Anersaakkut paratiisi suua?

GUSTAVOP, Brasiliami illoqarfeeqqami peroriartorsimasup, meeraanerminiilli ilinniarsimavaa inuit ajunngitsut toqugunik qilaliassasut. * Inuit aalajaatsut siunissami naassaanngitsumik naammalluinnartuullutik nunarsuarmi paratiisimi inuusinnaajumaartut Guutip siunertariagaa naluaa. (Saqqummersitat 21:3, 4) Aamma alla paasisimanngilaa, tassami maannamiit anersaakkut paratiisimiilereersinnaavoq.

Anersaakkut paratiisi taama ittoq illit tusarnikuuiuk? Sunaanersoq ilaassagaannilu suut piumasaqaataanersut nalunngiliuk? Pilluarusuttut tamarmik tamanna ilisimasariaqarpaat.

Anersaakkut paratiisi qanoq nanineqarsinnaasoq

Oqaraanni ullumikkut paratiisimi inuusinnaalereerluni, piviusorsiunngitsutut nipeqarsinnaagunarpoq. Silarsuarmi manna paratiisiunngilluinnarpoq. Amerlavallaat kunngi hebræariusup allagaasa ilumoorneri misigisimavaat: „Tulliutillugit takuakka qunutitaanerit seqernup ataani pisartut. Takuakka qunutitaasut qullii tuppallersarneqanngillallu. Takuakka qunutitsisunit nakuuserfigineqarnerat tuppallersarneqanngillallu.“ (Oqaluussisartup oqaasii 4:1) Inuit millionilikkuutaat naalakkersuisunit, upperisarsiornikkut aningaasaqarnikkullu aaqqissuussinernit peqquserluttunit atuagarliortitaapput, illorraallatsinneqanngillallu ’tuppallersarneqaratilluunniit’. Allarpassuit akiligassatik akilerniarlugit, meeqqatik perorsarniarlugit allarpassuillu naammassiniarsaralugit tamaasalu ataqatigiissinniarlugit akiuuttarput. Inuit taakkua qularnanngitsumik ’tuppallersarneqarusoqaat’, artorsaatiminnut oqilisaalaarsinnaasumik. Taakkununnga tamanut inuuneq paratiiserpalaanngilluinnarpoq.

Anersaakkut paratiisi sumiikkami? Qallunaat oqaasiat „paradis“ grækerit, perserit aamma hebræarit oqaasiannik naggueqarpoq taakkualu tunngavigaat naatsiiviliarsuaq imaluunniit naatsiivik, qasuersaarfik eqqissinartoq. Biibilip neriorsuutigaa nunarsuaq paratiisinnguikkumaartoq, inuiannut naammalluinnartunut angerlarsimaffik naatsiivissuarpalaartoq. (Tussiaat 37:10, 11) Tamakku eqqarsaatigalugit isummersinnaavugut anersaakkut paratiisi tassaasoq avatangiisit tarnitsinnut nuannersut sianiutiginnartullu, tullermillu Guutimillu eqqisseqatiginninnermik nuannaarutiginniffiungaartut. Gustavop paasilersimavaa ullumikkut taama ittumik paratiiseqartoq, inuillu tassaniittut amerliartuinnartut.

Gustavo aqqaneq-marlunnik ukioqarluni aalajangersimavoq katuulisut romalerisutut palasinngorniarluni. Angajoqqaami akuersineratigut palasinngorniat atuarfianni atualerpoq. Tassani nipilersorneq, isiginnaartitsineq, politikkilu, oqaluffeqarfiup inuusuttut pilerisaarniarlugit aallartissimasai, kiserluinnaasa sammilerpai. Nalunngilaa palasip inuiaat iluaqutissaannut inuunini tunniulluinnartariaqaraa katinngisaannartariaqartorlu. Palasilli ilinniartullu ilaat Gustavop nalunngisai kanngunartuliortuupput. Avatanngiisinit taakkunannga sunnerneqarluni Gustavo imerajuttunngorpoq. Erseqqippoq anersaakkut paratiisi suli nanisimanngikkaa.

