Piviusumik qanoq pillualertoqarsinnaasoq

UPPERISARSIORTUT buddhistit siuttuat Dalai Lama ilaanni ima oqarsimavoq: „Pilluarnerup ujarnissaa inuunitsinni siunertaasoq upperaara.“ Taava nassuiaavoq uummatip eqqarsartaatsillu sungiusarnerisigut imaluunniit naalakkersornerisigut pilluarneq anguneqarsinnaasoq. „Pilluarneq ilumoortoq angussagutsigu isuma tunngaviusumik sakkussatuaavoq,“ nangilluni oqarpoq. Guutimut uppernissaq pisariaqannginnerarpaa. *

Jesus Guutimut upperluinnarami akerlerluinnaanik isumaqarpoq. Ukiut hundredelippassuit ingerlanerini inuit millionilippassuit ilinniartitsissutaanik sunnerneqartarsimapput. Inuit pilluarnissaat Jesusip soqutigisarsimavaa. Qaqqami oqaluutsimini ilisimaneqarluartumi qulingiluariarluni pilluarneraavoq, ima aallartittarami: ’Pilluarput . . .’ (Matîuse 5:1-12) Oqaluutsimini tassani tusarnaartini isummaminnik uummatiminnillu misissuilluaqqullugit, eqqiaaqqullugit naalakkisartitseqqullugillu ilinniartippai — nakuusernerit, kanngunartuliornerit, imminuinnarlu eqqarsaatiginerit eqqissinartunik, minguitsunik asannittunillu eqqarsaatinik taarseqqullugit. (Matîuse 5:21, 22, 27, 28; 6:19-21) Soorlu ajoqersugaasa ilaata kingusinnerusukkut allaaserigaa ’ilumoortut suulluunniit, assuarnaatsut suulluunniit, asanartut suulluunniit, nersornartut suulluunniit, suut ileqquulluartuunersut, suut ataqqinartuunersut eqqarsaatitsinniitittuartariaqarpavut’. — Filípimiut 4:8.

Piviusumik pilluassagaanni allanut attaveqartariaqarneq Jesusip nalusimanngilaa. Inuit kisimiittussaatillugit pinngortitaanngimmata uatsinnut mattukkutta avatangiisigulluunniit isumaqatiginngittuaannarutsigit piviusumik pilluarsinnaanngilagut. Asaneqarluta misigisimagutta imaluunniit allanut asannikkutta aatsaat pillualersinnaavugut. Asanninnermut taamaattumut Guutimut attaveqarnerput tunngaviusoq Jesusip ilinniartitsissutigisimavaa. Ilinniartitsissutaa taanna Dalai Lamap ilinniartitsissutaanit allaaneroqaaq, tassami inuit Guutimit avissaaqqallutik piviusumik pilluarsinnaanngitsut Jesusip ilinniartitsissutigaa. Sooq taamaappa? — Matîuse 4:4; 22:37-39.

Anersaakkut pisariaqartitatit eqqarsaatigikkit

Jesus qaqqami oqaluutsimini makku pilluarnerarpai: „Pilluarput anersaakkut pisariaqartitaminnik miserratiginninngitsut.“ (Matîuse 5:3, NV) Sooq Jesus taama oqarpa? Tassa uumasut assiginagit inuit anersaakkut pisariaqartitsimmata. Guuti assilillugu pinngortitaasimagamik pissusii, soorlu asanninneq, naapertuilluarneq, naakkinninneq ilisimassuserlu ilaarniarsinnaavaat. (1 Moses 1:27; Mika 6:8; 1 Juánase 4:8) Inuunerup siunertaqarnera ilisimassallugu anersaakkut pisariaqartitaannut ilaavoq.

Anersaakkut pisariaqartitavut qanoq matusinnaavavut? Imminut isumaliutigeqqissaarneq aqqutigalugu taamaaliorsinnaanngilagut. Jesus ima nassuiaavoq: ’Timiusaannaq inuup inuussutiginngilaa, oqaaserli sunaluunniit Guutip [Jehovap] qarnanit anisoq inuussutigisaraa.’ (Matîuse 4:4) Guutip ’oqaaserisai suulluunniit’ inuunitsinnut pingaarutillit  Jesusip oqaatigigaa malugiuk. Inuunerup siunertaanik qanorlu pilluarnermik angusisinnaanitsinnik isumaliutersuuterpassuit eqqarsaatigalugit pingaaruteqarpoq paasissallugu apeqquteqartoq Guutip kisimi akisinnaasaanik. Peqqinnissamik, pisuunngornissamik pilluarnissamillu neriorsuisunik atuagaarniarfiit atuagaaterpassuaqarput. Allaat pilluarneq qanoq nanineqarsinnaasoq pillugu Internetikkut nittartagaliortoqarsimavoq.

