Nakkutilliisut ilagiinnilu kiffartortut Guutip siulersuineratigut toqqarneqartarput

’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi.’ — APUSTILIT SULIAIT 20:28.

1, 2. Jesaja 60:22 qanoq ililluni eqquukkiartorpa?

JEHOVAP qangali siulittuutigisimavaa ulluni kingullerni maluginiarnartumik pisoqarnissaa. Pruffiiti Esajas aqqutigalugu oqarpoq: „Minnersaat tusindilinngussaaq nukarlersaallu inuiassuanngussalluni. Uanga tassa [Jehova]; piffissanngorpat pilertortumik tamanna naammassissavara.“ — Jesaja 60:22.

² Siulittuutip tamatuma ullumikkut eqquunneqarneranut takussutissaqarpa? Ilaana! 1870-ikkunni USA-mi Alleghenymi Pennsylvaniamiittumi Jehovap kiffai ilagiinnik pilersitsipput. Mikisunnguamiilli aallartinneranit silarsuaq tamakkerlugu ilagiit titusindilikkuutaat pilersiortorneqarput. Oqaluussisartut millionilikkuutaat — inuiassuit — nunarsuaq tamakkerlugu nunani 235-ni ilagiinnut 91.000-init amerlanerusunut ilaapput. Tassuuna Jehovap ’annikilliornartussap angisuup’ qanittumi nalliutilernera sioqqullugu pallorfiginnittunik ilumoortunik katersuinermik siuarsaanera erseqqissumik takuneqarsinnaavoq. — Matîuse 24:21; sarĸúmersitat 7:9-14.

3. ’Ataatap Ernerullu anersaallu illernartup aqqanut kuisinneq’ qanoq paasisariaqarpa?

³ Jehovamut namminneq tunniulluinnareerlutik millionilikkuutaat taakkua Jesusip peqqussutaa malillugu ’Ataatap Ernerullu anersaallu illernartup aqqanut kuisittarput’. (Matîuse 28:19) Tunniulluinnarsimasut ’Ataatap aqqanut’ kuisinnerat, isumaqarpoq Jehova ataatamittut qilammiusutut inuunermillu Tunisisutut akuerigaat taassumalu kisimi oqartussaaneranut naalatsigitittut. ’Ernerup aqqanut’ kuisinneq isumaqarpoq Jesus Kristus Utertitsisumittut, Siulersuisumittut Kunngimittullu nassuerutigigaat. Aamma akueraat inuunerminni Guutip anersaavanit illernartumit imaluunniit pissaaneranit sulissutiginnittumit siulersussagaatik — tassuuna ersersippaat ’anersaap illernartup aqqanut’ kuisillutik.

4. Kristumiut Guutip oqaasianut qanoq kiffanngortitaasarpat?

⁴ Ajoqersuganngorlaat kuisinnermikkut Guutip oqaasianut kiffanngortitaasarput. Kimit kiffanngortitaasarpat? Korintumiunut agdlagkat aípait 3:5-imi allassimasut taakkununnga naleqquttut oqartoqarsinnaavoq: ’[Guutip oqaasianik kiffaasutut] pisinnaassuserput Guutimit pivoq.’ Jehova Guutimit kiffanngortitaanermit ataqqinaataanerusumik takorluuisinnaanngillat. Kuisereernermik kingorna Guutip anersaavata siulersuinera akueritillugu oqaasialu maleruartillugu, oqaatsimut kiffaasutut ’nutaarsiassamik nuannersumik’ oqaluussisutut  anersaakkut siumukartuassapput. — Matîuse 24:14; apustilit suliait 9:31.

