Tunniulluinnarnerit eqqortippiuk?

’Qanoq iliugassasi tamaasa kajumillusi suliarisigik Jehovamullusooq, soorlu inunnut pinngitsusi.’ — KULORSAMIUT 3:23.

1. Timersortartut qanoq isiginnittaaseqartariaqarpat?

TIMERSORTARTUT angusaqarluarnerpaaniarlutik qanoq iliortarpat? Arsaanneq, assammik arsaanneq, ujakkaarneq, sulorarneq timersoriaaserluunniit alla pineqaraluaraangat pitsaanerpaamik angusaqartoqarsinnaavoq aatsaat timersornermut tunniusimalluinnaraanni. Timersortartut timikkut isumakkullu sapinngisartik tamaat sungiusarluartariaqarput angusaqarluarumallutik. Aap, timikkut isumakkullu sungiusarnermut tunniusimalluinnartariaqarput.

2. Oqaaseq ’tunniulluinnarneq’ Biibilimi atorneqaraangat qanoq paasisariaqarpa? Assersuummik taasaqarit.

² Kristumiummi Guutimut kiffartornissamut tunniulluinnarsimasut? Oqaaseq ’tunniulluinnarneq’ Biibilimi atorneqaraangat qanoq paasisariaqarpa? Hebriiarit oqaluutaat nutsikkani assigiinngitsuni ’tunniulluinnarneq’-mik nutserneqartoq isumaqavippoq „immikkoorpoq, avissaarpoq, tunuarpoq“. * Israelitoqqami palasiuneq Aron ’ataqqinnaammik  illernartumik’ niaqoruteqarpoq. Kuultimit akuitsumit sanaajuvoq hebriiarisuut ima allannilik: „Illernartitaq Jehovamut pigititaq“. Tassuuna palasiuneq eqqaasinneqarpoq illernartuummut narrunarsaataasumik iliuuseqarnaveersaassalluni, „[Jehovamut] pigititaagami uuliamik Guutimi pianik tanitaalluni“. — 2 Moses 29:6; 39:30; 3 Moses 21:12.

3. Guutimut tunniulluinnarsimanitta pissusilersornerput sunnertariaqarpaa?

³ Tamatuma takutippaa tunniulluinnarneq Biibili tunngavigalugu ilumoorunneqartariaqartoq. Tunniulluinnarneq isumaqarpoq kajumilluni Guutimut kiffaajumaneq, taamaaliussagaannilu minguitsumik ileqqoqartariaqarpoq. Taamaattumik paasivarput apustili Peterip Jehovap oqaasii sooq issuarnerai: ’Iluartuussaasi, uanga illernartuugama.’ (1 Pîtruse 1:15, 16) Kristumiutut tunniulluinnarsimasutut immikkut akisussaaffeqarpugut tunniulluinnarnerput eqqortissallugu naggatissamut aalajaalluta. Kristumiutulli tunniulluinnarneq sumik nassataqarpa? — 3 Moses 19:2; Matîuse 24:13.

4. Tunniulluartinnani qanoq iliortoqartarpa, tamannalu sumut assersuunneqarsinnaava?

⁴ Jehova Guuti, siunertaa, aamma Jesus Kristus siunertamilu taassuma inissisimaffia pillugit eqqortumik ilisimasaqareerluta, nammineq aalajangerpugut Guuti uummatikkut, isumakkut, tarnikkullu iluunngarluta nukivullu tamakkerlugit kiffartuukkumallugu. (Mákorse 8:34; 12:30; Juánase 17:3) Aalajangerneq tamanna inuttut neriorsuinertut Guutimut nangaanngivilluni tunniulluinnarnertut isigineqarsinnaavoq. Tunniulluinnarnerput isummeriataarnerunngilaq. Qinunikkut eqqarsaatigeqqissaaqqaarparput silaqassuserput atorlugu. Sivikitsuinnaasussatut aalajangigaanngilaq. Narsaammik assallatserilersutut suliaq ilungersunarpallaaqimmat katersuinissarluunniit ungasippallaaqimmat, naammassinagulu katersuiffinngussanersorluunniit qularalugu uniinnarsinnaanngilagut. Maanna Guutip siulersuineratigut akisussaaffimmik tigusillutik ’assallatserisut’ qanorluunniit pisoqaraluarpat qasusuissimasut ilaat misissoriartigik. — Lúkarse 9:62; Rûmamiut 12:1, 2.

