Atuartartut apeqqutaat

Inuit qarasaasianut programminik nioqqutissiarineqartunik nuutsillutik imminnut tunioraattarnerat ileqquulersimavoq. Kristumiut ilumoortut taamatut iliortarneq qanoq isumaqarfigisariaqarpaat?

Immaqa ilaasa taamatut iliortarnertik kukkullutik utoqqatsissutiginiartarpaat Jesusip oqaasianut innersuussillutik: ’Akeqartinnagu pigassiuk akeqartinnaguttaaq tunniussiuk.’ Jesusilli naqitikkanik qarasaasianulluunniit programminik nuutsitanik, pilersitseqqaartutut pisinnaatitaanermik inatsimmit illersorneqartunik, tunisinissaq eqqartunngilaa. Jesusip ajoqersukkani illoqarfinnut nunaqarfinnullu assigiinngitsunut naalagaaffik pillugu oqaluussiartoqquai, napparsimasut katsorsaqqullugit aamma anersaapilunnik anisitseqqullugit. Taamaaliornertik akilersittussaanngilaat. ’Akeqartinnagu tunniutissavaat.’ — Matîuse 10:7, 8.

Qarasaasianik atuinerulerneq, inuussutissarsiornermi namminerlu atuinermi, qarasaasianut programminik piumasaqarnerulersitsisimavoq. Qarasaasianut programmit taamaattut nalinginnaasumik pisiarineqarsinnaapput. Ilaat tamanit atorneqartussanngorlugit qarasaasianut programmiliortaraluarput, akeqanngitsumillu nuutsinneqarsinnaallutillu allanut tunniunneqarsinnaasut, programmilli amerlanerit nioqqutissiarineqartarput. Nammineq suliffimmiluunniit atugassaappata atuisut namminneq qarasaasianut programminik pisinissaat naatsorsuutigineqarpoq. Qarasaasianut programminik akileqqaarnagu tigusineq imaluunniit nuutsineq atuakkanik nuutsisaqattaarnerujussuartut inerteqqutaatigivoq. Nuutsinneqarnerilu tunissutaagaluarpata aamma inerteqqutaavoq.

Qarasaasianut programminik (pinnguaatit ilanngullugit) atuisutut akuerineqassagaanni programminik piginnittut/atuisut amerlanertigut akuersissummik, aalajangersakkanik aalajangersimasunik killiliinernillu maleruaanissamik pisussanngortitsisunik, pissarsisariaqarpoq. Akuersissutit taamaattut ilarpassuini allassimavoq programmi inummit ataasiinnarmit atorneqarsinnaasoq, amerlanertigullu qarasaasiamut ataasiinnarmut ikkunneqartussaalluni angerlarsimaffimmiippat, suliffimmiippat atuarfimmiippalluunniit. Akuersissutit ilaanni akuerineqartarpoq atuisoq programmiutiminut sillimmatissatut nuutsinneqarsinnaanera, allalli pissaanik nuutsinneqaqqusaanngitsoq. Piginnittup kissaatigiguniuk programmi tamaat (akuersissut uppernarsaatillu ilanngullugit) allamut tunniussinnaavaa. Taamaaliorunili nammineq atuinissaminut akuersisut annaassavaa. Akuersissutit assigiinngitsuupput. Taamaattumik programmimik pisigaanni imaluunniit neqeroorfigineqaraanni  akuersissummi piumasaqaatit misissorneqaqqaartariaqarput.

Nunat amerlasuut pilersitseqqaartutut pisinnaatitaaneq (copyright) isumaqatigiissutigisarpaat. Isumaqatigiissummi „ilisimasanut tunngasunik piginnittussaassuseq“ illersorneqarpoq, tassanilu qarasaasianut programmit ilaapput, aamma inatsisit pilersitseqqaartutut pisinnaatitaanermut (copyright) tunngasut malinneqarniarneqarput. Assersuutigalugu aviisimi New York Times-imi ukioq 2000-imi januarip 14-ianeersumi allassimavoq „tyskit danskillu politiivi qarasaasianut programminik ’ujajaasutut’ taaneqartunik, amerlasuunik ilaasortaqartunik, programminik pinnguaatinillu nuutsisartunik siammarterisartunillu tigusarinnissimasut“. Ilaat allaat Internettikkut tuniniarneqartarput.

