Siulersuisoqatigiit peqatigiiffimmit inatsisitigut akuerisaasumit qanoq allaassuteqartut

WATCH TOWER BIBLE AND TRACT SOCIETY OF PENNSYLVANIA januaari 1885-imiilli ukiumoortumik ataatsimiititsisarpoq. 1800-kkut naalerneranni kristumiunik tanitanik katersuinermi peqatigiiffiup tamatuma siulersuisuinut ilaasortat tamarmik qilammi inuunissamik neriugisaqarput. Taamaattuaannangajassimavorlu.

Ataasiarluni taamaassimanngilaq. 1940-mi Hayden C. Covington Peqatigiiffiup siulersuisuinut ilaasortatut qinerneqarpoq. Taanna Peqatigiiffiup inatsisitigut siunnersortigaa ’savanullu allanut’ ilaalluni nunarsuarmi inuunissamik neriugisalik. (Juánase 10:16) 1942-miit 1945 tikillugu Peqatigiiffimmut vicepræsidentiuvoq. 1945-mi qatanngut Covington siulersuisunut ilaasortatut tunuarpoq taamanikkut Jehovap piumasaatut, tassa Pennsylvaniami Peqatigiiffiup siulersuisui tamarmik kristumiut tanitaasussaasut, isigineqartartoq naapertorlugu. Lyman A. Swinglep Hayden C. Covington siulersuisunut ilaasortatut kingoraarpaa, Frederick W. Franzilu vicepræsidentitut qinerneqarluni.

Sooq Jehovap kiffai isumaqarpat Watch Tower Bible and Tract Society of Pennsylvania-p siulersuisui tamarmik kristumiut tanitaasussaasut? Taamani Pennsylvaniami Peqatigiiffiup siulersuisuinut ilaasortat amerlanerusutigut tassaammata Jehovap Nalunaajaasuisa Siulersuisoqatigiivi, tassaajuaannartut angutit tanitat.

Ukiumoortumik ataatsimiinneq pingaarutilik

1944-mi oktobarip ulluisa aappaanni Pittsburghimi ukiumoortumik ataatsimiinnermi Pennsylvaniami Peqatigiiffiup ilaasortaasa aalajangersakkat arfinillit Peqatigiiffiup malittarisassiaanik allannguisut isumaqatigiissutigaat. Malittarisassatoqqat naapertorlugit Peqatigiiffiup sulineranut aningaasatigut tapersiisut ilaasortaanermut uppernarsaammik tunineqassapput qinersisinnaatitsisumik, allanguutilli pingajuata tamanna atorunnaarsippaa. Ukiumoortumik ataatsimiinneq pillugu nalunaarusiami allassimavoq: „Peqatigiiffik 500-innarnik ilaasortaqarsinnaavoq. . . . Qinerneqartut Peqatigiiffimmut piffissaq tamaat kiffartortuusariaqarput imaluunniit Jehovap Nalunaajaasuisa ilagiivisa ilaanni piffissap ilaannaa kiffartortuullutik Naalakkatullu anersaaqartariaqarlutik.“

Taamanimiilli Peqatigiiffiup siulersuisuinut ilaasortat Jehovamut tunniulluinnarsimasut akornannit qinerneqartarput, Guutip naalagaaffiata sulinera siuarsarniarlugu qanoq annertutigisumik aningaasatigut tapersiinerat apeqqutaatinnagu. Pitsanngoriartuaarneq tamanna Jesaja 60:17-imi siulittuutigineqartumut naapertuulluarpoq: „Taarteqartissavara kanngussak kuultimik, savimineq sølvimik, qisuk kanngussammik, ujarallu saviminermik. Eqqissineq ilinnut naalaganngortissavara, iluarnerlu naalakkersortigissavat.“ Siulittuummi ’naalakkat’ aamma ’naalakkersortit’ eqqaaneqarnerisa takutippaa Jehovap innuttaasa akornanni aaqqissuussaanikkut ingerlatseriaatsinut atatillugu pitsanngoriartoqarnissaa pineqartoq.

Guutip siulersuinera tunngavigalugu aaqqissuussinermik allannguineq pingaarutilik tamanna ’unnuit ullaallu 2300-t’ Daniel 8:14-imi eqqaaneqartut naalerneranni pisimavoq. Maanna ’illernartuut kingumut pissusissamisut ilerpoq’.