Demokratii tunngaviginagu, Guutilli siulersuineratigut toqqarneqarneq

5. Kristumiut nakkutilliisut ilagiinnilu kiffartortut demokratii tunngavigalugu toqqarneqartarpat? Nassuiaruk.

⁵ Oqaluussisartut amerliartuinnartut pisariaqartitaat matussutissinniarlugit nakkutilliisut piukkunnaatillit ilagiinnilu kiffartortut pikkorissut toqqarneqartariaqarput. (Filípimiut 1:1) Angutit anersaakkut piukkunnaatillit taakku qanoq toqqarneqartarpat? Kristumiuunerartut periaasii atorneqanngillat. Assersuutigalugu kristumiut nakkutilliisut demokratii tunngavigalugu ilagiinni amerlanerussuteqartut qinersineratigut qinerneqartanngillat. Naamik, Guutip siulersuineratigut toqqarneqartarput. Qanoq paasisariaqarpa?

6. (a) Guutip aqutsinera ilumoortoq suua? (b) Sooq nakkutilliisut ilagiinnilu kiffartortut Guutip siulersuineratigut toqqarneqartarpat?

⁶ Naatsumik oqaatigissagaanni Guutip siulersuinera, teokratii, ilumoortoq tassaavoq Guutip aqutsinera. Jehovap Nalunaajaasui kajumillutik Guutip aqutsineranut naalatsigitittarput taassumalu piumasaatut iliorniarlutik suleqatigiittarlutik. (Tussiaat 143:10; Matîuse 6:9, 10) Ilagiinni kiffartortut kristumiullu nakkutilliisut imaluunniit utoqqaanertat Guutip siulersuineratigut toqqarneqartarput, angutit akisussaaffimmut piukkunneqarnerinut toqqarneqarnerinullu tunngatillugu Guutip aaqqissussinera, oqaasiani Biibilimi allaatigineqartoq, maleruarneqartarmat. Jehova ’tamanut naalagaanersuugami’ soorunami aalajangersinnaavaa peqatigiissortani takussaasoq qanoq ingerlassasoq. — 1 Israelikkut 29:11; Tussiaat 97:9.

7. Jehovap Nalunaajaasui qanoq siulersorneqartarpat?

⁷ Kristumiuuneraqatigiinni upperisarsioqatigiit amerlasuut assiginagit, Jehovap Nalunaajaasuisa namminneq aalajangertanngilaat upperisarsiornikkut aqutseriaatsimit qanoq ittumit siulersorneqassanerlutik. Kristumiut ilumoorusuttut taakkua Jehovap najoqqutassiai maleruarumavaat. Ilagiinnit, palasinit inunnilluunniit allanit nakkutilliisuusut toqqarneqarneq ajorput. Toqqaanernut tamakkununnga ilagiit avataannit akuliunniartoqaraluarpat Jehovap innuttai eqqortuusup akerlianut akuersiinnarumassanngillat. Ukiuni hundredelinni siullerni apustilit ima oqartut isiginnittaasiattut aalajaatsumik isiginnittaaseqarput: ’Guuti inunnit naalattariaqarneruvoq.’ (apustilit suliait 5:29) Taamaalillutik Jehovap Nalunaajaasui sutigut tamatigut Guutimut naalatsigitittarput. (Eprîarit 12:9; Jâko 4:7) Guutip siulersuinera maleruaraanni Guutimut iluarisaanarpoq.

8. Demokratii tunngavigalugu siulersorneqarneq Guutimillu siulersorneqarneq sukkut assigiinngissuteqarpat?

⁸ Naalagarsuarmut Jehovamut kiffaasutut paasisariaqarpavut demokratii tunngavigalugu siulersorneqarnerup Guutimillu siulersorneqarnerup assigiinngissuutaat. Inuit demokratii tunngavigalugu qinigaagaangata qinersisaasa amerlassusii naapertorlugit gruppit assigiinngitsut sinniisoqassapput. Amerlanertigut qineqqusaartoqartarpoq qineqqusaartut, amerlanerit aalajangiinerisigut qinerneqartarlutik. Guutip siulersorneratigut toqqaanerni taamaattoqartanngilaq. Toqqaanerit taakku inunninngaanniinngillat, peqatigiiffimmit inatsisitigut akuerisaasuminngaaneernatilluunniit. Paulusip Galatiamiut allaffigigamigit ’inunnit pinnani inukkullu pinnani, Jesus Kristusikkulli  Guutikkullu Ataatakkut taassuminnga toqusunit makititsisukkut’ apustiliulluni, isumaqarunarpoq Jesusip Jehovallu ’Guutimik nalusunut apustilitut’ toqqarsimagaanni. — Rûmamiut 11:13; Galâsiamiut 1:1.