Taamaakkaluartoq inuit siulersorneqaratik tamakkuninnga eqqarsaatiginnissinnaanerat amigarpoq. Namminissarsiornissaq imminnuinnarlu eqqarsaatiginissaq amerlanertigut siuarsarneqartarpoq. Ilisimasakinneq misilittagakinnerlu peqqutaagajupput, eqqunngitsumillu tunngavissaqarajullutik. Assersuutigalugu imminut ikiornissamik siunnersuiniarlutik atuakkiortartut amerliartuinnartut „pinngoriartuaarsimaneq tunngavigalugu tarnip nakorsarneqarnissaanik“ isumaliutersortalersimapput. Taakkua isumaat naapertorlugu inuit misigissusat uumasunik siuaasaqarnitsinnik tunngavilersorniarneqartarput. Pinngortitsisorli sumiginnaraanni pilluarnermik ujaasinerugaluaq kinguneqarluarsinnaanngilaq pakatsinermillu kinguneqaannassalluni. Itsaq pruffiitit ilaat ima oqarsimavoq: „Ilisimatuut pakatsisinneqassapput . . . [Jehovap] oqaasii asiginnaramikkit ilisimassusertik sumut iluaqutigissavaat?“ — Jeremia 8:9.

Qanoq pinngortitaasugut qanorlu pilluarsinnaasugut Jehova Guutip nalunngilaa. Sooq nunamiittugut siunissamilu qanoq pisoqarumaartoq nalunagu, ilisimasaminillu tamakkuninnga Biibili aqqutigalugu aviffigeqatigaatigut. Atuakkami isumassarsiarititaasumi tassani saqqummiussaasa inuit eqqortumik isiginnittaasillit uummataat attorpaat nuannaalersillugit. (Lúkarse 10:21; Juánase 8:32) Jesusip ajoqersugaasa ilaat marluk taamaassimapput. Toqummat assut aliasussimapput. Makereernermi kingorna inuiaat annaanneqarnissaat pillugu Guutip siunertaani qanoq inissisimaffeqarluni Jesusip nammineerluni oqaluttuummatik ima oqarput: ’Uummativut taamani kissalilinnginnerpat ingerlatilluta oqaluffigimmatigut, allakkanillu nalujunnaarsimmatigut?’ — Lúkarse 24:32.

Biibilimi allassimasunit siulersortikkaangatta pilluarnerulertarpugut. Tassunga atatillugu pilluarneq neriusaamut assersuunneqarsinnaavoq. Pissutsit pitsaagaangata neriusaaq ersertarpoq, aatsaalli pissutsit pitsaalluinnaraangata kusanartorujussuanngortarpoq marloqiusanngortarluniluunniit. Biibilimi ajoqersuutit atoraanni qanoq pilluarnerulersitsisinnaanersut misissulaariartigit.

Inuunerit pisariillisaruk

Pigissaarnissaq pillugu Jesusip siunnersuutaa qimerlooqqaariartigu. Pigissaarnissamik noqqaassutiginninnerup inuunermi pingaarnerutinnginnissaa mianersoqqussutigereerlugu maluginiarnartumik ima oqaaseqarpoq: ’Taamaattumik isit peqqusersuippat timit tamarmi qaamassormiussavoq.’ (Matîuse 6:19-22) Oqarpoq pigissaarnissaq, pissaaneqarnissaq anguniagarluunniit alla noqqaassutigivallaarutsigu inuunermi pingaarnerusut allat annaasaqarfigissagivut. Soorlu piffissami  allami oqarsimasoq ’peqangaaraluarluni pigisani inuup inuussutigisarinngikkai’. (Lúkarse 12:15) Pingaarutillit, soorlu Guutimut attaveqarneq, ilaquttavut allallu assingusut siulliukkutsigit, taava ’isigut peqqusersuissapput’, tassa eqqortut isiginiarnerussagivut.