1944-mili ataatsimiinnerup pingaarutillip kingorna suli pingaartunik apeqquteqarpoq akineqanngitsunik. Taamani Siulersuisoqatigiit amerlanerusutigut tassaammata Pennsylvaniami Peqatigiiffiup siulersuisuisa ilaasortaat arfineq-marluk, ima paasisariaqarpa Siulersuisoqatigiit  kristumiunit tanitanit arfineq-marlunnit amerlanerusunik ilaasortaqarsinnaanngitsut? Siulersuisullu Peqatigiiffiup tamatuma ilaasortaanit qinerneqartarmata, ima paasisariaqarpa ukiut tamaasa ukiumoortumik ataatsimiinnermi ilaasortat taakkua Siulersuisoqatigiit qinertaraat? Watch Tower Bible and Tract Society of Pennsylvania-mi siulersuisut tassaappat Siulersuisoqatigiinni ilaasortat, imaluunniit peqatigiit assigiinngitsut marluk pineqarpat?

Ukiumoortumik ataatsimiinneq pingaarutilik alla

Apeqqutit taakku 1971-imi oktobarip aallaqqaataani ukiumoortumik ataatsimiinnermi akineqarput. Tamatumani oqalugiartut ilaata eqqaavaa ’kiffap ilumoorlunilu silatuup’ Siulersuisoqatigiivi Watch Tower Bible and Tract Society of Pennsylvania piunngikkallarmalli ukiuni hundredelippassuarni piusut. (Matîuse 24:45-47) Pennsylvaniami Peqatigiiffiup pilersinneqarnera ukiunik 1800-nik amerlanerusunik sioqqullugu ukiumi 33-mi piinsip ulluani siulersuisoqatigeeqalerpoq. Aallaqqaammut siulersuisoqatigiit taakku tassaapput apustilit aqqaneq-marluk. Tassa angutit arfineq-marluinnaanngillat. Kingusinnerusukkut amerlanerulersimagunarput, allassimavormi ’Jerusalemimi apustilit utoqqaanerillu’ siulersuisut. — apustilit suliait 15:2.

1971-imi oqalugiartup qulaani eqqaaneqartup nassuiarpaa Watch Tower Society-mi ilaasortat Siulersuisoqatigiinnut ilaasortassanik tanitanik qinersisinnaanngitsut. Sooq? „’Kiffaqatigiit’ Siulersuisoqatigiivi inunnit qinerneqarneq ajormata. Jesus Kristusimit, kristumiut ilagiissaasa ilumoortut niaquannit ’kiffallu ilumoorlunilu silatuup’ naalagaanit . . . toqqarneqartarput“. Ersarippoq Siulersuisoqatigiinnut ilaasortaasut peqatigiiffiup suulluunniit inatsisitigut akuerisaasup ilaasortaannit qinerneqarsinnaanngitsut.

Nangilluni oqalugiartoq pingaarutilinnik oqaaseqarpoq: „Siulersuisoqatigiit — Peqatigiiffiup siulersuisuitut — præsidenteqanngillat, vicepræsidenteqaratik, allatseqaratik aningaaserisoqaratillu taassumunngalu ikiorteqaratik. Aqutsisoqaannarput.“ Ukiorpassuarni Pennsylvaniami Peqatigiiffimmi præsidenti aamma Siulersuisoqatigiinni nuimanersaavoq. Taamaakkunnaassaarli. Siulersuisoqatigiinnut ilaasortat misilittagaat assigiinngillat piginnaanerilu assigiinnatik, tamarmilli assigiimmik akisussaaffeqarput. Oqalugiartoq nangippoq: „Siulersuisoqatigiinnut ilaasortaasoq kinaluunniit siulersuisunut taakkununnga aqutsisuusinnaavoq Watch Tower Bible and Tract Society of Pennsylvania-mut præsidentiunngikkaluarluni. Apeqqutaaginnarpoq Siulersuisoqatigiinni ilaasortat aqutsisutut qanoq kingoraartaannersut.“

1971-imi ukiumoortumik ataatsimiinnermi puiuaatsumi ersarissumik nassuiarneqarpoq Siulersuisoqatigiinnut ilaasortat tanitat Pennsylvaniamilu Peqatigiiffiup siulersuisui imminnit immikkoortinneqartariaqartut. Siulersuisoqatigiinnulli ilaasortat Peqatigiiffiup siulersuisuinut ilaasortaaginnarput. Ullumikkulli ima aperisariaqarpugut: Biibilimi tunngavissaqarpa Watchtower Bible and Tract Society of Pennsylvania-mi siulersuisut Siulersuisoqatigiinnut ilaasortaasariaqarnerannut?