Anersaaq illernartukkut toqqarneqarneq

9. apustilit suliait 20:28-mi kristumiut nakkutilliisut toqqarneqartarnerat pillugu qanoq allassimasoqarpa?

⁹ Paulusip Efesusimi nakkutilliisunut eqqaasitsissutigaa Guutimit anersaaq illernartukkut toqqarneqarnerat. Ima oqarpoq: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai nammineq aamminik pissarsiai paareqqullugit.’ (apustilit suliait 20:28) Nakkutilliisut kristumiut taakku anersaaq illernartumit siulersortittuartariaqarput Guutip savaataanik paarsitillutik. Angut ilagiinni suliaqartoq Guutip najoqqutassiaanik maleruaajunnaarpat piffissap ingerlanerani anersaaq illernartup suliaanik suliaqartikkunnaassavaa.

10. Guutip siulersuineratigut toqqaanernut atatillugu anersaaq illernartoq qanoq sunniuteqartarpa?

¹⁰ Anersaaq illernartoq toqqaanernut atatillugu qanoq sunniuteqartarpa? Pingaarnerpaamik ilagiinni anersaakkut nakkutilliisussanut piumasaqaatit atuakkami anersaamit illernartumit isumassarsiarititaasumi allassimapput. Timoteusimut Titusimullu allakkamini Paulusip nakkutilliisut ilagiinnilu kiffartortut piumasaqaatit naammassisariaqagaat eqqartorpai. Piumasaqaatit assigiinngitsut 16-it missaat eqqaavai. Assersuutigalugu nakkutilliisut assuarnaatsuusariaqarput, ileqquminni mianersortuullutik, isummamikkut peqqissuullutik, ippinnaatsuullutik, inoroorsaartuullutik, ajoqersuisinnaallutik ilaqutariinnilu ittuusutut maligassaalluartuusariaqarlutik. Imigassanik aalakkoornartutornermut oqimaaqatigiissumik isiginnittaaseqartariaqarput, aningaaserituussanatik imminnullu naalakkersinnaassuseqartariaqarlutik. Tamatumunnga assingusumik ilagiinni kiffartortutut toqqarneqarusuttunut qutsisumik piumasaqaateqarpoq. — 1 Timûtiuse 3:1-10, 12, 13; Títuse 1:5-9.

11. Ilagiinni akisussaaffeqarusuttut piumasaqaatit suut inooriaaserisariaqarpaat?

¹¹ Piumasaqaatit tamakkua takutilluarpaat Jehovamik pallorfiginninnermi siulersuisut kristumiutut maligassaalluartariaqartut. Anersaaq illernartup sunniuteqarnera angutini ilagiinni akisussaaffeqarusuttuni takussutissaqartariaqarpoq. (2 Timûtiuse 1:14) Takuneqarsinnaasariaqarpoq Guutip anersaavata inerititaanik inerititaqartut, soorlu ’asanninnermik, nuannaarnermik, eqqissinermik, kamajuinnermik, inussiarnernermik, ajunngitsuliornermik, uppernermik, saamanermik imminullu naalakkersorsinnaanermik’. (Galâsiamiut 5:22, 23, NV) Inerititat taamaattut uppeqatiminnut allanullu pissusilersornerminni ersersissavaat. Soorunami nakkutilliisut ilaat anersaap inerititaasa ilaannik aalajangersimasunik inerititaqarnerusarput, ilaalli piumasaqaatinik allanik nammassisaqarnerusarlutik. Ilagiinnili kiffartortutut nakkutilliisutulluunniit toqqarneqarusuttut tamarmik inooriaatsiminni tamatigut takutittariaqarpaat anersaakkut ittut soqutigigitik Guutip oqaasiani piumasarineqartutut inooriaaseqarlutik.