Tunniulluinnarnertik miserratiginngilaat

5. Jeremias Guutimut kifatut tunniulluinnarsimasutut qanoq maligassaalluarpa?

⁵ Jeremias Jerusalemimi ukiut 40-t sinnerlugit (647-607 u.n.s.) pruffiititut kiffartorpoq, suliaalu oqitsuinnaanngilaq. Sanngiiffini nalunngilluinnarpai. (Jeremia 1:2-6) Ullut tamaasa Judakkut manngertunik uummatillit oqaluussiffigissallugit qunusuillunilu nikallujuittariaqarpoq. (Jeremia 18:18; 38:4-6)  Jeremiasilli Guutini Jehova tatigaa, Guutip kiffaatut tunniulluinnarsimasutut aalajaassinnaaqqullugu nakussatsippaa. — Jeremia 1:18, 19.

6. Apustili Johannes uatsinnut qanoq maligassaalluarpa?

⁶ Eqqarsaatigiuttaaq apustili Johannes aalajaatsoq utoqqalilluni qeqertamut tikitassaanngitsumut Patmosimut aallarunneqartoq ’Guutip oqaasia Jesusillu Kristusip nalunaajaataa pissutigalugit’. (sarĸúmersitat 1:9) Aalajaappoq ukiullu 60-t missaanni kristumiutut tunniulluinnarnini eqqortillugu. Jerusalemip Romamiut sakkutuuinit aserorneqarnera angumeraa. Immikkut pisinnaatitaaffigalugu iivangkiiliumik allakkanillu pingasunik isumassarsiarititaasunik sarĸúmersitat-nillu allappoq, tassani Harmagedonimi sorsunnissaq siulittuutigalugu. Paasigamiuk Harmagedon inuutilluni nalliutissanngitsoq taamaatippa? Eqiasulerpa uniinnarlunilu? Naamik, Johannes toqunissani tikivillugu aalajaattuarpoq. Nalunngilaa naak ’piffissaq qanikkaluaqisoq’ takorluukkani aatsaat kingusinnerusukkut eqquukkumaartut. — sarĸúmersitat 1:3; Daniel 12:4.

Ullumikkut maligassiuisut

7. Angut kristumiu tunniulluinnarnerminik eqqortitsisimasutut qanoq maligassaalluarpa?

⁷ Ukiuni nutaajunerusuni kristumiut aalajaatsut tusindilikkuutaat tunniulluinnarnerminni neriorsuutertik eqqortittuarsimavaat naak Harmagedonip nalliunnissaa tikivillugu inuusinnaanngikkaluarlutik. Taakkua ilagaat Ernest E. Beavor Tuluit Nunaanneersoq. 1939-mi, sorsunnersuup aappaata aallartilernerani, Jehovamut nalunaajaasunngorpoq, nutaarsiassanik assiliisarfiutini ingerlalluartoq tunivaa tamakkiisumik kiffartortunngorniarluni. Kristumiutut sorsunnermut kallunnaveersaartuunini attalluaramiuk ukiut marluk parnaarussaavoq. Ilaqutaasa tapersersorpaat, 1950-imilu meerai pingasut Napasuliaq Alapernaarsuiffiup Biibilimik Atuarfiani Gileadimi ajoqersuiartortitassatut ilinniarput. Qatanngut Beavor oqaluussinermini ilungersuussisuugami ikinngutiminit ’Harmagedon-Ernie’-mik taaneqartarpoq. Tunniulluinnarsimanini uummammik tamakkiisumik eqqortippaa, 1986-imilu toqunissani tikivillugu Guutip Harmagedonimi sorsunnissaa qanittuararsuutippaa. Tunniulluinnarnini Guutimik isumaqatigiissutitut killiligaasutut isiginngilaa. * — 1 Korintumiut 15:58.

8, 9. (a) Spaniami Francop naalakkersuinerata nalaani angutit inuusuttut amerlasuut qanoq maligassaalluarsimappat? (b) Immitsinnut qanoq aperisariaqarpugut?

⁸ Ilungersuussingaarnermikkut maligassaalluartut allat Spaniameersuupput. Francop naalakkersuinerata nalaani (1939-75) angutit inuusuttut tunniulluinnarsimasut hundredelikkuutaat kristumiutut naalakkersuinermut attaviitsuunertik aalajangiussimajuarpaat. Amerlasuut ukiuni qulini sivisunerusumilluunniit sakkutuut parnaarussiviini parnaarussaasimapput. Oqaluussisartut ilaat, Jesús Martín, allaat ukiuni 22-ni parnaarussaasussanngorlugu eqqartuunneqarpoq. Afrikap avannaani sakkutuut parnaarussivianniitilluni peqqarniitsumik unatarneqarpoq. Tamakku tamarmik oqitsuinnaanngillat, tunniutiinnarumanngilarli.

