Nalunaarut immikkut ittoq

OKTOBARIP 7-iani 2000-imi Watch Tower Bible and Tract Society of Pennsylvania-p ukiumoortumik ataatsimiinnerata naalernerani aqutsisoq John E. Barr Siulersuisoqatigiinneersoq immikkut nalunaaruteqarpoq. Nalunaarut taanna Theodore Jaraczip aamma Daniel Sydlikip ullormi tamatumani siusinnerusukkut oqalugiaatigisaata nanginneraa. — Takuuk atuagassiami matumani quppernerit 12-16 aamma 28-31.

Pingaarutilimmik erseqqissaalluni qatanngut Barr ima oqarpoq: „’Kiffaq ilumoorlunilu silatooq’ taassumalu Siulersuisoqatigiivi peqatigiiffinnut inatsisitigut akuerisaasunut paareqquneqartunit pingaarnerungaartunik annertunerungaartunillu paarsitinneqarput. Peqatigiiffiit taamaattut malittarisassaanni siunertarisap allassimanerani oqartussaanerup killeqarnera naatsorsuutigineqarpoq. Naalakkattali Jesus Kristusip kiffani ilumoortut ’pigisaminut tamanut’, tassa maani nunarsuarmi Guutip naalagaaffiata soqutigisaanut, paarsisunngortippai. — Matîuse 24:45-47.

Pennsylvaniami Peqatigiiffik eqqarsaatigalugu qatanngut Barr nangippoq: „Watch Tower Bible and Tract Society of Pennsylvania 1884-imi pilersinneqaramili oqaluttuarisaanitsinni pingaarutilimmik inissisimaffeqarpoq. Taamaattorli tassaaginnarpoq peqatigiiffik ’kiffap ilumoorlunilu silatuup’ pisariaqartinneqaraangat atorsinnaasaa.“

Qatanngutip Sydlikip qatanngutillu Jaraczip oqalugiaatiminni nassuiarpaat ’kiffap ilumoorlunilu silatuup’ Naalakkap nunarsuarmi pigisaanik tamanik paarsitinneqarnini, angutinik piukkunnaatilinnik ’savanut allanut’ ilaasunik allaffissornikkut suliassat ilaannik akisussaaffiliinissaminut akornutiginngikkaa. (Juánase 10:16) Biibilimilu piumasarineqanngilaq peqatigiiffiit Jehovap Nalunaajaasuisa atortagaasa siulersuisui tamarmik ilaalluunniit tassaassasut kristumiut tanitat.

Qatanngutip Barrip tusarnaartut oqaluttuuppai Jehovap Nalunaajaasuisa Siulersuisoqatigiivinut ilaasortat ilaat peqatigiiffinni ’kiffap ilumoorlunilu silatuup’ USA-​mi atortagaanni tamani siulersuisutut nammineq piumassutsiminnik ungasinngitsukkut tunuartut. Kingoraarlugit qatanngutit angutit akisussaassuseqarluartut ’savanut allanut’ ilaasut qinerneqarput.

Qularnanngitsumik aalajangerneq tamanna iluaqutaasussaavoq, anersaakkut nerisassiornermut allatigullu silarsuaq tamakkerlugu qatanngutigiit anersaakkut pisariaqartitaasa isumaginissaannut Siulersuisoqatigiinnut piffissaqartitsisoq.

Naggataatigut aqutsisup tusarnaartut nuannaartut ima oqaluttuuppai: „Nakkutilliisut misilittagaqarluartut inatsisit tungaatigut allaffissornikkullu akisussaaffiit ilaannik akisussaaffeqaraluarlutik . . . tamarmik Siulersuisoqatigiit anersaakkut siulersuinerisa ataanni kiffartorput. . . . Jehova qinnuigaarput peqatigiilluta piumasaatut iliorniarnivut pilluaqqoqqullugit, aqqata angisuup unnersiutigineqaatissaanut ataqqinaatissaanullu.“