Ullut ilaanni Gustavop nunarsuarmi paratiisi pillugu naqitaaraq atuarpaa. Taassuma inuunerup siunertaanik eqqarsaatiginnilersippaa. Oqaluttuarpoq: „Akuttunngitsumik Biibilimik atuartalerpunga, paasinaguli. Maluginngilaraluunniit Guuti ateqartoq.“ Palasinngorniat atuarfiat  qimappaa Jehovallu Nalunaajaasuinut saaffiginnilluni Biibilip paasinissaanut ikioqqulluni. Tamatuma kingorna siumukapallappoq inuuninilu Guutimut tunniulluinnarlugu. Gustavop anersaakkut paratiisi ilikkalerpaa.

Inuiaat Guutip aqqanik illersuisut

Gustavop ilikkarpaa Guutip atia, Jehova, Biibilimik atuaqqissaartartup pingaannginnerusutuinnaanngitsoq soqutigisariqaraa. (2 Mosesi 6:3) Pallorfiginninnermut ilumoortumut pingaarnernut ilaavoq. Jiisusip ajoqersukkani qinunissaanik ilinniartippai: ’Ataatarput qilanniittutit, aqqit illernartitaali.’ (Matthæusi 6:9) Ajoqersukkap Jaakup Guutimik nalusut kristumiunngorsimasut eqqaagamigit oqarpoq: ’Guuti Guutimik nalusunik aterminut innuttassarsereersimasoq.’ (Apustilit Suliaat 15:14) Ukiuni hundredelinni siullerni ’aterminut innuttarsarsiai’ tassaapput ilagiit kristumiut. Ullumikkut aamma Guutip aqqanik illersuisoqarpa? Aap, Gustavop paasilerpaa tassaasut Jehovap Nalunaajaasui.

Jehovap Nalunaajaasui nunani sumiiffinnilu 230-ni oqaluussisartuupput. 6 millionit missaanniipput, aamma 8 millionit missaat soqutiginnittuupput ataatsimiinnerinut najuuttartut. Sumiluunniit nalunaajaanertik ilisimaneqaatigaat, taamaalillutillu Jiisusip oqaasii naammassillugit: „Naalagaaffimmillu iivangkiiliu tamanna silarsuarmi tamarmi oqaluussissutigineqassaaq inuiannut tamanut nalujunnaarsillugu taavalu naggatissaq nalliutissaaq.“ (Matthæusi 24:14) Sooq Gustavo isumaqarpa Jehovap nalunaajaasuisa akornanni anersaakkut paratiisi nassaarisimallugu? Oqarpoq: „Silarsuarmi ingammillu palasinngorniat atuarfianni takusannut naleqqiuppakka Jehovap nalunaajaasuini paasisimasakka. Allaassutaanerpaaq tassaavoq Jehovap nalunaajaasuini asaqatigiinneq.“

Aamma allat Jehovap Nalunaajaasui pillugit assingusunik oqaaseqartarput. Arnaq inuusuttoq Miriamimik atilik Brasiliamiu oqarpoq: „Misigissuseq nuannaarneq nalugaluarpara, ilaquttakkaluunniit ilagigaluaraangakkit. Asanninneq ersersinneqartillugu siullerpaamik takuara Jehovap nalunaajaasuini.“ Christian oqarpoq: „Ilaatigooriarlunga anersaarsiorneq sammisarpara, upperisarsiornerli soqutigisarinngivippara. Innuttaaqatigiinni sumi inissisimaneq soqutigineruara ingeniøritullu suliaqarnera. Nuliarali Jehovap nalunaajaasuinik Biibilimik atuaqateqartalermat, allanngornera malugilerpara. Aamma kristumiup arnap pulaartorisartagaata nuannaarnerata aallussineratalu killippaanga.“ Jehovap Nalunaajaasui pillugit sooq inuit taama oqaaseqarpat?