⁹ Angutit inuusuttut taakkua qaquguluunniit iperaagaassanerlutik nalugajuppaat, arlaleriaqalutimmi eqqartuunneqartaramik. Taamaattorli parnaarussivimmiinnerminni assuarnaattuarput kiffartornermillu ilungersuussillutik. 1973-imi pissutsit pitsaanerulermata oqaluussisartut taakkua ilarpassui, taamani 30-t sinnilaarlugit ukiullit, iperagaapput ingerlaannarlu tamakkiisumik kiffartortunngorlutik. Ilaat specialpioneerinngorput, allat angalallutik nakkutilliisunngortut. Tunniulluinnarnertik  parnaarussivinni eqqortittuarpaat, iperagaanermillu kingorna amerlanerit aalajaattuarput. * Uagut pilluta ullumikkut taama oqartoqarsinnaava? Taakkutulli tunniulluinnarsimanerput eqqortipparput? — Eprîarit 10:32-34; 13:3.

Tunniulluinnarsimanitsinnut eqqortumik isiginnittaaseq

10. (a) Tunniulluinnarsimanerput qanoq isigisariaqarparput? (b) Jehovap imminut kiffartornerput qanoq isigaa?

¹⁰ Guutip piumasaatut iliorniarluta tunniulluinnarsimanerput qanoq isigaarput? Guutimut kiffartorneq inuunitsinni salliutipparput? Qanorluunniit atugaqaraluarutta, inuusuttuugutta utoqqaaguttaluunniit, aappaqarutta aappaqanngikkuttaluunniit, napparsimagutta peqqikkuttaluunniit, atukkavut naapertorlugit tunniulluinnarsimanerput eqqortinniartariaqarparput. Immaqa pioneeritut, Napasuliaq Alapernaarsuiffiup immikkoortortaqarfiisa ilaanni kajumilluta suleqataasutut, ajoqersuiartortitatut imaluunniit nakkutilliisutut angalasartutut tamakkiisumik kiffartorsinnaavugut. Meerallit ilaquttamik timikkut anersaakkullu pisariaqartitaat ulapputigaat. Qaammatit tamaasa nalunaaquttap-akunnialuinnannguinik kiffartortut tamakkiisumik nalunaaquttap-akunnerpassuini kiffartortumit Jehovap isaani nalikinnerunerpat? Naamik. Jehovap sapikkatsinnik ilimasuffiginngisaannarpaatigut. Apustili Paulusip najoqqutassiaq manna eqqaavaa: ’Kajumittoqaraangami sapinngisai missiliorlugit ilassiuminartarpoq, sapigai missiliorlugit pinnagu.’ — 2 Korintumiut 8:12.

11. Suna annannissatsinnut aalajangiisuua?

¹¹ Qanorluunniit pisoqaraluarpat iliuutsivut annannissatsinnut aalajangiisuunngillat, Jehovalli ajunngissusia pisassarinngisaraluarput Jesus Kristusikkut aalajangiisuuvoq. Paulus ima nassuiaavoq: ’Tamarmik ajortuliorput Guutimi nersornaammik ajorsarlutik taassumalu saammaanneranit iluartuutinneqarlutik akeqanngitsumik, utertitaagamik Kristusi-Jesusikkut“ — Rûmamiut 3:23, 24; Jâko 2:17, 18, 24.

12. Sooq immitsinnut naleqqiutissanngilagut?

¹² Immitsinnut naleqqiunnissatsinnut pissutissaqanngilagut Guutimut kiffartornermi piffissaq qanoq sivisutigisoq, atuagassiat atuakkallu qanoq amerlatigisut agguaannerivut imaluunniit atuaqqissaaqativut qanoq amerlatiginersut eqqarsaatigalugit. (Galâsiamiut 6:3, 4) Kristumiutut kiffartornermi qanorluunniit angusaqaraluarutta, Jesusip maniguunnissatsinnik kajumissaarilluni oqaasii tamatta eqqaamasariaqarpavut: ’Taamattaaq ilissi ilissinnut suliareqqusat tamaasa suliarigussigik ima oqaritsi: „Kiffaavugut  atunngitsut, uatsinnut suliarisariaqartut suliaraavut.“’ (Lúkarse 17:10) Qanoq akulikitsigisumik ilumoorluta oqarsinnaavugut ’uatsinnut suliarisariaqartut suliarigivut’? Taamaattumik una apequtaalerpoq: Kiffartornerput qanoq pitsaatigisariaqarpa? — 2 Korintumiut 10:17, 18.

