliisutut kiffartortumut taarsiullugu, Filípimiut 1:1 allassimaffiillu allat naapertorlugit Biibilip nakkutilliisussanut piumasaqaataanik naammassinnittut tamarmik utoqqaanertaqatigiiussapput. — apustilit suliait 20:28; Evfisumiut 4:11, 12.
19 1975-imi aaqqissuusseqqinneq atulerpoq. Guutip peqatigiissortaata nunarsuaq tamakkerlugu suliassai ataatsimiititaliat assigiinngitsut Jehovap Nalunaajaasuisa Siulersuisoqatigiivinit ilaasortaqartunit nakkutigineqartussaapput. Immikkoortortaqarfinni aamma ataatsimiititaliat pilersinneqarput nunani assigiinngitsuni suliassanik nakkutilliisussat. Taamanimiilli Napasuliaq Alapernaarsuiffiup Peqatigiiffiata qullersaqarfiani immikkoortortaqarfinnilu suliassat pisariillisarneqartarput ’sorliit pingaarnerunersut misilittarsinnaaqqullugit’. (Filípimiut 1:9, 10) Kristusip paarsisuutitai oqaluussinermi siulersuisussaapput, ilagiinni ajoqersuisussaallutik Guutillu savaataanik paarsilluartussaallutik. — 1 Timûtiuse 4:16; Eprîarit 13:7, 17; 1 Pîtruse 5:2, 3.
Jesusip siulersuilluarnera
20. Jehovap peqatigiissortai malittuassagutsigik Jesusip inissisimaffia eqqarsaatigalugu suna akuerisariaqarparput?
20 Jehovap peqatigiissortai siuariartortut malittuassagutsigik Jesus Kristusip Guutimit ’ilagiit niaquattut’ inissisimaffeqartitaanera akuerisariaqarparput. (Evfisumiut 5:22, 23) Maluginiarnarportaaq Jesaja 55:4-mi Jehovap oqaasia: „Taanna inuiaqatigiinnut nalunaajaasunngortippara, inuianni akimanertanngortikkakku naalagaaninngortillugulu.“ Jesusip siulersuineq nalunngilaa. Savaatini ilisarisimavai, suliaallu ilisimallugit. Asiami ilagiit arfineq-marluk misissoramigit tallimariarluni oqarpoq: ’Suliatit ilisimavakka.’ (sarĸúmersitat 2:2, 19; 3:1, 8, 15) Aap, Ataatani Jehova assigalugu Jesusip suliavut pisariaqartitavullu nalunngilai. Qinnut najoqqutassaasoq saqqummiutsinnagu ima oqarpoq: ’Ataatassi ajorsaatisi ilisimavai qinnuiginngikkallartilluni.’ — Matîuse 6:8-13.
21. Jesusip ilagiinni kristumiuni siulersuinera qanoq malunniuppa?
21 Jesusip siulersuinera qanoq malunniuppa? Ilaatigut nakkutilliisut kristumiut, ’inunnik tunissutit’ aqqutigalugit. (Evfisumiut 4:8) sarĸúmersitat 1:16-imi nakkutilliisut tanitat Kristusip talerpimmiugisaatut, taassumannga naalakkersorneqartutut, allaatigineqarput. Ullumikkut Jesusip utoqqaanertanik aaqqissuussineq siulersortarpaa, angutit taakku qilammi nunamiluunniit neriugisaqaraluarpata. Soorlu allaaserisap matuma siuliani nassuiarneqartoq anersaaq illernartumit Biibilimi piumasarineqartut tunngavigalugit toqqarneqartarput. (1 Timûtiuse 3:1-7; Títuse 1:5-9) Ukiuni hundredelinni siullerni Jerusalemimi utoqqaanertat siulersuisoqatigiiupput ilagiinnik oqaluussinermillu nakkutilliisut. Ullumikkuttaaq Jehovap peqatigiissortaasa maligassiaq tamanna malippaat.
