Anersaamut kajungerit inooqqullutit!

’Anersaamut kajungerneq inuussutaavoq.’ — ROMAMIUT 8:6, NV.

1, 2. Biibilimi „uinik“ aamma „anersaaq“ imminnut qanoq sanilliuneqarpat?

SILARSUARMI ajortunngorsimasumi uinngup pilerissusiinik pingaartitsiffiungaartumi Guutip isaani ileqqussatigut minguittuarnissaq imaannaanngilaq. Biibilimili ’uinik’ ’anersaarlu’ imminnut sanilliunneqarput, erseqqissarneqarporlu uinimmut ajortiliusumut naalaannaraanni kingunipilui ilungersunartut taavalu Guutip anersaavanit illernartumit sunnerneqartikkaanni kinguneri qanoq assigiinngitsigisut.

² Assersuutigalugu Jiisusi-Kristusi oqarpoq: „Anersaaq-una inuuneqalersitsisartoq, uinilli iluaqutaanani. Ilissinnut oqaaserisakka tassaapput anersaaq inuussullu.“ (Johannesi 6:63) Apustilillu Paulusip kristumiut Galatiamiut ima allaffigai: „Uinngummi pilerissusiisa Anersaaq assortorpaat, Anersaallu uinik assortorpaa. Akerleriipput piumasassinnik iliorneq sapilersillusi.“ (Galatiamiut 5:17) Paulus aamma allappoq: „Uinimmummi siaruarterisup aserorneq uinimmit katersugariumaarpaa, anersaamulli siaruarterisup anersaamit inuuneq naassaanngitsoq katersugariumaarpaa.“ — Galatiamiut 6:8.

3. Kissaatipilunnit eqqunngitsulioqqajaanitsinnillu aniguisinnaassagutta suna pisariaqarpa?

³ Jehovap anersaavata illernartup — pissaanerata sulissutiginnittup — „uinngup pilerigisai“ minguttuut peerluinnarsinnaavai uinittalu ajortiliusup aserornartumik naalakkersuinera atorunnaarsillugu. (1 Petrusi 2:11) Eqqunngitsulioqqajaanitsinnit inussiaajunnaarsinnaassagutta Guutip anersaavanit ikiorneqartariqarpugut, Paulusi ima allammat: „Uinngup kajungernera toqussutaavoq, Anersaamulli kajungerneq inuussutaallunilu eqqississutaavoq.“ (Romamiut 8:6, NV) Anersaap kajungernera qanoq paasisariaqarpa?

„Anersaamut kajungerneq“

4. „Anersaamut kajungerneq“ qanoq paasisariaqarpa?

⁴ Paulusip „anersaamut kajungerneq“ eqqartoramiuk taggit grækerisooq atorpaa, isumaqartoq ’eqqarsariaaseq, siunertaq, neriugisaq, noqqaaniarneq’. Oqaluut tamatumunnga assingusoq isumaqarpoq ’eqqarsarpoq, aalajangersimasumik isiginnittaaseqarpoq’. Taamaattumik anersaamut atasunik eqqarsaateqarneq isumaqarpoq eqqarsaatit Jehovap pissaaneranit sulissutiginnittumit sunnerneqarlutillu naalakkersorneqartariaqartut. Taamaaliussagutta kajumilluta eqqarsariaaserput, iliuuserisartakkavut neriugisavullu Guutip anersaavanit illernartumit sunnerneqartittariaqarpavut.

5. Anersaaq illernartup sunniineranut qanoq naalatsigitittariaqartigaagut?

⁵ Paulusi oqarami ’Anersaamiittumi kiffalersugut’ uparuuppaatigut anersaap illernartup sunniineranut qanoq naalatsigitittariaqartiginersugut. (Romamiut 7:6) Kristumiut Jiisusip utertitsissutitut pilliutaanut uppernertik  tunngavigalugu ajortip naalakkersuineranit aniguisinneqarput taamaattumillu inussiaasimanerminnit ’toquppullusooq’. (Romamiut 6:2, 11) Assersuutaasumik ’toqugaluarlutik’ suli inuupput, taamaattumillu massakkut ’iluarnermut inussiaataasutut’ Kristusip malinnissaanut kiffaanngissuseqarlutik. — Romamiut 6:18-20.