Anersaakkut paratiisi

Jehovap nalunaajaasuisa allaassutaat tassaavoq Biibilimik ilisarsinerminnik qujamasunnerat. Upperaat Biibili ilumoortuusoq, Guutillu oqaaserigaa. Taamaattumik naammagiinnanngilaat upperisaminni ajoqersuutit tungaviunerusut ilisimanissaat. Aalajangersimasumik namminneq atuaqqissaartarput Biibilimillu atuartarlutik. Jehovap Nalunaajasui ilaginerusaraanni, Guuti taassumalu siunertaa pillugit Biibilimi saqqummersinneqartunik ilinnigaqarnerunartarpoq.

Ilisarsinerup tamatuma Jehovap nalunaajaasui inussiaajunnaarsippai allanik nuannaarunnaarsitsisinnasunit soorlu upperisapalaanit eqqarsaatinillu aserornartunit. Jiisusi oqarpoq: „Sallusuissutip inussiaajunnaarsissavaasi,“ aamma Jehovap nalunaajaasuisa tamanna ilumoorluinnartoq paasisimavaat. (Johannesi 8:32) Fernando piffissap ilaatigut anersaarsiortarsimasoq oqarpoq: „Oqiliallannaqaaq inuuneq naassaanngitsoq pillugu ilikkagaqarluni, angajoqqaama uangaluunniit toqunissarput annilaanngassutigiuarsimagakku.“ Sallusuissutip Fernando anersaat silarsuaannit aamma toqusoqartillugu qanoq pisoqartarneranik siooraneranit inussiaajunnaarsippaa.

Biibilimi Guutimut qanimut ilisarsineq paratiisimut atassuserneqarpoq. Pruffiiti Esaja oqarpoq: „Ajortumik iliortoqarnanilu ajoqusiisoqassanngilaq qaqqanni illernartumi, [Jehovamik] ilisarsinerup nuna tamakkerumaarmagu soorlu ermit matoqqagaat immap naqqa.“ — Esaja 11:9.

Ilisarsinerinnaq soorunami naammanngilaq Esajap oqaasii eqquutissappata. Ilinniakkat naapertorlugit iliuuseqartoqartariaqarpoq. Fernando  oqarpoq: „Anersaap inerititai ineriartortikkaanni, anersaakkut paratiisimut tapersiineruvoq.“ Fernando innersuussivoq apustili Paulusip oqaasiinut, pissusermut kristumiup ineriartortitassaanut, tassa ’anersaap inerititaanut’. ’Asanninnertut, nuannaarnertut, eqqissinertut, kamajasuunnginnertut, inussiarnisaarnertut, ajunngitsuunertut, unneqqarissuunertut, qanilaarnertut imminullu naalakkersinnaanertut’ taavai. — Galatiamiut 5:22, 23.

Ilumuunngila inuiaqatigiinni innuttaasut ataasiakkaat pissutsit taamaattut ineriartortinniarlugit ilungersuussisut akornanniikkaanni, soorlu paratiisimiilluni? Anersaakkut paratiisi pruffiiti Sefanjap siulittuutigisaa inunni taamaattuni nassaassaassaaq. Oqarpoq: „Iluaatsuliussanngillat sallussanatillu, oqaatsinik peqquserluutaasunik qanermiugisaqassanngillat; mangiassapput tammaarsimassallutillu ungoorlugit peersinneqassanngillat.“ — Sefanja 3:13.

Asanninnerup pingaaruteqassusia

Immaqa malugisimassavat Paulusi anersaap inerititaanik taaguigami siulliullugu taagaa asanninneq. Biibilimi pissuseq tamanna eqqartorneqartaqaaq. Aap, Jiisusi allaat oqarsimavoq: „Asaqatigiikkussi tamatumuuna paasissavaat ajoqersugarigissi.“ (Johannesi 13:35) Soorunami Jehovap nalunaajaasui naammalluinnartuunngillat. Ilaanni inuttut aaqqiagiinngissuteqarsinnaasarput, soorlu Jiisusip ajoqersugai aamma taamaattarsimasut. Ilumoorlutilli asaqatigiipput, aamma anersaaq illernartumik ikioqqullutik qinusarput asanninneq ineriartortittuaannarsinnaaqqullugu.

