Inuttut sanngiissuseq ajugaaffigisinnaavarput

„Uinngup kajungernera toqussutaavoq.“ — ROMAMIUT 8:6.

1. Ilaasa inuup timaa qanoq isigisarpaat, apeqqutillu suut eqqarsaatigisariaqarpavut?

„QUTSAVIGISSAVAKKIT pinngortitaagama tupinnangaartumik.“ (Tussiaat 139:14) Tussiaasiortoq David taama erinarsorpoq Jehovap pinngortitaasa ilaat eqqarsaatigalugu — inuup timaa. Taamatut unnersiutiginninnatik upperisarsiornikkut ajoqersuisartut ilaasa timi ajortip isertorfiatut atortuatullu isumaqarfigaat. Inuup timaa taaneqarpoq ’nalusuunerup atisai’, ’ileqqupiluit aallaaviat’, ’ajortunngorsimanerup kalunneri’, ’ajussutsip parnaarussivia’, ’toqu uumasoq’, ’timi uumagaluarluni toqungasoq’, aamma ’iliveq angalaartoq’. Ilumoorpoq apustili Paulus oqarsimammat: „Nalunngilara . . . uininni ajunngitsoqanngitsoq.“ (Romamiut 7:18) Tamannali isumaqarpa neriuutissaqarata timimi ajortiliusumi parnaarussaaqqasutut ittugut?

2. (a) „Uinngup kajungernera“ qanoq paasisariaqarpa? (b) Guutip piumasaatut iliorusuttut iluanni uinngup anersaallu akornanni qanoq sorsuuttoqarpa?

² Biibilimi oqaaseq ’uinik’ inuup timaanut naammalluinnanngitsumut atorneqarajuppoq, tassa inummut Adamip pikitsitsisimasup kinguaavanut naammalluinnanngitsumut ajortiliusumullu. (Efesosimiut 2:3; Tussiaat 51:7; Romamiut 5:12) Adamimit kingornussaq tamanna pissutigalugu ’inuuvugut qajannartut’. (Romamiut 6:19) Paulusi mianersoqqusilluni oqarpoq: „Uinngup kajungernera toqussutaavoq.“ (Romamiut 8:6) „Uinngup kajungernera“ tassa uinngup ajortiliusup kissaatipilui, taakkunanngalu naalakkersorneqarsinnaavugut. (1 Johannesi 2:16) Guutip piumasaatut iliorniarutta anersaaq pigisarput uinippullu naammalluinnanngitsoq  ajortiliusorlu ’uinngup suliaanik’ kajungerisaqartuartoq, ilutsinni imminnut sorsuupput. (Galatiamiut 5:17-23; 1 Petrusi 2:11) Paulusip ilumini erloqinartumik sorsuuttoqarnera allaatigereeramiuk nangilluni allappoq: „Uangannguakuluk! Kia kiffaajunnaarsissavaanga timimit matumannga toqup pianit?“ (Romamiut 7:24) Paulusi ussernartunut akiuussinnaanani tunniutiinnartariaqarpa? Biibilip takutippaa taamaanngilluinnartoq!

Ussernartut ajortilu piviusuupput

3. Amerlasuut ajorti ussernartullu qanoq isigisarpaat, Biibilimili isiginnittaatsimut taama ittumut qanoq mianersoqqussuteqarpa?

