Piviusumik pillualertoqarsinnaava?

GEORGEP qungujulluni kikkut tamaasa ilassisarpai. Inuuneq tunissutitut erlinnartutut nuannaarutissatullu isigaa. Nuannaarnera isumallluarneralu tamanit malugineqartarpoq, allaat utoqqalinerup kinguneri atuleraluaramigit nuannaarnikillinngilaq. Toqunissi tikillugu George inuttut nuannaartutut ilisimaneqarpoq. Georgesut nuannaartuuit? Ulloq nutaaq tunissutitut nuannaarutissatut isigisarpiuk? Imaluunniit ulloq aggersoq soqutigineq ajorpiuk allaallu ernumassutigisarpiuk? Pilluarnissannut akornuteqarpit?

Pilluarneq ataavartumik illorrisimaarnertut nassuiarneqarsimavoq. Nalerisimaarnermiit nuannaangaarnermik taamaaginnarnissamillu pissusissamisoortumik kissaateqarnermik ilisarnaateqarpoq. Taamatulli pilluartoqarsinnaava?

Ullumi inuiaqatigiinni isuma siuarsarneqartoq tassaavoq pisuujugaanni aatsaat pilluarneq anguneqarsinnaasoq. Millionilippassuit pisuunngorniarlutik ulapputeqaat. Ilarpassuisa ikinngutitik inuunermilu pingaarutillit allat pilliutigisarpaat. Eqqarsarluarnissaminnut imminnulluunniit isumaginissaminnut piffissaqaratik uniaaluttut ulappupput. Tupinnanngitsumik „inuit sianiutiminnik qasusoortut amerligaluttuinnarput ukiukilligaluttuinnarlutillu,“ Los Angeles Times taama allaatigisaqarpoq, nangillunilu allappoq „nakorsaasiorfiit sianiutinut nakorsaatit tuninerpaasalersimagaat“. Millionillit ikiaroornartunut saattarput, ajornartorsiutitilluunniit qaangerniaraluarlugit imigassamut saattarlutik. Qasusooqqajaasut ilaat pisiniarujussuartarput. Tuluit aviisiata The Guardian-ip misissuinera naapertorlugu „pisiniarujussuarneq katsorsaatitut  arnanit atorneqarnerusarpoq . . . Angutinut naleqqiullugu pingasoriaammik arnanit tamanna atorneqarneruvoq.“

Pilluarnerli piviusoq pisiniarfimmi, puiaasami, iisartakkami, kapuummi ileqqaakkaniluunniit nassaarineqarsinnaanngilaq. Pilluarneq pisiassaanngilaq; akeqanngilaq. Tunissut erlinnartoq tamanna sumi nanisinnaavarput? Allaatigisami tulliuttumi tamanna sammissavarput.