Allanngornersuaq

6. ’Iluarnermut inussiaataalersut’ qanoq allanngortarpat?

⁶ ’Ajortimut inussiaataanermit’ ’iluarnermut inussiaataalissagaanni’ allanngorluinnartariaqarpoq. Ilaat taama allanngorsimasut pillugit Paulusi allappoq: „Uffarneqarlusili minguiarneqarpusi, illernartitaavusi, iluartuutitaavusi Naalakkap Jiisusi-Kristusip aqqatigut Guutittalu Anersaavatigut.“ — Romamiut 6:17, 18; 1 Korinthimiut 6:11.

7. Sooq assigiinngitsut pillugit Guutitut isiginnittaaseqarneq pingaaruteqarpa?

⁷ Taama malunnartigisumik allanngussagutta Jehovap assigiinngitsunut isiginnittaasia ilinniaqqaartariaqarparput. Tussiaasiortoq Daavi ilungersorluni Guutimut qinuvoq: „Ingerlavigeqqusannik ilinniartinnga, [Jehova] . . . Sallusuissutsikkut ilitsersunnga ajoqersunngalu.“ (Tussiaat 25:4, 5) Jehovap Daavip qinnutaa tusarlugulu akivaa, ullumikkullu aamma kiffaminut taamaaliorsinnaavoq. Uinitta pilerissusiinit minguttuunit pileritsatsinneqarutta Guutip aqqutigeqqusaasa sallusuissusiatalu eqqarsaatiginissaat iluaqutaasorujussuussaaq, Guutimummi atasut tamarmik minguitsuullutillu illernartuupput.

Guutip oqaasia pingaaruteqangaarpoq

8. Sooq Biibili atuarlugulu atuaqqissaartariaqarparput?

⁸ Guutip oqaasia, Biibili, anersaavata sunniinerata kinguneraa. Guutip anersaavata sunnersinnaavaatigut ilaatigut Biibili atuartarutsigu atuaqqissaartarlugulu — ullut tamaasaanerusoq. (1 Korinthimiut 2:10, 11; Efesosimiut 5:18) Isumarput uummaterpullu Biibilip najoqqutassiaanik immertarutsigu saassussinerit anersaakkut qajannarsisitsisinnaasut akiornissaannut iluaqutigissavarput. Aap, kanngunartuliornissamut ussernartorsiulerutta Guutip anersaavata oqaaqqissaarutinik Biibilimeersunik eqqaasissinnaavaatigut Guutip piumasaatut iliorumalluta aalajangernitsinni nakussatsilluta. (Tussiaat 119:1, 2, 99; Johannesi 14:26) Taamaaliorutta eqqunngitsuliortinneqassanngilagut. — 2 Korinthimiut 11:3.

9. Biibilimik atuaqqissaarnerup qanoq Jehovamut ajunngitsumik attaveqartuarnissarput nakussatsissavaa?

⁹ Atuagassiat Biibililersaarutit atorlugit ilumoorluta eqiasuillutalu Biibili atuaqqissartuarutsigu, Guutip anersaava isummatsinnut uummatitsinnullu sunniuteqassaaq Jehovap maleruaqqusaanut ataqqinninnerulersilluta. Jehovamut attaveqarnerput inuunitsinni pingaarnerpaassaaq. Ussernartorsiulerutta akuersiinnarnissaq qanoq nuannertigissanersoq eqqarsaatigissanngilarput. Pingaarnerpaatut eqqarsaatigissavarput Jehovap isaani assuarnaattuarnissarput. Taassumunnga attaveqarnerput pingaartikkutsigu  iliuuserisartakkavut attaveqarnermut tamatumunnga ajoqutaasut tamaasa akiussavavut.

