Sallusuissut pigiliuppiuk?

’Allanngoritsi isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ — RÛMAMIUT 12:2.

1, 2. Sooq ullumikkut kristumiuulluarnissaq imaannaanngila?

ULLUNI kingullerni makkunani — ’nalorninartuni anigorniarneri ajornartuni’ — kristumiuulluarnissaq imaannaanngilaq. (2 Timûtiuse 3:1, NV) Tassami, Kristusip maligassiaa malinniassagutsigu silarsuaq ajugaaffigisariaqarparput. (1 Juánase 5:4) Eqqaamajuk Jesusip kristumiunut aqqutigeqqusaq qanoq oqaatigigaa: ’Isertarfikkut nerukitsukkut iserniaritsi, isertarfik nerutoqimmat aqqusinerlu sileqimmat aserorsimaffimmut sammisoq, tassuunalu ingerlasut amerlaqaat; isertarfilli nerukippoq, aqqusinerlu ameqaaq inuunartumut sammisoq, taassuminngalu nanisisut ikeqaat.’ Aamma oqarpoq: ’Uannik malinnikkumasoq imminik isumakkiissavoq, [napasorlu anniartitaaffini; NV] ullut nungullugit ersullugu malissavaanga.’ — Matîuse 7:13, 14; Lúkarse 9:23.

² Aqqusineq amitsoq inuunartumut sammisoq nanereeruniuk kristumiup tassaniiginnarnissani ilungersuutigisariaqarpaa. Sooq taamaaliorneq unamminiarnartuua? Tunniulluinnarutta kuisikkuttalu Satanip ’qoqassiniarlutalu’ peqqusersiorfiginiarlutaluunniit eqqornialertarmatigut. (Evfisumiut 6:11) Sanngiissutivut malugisarpai anersaakkullu sanngiillisitsiniutigalugit. Jesusimi ajugaaffiginiareersimaguniuk sooq ilaginnassavaatigut? — Matîuse 4:1-11.

Satanip qoqassiiniarneri

3. Satanip Eva qanoq qulalersippaa?

³ Satanip periaasiisa ilaat tassaavoq qulalersitsiniaaneq. Anersaakkut sakkutuussutitsinni sanngiissutsivut paasiniartarpai. Aallaqqaataani Eva aperigamiuk taamatorluinnaq periaaseqarpoq: „Ilumununa Guutip naatsiiviup orpiisa arlaannaalluunniit neriffigeqqunngikkaa?“ (1 Moses 3:1) Allatut oqaatigalugu Satan oqarporlusooq: ’Ilumoorpa Guutip taama peqqunngikkaasi? Taama ajunngitsigisumik erliguutissanerpaasi? Guutimmi nalunngilaa orpimmit nerigaluarussi isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.’ Satan qularluni ikkussivoq naalernissaalu utaqqillugu. — 1 Moses 3:5.

4. Ullumikkut ilaat qanoq qulalertarpat?

⁴ Ullumikkut periaaseq taanna Satanip qanoq atortarpaa? Biibilimik atuarneq, nammineq atuaqqissaarneq, qinuneq, kristumiutut oqaluussisarneq ataatsimiigiartarnerlu sumiginnartarutsigit qulartunit allanit sunnerteqaqqajaasinnaavugut. Assersuutigalugu oqarsinnaapput: „Qanoq ililluta paasisinnaavarput upperisarput tassaasoq sallusuissut Jesusip oqaluussissutigisaa?“ „Ilumut ulluni kingullerni inuunerpugut? Maannami ukiuni 2000-kkunni inuulereerpugut.“ „Harmagedonimut ikaarsaalernerpugut, imaluunniit suli siunissami ungasissumiippa?“ Taamatut qulartoqalissappat qanoq paasinarsaasoqarsinnaava?

5, 6. Qulalerutta qanoq iliortariaqarpugut?

⁵ Jakob allakkami ima siunnersuilluarpoq: ’Ilisimassutsikkut inorsartumik ilaqarussi Guuti tamanik appisaluussinani tunisisaannartoq qinnuigiliuk; taava tunineqarumaarpoq.  Upperlunili qinuli nakimanani; nakimasummi assigaa immap malinga anorip aalatitaa qaffiumisaartoq. Tassa inuk taamaattoq isumaqarnaveerli [Jehovamit] sumik tigusissasoraluni, ataasiunngitsumik isumalik taanna saqittuinnarluni ingerlasoq.’ — Jâko 1:5-8.