Ullut tamaasa atorluartakkit

13. Kiffartortilluta qanoq isiginnittaaseqartariaqarpugut?

¹³ Nuliaasut, uiusut, meeqqat, angajoqqaat kiffallu siunnersoreerlugit Paulus ima allappoq: ’Qanoq iliugassasilu tamaasa kajumillusi suliarisigik [Jehovamullusooq], soorlu inunnut pinngitsusi, ilisimallusilu kingornussassaq [Jehovamit] akissarsiariumaarissi; Naalagaq Kristus kiffartorfigaarsi.’ (Kulorsamiut 3:23, 24) Jehovamut kiffartornermi naammassisavut inunnut malugeqqusaarluta suliarinngilavut. Guutimut kiffartorniarpugut Jesus Kristusip maligassiaa malillugu. Taassuma sulinermini sivikikkaluami suliaq nukinginnartutut isigalugu naammassivaa. — 1 Pîtruse 2:21.

14. Ullut kingulliit eqqarsaatigalugit Peter qanoq mianersoqqusiva?

¹⁴ Aamma apustili Peterip suliaq nukinginnartuusoq eqqaavaa. Allakkami aappaanni mianersoqqusilluni allappoq ulluni kingullerni inoqarumaartoq — tunussisunik qulartunillu — mittatilliillutik illigutsannitik malillugit Kristusip najuunnera pillugu qulalersitsiniartunik. Peterili ima allappoq: ’[Jehovap] unnersuutigisani mullutinngilai, soorlu qassiit mullussisorigaat, kamajuillunili pivaasi tammarsimasoqaqqusinnginnami, tamaasali allamik isumataaqqullugit. [Jehovalli] ullussaa tillittutut nalliukkumaarpoq.’ — 2 Pîtruse 3:3, 4, 9, 10.

15. Ullut tamaasa ajunngitsuliornissarput qanoq sianigisinnaavarput?

 ¹⁵ Ilumoorluta tunniulluinnarsimanerput eqqortissagutsigu, ullut tamaasa Jehovamik unnersiutiginninnermut atortariaqarpavut. Unnuit tamaasa ullup ingerlanera eqqarsaatigalugulu qanoq arlaatigulluunniit Guutip aqqanik illernarsisitseqataasimanerluta naalagaaffianillu nutaarsiassamik nuannersumik oqaluussissutiginneqataasimanerluta? Minguitsunik ileqqoqarnikkut, ineriartornartumik oqaloqatigiinnikkut ilaqutariinnut ikinngutinulluunniit asannittumik isumassuinikkut taamaaliortoqarsinnaavoq. Periarfissaqalernerput allat kristumiut neriugisaannik oqaluttuunnissaannut atortarparput? Guutip neriorsuutaasa eqqarsaatigeqqissaarnissaannut allanik ikiugaqarpugut? Ullut tamaasa anersaakkut ittunik ajunngitsuliorta, taamaalilluta assersuutitut qilammi anersaakkut ’pequutinik’ katersuilluta. — Matîuse 6:20; 1 Pîtruse 2:12; 3:15; Jâko 3:13.

Erseqqissumik isiginnittaaseqartuarit

16. Guutimut tunniulluinnarsimanitta eqqortinnissaanik aalajangersimanerput Satanip qanoq sanngiillisinniarsaraa?

¹⁶ Ullut inuuffigisavut kristumiunut ilungersunarnerujartuinnarput. Satan ikiortaalu ajunngitsut ajortullu, minguitsut minguttuullu, ileqqorissaarnerup kanngunartuliornerullu assigiinngissutaannik ersernerlussisitsiniarsaripput. (Rûmamiut 1:24-28; 16:17-19) Fjernsynimi internetimiluunniit takusartakkatsigut uummaterput isumarpullu mingutsikkuminarnerungaartunngortippai. Anersaakkut isiginnittaaserput ima tappiillitigisinnaavoq allaat qoqassiiniarneri takulluarsinnaajunnaarlutigit. Tunniulluinnarnerput  eqqortinniarlugu aalajangersimanerput sanngiilliartulersinnaavoq, assallatserullu iperariartulersinnaavarput anersaakkut nalilinnut naapertuutinngitsumik iliuuseqalerutta. — Lúkarse 9:62; Filípimiut 4:8.