„Ilami inatsisitit nuannareqaakka“

10. Jehovap inatsisaanut naalanneq qanoq anersaamut kajungernermut attuumassuteqarpa?

¹⁰ Anersaamut kajungissagutta Guutip oqaasianit ilisarsineq naammanngilaq. Kunngi Salomop Jehovap inatsisai nalunngilluarpai, utoqqaligamili maleruarunnaarlugit. (1 Kunngit 4:29, 30; 11:1-6) Anersaamut atasut pingaartikkutsigik paasissavarput Biibilimi allassimasoqarneranik ilisimanninneq naammanngitsoq; aamma uummatikkut iluunngarluta Guutip inatsisai naalattariaqarpavut. Taamaaliussagutta peqqissaartumik Jehovap piumasaqaatai misissortariaqarpavut, maleruarnissaallu ilungersuutigalugu. Tussiaasiortoq taamaaliorpoq. Ima erinarsorpoq: „Ilami inatsisitit nuannareqaakka, eqqarsaatinniipput ulloq tamaat.“ (Tussiaat 119:97) Ilumoorluta Guutip inatsisai maleruarusukkutsigik, aamma pissutsit Guutip ilisarnaatigisai ineriartortikkusuppavut. (Efesosimiut 5:1, 2) Eqqunngitsuliorneq kajungerinagu akerlianik anersaap inerititai ineriartortissavavut, Jehovalu nuannaartikkusukkatsigu ’uinngup suliai’ ingalassimassavavut. — Galatiamiut 5:16, 19-23; Tussiaat 15:1, 2.

11. Qanoq nassuiassaviuk Jehovap kanngunartulioqqusinnginnera illersuutigigipput?

¹¹ Qanoq Jehovap inatsisaanut ataqqinninneq nuannarisaqarnerlu ineriartortissinnaavavut? Ilaatigut taamaaliorsinnaavugut iluaqutaassusiat eqqarsaatigalugu. Assersuutigalugu Guutip inatsisaani kanngunartuliorneq allasiornerlu inerteqqutigineqarput, allassimavorlu kinguaassiuutitigut atoqatigiinneq aappariinnerup iluinnaaniissasoq. (Hebræerit 13:4) Inatsit taanna pissutigalugu annaasaqarnerpugut? Ataataq qilammiusoq asannittoq iluaqutigisinnaasatsinnik erliguulluta inatsisiliussanerpa? Soorunami naamik. Jehovap ileqqussatigut najoqqutassiaanik maleruaanngitsorpassuit inuunerat eqqarsaatigiuk. Kissaatiginagu naartulersut amerlasuut naartuersittarput katiaarpallaarlutilluunniit aappariittullu pilluaallutik. Allat kisimiillutik pilersuisunngortarput aappaqaratillu meerartik perorsartariaqarlugu. Aammattaaq kanngunartuliortartut kinguaassiuutitigut tunillaattartumik nappaateqalersinnaasarput. (1 Korinthimiut 6:18) Jehovamullu kiffaasoq kanngunartulioruni misigissutsikkut erloqingaarsinnaavoq. Ilerasuuteqarneq naqisimagaanni ernumangaarlunilu sinissaaruttoqarsinnaavoq. (Tussiaat 32:3, 4; 51:5) Tamatuma takutilluannginnerpaa Jehovap kanngunartulioqqusinnginnera illersuutigigipput? Qularutissaanngilaq ileqqussatigut minguittuarneq iluaqutaasorujussuusoq!

Jehova ikioqqullutit qinnuigiuk

12, 13. Kissaatitsinnit ajortunit atugarliortitaagutta qinunissaq sooq pissusissamisoorpa?