³ Ullumikkut inuppassuit ajorteqarnera akuerisinnaanngilaat. Ilaasa oqaaseq quianartutut inuit sanngiissutaattut minnerusut itsarpalaartutut atortarpaat. Upperinngilaat ’tamatta Kristusip eqqartuussivianut sassartitaajumaartugut, inuit ataasiakkaat pineqarumaarmata inuunermi maani naammassisatik ajortut ajunngitsulluunniit naapertorlugit’. (2 Korinthimiut 5:10) Immaqa allat qungujullutik oqartarput: „Suut tamaasa sapinngilakka, ussernartut kisiisa pinnagit!“ Kulturit ilaanni inuit kissaatigisamik ingerlaannaq matussutissinneqartarnerat sungiusimavaat. Nerisassat, atoqatigiinneq, aliikkutassiat angusaqarnerlu pillugit taamaappoq. Suut tamaasa pigerusuinnaanngilaat, maannakkorpiarli perusuppaat! (Lukas 15:12) Nuannaarniutit maanna pineqarsinnaasut kisiisa eqqarsaatigaat, nuannaarutaajumaartullu ’inuunivimmut’ atasut eqqarsaatiginagit. (1 Timotheusi 6:19) Biibilimili paasitinneqarpugut eqqarsaatiginneqqissaartoqartariaqartoq siumullu isigisaqartariaqartoq, anersaakkut allatigullu ajoqusiisinnaasut tamaasa pinngitsoortinniarlugit. Ussatit ilaat isumassarsiarititaasoq imaappoq: „Silatuup perlussaq takusarpaa qimarnguffissarsiortarlunilu, misilittagakitsorli ingerlaqqittarpoq akiliisariaqartarlunilu.“ — Ussatit 27:12.

4. 1 Korinthimiut 10:12, 13-imi Paulusi qanoq mianersoqqusiva?

⁴ Paulusi kristumiunut Korinthimiittunut — illoqarfimmi ileqqussatigut ajortunngorsimanerminik ilisimaneqartumi najugaqartut — allakkami ussernartunut ajortillu pissaaneranut piviusorsiortumik mianersoqquai. Ima allappoq: „Kinaluunniit patajaatsuusorisoq mianersorli orloqqunani. Usserneqaatigisimasasi inuit atortagaattut iinnarput, Guutilu unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ (1 Korinthimiut 10:12, 13) Tamatta, inuusuttut utoqqaallu, angutit arnallu, assigiinngitsorpassuarnik usserneqartarpugut — atuarfimmi, suliffimmi allaniluunniit. Taamaattumik Paulusip oqaasii misissorneruniartigik paasiniarlugu uatsinnut qanoq pingaaruteqarnersut.

Imminut tatigivallaarnak

5. Sooq imminut tatigineq navianartuua?

⁵ Paulusi allappoq: „Kinaluunniit patajaatsuusorisoq mianersorli orloqqunani.“ Ileqqussatigut nukittusorivallaarneq navianarpoq. Taamaaliortup ajortip suunera pissaaneralu nalugunarpai. Moses, David, Salomon apustili Peterilu tamarmik ajortuliorsimammata, pissutissaqarnerpugut isumaqassalluta eqqorneqarsinnaanata? (4 Moses 20:2-13; 2 Samuel 11:1-27; 1 Kunngit 11:1-6; Matthæusi 26:69-75) „Ilisimasup ajortoq siooragalugulu ingalassimasarpaa, sianiitsorli eqqarsaqqaarnani periataartarpoq aarlerissutissaqanngitsutullu misigisimasarluni,“ Ussatit 14:16-imi allassimavoq.  Jesusilu oqarpoq: „Eqqumagitsi, qinugitsilu usserneqaqqunasi. Anersaaq kajumikkaluarpoq, uinilli qajannarpoq.“ (Matthæusi 26:41) Inummik naammalluinnanngitsumik ussernartunut navianartunut killissaanngitsoqanngimmat Paulusip mianersoqqussutaa ilumoorutariaqarparput ussernartullu assortorlugit. Taamaaliunngikkutta ajortuliussaagut. — Jeremia 17:9.