17. Paulusip ajoqersuutaa Guutimut ajunngitsumik attaveqartuarnissatsinnut qanoq iluaqutigisinnaavarput?

¹⁷ Taamaattumik Paulusip ilagiinnut Thessalonikamiittunut oqaasii aamma uatsinnut pingaaruteqarput: „Tassaavoq Guutip piumasaa iluarsissutissarsi, kanngunartuliornaveersaarnissarsi tamassi timisi pigisinnaassavasi iluarsiartortillusi ataqqinartillusilu, kinguaassiuutitigut pilerituumik illigussuseqarnasi inuttut inuiaqatigiinneersutut Guutimik ilisarsinngitsutut.“ (1 Tásalûníkamiut 4:3-5, NV) Kristumiut ilaat ilagiinniit anisitaasimapput kanngunartuliorsimagamik Guutimullu tunniulluinnarsimanertik sumiginnarsimallugu. Guutimut attaveqarnerat ima sanngiillisimatigaaq allaat taanna inuuneranni pingaaruteqarunnaarsimalluni. Paulusili ima oqarpoq: ’Guutip qaaqqunngimmatigut minguttooqqulluta, kisianni iluarsiartoqqulluta. Taamaammat narruginnittup inuit pinnagit Guuti narrugaa; taassuma anersaani illernartoq ilissinnut tunniuppaa.’ — 1 Tásalûníkamiut 4:7, 8.

Illit qanoq aalajangerpit?

18. Suna aalajangiussimasariaqarparput?

¹⁸ Jehova Guutimut tunniulluinnarsimanitta pingaaruteqassusia paasisimagutsigu qanoq aalajangersimasariaqarpugut? Aalajangiusimasariaqarparput ileqqutsigut oqaluussinermullu tunngatillugu ilerasuuteqanngittuarnissarput. Peter ima oqaaqqissaarivoq: ’Ilerasuutissaqarnaveersaaritsi, Kristusimi iluartumik saqinissinnik assuarlersut mamarlerneqaatigisassinnik pakatsisinneqaqqullugit.’ (1 Pîtruse 3:16) Imaassinnaavoq kristumiutut ileqqulersuutivut pissutigalugit mitallerneqarlutalu erloqisinneqarumaartugut, Guutimulli uppernini ilumoorninilu pissutigalugit Kristus aamma taama pineqartarsimavoq. Apustili Peter allappoq: ’Kristus taava uinikkut anniarmat, ilississaaq isumaata taamaaqataanik sakkulersorniaritsi (uinikkummi anniartoq ajortulissaararaaq).’ — 1 Pîtruse 4:1.

19. Qanoq oqaatigineqarsinnaasariaqarpugut?

¹⁹ Tunniulluinnarnerput eqqortinniarlugu aalajangersimagutta Satanip silarsuaani, anersaakkut, ileqqussatigut timikkullu napparsimasumi tammartitsiniutinut illersuutigissavarput. Tamannaannaanngilarli, tatigisinnaagatsigu Guutip akuerigaatigut, tamannalu Satanip ikiortaasalu neqeroorutigisinnaasaannit tamanit pitsaanerungaarpoq. Taamaattumik oqaatigineqanngisaannartatoq sallusuissut ilikkaqqaaratsigu asanninnerput soraarussimagipput. Akerlianilli ukiuni hundredelinni siullerni Tyatirami ilagiinniittut oqaatigineqarnerattut oqaatigineqarisatoq: ’Suliatit asannissutsillu uppersutsillu kiffartornitillu nikallujuissutsillu ilisimavakka, suliatillu kingulliit siullernit amerlanerusut.’ (sarĸúmersitat 2:4, 18, 19) Tunniulluinnarsimanerput eqqarsaatigalugu, akunnattunngunngisaannarta, ’anersaakkulli ilungersuaniarta’ naggatissaq tikivillugu — naggatissaq qanimmat. — Rûmamiut 12:11; sarĸúmersitat 3:15, 16. (wE 1/2 01)

[Quppernerup ataani ilanngussaq]

Eqqaamavigit?

• Tunniulluinnarneq qanoq isumaqarpa?

• Guutimut kiffaasut tunniulluinnarsimasut itsaq maannakkullu inuusut kikkut malittariaqarpavut?

• Guutimut kiffartorneq qanoq isigisariaqarparput?

• Guutimut tunniulluinnarsimanerput eqqarsaatigalugu qanoq aalajangertariaqarpugut?

[Atuaqqissaarnermi apeqqutit]

[Qupp. 15-mi assiliartaq]

Jeremias aalajaattuarpoq naak naakkittaatsuliorfigineqaraluarluni

[Qupp. 17-mi assiliartaq]

Ernest Beavor aallussilluarnermigut meeqqaminut maligassiuilluarpoq

[Qupp. 18-mi assiliartaq]

Nalunaajaasut inuusuttut hundredelikkuutaat Spaniami parnaarussivinni assuarnaattuarsimapput

[Qupp. 19-mi assiliartat]

Ullut tamaasa anersaakkut ittunik ajunngitsuliorniarta