Malinnittuarit!
22. Siulersuisoqatigiit qanoq ikiuisarpat?
22 ’Kiffamut ilumoorlunilu silatuumut’ sinniisutut Jehovap Nalunaajaasuisa Siulersuisoqatigiivi nunarsuarmi Guutip naalagaaffianut atatillugu soqutigisaanik paarsitinneqarput. (Matîuse 24:45-47) Siulersuisoqatigiit pingaartumik kristumiut ilagiissaat siulersorlugillu anersaakkut ajoqersortarpaat. (apustilit suliait 6:1-6) Uppeqatitta ilaat ajunaarnersuarnit eqqorneqaraangata Siulersuisoqatigiit peqatigiiffiit inatsisitigut akuerisaasut ilaat qinnuigisarpaat ikiueqqullugit illullu naalagaaffilersaarfiillu aserorneqarsimasut iluarsaateqqullugit sanaqqeqqullugilluunniit. Kristumiut ilaat naakkittaatsuliorfigineqaraangata malersorneqaraangataluunniit anersaakkut nakussatsinneqarnissaannut iliuuseqartoqartarpoq. ’Piffissaanngikkaluarpalluunniit’ sapinngisamik iliuuseqartoqartarpoq oqaluussineq ingerlajuarsinnaaqqullugu. — 2 Timûtiuse 4:1, 2, NV.
23, 24. Jehovap innuttaani sumilluunniit nalaataqaraluarpata Jehovap suna isumagiuassavaa, uagullu suna aalajangiuttariaqarparput?
23 Innuttami pissutsinik sunilluunniit nalaanneqarnissaat akuerissagaluarlugu Jehovap anersaakkut inuussutissanik pisariaqartumillu siulersorlugit isumagiuassavai. Guutip aamma qatanngutit angutit akisussaaffillit siuneqassuseqartittarpai paasisaqartittarlugillu pitsanngorsaataasunik aalajangiisinnaaqqullugit peqatigiissortat Guutimit siulersorneqartut siuarsarsinnaaqqullugit pitsaanerulersissinnaaqqullugillu. (5 Moses 34:9; Evfisumiut 1:16, 17) Jehovap silarsuarmi tamarmi ajoqersuganngortitsinermik peqqussummut naalassinnaaqqulluta kiffartornitsinnillu naammassinnissinnaaqqulluta pisariaqartitatsinnik pilersortuarpaatigut. — 2 Timûtiuse 4:5.
24 Tatigilluinnarsinnaavarput Jehovap innuttani aalajaatsut pakatsisinngisaannassagai; ’annikilliornartussamit angisuumit’ aniguisissagai. (sarĸúmersitat 7:9-14; Tussiaat 94:14; 2 Pîtruse 2:9) Pissutissaqarluarpugut — naggatissaq tikivillugu — aallaqqaataaniit tatiginninnerput aalajangiusimassallugu. (Eprîarit 3:14) Taamaattumik aalajangerniarta Jehovap peqatigiissortai malittuarumallugit. (wE 15/1 01)
Qanoq akissavit?
• Sooq oqarsinnaavugut Jehovap peqatigiissortai siuariartortuartut?
• Suup takutippaa Guutip innuttaasa anersaakkut qaammarissiartorneq nuannaarutigisinnaagaat?
• Kristumiut oqaluussisarnerat eqqarsaatigalugu qanoq siuariartortoqarsimava?
• Peqatigiissutsikkut allanngornerit naleqqulluartut suut Jehovap kiffaasa misigisimavaat?
[Atuaqqissaarnermi apeqqutit]
[Qupp. 18-mi assiliartaq]
David assigalugu Jehovap tupinnartuliarpassui taagorsinnaanngilavut
[Qupp. 19-mi assiliartaq]
Guutip savaataasa peqatigiissutsikkut pitsanngorsaanerit naleqqulluartut iluaqutigisimavaat