¹² Anersaamut kajungeraanni Guutimut ilungersorluni qinusariaqarpoq. Guutimut ikioqquneq pissusissamisoorpoq, Jiisusi  oqarmat: „Ilissimi . . . qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ (Lukasi 11:13) Qinunikkut eqqaasinnaavarput anersaamit ikiorneqartariaqartugut sanngiissutitta akiornissaannut. (Romamiut 8:26, 27) Paasigutsigu ajortumik kissaateqarluta isiginnittaaseqarlutaluunniit — imaluunniit uppeqatitsinnit isumassuisumit tamatuminnga paasitinneqarutta — sanngiissutip tamatuma qinunikkut immikkut eqqaanissaa ajugaaffiginissaanullu Guutimut ikioqqulluni qinunissaq silatusaarnerussaaq.

¹³ Jehovap ikiorsinnaavaatigut suut naapertuilluartuunersut, suut minguitsuunersut suullu ajunngitsuunersut nersornartuunersullu tamaviaarutiginissaanut. Ilungersorluni Guutip qinnuiginissaa pissusissamisuussaaq, taamaalilluni ’eqqissinerup Guutimit pisup siuneqassusernit tamanit annerungaartup’ uummaterput eqqarsaativullu sernigisinnaavai. (Filippimiut 4:6-8) Taamaattumik Jehova qinnuiginiartigu ikioqqulluta ’iluarnerup, Guutimut tunniusimanerup, uppernerup, asanninnerup, nikallujuinnerup qanilaarnerullu’ noqqaassutiginissaannut. (1 Timotheusi 6:11-14) Ataatatta qilammiusup ikiuineratigut isumakuluutit ussernartullu ima angitigilissanngillat nukissaarulluta. Akerlianik inuunerput Guutimeersumik eqqissisinneqassaaq.

Anersaaq aliasutsinnasiuk

14. Sooq Guutip anersaava pissaanerua minguissutsimik siuarsaasoq?

¹⁴ Jehovamut kiffaasut inersimalluartut Paulusip unnersuussutaa maleruartarpaat: „Anersaaq qamiteqinasiuk.“ (1 Thessalonikamiut 5:19) Guutip anersaava ’anersaamik illernartitsisumik’ taaneqarami minguitsuullunilu illernartuuvoq. (Romamiut 1:4) Anersaaq illernartup sunniineraangatigut illernarsiartorlutalu  minguissiartortarpugut. Minguitsumik inuuneqalersittarpaatigut, inuuneq minguitsoq Guutimut naalannermut ilisarnaataasoq. (1 Petrusi 1:2) Minguttuumik iliuutsit tamarmik Guutip anersaavanik tunuartitsisarput, tamannalu ajunaarutaasinnaavoq. Qanoq?

15, 16. (a) Guutip anersaava qanoq aliasutsissinnaavarput? (b) Jehovap anersaavata aliasutsinnissaa qanoq pinngitsoortinneqarsinnaava?

¹⁵ Paulusi allappoq: „Guutip Anersaava illernartoq aliasutseqinasiuk, taassuminnga naqissusersimavusi ulloq utertitaaffissaq nalliutserlugu.“ (Efesosimiut 4:30) Biibilimi Jehovap anersaava naqitsisitut imaluunniit ’piumaartussanut sallunaveerutaasutut’, kristumiunut tanitanut aalajaatsunut tunniunneqartutut taakkununngalu qilammi toqujuitsutut inuuneqartitsisutut, allaatigineqarpoq. (2 Korinthimiut 1:22, NV; 1 Korinthimiut 15:50-57; Saqqummersitat 2:10) Guutip anersaavata tanitat suleqataallu nunarsuarmi inuunissamik neriugisallit aalajaatsumik inuunissaannut siulersorsinnaavai ikiorlugillu ajortuliunngitsoortissinnaallugit.