Ilagiit kristumiut tamanna qanoq isumaqarfigaat? Jesus oqarpoq: ’Kaasari tunisiuk kaasarip pissaanik, Guutilu Guutip pissaanik.’ (Mákorse 12:17) Tamanna isumaqarpoq kristumiut nunami najugarisaminni inatsisinut naalassasut, inatsisit taakku Guutip inatsisaanut akerliunngippata. Paulus naalakkersuisutut oqartussaasut pillugit allappoq: ’Inuit tamarmik naalakkersuisunut akimanernut naalattuugilit. . . . Taamaattumik naalakkersuisunut akerartortup Guutip peqqusaa assortorpaa, assortuisulli pillaatissarsissapput.’ — Rûmamiut 13:1, 2.

Pilersitseqqaartutut pisinnaatitaanermut (copyright) tunngasunik inatsisinik maleruaasitsisussatut nassuiaasussatullu kristumiut ilagiivini utoqqaanertat allat qarasaasiaanik nakkutilliisussaanngillat. Isumaqarpulli, allallu taama ajoqersorlugit, kristumiut allat pigisaanik tigusissanngitsut, inatsisinillu maleruaaniartutut innuttaanissartik ilungersuutigissagaat. Taamaaliornermikkut inatsisinik unioqqutitsisutut pillarneqassanngillat, Guutimullu ilerasuuteqassanngillat. Paulus allappoq: ’Tamanna pillugu naalattariaqarput, kamanneq kisiat pissutiginagu, tarnilli nalunngissusiattaaq pissutigalugu.’ (Rûmamiut 13:5) Paulusip tassunga atatillugu kristumiup ilumoortup kissaataa oqaatigivaa: ’Isumalluarpugummi sumik ilerasuutigisaqarnata, tamatigut assuarnaatsutut iliorniaratta.’ — Eprîarit 13:18. (wE 15/2 01)

[Qupp. 31-mi ungalusaq]

Suliffeqarfiit atuarfiillu ilaat akuersissutinik atuisunut amerlasuunut atugassaasunut pisisarput. Akuersissutini taamaattuni allassimavoq amerlanerpaamik qassit programmimik atuisinnaanersut. 1995-imi Jehovap Nalunaajaasuisa ilagiivini allaaserisaq ima siunnersuuteqartoq oqallisigineqarpoq:

„Suliffeqarfiit amerlanerit nioqqutissanngorlugit qarasaasianut programmiliortut pilersitseqqaartutut pisinnaatitaanermik (copyright) pigisaqarput, akuersissutillu ilanngullugit nassiunneqartut takutippaat programmit qanoq ilillugit inatsisinut naapertuuttumik atorneqarsinnaanersut. Akuersissummi allassimasarpoq piginnittoq programmip nuunneranik allanut tunniussisinnaanngitsoq; nunani assigiinngitsuni pilersitseqqaartutut pisinnaatitaanermik inatsit naapertorlugu taamaaliorneq inerteqqutaavoq. . . . Suliffeqarfissuit ilaasa qarasaasiat, programmitaat akuersissullu ilanngutereerlugit, tuniniartarpaat. Niuertarfinnili qarasaasianik tuniniaasut ilaanni akuersissut ilanngullugu tunniunneqartanngillat, programmit ikkunneqarsimasut ’ujajaasunit’ nuunneqarsimammata, tamannalu isumaqarpoq pisisoq programmimik atuinermigut inatsisinik unioqqutitsissasoq. Tassunga atatillugu aamma eqqaaneqassaaq kristumiut qarasaasiakkut allattarfissuarmi atortunik ilisinatik aamma aallissanngitsut, atortut pilersitseqqaartutut pisinnaatitaaneq (copyright) pillugu inatsimmit illersorneqarpata (assersuutigalugu Peqatigiiffiup naqitigai) aamma piginnittumit akuerineqarnatik assilineqarpata.“