Guutip naalagaaffianik oqaluussissutiginninnermit nutaarsiassat

Letlandimi nutaarsiassaq nuannersoq qisuariarfigineqarpoq

BIIBILIMI ersersinneqarpoq Guutip piumagaa ’inuit tamarmik annassasut sallusuissummillu ilisarsissasut’. (1 Timûtiuse 2:4) Ukiorpassuarni nutaarsiassamik nuannersumik tusarnissaminnut nangarneqarsimasut maanna periarfissinneqarput. Letlandimi, nunani allanilumi, assigiinngitsunik utoqqaassusillit assigiinngitsunillu tunuliaqutallit tusarliussaq qisuariarfigaat, soorlu pisimasuni tulliuttuni takutinneqartoq.

• Illoqarfimmi Rçzeknemi Letlandip kangianiittumi anaanap paniatalu inuussuttuaqqap arnaq aqqutissartik pillugu aperaat. Pisariaqartunik paasitereermatik arnap, Jehovamut Nalunaajaasuusup, anaanaq panialu Jehovap Nalunaajaasuisa ataatsimiinnissaannut qaaqqusissummik tunivai.

Anaanaq panialu uppertuugamik aalajangerput ataatsimiigiarniarlutik. Ataatsimiigiartillutik isumaqatigiipput iluarinngisaqarunik ingerlaannaq aniinnassallutik. Ataatsimiinnerli soqutiginangaarmat aninissartilluunniit eqqaanngilaat. Anaanaq panialu Biibilimik atuaqqissaaqatigineqarnissamik neqeroorfigitikkamik akuersipput, taamanimiilli aalajangersimasumik ataatsimiigiaqataasalerput. Qaammatit pingasuinnaat qaangiummata oqaluusseqataarusulerput kuisinnissartillu eqqartorlugu.

• Letlandip kitaani illoqarfiit ilaanni oqaluussisartup Anna, 85-nik ukiulik, soqutiginnilluartoq naapippaa. Biibilimik atuaqqissaaqatigineqarnissamik neqeroorfigineqarami akuersivoq. Pania ilaqutaasalu ilaat iliuusaanut assut akerlilersuipput. Annalli akerliunnerat namminerlu utoqqaanini peqqiilliorniniluunniit Biibilimik atuaqqissaarnissaminut akornutigiumanngilai.

Ullut ilaanni Annap panini oqarfigaa kuisikkumalluni. „Kuisikkuit utoqqaat illuannut nuutsissavakkit,“ pania oqarpoq. Annalli sioorasaarneqarnini soqutiginngilaa. Sanngiillisimanini pissutigalugu angerlarsimaffimmini kuisippoq.

Paniata tamanna qanoq qisuariarfigaa? Pissutsini allanngortilluinnarsimavaa allaat anaanani kuisereermat mamartunik nerisassiuuppaa. Anaanani aperaa: „Kuisilluni qanoq misigisimanarpa?“ Anna akivoq: „Soorlu inuk nutaaq.“

• 1998-imi decembarimi Jehovap Nalunaajaasuisa marluk Sovjetunioniusimasumi sakkutuunut naalagaasimasoq naapippaat. Pinngortitsisoqarnera upperigamiuk Biibilimik atuaqqissaatigineqarumagami akuersivoq, kingornagullu nulia aamma atuaqqissaaqataasalerpoq. Siumukapallapput erniinnarlu kuisimanatik oqaluussisartunngorlutik. Aasaammat sakkutuunut naalagaasimasoq kuisippoq. Anersaamut tunngasunut asanningaarnerat ilagiinni tamanut qiimmassaataangaarsimaqaaq. Illu naalagaaffilersarfissatut iluarsaanneqartussanngormat aamma peqataapput. (wE 1/2 01)