⁶ Taamaattumik qanoq iliortariaqarpugut? ’Guuti qinnuigisariaqarparput’ uppernermik paasinninnermillu tuneqqulluta, namminerlu atuaqqissaarnerusariaqarpugut akissutissarsiorluta qularnerlu ajugaaffiginiarlugu. Aamma upperluartunut ikioqqusinnaavugut, qularinngisaannassavarputtaaq Jehovap pisariaqartitatsinnik tapersersiorumaaraatigut. Jakob aamma allappoq: ’Taamaattumik Guuti naalagarsiorfigisiuk; Diaavululi akerortorsiuk, qimassavaasilu. Guutimut palligunniaritsi, taava ilissinnut palligutissavoq. Ajortuliortusi-aa, assasi ipiiarsigik, ataasiunngitsumik isumaqartusi-aa, uummatisi minguiarsigik.’ — Jâko 4:7, 8.

7, 8. Jesusip ajoqersukkaminut ajoqersuutigisaatut pallorfiginnittunut piumasaqaatit tunngaviunerusut ilaannik taasaqarit. Piumasaqaatit tamakku kikkut naammassisarpaat?

⁷ Assersuutigalugu apeqqut manna misissoriartigu: Qanoq paasisinnaavarput Jesusip ajoqersukkaminut ajoqersuutigisaatut pallorfiginneriaaseqarluta? Tamanna paasiniarlugu paaseqqaartariaqarparput pallorfiginninnermik ilumoortumik maleruaasunut suut piumasaqaataanersut. Biibilip takutippaa kristumiut ilumoortut asaqatigiittariaqartut. (Juánase 13:34, 35) Guutip aqqa Jehova illernartissavaat. (Jesaja 12:4, 5; Matîuse 6:9) Aterlu taanna ilisimaneqalersissavaat. — 2 Moses 3:15; Juánase 17:26.

⁸ Pallorfiginninneq ilumoortoq taanna aamma allamik ilisarnaateqarpoq Guutip oqaasianut Biibilimut ataqqinninnermik. Atuagatuaavoq Guutip kinaassusianik siunertaanillu paasissutissiisoq. (Juánase 17:17; 2 Timûtiuse 3:16, 17) Kristumiullu ilumoortut oqaluussissutigaat Guutip naalagaaffia aqqutigalugu taamaallaat nunarsuaq tamakkerlugu paratiisimi naassaanngitsumik inuunissamik inuiaat neriuutissinneqartut. (Mákorse 13:10; sarĸúmersitat 21:1-4) Silarsuup matuma naalakkersueriaasia peqquserluttoq inooriaasialuunniit ajortunngorsimasoq peqataaffigineq ajorpaat. (Juánase 15:19; Jâko 1:27; 4:4) Ullumikkut piumasaqaatit tamakku kikkut naammassisarpaat? Piviusut takutippaat Jehovap Nalunaajaasui kisimik taamaaliortut.

 Qulalerneq qanoq anigorniarneqarsinnaasoq

9, 10. Qularunnaarniarluta qanoq iliorsinnaavugut?

⁹ Qulangaarnermik erloqissuteqarutta qanoq iliussaagut? Kunngi Salomon silatooq Ussatit kapitali 2-mi akivoq: „Ernera, oqaatsikka ilassiniakkit inassutikkalu pigiliullugit, ilisimassummut naalaarlutit paasiniaallutillu uummatikkut iluunngarlutit. Silassorissuseq qaaqquinnariannguaruk siuneqarnerlu aggeqqullugu nipituumik torlulaffigalugu. Ujarniaruk sølvisiortoq assigalugu, erlinnartunik nassaarniartutut ilungersorlutit. Taava paasilissavat Guutimik mianerinninneq sunaasoq ilisarilerlugulu Guuti.“ — Ussatit 2:1-5.

¹⁰ Eqqarsaat nuannerluinnartoq, ilaa? Ilumoorluta ilisimassut Guutimeersoq naalaarutsigu ’Guuti ilisarilissavarput’. Aap, Naalagaq silarsuarmi kisimi oqartussaasoq ilisarilersinnaavarput oqaasia ilassillugulu pingaartikkutsigu. Ima paasisariaqarpoq qinunikkut atuaqqissaarnikkullu Jehovamut saaffiginnittariaqartugut. Guutip oqaasiani erlinnartuutit iluaqutigalugit qularutigisavut tamaasa peersinnaavavut sallusuissutillu qaamarnganik takunnissinnaalerluta.