6. Qaqugukkut qanorlu usserneqarnissatsinnut piareersartariaqarpugut?

⁶ Ajornartorsiutit tassanngaannaq ilimagineqaratillu takkussinnaasut piareersimaffiginissaat silatusaarneruvoq. Kunngi Asap nalunngilaa eqqissineqartillugu pallittaalisaliornissamut piffissaasoq. (2 Nalunaarsuutit 14:1, 5, 6) Nalunngilaa saassunneqalereerluni piareersarnissaq kingusippallaassasoq. Tamatumunnga assingusumik pitsaanerussaaq eqqissisimatilluni eqqarsarsinnaatillunilu usserneqaraanni qanoq qisuariassanerluni siumut aalajangereeraanni. (Tussiaat 63:7) Danielip ikinngutaasalu Guutimik mianerinnittut kunngip pitsaasunik nerisassaataanik neqeroorfigineqartinnatik aalajangerpaat Jehovap inatsisai naalakkumallugit. Taamaattumik nangaanatik aalajangernertik aalajangiussimavaat nerisassallu minguttuut attornagit. (Danieli 1:8) Ileqqorissaarnikkut minguittuarnissarput aalajangerniartigu usserneqartinnata. Taava ajorti assortorsinnaassavarput.

7. Sooq tuppallersaatigisinnaavarput nalunagu allat usserneqarneq akiortorsimagaat?

⁷ Paulusip oqaasii tuppallersaatigingaarsinnaavavut: „Usserneqaatigisimasasi inuit atortagaattut iinnarput.“ (1 Korinthimiut 10:13) Apustili Petrusi allappoq: „[Diaavulu] uppernikkut aalajaallusi assortorsiuk, ilisimavarsimi qatanngutisi silarsuarmiittut taamaattuttaaq atugarliortitaasartut.“ (1 Petrusi 5:9) Aap, allat assingusunik usserneqartarsimapput Guutillu ikiuineratigut akiuuttarsimallutik. Uaguttaaq taamaaliorsinnaavugut. Kristumiutulli ilumoortutut silarsuarmi ajortunngorsimasumi inuugatta, tamatta qaquguluunniit usserneqarnissarput ilimagisinnaavarput. Qanorli taava inuttut sanngiissuseq ajortuliornissamullu usserneqarneq ajugaaffigisinnaavavut?

Ussernartut akiorsinnaavavut!

8. Usserneqarnerit ingalassimaniarlugit pingaarnerpaamik qanoq iliortariaqarpugut?

⁸ „Ajortimut inussiaajunnaaqqulluta“ pingaarnerpaamik ussernartut ingalassimasariaqarpavut. (Romamiut 6:6) Ussatit 4:14,  15-imi ima kajumissaarneqarpugut: „Iluaatsut aqqusininnguat ingerlavigeqinasiuk ajortullu aqqutaat atuallannagu. Ingalassimaniarsiuk, ingerlavigeqinasiuk, sangugit qimallugu ingerlaqqillutillu.“ Nalunngikkajupparput pissutsit aalajangersimasut ajortuliornermik kinguneqaannartartut. Taamaattumik paasinarpoq kristumiut ’ingerlaqqittariaqartut’ suullu tamaasa kissaatipiloqalersitsisinnaasut minguttuunillu pilerissuseqalersitsisinnaasut qanillinaveersaarlugit.

9. Biibilimi qanoq erseqqissarneqarpa ussernartuusinnaasunit nigorsimannittariaqarnerput?

⁹ Usserneqarneq akerlilerniarlugu iliuusissaq alla pingaartoq tassaavoq ussernartuusinnaasunit nigorsimanninnissaq. Paulusi ima siunnersuivoq: „Kinguaassiuutitigut inuunerlunneq nigorsimaniarsiuk!“ (1 Korinthimiut 6:18) Aamma allappoq: „Guutipilussiorneq qimarratiginiarsiuk.“ (1 Korinthimiut 10:14) Apustilip Timotheusi kajumissaarpaa aningaaserituujuneq ’inuusuttullu kajungerisaat’ ingalassimaqqullugit. — 2 Timotheusi 2:22; 1 Timotheusi 6:9-11.