12. Kikkut anersaaq illernartukkut toqqarneqartutut oqaatigineqarsinnaappat?

¹² Paulusip allat kajumissaarpai imminut malinnittunngoqqullugit nakimaalluni taamaaliorsinnaavoq nammineq Jesus Kristus ’pilluta maligassaqartitsisoq, tumini atuaqqullugit’ malinniartaramiuk. (1 Pîtruse 2:21; 1 Korintumiut 11:1) Taamaattumik oqarsinnaavugut  nakkutilliisutut ilagiinnilu kiffartortutut toqqarneqarnerminni Biibilimi piumasaqaatigineqartutut inooriaaseqartut anersaaq illernartukkut toqqarneqarsimasut.

13. Ilagiinni qatanngutit suliaqartussanik piukkussisut anersaaq illernartup qanoq ikiortarpai?

¹³ Aamma anersaap illernartup nakkutilliisussanik toqqaanermut piukkussinermullu atatillugu sunniuteqarnera allamik takussutissaqarpoq. Jesus oqarpoq ’Ataatap qilammiusup imminit qinusut anersaamik illernartumik tunissagai’. (Lúkarse 11:13) Taamaattumik ilagiinni utoqqaanertat katersuukkaangamik angutit kikkut ilagiinni suliassanut piukkunnaateqarnersut oqaloqatigiissutiginiarlugit, Guutip anersaava siulersoqqullutik qinnuigisarpaat. Piukkusatik Guutip oqaasiani isumassarsiarititaasumi allasimasunik tunngavilersortarpaat, anersaaq illernartullu eqqarsaatigineqartoq Biibilimi piumasarineqartutut inooriaaseqarnersoq nalilersinnaatittarpaa. Qatanngutit angutit piukkussisut qallikkut pissusiannit ilinniagaqarsimasuttulluunniit tunuliaqutaannit piginnaassusiinilluunniit sunnerneqartariaqanngillat. Pingaarnerpaamilli misissortariaqarpaat inuttut anersaakkut ittunik pingaartitsisuunersoq ilagiinniittut nangaanatik anersaakkut siunnersortinniarlutik saaffigisinnaasaat.

14. apustilit suliait 6:1-3 sumik ilinniarfigisinnaavarput?

¹⁴ Utoqqaanertaqatigiit nakkutilliisut angalasartut peqatigalugit qatanngutit angutit utoqqaanertassatut ilagiinnilu kiffartortussatut piukkutarpaat, toqqaaneqarnerli ukiuni hundredelinni siullerni maligassiarineqartoq naapertorlugu ingerlanneqartarpoq. Taamanikkut suliassamut pingaartumut angutinik anersaakkut piukkunnaatilinnik pisariaqartitsisoqalerpoq, taamaattumillu siulersuisoqatigiit ima siunnersuipput: ’Ilassinnik angutinik arfineq-marlunnik tusaamasaalluartunik anersaamillu ilisimassummillu ilumioqangaartunik  qinerleritsi isumagisariaqartumut tamatumunnga ivertitassatsinnik.’ (apustilit suliait 6:1-3) Angutit pissutsinut pineqartunut ilisimannittut piukkussipput, angutilli Jerusalemimiittut pingaarnerpaamik akisussaaffillit toqqaasussaapput. Ullumikkuttaaq periaaseq tamatumunnga assingusoq malinneqartarpoq.

15. Siulersuisoqatigiit qanoq inissisimappat qatanngutinik angutinik akisussaaffilerlugit toqqaanermi?

¹⁵ Jehovap Nalunaajaasuisa Siulersuisoqatigiivisa toqqaannartumik immikkoortortaqarfinni tamani ataatsimiititalianut ilaasortat toqqartarpaat. Suliassanut pingaartunut tamakkununnga kikkut toqqarneqarsinnaanersut aalajangerneqassagaangat Siulersuisoqatigiit Jesusip oqaasii eqqaamasarpaat: ’Amerlasuunik tunineqartoq amerlasuunik piniarfigineqassavoq, amerlasuunillu paarseqquneqartoq amerlanernik piumaffigineqassavoq.’ (Lúkarse 12:48) Siulersuisoqatigiit immikkoortortaqarfiit ataatsimiititaliaannut ilaasortat saniatigut aamma Betelimi utoqqaanertat nakkutilliisullu angalasartut toqqartarpaat. Qatanngutilli angutit akisussaaffillit sinnerlutik allanik toqqaasinnaatippaat. Periaaseq taanna aamma Biibilimik tunngaveqarpoq.