Nalissaqanngitsumik peqatigiinnermik kinguneqarpoq. Nagguveqatigiissutsimik saqitsaassuteqarnermit inuiaqatigiissutsimilluunniit pingaartitisivallaartunit avissaartuutsinneqanngillat. Akerlianik 1900-kkut naalernerani Jehovap nalunaajaasui naggueqatiginngisanik nungusaasut aamma inuiaqatiginngisanik toqoraasut akornanniillutik, imminnut illersortarput, inuunertillu allaat navianartorsiortittarlugu. Naak ’inuiaqatigiit immikkut naggueqatigiiusut immikkullu inuiaasut immikkullu oqaaseqaraluarlutik’, ataasioqatigiinneq nuannaarutigaat nammineq misigitinnagu paasiuminaassinnaasoq. — Saqqummersitat 7:9.

Paratiisi Guutip peqqusaanik iliortut akornanni

Anersaakkut paratiisimi piumatussuseq, ileqqorlunneq, namminissarsiornerlu inissaqartinneqassanngillat. Kristumiunulli ajoqersuut imaappoq: „Silarsuarmut matumunnga naleqqussarniaqinasi, allanngoritsili isumassigut nutaanngortitaajuarlusi, sianigileqqullusiuk sunaasoq Guutip piumasaa: ajunngitsoq, iluarinartoq, naammalluinnartoq.“ (Romamiut 12:2) Ileqqorlunnata inuugutta Guutillu peqqusaa maleruarlugu, anersaakkut paratiisimik ineriatortitsiqataassaagut, aamma tamanna nuannaarnissatsinnut ilasaaqataasaaq. Carlap tamanna ilumoortuusoq paasisimavaa. Oqarpoq: „Suleruloornissannik ataatama ilinniartippaanga aningaasatigut namminiilernissannut. Universititimiinnermali arlaatigut toqqissisimatikkaluaraanga, ilaqutariinni ataasioqatigiinneq maqaasivara toqqissisimanermillu taamaattumik ilisarsinerup Guutip oqaasianeersup taamaallaat tunisinnaavaatigut.“

Anersaakkut paratiisip nuannaarutissartaasa soorunami inuunermi ajornartorsiutit tamaasa peersinnaanngilai. Kristumiut suli napparsimalertarput, nunaanni innuttaaqatigiit sorsuutilersinnaapput, amerlasuullu piitsuussuseq  akiorniagassaraat. Kisianni Jehova Guutimut qanimut attaveqalereersimagutta — anersaakkut paratiisimiinnissamut pisariaqartoq — tapersersortigisinnaavarput. Qaaqquaatigut ’nanertuutigisavut imminut tunniuteqqullugit’, amerlasuullu nuannersumik tapersersorneqarsimanerminnik oqaluttuarsimapput, allaat pissutsini ajornerpaani. (Tussiaat 55:23; 86:16, 17) Guuti neriorsuivoq pallorfiginnitsini najortuarniarlugit, aamma ’qooqqukkut toqup taartitaatigugooraluarpata’. (Tussiaat 23:4) Guuti tapersersorniarluta piareersimasoq tatigigutsigu, ikiussavaatigut ’eqqissinerup Guutip piata sianinernit tamanit annerungaartup’ pigiuarnissaanut, eqqissinerlu tamanna anersaakkut paratiisimut matuersaataavoq. — Filippimiut 4:7.

Anersaakkut paratiisimut taperseeqataasinnaavugut

Amerlanerit naatsiiviliarsuaq imaluunniit naatsiivik angalaarfigissallugu nuannarisarpaat, pisuttuarfigalugu, aamma immaqa issiavinnut ingilaarlutik avatangiisit nuannaarutigalugit. Taamatulli amerlasuut Jehovap nalunaajaasui ilagissallugit nuannarisarpaat. Isumaqarput peqatigiinneq nutaannguallaataasartoq, eqqissisimaarfiulluni nukittorsaataallunilu. Naatsiivilli kusanartoq paaqqutarineqartariaqarpoq paratiiserpalaartuaannassaguni. Taamatulli anersaakkut paratiiseqarsinnaavoq maani nunarsuarmi paratiiserpalaanngilluinnartumi Jehovap Nalunaajaasuisa ineriartortimmassuk Guutillu pilluaqqummagit. Uagulli tamatta immikkut qanoq paratiisimut tamatumunnga iluaqutaasumik taperseeqataasinnaavugut?