10. Pisimasut assigiinngitsut marluk suut ussernartumit qimaanerup pingaaruteqassusia takutippaat?

¹⁰ Assersuutigalugu taaneqarsinnaavoq Israelimi kunngi Daavi. Illussaarsuami qaavanit takuleramiuk arnaq pinnersoq uffartoq uummatimini eqqunngitsumik pilerissuseqalerpoq. Illup qaavanit atertariaqaraluarpoq ussernartumillu qimaasariaqaraluarluni. Akerlianilli arnap — Batsebap — kinaanera paasiniartippaa, ajorluinnartumik kingunilimmik. (2 Samueli 11:1–12:23) Tamatumunnga akerliusoq eqqaasinnaavarput, Josefi, naalakkami nuliata kanngunartuliorfiginiarmani allaanerulluinnartumik iliuuseqartoq. Ima oqaluttuarineqarpoq: „Naak Potifarip nulia ullut tamaasa arneriffigeqqusaraluartoq Josefip akueriumanngilaa arneriffigiumanagulu.“ Mosesip inatsisaanik peqanngikkaluarluni Josefip ima akivaa: „Qanoq taama kanngunartigisumik iliussaanga Guutimut ajortuliorlunga?“ Ullut ilaanni Potifarip nuliata tiguaa oqarlunilu: „Innaatinnga!“ Josefi tunngavilersuiniaraluarluni uninngaannarpa? Naamik. „Qimaalluni anivoq.“ Josefip kinguaassiuutitigut ussernartup nakkaannarfiginissaa periarfissinngilaa. Qimaavoq! — 1 Moses 39:7-16.

11. Ussernartorsiortinneqartuarutta immaqa qanoq iliorsinnaavugut?

¹¹ Ilaat isumaqassapput qimaaneq qunutussutsimut ersiutaasoq, amerlanertigulli silatusaarnerussarpoq navianartumit qimagulluinnarnissaq. Immaqa suliffimmi ussernartorsiortinneqartuarpugut. Immaqa allamik suliffittaarsinnaanngilagut, ussernartorli allatut anigorsinnaavarput. Nalunngikkutsigu aalajangersimasoq eqqunngitsuliornerusoq qimattariaqarparput, eqqortuliuinnarniarlutalu aalajangertariaqarluta. (Amosi 5:15) Ussernartumit qimaaneq aamma isumaqarsinnaavoq Internettimi tiingasulersaarutit aliikkusersuisarfiilluunniit pasinakujuttut qanillinaveersaarnissaat. Isumaqarsinnaavortaaq atuagassiamik igitsisariaqartugut allanilluunniit ikinngutissarsiortariaqartugut — Guutimik asannittunik immaqalu ikiortigisinnaasatsinnik. (Ussatit 13:20) Ussernartup suulluunniit qimarratiginissaa silatusaarnerussaaq. — Romamiut 12:9.

Qinuneq qanoq iluaqutaasinnaasoq

12. Oqaraangatta: „Ussernartumut pisinnata,“ Guuti sumik qinnuigisarparput?

¹² Paulusi kajumissinartumik ima isumalluarsaarivoq: „Guuti unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu  aniguiffissaq pilersissavaa artorsartitaaqqunasi.“ (1 Korinthimiut 10:13) Ilaatigut Jehovap ikiortarpaatigut ussernartut akiorsinnaaqqullugit qinnutivut akillugit. Jiisusip ilinniartippaatigut ima qinoqqulluta: „Ussernartumut pisinnata, ajortumilli annaatsigut.“ (Matthæusi 6:13) Qinnut qamannga pisoq taamaattoq akillugu Jehovap ussernartorsiortiinnassanngilaatigut; Saatanimit qoqasiiniarnerinillu aniguisissavaatigut. (Efesosimiut 6:11) Guuti ikioqqulluta qinnuigisariaqarparput ussernartut takusinnaaqqullugit akiornissaannullu nukissaqarteqqulluta. Ussernartumut nakkaannannginnissatsinnik ilungersorluta qinnuigigutsigu ikiussavaatigut Saatanimit, ajortumit, nakutinneqaqqunata.