’Ilagiit utoqqaanertassaannik ivertitsigit, soorlu inakkikkit’

16. Sooq Paulusip Titus Kretami qimappaa, tamatumalu Guutip siulersuneratigut toqqaanerit pillugit sumik paasitippaatigut?

¹⁶ Paulusip suleqatini Titus oqarfigaa: ’Imaattoq pillugu Kretami qimappakkit: naammatsinneqanngitsut ilinnut naammatseqqullugit, illoqarfinnilu tamani ilagiit utoqqaanertassaannik ivertitseqqullutit, soorlu inakkikkit.’ (Títuse 1:5) Nangilluni Paulusip eqqaavai angutit suliassamut tamatumunnga piukkunnaatigisariaqagaat Titusip eqqumaffigisassai. Taamaattumik ullumikkut Siulersuisoqatigiit immikkoortortaqarfinni qatanngutit angutit piukkunnaatillit toqqarsimavaat sinnerlutik utoqqaanertassanik ilagiinnilu kiffartortussanik toqqaasinnaatillugit. Pingaartorujussuuvoq Siulersuisoqatigiinnut sinniisut toqqaanerminni Biibilimi najoqqutassiat paasilluarlugillu maleruassagaat. Taamaalillutik Siulersuisoqatigiit siulersuineratigut nunarsuaq tamakkerlugu Jehovap Nalunaajaasuisa ilagiivini angutit piukkunnaatillit kiffartortut toqqarneqartarput.

17. Nakkutilliisussanik ilagiinnilu kiffartortussanik toqqaanissamut piukkussinerit immikkoortortaqarfinni kikkut isumagisarpaat?

¹⁷ Nakkutilliisutut ilagiinnilu kiffartortutut toqqaasoqassagaangat piukkussinerit Napasuliaq Alapernaarsuiffiup Peqatigiiffiata immikkoortortaqarfiisa ilaannut nassiunneqartarput, tassanilu angutit misilittagaqarluartut Guutip anersaavata siulersuinera tatigalugu taakkuninnga toqqaasarput. Angutit taakkua akisussaaffitsik nalunngilaat, paasivaallu ’assamminnik patitassaminnut pinasuarpallaassanatik, alla ajortuliaasigut peqatigileqqunagu’. — 1 Timûtiuse 5:22.

18, 19. (a) Toqqaanerit ilaat qanoq nalunaarutigineqartarpat? (b) Qatanngutit angutit piukkunnaatillit piukkullugillu toqqarneqaraangata periaaseq suna malinneqartarpa?

¹⁸ Toqqarneqarnerit ilaat peqatigiiffiup inatsisitigut akuerisaasup naqitsisaanit naqissusikkat allakkatigut nalunaarutigineqartarput. Allakkat taamaattut immaqa ilagiinni ataatsini qatanngutit angutit arlallit toqqarneqarnerinut atorneqartarput.

¹⁹ Guutip siulersuineratigut toqqaanerit Guutip ernera nunarsuarmilu ’kiffaa ilumoorlunilu silatooq’ takussaasoq taassumalu Siulersuisoqatigiivi aqqutigalugit Jehovameersuupput. (Matîuse 24:45-47) Qatanngutit angutit akisussaaffeqalernissaminnut  piukkunneqartarnerat toqqarneqarnerallu tamatigut anersaap illernartup siulersuineratigut naammassineqartarput. Taamaappoq piukkunnaatit piumasarineqartut Guutip oqaasiani allassimammata, toqqarneqartullu takutittarmagu anersaap illernartup inerititaanik inerititaqarluni. Taamaattumik toqqaanerit anersaaq illernartumit toqqaanertut isigineqartariaqarput. Ullumikkut nakkutilliisut ilagiinnilu kiffartortut Guutip siulersuineratigut toqqarneqartarput, soorluttaaq ukiuni hundredelinni siullerni taamaattoq.