11. Elisap kiffaa qanoq qulalerpa?

¹¹ Kunnginik allakkat aappaat 6:11-18-imi Guutimut kiffaasup qunutuullunilu qulartup qinunikkut qanoq ikiorneqarsinnaaneranik assersuutissaqarluarpoq. Elisap kiffaata anersaakkut siuneqassuseq amigaatigaa. Paasinngilaa katersaarsuit qilammiittut Guutip pruffiitiata, Aramæerit sakkutoorpassuinik avatangerneqartup, ikiornissaanut piareeqqasut. „Arraa, naalagara, qanoq iliussaagut?“ kiffaa annilaangalluni nilliavoq. Elisa qanoq akiva? „Ersissanngilatit, uagut ilivut akeqqatta iliinit amerlanerupput!“ Kiffarli qanoq qularunnaarsinneqarsinnaava? Katersaarsuimmi qilammiittut takusinnaanngilai.

12. (a) Elisap kiffaa qanoq qularunnaarsinneqarpa? (b) Qularunnaarniarluta qanoq iliorsinnaavugut?

¹² „Taava Elisa ima qinuvoq: ’[Jehova], kiffama isai ammakkit.’ [Jehovap] kiffap isai ammarpai, kiffallu takuaa qaqqaq hestinik innerusunik qamutinillu innerusunik ulikkaartoq, taakkulu Elisa ungullugu inississimasut.“ Taama pisoqarnerani Jehovap kiffaq  katersaarsuarnik qilammiunik Elisamik illersuisunik takunnissinnaalersippaa. Ullumikkut taamatut Guutimik ikiorneqarnissarput ilimagisinnaanngilarput. Eqqaamajuk Elisap kiffaata Biibili tamaat piginngikkaa, taamaattumillu uatsitulli atuarneratigut uppernikkut nakussatsinneqarsinnaanani. Uagut Biibili tamaat pigaarput, atorluartarutsigulu uppernerput nakussatsissinnaavarput. Assersuutigalugu Jehovap qilammi issiavissaarsuarminiinneranik allaatigisat arlallit eqqarsaatigeqqissaarsinnaavavut. Allaatigisat taakkua qularunnaarluinnarsippaatigut Jehova qilammi peqatigiissortaqartoq ullumikkut kiffami silarsuaq tamakkerlugu ajoqersuisarneranni tapersersuisartunik. — Jesaja 6:1-4; Hesekiel 1:4-28; Daniel 7:9, 10; sarĸúmersitat 4:1-11; 14:6, 7.

Satanip qoqassiniaaneri mianersuutigikkit

13. Satanip qanoq sallusuissummit qimagutsinniarsaraatigut?

¹³ Periaatsit allat suut atorlugit Satanip anersaakkut sanngiillisinniartarpaatigut sallusuissummillu qimagutsinniartarluta? Ilaatigut kanngunartulioriaatsit assigiinngitsut atortarpai. Ullumikkut silarsuarmi tiingatuuffioqisumi allasiorneq nalaatsornikkullu atoqateqartarneq inunni qanorluunniit akeqassagaluarpat sapinngisamik inuulluapilukkumatuuni nalinginnaaqaat. Filmitigut fjernsynikkullu inooriaaseq taamaattoq siuarsarneqartarpoq. Tusagassiuutit, ingammik Internetti, tiingasulersaarutinik ulikkaarput. Alapernaatsut pinngitsooratik usserneqassapput. — 1 Tásalûníkamiut 4:3-5; Jâko 1:13-15.

14. Sooq kristumiut ilaasa Satanip qoqassiiniarneri napitiffigisimavaat?

¹⁴ Kristumiut ilaasa alapernaasiinarlutik tiingasulersaarutinik, aamma amiilaarnarnerusunik, isiginnaartarlutik isumartik uummatertillu mingutsissimavaat. Satanip napiaaniutaanut napitissimapput, amerlanertigullu taamaalillutik anersaakkut umiiartarlutik. ’Ajorsutsimikkut merlertuujuarsimanngillat’. ’Silaqarsutsimikkut inersimasunngorsimanngillat.’ (1 Korintumiut 14:20) Ukiut tamaasa tusindilippassuit Guutip oqaasiani najoqqutassiat maleruagassiallu aalajangiussimannginnamikkik kingunipilui atortariaqarpaat. ’Sakkutuussutit tamaasa Guutip pii’ atisimanagillu paarisimanngilaat. — Evfisumiut 6:10-13; Kulorsamiut 3:5-10; 1 Timûtiuse 1:18, 19.