13. Sivisuumik ussernartorsiorutta qanoq iliortariaqarpugut?

¹³ Ingammik sivisuumik ussernartorsiortitaagaangatta ilungersorluta qinusariaqarpugut. Ussernartut ilaat pissutigalugit ilutsinni akiuuttoqartarpoq eqqarsaatinik isummanillu, qanoq qajannartigisugut eqqaasinneqartarluta. (Tussiaat 51:7) Assersuutigalugu qanoq iliussaagut eqqunngitsuliarisimasarput pissutigalugu ilerasuuteqarutta? Taamaalioqqinnissatsinnut ussernartorsiorutta qanoq iliorsinnaavugut? Misigissuserput naqissimaannarnagu tamanna qinunikkut Jehovamut saqqummiuttariaqarparput — pisariaqarpat arlaleriarluta. (Tussiaat 55:23) Oqaatsimi pissaanera anersaanilu illernartoq atorlugit ikiorsinnaavaatigut isumatta eqqunngitsulioqqajaaneranit minguiarnissaanut. — Tussiaat 19:9, 10.

14. Sooq ussernartut akiorsinnaajumallugit qinuneq pisariaqarpa?

¹⁴ Jiisusip Getsemanep Naatsiiviani apustilini qanoq uernartigisut takugamigit oqarpoq: „Eqqumagitsi, qinugitsilu usserneqaqqunasi. Anersaaq kajumikkaluarpoq, uinilli qajannarpoq.“ (Matthæusi 26:41) Ussernartorsiorneq ilaatigut ajugaaffigineqarsinnaavoq ussernartutut isikkoqarsinnaasut assigiinngitsut navianaataalu malunnanngitsuusaartut eqqumaffigigaanni. Aamma ussernartorsiorneq eqqarsaatigalugu ingalaannaq qinuneq pingaaruteqarpoq, akiornissaanut anersaakkut piareersassagatta. Ussernartut akiuussinnaannginnerpaaffitsinni eqqortarmatigut nammineq akiorsinnaanngilavut. Qinusariaqarpugut pissaanerup Guutimeersup Saatani akiorniarlugu illersornissatsinnut nakussatsissinnaammatigut. (Filippimiut 4:6, 7) Immaqa aamma ’ilagiinni utoqqaanertanit’ anersaakkut ikiorneqarnissarput qinnunneqarnissarpullu pisariaqartippavut. — Jaaku 5:13-18.

Ussernartut akiukkit

15. Ussernartut akiorniarlugit qanoq iliortariaqarpugut?

¹⁵ Ussernartoq akiorsinnaassagutsigu tamatuma saniatigut akiorlugu iliuuseqartariaqarpugut ussernartup peerunnissaata tungaanut pissutsilluunniit allanngornissaasa tungaannut. Jiisusi Saatanimit usserneqarami ussernartoq akiorpaa Diiavulup qimagunnissaata tungaanut. (Matthæusi 4:1-11) Ajoqersugaq Jaaku allappoq: „Diaavulu akerartorsiuk, taava ilissinnit qimaassaaq.“ (Jaaku 4:7) Ussernartut akiorsinnaassagutsigik aallarniutigalugu Guutip oqaasianik isumarput nakussatsittariaqarparput taassumalu najoqqutassiai aalajangiusimaniarlugit aalajangerluta. Iluaqutaassaaq allassimaffiit sanngiissut akiugarput pillugit allassimasut sammisarutsigit, eqqaamaniartarlugillu eqqarsaatigeqqissaarutsigik. Aamma pitsaassaaq kristumiu inersimalluartoq — immaqa utoqqaanertaq — ussernartorsioraanni tatigalugu saaffiginissaa oqaloqatiginissaalu. — Ussatit 22:17.