Naamik. Pennsylvaniami Peqatigiiffik Jehovap Nalunaajaasuisa kisiat inatsisitigut sakkuginngilaat. Peqatigiiffiit allat, assersuutigalugu Watch Tower Bible and Tract Society of New York, Incorporated, USA-mi sulinitsinnut oqilisaapput. Ersarippoq Jehovap peqatigiiffik taanna pilluaqqusimagaa, aamma naak siulersuisunut ilaasortat amerlanerit ’savanut allanut’ ilaagaluartut. Tuluit Nunaanni International Bible Students Associasion, nunanilu allani peqatigiiffiit inatsisitigut akuerisaasut allat Guutip naalagaaffiata soqutigisaasa siuarsarneqarneranni iluaqutigineqarsimapput. Peqatigiiffiit taakku tamarmik nunarsuaq tamakkerlugu nutaarsiassap nuannersup oqaluussissutigineqarnerani pingaaruteqarput. Sumiikkaluarunilluunniit siulersuisullu kikkuugaluarpataluunniit Guutip siulersuinera tunngavigalugu aqunneqartarput Siulersuisoqatigiinnillu atorneqartarlutik. Peqatigiiffiit taakku Guutip naalagaaffiata soqutigisaasa siuarsarneqarneranni immikkut suliaqartinneqarput.

Peqatigiiffiit inatsisitigut akuerisaasut taakku iluaqutigaavut, taamaalillutalu nunani  assigiinngitsuni inatsisit maleruarlugit, Guutip oqaasiani piumasarineqartutut. (Jeremia 32:11; Rûmamiut 13:1) Peqatigiiffiit inatsisitigut akuerisaasut iluaqutigalugit Biibilinik, atuakkanik, atuagassianik assigisaannillu naqiterinikkut Naalagaaffimmik tusarliussaq siaruarsarparput. Aamma illuuteqarnermi, ikiuiniarnerni nassiussinerni, ataatsimeersuarfissanik attartornermi ilaallu ilanngullugit Peqatigiiffiit inatsisitigut akuerisaasut taamaattut pisariaqartinneqarput. Peqatigiiffiit inatsisitigut akuerisaasut taamaattut iluaqutigisinnaagatsigik qujamasoqaagut.

Jehovap aqqa pingaarnerpaatinneqarpoq

1944-mi Watch Tower Bible and Tract Society of Pennsylvania-p siunertaa erseqqissarniarlugu peqatigiiffiup tamatuma malittarisassaani immikkoortoq II allanngortinneqarpoq. Malittarisassat naapertorlugit Peqatigiiffiup siunertaa pingaarneq imaappoq: „Guutip naalagaaffia Kristus Jesusimit naalakkersorneqartoq pillugu iivangkiiliu inuiaqatigiinnut tamanut oqaluussissutigineqarnissaa Guutip ajugaqanngitsup JEHOVAP aqqata, oqaasiata qutsinnerusaartuuneratalu nalunaajaassutigineqarnissaa.“

1926-miilli ’kiffap ilumoorlunilu silatuup’ Jehovap aqqata pingaanerpaatinneqartarnera isumagisimavaa. Ukioq 1931 tamatumunnga atatillugu immikkut ittuuvoq, Biibilimik Atuaqqissaartartut ukioq taanna Jehovap Nalunaajaasuinik taaguuteqalermata. (Jesaja 43:10-12) Atuakkat Guutip aqqanik pingaartitsisut ilaat ukuupput: Jehova (1934; qallunaatut 1937), „Lad dit navn blive helliget“ (’Aqqit illernarsili,’ 1961; qallunaatut 1965) aamma „Nationerne skal kende at jeg er Jehova“ — Hvordan? (’Inuiaqatigiit misigissavaat uanga tassaasunga Jehova’ — qanoq ilillutik? 1971; qallunaatut 1972).

Tamatumunnga atatillugu eqqaaneqartariaqarportaaq Ny Verden-Oversættelsen af De Hellige Skrifter, tamakkerlugu 1960-imi tuluttut saqqummersinneqartoq. Nutsikkami taassumani tamatigut Jehovap aqqa allanneqartarpoq allassimaqqaarfinni tetragrammi (Guutip aqqa naqinnernik hebriiariusunik) allassimagaangat. Aamma Guutip aqqa Kristumiut Allagaataanni Griikerisuuni allassimaffinni 237-ni, atortussaaneranik atuaqqissaarnikkut paasineqartuni, atorneqarpoq. Qujamasuutigaarput Jehovap ’kiffaqatigiit’ Siulersuisoqatigiivilu naqiterisarfimminnik peqatigiiffimminnillu inatsisitigut akuerisaasunik atermi nunarsuaq tamakkerlugu ilisimaneqalissutigisaanik assigiinngitsutigut atorsimammagit.