Pigisavut pingaartittariaqarpavut

15. Sooq immaqa ilaasa anersaakkut kingornussamik nalinga paaserpiarsimanngilaat?

¹⁵ Jesus oqarpoq ’sallusuissut ilisarissavarsi, sallusuissutillu inussiaajunnaarsissavaasi,’ Jesus oqarpoq. (Juánase 8:32) Jehovap Nalunaajaasuisa amerlanersaasa inooriaaserisimasartik qimattariaqarsimavaat upperisarsioqatigisimasatillu qimallugit. Taamaattumik immaqa kiffaanngissuseq sallusuissummiittoq pingaartinnerusinnaavaat. Inuusuttulli ilaasa sallusuissummi peroriartorsimasut anersaakkut kingornussamik nalinga paaserpiarsimanngilaat. Eqqunngitsumik upperisarsiornermut  silarsuarmiluunniit matumani ikiaroornartunik atornerluinermut, kanngunartuliornermut inuulluapilukkumanermullu ilaasimanngisaannarput. Tamanna pissutigalugu immaqa anersaakkut paratiisip inuuffigisatta Satanillu silarsuaata ajortunngorsimasup assigiinngissutaat iluamik takusinnaanngilaat. Ilaasa allaat silarsuup toqunartua misilikkumallugu tunniutiinnarsimapput arajutsisaqarsoralutik. — 1 Juánase 2:15-17; sarĸúmersitat 18:1-5.

16. (a) Imminut qanoq aperisariaqarpugut? (b) Suut ilikkarpavut, qanorlu iliornissatsinnik kajumissaarneqarpugut?

¹⁶ Anniarneq naalliunnerlu suunersut paasissagaanni misigeqqaartariaqarpat? Allat misigisimasaat ajortut ilinniutigineqarsinnaanngillat? Silarsuup matuma ’attakorsuisa maralluinut’ niuuttariaqarpugut arajutsisaqarnerluta paasiniarlugu? (2 Pîtruse 2:20-22) Ukiuni hundredelinni siullerni Peterip kristumiut ilaat siornatigut Satanip silarsuaanut ilaasimasut ima eqqaasippai: ’Naammappormi, siornagut Guutimik nalusut piumasaat naammassisimagassiuk, kanngunartuliornerit illigutsannerillu nerivallaarnerillu viinnisorpallaarnerillu imerpallaarnerillu guutipilussiornerillu ileqqussaanngitsut inuuseralugit.’ ’Maajunnartuliortariaqanngilagut’ inuuneq qanoq ajortigisinnaanersoq paasiniarlugu. (1 Pîtruse 4:3, 4) Naalagaaffilersaarfitsinni Biibilimik ilinniartitsinermi qitiusumi Jehovap ileqqussatigut najoqqutassiaanik qutsissunik ajoqersorneqartarpugut, kajumissaarneqartarpugullu ’siuneqartutut’ sallusuissut sianigeqqullugu, taamaalillutalu sallusuissut pigiliuteqqullugu. — Josva 1:8; Rûmamiut 12:1, 2; 2 Timûtiuse 3:14-17.

Taaguutitta akisussaaffeqartippaatigut

17. Jehova pillugu qanoq nalunaajaalluarsinnaavugut?

¹⁷ Sallusuissut pigiliussimagutsigu periarfissani tamani allanut oqaluttuariniassavarput. Imaanngilarli soqutiginninngitsut tusarnaarnissaannut kimigiiserfigissagivut. (Matîuse 7:6) Jehovamulli Nalunaajaasuunerput oqaatigissallugu annilaangatiginngilarput. Soqutiginnilaartoqarpat ilumoortunik apeqquteqartoqarpat Biibilimulluunniit tunngasunik atugassianik tigusisoqarpat, neriugisatta oqaluttuarinissaanut piareersimassaagut. Taamaattumik pitsaassaaq sumiikkaluaruttaluunniit — suliffitsinni, atuarfimmi, pisiniarfinni sukisaarsaaruttaluunniit — atuagassianik nassataqartuarnissarput. — 1 Pîtruse 3:15.