Jesusip pinnginnaveersaartuuneq imminulluunniit naaggaarluinnarneq illersunngilai. Jesus nammineq aamma taamatut inuusimanngilaq. (Matîuse 11:19; Juánase 2:1-11) Tassani Jesusip erseqqissarniarpaa pisuussutinik katersuinermuinnaq inuunerminnik atuisut pingaarnernik arajutsisaqartarmata.

USA-p illoqarfiisa ilaanni San Franciscomi tarnikkut nappaatinik katsorsaasartut ilaata inuunerminni siusissumik pisuunngorsimasut eqqaagamigit oqarpoq taakkununnga aningaasat „qasusoorutaallutillu paatsiveerussutaaginnartartut“. Ilanngullugu oqaatigaa inuit taamaattut „marlunnik pingasunilluunniit illusisartut, biilisillutik allarpassuarnillu pisisarlutik. Tamanna pilluaatigilinngikkaangamikku nikallungaqqajaalersarput, imaqanngitsutut misigalutik inuunertillu qanoq atussanerlugu nalornilersarlutik.“ Akerlianik inuunerup pilimanngitsumik atornissaanik anersaakkullu pisariaqartitat matussuserneqarnissaannik Jesusip siunnersuutaanik malinnittut piviusumik pilluarnissaminnut periarfissaqarnerungaarput.

Tom, sanasoq Hawaiimiu qeqertani Manerassuarmiittuni timip piisigut pigissaarfiunngeqisuni naalagaaffilersaartarfinnik piumassutsiminik sanaqataasimavoq. Inuit maniguuttut taakku pillugit Tom maluginiagaqarsimavoq. Ima oqarpoq: „Qeqertani taakkunani anersaakkut qatanngutikka ilumut pilluartuupput. Aningaasat pigissaarnerlu pilluarlersitsisinnaanngimmata paasinninnissannik ikiorsimavaannga.“ Piumassutsiminnik suleqatimi qanoq nuannaartiginerat aamma maluginiarsimavaa. „Aningaasarsiorluarsinnaagaluarput, anersaakkulli soqutigisatik siulliutissallugit pilimanianngitsumillu inuussallutik qinersimavaat,“ Tom oqaluttuarpoq. Maligassianik tamakkuninnga kajumissisinneqarluni Tomip inooriaatsi pisariillisarpaa ilaquttaminut anersaakkullu aallussaminut piffissaq annerusoq atulerlugu — tamannalu peqqissimissutiginngisaannarpaa.

Pilluarneq imminullu ataqqineq

Pilluassagaanni imminut nalilittut isiginissaq pingaaruteqarpoq. Inuttut naammalluinnaanngitsuunerup kinguneranik sanngiitsuuneq pissutigalugu inuit ilaat imminnut isumalluanngitsumik isigisarput. Missigissutsit tamakku ilarpassui meeraanermiit aallaaveqarput. Misigissutsit pigiliutiinnakkat tamakku qaangerniassallugit ajornakusoorsinnaavoq, qaangerneqarsinnaappulli. Guutip oqaasiinik atuinikkut qaangerneqarsinnaapput.

Pinngortitsisoq uatsinnut qanoq isiginnittaaseqarnersoq Biibilimi nassuiarneqarpoq. Taassuma isumaa inuit isumaannit, allaat uagut isummatsinnit, pingaarnerunnginnerpa? Guutip asannittup ajortumik paqumisuttumilluunniit isigineq ajorpaatigut. Periarfissavut killivullu takusinnaavai. (1 Samuel 16:7; 1 Juánase 4:8) Imminik nuannaartitserusuttut tamaasa qanorluunniit naammalluinnanngissuseqaraluarpata erlinnartutut isigisarpai. — Daniel 9:23; Haggaj 2:7.

Soorunami Guutip sanngiissutivut ajortuliarisartakkavullu isiginngitsuusaarneq ajorpai. Ajunngitsumik iliornissarput ilungersorluta sulissutigissagipput ilimagaa, taamaalioraangattalu tapersersortarpaatigut. (Lúkarse 13:24) Taamaakkaluartoq Biibilimi ima allassimasoqarpoq: „Soorlu ataataasup qitornani nallittortarai taamatut [Jehovap] nallittortarpai mianerinnitsini.“ Aamma ima: „Illit, [Jehova], ajortuliat naatsorsuutigissagaluarukkit kina atassagaluarpa taava, [Jehovap]? Illilli isumakkeerfiginnittarputit  mianerineqarnissat pillugu.“ — Tussiaat 103:13; 130:3, 4.