Pingaarnertut Jehovap nalunaajaasuisa ilagiivisa ilaannukartariaqarpoq, Biibili taakkua ilagalugit atuarlugu ilisarsinerlu Guutip oqaasianeersoq pigiliullugu, anersaakkut paratiisimut tunngaviusoq. Carla oqarpoq: „Anersaakkut nerisassaqanngippat, anersaakkut paratiiseqassanngilaq.“ Taamaattumik Guutip oqaasia akuttoqatigiimmik atuartariaqarpoq atuariikkallu eqqarsaatigisariaqarlutik. Taamatut ilinniaraangatta, Guutimut qanimut attaveqalertarpugut, asalertarlugulu. Aamma qinunikkut qanoq oqaloqatigisinnaanerlugu ilinniartarparput siulersuinissaa anersaavatalu ikiuineratigut peqqusaata naammassinissaa qinnutigalugu. Jiisusi oqarpoq qinujuartariaqartugut. (Lukasi 11:9-13) Apustili Paulusi oqarpoq: „Qinuttuinnaritsi.“ (1 Thessalonikamiut 5:17) Qularutiginagu tusarumaaraatigut Guutimik qinunikkut oqaloqatiginninnerup immikkut pisinnaatitaaffiunera, anersaakkut paratiisimut tunngatillugu pingaartuuvoq.

Piffissaq ingerlatillugu inooriaaseq ilinniakkat naapertorlugit pitsanngoriartuaassaaq, allanullu oqaluusererusulernissaanut piffissanngorumaarluni. Taava Jiisusip peqqussutaata maleruarnissaanut piareersimassaaq: „Taamattaaq qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.“ (Matthæusi 5:16) Nuanneqaaq allanut Jehova Guuti Jiisusi-Kristusilu pillugit ilisarsisitseqataagaanni inunnullu asanninnerminnik takutitsinerat oqaluttuaralugu.

Piffissanngorumaarpoq nunarsuup tamarmi paratiisinngornissaanut — mingutsinneqanngitsoq naatsiivissuartut ittoq, inunnut aalajaatsunut angerlarsimaffissaqqissoq. ’Ulluni atugarliorfiungaartuni’ anersaakkut paratiiseqarnera, Guutip pissaaneqarneranut uppernarsaataavoq qilanaartuutaallunilu siunissami angujumaagaanut naammassiumaagaanullu. — 2 Timotheusi 3:1.

Allaat maannakkut anersaakkut paratiisimik nuannaarutiginnittut, Esaja 49:10-p anersaakkut eqquunnera misigivaat: „Kaalissanatillu qilalissanngillat, kiassuullu seqernullu erloqisissanngilaat nallittuinermini ingerlatissagamigit imermut puilasumut siulersorlugit.“ Josép tamatuma ilumoornera uppernarsarsinnaavaa. Takorloorsimagaluarpaa ilaanni nipilersortartutut tusaamasanngornissani, ilagiilli kristumiut peqatigalugit Guutimut kiffartornermini nalerisimaarnerulersimavoq. Oqarpoq: „Maannakkut siunertaqarluartumik inuuvunga. Kristumiuni qatanngutigiissuarni toqqissisimavunga, Jehovalu ilisarisimalerpara tatigisinnaasatsitut Ataatatut asannittutut.“ Josép nuannaarnera — nuannaarneq millionillit allat aamma anersaakkut paratiisimiittut misigisaat — Tussiaat 64:11-mi allaaserineqarluarsimavoq: „Iluartut [Jehova] tipaatsuutigissavaat taassumanilu qimarnguffissarsiorluni.“ Aap, anersaakkut paratiisi pillugu allaaserilluagaavoq! (wE 1/3 01)

[Quppernerup ataani ilanngussaq]

[Qupp. 31-mi assiliartaq]

Anersaakkut paratiisimiinnerput nuannaarutigiitigalugu, tamatuminnga allileeqataasariaqarpugut