18. Kristumiuunerput isertunngikkutsigu qanoq illersuutigisinnaavarput?

¹⁸ Kristumiuunerput isertunngikkutsigu Satanip ersinngitsukkut saassussineri assortorluarnerusinnaavavut. Suliffitsinni inuuissiortoqarpat, juullilerneraniluunniit nereqatigiittoqarpat suleqatitta ilaat oqaannassaaq: „Aperisariaqanngilarput. Jehovamut nalunaajaasuuvoq.“ Tamannattaaq pissutigalugu eqqaminniitilluta quiasaarniapilunneq ajorput. Taamaalilluta kristumiuunerput oqaluttuarigutsigu illersuutigissavarput. Soorlu apustili Peterip oqaatigigaa: ’Kinaanerpa ajunngitsoq ilungersuutigigussiuk ilissinnik innarliortitsissasoq? Kisianni iluarneq pillugu naalliukkaluarussi pilluarpusi.’ — 1 Pîtruse 3:13, 14.

19. Qanoq ilisimasinnaavarput ’ullunik kingullernik’ taaneqartut naalerneranni inuulluta?

¹⁹ Sallusuissut pigiliukkutsigu qularutigissanngilarputtaaq pissutsinik aaqqissuussaanerup matuma ulluini kingullerni inuulluta.  Nalussanngilarput Biibilip siulittuutaasa ilarpassui ullutsinni eqquuttut. * Paulusip ’ullussani kingullerni ajornartunik nalliuttoqarnissaanik’ mianersoqqusinera uppernarsarneqaraluttuinnarpoq ukiuni 1900-kkunni annilaanganaqisunik pisoqartarneratigut. (2 Timûtiuse 3:1-5; Mákorse 13:3-37) Ukiut 1900-kkut pillugit aviisimi allaaserisami ima qulequtalimmi: „Naakkittaatsuliorfiusutut eqqaamaneqassapput“ tusagassiortoq ungasinngitsukkut allappoq: „1999 tassaavoq ukiut hundredellit affaanni kingullermi ukioq aasunninnerpaasumit aassunninnerpaaq.“

20. Maannakkut qanoq iliornissamut piffissanngorpa?

²⁰ Nangaanissamut piffissaanngilaq. Nalunanngilaq nunarsuaq tamakkerlugu aatsaat taama peqqissaartigisumik Biibilimik ilinniartitsinersuaq inuiaqatigiinnut nalunaajaataasoq Jehovap pilluaqqugaa. (Matîuse 24:14) Sallusuissut pigiliuguk allanullu oqaluttuaralugu. Maannakkut qanoq iliornerit naassaanngitsumik siunissannut aalajangiisuuvoq. Uniinnaruit Jehovap pilluaqqusinera misiginngitsuussavat. (Lúkarse 9:62) Maannakkut piffissanngorpoq ’aalajangernissamut saqinnaveernissamullu Naalakkallu suliaanik naammassisaqangaartuinnarnissamut, suliniarnivut Naalakkami asuliinnaanngitsut ilisimagatsigik.’ — 1 Korintumiut 15:58. (wE 1/2 01)

[Quppernerup ataani ilanngussaq]

Makku eqqaamavigit?

• Qularneq qanoq anigorsinnaavarput?

• Elisap ikiortaanut pisimasoq qanoq ilinniarfigisinnaavarput?

• Ileqqussanut tunngatillugu ussernartut suut eqqumaffigiuartariqarpavut?

• Sooq Jehovamut Nalunaajaasuunerput isertornaveersaartariaqarparput?

[Atuaqqissaarnermi apeqqutit]

[Qupp. 10-mi assiliartat]

Qinunerup aalajangersimasumillu Biibilimik atuaqqissaartarnerup qularnermik aniguinissatsinnut ikiorsinnaavaatigut

[Qupp. 11-mi assiliartaq]

Elisap ikiortaa qularunnaarsitsisumik takorluugaqarpoq

[Qupp. 12-mi assiliartaq]

Naalagaaffilersaarfinni, Beninimiittutut ittuni, Jehovap ileqqoreqqusai qutsissut pillugit najoqqutassiaanik ajoqersorneqartarpugut