Taamaammat Guutip isiginnittasiatut imminut isiginissarput ilinniartariaqarparput. Naak imminnut naleqanngitsutut isigigaluarpataluunniit asannitsini erlinnartutut isigigai tatigigaalu paasigaanni pilluarnerulissutaasinnaavoq. — 1 Juánase 3:19, 20.

Neriunneq — pillualissagaanni pisariaqarpoq

Paasinnittaatsip nutaap ’psykologii isumalluartoq’-mik taaneqartartup tapersersorpaa isumalluartumik isiginneriaaseq eqqarsaatinit nuannersunit namminerlu piginnaalluakkanik maluginninniarnernik ineriartortinneqartartoq pilluarnermik kinguneqarsinnaasoq. Inuunermut siunissamullu isumalluartumik isiginnittaaseq pilluarnermut ilasaataasarmat ikittuinnaat miserratigissagunarpaat. Isumalluarnerli taamaattoq kissaataannaanani tunngaveqarluartariaqarpoq. Aammami qanorsuarluunniit isumalluartumik isiginnittaaseqarnerup nuannersunilluunniit eqqarsaateqarnerup pilluaassutaasut sorsunnerit, kaannersuit, nappaassuit, mingutsitsineq, utoqqalisarneq toquluunniit peersinnaanngilaat. Taamaakkaluartoq isumalluartoqartariaqarpoq.

Soqutiginarpoq oqaaseq isumalluarneq Biibilimi atorneqanngimmat. Oqaaseq kimeqarneq atorneqartoq alla tassaavoq neriunneq. Oqaaseq „neriunneq“ Biibilimi atorneqaraangami „siunissaq pillugu ajunngitsumik nalorninaatsumillu neriugisaqarnertut ilimagisaqarnertulluunniit“ atorneqartartoq, qinerlerfissiat ilaanni nassuiarneqarpoq. Oqaaseq neriunneq Biibilimi atorneqaraangami pissutsinik isumalluartumik isiginninnermit isumaqarnerusarpoq. Aaammattaarli neriugisat suussusaat ilanngunneqartarpoq. (Evfisumiut 4:4; 1 Pîtruse 1:3) Assersuutigalugu kristumiut neriugisaat tassaavoq naalliuuterpassuit immikkoortumi siuliani taaneqartut qanittumi peerneqarumaartut. (Tussiaat 37:9-11, 29) Tamannaannaanngilarli.

Inuit aalajaatsut nunarsuarmi paratiisiusumi naammalluinnartutut inuulernissaat kristumiut qilanaaraat. (Lúkarse 23:42, 43) Neriunneq taanna sarĸúmersitat 21:3, 4-mi ima itisilerneqarpoq: ’Takussagissi Guutip ineqarfia inunnittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’

Kinaluunniit neriugisami taamaattup piviusunngortinneqarnissaanik neriugisalik pilluassalluni pissutissaqarluarpoq, allaat maannakkorpiaq atukkani ajoraluarpataluunniit. (Jâko 1:12) Neriunneq taamaattoq sunik nassataqarnersoq soorlu upperisinnaanerlugu sooq misissornianngiliuk? Ullut tamaasa Biibilimik atuartarnikkut neriuut taanna nakussatsiguk. Taamaalioruit anersaakkut pissarsilluaannarnak aamma inuit pilluaassutaat ingalassimasinnaavatit inuuninnilu naammagisimaarnerutissavaatit. Aap, tamaasa katikkaanni pilluarnermut piviusumut aqqut tassaavoq Guutip piumassaanik naammassinninneq. (Nalunaajaasup oqaasii 12:13) Biibilip maligassiuinera naapertorlugu inuugaanni pilluarluni inuuneruvoq, imami Jesus oqarsimavoq: ’Pilluarput Guutip oqaasianik tusartut toqqorlugulu!’ — Lúkarse 11:28. (wE 1/3 01)

[Quppernerup ataani ilanngussaq]

[Qupp. 5-mi assiliartat]

Pisuussutinik katersuinikkut, kiserliornikkut inuilluunniit killilimmik ilisimasaannik tatiginninnikkut pillualertoqarsinnaanngilaq

[Qupp. 6-mi assiliartaq]

Kristumiutut neriuutip pillualersippaatigut

[Qupp. 7-mi assiliartaq]

Guutip inatsisaanut naalalluni inuuneq pilluarnartuuvoq