¹⁶ Apustili sallunermut, tillinnermut, kanngunartumik ileqqoqarnermut ilaallu ilanngullugit mianersoqqusivoq. Taamaaliornissatsinnut nakkaannarutta Guutip oqaasiani unnersuummut, anersaamit isumassarsiarititaasumut, akerliusumik iliussaagut. (Efesosimiut 4:17-29; 5:1-5) Taamaaliorutta Guutip anersaava ilaatigut aliasutsissinnaavarput, tamannalu kissaatiginngilluinnarparput. Guutip oqaasiani unnersuussineq arlatta sumiginnalerpagu, isiginnittaaseqaleriartuaarsinnaavugut pissuseqaleriartuaarsinnaallutaluunniit piaaraluni ajortuliortitsisumik Guutimillu iluarisaajunnaartitsilluinnartumik. (Hebræerit 6:4-6) Immaqa ingerlaannaq ajortulioqqajaassanngilagut, taamaaliortoorsinnaavugulli. Anersaap siulersuinerata akerlianik iliortuarutta aliasutsissavarput. Aamma anersaaq illernartup pilerfia Jehova assortorlugulu aliasutsissavarput. Guutimik asannittoq taamaaliorusunngisaannarpoq. Taarsiullugu Jehova ikioqqulluta qinnuigaarput anersaava aliasutseqqunagu, aqqali illernartoq ataqqiumallugu. Taamaaliorsinnaavugut anersaamut kajungertuarutta.

Anersaamut kajungertuarit

17. Suut anersaakkut anguniagarineqarsinnaappat, taakkualu sulissutiginissaat sooq silatusaarnerua?

¹⁷ Anersaamut kajungertuassagaanni anersaakkut anguniagaqartariaqarpoq anguniarnissaallu sulissutigalugu. Pisariaqartitavut periarfissavullu naapertorlugit anguniagarisinnaavarput atuaqqissaarnitta pitsaanerunissaa, oqaluusseqataanerunissaq, kiffartornermiluunniit aalajangersimasumik immikkut pisinnaatitaaffeqarnissaq, assersuutigalugu pioneeritut, betelimi kiffartortutut imaluunniit ajoqersuiartortitatut kiffartornissaq. Taamaalilluta isumarput anersaakkut soqutigisanut sammitissinnaavarput inuttullu sanngiissutinut nakkaannarnissaq imaluunniit nunap piinik anguniakkanit kissaatigisanillu Biibilimut akerliusunit pissutsit aaqqissuussaaneranni matumani nalinginnaasunit siulersorneqarnissaq pinngitsoortissinnaavarput. Silatusaarnerpaamik iliuuserisinnaasarput Jiisusip ima kajumissaarutigaa: „Erlinnartuutinik nunami katerseqinasi, tassanimi qillaalaat oquillu aseruisarmata tillinniallu nakuuserlutik illumut iserlutik tillittarmata. Qilammili katersigitsi erlinnartuutinik, tassanimi qillaalaat oquillu aseruissanngimmata, tillinniallu nakuuserlutik illumut iserlutik tillissanngimmata. Uummativimmi erlinnartuutitit najortuartarpai.“ — Matthæusi 6:19-21.

18. Sooq maanna ulluni kingullerni makkunani anersaamut kajungertuarnissaq pingaaruteqarpa?

 ¹⁸ ’Ulluni kingullerni’ makkunani anersaamut kajungerneq kissaatillu silamiorpaluttut tunuartinnissaat silatusaarnerpaapput. (2 Timotheusi 3:1-5) „Silarsuaq piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:15-17) Assersuutigalugu kristumiut inuusuttut piffissaq tamaat kiffartornissartik anguniagarigunikku anguniagaq tamanna inuusuttuunerup ukiuini ajornartorsiuteqarfiusuni iluaqutigisinnaavaat. Eqqortuusup akerlianut akuersiinnartinniarneqarunik, Jehovamut kiffartornerminni anguniagarerusutatik eqqaamasinnaavaat. Inuttut anersaakkut ittunik pingaartitsisuugamik, nunap piinik pissarsiniarneq ajortilluunniit neriorsuutigisaanik inuulluataarneq anersaakkut ittut anguniakkamik akiginissaat silatusaannginnertut, aap sianiilliornertut, isigissavaat. Mosesi eqqarsaatigiuk, taassuma ’Guutip innuttai naallioqatigiumanerungaarmagit sivikitsuinnarmik ajortimi inuulluataarnissaminngarnit’. (Hebræerit 11:24, 25) Inuusuttuugutta utoqqaaguttaluunniit taassumatut aalajangiissaagut anersaamut kajungertuarutta uinillu ajortiliusoq kajungerinagu.