Guutip oqaasiata siaruarterneqarnera siuarsarneqarpoq

Jehovap innuttaasa aalajaallutik aqqa nalunaajaatigisarpaat oqaasialu illersortarlugu Biibilit atuagassiallu Biibililersaarutit millionilikkuutaat naqiterlugit siaruarterlugillu. 1900-kkut aallartilerneranni Watch Tower Society The Emphatic Diaglott-imut, Benjamin Wilsonip Kristumiut Allagaataannik Griikerisuunik griikerisuumit tuluttuumut nutsigaanut, piginnittussaatitaavoq. Aamma Peqatigiiffiup King James Version qupperninik 500-nik ilanngussartalik Biibilimik Atuaqqissaartartut immikkut saqqummersitaat naqitertippaa. 1942-mi King James Version innersuutitalik naqitertippaat. 1944-mi Peqatigiiffiup American Standard Version 1901-imeersoq Guutip aqqanik atuisoq naqitertittalerpaa. Aamma The Bible in Living English-imi Stephen T. Byingtonip nutsigaani, Peqatigiiffiup 1972-imi naqitertitaani, ateq Jehova atorneqarpoq.

Peqatigiiffiit inatsisitigut akuerisaasut iluaqutigalugit Jehovap Nalunaajaasuisa Biibilit nutsikkat taakku tamaasa naqiterlugillu siaruartersimavaat. Maluginiarnarnerpaarli tassaavoq Watch Tower Society aamma Jehovamut nalunaajaasut tanitat New World Bible Translation Committee-miittut suleqatigiilluarnerat. Nuannaarutigaarput nutsikkap tamatuma tamarmi ilaannaaluunniit manna tikillugu 106.400.000-nngorlugu oqaatsini 38-ni naqiterneqarsimanera. Watch Tower Bible and Tract Society of Pennsylvania tassa ilumut Biibililiorniaqatigiiffik.

’Kiffaq ilumoorlunilu silatooq’ ’naalakkami pigisaanut tamanut paarsisunngortinneqarpoq’. Isumagissaanut ilaapput USA-mi New Yorkimi qullersaqarfiup aamma nunarsuaq tamakkerlugu immikkoortortaqarfiit 110-usut illuutaat pigisaallu. ’Kiffaqatigiinnut’ ilaasut nalunngilaat  paareqquneqartunik qanoq paarsisimanerminnut akisussaatinneqarumaarlutik. (Matîuse 25:14-30) Taamaakkaluartoq ’kiffap’ nakkutilliisut piukkunnaatillit ’savanut allanut’ ilaasut inatsisinut allaffissornermullu tunngasunik akisussaaffilinngitsuunngilai. Taamaalilluni Siulersuisoqatigiinnut ilaasortat ’qinusarneq oqaatsimillu kiffartuuteqarneq’ piffissaqarfiginerusinnaavaat. — apustilit suliait 6:4.

Silarsuarmi matumani periarfissaqartillutik Siulersuisoqatigiit ’kiffamut ilumoorlunilu silatuumut’ sinniisuusut peqatigiiffiit inatsisitigut akuerisaasut atussavaat. Peqatigiiffiit taamaattut iluaqutaapput, pinngitsoorneqarsinnaannginngillat. Peqatigiiffik inatsisitigut akuerisaasoq naalakkersuisunit atorunnaarsinneqassappat oqaluussineq ingerlaannassaaq. Nunani maannakkut suliatsinnik killilersuiffiusuni inatsisitigut akuerisaasunik peqatigiiffeqanngilaq, taamaattorli Guutip naalagaaffianik tusarliussaq oqaluussissutigineqartarpoq, ’ajoqersuganngortitsisoqartarluni’ Guutillu siulersuinera siuarsiartorluni. Taamaappoq Jehovap Nalunaajaasui ’ikkussuillutillu imerterimmata’ ’Guutilu naajartortitsimmat’. — 1 Korintumiut 3:6, 7.

Siunissaq qilanaaraarput Jehovap innuttami anersaakkut timikkullu pisariaqartitaat isumagissagai tatigalugu. Taassuma Erneratalu Jesus Kristusip oqaluussinerup naammassinissaanut pisariaqartumik siulersuiuassapput tapersersuiuarlutillu. Guutip kiffaatut qanorluunniit angusaqartigigaluarutta ’inuit pissaaneratigut pinnani inuillu nakuussusiatigut pinnani Jehovalli anersaatigut pisarpoq’. (Sakarja 4:6) Taamaattumik ikioqqulluta Guuti qinnuigaarput nalunagu Jehovamit nakussatsinneqarluta ulluni kingullerni makkunani suliareqqusaa naammassisinnaassallugu. (wE 15/1 01)