16. Qanoq ileqqussatigut assuarnaattuarsinnaavugut?

 ¹⁶ Biibilimi kajumissaarneqarpugut ’inummik nutaamik’ atisinissatsinnut. (Efesosimiut 4:24) Ima paasisariaqarpoq Jehovamit ilusilersorneqarlutalu allanngortinneqartariaqartugut. Suleqatini Timotheusi Paulusip ima allaffigaa: ’Noqqaassutiginiakkit iluarneq, Guutimik mianerinninneq, upperneq, asanninneq, nikallujuinneq qanilaarnerlu. Uppertutut sorsunniarit ajunngitsoq sorsuutigalugu, pigilerniaruk inuuneq naassaanngitsoq, tamatumunnga qaaqquneqarsimagavit.’ (1 Timotheusi 6:11, 12) ’Iluarneq’ imaluunniit naapertuilluarneq noqqaassutigisinnaavarput Guutip oqaasianik eqiasuilluta atuaqqissaarnitsigut taassuma pissusiisa iluamik ilinniarnissaat anguniagaralugu taavalu piumasaanut naapertuuttumik inuulluta. Aamma kristumiutut suliassat, soorlu nutaarsiassamik nuannersumik oqaluussissutiginninneq ataa tsimiigiartarnerlu, aallulluinnartariaqarpavut. Guutimut qanillineq taassumalu anersaakkut pilersitaanik iluaqutiginninneq anersakkut ineriartornitsinnut iluaqutigissavarput ileqqussatigullu assuarnaattuarsinnaalluta. — Jaaku 4:8.

17. Qanoq nalunngilarput Guutip ussernartorsiorutta imminiiginnassanngikkaatigut?

¹⁷ Paulusip neriorsoqqissarpaatigut Guutip ikiuineratigut artukkatsinnik usserneqarnavianngitsugut. Jehovap ’usserneqarnermut ilagitillugu aniguiffissaq pilersissavaa artorsartitaaqqunata’. (1 Korinthimiut 10:13) Aap, tatigiuarutsigu Guutip akuerissanngilaa ussernartoq ima ingasatsigissasoq assuarnaatsuujuarnissatsinnut anersaakkut naammattumik nukissaarulluta. Kissaatigaa eqqunngitsuliornermut isiginnittaatsimisut ussernartup akiornera iluatsissinnaassagipput. Aamma ima neriorsuivoq: „Iperassanngilakkit imminiiginnassanallu.“ — Hebræerit 13:5.

18. Qanoq qularinngissinnaavarput inuttut sanngiissuseq ajugaaffigisinnaallugu?

¹⁸ Paulusip qularinngilaa nammineq inuttut sanngiissumminut akiuunnini qanoq kinguneqassasoq. uinimmi pilerissusiinut pilliutitut imminut isiginngilaq nammineq ikiortissaarullunilu uinimmi pilerissusii ajugaaffigisinnaanagit. Naamik, akerlianik oqarpoq: „Taamaattumik uanga arpappunga maangaannaq pinnanga, tilluuttartutullu silaannarmut tillueriartutut inngilanga. Timiga peqqarniisaarfigaara naalatsillugulu pinngitsaalillugu allanut oqaluussisartunga narrugisaaqqunanga.“ (1 Korinthimiut 9:26, 27) Uaguttaaq uinimmut naammalluinnanngitsumut akiuunnermi ajugaasinnaavugut. Biibili, atuagassiat Biibililersaarutit, kristumiut ataatsimiinneri uppeqativullu inersimalluartut aqqutigalugit Ataatatta asannittup qilammiusup tamatigut eqqortuliorsinnaanissatsinnut unnersuuttuarpaatigut. Taassuma ikiuineratigut inuttut sanngiissuseq ajugaaffigisinnaavarput! (wE 15/3 01)

Uku eqqaamavigit?

• „Uinngup kajungernera“ qanoq paasisariaqarpa?

• Qanoq ililluta ussernartut akiornissaannut piareersaasinnaavugut?

• Ussernartoq qanoq ajugaaffigineqarsinnaava?

• Ussernartut eqqarsaatigalugit qinuneq qanoq pingaaruteqarpa?

• Qanoq nalunngissinnaavarput inuttut sanngiissuseq ajugaaffigineqarsinnaasoq?

[Atuaqqissaarnermi apeqqutit]

[Qupp. 8-mi assiliartat]

Biibilimi ajoqesuutigineqanngilaq uinitta pilerissusiinut ikiorneqarsinnaanngitsutut pilliutaasugut?

[Qupp. 10-mi assiliartaq]

Ussernartumit qimaanitsigut ajortuliorneq pinngitsoorneqarsinnaavoq