Jehovap siulersunera qujamasuutigaarput

20. Sooq Davidip Tussiaat 133:1-imi allassimasaatut oqarsinnaavugut?

²⁰ Ullumikkut Guutip naalagaaffianik oqaluussissutiginninnermi anersaakkut siumukarfiusumi Guutillu siulersuineratigut amerliartorfiusumi qujamasuutigaarput Jehova nakkutilliisunik ilagiinnilu kiffartortunik toqqaasarnermut tunngatillugu akisussaanerpaammat. Aaqqissuussineq Biibilimik tunngaveqartoq tamanna iluaqutigalugu Jehovap Nalunaajaasuitut Guutip najoqqutassiai qutsissut naapertuilluartullu maleruarsinnaavavut. Qatanngutillu angutit toqqarneqartut isiginnittaasiat ilumoorlutillu ilungersorneri Jehovap kiffaasa eqqissinermik ataasiussutsimillu nuannersunik misigisarnerannut pissutaaqataapput. Taamaattumik tussiaasiortoq David assigalugu ima oqarsinnaavugut: „Iluarlunilu nuannillaaraaq qatanngutigiit isumaqatigiillutik najortigiileraangata.“ — Tussiaat 133:1.

21. Jesaja 60:17 ullumikkut qanoq eqquukkiartorpa?

²¹ Qujamasuutigaarput Jehovap oqaatsimigut anersaaq illernartukkullu siulersortarmatigut. Tamatumunnga atatillugu Jesaja 60:17-imi allassimasoq naleqqulluarpoq: „Taarteqartissavara kanngussak kuultimik, savimineq sølvimik, qisuk kanngussammik, ujarallu saviminermik. Eqqissineq ilinnut naalaganngortissavara, iluarnerlu naalakkersortigissavat.“ Jehovap Nalunaajaasui Guutip siulersuinera naapertorlugu periaaseqaleriartortillugit misigivugut Guutip nunarsuarmi peqatigiissortani tamaat pilluaqqugaa, soorlu allassimaffimmi erseqqissarneqartoq.

22. Suna qujamasuutigaarput, qanorlu iliornissamut aalajangertariaqarpugut?

²² Aaqqissuussinerit Guutimeersut maleruakkavut qujamasuutigeqaavut. Aamma nakkutilliisut ilagiinnilu kiffartortut Guutip siulersuineratigut toqqarneqartut suliaat ilungersunartut nalerisimaarnartullu pingaartippavut. Ataatarput qilammiusoq asannittoq uummatikkut iluunngarluta unnersiutigaarput anersaakkut pisuunngortimmatigut pilluaqqungaarlutalu. (Ussatit 10:22) Taamaattumik aalajangerniarta Jehovap peqatigiissortai malittarniarlugit. Pingaarnerpaamillu Jehovap aqqata angisuup illernartullu unnersiutiginissaanut ataqqinaatissaanullu ataasiussuseqarluta kiffartoqatigiittuarta. (wE 15/1 01)

Qanoq akissavit?

• Sooq oqarsinnaavugut nakkutilliisut ilagiinnilu kiffartortut demokratii tungaviginagu Guutip siulersuineratigut toqqarneqartartut?

• Angutit kristumiut anersaaq illernartoq aqqutigalugu akisussaaffinnut qanoq toqqarneqartarpat?

• Nakkutilliisut ilagiinnilu kiffartortut toqqarneqarneranni siulersuisoqatigiit qanoq inissisimaffeqarpat?

• Guutip siulersuineratigut toqqarneqarnerit pillugit sooq Jehovamut qujamasuttariaqarpugut?

[Atuaqqissaarnermi apeqqutit]

[Qupp. 15-mi assiliartat]

Nakkutilliisut ilagiinnilu kiffartortut Guutip siulersuineratigut toqqarneqartarput