19. Anersaamut kajungerneq qanoq iluaqutigissavarput?

¹⁹ „Uinimmut kajungerneq Guutimut akerartuutaavoq,“ kisianni „anersaamut kajungerneq inuussutaallunilu eqqississutaavoq.“ (Romamiut 8:6, 7, NV) Anersaaq kajungeriuarutsigu eqqissineq nuannerluinnartoq misigissavarput. Uummaterput isumarpullu ajortiliunitta sunniineranut illersorneqarnerussapput. Guutip inatsisaasa unioqqutinnissaannut ussernartorsiornerit akiorluarnerusinnaavavut. Uinngullu anersaallu akiuuttuarneranni Guutip ikiussavaatigut ajugaanissatsinnut.

20. Qanoq qulakkeersinnaavarput uinngup anersaallu akiuunneranni ajugaasinnaasugut?

²⁰ Anersaamut kajungertuarnitsigut Jehovamut, inuunerup anersaaq illernartullu pilerfianut, inuunermut pingaarutilimmik attaveqartuarsinnaavugut. (Tussiaat 36:10; 51:13) Saatani Diaavulu kiffaalu sapinngisaminnik iliuuseqarsinnaapput Jehova Guutimut attaveqarnerput aserorniarlugu. Isumarput naalagaaffiginiaraluarpaat, nalunnginnamikku nakkaannarutta naggataatigut Guutimut akeranngussasugut toqussasugullu. Uinngulli anersaallu akiuunneranni ajugaasinnaavugut. Paulusip tamanna nalunngilaa, nammineq akiuunnini allaatigigamiuk ima apereqqaarpoq: „Kia kiffaajunnaarsissavaanga timimit matumannga toqup pianit?“ Akilluni takutippaa aniguisoqarsinnaasoq: „Guutili qujanarsili Jiisusi-Kristusikkut Naalakkatsigut!“ (Romamiut 7:21-25) Uaguttaaq Guuti qutsavigisinnaavarput Kristusikkut inuttut sanngiissutsit ajugaaffiginissaannut periarfissimmatigut, anersaamut kajungertuarnitsigut taamaalillutalu inuunermik naassaanngitsumik neriugisaqartuartilluta. — Romamiut 6:23. (wE 15/3 01)

Eqqaamavigit?

• Anersaamut kajungerneq qanoq paasisariaqarpa?

• Jehovap anersaavanit qanoq sunnertissinnaavugut?

• Nassuiaruk ajortip akiornissaanut Biibilip atuaqqissaarnera, Jehovap inatsisaasa maleruarnerat Jehovallu qinnuigisarnera sooq pingaaruteqarnersut.

• Anersaakkut anguniagaqarnitta qanoq inuunerup aqqutaaniitiinnarsinnaavaatigut?

[Atuaqqissaarnermi apeqqutit]

[Qupp. 15-mi assiliartaq]

Biibilip atuarnera atuaqqissaarneralu saassussinerit anersaakkut sanngiillisitsisinnaasut akiornissaannut iluaqutigisinnaavavut

[Qupp. 16-mi assiliartaq]

Ajortulioqqajaanerit ajugaaffiginiarlugit Jehovamut ikioqqulluni qinuneq pissusissamisoorpoq

[Qupp. 17-mi assiliartaq]

Anersaakkut anguniagaqarneq anersaamut kajungertuarnissamut iluaqutigisinnaavarput